ꂴꊛ：ꉒꈌꈬꇬꉂꏣ(ꊰꇖ)http://yi.yizuren.com/plus/view.php?aid=131
ꊰꉬ
ꆈꌠꈎꏅꌩꏓꄉꌐꀐ，ꑶꇽꁡꇤꂷꈁꐛꅉꃅꐷꈭꇬꌩꁐꐛꌐꀐ。ꄚ，ꆿꃀꁡꇤꆹꈎꏅꃄꀑꃅꑊꑠꋍꍈꂯꎹꅉꀋꊌꃅꎍꑴꌦ。
ꀋꉊꂴꆽꆹꉬꑲꆏ，ꆈꌠꈎꏅꄮꇬꆏ，ꆿꃀꁡꇤꑷꇽꇬꃥꌋꀋꁧꈧꌠꑠꆹ，ꈎꏅꅐꊌꀋꃅꀕ，ꆏꂅꉢꂅꏿ、ꆏꄿꉠꄩꐂꃅꃴꄿꏁꍅꅍꈩꇁꌐꇬꎷꌠ，ꇇꇬꆹꎧꏸꌌꇁꌠꐊ、ꃮꀂꏾꎸꌌꇁꌠꐊ、ꑌꁮꉆꁮꎸꌌꇁꌠꐊ、ꎼꎸꉐꎸꌌꇁꌠꐊ……ꑞꃅꄸꆏ，ꋍꈓꇀꅉꀕꃅꆈꌠꈎꏅꄷꆏ，ꃴꄿꏁꍅꆹꂚꄏꍤꁆꈎꏅꎭꁧꇬꎷꒉꄷꉬ，ꈛꎂꃅꃴꄿꏁꍅꁵꋀꊇꎁꃅꉌꌤꑓꀖ、ꉂꅇꑟꅅꌋꆀꋠꅍꅝꒉꑠꎭꌊꂚꄏꍈꆹꇬꎷꌠꉬ。ꋍꈓꇀꅉꀕꃅꑠꃅꈮꈜ、ꉌꇿꑓꇿꃅꁧꇬꎷ，ꄽꂫꆏ，ꊋꒉꌠꆹꉘꇉꉘꀋꅐꃅꀱꇁꇬꎷ。
“ꀋꍑꀐ，ꀋꍑꀋꍑ，ꇅꂚꇫꈁꀋꅲꌠ，ꉡꆹꀵꁧꑲꆀꀱꀵꉈꑴꇁꀋꉆ！”
“ꑠꆹꉬꑲꆏ，ꆎꆹꑞꃅꃮꀂꏾꀵꁧꌠꉬ？”
“ꉡꆹꆍꊇꎁꃅꌠꀋꂸ，ꆍꊇꎁꃅꌞꎭꌠ，ꆍꊇꎁꃅꋠꌠꀋꂸ。ꆍꅿꋬꂻꅲꅇꄜꌠ、ꉪꐨꉜꐨ、ꇖꂟꐨ……ꊿꀉꑌꆏꏈꀕ，ꀉꁧꀕ，ꑡꑌꉢꎺꄉꌐꀐ，ꋍꇬꀋꊰꋹꃅꉢꄜꇅꂚꇯꅊꈫ。ꋠꅍꅝꒉꆹꉢꈍꃅꑌꇬꀋꌌꌠꉬ，ꌌꁧꇬꑌꀈꈥꀕ，ꀵꊋꄺꊋꅍꃅꇅꂚꇫꈁꅲꈧꆏꀋꉬ。”
ꊛꄉꊿꒈꃚꏇꃚꇫꈌꐚꇁ，ꈀꄸꑌꃴꄿꏁꍅꇬꇖꅒꀋꄐꌐ。ꄽꂫꆏꈀꄸꑌꂱꑱꋠꅍꅝꒉꂱꑱꌌꇁꈧꌠꂱꑱꀱꌊꁧꌐꌦ。ꄚꃴꄿꏁꍅꀵꌊꑤꍰꇓꈓꇅꂚꅍꈎꏅꎭꁧꌠꃮꀂꏾꁆꌠꆹ，ꈀꄸꂷꇱꆦꇫꎭꀋꐚ，ꋋꆹꑓꇙꀕꃅꃴꄿꏁꍅꇱꉜꅐꇁꀐ，ꃴꄿꏁꍅꅉꐚꌠꆏ，ꋋꆹꁡꇤꇬꃰꊿꋍꏅꌠꅿꄡꀋꉆꌠꉌꂵꉪꐨꉬ。ꇅꂚꂶꌠꆹꁡꇤꇬꃤꋍꁯꋍꑷꃅꀹꃅꇏꆹꀋꊪꀋꎴꑴꇬ，ꄚꋍꈓꇀꅉꀕ，ꁡꇤꇬꃮꎸꇁꏙꋌꏬꀋꋻꑷꀋꐥ？ꃴꄿꏁꍅꂶꌠꆹꀊꅰꃅꉌꂵꇿꌠꆏ：“ꋍꂷꋚꏬꊯꑻꋙꋠꌠꀋꉬꃅ，ꊯꑻꋚꏬꋍꂷꍈꐘꌠꉬ！” ꊯꑻꋚꏬꋍꂷꍈ，ꇅꂚꆹꈍꄮꑌꋍꂷꋚꏬ，ꊯꑻꋚꋠꌠꏭꀋꋌꃅꉌꂵꇿꁦꉘꀕꀐꋭ。
ꄚ，ꃅꐛꃅꄏꀕ，ꑠꃅꈎꏅꃅꌒ、ꐥꌒꄻꌒꌠꆹꀋꉊꄹꈎꅑꅷꇁꌠꆏꁰꒌꍈꑌꎹꅉꀋꊌꆘꅝꀐ。
