ꆈꇷꉼꏸꁱꌠ

　　ꆈꌠꌺꇖꇫꐥꌠꆹ,ꊿꌦꇬꑌꀈꈬꉙ,ꊿꀘꇬꑌꀈꈬꉙꑵ,ꑠꉬꑴꇬ,ꉙꄟꆏꐯꀋꌡ。ꊿꌦꇬꆏꀈꈬꇖꊱꉙꑟꃅ,ꂴꊱꌠꆏ “ꂿꋩ”,ꊁꊱꌠꆏ“ꒌꂘ”,ꋌꊂꊱꌠꆏ“ꈜꂘ”,ꄽꂫꊱꌠꆏ “ꒌꈎ”。ꂿꋩꊱꌠꌋꆀꒌꂘꊱꌠꆏꌺꋊꌺꃤꏣꑟꃶꌐꈀꄸꑌꉙꑵ,ꊁꑍꊱꌠꆏꀘꂾꌋꆀꌺꋊꌺꃤꌧꂿꑠꌠꁳꂘꎻꑵ。ꈜꂘꇬꆏ,ꐈꆀꈬꉻꈀꄸꑌꂱꑱꈛꅉꈴꄉꂘꅸꆦꀑꒈꇤꏓ,ꂘꅸꃅꑐꇳꇐꈴ,ꂚꇇꒉꐑꈴ,ꌅꋦꁍꃴꈴ,ꇓꑴꅲꐬꑟ。ꇓꑴꅲꐬꄉꂘꅸꂿꃄꁍꈬꑟ,ꂿꃄꁍꈬꄉꂘꅸꂿꃄꇳꇐꎭ。ꇢꊭꇬꃄꂓꀄꊭꈧꌠꆏꂱꑱꇱꄉꂘ。ꈜꂘꌐꈭꐨꆏꇓꑴꅲꐬꄉꒌꈎꅸꉇꇁ,ꂴꇿꈴꆏꈎꅸꇿꈴꆺꑳꏂꃴꑟ,ꑷꈓꃌꅇꄜꇁꃲ,ꇢꇑꌺꅇꄜꇁꃲꄷꑲꆀꌐ。ꉙꌐꈭꐨꆏꉩꑵꉬ。

　　ꊿꀘꅈꉙꌠꆏꆀꃅꁧꀦꉙ,ꏃꇂꊇꄮꉆꋏꌺꒆꀿꀋꂿꇈꀿꃼꀿꎹꆹꌠꃆꂮꉙꑵꉬꄷ。

　　ꄚꐰꆏꑞꋯꇁꄿ、ꇈꃅꇁꄿ、ꁉꉘꇁꄿꉙꅈꏓꁱꄉꌠꄻꉜꐋꊈꀨꂿ,ꏓꁱꌊꆹꑽꌠꌋꆀꀋꊒꌠꆏꄯꒉꁱꌊꉢꁳꇁ,ꉢꉈꑴꄺꀱꁰꀱꂿ!

　　ꋍ. ꀿꃀꋩꈽꀈꈬꉙꅇ

　　ꑱ……ꀈꈬ,ꉙꈜꑌ,ꀈꈬꂸꄜꅇꀨꋉꂸꌒ,ꉙꈜꂸꋯꅇꆦꀠꂸꊌ,ꈁꋩꈁꈿꆺꑳꀉꁌ(ꂵ)ꋩ。ꆺꑳꀉꁌ(ꂵ)ꑌ,ꂴꆹꋍꑍꆏ,ꉘꏂꉘꁁꆅ,ꋚꌗꒉꌗꉬꎼꈀ;ꊁꇁꋍꑍꆏ,ꉘꁁꆅꁁꆅ,ꎯꂚꄔꏿꉬꎼꈀ;ꊁꇁꋍꑍꆏ,ꎸꀕꈷꀕꆅ,ꈿꈐꈿꉈꉬꎼꈀ,ꑞꑌꂸꉬꃲ。ꈌꌋꈌꊂꇁꅊꇈ,ꀋꃀꌺꊂꇁꅊꇈ,ꃅꌋꃅꊂꇁꅊꇈ,ꋍꀿꋋꇴꇁꅊꇈ,ꋍꃀꋋꇴꇁꅊꇈ,ꀿꐊꎭꁻꎭꏿꁧꅊꇈ,ꃀꐊꑱꍹꐞꄜꁧꅊꇈ。

　　ꏃꃅꉬꐮꆏ,ꁦꀑꉐꆈꌹꋒꆹ,ꏃꃅꉬꉎꏭꅇꇁꉐꄜꁧ。ꏃꃅꉬꉎꏭ,ꐱꐎꐱꆉꌕꇷꄵ,ꋍꇷꊰꇁꑳꉎꌩꄹꌸ ,ꌩꄹꈺꑌꁧꂸꅲ,ꄹꑌꒉꂸꅲ。ꋍꇷꊰꇁꑳꐮꇓꆈꌸ,ꇓꆈꄹꑌꒉꂸꅲ,ꈺꑌꁧꂸꅲ。ꋍꇷꊰꇁꆺꑳꀉꁌ(ꂵ)ꌸ,ꆺꑳꀉꁌ(ꂵ)ꄹꑌꒉꅲꃲ，ꈺꑌꁧꅲꃲ,ꉫꑌꁧꈴꁮ,ꂸꉬꁧꈴꁮ。

　　ꁧꌠꁧꈴꁮ,ꋩꌠꋩꈴꁮ。ꒉꋩꒉꈿꒈꂪꌕꇉꋩ。ꆳꋩꆳꈿꀋꆳꇣꄧꋩ,ꏰꋩꏰꈿꅔꏁꈬꊂꋩ,ꑙꋩꑙꈿꌩꑭꇉꃴꋩ,ꆿꋩꆿꈿꆿꃅꀋꐦꋩ,ꏬꋩꏬꈿꏬꇁꄮꈌꋩ,ꐧꋩꐧꈿꆺꑳꏂꃴꋩ。ꅽꋊꅽꃤꄓꆎꋩ,ꅽꌺꅽꇖꄓꆎꋩ,ꅽꃶꅽꌐꄓꆎꋩ,ꏣꃀꈬꄙꄓꆎꋩ,ꏣꑟꈬꉐꄓꆎꋩ。

　　ꆺꑳꀉꁌ(ꂵ)ꑌ,ꋨꑌꁧꈜꁮ,ꂸꋩꁧꈜꁮ;ꋨꑌꈤꆹꇐ,ꂸꋩꈤꆹꇐ。ꉩ……

　　ꑍ. ꒌꂘꀈꈬꉙꅇ

　　ꑱ……ꀈꈬ,ꉙꈜꑌ,ꀈꈬꂸꄜꅇꀨꋉꂸꌒ,ꉙꈜꂸꋯꅇꆦꀠꂸꊌ。ꈁꉙꈁꂘꆺꑳꀉꁌ(ꂵ)ꂘꃅꂸ,ꌧꇁꂿꌠꄓꆏꂘ,ꂸꂘꒉꂸꅝ,ꂸꂘꋚꂸꋠ,ꂸꂘꈜꂸꍬ,ꂸꂘꆏꂸꌧ。ꆏꁍꆹꍔꂄꇖ,ꀿꆹꍔꂄꌺ(ꅪ),ꀀꍔꎼꂸꃏ,ꑙꆉꈾꂸꋠ。ꍀꌺꍔꄡꅐ,ꄡꁱꄡꋓꂸ；ꆿꅪꍔꄡꅐ,ꄡꉘꄡꅪꂸ;ꀐꐩꍔꄡꅐ,ꄡꎼꄡꃏꂸ;ꈥꀐꍔꄡꅐ,ꄡꈎꄡꍬꂸ。

　　ꆏꐈꆎꌅꃅ,ꆏꐈꃅꈯꄀꅪꆹꄡꐛ,ꆏꐈꃅꈯꄀꅪꐛꃲꆏ,ꆏꇁꈝꃴꃬꁌꀘꎁꎂ,ꅽꌺꅽꇖꆎꉘꇶꎓꀕꎂꀕ,ꆎꑌꊂꈘꃅꈯꃹꎂꀕ,ꅽꌺꅽꇖꊂꈘꈝꃴꑌꎂꀕ。ꆏꐈꇈꈬꆿꅪꆹꄡꐛ,ꆏꐈꇈꈬꆿꅪꐛꃲꆏ,ꆏꇁꅔꐍꑾꁌꀘꎂꀕ,ꅽꌺꅽꇖꆎꉘꇶꎓꀕꎂꀕ,ꆎꑌꊂꈘꇉꊂꃹꎂꀕ,ꅽꌺꅽꇖꊂꈘꅔꐍꑌꎂꀕ。ꆏꐈꇣꁁꋩꃅꆹꄡꐛ,ꆏꐈꇣꁁꋩꃅꐛꃲꆏ,ꅽꀑꍋꋍꇷ,ꅽꄩꊀꋍꋬ,ꊀꄩꐧꋍꒆ,ꐧꇇꏶꋍꏢ,ꆸꑌꋍꇅꏶ,ꂸꆹꋍꇅꏶꎂꀕ。ꆏꐈꁍꊂꂿꇌꆹꄡꐛ,ꆏꐈꁍꊂꂿꇌꐛꃲꆏ,ꅽꆽꄉꋍꇷ,ꅽꊂꈪꋍꋬ,ꈪꊂꐧꋍꒆ,ꐧꇇꏦꋍꏢ,ꆸꑌꋍꇅꏶ,ꂸꆹꋍꇅꏶꎂꀕ。

　　ꆏꐈꆎꌅꃅ,ꆏꐈꉱꈐꐰꇑꐛꅊꇈ,ꉱꑓꈐꉘꐛꅊꇈ,ꉱꈐꈜꉐꑌ,ꁨꑴꈚꑴꃅ,ꉱꈐꈜꐯꑌ,ꆿꑴꍯꑴꃅ,ꋠꑴꅝꑴꃅꅊꇈ。ꆏꐈꆧꐎꈬꊂꉆ,ꑌꇁꑿꑴꃅꅊꇈ。ꆏꐈꈝꃴꈜꇬꉆ,ꃮꑴꃬꑴꃅꅊꇈ。ꆏꐈꁍꇁꑗꐮꉆ,ꆫꑴꂿꑴꃅꅊꇈ。ꆏꐈꑌꇁꑾꒌꐛ,ꆧꐎꈬꊂꀀꅊꇈ。ꆏꐈꆿꇁꍮꒌꐛ,ꏸꁧꅪꊂꀀꅊꇈ。ꆏꐈꇱꇁꃎꒌꐛ,ꑌꂾꏂꊂꐥ,ꌺꑴꇖꑴꃅꅊꇈ。ꆏꐈꇉꄩꇪꀮꐛ,ꑙꆪꒈꈬꑍ,ꇪꀮꂾꄧꀕ,ꌺꍸꀿꉂꆨ,ꅩꍸꃀꉂꆨ,ꄾꆏꇭꀧꂿ,ꂸꄿꂾꃚꈨꅊꇈ。ꆏꐈꃅꃴꈭꏂꐛ,ꆿꆪꒈꈬꑍ,ꈭꇴꇕꎓꀕ,ꌺꍸꀿꉂꆨ,ꅩꍸꃀꉂꆨ,ꄾꆏꇭꀧꂿ,ꂸꄿꂾꃚꈨꅊꇈ。

