ꉂꄷꋋꈨꍣꑲꆏꁡꇤꇬꀉꂿꉂꃆꂮꌋꆀꁮꅉꈨꉠꉌꑌꇁꇬꎷ，ꌟꒉꇐꀳꇬ：“ꌦꑌꌺꇖꀉꂿꀋꉂꌠꀋꐥ”ꄷ，ꄚ，ꉢꂿꉢꈨꋺꌠꀉꑳꀉꂿꉂꇬꉨꍠꏿꄉꉂ， ꃮꁮꀉꂿꉂꇬꌧꑆꌥꑆꃅꄉꉂ，ꃬꊭꀉꂿꉂꇬꌧꑻꌤꑻꄹꄉꉂ，ꇫꇌꀉꂿꉂꇬꁦꀑꇂꀟꏅꄉꉂ，ꃆꌺꀉꂿꉂꈜꅪꆲꏂꄓꄉꉂ。ꀊꋨꄮꉪꇬ，ꉂꋚꉂꒉ，ꉂꃢꉂꈚ，ꉂꃆꉂꂮ，ꉂꅇꉂꑟꑠꐯꇯꈁꐥꃅꀉꂿꉂꃆꂮꀉꄂꌐꉘꇉ，ꄚ，ꊁꑲꆀꉢꌧꇁꌠꀉꄉꉂꄷꑠꈨꑌꐥꅊꇈ，ꄷꀋꁧꏣ꒜ꏣꑟꐮꎿꐮꈴ，ꐋꀨꐡꊈꐮꐊꐮꄻ，ꃷꇎꃷꇤꐮꊪꐮꄏꑠꑌ“ꉂ”ꄷꑠꈨꐥꅊꇈ，ꉂꄜꌠꌐꃅꌐꀋꉆ，ꉈꑴꉢꋋꀋꌧꌠ“ꉂ”ꇯꀊꅰꀋꃷ꓂ꐤꁮ！！
ꌶꅉꁧꈭꐨꄯꒉꌶꅉꇬꂘ꒜ꌧꇐꉪꂘꌠꉂ，ꁦꎴꇤꌃꌠꉂ，ꌷꐋꂘ꒜ꉂ，ꆽꈜꀊꅪꉂ，ꁍꇩꉂꑠꂘ。ꊼꇅꀉꒉꑲꆏꉂꃆꉂꂮꈜꀕꐋꀋꌡ，ꑮꆜꌠꆗꉂꌠꉉ，ꈊ꒜ꐋꀨꀉꒉꑠꈨꐊꄉꇈꈬꇯꈩꁧꋺ，ꀊꋨꄮꇬꉢꊯꊪꊰꑋꀉꄂꈎꑴꌩ，ꋀꉉꇬꉢꀄꊭꇨꌤꆿꑠꅐꂵꄷꄉꉡꐊꀋꅲ，ꄚꉡꆹꆈꋀꊂꈹꁧꇬꎷ，ꑞꅉꑟꑲꆏꑮꆜꑐꇭꀊꐯꑠꆹꉠꏭ：“ꀉꁪ！ꄁꀺꋂꅑꋂꐔꂾꄓꎸ，ꄆꇆꋐꅑꋐꌈꂾꄓꎸ，ꄽꀮꏢꅑꏢꌗꂾꄓꎸ，ꌧꇤꏠꅑꏠꉧꂾꄓꎸ，ꌳꉔꌠꆗꑠꍈꂾꄓꎸ，ꌠꆗꆎꆹꑡꎹꇁꌠꉬꀋ？”ꄷ。ꉡꆹꂴꇯꆐꌠꆗꄊꀖꀉꒉꈧꌠꂘꄉꌠꉨꀱꄉ：“ꀋꉅꇓꂵꑍꍈ꒔ꈜꎍꉆꅀ？ꀋꄜꆗꌺꑍꍈ꒔ꐋꐛꄎꅀ？ꀋꇴꑶꂷꅐꊧꐕꀋꉆ，ꀋꇖꈋꂷꁯꇵꉠꂸꉆ，ꀋꉂꑍꂷꉂꄷꉉꀋꉆ，ꀃꑍꆹꆍꅪꎔꋋꈨꉂꄉꄚꇁꌠꉬꀐ。”ꄷꇬꆏ，ꑮꆜꈧꌠꉎꉐꄹꒈꑍꀒꁨꒉ，ꉐꆂꑌꀒꁨꎇ，ꇇꁮꀒꁨꇤꃅꄚꄉꒊꅍꀖ。ꀊꋨꇅꇬꉠꉌꂵꋧꃅꋋꂷꇬꈁꉂꀕꌠꆹꑮꆜꌠꆗꉂꐨꋋꈨꀉꄂꐥ，ꀋꃋꉪꎼꇁꇬꀊꋨꇅꇬꉢꉂꌠꆹꑮꆜꌠꆗꉂꐨꀋꉬꅊꇈ。ꄚ，ꉠꐋꀨꄊꀖꀉꒉꌠꌋꆀꌞꑮꆜꇯꍝꃅꐮꉂꑠꑌꀉꑌꃅꐥ，ꄷꀋꁧꐮꍯꇈ꒔ꑷ꒔ꇤꐛꑲꋦꇤꄂꑠꇯꐊ。ꑠꃅꋀꐊꄉꈩꇈ，ꌓꀖꅇꅲ，ꈘꅇꑠ꒔ꊱ꒔ꊱꌌꐯꀥꇯꈩ，꒔ꃢꆹꌠꆗꊋ，꒔ꃢꆹꑮꆜꊋ，꒔ꃢ꒔ꃢꆹꉡꑌꌩꄹꇓꂵꑞꑌꇫꐊꃅꑠ꒔ꊱꉢꈘꇢꊭꂅ，ꀉꁁꈧꌠꉎꉐꄷꒊꁖꇈꑮꆜꈧꌠ：“ꌳꉔꋋꈨꆹꈍꃅꑌꉜꅐꇁꉆ，ꇿꄉꇁꌠꉬꀋ？”ꄷ，ꉠꄊꀖꈧꌠꆹ：“ꉪꐋꀨꀉꇨꋋꍈꊙꃅꊙꌊꇁꌠꉬ”ꄷꌓꀖꈩ，ꀊꋨꄮꇬꇯꍝꃅꈩꌒꐯꈩꌒ，ꌋꐓꀱꁧꈜ꒜ꇬꆏ，ꉠꐋꀨꈧꌠꐙꄏꀐꀞꄷꉠꏯꅲꇈ，ꌶꌺꀄꊭꑠꆹꎔꎗꃅꄯꒉꌷ，ꊁ꒔ꑍꉾꃪꑠꐛꉆꌠ，ꅉꀕꑠꃅꀒꐊꄉꈩꇬꆹꈲꁧꀋꐥꌠꄷꉠꏭꂘ，ꋋꈨꉢꎺꇁꑲꆏ，ꀋꃋꑌꉢꇯꋀꉂꇁꌦꀐ！꒔ꃢꋍꃢꆏꈊ꒜ꉈꏭꈩꁧꄉꊁꄹꉈꄓꑎꇈꄯꒉꌷꇬꆹꑎꄉꂘ꒜ꌌꊨꏈꋺ，ꊿꄹꇬꂘ꒜ꌶꌺꏭꊨꏈꋋꈨꑲꆀꂘ꒜ꃪꌠꉬꄷ，ꇯꍝꃅꌠꉬꀕꇆ？
ꃷꇎꀉꑳꑠꂷꑸꉻꏢꌺꅞꄉ꒔ꀉꂿꀉꄉꌌꅥ、ꊨꏈꇬꎷ，ꉠꀊꂵꄹꇬ꒔ꀉꂿꀉꄉ꒔ꏭꉂꄉꑠꃅꌠꉬꄷ。
ꊁꉪꌶꅉꇬꐧꋦꉂꁨꊿꑠꈨꎆ꒜ꆿꂷꑠꌌꉪꌶꅉꇬꇇꀨꇁ，ꂘ꒜ꄹꇬꋋꈨꆹꉂꉬ，ꉂꁨꊿꑲꆀꑠꃅꄎꌠꉬꄷ。