ꁡꇤꇬꃰꊿꈧꌠꉘꇉꌠꆹ，ꎼꈎꀕꏅꄮꇬꆏ，ꀋꉊꊂꌋꆀꉌꈯꑓꈜ、ꉌꃈꑓꌒꌠꑠꆹꉬꇮꃅꉈꀱꇁꌐꑟꉂꌠꉬ。ꄚ，ꉘꇉꉘꀋꅐꈀꄸꑌꉪꇁꇬꀋꑟꌠꆏ，ꐤꅉꐤꅉꃅꅇꉩꅲꀋꌒꌠꑠꀉꄂꈨꇁꇬꎷ：ꇅꂚꆹꊿꀋꂄꆈꒉꀕꌠꐛꄉ，ꌌꍏꑭꊂꃅꊨꀖꇬꎷ，ꉈꑴꆏꈢꌊꊿꋋꂿꀋꄐꌠ“ꇌꉻ”ꇬꊐꄉ。ꉌꐒꑓꋩꌠꆹꐛꂨꅍꆿꃀꁡꇤꀀꎌꌐ，ꋋꆹꑍꇁꈤꀋꉆꌠꁧꀐꃅꉒꌡ，ꉇꆏꑍꈴꌊꒉꏽꌠꆺꃮꒊꃀꑌꌡꇫꎍ。ꄚꎭꈐꎔꌠꆏ，ꋧꃅꋋꂷꆹꊿꐥꇿꑵꉬꇬꎷꅊꇈ，ꊿꐥꆏꏡꁈꆹꈍꄮꑌꏂꅐꇁꄎꇬꎷꌠ，ꄡꇗꃴꄿꏁꍅꄈꏢꁈꐥꅊꇈ，ꄈꑼꈍꑌꑼꌠꇴꌊꋍꈜꄉꐮꇖꇈꏡꁈꏢꏂꅐꇁ，ꑠꅹꐯꏤꄉꈝꃀꈪꇬꄉꈜꌬꄉꑤꊈꎼꏹꇑꁧꌠꃅ。ꇑꊋꀋꐛꈬꐨꆏ，ꂁꆈꄉꑤꊈꎼꏹꈐꁧꌠꄐꎖꑠꐘꉪꅐꇀꌦꀐ。
ꄚꉘꀋꇉꌠꆏ，ꑡꑌꑽꀋꉻꃢꌺꇇꈐꇬꊐꌐꀐ，ꀊꄶꏤꏅꌌꇙꄉ，ꊿꇱꐒꃆꀞꇬꏦꌊꐺꄉꆺꃮꒊꃀꏢꁮꇬꄉꌉꌦꇫꎭꀋꇊꌠꆿꃀꌺꀊꋨꂷ。
ꀊꄸꀈꏦꑳꇬꃹꇁꇈꅞꇤꈏꇢꇑꏢꁮꇬꑌꄉ，ꀋꃋꋌꃢꑤꍰꇓꈓꇬꄉꂚꄏꈐꆹꌠꃆꂮꉉꃴꄿꏁꍅꇰꅷꐺ：
“ꂴꇯꆐꇅꂚꌋꆀꐯꏭꏤꄉ，ꊁꄹꉖꈊꃀꌊꁁꄮꇬꆏꊞꐂꉣꑊꋋꋩꆹꂿꄷꄉꌠ。ꄚꈬꑍꈬꄅꀕ，ꊯꊪꑍꄀꄃꌠꀋꉻꃢꌺꑊꋌꋋꂷ，ꌍꑓꇬꐋꀋꌡꌠꋌꉜꅐꇁꄉ，ꀊꋨꄹꉖꈊꃀꇯꆐꇅꂚꋋꇱꏭꆦꌊꀉꁁꈚꇬꊐꇫꎭꅊꇈ！”
“ꏮꆦꌊꇿꇬꁧꌠꆹ，ꈍꃅꑌꍤꅐꇁꄎꌠꉬ。”
“ꃴꄿꏁꍅꀋ，ꊋꋠꇨꀐ。ꑤꍰꇓꈓꀄꊭꑴꇬ，ꄚꈜꈪꈛꍣꀉꑌꇨ，ꉪꆿꃀꁡꇤꏭꀋꋌꃅꊋꋠꇨ。ꇯꍝꃅꎹꊋꇨꄷ。”
ꀊꄸꀈꏦꊛꄉꉉꇬ，ꀋꃉꀃꑍꆏꑤꍰꇓꈓꇬꑌꐝꅉꈚꈀꐛꅉꃅ，ꅳꍩꀵꄉꈛꌬꌠꀉꄂꉬꌐꀐ。ꀊꄶꄵꇓꁧꀐꄉꌤꅐꈭꐨꆏ，ꊿꈛꎼꈜꈴꌠꊽꉌꀋꃹꈧꌠꆏ，ꋀꊇꇱꌭꌊꅲꇫꇬꎷ。ꋋꌋꆀꎭꂵꊞꐂꑋꆹꃢꈜꆦꈚꄻꄉꑲꆀꈴꈭꅐꇁꌠꉬ，ꑠꀋꉬꇮꇬꆹ，ꇓꈓꑌꆹꀋꄐ，ꆹꄎꇮꇬꑌꀱꁖꇁꀋꄐ。ꃴꄿꏁꍅꆹꅲꌐꈭꐨꆏ，ꀅꈓꃅꋍꃢꇕꏒꑲꆀꉉꇬ：
“ꑠꈨꉬꑲꆏ，ꀋꃉꆏꀋꉻꃢꌺꂶꌠꆹꒃꌊꅥꌦꇫꎭꀋꉆꀐ。ꊿꋋꂷꅥꄡꌦꃅꊏꄉ，ꏡꁈꏂꄉꋍꈂꀸꇬꄉꂚꄏꅿꐪꊂꍈꊼꇅꅲꇬꂿꄷ。”
ꀊꄸꀈꏦꉪꅷꑤꍰꇓꈓꄉꂚꄏꎹꈹꆹꇬꊋꋠꐨꄀꇬꆏ，ꀅꌳꌺꃅꌗꇬꏂꇈ。ꇤꈏꇢꇑꏢꁮꇬꄉꄓꅊꁧꈴꒉ，ꑓꋪꋑꌠꆹꍻꇇꎇꇇꀋꂿꌠꂿꃅꆈꏸꀕꁬꌠꇬꉜꎍ。
