ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꉆ)
ꄜꃑꄮꈉ: 2013-03-01  | ꁰꄻꊿ:ꀉꈌꏬꌋ

  ꂴꊛ:ꉒꈌꈬꇬꉂꏣ(ꏃ)http://yi.yizuren.com/plus/view.php?aid=124          

                ꉆ
  ꂚꄏꆹꋋꇅꃅꀀꐙꇀꌦꀐ。
  ……ꆍꊇꀋꃉꆏꇁꌊꌩꈤꒉꈤꂫꍈꃅꐙꅉꇫꑟꇀꌦꀐ。ꉸꊉꀘꂽꄨꁥꌠꆹꉬꇮꃅꊰꉬꉖꈊꃀꆏꅥꈔꌉꈔꉱꇤꌐꀐ……ꆍꊇꆹꂨꁖꂿꄷꉪꌠꅀ?ꃄꇖꄹꊂꇿꇬꑌꁌꄝꂽꑼꀉꄂꉬꌐ……
  ꈍꃅꌠꉬ?ꉡꆹꉜꅊꇈꂿꆏꀀꑌꃹꒉꀐꌠꉬꅊꇈ。ꌞꇦꀨꇁꀠꅇꁊꌠꆹꋍꇅꂯꑭꀋꆏ,ꉡꆹꈍꃅꄉꀀꑌꃹꄎꌠꉬ。ꂚꄏꋌꉜꇬꇤꋲꇨꀐ,ꄚꃅꇴꃅꇴ,ꃅꏢꃅꏢꌠꂾꃚꅿꅥꐷꌠꇂꃴꄉꇬ,ꋋꆹꑞꑌꀋꉪꀋꈾꃅꀀꑌꃹꒉ!ꋍꅳꀧꆹꊉꀕꊉꃅꇬꊎꂿ。ꀁꉘꍈꐛꇬꆏ,ꋋꇅꃅꌙꈈꀕꃅꇫꎍꌐꌦꀐ。ꃅꃴꃄꅉꑠꒈꒊꑠꂷ,ꀋꇊꇬꇿꇬꑌꀀꑌꇴꌐꀐꌠꌡꇬꎍ—ꊿꏇꃚ、ꉌꊭꂾꃚ、ꁯꍛꁯꄸꏄꃚ、ꈌꃮꃚ,ꀉꁁꄷꀋꁧꃅꆳꁏꃚ、ꇉꅼꒈꌺꀅꃚ、ꂾꃚꉬꇮꃅꐪꀋꊌꁖꀋꐥꀐꌐꌠꌡ。ꂚꄏꆹꀂꄁꆞꀋꇔꃅꄉꀀꐛꅹ,ꉌꂵꇬꊼꇅꇙꇈ,ꀋꎺꃅꀀꈤꇬꄉꋌꐂꑣꄓꏿꇬꉆ:ꈍꃅꌠꉬ,ꉠꅳꀧꋌꇱꀜꐆꇫꎭꀐꌠꅀ?