ꒉꌶꅉꇬꌷꈭꐨꉠꐋꀨꑠꂷꀒꌶꅉꇬꀀꐋꑠꂷꅉꀕꄆꅇꀋꈘꃅꅥ꒔ꀉꂿꁵꇬꎷ，꒔ꑍꑌꇢꊭꀋꄀ，ꋌꀋꅥꑌ꒔ꀉꂿꅥꎼꇁꇬꎷ，ꃶꌠꉬꀋꐚꄷ，ꉡꆹꒊꅍꀖꎴꃅꄉ：“ꀉꑳꌺ꒔ꀉꂿꉂꌠ，ꅑꁧꀋꀵꌠꉬ”ꄷꉉ。
꒔ꑍ，ꍀꍬ，ꍀꉼꉪꌕꑻꐮꐊꒉꄿꉛꑎꁧꐮꄉ，ꀉꇢꉜꃆꋬꉢꈐꌊꇁꇈ，ꉢꂁꀀꃹꑐꄉꋍꑊꇴꒉꇬꆏ,ꇁꌊꉠꀊꂵꋒꇈꇿꁧꄷꄉ，ꉡꆹꁦꅉꀋꐥꄷꉉ，ꍀꉼꉢꇴꄉꇈꉣꑊꐮꐊꍀꍬꇴꒉꂿꄷꄉꇬꆏ，ꉠꀊꂵꆹ꒔ꀋꋗꀕꃅꐙꐤꁮꄉꉠꊂꄉꆈꌠꉬꅊꇉ，ꉠꀀꃹꄉꉜꃆꋫꌠꋌꀖꎼꇁꇈ，“ꁨꉜꇁ，ꅽꉜꃆꋫꌠꋌꈐꌊꄚꁖꇁꀐ，꒔ꒈꌺꃅꊾꈐꑲꌧ,ꀉꒉꄮꆏꑡꋌꃅꊿꅽꇁꀋꐚ”ꄷꄉꉠꀊꇢꋌꇴꎼꇁ，ꉡꆹꋌꉉꌊꑊꏦ、ꎲꄏ、ꇨꇓꃃꄉ，“ꋋꈨꈏꈨꀋꉬꄾ？ꃆ꒰ꑍꆏꀱꌊꉈꑴꄉꇀꋌꐥꄾ？”ꄷ，ꄚꀊꂵꄡꇗ：“ꆏꁨꉜ，ꋋꌕꑻꐯꇯꐮꄻꌊ，꒔ꒈꌺꃅꌢꋖꐛ，ꀉꒉꑲꆏꊾꈐꊾꈱꇁꌠꉬ，ꌕꑻꐯꇯꒃꅷꂷꏦꌌꏶꇁ”ꄷ。ꀉꇢꆹ：“ꑽꀋꐥ，ꋋꈨꆹꈐꌠꀋꌗ，ꄚꆍꌕꑻꀄꊭꇨ，ꀉꒉꑲꆀꄻꆍꁳꉛꑎꎻꂿ”ꄷ。ꑠꃅꄉ，ꉡꆹꀉꑳꄹꇬꀉꑳꐛꀱꀊꂵꏭ：“ꀊꇢꄹꇬꇯꈐꌠꀋꉬꄷ”ꄉꑳꉨ：꒔ꏢꌠꆹꊾꈐꊾꈱꄷꄉꉠꉌꂵꃚ，ꑍꏢꌠꆏꉠꄐꏤꄉꉛꈹꎂꀕꌠꀊꂵꀜꐆꇫꎭꄉꉌꂵꃚ。ꄚꀊꂵꆹꀉꅰꃅꉠꏯ：“ꀊꇢꆹꆍꊇꌕꑻꉂꄉꑠꃅꌠ”ꄷꏈ。ꉡꑌ：“ꄚꆎꆹꑡꃅꉪꊇꀋꉂ？”ꄷꇬꆏ ，ꀊꂵꆹ：“ꉢꉠꌺ（ꀊꇢꄜꌠ）ꀉꄂꉂ，ꑡꃅꌣꋖꑠꈨꉂꀋ？”ꄷꄉꃃꐯꃃꃅꄯꁯꎹꌠꌡꇈꉢꋌꇷꌊꉩꀋꀬꃅꆏꀐ。ꊁꉢꉪꎼꇁꇬꀊꇢꆹꉪꉂꌠ，ꀉꂵꆹꉪꌕꑻꉜꃆꈐꄉꀋꉂꌠꅀꑞꃅꌠꉬꂯ？