“ꊞꐂꂶꌠꆹꀋꉻꃢꌺꂶꌠꒃꌊꇁꀕꀐ？”ꃴꄿꏁꍅꇬꅲ。
ꃀꌠꆹꆿꃀꁡꇤꇬꃅꄉꇫꃅꇷꒉꎍꒉꊋꈧꌠꃅꋊꇤꅐꇁꌐꑲꆀ，ꀊꄸꀈꏦꂶꌠꉉꌊꋍꅇꃅꅲꄉ，ꆺꃮꒊꃀꋮꄉꀋꉻꃢꌺꇬꀑꇬꀋꑴꃅꊨꇽꌠ“ꏢꇋ”ꇫꎭ，ꀧꈬꋬꂻꂾꄸꐛꅹ，ꋦꈭꀉꁁꂷꏭꆦꄉꀋꉻꃢꌺꂶꌠꆹꌌꀁꐯꃅꊨꀖꅲꀐ。
“ꋋꁧꊼꇅꀉꉘꍈꐛꀐ，ꑡꃅꏦꌊꇬꁖꀋꇁꑴꌦꌠꉬ？”ꋌꊛꄉꅱꌦ，ꉌꐒꌠꆏꇰꑳꑍꁱꋓꃅꎭꂵꊞꐂꂶꌠꉈꑴꋍꃢꉂꏣꌌꌤꃅꌠꐒ。
“ꀒ，ꇁꀐ，ꃴꄿꏁꍅꀋ。”
ꀊꄸꀈꏦꀱꑱꈐꇤꈏꇢꇑꏢꁮꇬꑌꎍꊌꀋꃅꀕ，ꎭꂵꊞꐂꂶꌠꑌꊁꈹꇁ，ꀂꏾꋋꂷꃅꃰꇱꉱꐬꇓꀋꁮ，ꈁꑓꋋꂷꃅꀇꐒꀉꄂꌐꄉ，ꑍꃀꑍꊂꈁꑓꑅꆈꂶꌠꑌꈜꈼꌊꅩꌦꀜꅍꈋꂷꌡꇫꎍ。
“ꑡꉬꌠꉬ,ꏦꌊꀋꇁꅀ？”ꃴꄿꏁꍅꇫꅲꐺ。
“ꑊꋌꋋꂷꆹꇯꍝꃅꊼꇅꑌꅥꀋꐕ，ꌌꑍꇅꌕꇇꀉꄂꅥꑴꌦꇯꆐ，ꌦꌠꌡꃅꇬꎍꄉꀀꃅꀀꇬꎷꀀꀋꌋꑴꌦ！”ꎭꂵꊞꐂꂶꌠꏈꉘꀕꃅꁮꎐꈨꑌꃅꉉꅷꐺ。
“ꀊꑴ，ꄓꇁꀋꄐꀐꈨꀋꉬꌒꀒ？”ꃴꄿꏁꍅꀊꅰꃅꉌꐒꑓꋩꇀꌦꀐ。
“ꄓꇁꀋꄐꑲꆏꀊꅰꃅꊿꇿꀐꍰ！ꉢꉜꇬꆹꈍꄮꇯꆐꌌꌉꇫꎭꋭꀐꌠꉬ！”
“ꉑꉎꉐ，ꅽꐛꄟꂶꌠꌋꆀꐮꌠꃅꇀꌦꀐ！”
“ꉑꉎꉐ，ꃴꄿꀋ，ꉢꅑꈨꀋꉬꃅꄉ。ꆏꉪꊇꆃꍈꇬꊼꇅꅲꉚꉐ，ꑊꋌꉱꃀꋋꂷꆹꌤꀋꂄꆈꒉꀕꌠꈍꑋꃅꋺꉏ！ꋋꆹꂚꀯꍈꏲꁇꏲꌋꂶꌠꉬ，ꂚꀯꍈꂶꌠꊨꀖꀠꂘꄷꆏ，ꋋꆹꑊꋌꌻꂷꀋꏮꐂꄩꉆꄉꊨꏈꇬꎷ，ꏇꃚꆹꇂꁮꂆꃚꏭꀋꋌꃅꊽꄸꆹꌋꉩ，ꇵꋍꋏꌊꎇꈀꄸꃤꑌꂤꀋꋌ！ꉢꀄꂼꂻꇬꂯꋍꑆꁬꌠꌊꐒꅷꐺꌠꀉꄂꂻꇬꎷ！”
“ꑊꋌꌻꋋꂷꆹꀉꐩꀋꀮꏭꀋꋌꃅꐈꋓꇨ，ꋌꄆꍣꏮꄆꃑꎼꇁꃅꇖꀋꅔꑲꆏ，ꑤꍰꇓꈓꇬꄉꉪꋋꒃꅞꀋꄐꌠꉬ。”ꀊꄸꀈꏦꉉꇬ，“ꃴꄿꀋ，ꇅꂚꃆꂮꎼꐝꉅꌐꄷꇬꑌ，ꄝꇬꏆꀋꉆꌠꉬ！ꉠꉪꐪꃅꇬꆹ，ꏮꂛꊨꃺꑌꊈꁵꎻ，ꋪꐥꌠꋪꎹ，ꐆꁯꌠꋍꇬꄉꐆꄍꌠ，ꎭꋺꌠꎭꀖꋍꇭꀧꇬꁊꎻ。ꑠꃅꐙꌠꑊꋌꌺꋋꂷꊏꇫꐥꄉꌊꑡꂷꃅꂯꆏ，ꋋꆹꇫꐥꄷꑲꆏ，ꉪꊇꆹꈍꃅꐥꈍꃅꌦꌠꂯꊿꋌꀋꐚꀐ！”
“ꈹꇇꇬꊐꄉꌠꉜꐎꁈꁧꄎꑵꀋꉬ，ꑊꋌꌺꋋꂷꌉꌦꇫꎭꇬꆹꃫꂷꆽꋏꌠꇯꀋꐰꌠ。ꄚꀋꃋꆹ，ꂚꀯꍈꂶꌠꆹꋋꇅꃅꆘꅝꇫꈴꁧ，ꃅꒊꃅꇁꆹꊿꋋꊨꀋꄅ，ꆿꃀꁡꇤꑭꁘꀕꈁꐕꅉꇬꃅꊋꋠꏡꋠ，ꉪꍛꀯꊈꑼꌕꑻꌠꆹ，ꈍꃅꑌꇨꃃꇫꊰꌠꋰꄉꌌꊼꇅꌤꌧꃪꃭꃅꎥꃪꑲꆀꍑꌠꉬ。”ꃴꄿꏁꍅꂶꌠꏟꈯꀕꃅꉉꏈꅷꐺ。
ꇤꈏꇢꇑꋯ，ꋋꇅꃅꇗꄃꀕꃅꐙꇀꌦꀐ。
ꋋꆹꆿꃀꁡꇤꌟꒉꈧꌠꏂꇫꁰꈘꃀꈿꌠꈀꄸꑌꅉꐚꌐꐛꅹ，ꊾꂷꇬꁣꏙꇁꌠꀋꐥ，ꀉꁁꄷꀋꁧꃴꄿꏁꍅꑮꃀꂶꌠꑌ，ꈊꋚꋠꌐꄷꆏꀂꌤꍈꀞꁧꌠꉬꄷꃷꇎꀋꃀꈧꌠꅍꄉꎭꁱꎭꃹꌌꎭꋩꌧꈿꁧꀐ。ꌺꀋꁨꇖꀋꄜꌠꑱꈐꆹꊼꇅꐰꀕꈩꀕꃅꐙ，ꀮꎌꅉꀮꎍ，ꇖꎌꅉꇖꎍꑞꑌꊱꀕꁨꀕ。ꇤꂾꅉꏯꇮꊙꂶꌠꆹꈾꊐꐛꂨꅍꎌ，ꇣꇁꅉꏯꇮꊙꂶꌠꇬꆹꅍꊐꐛꂨꅍꄉ。ꂿꃅꉮꌸꀊꋨꌕꈎꈳꅐꈭꐨꆏ，ꈜꎴꃅꄷꐛꌠꆿꃀꁡꇤꑌꇩꏤꑬꊂꂿꑘꁡꇤꈧꌠꌋꆀꐯꌟꃅ，ꌦꇬꈴꁧꌐꀋꇊꅉꇬꄉꑾꐚꂷꌟꃅꈭꅐꀐ，ꑡꑌꉘꁈꁉꃅꀻꎆꌐ,ꀊꅰꃅꒂꅐꌜꍣꐘꌠꄉꀏꄩꀖꄉꀻꎆ。ꇅꂚꆹꀈꏦꇬꑮꒃꎭꇁꈭꐨꆏ，ꉈꋍꃢꉈꃅꆿꃀꁡꇤꇁꋺ。ꋋꆹꁬꐴꁬꋌꎳꅉꇬꇮꃅꊾꂷꏃꌊꄚꇬꄉꁊꈴꃅꑐꇔ、ꑸꑽꁯꏂꌋꆀꑾꃅꈁꆺꑠꌌꊪꏿꇈ，ꊌꐨꌐꀋꄿꃅꐥ。ꋍꉻꊪꄉꌠꐥ，ꂱꑱꊨꏦꃅꊪꄉꌠꐥ，ꀒꐱꃅꉉꑲꆏ，ꑭꁆꑍꁆꅑꌠꑶꋦꑷꈀꐥꅉꃅꈲꅍꌐꀋꉆꃅꐥꌐ。ꃴꄿꏁꍅꄰꊖꁍꇬꑸꑽꁯꏂꏁꀠꀕꑠꋍꎆꋍꎆꃅꐒꇬꄀꄉꌐ。ꋋꆹꃴꄿꏁꍅꄰꌌꂱꑱꃄꅉꇬꊪꄉꊌꌠꉬ。ꀋꃋꀃꑍꑟꄮꇬꆏꆿꃀꁡꇤꑬꊂꑠꇬꆹ，ꈀꄸꑷꄰꉬꄿꂿ，ꇮꊙꇬꋚꊐꐛꂨꀕ，ꊖꁍꇬꁬꋌꑸꑽꁯꏂꑠꄀꅉꀋꊌꃅꎍꌐ，ꑸꑽꁯꏂꈧꌠꆹꌌꋍꑞꋍꑵꃢꈜ、ꌬꀮꌬꀏꑠꀟꆦꄉꌬꉆ，ꃰꊿꐥꐨꐥꄸꆹ，ꇯꍝꃅꌦꌺꄂꅪꂶꌠꃅꃴꃅꄅꁉꄉꊂꑠꃅꐥꌒꀋꋻꑴꌦꌠꉬ。
ꄚꂿꃅꀋꋌꄏ，ꋓꇗꉏꃰꇿꇫꐥꀋꐚ。ꀋꌋꀋꏢꃅꋋꇅꃅꇈꌺꇷꎿꄩꁮꅷꐺꌠꌡ，ꐥꐨꅿꏹꃰꈜꈧꌠꇬꃅꉒꇱꉱꆈꏸꀕꑡꑌꊌꀋꂿ，ꃰꊿꇫꐥꌠꉬꇮꋌꎼꈍꃅꇮꀋꐚꌐ。ꄚꇤꈏꇢꇑꏢꁮꇬꑌꎍꌠꍛꀯꊈꑼꌕꑻꌠꑌ，ꄡꇗꃅꇁꁈꀋꊌꇫꎍ。
ꈀꄸꑌꃅꇁꁈꀋꊌꄮꇬꆏ，ꅉꀕꃅꎭꂵꊞꐂꂶꌠꄈꄡꇗꃅꃴꈍꂤꃄꅉꈍꄕꀋꐚꃅꂴꅑꄉꋍꎴꉉꇬꎷ。ꋀꌕꑻꈯꄔꇓꇬ，ꎭꂵꊞꐂꅿꄈꋊꄈꀁꎴ，ꈎꄜꑌꀄꊭꄉꈂꀸꀃꈈꀋꅑꃅꅐꐚ，ꉌꂵꑡꉪꆏꈂꀸꑡꉉꀬ。ꋋꈨꆏꄧꀕꃅꋍꅿꉾꃪꅉꉬ，ꅇꆹꉉꌊꀊꅰꌸꅉꇬꌸꀋꄐꑴꇬ，ꄚꅉꀕꃅꋌꇱꌾꌊꃰꊿꈧꌠꆹꀒꁨꋍꁘꃅꌤꃆꊋꋠꐨꌌꐝꈷꌠꏡꁈꎹꈹꇬꎷ。
