ꀨꏾꌠ > ꃆꃀꁱꇐꋽꇐ

ꌦꐯꁳ
ꄜꃑꄮꈉ: 2016-11-02  | ꁰꄻꊿ:ꃴꄿ

ꃬꀂꏾꂷꇬꃅꇴꈬꁙꄓ

——ꆈꌠꇐꀳ

 

ꀉꐔꂷꑮꆏꇈꊂꏢꈥꉙꀕ

ꄆꁱꄆꒌꈁꇎꈁꄿꐥꐨꄏꈧꌠ

ꇓꈓꂿꏒꀕꑠꂷꇬꄉꀉꄜꀕꃅꄜꃑ

 

ꃅꀋꇴꌦꇯꃈꊭꄓꇠꄹꑳꁭꀺ

ꑳꁭꇬꅑꑴꌦꇬꆹ

ꅋꃷꅋꋠꆹꎲꃷꎲꋠꆹꇇꌋꐔꄀꃷꋠꆹ

ꀉꑳꀿꃀꀋꌧꋍꅝꉠꃷꅍꌋꆀꆊꌧꊐ

ꉠꐧꌧꃶꂯꄐꋋꏢꃅꈊꃅꄜꀋꐥꇬꊎꈢ

ꊭ-ꇠ-

ꄷꑠꇅꄜꈧꀋꐛ

 

ꄯꒉꈪꈚꒉꈫꉘꁮꄎꌬꀕ

ꒉꑋꁨꂸꑟꇁꑋꉈꂸꊪ

ꇤꃀꀈ꒧ꍯꁧꇈꀑꀋꁏꑊꀋꆴ

ꉳꑴꄼꈯꐳꊥꌦꐣꁙꎆꃀꄙꀋꀀ

ꈭꃀꀉꎓꈜꈢꈔꃴꄩꉌꃀꒉꐑꇉ

ꃅꒉꄀꈻꌊꉘꁮꀉꂿꀘꄹꉇ

ꁴꍂꈛꇽꊿꈱꐮꊏꌐꃅꈱꇌꊏꌐ

ꅽꃀꉢꍯꃄꑌꋽꉠꌐꆏꀀꃄꑌꎔ

ꁴꍂꈛꇽꂿꍍꐎꍍꆀꉼꑎꆽꋖꋦꄉꀐꂸ

 

ꐕꍯꏮꇉ36ꂷꅑꁍꁈꊈꐎꁊꅉꑑꀕꑐꄹꃴ

ꌿꁧꎺꁧꐴꑃꊖꃴꇬꇉꊐꄉꈧꌠꑌ

ꃀꈍꋍꇗꐛꇰꄉ

ꏬꀴꂷꇁꃏꏸꇷꁻꀑꆸꀮꀕꅞ

ꀉꁌꑸꁆꋫꌠꀑꆷꃅꈯꉜ

ꀒꄝꑟ

ꋍꂾꋍꈪꌹꍈꇬꌩꏪꂷꋌꐔꄀꇬꅜꄉ

ꅏꅪꏢꋌꅥꊰꇁ ꑱꉙꃶꑳꏢꑳ

ꀄꂼꏣꆷꇵꑠꊱꇫꐊꇁ

 

ꑲꇽꃅꇴꌦꆈꈾꋋꂷ

ꇖꌦꁍꁳꇀꑌꋽꁍꌦꇖꁳꇀꑌꋽ

ꀿꌦꌺꁵꃄꑌꋽꌺꌦꀿꁵꃄꑌꋽ

ꅩꌦꃀꁵꃄꑌꋽꃀꌦꅪꁳꃄꑌꋽ

ꃺꌦꑌꁳꇀꑌꋽꑌꌦꃺꁵꇀꑌꋽ

ꐋꌦꐋꁳꇁꑌꋽꃌꌦꒆꁳꇀꑌꋽ

ꊿꌦꍶꁵꇀꑌꋽꊿꌦꇓꁵꇀꑌꋽ

 

ꏂꀨꄯꒉꌦꇁꉪꁳꂯꈍꎞꇐꀳꌦꇁꉪꁳꂯ

ꃅꇗꃅꌋꌦꇁꉪꁳꂯꁦꇁꇈꒉꌦꇁꉪꁳꂯ

 

ꇓꂵꀑꈑꃅꄉꌦꐯꁳ

ꑾꌺꍶꆂꅝꄉꌦꐯꁳ

ꆼꏻꃅꈯꁵꄉꌦꐯꁳ

ꇬꏭꉡꆹꉌꆐꅑꈧꐛꑴꄷ

ꅋꋠꃄꅉꁵꄉꌦꐯꁳ

ꇬꏭꉡꆹꅋꋌꑱꋌꇫꉔꅷꇁꀋꋭꄷ

ꇬꀺꁦꌺꁵꄉꌦꐯꁳ

ꇬꏭꉡꆹꏠꐕꄇꈜꋍꑠꈁꏾꄺꏦꀋꐥꄷ

ꒉꅜꊨꊭꁵꄉꌦꐯꁳ

ꉡꆹꑮꏀꑮꆹꍯꌊꐮꄅꋥꏦꀋꐥꄷ

ꇓꂃꀨꄉꌦꐯꁳ

ꊨꏦꇬꀺꄉꐮꐴꇵꅇꄸꀵ

ꃬꐎꇌꐎꅥꄉꌦꐯꁳ

ꇬꀺꅽꀑꇬꇖ

ꈼꅇꍃꅇꈛꇽꌦꐯꁳ

ꇬꀺꊨꏦꁵꈧꌺꑓꐚꂷꑞꈨꂿꄎꂯ

ꆪꌺꁁꁐꍈꑞꈨꆫꄐꂯ

ꀉꇐꇃꆉꄉꌠꀉꇐꀵꈞꆈꇿꀀꎍ?

ꉢꌦꈀꄸꁵꇈꂯ?ꌥꆹꄡꇗꐥꌟꃅ

ꈩꀋꐮꏢꀋꉬ


ꇁꀦ: 彝族人网 ꁰꄻꌠ: wuda  |  ꄜꃑꌠ: