ꃅꁁꈬꄜ《ꏬꒌ》ꋌꋐꍑꅐꈭꐨ，ꆈꌠꉙꃅꁱꄉꌠꉙꇐꀊꏀꆹꑠꐛꅹꃅꀊꅰꃅꀉꑌꀐ，ꆈꌠꉙꇐꀊꏀꆹꀒꁨꋍꁘꃅꉗꀍꅩꍅꄑꀐꄷꉉꉆꌠ；《ꏬꒌ》ꋌꋐꇬꈁꈻꁱꌠꆹꇯꍝꀕꃅꆈꌠꌺꇖꐥꐨꇬꀋꑍꀋꈤꌠꎺꏣꉬ。ꃅꋊꀻꎆꐲꇨꄉ，ꉪꀉꁌꀋꁧꐥꐨꐥꄸꆹꀋꃅꋋꄮꋧꃅꐛꐨꌋꆀꀉꒉꃅꐮꍣꀐꌠꉬ，ꆈꌠꌺꇖꀎꋏꊂꋊꉌꃀꉪꐨꑌꐮꀋꌡꅉꀉꒉꃅꐥꀐꌠ，ꄚꑍꃀꑍꉌꊫꑌꃅꇫꄉꀋꉪꀋꏣꑲꆏ，ꊿꋋꋓꉪꀋꁨꃅꐙꌠ。《ꏬꒌ》ꋌꋐꀘꈭꐨꆏ，ꀋꇊꆏꉡꆹꇁꌊꆈꌠꁡꇤꑠꂷꇬꄉ，ꆈꌠꀉꁌꌧꅍꐤꂷꌋꆀꌧꈿꐺꀐꌠꌡ，ꀊꄶꇬꀉꁁꊿꋅꌧꇐꇫꆽꁱꀋꎍꑴꌦ，ꀊꄶꇬꀿꃀꏁꊤꀕ，ꌺꇖꏮꏑꏿꑴꌦ，ꀊꄶꇬꁍꁇꋦꅉꌺꇖꃅꇴꋊꑴꌦ。
ꋍ ꀋꑍꀋꈤꌠꐥꐨꐛꒌ
ꉪꈭꉪꇍꋧꃅꆹꀋꌋꀋꏢꃅꇬꊎꐛꐈꇬꎷ，ꌫꉂꌫꈨꀊꏀꌠꀋꆏꃅꇫꅐꇁ，ꋌꃀꉪꀉꁌꀋꁧꇫꂿꇫꈨꀋꋻꌠꐥꇐꑠꆀꃅꇖꈋꁊꈴ；ꄚꇬꐊꄉ，ꆈꌠꌺꇖꀀꁍꑌꁋꆹꀉꒉꃅꐛꐈꀐ，ꌬꀮꌬꀏ、ꎊꈬꀮꇐꑠꆏꆹꋊꏀꆦ，ꊿꇫꀋꌬꀐꌠꑠꀉꑌꃅꐥ，ꀋꋓꀋꉪꇬꆏ，ꀊꆨꐥꐨꇬꇫꐞꀋꉆꌠꉁꈾꑠꑞꂓꌠꇯꊿꋋꀋꎺꆘꅝꀐ。ꀊꆨꉂꏣꄚꁥꎍꌠꑌꊿꇤꇿꎭꀋꐚꀐ。ꃅꁁꈬꄜꁱꄉꌠ《ꏬꒌ》ꄷꋌꋐꀘꇬꑲꆀ，ꀊꆨꐥꐨꐛꒌꊽꉌꃀꇬꃹꇁ，ꀎꋏꀉꁌꀋꁧꐥꐨꊿꎺꇁ，ꈌꌋꉆꈹꀿꉂꋋ，ꃢꅋꈚꑣꃀꉂꋋ。ꃅꁁꈬꄜꉙꇐ《ꏬꒌ》ꄷꋌꋐꇬꉙꇐꅇꀨ《ꈓꃃ》《ꍓꃯ》《ꆭꍔꁮꅉ》《ꄙꄣ》《ꐔꂩ》《ꃈꈷ》《ꋩꀻ》《ꇓꄃ》《ꄮꉒ》ꄷꋍꑠꂿꇬꆏ，ꀋꇊꆏꉪꊇꆹꀱꆈꃅꆸꈈꑟꆹꀐꌠꌡ，ꉪꈁꂿꈁꈨꌠꆹꀄꊭꃅꋍꑍꉪꇫꐞꀋꉆꌠꐥꇐꋍꑠ，ꀀꂼꂻꇬꂯꂻꑴꌦꌠꐥꐨꐥꄸ，ꉷꃅꇓꈓꀊꉗꃅꐥꀐꐛꅹꅀꑞꃅꀋꐚ，ꉙꇐꂓꅇꋋꈨꂿꇬꆏ，ꑞꁱꌠ、ꈍꃅꁱꌠꀋꉜꌦꇯꆐꉌꐡꇁ，ꀊꉗꃅꍵꃹꄉꀀꂱꉪꄸꈐꇬꀀꌠꎺꏣꋌꀀꄗꎼꇁ，ꀄꊭꃅꋍꑍꐥꐨꁮꅉꋍꂷꇈꋍꂷꃅꉪꑓꐛꇀꌦꀐ。
“ꎺꌦꀋꎺꌥꄮꇬ/ꅳꀧꄵꄉꃀꆏꀊꏂꊐꂿꄷ/ꀉꂿꃬꏿꏬꌌꉢꅰꂯꀋꄿ/ꀉꄉꀂꏾꌎꄉꉡꍗꂯꀋꄿ……ꀉꂿꂷꏦꇍꌊꑳꐮꈴꄉꈹꅸꇁ/ꀉꄉꇇꁮꆗꌌꑳꉎꐱꄉꇊꅷꇁ……ꃅꈎꈢꋒꁧ/ꃅꆪꈢꋒꁧ……ꃀꆏꀊꏂꇆ/ꃀꆏꀊꏂ……ꎹꀕꑳꉎꑞꑌꑞꃅꆏꀋꊌ/ꈹꀕꑳꐮꅞꑌꑞꃅꆏꀋꊌ—《ꃀꆏꀊꏂ》”ꀉꑌꈎꀋꐛꌦꂾꆹ，ꅳꀧꄴꀋꄵꌠꆹꆈꌠꉌꈲꐮꀋꌡꅉꉬ，ꆈꌠꆹꌺꃰꀋꐥ，ꅩꃰꀋꐥ，ꐯꇯꅳꀧꄵꌐꌠ，ꀋꃅꋋꄮꆏꃅꐛꃅꐙꁏ，ꆈꌠꀉꑳꅳꀧꀋꄵꌠꌐꀋꉆꀐ，ꀱꆽꃅꉌꈲꀉꑳꄉꅳꀧꄵꌊꐺ。ꄚꅳꀧꀋꄵꑲꆏꃀꆏꀊꏂꈁꎔꎗꌠꈀꄸꄀꇊꂯ，ꆈꌠꉌꈲꈍꃅꏡꃏꂯ，ꉪꀉꁌꀋꁧ“ꃆꇭꃅꃨꋩ，ꂴꍧꑱꎵꀵ，ꌀꄝꂶꀧꏀ，ꆈꆞꁙꆺꈨ，ꃀꆏꀊꏂꏧꇀꑳ，ꀋꈄꀕꃅꉨ”ꌠꐛꒌꆹꇿꇬꎹꁧꂯ。
ꃅꁁꈬꄜꃤ《ꏬꒌ》ꄷꋌꋐꉜꀘꄮꇬꆏ，ꀋꇊꆏꉢꀱꆀꃅꇖꈋꀉꄉꐊꄉꈌꌋꉆꈹꐺ，ꀉꂿꐊꄉꎭꁻꎭꋩꐺꀐꌟꃅꐛ，ꀿꏮꌺꉜꉌꃀꊷꆣꀕ，ꃀꏮꅪꉚꏢꁮꇗꄃꀕ，ꌹꑌꉌꌒꀿꃀꈭꇍꏮ。ꐥꐨꐛꒌꑴꁱꁬꌡꑠꂷꃅꁁꈬꄜꈻꁱꎼꇁꀐ，ꆀꃅꇖꈋꆲꏂꂱꇬꀕ，ꉹꁌꄮꐽ、ꑘꒃ，ꆈꌠꌺꇖꀋꌒꀕꃅꉨ，ꁍꁈꈌꌋꅉ，ꌺꇖꋍꇬꉘ；ꁍꁈꑲꅉꇬ，ꌺꇖꃅꇴꋊ。
ꑍ ꀋꑍꀋꈤꌠꊿꋅꉂꏣ
ꊿꋅꉂꏣꆹꀋꃅꋋꄮꆈꌠꌺꇖꋍꏅꀋꑍꀋꈤꌠꉂꏣꉬ，ꈜꀕꇈꆈꌠꌺꇖꌧꇐꁱꂷꌷꄉꀉꁁꊿꋅꌋꆀꐮꑌꑲꋻꈧꌠꆹ，ꑍꃀꑍꐥꐨꇬꄉꊨꏦꊿꋅꋋꁯꋦꃆꋦꂮꌌꋧꃅꊿꋆꀉꁁꈧꌠꌋꆀꐯꌟꉜ，ꀃꑍꋋꄮꆈꌠꋋꁯꆹꋧꃅꊿꋅꈬꇬꊼꇅꊁꊰꎍꀐꌠꋀꊇꉜꐝꍠꀕ；ꑠꃅꄉ，ꋀꊇꈁꉪꈁꈾꌠꆹꊨꏦꑴꅉꀋꉬꃅ，ꊿꋅꌤꃆꀉꒉꋌꐘꉬ，ꆈꌠꃆꃀꁱꇐꁱꊿꀉꑌꈨꆹꁱꇐꐮꀋꌡꑠꀉꑌꈨꁱꌊꂱꑱꃅꊿꋅꉂꏣꄛꑣ，ꊿꋅꉌꊈꇳꍝꀐ。ꃅꁁꈬꄜꃤ《ꏬꒌ》ꄷꋌꋐꑌꆈꌠꃆꃀꁱꇐꀉꁁꈧꌠꌋꆀꐯꌟꃅꊿꋅꉂꏣꌌꀨꄉ，ꄸꇬꂾꄀꄉꌠꉙꇐꈁꀊꎴꌠ《ꏬꒌꒃ》ꄷꋋꊱꈐꏭꆹꄇꇖꀕꃅꊿꋅꉂꏣꉉꄜꀐ：“ꉠꊿꋅꅇꂷ ꉢꈻꐯꄀꉙꇐꋋꎴꁱ/ꉠꊿꋅꁱꂷ ꉢꌦꐯꇯꉙꇐꋋꎴꐛ”。ꀊꆨꆈꌠꐩꋊꇬꆈꌠꌺꇖꐤꎭꄺꎭꊬꌠꏭꆹꑠꃅꁱ：“ꐥꋊꑠꊭꇬ/ꇅꈯꋍꃢꍀꌈꆿꄧ/ꅔꐍꑿꐥꑿꁋꀘꐛꅹ/ꌳꈄꀋꃀꈧꌠꀑꇬꏍꈿꏿ/ꍀꅥꆿꌉꑌꇁꑾꈜꏂꐨꁮ”；ꆈꌠꌺꇖꃅꋊꀊꏀꋎꌠꃹꇁꇈ，ꈝꃀꐥꌒꊬꌠꍬꇁꌠꃆꂮꆹꑠꃅꁱ：“ꏃꃅꄜꐛꐍꄮꇬ/ꊖꆈꀀꐚꇀꄮꇬ/ꍀꑍꑌꀋꐚ/ꆿꈔꑌꀋꐚ/ꃰꊿꍀꎹ ꍀꀋꊌ/ꃰꊿꆿꈹ ꆿꀋꂿ/ꑌꑿꀉꄂꑌꁬꑿꎶꇥꀋꏦ/ꃰꊿꈧꌠꄡꇗꑌꑿꌊꁈꐛ”；ꏬꐰꇑꆹꆈꌠꐰꇑ，ꆈꌠꁱꂷꋊꍬꄉꌠꌌꌬꐛꅹꃅꈮꈜꌠꏭꆹꑠꃅꁱ：“ꀎꋏꀉꁌ ꉌꃀꉪꉩꁦꀑꉪ/ꊂꋊꀋꁧ ꐰꇑꁦꀑꑟꅊꇈ/ꈎꂄꆪꂄ ꂷꅑꀮꇗꀕꑠꈓ/ꑍꂄꉖꂄ ꈨꑭꐝꇅꀕꑠꑍ/ꏬꏿ 819ꂷ ꃹꇁ/ꏬꌺ 819ꂷ ꐛꃲ”。ꆈꌠꌺꇖꉘꁇꁉꃅꀻꎆꆸꇰꌠꃆꂮꏭꆹꑠꃅꁱ：“ꂓꄜꆹꂯꌠꏬꌺ/ꀻꎆꆹꂯꌠꏬꌺ/ꋍꑍꋍꉙ ꏬꒆꏬꐛꆸꄮꇬ/ꋍꈓꋍꉙ ꏬꂓꏬꄜꆸꄮꇬ/ꇉꐤꊨꌠꊖꆈꄩꄉ ꏬꒌꈻ/ꇉꅶꂿꌠꊖꆈꄩꄉ ꏬꆠꈎ/ꃮꆫꀊꉘꊖꆈꄩꄉ ꏬꉙꁊ/ꎆꆫꀉꁌꊖꆈꄩꄉ ꏬꁱꑴ”。
“ꀋꅞꉖ/ꀙꃀꃅꊪꄉ/ꀗꌺꆞꇢꄉ/ꆺꑳꏂꃴꒌꈻꆠꈎꑷꈓꎓꁨꀕ//ꀃꌋꃅꄜ/ꒌꁉꄮꒌꁉ/ꉜꂾꑱꈌꉱꈐꐫꇓꉜꄉꏭꏮꉜꀋꏮ/ꒌꐪꆠꈜꑍꇁꌕꐪꀉꄂ/ꑳꂾꉷꈜꍬ/ꁭꅐꀉꁁꉜꄉꁮꁧꃲ —《ꆺꑳꒌꈻ》”。ꀋꈑꃺꃶꅿꉙꇐ《ꀉꇐꒌꈎ》ꄷꂓꅑꑠꊱꐥ，ꄚꉙꇐꋋꑍꊱꐯꌟꅉꆏꐯꇯꆈꌠꌺꇖꒌꈎꌠ，ꐯꇯꆈꌠꌺꇖꋍꑍꋍꉙꃅꀿꇁꃀꐞꁧ，ꊿꋅꌧꇐꋊꊛꌠꆹꋍꑍꋍꉙꃅꁮꑋꒉꀐꌠꐛꅹꃅꎺꐒꋠꄉꇳꉔꌠ；ꄚꐮꀋꌡꌠꆏꀋꈑꃺꃶꉙꇐꆹꒈꂃꒊꆱꄓꃅꄓꄉ，ꁧꉺꇉꉼꃅꄉꇳꉔꌠ，ꃅꁁꈬꄜꉙꇐꆹꇤꈏꑭꑌꄉꁮꅉꌧꌠꌟꃅꑖꈈꀕꃅꌧꌠ。
ꌕ ꀋꑍꀋꈤꌠꆀꃅꉙꇐꑵꄟ
ꆈꌠꋊꃅꐥꇈꌠꃆꃀꁱꇐꈬꇬꈁꄞꅐꌠꆹꉙꇐꉬ，ꆈꌠꌧꇐꍸꇐꆹꊋꒉꌠꈌꈻꏿꄉꀎꋏꌧꊂꋊꇰꃅꋊꊛꅸꇁꌠ，ꄚꌧꌒꎺꌒꂯꃅ，ꐛꏦꆏꉙꇐꃅꐙꌠꊋꒉ，ꆃꎭꃅꄷꆈꌠꉹꁌꃅꇫꋒꌥꌠ《ꅺꊈ》 《ꂘꃅ》 《ꀉꂿꅩꌺ》 《ꀊꌱꑘ》 《ꀉꑳꀉꎓ》ꑠꉉꀋꌸꀐ，ꆃꎭꆈꌠꆹꑍꃀꑍꈍꈩꉐꍣꇬꇯꉙꇐꌟꃅꋍꊱꋍꊱꃅꉉꌠ。ꃅꁁꈬꄜꃤꉙꇐꈁꈻꁱꌠꆹꆈꌠꐥꃆꐥꂮ，ꉙꇐꈁꉜꌠꑌꆈꌠꌺꇖꑠꉬꐛꅹꃅ，ꆈꌠꋊꃅꐥꇈꌠꉙꇐꐛꄟꑲꆀꁱꊿꑌꁱꌒ，ꉜꊿꑌꀘꏾꌠ。ꆈꌠꉙꇐꑵꄟꇬꈁꄞꅐꌠꆏꐛꒌꐥꋌꐘꉬꌠ，ꉪꐨꏢꉉ、ꉜꐨꐘꄜꂯꇬ，ꐛꒌꐥꃅꑠꌊꄉꉙꑵ，ꉉꍆ、ꊩꀽꌠꁰꄟꀋꌬ。“ꏬꌺ—/ꆏꄡꇗꑌꇁꑾꈜꍬ/ꑌꑿꊂꈹ ꀻꎆꆸꏢꉨꇬꎷ//ꏬꌺ—/ꆏꄡꇗꆿꇁꍮꈜꍬ/ꆿꍯꌟꃅ ꂷꌵꆹꏭꄐꇬꎷ—《ꏬꒌꒃ》”ꄚꇬꆹꏬꌺꌌꆈꌠꌺꇖꎃꊐꄉ，ꆈꌠꌺꇖꆹꋍꈜꋌꍬꄉ、ꊨꏦꊋꃤꉘꇉꄉꀻꎆꆸꇰꌠꈻꁱꌠ，ꉪꇫꋒꌥꌠ“ꏬꌺ”“ꑌꑿ”“ꈝꃀ”“ꆿꍯ”“ꂷꌵ”ꋍꑠꌊꄉꉙꑵ，ꐛꒌꊽꑓꐛꃅꐙꎍ，ꉻꃯꃅꀋꐛ。ꄡꇗ《ꏬꒌꒃ》ꄷꋋꊱꇬ，ꐪꊛꄉꀃꑍꋋꄮꆈꌠꃅꄷꁉꃑꀐ，ꆈꌠꌺꇖꋧꃅꌋꆀꐮꑌꑲꎍꀐ，ꆈꌠꋊꃅꐥꇈꌠꌧꇐꑌꅔꅐꋧꃅꈨꆹꀐꄷꌠꈻꁱꇬꆏ，ꆈꌠꌧꇐꁰꁱꈬꇬꈁꂓꅑꌠꌊꎆꁱꄉꉉꈻ：“ꅺꊈ”ꆏꌌ ꋧꃅꏭꌧꈿ/“ꂘꃅ”ꆏꌌ ꋧꃅꏭꉙꂘ/“ꇐꀳ”ꆏꌌ ꋧꃅꏭꉉꀥ/“ꈍꎞ”ꆏꌌ ꋧꃅꏭꈍꈩ/“ꀉꇐ”ꆏꏃ ꋧꃅꄉꌳꈄ/“ꅩꌺ”ꆏꏃ ꋧꃅꄉꉂꄜ/“ꀈꑘ”ꆏꏃ ꋧꃅꄉꎔꌋ/ꀉꁌꏿꌠꏤꏅꆏꈚ ꋧꃅꃰ/ꀊꂵꍹꌠꃭꇁꆏꈚ ꋧꃅꏷ。
ꆈꌠꋊꃅꐥꌠꉙꇐꑵꄟꆹꎆꁱꄷꋌꐘꑌꉬꌠ，ꉎꏯꉉꌠꅺꌡꆏꄇꇖꀕꃅꎆꁱꌠꉬꀐ，ꁱꊿꑠꃅꁱꌠꆹꋍꈚꀉꄂꀋꉬꌠ；ꋍꈭꐨ，ꆈꌠꋊꃅꐥꌠꉙꇐꇬꆹꐥꇐꑍꑵꑍꑵꐯꇯꄉꉉꑟꃅꌠ：ꃅꈯꆏꏨꆉ、ꅔꐍꆏꏰꌺ、ꃪꅪꆏꐛꑿ、ꇅꈯꆏꆿꅪ、ꒉꃴꆏꉜꏂ、ꇉꅶꆏꐓꇌ、ꂷꑭꆏꉑꀮ、ꅙꑭꆏꎽꀮ、ꇉꄩꆏꇪꀮ、ꌩꑭꆏꁯꎓ、ꈛꁧꆏꏜꋇ、ꆺꑳꆏꀉꂿ、ꃆꇭꆏꏪꈜ、ꀊꌱꆏꉂꏣꑠꌐꀋꉆꌠ。ꉙꑵꄮꇬꑌ，ꅇꂷꑍꇬꑍꇬꐮꐊꐙꃅꑠꑵ，ꉉꅷ“ꑳꂾ”ꑞꆏ，“ꑳꊂ”ꄚꐊꇁꎂꀕ，ꁱꅷ“ꈢꈐ”ꑞꆏ，“ꈢꉈ”ꄚꁥꇁꎂꀕ，ꑵꅸ“ꑌꑿ”ꑞꆏ，“ꆿꍯ”ꑵꊂꈹꇁꎂꀕ，ꉪꅷ“ꉜꏂ”ꄀꆏ，“ꎳꌺ”ꀋꎺꇁꀋꉆꌠ。ꃅꁁꈬꄜꁱꄉꌠ《ꏬꒌ》ꄷꋌꋐꇬꑌꑠꃅꁱꄉꌠꀉꑌꃅꐊ。
ꇖ ꀋꑍꀋꈤꌠꏀꀺꈝꃀ
ꃅꁁꈬꄜꁱꄉꌠꉙꇐ《ꏬꒌ》ꄷꋌꋐꇬꏀꀺꐨꆏꑍꐘꇬꄉꌧꉆ，ꋍꐘꌠꆏꉙꇐꉪꏣꀂꏽ，ꑍꃀꑍꉙꇐꆹꊋꒉꌠꆏꃰꊿꐥꐨꈻꁱ，ꋌꐛꋦꈭꈻꁱꌠꆹꊼꇅꀁꑌ，ꄚꃅꁁꈬꄜꆹꋌꐛꋌꐙꋦꈭꐛꐈ，ꃰꊿꋦꈭꀛꐆꄉ，ꃅꐛꃅꐚꐙꁏꆹ，ꊨꏦꐤꎭꊐꌠꃆꂮꐒꊀꄉ，ꀒꁨꋍꁘꃅꊿꋅꊫꂫꐒꊀ，ꋧꃅꃰꊿꊫꂫꐒꊀ；ꅺꌡꇬꋍꉙꇐ《ꈭꄂ》 《ꑋꄂ》 《ꎺꄂ》 《ꄮꉒ》 《ꀻꑳꇆ，ꐞꁧꃲ!》ꄷꋋꈨꐯꇯꑠꉬꌐ。