“ꉪꊇꆹꌺꇰꁱꐭꀋꇮꌕꑻꌟꃅꄚꇬꑌꌊꑡꂷꃅꄷꌠꉬꀋ？”ꎭꂵꊞꐂꌤꉪꈽꄮꇬꆏ，ꅉꀕꃅꇇꏸꇇꃀꌌꅳꁖꇬꆸꋏꇬꎷꑠꍈꋻꅑ，ꆏꉜꉐ，ꀋꃋꑌꄡꇗꋍꅳꁖꋌꇱꆼꋏꅩꍠꀕꌦꀐ。“ꃅꆳꑌꁏꅐꀐ，ꂶꉐꑌꐛꈴꀐ，ꇁꉚꅷꄽꂫꑟꇬꆏ，ꊏꉪꁳꈴꎻꌠꈝꃀꆹꀊꃶꁌꌙꀕꑠꏢꀋꐥꀐ。”
ꃴꄿꏁꍅꂶꌠꆹꇇꑍꁆꌠꎇꌊꋍꂴꊨꀭꌠꇬꉨꌎꅷꐺ。ꉪꆈꌠꏦꃤꃅꇬꆹ，ꁦꋠꂷꇫꐥꄷꆏꁌꇐꈤꌠꑠꌕꑵꆹꈍꄮꑌꀵꐺꇬꎷꑵ，ꋍꑵꌠꆏꅆꃅꏼ，ꋍꑵꌠꆏꉼꉹꋓ，ꋍꑵꌠꆏꂱꊨꍠꅍꊝꏢ。ꊝꆹꌺꃰꌌꇁꂱꊨꍠꌠ，ꂱꊨꅾꄮꇬꄉꅑꀉꁌꀋꁧꐊꏃꃅꉬꉎꁧꄹꉇꑟꌠ，ꌺꃰꂷꈁꑓꌋꆀꂱꀯꈭꇍꑠꇬꆹ，ꇯꍝꃅꒈꋌꁟꑻꃅꄉꇬꎷ，ꂴꊨꋍꏢꑌꄝꇫꅿꀋꄉꑵ。ꃴꄿꏁꍅꂴꊨꐍꎭꀕꋋꀮꆹ，ꄚꈜꎴꃅꄷꐛꌠꆿꃀꁡꇤꃅꄉꇬꆹ，ꃀꅉꆐꀉꁁꆹꐥꊋꐜꀋꈨꀐꌠꉬ。
“ꉈꏭꑠꇬꑡꀕꈧꆏꈨꇁꀋ？”ꊞꐂꌺ。ꃴꄿꏁꍅꂶꌠꂴꊨꐍꎭꅍꎍꀭꌠꌎꄉꉉꇬ。
“ꀋꃋꆹꑡꀕꑌꀋꈨꑴꌦ。ꉡꆹꑠꏡꉪ，ꀋꄹꄷꉪꊇꇅꂚꂶꌠꆹꇴꌊꉈꇁꀋꄐꑲꆏ，ꁡꇤꇬꆈꉼꈧꌠꆹ，ꋀꊇꀉꁌꀋꁧꇬꄉꅑꅷꇁꌠꆏ，ꈍꄮꈍꄮꑌꉪꊇꁏꐚꈧꌠꇬꆼꍅꌠꉌꂵꀉꄂꑌꅷꇁ，ꉪꊇꆹꀋꃉꆏꑡꍈꑌꉘꇉꋙꑌꀋꎑꀐ，ꉪꊇꆈꉼꈧꌠꄿꀕꀋꐚꆏ？！”
ꃴꄿꏁꍅꂶꌠꆹꋌꇷꋍꏼꐂ，ꇓꆈꀋꃀꂷꌟꃅꋍꉌꂵꇬꆼꍅꎍꌠꌤꃆꐘꌠꆹꉌꊒꈌꐱꌠꎭꂵꊞꐂꇱꉉꅔꁖꇁꀐ。ꋋꀋꎸꀕꑓꏮꁱꀋꐭꃅꉪꈾꇫꑌꎍꌠꀊꄸꀈꏦꂶꌠꉜꈭꐨꑲꆀ，ꌌꉪꉚꃅꅲꅷꐺ：
“ꐯꑴꇆ，ꉡꑌꋋꏢꉪꅷꐺꌠꀋꂸ。ꀈꏦ，ꆏꊼꇅꉉꉐ，ꉪꊇꉈꋍꃢꑤꍰꇓꈓꂿꁦꌦꅀ，ꀋꄹꄷꇅꂚꆹꎹꊊꑲꆏ，ꋋꆹꈍꄮꑌꇬꀋꅲꄷꌠꅀ？ꇯꍝꃅꉪꅿꆿꃀꁡꇤꀋꇁꀋꉜꀐꄷꌠꅀ”？
ꀊꄸꀈꏦꁱꀋꐭꃅꄓꌊꉽꐯꄌꌊꇢꇑꄩꄂꅷꐺ，ꊭꄎꄉꃱꏢꒉꏬꋀꊇꄐꂿꄷꐺ。
“ꇅꂚꆹꀈꏦꇬꉌꃹꌠꉬ，ꉪꆈꌠꀋꃋꌐꃶꉬꀐ，‘ꇌꉻ’ꆹꌌꑳꃅꄉꀋꉆ，ꑠꅹꉪꊇꆹꋩꌊꁡꇤꇬꇁꇬꑖꉬꐥꌠꉬ。‘ꏨꆉꑳꀋꁨ，ꃪꈌꌩꏪꑲꋉꇬꀀ；ꊴꐷꊈꂾꑳꀋꁨ，ꃪꑭꇆꆉꑲꋉꇬꀀ。’ꋋꆹꉪꆈꌠꏦꃤꉬ，ꇭꍣꄈꊿꋅꏦꃤꁌꀋꒉꀋꉆ。ꀈꏦ，ꆏꉉꉐ，ꑠꉬꀕꀋ？”ꃴꄿꏁꍅꂶꌠꀂꏾꈎꄉꈁꑓꎎꌊꄿꌦꋩꃅꏭꀈꏦꈁꑓꐛꐈꐨꉜꎍ。
ꀈꏦꆹꀊꅰꃅꀂꏾꋋꇱꈎꁡꊭꀋꃀꇬꇱꄉꑌꇈꄡꇗꁱꀋꐭ。ꉽꐯꇬꀇꐒꒉꈾꀜꆽꀕꃅꇬꊎꈾ。ꋌꑓꏮꒉꈾꀜꆽꀕꈧꌠꉜ，ꇇꑍꁆꌠꌌꀋꆏꃅꏂꂿꀕꌠꃱꏢꈧꌠꌌꍀꅷꐺ，ꉌꂵꑌꒉꈾꌟꃅꈾꇫꎍ。
ꀉꒉꃅꐂꀥꏿꀻꎆꌠꐩꋊꀊꋨꊭꄮ，ꃴꄿꏁꍅꂶꌠꑳꂴꆽꌧꇤꀈꃀꑍꁧꌠꆹꐯꇯꌞꎭꁡꇤꎷꏸꇤꄸꇬꃹꁧꌐꐛꅹ，ꊁꆏꇩꏤꍔꊱꏦꃤꈴꄉꊒꀐꑴꇬ，ꄚꋋꉪꅷꇩꏤꌋꆀꋍꉻꃅꊋꋠꌠꄀꄮꇬꆏ，ꄷꀋꁧꀊꋨꄮꇬ，ꋋꆹꁡꇤꇬꏃꂠꊿꏲꌋꑌꉬꄉ，ꀱꒊꀱꇁꊨꏦꑱꈐꊿꇬꀁꑌ，ꀉꁁꀊꏀꃅꑳꋈꄻꀋꅐꃅꉉꀽꈭꐨꆏ，ꄡꇗꌜꍣꄐꐏꑳꏢꁮꇬꉚꄉꀀꅷꀃꑍꋋꄮꑟꇁ。ꀋꃋꄚꋌꈚꇬꆹꄧꀕꃅꀋꉊꌤꃅꄐꅿꋚꋠꅉꃀꈿꅉꉬꅊꇈ。ꀋꃋꋋꇅꇬꆹ，ꄡꇗꇤꈏꇢꇑꏢꁮꇬꄉꃱꏢꍀꅷꐺꌠꀊꄸꀈꏦꂶꌠꉌꃀꈍꃅꑌꇗꄃꀕꐼꇉꀕꀋꄐꀐ。ꋋꎺꇁꀋꉊꐛꐪꄀ，ꀊꋨꄮꇬꆹꇯꍝꃅꁬꃨꌡꌠꋧꃅ、ꀄꂼꂻꌠꌡꌠꐩꋊꉬ！ꄡꇗꄚꇤꈏꋋꂷꇬꄉ，ꃆꄔꊷꆣꀕꌠꋍꑮꆜꈁꑓꋌꁨꅩꍠꀕ，ꉦꏪꇬꁦꌺꈜꀕꊷꆣꀕ，ꑓꏮꉙꀕꃅꐞꌠꃆꄔꇬꉜꄉ，ꋋꆹꆀꃅꁡꇤꑮꆜꉂꏣꉂꑟꌌꄉꉂꏣꉂꑟꉍꈄꈍꑋꎀꋻꑌꀋꐚ，ꃱꏢꒉꈍꑋꏬꂚꄏꄐꋺꑌꀋꐚ……ꃅꇴꃴꇉꀕꌠꈍꑋꆹꂚꄏꋍꑊꋌꇱꇊꐯꇯꄉꀋꐚ。ꇫꈴꁧꀐꌠꌤꆿꑠꆹꃅꇴꑌꀋꌡ，ꑮꆜꀄꂼꐈꇁꐥꐨꐛ，ꈝꃀꈛꎭꈛꅧꇈꊋꋠꄉꑓꁴꌦꅪꐊꑴꇬ，ꄚꄽꂫꆏ，ꌠꏀꑍꂷꉌꂵꉪꇊꋍꈜꑟ，ꉂꇁꑍꂷꉂꏣꇽꀋꉆꀐ。
ꑠꅹ，ꂚꄏꋩꌊꆿꃀꁡꇤꇁꄷꇬ，ꋌꉈꑴꀉꁁꑡꈨꉉꅍꐥꂯ？
ꃴꄿꏁꍅꂶꌠꄡꇗꋍꂴꊨꐎꎭꀕꀭꌠꌭꄉ，ꊛꄉꋍꉪꈜꇬꈴꄉꀁꋌꉉꅷꒉꑴꌦ：
“ꋌꀋꄹꄷꀋꇁꇮꇬꆹ，ꉪꊇꆏꑠꃅꇫꅲꂿ：ꇅꂚ，ꆎꆹꇭꍣꄈꑼꂷꉬꀕ？ꆎꆹꇭꍣꄈꎼꏹꂷꉬꀕ？ꄈꅽꏯꊿꋅꏦꃤꁌꒉꄷꇬ，ꆎꆹꑞꐛꅹꃅꏦꃤꋋꈨꀋꎺꇫꎭꌠꉬ？”
ꀈꏦꆹꇇꎇꂱꀯꄙꄉ，ꑊꏦꐆꃅꊼꇅꒉꇈ，ꋋꇅꃅꀱꑍꃀꑍꊂꋍꅿꐛꐪꃅꀬꑽꀬꇯꅝꃅꉉꇬ：
“ꃴꄿꀋ，ꈀꄸꂷꅽꏯꈌꀥꉐꀥꄷꌠꉬ？ꀋꃋꆹꇅꂚꂶꌠꎹꀋꊌꒉꄸꀋꅲ。ꎹꊊꑲꆏ，ꆏꉉꌠꌤꃆꋋꈨꆹꉢꋋꏢꃅꇬꀋꅲ。ꉢꑠꇬꀉꄂꇬꏮꅲ：ꆿꂷꑍꈭꑿꉻꇬꀋꃹ，ꆎꑍꃢꈱꉡꊏꀬꑴꅀ？ꋌꈍꃅꉉꄿꂿ，ꎭꂵꊞꐂꉣꑊꆹꋓꄉꐒꌊꆿꃀꁡꇤꇁꌠꉬꀐꍰ！”