ꉢꎺꇁꇬꋍꑍꉪꐯꇯꎆꆫꅉꄉꉌꊭꌺꌕꍈꉪꒃꅜꇈꉪꌌꉌꊭꀋ꒜ꑌꈧ，ꉌꊭꀋ꒜ꂶꌠꃰꏭꀋꃰꃅꂃꏭꂃꇫꎍ，ꀉꑳ꒔ꈨꋋꈨꆹꀥꅷꇫꒃꒉ，ꄚꇫꒃꅜꀋꄐ。ꊁ꒔ꇅꌺꐛꑲꆀꃅꈯꀉꁌꇁꇈ,“ꀉꑳꈨꏭꉌꊭꄝ꒔ꀉꂿꇱ，ꎭꃅꑋꊰꀕ”ꄷꇉ，ꀉꑳꀄꊭꂶꌠꄝꇬꇯꀋꅲꄉꋌꏶꑳꉨ，ꀉꑳꂶꌠꉨꅉꏿꅉꃅꀉꁌꏭ：“ꉌꊭ꒔ꀉꄉ，ꉌꊭ꒔ꀉꂿ，ꉌꊭ꒔ꀉꁌ，ꉌꊭ꒔ꀊꂵ，ꋌꑮ꒜ꀋꁨꀞꍸ꒜ꐛꌠꉨꉌꊭꄻ꒔ꑮ꒜ꃅꂿ”ꄷꄉꉩ。ꉡꆹꊼꇅꀉꒉꄉꑳꀋꉩꑴꇬꉌꂵꄡꇗꄻꀋꈴꄉ，ꀉꑳꂶꌠꉉꌠꉠꒊꒉꃄꑌꐛ，ꄚꀉꁌꊂ꒜ꌠꊾꃶꂷꄷꑌꉉ。
ꊂꄹꉇꁡꇤꄉꊿꈍꑋꃅ꒔ꈜꑌꌐꇈ，ꃅꈯꀉꁌꂶꌠꄡꇗꑊꀋꏦꃅꀉꑳꂶꌠꀉꄉꋴꄉ：“ꀋꅔꉇꆍꆿꌺꏤꉌꊭꀄꊭꌹꀕꃅꑠꈨꒃꌊꈩꇈ，ꄝ꒔ꀉꂿꇱꀋꅲꄉꉢꌌꏶ，ꆿꌺꄚꇁ，ꆏꀋꅔꉇꉢꌌꏶꌠꉨ，ꀃꑍꆏꀉꁌꌧꅗꆈꀧꂷꄻꆎꍈꂿ”ꄷ，ꆿꌺꆹꀉꁌꏭ：“ꉢꅽꃤꋠꀋꏾ，ꀉꁌꑊꈯꅍꑠꂷ”ꄷ，ꃅꈯꀉꁌꆹꒈꅉꉉꅉꃅ：“ꉐꀕ，ꆏꉌꆐꅑꂵꀒ”ꄷ ，ꆿꌺꀉꄉꆹ：“ꆏꉢꏶꌦꂵ,ꀉꁌꇬꑠꃅꉉꈨꇿꐥ，ꀉꁌꆏꑠꄡꍈ，ꐯꀐꄷꌠꉬ，ꀋꅔꉇꏶꌦꇧꎭꇮꌠ，ꉌꊭꌺꑠꈨꋠꃅꋠꀋꉆ，ꅝꃅꅝꀋꉆ”ꄷꉉ。ꉢꉪꇬ，ꀉꁌꆹꆿꌺꀉꄉꏦꄉꑠꃅꉉ，ꆿꌺꀉꄉꆹꌟꒉꑠꂷꇬꉉꀋꌒꄉꑠꃅꈌꌒꉉꌠ，ꉌꂵꇬꆹꀉꁌꌂꃅꉪ。