  ꀀꈤꄈꅉꆹꌍꑓꌋꆀꋓꃅꎍ。ꋋꆹꋋꇅꃅꇭꀧꎎꌊꅳꀧꇤꌍꑓꇬꊒꄉꊼꇅꅲꇬꆏ,ꂾꃚꍈꑌꐜꀋꈨ。ꋌꀅꌳꌺꃅꈂꀸꊼꇅꌌꍝꃅꈩꇬꆏ,ꃚꋒꆹꄇꇖꀕꃅꇁꋍꅳꀧꇬꃹꇁꑴꌦ。ꀒ,ꉜꅊꇉꂿꆏ,ꇦꀨꇁꀠꅇꁊꌠꆹꆏꀐꅊꇈ。ꑞꐛꅹꃅꆏꇨꎭꌠꆏꉬ?ꋍꅿꅳꀧꀜꀋꐡꑴꌦꌠꉬꅊꇈꍰ。
  ꋋꆹꎺꇊꐝꄧꀕꃅꀋꉊꑸꎭꄉꌉꈿꀊꋨꃢꋌꎺꉆꃀꉱꈐꇬꊐꄉꑴꌦ。ꀊꋨꄮꇬꋌꂽꄻꀊꉗꀋꐛꑴꌦꄉꆃꄐꇬꁰꀕꌤꃅꐺ。ꑸꎭꃅꄷꐏꎍꌠꁮꐚꁥꌠꆹꇯꍝꆸꉂꐯꆸꉂꑠꁥ,ꂱꑱꅉꏯꈀꄸꑌꄇꍩꁉꄉꌌꐯꌉꐛꅹ,ꊿꑍꂷꐮꀋꁆꑌꄉꅇꉉꇬꂯꐯꊌꈨꀋꄐ。ꆃꍈꉉꋋꇰꇬ,ꀋꃉꉪꆃꌠꆹꌤꀋꐥꀐ,ꀀꑌꇴꏾꀐꇬꁨꎇꇫꊼꇅꀀ。ꈜꎴꃅꄊꀙꎭꉜꄉꏹꄮꇬ,ꃅꈊꃅꄜꃅꈛꎼꁧꇬꎷ,ꃅꐎꈍꑋꑍꃅꀀꑌꇴꀋꋻꐛꅹ,ꑓꋪꊼꇅꂭꐯꇯꄷꆏ,ꑍꀕꑌꃅꀀꑌꃹꁧꇬꎷ。ꋋꇅꃅꀀꐚꇁꇬꆏ,ꋍꑞꋍꑵꄇꍩꉬꇮꃅꆏꄉꀋꅥꌐꀐ,ꆃꄐꂶꌠꆹꈍꄮꇬꇯꆐꂵꀒꁨꆹꀐꅊꇈ。ꋋꆹꒊꇐꀉꒉꃅꑠꂷꀖꅐꇁꀐ!ꃚꋒꋋꇅꃅꐛꐈꁏ,ꊽꌋꏣꏓꈌꋌꌌꇙꋏꀕ,ꉜꅊꇈꂾꆏꋋꆹꉈꑴꋍꃢꉇꉻꇱꁁꀕꉌꌼꀖꎼꇁꄉ,ꀋꎺꃅꀀꃅꃹꌞꌠꇬꄉꀀꐚꇁꌠꉬꅊꇈ。ꀊꋨꄮꇬ,ꋋꆹꍉꄊꑍꏢꌋꆀꇦꀨꅇꁊꇁꀠꏢꌌꂵꅷꑸꎭꁦꀑꊐ, ꄧꀕꃅꄽꂫꃢꌠꊿꇬꒃꄮꇬꊝꅊꇈ。ꀋꃋꋋꇅꇬꆹ,ꋋꄉꂯꊿꇬꂷꐛꄉ,ꃅꐎꍝꇙꀕꋍꈓꂷꊿꇱꈢꃘꍹꀉꄂꐥꌠ“ꇌꉻ”ꋋꂷꇬꊐꄉꀐ。
  ꀋꅞꉖ“ꀋꆏꃅꌉꈿ”ꌠꆹꄽꂫꆏꋌꋰꄉꈳꅐꇁꀐ。ꋋꆹꃅꃴꃄꅉꏯꈀꎭꀕ!ꉈꑴꆏꀋꉻꃢꌺꏭꑌꈀꎭꀕ!ꀋꄹꄷꊾꇰꋋꂷꅿꂄꃅꌠꄸꐙꌠꏡꁈꀋꉬꑲꆏ,ꋋꆹꈍꃅꑌꋍꇅꂯꇗꄃꀕꃅꑘꒃꊖꋠꀋꄐꀐꌠꉬ。