“ꀉꁧꀕ，”ꎭꂵꊞꐂꉉꇬ，“ꉪꆈꌠꑮꃀꇑꈨꀉꄂꐥꀋꅲ，ꌐꃶꇑꃅꑠꆹꈨꂯꈨꀋꋻ，ꀊꅰꃅꂿꑌꂿꀋꋻꄷ。”
ꇤꈏꇢꇑꋮ，ꀃꂯꈊꃀꆏꉘꃀꃢꌠꒈꃚꇬꈌꐚꇁꀐ。ꄚꃱꏢꒉꇓꍔꇬꈮꁁꅝꌐꄷꆏ，ꋀꊇꌕꑻꌠꆹꑌꀋꄿꇁꉚꊌꀋꃅꌦꀐ。ꀃꈈꉈꏭꄡꇗꃰꐛꆈꁍꀕꑴꌦ，ꀋꉻꃢꌺꂶꌠꑌꄡꇗꊏꌊꇬꀋꇁ。ꃴꄿꏁꍅꂶꌠꑓꐕꊖꁍꇬꅑꎍꌠꇌꑆꇬꋒꂶꌠꉜꅷꐺ，ꋋꆹꉈꋍꃢꌤꃆꊽꉈꇬꐘꌠꉪꅷꐺꌦꀐ。ꇌꑆꇬꋒꋋꂷꆹꋋꐊꄉꌥꆹꐤꆹꀋꑴꃅꎭꅗꅧꅗꄉꊋꋠꐯꊋꋠꃅꁏꐚꁡꇤꋉꐛ，ꍠꇙꀕꃅꊨꏦꈁꏾꃅꇈꐬꆠꃰꈻꏸꏦꑠꌕꈎꐥꋺ。ꊁꆏꐙꁧꌋꈧꌠꇱꇊꄉꌉꌠꇂꃴꄉ，ꁧꀑꇉꄩꊾꂿꇓꁨꐛ，ꎭꈐꎔꇫꐥꇈꌠꋋꆹꀉꁁꑡꑌꀋꐥꌐꀐ，ꂁꄉꇌꑆꇬꋒꋋꂷꀉꄂꋍꇱꀨꎹꅷꀋꃋꀃꑍꋍꄮꑟꇁꌠꉬ。ꅑꅷꌅꈌꐥꌠꄻꀱꄮꇬꑟꄮꇬꑲꆀ，ꊿꇬꀋꈁꀋꅲꀋꌬꌠꁿꇓꂷꇬꄉꇌꑆꇬꋒꂶꌠꋋꇱꀖꌊꇁꄉ，ꀉꏀꃅꇂꋌꌎꄉꈭꐨꑲꆀꊿꋋꎼꄻꇙꌌꇙꌠꂿꃚꂿꇁ。ꃅꑍꋋꑍꎺꄅꈨꄀꂾꄸꐛꅹ，ꋋꆹꂴꊨꉘꄉꌠꉬ，ꋋꆹꁡꇤꐥꌒꄻꌒꆹꋍꂴꊨꌡꃅꆈꏪꀕ，ꃷꌐꑘꀋꉬ，ꐥꋊꐥꍂꎳꑟꉂꌠ。
ꄚ，ꋋꇅꀉꄂꃅ，ꈨꌺꌬꑋꃅꇴꃅꏢꇁꅊꇈ，ꀋꉊꄹꈎꅑꅷꇁꌠꆏ，ꃰꊿꐥꐨꆹꃅꉒꇱꉱꆈꏸꀕꑡꑌꊌꂿꀋꉆꀐ。ꇯꍝꃅꐙꁧꌋꆹꒊꃀꇬꇓꂵꌡꄷꌠꅀ，ꇭꍣꄈꆹꒊꃀꀇꐒꌡꄷꌠꅀ，ꀇꐒꈴꅐꈭꐨꆏ，ꇓꂵꆹꐥꋊꐥꍂꃅꀋꇙꀋꑐꀐꄷꌠꅀ？ꋋꉈꑴꊛꄉꉪꀋꉆꀐ，ꑠꅹꑓꏮꎭꂵꊞꐂꇬꊼꇅꑓꂭꋏꈭꐨꆏ，ꎭꂵꊞꐂꆹꏭꉈꑴꋍꃢꅊꁧꉜꒉꌦꄷ，ꀋꉻꃢꌺꑓꋪꁉꄏꄷꆏ，ꈛꎼꀋꄐꑌꐔꌊꇁ；ꇯꍝꃅꇰꐯꇰꌠꉬꑴ，ꈍꃅꄉꂚꄏꈭꋏ，ꐥꌒꄻꌒꑘꒃꌠꌌꆿꃀꑊꋌꌺꌡꋋꂷꇬꉘꇉꇁꌠꉬꀋ，ꀋꇷꇂꇷꋠ！……
ꎭꂵꊞꐂꆹꇤꈏꇢꇑꏢꁮꇬꄉꄓꇬꉆꊌꀋꃅꀕ，ꂱꀘꑍꂷꌗꃀꌗꌺꐮꑘꀋꒃꃅꀥꈐꏭꃹꇁ。
“ꀋꉻꃢꌺꀀꐚꐙꀐ？”ꎭꂵꊞꐂꆹꀋꎺꃅꇬꅲꅷꐺ。
“ꀀꐚꀐ。”
“ꀀꐚꑲꆏꑡꃅꉆꐥꃅꏃꌊꄚꇬꀋꇁꌠꉬ！”
“ꀋꉬꀐ，ꀋꉻꃢꌺꆹꐙꁧꌋꑍꂷꐊꄉꆶꁈꁧꀐ！ꄷꀋꁧꉪꂱꀘꀃꈈꃱꈿꌬꊿꂷꑋꋀꇱꅥꀙꐯꀙꃅꇬꄉꇉꀐ。