　　ꆏꐈꆎꌅꃅ,ꆏꐈꒌꇑꐛꄉꌳꈄꐊꅊꇈ,ꆏꐈꈌꇐꐛꄉꅡꈭꐊꅊꇈ,ꆏꐈꐰꇑꐛꄉꌣꈚꐊꅊꇈ,ꆏꐈꀙꇐꐛꄉꀘꂾꐊꅊꇈ,ꆏꐈꑊꇐꐛꄉꌠꑊꐊꅊꇈ。ꂿꃄꌦꆅꈁꐥꅈ,ꃱꇌꐎꒃꈢꅊꇈ。ꂿꃅꍂꃤꈁꐥꅈ,ꎤꁉꎤꇺꄀꅊꇈ。ꂿꃅꃣꈌꈁꅐꅈ,ꍲꋐꈜꈷꊐꅊꇈ。ꆏꐤꑌꂄꃅꐥ,ꁦꑌꂄꃅꁧꅊꇈ。ꉩ……

　　ꌕ. ꈜꂘꀈꈬꉙꅇ

　　ꑱ……ꀈꈬ,ꉙꈜꑌ,ꀈꈬꂸꄜꅇꀨꋉꂸꌒ,ꉙꈜꂸꋯꅇꆦꀠꂸꊌ。

　　ꃪꀮꇴꇰꃲ,ꏃꃅꄜꇁꃲ,ꆺꑳꀉꁌ(ꂵ)ꑌ,ꁧꐪꁧꈜꄻꇰꃲ。ꆎꆹꌺꁨꀿ(ꃀ)ꉫꀕ?ꌺꁨꀿ(ꃀ)ꉬꆏ,ꌺꄓꀿ(ꃀ)ꏃꇁꄿꃲ；ꃺꁨꑌꉫꀕ?ꃺꁨꑌꉬꆎ,ꃺꄓꑌꏃꇁꄿꃲ;ꑌꁨꃺꉫꀕ?ꑌꁨꃺꉬꆏ,ꑌꄓꃺꏃꇁꄿꃲ;ꋊꁨꃤꉫꀕ?ꋊꁨꃤꉬꆏ,ꋊꄓꃤꏃꇁꄿꃲ;ꅫꁨꌱꁨꀿ(ꃀ)ꉫꉬ?ꅫꁨꌱꁨꀿ(ꃀ)ꉬꆏ,ꅫꄓꌱꄓꃢꇢꇁꄿꃲ;ꑮꃀꌺꑮꁨꌠꀿ(ꃀ)ꉫꀕ?ꑮꃀꌺꑮꁨꌠꀿ(ꃀ)ꉬꆏ,ꑮꃀꌺꑮꄓꄉꈀꎭꇁꄿꃲ。ꏃꇁꈀꈘꆹ,ꑮꃀꌺꑮꎲ。ꃢꇁꈚꈘꆹ,ꅫꇁꌱꃀꎲ。ꁮꇁꐳꐥꆹ,ꋊꇁꃣꌺꎲ。ꁧꌠꁧꄿꃲ,ꆺꑳꀉꁌ(ꂵ)ꁧꄿꃲ,ꂃꍣꀱꇗꀕ,ꆞꍣꃱꀕꐚ,ꏁꁕꇱꄓꅞ,ꋩꃅꇶꍠꀕ,ꃅꒃꃅꊀꄅ,ꇇꎇꏃꉻꒃ,ꑭꎅꊃꏤꑃꄉꁧ。ꏼꄵꇇꆹꈯ,ꇇꆹꀨꈩꀕꃅꁧ。ꉈꈻꌀꂷꍣ,ꌀꂷꀱꇗꀕꃅꁧ。ꂥꂿꑱꇺꐎ,ꑱꇺꄵꋓꀕꃅꁧ。

　　ꉎꈐꏂꊂꄓ,ꑌꂾꏂꊂꅞ,ꌺꇁꇖꒌꆹꄡꁠ,ꌺꇁꇖꒌꁠꃲꆏ,ꌺꉘꋊꂸꏦꎼꂵ,ꅩꉘꌐꂸꏦꎼꂵ,ꒊꃀꀊꎴꒈꂪꌤꁧꂵ,ꌩꃀꀉꒉꌩꌺꑍꁧꂵ。ꑌꂾꏂꊂꄓ,ꇤꇄꏂꊂꅞ,ꋊꇁꃣꒌꆹꄡꁠ,ꋊꇁꃣꒌꁠꃲꆏ,ꃆꏂꊂꑋꅽꌺꅽꇖꊈꃥꆦꊧꀨꀋꊌꂵ,ꐚꏛꑱꃀꀋꊌꂵ。ꇤꇄꏂꊂꄓ,ꇤꐮꏂꊂꅞ,ꃶꇁꌐꒌꆹꄡꁠ,ꃶꇁꌐꒌꁠꃲꆏ,ꃆꏂꊂꑋꅽꌺꅽꇖꊈꃜꊭꐋꀨꀋꊌꂵ。ꇤꐮꏂꊂꄓ,ꇣꁁꏂꊂꅞ,ꁏꇁꐙꒌꆹꄡꁠ,ꁏꇁꐙꒌꁠꃲꆏ,ꃆꏂꊂꑋꅽꌺꅽꇖꊈꊪꑭꊪꇇꀋꊌꂵ。ꇣꁁꏂꊂꄓ,ꐷꈭꏂꊂꅞ,ꑌꇁꑾꒌꆹꄡꁠ,ꑌꇁꑾꒌꁠꃲꆏ,ꃆꏂꊂꑋꅽꌺꅽꇖꎆꎹꋚꈹꌞꃅꅐꁧꂵ,ꎆꐚꋚꇪꊌꎼꂵ。ꐷꈭꏂꊂꄓ,ꄹꉺꅪꊂꅞ,ꃮꇁꃬꒌꆹꄡꁠ,ꃮꇁꃬꒌꁠꃲꆏ,ꃆꏂꊂꑋꅽꌺꅽꇖꃮꈹꃬꈹꌞꃅꅐꁧꂵ。ꄹꉺꅪꊂꄓ,ꎭꈜꐎꊂꅞ,ꆿꇁꍮꒌꆹꄡꁠ,ꆿꇁꍮꒌꁠꃲꆏ,ꃆꏂꊂꑋꅽꌺꅽꇖꂮꇁꈠꋒꋦꁧꂵ,ꂮꑍꀱꒃꁧꎼꂵ,ꈠꑍꈚꒃꁧꎼꂵ。ꎭꈜꐎꊂꄓ,ꏤꌧꃺꄧꅞ;ꏤꌧꃺꄧꄓ,ꁉꉘꇁꄿꅞ;ꁉꉘꇁꄿꄓ,ꆈꈯꇁꄿꅞ;ꆈꈯꇁꄿꄓ,ꅪꎄꇁꄿꅞ;ꅪꎄꇁꄿꄓ,ꆦꀑꒈꇤꅞ。ꆦꀑꒈꇤꆹ,ꈬꉻꐈꆀꈛꐞꅈ,ꅽꁍꄚꄉꐞ,ꅽꀿꄚꄉꐞ。ꀃꑍꑞꇬꆏ,ꈬꉻꐈꆀꈜꏑꅈ,ꅽꁍꄚꏓꅈ,ꅽꀿꄚꏓꅈ,ꆎꑌꄚꏓꆹ。ꆦꀑꒈꇤꄓ,ꌭꈌꇁꄿꅞ;ꌭꈌꇁꄿꄓ,ꃅꑐꑣꃢꅞ;ꃅꑐꑣꃢꄓ,ꃅꑐꀠꄚꅞ;ꃅꑐꀠꄚꄓ,ꃅꑐꇳꇐꅞ;ꃅꑐꇳꇐꄓ,ꃅꑐꌭꐮꅞ;ꃅꑐꌭꐮꄓ,ꐧꊂꇓꑆꅞ;ꐧꊂꇓꑆꄓ,ꂚꇇꒉꐑꅞ。ꂚꇇꒉꐑꆏ,ꅉꁮꃅꊀꇔ,ꅉꎹꃅꆏꅈ,ꈬꉻꃅꋚꍈ,ꐈꆀꃅꒉꄐꅈꉬ,ꅽꁍꒉꅝꅈꑌꉬ,ꅽꀿꒉꅝꅈꑌꉬ。ꆏꎵꃀꌤꌠꌌ,ꌤꑌꋍꊪꅝ,ꂸꌤꋍꊪꅝꇈꆹ。ꂚꇇꒉꐑꄓ,ꌅꋦꌐꑴꅞ；ꌅꋦꌐꑴꄓ,ꌅꋦꇂꐟꅞ；ꌅꋦꇂꐟꄓ,ꌅꋦꁍꃴꅞ。ꌅꋦꁍꃴꆏ,ꐧꎭꌅꋦꎭ,ꐧꈤꌅꋦꈤ,ꅽꁍꄚꄉꈤ,ꅽꀿꄚꄉꈤ,ꀋꃅꆏꏁꄚꈴꁧ。ꌅꋦꁍꃴꄓ,ꇓꑴꅲꐬꅞ。ꇓꑴꅲꐬꆏ,ꁁꐎꁀꆈꉻ,ꁀꆈꀒꁨꆹ,ꁁꐎꀱꉇꎭ。ꋂꐎꋂꆈꉻ,ꋂꆈꀒꁨꆹ,ꋂꐎꀱꉇꎭ。ꌦꌠꐥꌠꉻ,ꌦꌠꀒꁨꆹ,ꐥꌠꀱꉇꇁ。ꇓꑴꅲꐬꄓ,ꂿꃄꁍꈬꅞ。ꂿꃄꁍꈬꆏ,ꈭꆹꉜꂄꃅ,ꈜꆹꅲꂂꃅ,ꅽꈭꆏꍬꆹ,ꅽꈜꆏꈴꆹ,ꈛꀑꋩꌠꄡꎹ,ꈛꂪꁘꌠꄡꃹ。ꈛꁧꍲꐎꋦ,ꆎꑌꍲꄡꋐ,ꍲꑌꆏꄡꑣ。ꈛꁧꅋꏂꋦ,ꆎꑌꅋꄡꒃ,ꅋꑌꆎꄡꁏ。ꅽꑭꅽꈜꍬ,ꅽꑓꅽꈜꉜ,ꈛꁧꐛꏂꈌ,ꆎꑌꐚꄡꏖ,ꐚꑋꆏꄡꋊ。ꈛꁧꈌꐎꁍ,ꆎꑌꈌꄡꋣ,ꈋꑌꆏꄡꑝ,ꅽꇇꎹꊈꌌ,ꎹꊈꈌꁵꇈ。ꅽꂴꈜꁮꈜꌔꏢ,ꆏꏮꅽꐰꉜ,ꅽꐰꈛꆈꁮ,ꈛꆈꁨꁦꌩꆈꋦ,ꌩꆈꀃꄩꑙꆈꑌ,ꑙꆈꆺꃴꇓꆈꎍ,ꇓꆈꁨꁦꒉꆈꒉ,ꋋꑌꅽꈜꂸꉬꂸ,ꋋꆹꑍꋍꉱꃀꈜ。ꆏꏮꅽꉎꉜ,ꅽꉎꈜꏂꁮ,ꈜꏂꁨꁦꌩꏂꋦ,ꌩꏂꀃꄩꑙꏂꑌ,ꑙꏂꆺꃴꇓꏂꎍ,ꇓꏂꁨꁦꒉꏂꒉ,ꋋꑌꅽꈜꂸꉬꂸ,ꌦꇗꌦꆗꈜꉬꂸ。ꆏꏮꅽꂴꉜ,ꅽꂴꈜꐎꁮ,ꈜꐎꁨꁦꌩꐎꋦ,ꌩꐎꀃꄩꑙꐎꑌ,ꑙꐎꆺꃴꇓꐎꎍ,ꇓꐎꁨꁦꒉꐎꒉ,ꋋꆹꁍꈜꀿꈜꉬ,ꆎꑌꄚꈴꆹ。

　　ꂿꃄꁍꈬꄓ,ꂿꃄꑙꑐꀕꇬꈴ,ꂿꃄꇳꇐꑟ。ꂿꃄꇳꇐꆏ,ꀻꑳꐍꐷꀕ,ꑴꃀꑲꌺꄅ,ꑳꐮꃅꐎꀆ,ꑳꉎꇌꐎꂇ,ꐷꈭꈌꐎꃮ,ꈵꃴꃬꐎꇴ,ꀿꑌꒊꌋꀕ,ꃀꑌꅪꅈꅊ,ꅽꀿꄚꇬꋦ,ꅽꃀꄚꇬꑌ。ꂿꃄꌅꐥꌠ,ꆪꃱꄄꆈꁏ,ꉗꏂꑐꊂꑌ。ꂿꃄꃀꐥꌠ,ꁵꊈꄜꁻꇭ,ꈁꇠꑎꊂꑌ。ꂿꃄꀘꐥꌠ,ꏿꈌꏬꆉꃰ,ꆀꍹꑎꊂꑌ。ꆗꌺꄚꐥꌠ,ꆞꑭꊖꇱꄔ;ꀉꐔꄚꐥꌠ,ꂃꂪꑶꌩꃅ;ꀉꁌꄚꐥꌠ,ꏂꃴꏂꆈꄅ,ꌀꄝꏂꈄꃮ;ꀊꂵꄚꐥꌠ,ꂃꉘꂃꆈꄅ,ꆺꂿꏂꇠꄡ。ꑌꇁꑾꒉꆫ,ꏃꇁꎭꒉꃢ,ꁍꇁꑖꒉꃅ,ꆿꇁꍮꒉꋠ,ꌒꃅꌒꋠꐥ,ꂸꐥꉈꉩꀕ,ꆎꆹꄚꐥꇈ,ꉪꆹꀱꁧꃲ。
　　
　　ꇖ. ꒌꈎꀈꈬꉙꅇ