ꃅꁁꈬꄜꉂꏣꌂꏣꉙꑵꇬꆹ，ꐥꇐꌌꉙꑵꌠꇬꈴꄉꋍꅿꉪꐨꄛꑣ，ꈛꎂꃅꈍꃅꉂ、ꈍꃅꌂꃅꀋꁱ，ꋋꆹꉌꈲꉙꇐꁱꇬ“ꉌꐡꇀꆏꃧꃨꇯꑍꑓꁴꅐ，ꉌꎭꇀꆏꉌꊭꐚꆹꇬꇯꉌꃀꐂ”ꌠꁰꄟꌌꌬꌠ，ꑠꃅꁱꇬꆏꆈꌠꉙꇐꁰꄟꆹꋍꑍꋍꉙꃅꀉꑌꆹ，ꉙꇐꊽꉌꑠꑌꁦꎆꃅꁱꇫꅐꇁꄎ，ꀎꋏꈝꃀꀂꏽꄉ，ꊂꋊꑭꁘꀊꏀꀺꄉꐪꊛꆹꌠꑌꄇꇖꀕꀐ。
ꑍꐘꌠꆏꉙꇐꁰꏦꇬꏀꀺꐨꐥ。ꆈꌠꋊꃅꐥꌠꉙꇐꆹ，ꅇꂷꋍꇬꌠꁱꂷꉬꂷ、ꏃꂷ、ꈬꂷꃅꋓꄜꃅꐙꄉꋍꇬꋑꀋꋒꁱꂷꐯꑋꌐꃅꉙꑵꌠ，ꑠꃅꇬꆏ，ꈌꈻꏿꇬꎺꌒꀘꌒ；ꄚꃅꁁꈬꄜꃤꉙꇐꆹꉙꇐꋍꊱꈐꏭꅇꂷꀊꎴꇫꌠꆹꁱꂷꊯꎖꂷꌠꐥ，ꀁꎴꇫꌠꆹꁱꂷꑍꂷꅀꌕꂷꀉꄂꌠꐥ，ꅇꇬꄜꇐꇬꈴꄉꁱꂷꀁꑌꀉꑌꌠꐮꀋꌡꃅꌬ，ꑠꃅꇬꆏ，ꋍꁁꏯꆏꅇꇬꄜꇐꀊꅰꃅꐝꉅ，ꉇꑴꋍꁁꏯꆏ，ꅇꇬꆼꈘꌒ，ꀘꌒꃅꐙ，ꅇꂷꐛꏦꐮꀋꌡꑴꇬ，ꉙꇐꐛꒆꌠꏭꁧꒆꅍꋍꍈꇯꀋꐥ：“ꊨꊭ ꊨꊭꎔꀕ/ꆏꇬꊎꉠꊂꅑꆹꀵꑴꌦꑲꆏ/ꉢꁳꄛꁮꀕꃅ/ꅽꋓꅑꐪꇔꆹꎻꇬ/ꍑꀕꇆ/ꆏꇬꊎꉠꊂꅹꆹꎹꑴꌦꑲꆏ/ꉢꁳꅔꆙꀕꃅ/ꅽꋓꅺꃤꇽꆹꎻꇬ/ꄾꀕꇆ—《ꊨꊭꇆ ꊨꊭꎔꀕ》”。
ꃅꁁꈬꄜꁱꄉꌠꉙꇐ《ꏬꒌ》ꄷꋌꋐꆹꀉꑌꈎꆈꌠꉙꃅꁱꄉꌠꉙꇐꏓꐯꇯꄉꑠꀋꐥꀐꌠꇬꎃꊐꀐ，ꋋꆹꆈꌠꃆꃀꁱꇐꀊꏀꑠꀋꆏꃅꐪꊛꅷꁧꌠꏭꑆꊋꀉꒉꃅꐥꀐꌠ，ꉪꆈꌠꉙꃅꁱꌠꃆꃀꁱꇐꋍꑠꉌꃹꈧꌠꑌꉜꅍꀘꅍꀊꏀꑠꀋꆏꃅꇫꅐꇁꄉ，ꆀꉙꁱꇐꌧꇐꊌꐨꀊꏀꐪꀋꈘꇬꎷ，ꉌꃀꉌꌤꀺꌠꃆꃀꁱꇐꑌꀋꆏꃅꇫꅐꇁ，ꋍꑠꐛꅹꃅꉪꆹꁱꊿꏭꈀꎭꀕꅇꑍꇬꉉꄡꑟꌠ。