  ꂚꄏꇁꌊꌍꑓꏢꁮꇬꉆꇬ,ꋧꃅꆹꄡꇗꆈꋧꋪꇫꎍꑴꌦ。ꋋꆹꈍꃅꌍꑓꉈꏭꈀꒉꈀꌒꀕꌠꁯꀒ!ꀉꁁꄷꀋꁧꆈꋧꋪꅈꇬꀥꐺꇬꑌꈀꒉꈁꌒꀕꌠꉬ,ꈑꇙꂁꄚꑲꌺꋋꂷꇬꀀꌠꆹꏣꀋꋌꀐꌠꉬ。ꋋꆹꌧꂓꏪꇬꃅꇏꂴꆽꃅꉌꆐꊁꆹꅑꌠꋍꃅꐪꈧꌠꉪꇬꆏꀱꍠꄹꉌꆐꅑꇁꀐ。ꃄꈌꄐꃅꏈꌠꀞꇽꃆꂮꐘꌠꏢꄉꈭꐨꆏ,ꑞꐛꅹꃅꆿꃀꁡꇤꀋꁧꌠꉬꂯ?ꈍꃅꉉꄿꂿꋋꆹꊿꇱꇑꌊꁧꌠ,ꊽꈯꊾꌅꀋꄐ,ꋋꆹꇯꍝꃅꊨꏦꅑꃤꇔꆹꏮꇫꎭꉆꌠ。ꄷꀋꁧ,ꇓꈓꌋꆀꂿꑘꁡꇤꈯꄔꇬꏦꉅꌠꑌꀋꎪꃅꅐꇁꇬꎷꈨꑌꀋꉬ。ꈬꉘꃅꄷꈭꎴꈜꎴꇨꄉꃰꃅꏲꅷꇬꀋꑟ,ꌤꃅꆿꃅꇬꈁꏾꃅꀕ。ꇯꍝꃅꉉꑲꆏ,ꇑꌊꁧꌠꅀꑞꉬꄿꂿ,ꄽꂫꇬꆏꌤꅐꀐ。ꈞꆈꏂꇫꈧꌠꆹꈍꃅꑌꄝꇬꀋꏆꌠ,ꈌꋙꍈꀱꀀꇇꑝ,ꂄꃅꌠꄸꐙ,ꊿꄸꈁꑐꀕꈧꌠꆹꀍꃈꏵꀠꃅꊽꐬꆠꃰꈻꌠꑽꃤꐘꇯꁦꎆꃅꄻꋍꇬꇱꄉꌦꀐ。
  ꌧꂓꌩꏾꆴꀋꌐꑴꌦꌠꌋꆀꌩꇇꈬꐙꊰꊌꁧꀋꌐꑴꌦꈧꌠꇬꈴꄉ,ꉌꊢꃅꄎꌬꄹꑓꏮꉜꉚꋯꀋꂿꃅꎍꌠꂿꃅꆈꋧꋪꁬꌠꉜꇬꆏ,ꂚꄏꆹꀊꎴꐯꀊꎴꑠꇅꌗꉻꅷꐺ:ꀊꑴ,ꉡꆹꌩꁧꐚꇂꃴꀀꎍꁧꀋꏮ,ꈌꇁꈌꄚꐂ,ꃬꇁꃬꄚꄵꑵꌠꉬꄷꌠꅀ,ꑠꃅꄉꈁꏾꃅꇭꍣꄈꊾꂷꅿꌉꈿꊋꃤꄝꆘꅝꇫꎭꉆꄷꌠꅀ?
  ꋋꇅꃅ,ꑓꋪꏷꌬꀕꑠꋒꇁꋍꑓꑟꇬꃹꇁꀐ。ꊿꁰꒌꆈꁙꀕꑠꂷꆹꀊꑙꌩꁧꅂꃅꅂꌧꂓꇇꀕꈧꌠꇬꍬꄉ,ꐂ“ꇌꉻ”ꂷꌠꇬꃹꇁ。
  “ꈀꄸꉬ?”
  “ꂚꀯꍈ,ꉢꎭꂵꊞꐂ。”
  ꈁꑓꂶꌠꆹꊌꂿꀋꉆꑴꇬ,ꄚꊿꐛꄟꂶꌠꌋꆀꃛꁙꈧꌠꇬꄉ,ꂚꄏꑌꌋꎼꇁꀐ,ꋍꂴꆽꉆꎍꋋꂷꆹꇯꍝꃅꎭꂵꊞꐂꉬꅊꇈ。ꀊꄶꃛꁙꀊꃚꃅꌗꅐꄟ,ꀊꄶꑲꆈꅿꈍꀕꃅꎍꌠꇵꂷꑠꆹꉬꇮꋌꇬꋒꌥꐯꋒꌥ。
  “ꆏ?ꆏꈍꃅꈐꏭꃹꇁꌠꉬ?”
  “ꌍꑓꇬꎸꑟꉍꈄꈧꌠꆹ,ꈍꄮꇯꆐꒇꆼꈘꇫꎭꀐ。”
  “ꈍꄮꇬꉬ?”
  “ꆏꀀꑌꇴꄉ,ꇦꀨꅇꁊꇁꀠꂶꌠꃚꋒꀉꒉꃅꏄꄮꇬ,ꈀꄸꂷꑌꇬꀋꈨ。”
  ꂚꄏꆹꇇꎇꌊꌍꑓꇬꊼꇅꌎꉚꇬꆏ,ꇯꍝꃅꎸꑟꉍꈄꈧꌠꇬꀋꅑꀐꅊꇈ。ꋋꆹꃹꅼꐯꃹꅼꃅꌗꏻꇈ,ꀋꇊꋌꇯꍝꃅꑓꀋꂿꅈꇬꄉꀥꅷꐺꌠꌡ,ꇭꀧꋋꂷꃅꈁꒉꈀꌒꀕꌗꉘꀉꄂꐛꃅꀀꎍ。ꊼꇅꉪꉚꌦꇬꆏ,ꎭꂵꊞꐂꉌꂵꑞꑌꌠꋌꐝꉅꀐ。
  “ꈀꄸꂷꆎꐊꇁꌠꉬ?”
  “ꉪꊇꆃꍈ,ꅫꃀꀈꏦ。”
  “ꋌꇿꇫꐥꇆ?”
  “ꌧꂓꇂꃴꉆꎍ。”
  “ꀊ,ꋌꈍꃅꇁꌠꉬ?”ꂚꄏꉈꇬꃅꇫꅲ。
  “ꅫꃀꀈꏦꆹꆎꋩꇁꌠ,ꃆꀞꀊꐎꂶꌠꑌꏣꄀꌊꇁꀐ。ꂚꀯꍈ,ꆿꃀꁡꇤꁧꂿꂸ!”
  ꂚꄏꄡꇗꄯꇌꄭꇌꄹꉪꇫꎍꑴꌦ。ꀊꄸꀈꏦꈍꃅꊨꏦꑴꅉꑌꑭꄑꄉꇁꌠꉬ!ꌋꅪꂱꀘꆃꍈꂷꅿꃅꐪꑽꑌꃆꂮꆹꋌꇬꊎꉪꅷꐺ。ꎭꂵꊞꐂꑞꑌꀋꉪꀋꈾꃅ,ꂚꄏꏭꉆꐥꃅꑭꄑꄉꁧꌶꄹꇤꅷꐺ。
  “ꉡꆹꈍꃅꆿꃀꁡꇤꁧꉆꂯꆏ?ꄵꇓꁦꀑꄉ,ꉢꉉꋺ,ꉡꆹꁧꀋꉆꌠ。”
  “ꂚꀯꍈꉆꐥꃅꑷꇆ,ꄆꃑꅈꇬꄆꀋꐥꐛꅹ,ꇓꈓꋋꂷꃅꆈꋧꋪ,ꆏꀉꄂꑲꆏ,ꇓꈓꋋꂷꇬꊿꂷꇫꅉꐚꌠꀋꐥ,ꋍꉎꀋꐥꃅꊜꋽꑠꉔꀋꐥꀐ。”
  “ꈍꃅꄉꑠꃅꀕꉆꌠꉬ?ꉏꑴ,ꆍꊇꆹꈍꃅꄉꉈꑴꋍꃢꉡꇖꇀꌦꌠꉬ!”