ꋀꌕꑻꋌꇷꑑꃹꏾꁵꀕ。ꑤꊈꎼꏹꊿꇱꅥꇂꃴꐚꄹꉈꅑꅷꇁꌠꆏ，ꐙꁧꌋꈧꌠꉈꋍꃢꐂꁏꐚꀂꏽꑌꇀꌦꏦꄉ，ꁡꇤꑭꊂꐙꁧꌋꈍꑋꁯꌠꆹ，ꉈꃅꊿꁆꌊꐏꆫꄉꀐꌠꉬ。ꄚ，ꀋꃋꆏꈍꃅꄉꋋꇅꃅꁈꁧꄎꌠꉬ？ꀊꄸꀈꏦꂶꌠꑠꃅꎭꂵꊞꐂꇬꅲ：
“ꀃꂰꈊꃀꀃꈈꃱꈿꌬꌠꁧꀋꎆꅀ？”
ꂱꀘꑍꂷꌠꐮꆦꄉꀱꇬ：
“ꁦꎆꀐ，ꑲꂿꑳꊂꃅꁦꎆꄉꀐ！”
“ꀃꂰꈊꃀ，ꊞꐂꀾꍈꉈꃅꉪꏭꌗꋏꄉꇬ，ꑊꋌꀊꋨꈨꎼꃅꃏꑽꇀꏦꄉ，ꉪꏭꑍꃀꑍꊂꏭꀋꋌꃅꋓꉪꁨꄉꄷ！ꄚꀋꉻꃢꌺꋍꃅꀋꂄꎻꀋꈁ，ꉪꊿꇯꋌꇱꅥꂷꊂꌸꈭꐨꆏ……”
“ꃰꌦꉐꂷꋍꒈꒊ，ꉈꆏꃅꉒꑌꃴ，ꀋꉻꃢꌺꏢꁮꇬꀀꌠꃺꃶꀁꑳꑍꂷꑌ，ꎧꑱꐯꅤꋒꃅꁈꇫꈴꁧꀐ。”
ꃺꃶꀂꑳꋋꑍꂷꑌꐙꁧꌋꀉꑳ，ꈎꄜꀊꅰꀊꀋꒉ，ꄯꒉꈍꑋꈓꌶꋻ，ꈍꃅꑌꎭꂵꊞꐂꏲꂘꌠꉌꀋꃹ。ꎭꂵꊞꐂꅇꈨꊋꀋꃅꀕꇬꅲꌦ：
“ꈍꏯꉜꄉꁈꁦꌠꉬꀋ？”
“ꋍꑊꑮꃀꉉꇬ，ꁈꁧꌠꀋꉬ，ꑤꍰꇓꈓꄉꅇꎹꁧꌠꉬꄷ！”
“ꅇꎹ？”
“ꉉꇬꆹꉪꊇꇩꏤꇥꀯꐒꈄ，ꉈꆏꋍꏅꌤꑘꌌꊨꏦꃤꃅꀞ……”
ꌤꃆꋋꐘꆹꇯꍝꃅꆹꑽꀐ！
ꀊꄸꀈꏦꉌꐒꌠꆏ，ꀋꉻꃢꌺꁈꁧꌠꅔꁖꄷꑲꆏ，ꂚꄏꇬ“ꈐꆹ”ꌠꌤꑘꐘꌠꇬꁣꏙꌠꏦ。ꀋꎺꃅꊖꁍꇬꄉꇌꑆꇬꋒꂶꌠꋌꌵꎼꇁꇈꊛꄉꋋꇱꏹꎭꂵꊞꐂꀵ：
“ꆏꉆꐥꃅꂱꀘꈧꌠꊥꇬꌊꇁ，ꐙꁧꌋꈧꌠꉬꇮꏦꌊꄐꇬꌶꅉꇬꇁꌐ，ꌺꃰꌋꅪꃀꌠꀉꑳꐯꇯꏓꄉꌌꐏꏦꇁꌐ，ꋀꊇꁈꁧꂿꃅꀄꂼꂻꇬꂯꈑꆠꃬꄉꁊ！ꉢꊿꑍꂷꏃꄉ，ꃆꀞꋩꄉꀋꉻꃢꌺꈹꁧꂾꄸ！”
ꇌꑆꇬꋒꂶꌠꅝꀕꃅꂿꈴꀐ。ꊿꒈꃚꏈꃚ，ꈌꃮꃚ，ꊿꀥꐺꌠꑭꁘꂿꃚꑠꉬꇮꃅꃰꐛꆈꁍꀕꌠꈊꃀꄉꋓꃅꂿꇁꌐꀐ。
ꈜꎴꃅꉜꇬ，ꁡꇤꊂꆈꇈꂿꁦꀑꀉꄂꀀꑌꇴꌞꐯꇴꌞꌠꌡꃅꌙꈈꀕ，ꆺꃮꒊꃀꄩꀇꐒꁨꑭꂾꃚꆹ，ꃆꀞꈍꑋꂷꇬꊎꋓꀥꏿꌠꋌꁨꉜꅐꇁꉆ，ꃅꊭꌡꃅꀥꌊꈁꉜꆈꆈꏪꀕꌠꌧꂓꏪꇬꃹꁧꌐ。
ꊁꊛ：ꉒꈌꈬꇬꉂꏣ(ꊰꃘ、ꊰꏁ)http://yi.yizuren.com/plus/view.php?aid=133
ꉒꈌꈬꇬꉂꏣ(ꊰꉬ)
ꄜꃑꄮꈉ： 2013-04-01 | ꁰꄻꊿ：ꀉꈌꏬꌋ
ꇁꀦ： 《ꉒꈌꈬꇬꉂꏣ》
ꁰꄻꌠ：
beleys ｜
ꄜꃑꌠ：
