ꀨꏾꌠ > ꃆꃀꁱꇐꋽꇐ

ꍬ ꋠ ꄮ
ꄜꃑꄮꈉ: 2013-08-18  | ꁰꄻꊿ:ꀐꑌꃇꌒ

ꇤꈇꇬꌩꃅꇴꌩꆈꈾꑠꇤꄻꇬꊎꄉ。ꀊꍷꃅꇢꌺꂶꌠꋍꑮꃀꌋꆀꐯꇯꇣꁁꋚꃴꐺ。ꑮꃀꂶꌠꃅꇴꌤꑓꁴꌨꅉꃅꅊꁨꅐꇁ,ꀊꍷꃅꇢꂶꌠꆹꇇꋍꁆꆏꏾꇇꇬꌭꄉ,ꋍꁆꄸꐧꄙꄉꃅꐂꇓꇶꌠꉆꄉ,ꇨꇅꃃꐆꃅꋌꄷꂇ:“ꀉꄉ,ꆏꃆꄔꇣꌠꊼꇅꀖꏦꄉꉚꇆ!”ꄷ。
  ꑌꂾꑌꌠꃀꌠꑅꆈꉙꃅ,ꉬꊰꈎꀑꂪꐥꑠꂷ,ꑊꑆꇬꑊꈜꀉꑌꏢꇬꅑꀐ,ꈁꑓꂶꌠꉜꇬꈤꐙꃪꐚꀐꑴꇬ,ꀈꈥꄸꑓꋪꑍꁆꌠꏷꌬꅍꋬꐯꋬꑴꌦ。ꋋꇅꇬꆏꑷꇤꇍꃀꑠꏢꌌꈌꋉꄉꇫꑌ,ꀂꏾꂶꌠꋌꏂꋍꁀꏯꉜꄉꁂꄹꑳꌧꇬꎷ。ꋍꑲꃅꇴꈧꌠꐂꇁꌩꇣꌠꈽꄉꇴꇗꄹꑳꃴꉜꄉꀥꋓ。ꌺꅇꇫꌠꋌꋋꀋꈨꇬꀋꏯ,ꀋꑇꆺꌋꃅꋍꃭꇁꈫꌠꀉꄂꋌꍧꇙꋍꇅꁳꇈ,ꄡꑠꃅꇫꑌ。ꏮꋍꈁꑓꇬꉜꎼꇁꇬ,ꑊꉩꅍꑞꉪꀋꐚꃅꀱꋦ。ꑊꑆꋌꎺꄉꇬꆏ,ꑊꈜꈧꌠꀊꅰꃅꁮꅼ,ꀊꅰꃅꂿꐚ,ꄚꀈꈥꄷꄡꇗꇨꉻꑌꀊꅰꃅꋦꀐ。
  “ꃀꌠꊾꇠꋋꂷꑞꏢꉪꌦꀋꐚꀐ……”ꃅꇢꌺꂶꌠꋍꃀꌠꑠꃅꇫꑌꇬꆏ,ꀱꉇꑴꊉꋧꊉꑍꄹꏇꅉꃅꋌꋋꆹꌊꃆꄔꇣꌠꀖꏦ。ꃅꇢꆹꏃꈓꄉꇬꆏꀉꂿꌦꀐꌠ,ꋍꀉꄉꐋꀋꌠꋋꂷꋍꑊꀉꄂꐮꐊꅷꀋꃅꑟꌠ,ꀄꊭꄮꇬ,ꋍꉔꋑꀋꋒꋍꀉꄉꂷꇭꑭꑌꄉꑠꃅꌤꉪꄮꆏ,ꋋꑌꀀꀋꅲꃅꇇꇊꑍꍈꌠꄻꀉꄉꁡꊭꀂꏽꑕꄉꀉꄉꈿꑌꇬꎷ……
  ꃅꇢꋋꈨꉪꇬꆏ,ꄡꁵꍃꃅꃆꄔꇣꌠ“ꁉ”ꄷꋌꂡꏦꄉꇈ,ꀱꑮꃀꌋꆀꐯꇯꐂꇓꃴ、ꒉꇸꄉꋚꐙꌠꃅꅐꄉꇬꆏ,ꑖꈄꌺꃅꃀꌠꏭ:“ꀉꄉ,ꋙꋠꇁꌶ”ꄷ。ꀊꍷꀉꁌꄡꇗꑊꉩꅍꁭꇬꑌꀋꐭꃅꇁꌊꋀꈽꋙꋠ。