  ꂚꄏꇫꉌꑇꌠꆏꂱꑱꃅꄷꋍꂷꇬꃄꅉꐛꄟꆹ,ꋍꅿꀻꎆꌠꌋꆀꌧꑳꌠꇬꁣꏙꄎꌠꉬ。ꌧꂓꇆꆉꈯꄔꇬꄉ,ꋋꆹꀋꎸꀕꃅꊨꏦꀱꊨꏦꇬꅑꁧꀵꋻ:ꑤꍰꇓꈓꇬꄉꆿꃀꁡꇤꁧꌠꈝꃀꋋꏢ,ꀊꋨꄹꈎꑞꐛꅹꏛꃅꊥꇫꄉꌊꀋꄻꌠꉬꂯ?ꈭꎴꈜꎴꈭꈜꀋꃪꊁꊰꌠꆹ,ꈍꃅꑌꃅꄷꉹꁌꉮꐪꀉꒉꃅꐥꌠ,ꀊꅰꃅꉌꂵꂶꌠꉪꐪꋌꌌꃬꃹꇴꄂꏢꀉꄂꎵꇫꎭꐛꅹ,ꀊꄶꑋꁮꉆꁮꌟꃅꇰꑳꑏꁱꋓꌠꃅꇐꄚꅐꋻ。ꋌꄚꇢꊭꄉꇬꉉꐛꅹꃅ,ꌦꅐꐲꑷꌠꆹꀋꐥꀐꑴꇬ,ꄽꂫꆏꄡꇗꊿꈔꅲꀱꍠꀋꇊ。ꆿꃀꁡꇤꆹꈍꃅꑌꁧꀋꉆꌠ。ꊼꇅꉪꉛꉏ,ꂴꅑꌠꁨꇐꀋꐥꏠꌠꈝꃀꍬꊿꂷꆘꅝꇬꆹ,ꑸꆃꏤꁥꌠꈍꃅꑌꆏꀋꇬꌠꉬ?ꌅꈌꇑꌠꉬꄿꂿ,ꌅꈌꀧꌋꃅꌠꉬꄿꂿ,ꋀꊇꆹꐥꍂꃅꈉꊸꇬꎷꌠꉬ。ꀋꄸꄷꊁꄉꐪꎹꁖꈹꅷꁧꑲꆏ,ꌤꆿꆹꀊꅰꃅꀉꒉꁧ,ꄚꃆꃶꑖꋩꃣꌾꈌꂯꌠꃅꄷꋌꈚꆹꀊꅰꐛꀋꐛꇁꌠꉬꀐ。
ꉪꅷꄚꑟꇬꆏ,ꂚꄏꆹꎭꂵꊞꐂꏭꉉ:“ꆏꉆꐥꃅꁧ,ꆏꇤꐳꃅꀱꀊꄸꀈꏦꐊꄉꀱꁧ。ꉡꆹꄚꇬꀋꐞꀐꌠ,ꈍꃅꄿꂿꄚꇬꀋꐞꀐꌠ!”
  ꃛꁙꀊꂥꃅꌗꅐꈧꌠꋋꇅꃅꆏꇫꆏ,ꎭꂵꊞꐂꆹꏟꈯꀕꋌꌦꂚꄏꆼꁠꇬꎑꄉꉉꇬ:“ꂚꀯꍈ,ꀋꑍꂴꃢꌠꆹꇑꌠ,ꀋꃋꋌꃢꆹꈐꌠ!ꆏꀋꎪꃅꁧ!ꋋꆹꉪꑶꇽꁡꇤꃅꃀꈿꄉꇕꄟꏤꄉꌠꉬ。ꆏꐒꌋꀋꌸ,ꌍꆽꁏꁥꌠꃅꑠꆹꉪꇬꀋꏦꌠ,ꋀꊇꇁꑲꆏ,ꉪꊇꆹꋀꏭꄉꌠꉬ。ꋀꊇꃅꄙꂽꃪꃅꐥ,ꉪꊇꁦꀑꌋꆀꌩꏪꇆꆉꐥ。ꆎꉂꆎꅉꈧꌠꆹꉬꇮꃅꀑꇬꀋꑴꃅꅽꇭꀧꌋꃅꇁꌐꌠꉬ,ꉪꊇꆿꃀꁡꇤꂶꌠꀉꄂꑠꃅꐙꌠꀋꉬ。ꁰꅐꈌꐔꁡꇤ,ꒈꂪꀊꑞꁡꇤ,ꉈꑴꐛꃭꁡꇤ,ꀊꄙꁡꇤ,ꐙꁮꁡꇤꑠꉬꇮꃅꉪꊇꌋꆀꐮꏯꅇꀠꄉꌐꌠꉬꀐ。ꐙꁏꃥꌋꐛꀐꌠꆹꑡꑌꀋꏦ,ꏦꌠꆏꋍꇉꌅꂮꋍꇽꌟꒉꑠꂷꀋꊌꀋꇎꌠꀉꄂꏦ。ꂚꀯꍈ,ꉆꐥꃅꑷꇆ,ꉪꊇꀋꁆꄉꑤꊈꎼꏹꄻꁧꂿ,ꅽꊿꀊꋨꁥꑌꁧꏾꌠꐥꑲꆏꉬꇮꃅꁧꌐꂿ,ꉪꊇꆹꉬꇮꃅꇫꋩꇬꏦꌐꌠꉬ!”
  ꌤꃆꆹꂚꄏꉪꄉꌠꏭꀋꋌꃅꀋꇮꆺꌋꀕꇈꃄꈌꄐ,ꀊꅰꃅꊋꋠꇫꎍꅊꇈ。ꋋꆹꀊꅰꃅꃨꆰꏸꈨꉌꂵꑋꅉꀋꑌꀐ。
  “ꀋꍑ。ꉡꆹꇿꇬꑌꀋꁧ!ꉠꅿꂿꃆꆹꌌꄚꄉꊨꀖꋋꈨꊩꎴꌠ,ꉠꅿꉆꈉꆹꄚꇬꐛ,ꄚ“ꇌꉻ”ꋋꂷꇬꉬ!”
  ꀃꈈꉈꏭꂾꃚꈨꀅꌳꌺꃅꇫꈌꐚꇁ,ꎭꂵꊞꐂꆹꉇꏢꁻꎼꒉꌠꌡꃅꐂꀃꈈꊂꆈꂁꎍ。ꌍꑓꉈꏭꄉꈏꃹꇁꌠꎹꄓꉘꁮꑭꇂꃴꄉꇬꆏ,ꂚꄏꆹꎭꂵꊞꐂꇇꇬꄉꅅꃅꐎꏒꀕꑠꏼꋌꊌꂿꀐ。ꁰꀕꀉꒉꃅꇝꂱꂾ,ꑤꍰꇓꈓꄉꅑꅷꆿꃀꁡꇤꑟꌠꈝꃀꐕꌠꑭꄑꇬꍢꄮꇬ,ꎭꂵꊞꐂꆹꃅꈊꃅꄜꃅꂚꄏꐊꐺꐛꅹ,ꋋꆹꅅꃅꋌꏼꌌꈭꋍꈜꇈꌠꑍꈬꑍꇁꈧꌠꋌꒇꐴꀋꅿꋺ,ꃪꍶꌋꆀꃮꌌꀭꉌꈨꌠꋌꎸꃶꀋꂿꋺ。ꀋꄸꄷꀋꃋꋋꇅꇬꊾꂷꄚꈐꏭꃹꇁꑲꆏ,ꎭꂵꊞꐂꆹꈍꃅꑌꋍꅅꃅꏼꌠꀖꌌꌬꀐꌠꉬ。ꂚꄏꆹꊼꇅꉌꂵꌯꇁꀐꐛꅹ,ꀋꎺꃅꀥꊁꈹꆹꄉ,ꇇꅅꃅꌭꁆꌠꋌꇱꌭꇰꏢꀕꃅꄉ,ꀂꏾꂶꌠꌌꑠꃅꀕꀋꉆꃅꊞꐂꏭꌗꋏꐺ。
  ꀃꈈꉈꏭꂾꃚꈧꌠꇫꈌꀋꐚꇄꌠꇬꆏ。ꂚꄏꆹꎭꂵꊞꐂꇇꁆꌠꋌꄝꇫꎭꀐ,ꄚꂚꄏꆹꉈꑴꋌꇷꋍꃢꇬꉆꄈꌦꀐ。ꊿꋌꂲꆽꉆꎍꂶꌠꆹ,ꉜꅊꇈꂾꆏꇴꒉꉺꒉꌠꆈꌠꑮꆜꂷꉬꅊꇈ。ꂪꌦꀊꃴꑠꂷꋌꇙꀂꏾꇬꉱꄉꇈꃀꆏꍗꀕꑠꏮꄝꇬꆼꒆꄉ,ꆸꎡꆹꇠꏮꅑꎍ,ꄇꉼꋴꅪꈫꌠꍣꐧꊭꇬꑟꃅꄉꐛꅹ,ꏸꑭꀉꒉꌞꃆꍬꋑꌠꐍꀧꅍꇬꁖꎍ。
  “ꆏꑞꃅꑠꃅꄻꎴꄉꌠꉬ?”ꂚꄏꀅꌳꌺꃅꅲꇫ。
  “ꇅꂚ,ꆏꀉꁁꄡꉉꀐ。ꇤꐳꃅꑷ,ꃅꄜꇁꂯꄉꀐ!”
