ꀨꏾꌠ > ꃆꃀꁱꇐꋽꇐ

ꀉꄉꌺꐂ
ꄜꃑꄮꈉ: 2011-09-28  | ꁰꄻꊿ:ꀊꁠꃴꇤꃀ


ꌞꀉꄉꌺꐂꑠꈨꑌ
ꉪꃅꉪꇐꈤ
ꌕꋊꌕꁆꐊꄉꅸꂿꉂ
ꌕꃈꌕꅪꐊꄉꎔꂿꉂ
ꋋꑌꉌꃀꉪꅉꐛꀋꉆ
ꌞꀉꄉꌺꐂꑠꈨꑌ
ꃀꑍꊨꆹꎴꌠꇈꇬꋦꁧꃲ
ꋐꈉꇉꅶꈍꊰꅶꁧꃲ
ꏷꌦꑳꌠꃪꄧꋦꁧꃲ
ꌬꈇꇇꎇꋌꀋꂪꁧꃲ
ꇽꈇꈛꅂꅑꁧꃲ
ꊸꐪꈧꌺꁨꁧꃲ
ꈧꌺꅑꅉꂥꁧꃲ
ꎔꐪꆧꌺꁨꁧꃲ
ꆧꌺꃅꅂꃅꒉꊨꁧꃲ
ꅝꇬꀏꃱꑭꑴꇬ
ꅡꀯꉔꄉꋦꁧꃯ
ꋠꇬꌩꂷꂄꑴꇬ
ꌩꂷꌩꄩꅑꅉꂥꁧꃯ
ꀑꁮꁦꀑꈻꑴꇬ
ꁧꀑꈛꅂꄀꁧꃯ

    ꑍ
ꌞꀉꄉꌺꐂꑠꈨꑌ
ꎭꃅꎭꌠꄜꀋꆺ
ꑍꆏꑋꇴꏿꄹꐚꌠꎭ
ꌊꆏꀋꀀꃅꏸꆫꌠꎭ
ꈌꃅꏸꇬꀀꄉꉩꌠꎭ
ꃆꇭꉻꇬꀀꄉꀆꌠꎭ
ꃮꃀꏣꄀꉶꇤꉆꌠꎭ
ꆿꁮꃄꎭꂿꌠꎭ
ꏻꅉꅸꅉꃅꌠꎭ
ꃆꇭꈛꎭꊐꌠꎭ
ꏶꅉꋨꅉꃄꌠꎭ

    ꌕ
ꌞꀉꄉꌺꐂꑠꈨꑌ
ꁦꀑꃱꌌꈌꀋꑭ
ꁧꐧꃱꌌꈌꀋꑭ
ꑬꎳꄇꇑꊪꋺꌺ
ꑭꎅꈝꌏꍬꀋꏾ
ꁦꀑꉒꏂꏣꋺꌺ
ꐟꈯꉒꇉꅸꀋꏾ
ꃅꃴꉐꌦꌵꋺꌺ
ꈵꃴꑭꍷꌸꀋꏾ
ꈌꃅꈌꃨꌿꅶꈹꋺꌺ
ꇈꁘꌺꇬꃹꀋꏾ

 

ꇁꀦ: 未知 ꁰꄻꌠ:  |  ꄜꃑꌠ: beley ꌤꃅꅉ