  ꈀꄸꑌꁮꀋꐭꃅꇫꑌꄉꋙꋠꇬꆏ,ꃅꇢꄰꌺꉬꈎꄉꍇꌠꀀꍹꏡꌠꋌꇵꋚꄩꎭꇈ,ꋌꆹꌊꀉꁌꂶꌠꆼꈠꄉ:“ꀉꁌ,ꆏꀃꑍꉢꏁꇌꆫꁧꂸ!”ꄷ。
  ꌺꑮꃀꂶꌠꋋꈨꂿꇬꆏ,ꀉꑳꂶꌠꏭ:“ꃇꎓꀋ,ꄡꈩꃅꄉꋛ ꋚꋠꇁ!ꀏ——ꉠꑘꀕꀋ!”ꄷꌺꂶꌠꈻꎷꇬꆏ,ꀉꁌꂶꌠꁮꐭꀐ“ꇬꈧꎽ,ꋍꈁꏾꃅꏭ”ꄷꇈ,ꌺꑮ꒜ꂶꌠꉪꀋꈴꃅ:“ꀉꁌꋋꂷꑍ꒜ꑍꀉꑳꍈꏭꀋꅲꂷꉬꇈ,ꀃꑍꑞꉬꂯ?”ꉂꇫꑌ。
  ꇖꑳꂶꌠꋌꅰꉥꑣꌺꅍꋍꂣꈐꑌꄉꋠꏭꈭꐨꆏ,ꌺꂶꌠꏭ:“ꉪꀋꃅꎼꈎꂿꇌꏡꌠꌌꈎꏅꅀ?”ꄷ。
  ꌺꏤꑱꐪꅇꂷꋋꇬꈨꇬꆏ,ꋌꇷꋚꑋꈾꀋꀬꃅꑓꄆꅍꇬꑋꄉꀐ。
  ꌺꂶꌠ:“ꀉꄉ,ꆏꀋꃶꌑ?”ꄷ。
  “ꀋꃶꇆ、ꀋꃶꇆ,ꉢꇯꍝꃅꉉꂷꄸꇆ”。ꀉꁌꂶꌠꃶꐚꃅꋌꄷ。ꑓꋪꑍꁆꌠꀋꇊꆏ:“ꉢꑞꑍꃄꈌꄐꃅꉉꋺꇆ”ꄹꃅꇬꀋꏯꐙ。
  “ꋋꆏꑞꃅꃶꅇꂿꅅꑠꇬꐭꇁꂷꉬ,ꆏꀋꐚꈨꀋꉬꀐ,ꉪꂿꇌꋋꏢꀋꉬꆏꑲꋦꄎꑴꅀ?”ꌺꂶꌠꐒꌠꑌꐊ,ꉪꀋꈴꌠꑌꐊꃅꋌꄷ。
  ꀉꍸꀉꁌꂶꌠꃶꐚꃅ:“ꀋꉬꀐ,ꌌꈎꀋꏅꑲꑌꌌꃷꇫꎭꑲꆀꍑꀐ。ꉢꈨꇬꇩꏤꏦꃤꃄꅉꀧꊨꏦꁵꋋꏢꀋꌬꌦꃅ,ꐆꌊꉈꑴꐯꇯꌦꀐꄷ,ꃄꅉꑌꐆꐯꇯꃅ,ꐯꇯꑘꃅ,ꐯꇯꋙꋠꀐꄷ,ꃅꇌꍶꑿꑌꐆꐯꇯꁨꌦꀐꄷꄉ,ꌞꊿꑋꇌꃷꌠꃷ,ꑿꅥꌠꅥꃅꇰꀐ!ꉢꎆꋍꑵꆹꀋꐥꑴꇬ,ꀨꎹꆽꃴꀕꌋꆀ,ꀋꄹꄷꇯꍝꃅꐆꐯꇯꇁꑲꆏꉢꋋꀋꀬꀐ。ꀋꃅꇯꆏꃷꑲꆏꎆꃀꆹꉪꃤꐛꀐꈨ……”
  “ꀒ——ꑠꉬꅊꇈ!”ꌺꏤꋋꇅꑲꆀꅲꈴ,ꉪꐛ。
  “ꀉꄉ,ꑠꃅꉪꀋꇮ,ꈀꄸꉉꆎꇰꌠꉬ?”