  “ꀊꑴ,ꉢꉉꋺꀐꂼ,ꑠꃅꇬꆹꀋꍓꌠ。ꉡꆹꇿꇬꑌꀋꁧꌠ,ꆏꉆꐥꃅꁧ,ꉆꐥꃅꀱꅽꆿꃀꁡꇤꁧ。”
  “ꆏꀋꁧꅀ?ꆏꀋꁧꑲꆏꉡꑌꀋꁧꀐ。”
  ꎭꂵꊞꐂꆹꇁꌊꀀꈤꏢꁮꇬꊼꇅꉆꇈ,ꋌꅞꀀꈤꇬꑌ。ꀒꅡꂫꅡꅍꀊꋨꄹꈎꀊꉘꄨꍈꀊꋨꂷꌡ。ꊞꐂꆹꀊꋨꄮꇬꐳꆹꁘꀊꅪꌌꀊꋨꈨꉜꒉꃅꀋꐛꀕꅹ,ꋍꑍꌠꆏꂚꄏꊂꈹꐺꇬꎷꄉ,ꀂꂱꀘꄻꌠꉬꄷ,ꀁꑌꀊꄸꀈꏦꌟꃅꆽꏀꀊꃴꀵꌠꉬꄷꐺꇬꎷ。ꊁꊋꃤꀉꒉꃅꃹꈭꐨꑲꆀ,ꄀꇑꄉꊞꐂꋌꅰꌌꋍꅇꃅꅲ。ꉪꅷꄚꑟꇬꆏ,ꂚꄏꆹꀋꎺꃅꀃꈈꁬꌠꋌꈢꇰꏢꀕꃅꄉꇈ,ꉌꃀꀖꆏꇭꀧꌦꃅꎭꂵꊞꐂꏭꉉꇬ:“ꀋꃋꆹ,ꈍꃅꄿꂿꉡꆹꁧꀋꉆꀐꌠ。ꉢꋋꅉꀋꐚ,ꆍꆹꑡꀕꃄꏢꉪꌠꉬꀋꐚ。ꉡꆹꀊꄸꀈꏦꊼꇅꂿꏾ,ꀊꄸꀈꏦꉣꑊꐯꀋꂿꌦꂾ,ꉡꆹꇿꇬꑌꀋꁧꀐꌠꉬ!”
  ꎭꂵꊞꐂꂶꌠꆹꑓꂭꊼꇅꋏꇈ,ꋍꃢꉪꇬꉆꎍ,ꀋꇊꇬꌍꑓꉈꏭꌧꂓꇂꃴꇇꇤꏩꃚꌕꇅꇫꂿꌠꌡꇈ。ꋋꇅꃅꀀꈤꇬꄉꋌꄓꇬꉆꄉꉉꇬ:
  “ꍑꑴꇊ,ꆏꇁꉚꄉ,ꀃꂰꈊꃀꅫꃀꀈꏦꀋꎪꃅꇁꅊꈫ。”
  ꋌꇁꌊꌍꑓꂴꆽꑟꇈ,ꐧꊭꈎꄉꎸꑟꉍꈄꌌꎀꄉꌠꌍꑓꁬꌠꋌꒃꇇꇬꊐꌊꐺ,ꀋꎸꀕꃅꋌꁧꈭꐨꆏꀱꋍꄈꅉꇬꄉꃅꉉꌠꌡ,ꊁꆏꌍꑓꋌꁉꄉ,ꇭꀧꊼꇅꇙꇈꋌꐂꌧꂓꇇꀕꇨꇬꎑꄉ,ꌙꈈꀕꃅꊼꇅꈩꇈ,ꂿꉆꂿꀋꉆꃅꎍꌠꎹꄓꁮꑭꇬꄉꆘꅝꇿꃹꁧꀋꐚꀐ。


           ꊁꊛ:ꉒꈌꈬꇬꉂꏣ(ꈬ)http://yi.yizuren.com/plus/view.php?aid=126

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