　　ꆺꑳꀉꁌ(ꂵ)ꄷꂶꌠ,ꅽꋊꅽꃤꆏꏁꈀꇁꌠ,ꅽꌺꅽꇖꆏꏁꈀꇁꌠ,ꏃꆹꆏꏁꐉꆹꆎꀋꐊ,ꈁꏃꈁꎭꌠꒌꈎ,ꈎꇊꉇꉜ。ꇓꑴꅲꐬꈎ,ꌅꋦꁍꃴꑟ；ꌅꋦꁍꃴꈎ,ꂚꇇꒉꐑꑟ；ꂚꇇꒉꐑꈎ,ꐧꊂꇓꑆꑟ；ꐧꊂꇓꑆꈎ,ꃅꑐꌭꐮꑟ；ꃅꑐꌭꐮꈎ,ꃅꑐꇳꇐꑟ;ꃅꑐꇳꇐꈎ,ꃅꑐꀠꄚꑟ;ꃅꑐꀠꄚꈎ,ꃅꑐꑣꃢꑟ;ꃅꑐꑣꃢꈎ,ꌭꈌꇁꄿꑟ；ꌭꈌꇁꄿꈎ,ꆦꀑꒈꇤꑟ；ꆦꀑꒈꇤꈎ,ꅪꎄꇁꄿꑟ；ꅪꎄꇁꄿꈎ,ꆈꈯꇁꄿꑟ；ꆈꈯꇁꄿꈎ,ꁉꉘꇁꄿꑟ；ꁉꉘꇁꄿꈎ,ꏤꌧꃺꄧꑟ;ꏤꌧꃺꄧꈎ,ꆺꑳꏂꃴꊐ。ꑷꈓꃆꅇꄜꇁꃲ,ꇢꇑꌺꅇꄜꇁꃲ。ꉩ……

　　ꊥꇬꊿ: ꐛꊶꀉꃈ ꇊꃅꇫ ꐛꊶꐯꉐ ꐞꁁꏠꉼ
　　ꏓꁱꊿ: ꆈꇷꉼꏸ
　　ꍤꄻꊿ: ꎭꂵꏤꏦ ꐚꑴꀊꁬ
　　ꅲꇫꊿ: ꄸꌺꆿꐂ  ꐊꂾꀊꑱv7i彝族人网（彝人网）- 彝族文化网络博物馆