  “ꀊꐞꃀꌠꄸꇆ,ꀃꏤꑋꈍꃅꇮꀋꐚꇫꎍꑴꍰ!”
  ꃀꌠꋌꑵꇆ,ꀈꃀꇬꆏꀉꑳꀋꏯꐙꇁꑵꉬꅊꇈ!……ꅑꑌꅑꀋꀵ……”ꃅꇢꑠꃅꋍꃢꉪꈭꐨꆏ:“ꀉꄉ,ꋋꈨꆹꐮꈨꀋꉬꌠ,ꊿꈱꌊꇫꐺꌠꄸ。ꐆꄷꑲꑌ,ꎹꉼꍗꑴꉬꃅꄉ,ꐯꇯꑌꄡꁨꇁ,ꈲꇁ,ꋠꇁꌠꀋꆆ,ꉢꉪꇬꆹꈬꈎꊰꈎꈐꆹꏦꃤꋋꏢꀋꐈꌠꄸ,ꉪꅍꀋꐥꃅꇇꆹꇤꄉꃅꄹꌶ。ꆏꉉꋋꈨꉡꑌꈨꀐ,ꇯꍝꃅꑠꈨꇬꀋꐥꌠ。ꀨꍝꇬꑌ,ꉪꏭꎔꎗꃅꊋꇤꄉꑘꁨꄷꑠꀉꄂꅑ。ꆏꉉꑠꁢꊧꇬꀋꐥꌠ,ꊿꈱꄸ”。
  “ꊁꋍꏢꃅꇬ,ꀋꄸꄷꐆꐯꇯꄷꇬꑌ,ꉪꇌꌉꑿꅥꋠꇫꎭꌐꑵꅀ?ꄻꐯꇯꑌꉪꎁꐊꑴꌦꃅꄉ。ꉪꋠꌐꆏ,ꌺꇖꊂꋊꈨꇬꀋꐥꀐꅀ?ꋀꑞꌌꃄꂿꂯ?ꈍꃅꐥꂯ?ꀊꐮꈭꃅꄉꉉꇬ,ꀋꄸꄷꊿꉬꇮꑠꃅꉪꌐ;ꑠꃅꀕꌐꆏꉪꇩꏤꈍꄮꑲꆀꇖꑵꐛꏀꋉꐛꂯ?ꈍꄮꑲꆀꉪꊿꋅꋋꑷꌞꉎꎆꇁꂯ?ꈍꄮꑲꆀꌣꈚꇁꂯ?
  “ꀒ——,ꑠꉬꅊꇈ,ꉡꆹꃀꌠꐛꄉ,ꁱꂷꑌꀋꌧ,ꊿꈍꃅꉉꆏꈍꃅꐙꀐꎻꈁꄉ,ꌞꊂꀉꄂꈹꑲꌧ。
  “ꀃ——ꊾꂷꇫꐥꇬꂱꑲꊨꏦꉌꂵꂷꑌꑲꆀꍑꑵ,ꀋꉬꆎꊿꊏꈁꏾꃅꑌꎭꉆꑵꍰ!”ꌺꂶꌠꋌꄷꈭꐨꏮꀉꄉꉜꄉ,ꋍꁯꋋꑷꃅ“ꉎꉐ”ꃅꒉꇫꑌꀐ。ꀊꍷꃀꌠꈁꑓꇬꑊꑍꃅꑄꀐ。
  ꍬꋠꈭꐨ,ꎆꈤꀐ。ꀉꍸꃀꌠꆹꇿꅉꃅꇖꑳꌋꆀꐯꇯ“ꉖꉐ”ꃅꎆꆫꈉꇬꄉ,ꀊꁌꇖꈩꐋꃅꐯꏀꐯꀖꇫꐺ。ꋀꈩꅈꇬꒈꃚꉏꃚꐛ……                                
 

ꇁꀦ: 《ꆃꎭꉜꇐꁱꀕ》 ꁰꄻꌠ:  |  ꄜꃑꌠ: beley ꌤꃅꅉ