ꀄꊭꄮꇬꀊꂵꑕ꒧꒔ꌺꀋꃋꉂꄉꑓꁴꅐꌠꂿ，ꊿꉉꌠꑡꀕꉂꃅꇬꆹ，ꉡꆹꀋꉂꑡꃅꂯ？ꉂꋋꈨ，ꅝꃅꅝꀋꉆ，ꅝꉆꑌꌤꀋꋌ；ꋠꃅꋠꀋꉆ，ꋠꉆꑌꂮꀋꋌ；ꈚꃅꈚꀋꉆ，ꈚꉆꑌꈻꀋꋌꑠꈨꃅꉪ。
ꑍ꒜ꑍꑮꑟꅪꏷ，ꊈꃅꌱꋠ，ꆀꃅꀘꂾ，ꄹꃥꑠꇫꇁ，ꉈꑴꃷꇎꃷꇤꐮꐊ꒧ꃅꃤꑽꄮꇬ，ꊿꀉꑌꃅꐯꇯꋙꋠꑲꆏ，ꒉꀋꈻꂵꄷꄉ，ꋂꋐ，ꊈ꒨ꊈꂟ，ꇱꇐꇤꌋ，ꂤꈐꋔꅪ，ꋌꒀꑠꀋꆏꃅꇤꇬꇯ，꒔ꈨꄹꇬꆹꀋꈻꂵꄷꄉꀒꇱꑟꃅꇱ，꒔ꂷꋋꂷꆹꈺꀕꉚꄷꄉꀀꍹꏢꌊ꒔ꀍꄝꅝꉚꇉꈺꀐ，ꈺꇨꂵꄷ。ꉢꉪꇬꒈꊰꋋꈨꇯꉁꇨꑠꈨꑌꐥ，ꀋꉂꌟꑌꐥ，ꄉꄐꄉꉂꑵꅊꇈꃅꉪ，ꄚ，ꉈꑴꀋꉂꑲꆏꉂꋌꇤꇬꇯꑲꆏꍑ，ꉁꇨꑲꆏꀇꐒꄻꇬꇯꈝꐮꈨꀋꆆꃅꑌꉪ。
ꊁꉂꃆꂮꁮꅉꈍꑋꈨꋺ，ꉂꏣꉂꑟꈍꑋꎹꋺ，ꉂꅇꉐꂷꈍꑋꈨꋺꑲꆀ꒔ꍈꉢꌧꇁ，ꉂꆹꈝ꒜ꏢꌡ，ꌤꑍꅝꀋꉆ，ꂮꑍꋠꀋꉆ，ꈻꑍꈚꀋꉆ，ꄚꈝ꒜ꀋꁮꑲꆏꊿꇿꌦꀋꐚꇿꄓꀋꐚ，ꇿꒉꇿꇁꇿꇬꈴꁧꂯ？ꋽꉂꀋꁨꌠꇤꏦꀕ，ꎔꉂꀋꁨꌠꈥꇤꀕ，ꈄꉂꀋꁨꌠꌞꁌꐕꇖꐛ，ꉐꌠꇽ。
ꑠꃅꄉꁦꀑꎺꁧꂾꆏꉂꇁ，ꈛꁧꍑꒉꂾꑌꉂꇁ，ꇉꅶꉂꁧꂾꆏꈜꀕꉂ，ꉂꂷꏺꇅꀕꌠꂮꐚꋌꇁꌠꌡ，ꉂꏾꀨꈨꀕꌠꈠꆺꋌ，ꉂꏠꇪꉾꀕꌠꌐꒌꏿ，ꉂꒉꐝꍚꀕꌠꒉꌤꋌꐤꁮ，ꉂꅇꄎꌬꀕꌠꀋꎺꇁꀋꉆ！！！
2013ꈎ2ꆪ26ꑍ
