ꀨꏾꌠ > ꃆꃀꁱꇐꋽꇐ

ꈎꏅꀐ
ꄜꃑꄮꈉ: 2017-12-11  | ꁰꄻꊿ:ꃅꑖ

ꌨꏾꏂꇁꌦꀐ

ꈭꏂꏮꇁꌦꃲ

ꑳꉎꀠꆿꏾꊰꀐ

ꑳꐮꏜꏪꏂꒉꌦꃲ

ꀋꋓꀋꉪꃅꈎꏅꑟꇁꌦꀐ

ꈎꏅꆹꀉꄉꑊꈜꌡ

ꉜꅊꇈꆏꄄꍅꀕꃅꆀꃅꁡꇤꑟ

ꈎꏅꆹꀉꂿꑓꋪꌡ

ꐤꅉꐤꅉꃅꊌꂿꀋꉆꃅꄉꇁꇬꎷ

ꈎꏅꆹꅫꃀꀄꊭꍇꌠꌡ

ꋍꈓꋍꃢꃅꀿꃀꇤꑭꑟꇁꇬꎷ

ꈎꏅꆹꐋꀨꄊꀖꉪꑊꌡ

ꉜꅊꇈꆏꐮꐞꄚꈴꁧꃲ

ꌨꏾꀋꏂꀞꉂ

ꏾꏂꊰꉠꉌꂵꌸ

ꈭꏂꀋꏮꎼꈀ

ꈭꃀꐞꉠꄩꈴꁧ

ꀃꑍꑠꇬꏭ

ꇤꈏꇢꇗꑌꌕꂷꌠ

ꋍꂷꑋꉢꐍꑌꀋꄐꃲ

ꒉꇢꃪꇢꐤꅉꎴ

ꅐꅑꉆꄉꃰꇁꇬꑌꇁꉚꏦ

ꀅꌳꃅꄉꇁꂿꄷꑌꀋꂥꏦ

ꆺꑳꏂꃴꏭꈎꏅꇁꋍꑍꑌ

ꎧꎔꎧꆈꍔꈈꀿꃀꂪꂸꄐ

ꉠꅿꒆꁍꏭꃰꊿꇫꐥꌠ

ꇤꉎꀿꑭꌒꀿꑭꊷꆣꀕ

ꇤꐮꇖꈩꌒꒈꃚꎓꁨꀕ

ꃮꏸꄒꁈꌡꃮꆜꄇꇗꐰ

ꊿꇬꋬꂻ ꈎꏅꃅꌒꅊꇈ

ꋍꈓꋍꃢꏅ ꏄꅉꎔꅉꑟꅊꇈ!

          ꋬꂻꈨꅪ!


ꇁꀦ: 彝族人网 ꁰꄻꌠ: wuda  |  ꄜꃑꌠ: