ꀨꏾꌠ > ꃆꃀꁱꇐꋽꇐ

ꇈꃶꆿꐂꉙꇐꁱꇐꃘꊱ
ꄜꃑꄮꈉ: 2011-09-28  | ꁰꄻꊿ:ꀋꇐꏠꆧ ꁏ

ꁱꃀꀑꐱꐥꋊꃆꂮ:
ꇈꃶꆿꐂ,ꆈꌠ,ꌺꃰ,1958ꈓ10ꆨꆃꎭꊨꏦꏱꅉꍏꊾꒆꌺ。ꍏꇩꄯꒉꁱꃀꏓꉻꀕꑼ/ꌧꍧꌜꄯꒉꁱꃀꏓꉻꃛꍗꑮ/ꆃꎭꊨꏦꏱꅉꍏꄯꒉꁱꃀꏓꉻꍗꑮꉬ。ꉙꇐꁱꇐ:
《ꉒꐎꁦꀑꏣ》
《ꋌꐛꋌꐙꌠꌋꆀꉪꊇ》
《ꉙꇐꁍꁈꃣꌬ》
《ꄊꆃꎭꉌꐡꉙꇐꁱꇐꌋꄉꋐ》ꑠꅐꋺ。
ꍏꇩꀁꑌꊿꋅꁱꇐꃆꇭꈁꁠꌕꃢ、ꇖꃢ、ꉬꃢꀕꌠꊌ,ꌧꍧꌜꁱꇐꈁꁠꌕꃢꀕꌠꊌ。


ꃅꑆꇂꃴꑿ
ꄁꒌꇂꃴꑿꆹ
ꇭꋓꀊꂥꌠꄩꄉꄁꃰꏿ
ꊸꑭꀋꏚꌠꑿ
ꆳꇨꐞꁧꌠꑿ
ꉪꊇꑵꉙꈐꇬꄉꄁꃰꏿ
ꃅꑆꇂꃴꑵꉙ
ꉪꊇꑵꉙꆹꃆꄔꉐꑐ
ꄂꏂꇂꃴꑵꃚꉬ
ꉪꊇꅿꑵꉙꆹꃅꆳꇇꁮ
ꇭꋓꄩꄉꄁꃰꏿꌠꑿꈧꌠ
ꉪꊇꑵꉙꈐꃹꌠꑿ

ꑸꑽ
ꉪꊇꌋꆀꑸꑽ
ꐮꐞꀋꉆ
ꀊꅰꃅ
ꊖꆈꅿꉗꐊꌠꑸꑽꏭ
ꇗꅉꃅꐨꐥꄡꑟ

ꋚꊐꊸꑳꈐꏭꑸꑽꎍꐛꌐꄮꇬ
ꉪꊇꉌꃀ
ꌕꈈꀕꇈꇗꄃꀕꌠꊌꀐ
ꃅꋆꌋꎴꇬ
ꑸꑽꄻꇤꋯꄉ
ꃪꌌꏁꈤꀕ
ꈨꏀꐙꎴꐙꎴꅿꉗꅿ

ꅐꉈꏭꁧꄮꇬ
ꎺꄉꑸꑽꌌꁧ
ꑸꑽꑋꋚꈁ
ꄡꇗꉪꊇꉁꅉꌠꐋꀨꉬ

ꉪꊇꆹ
ꃰꇌꁍꃅꐛꌠꑸꑽꈐꇬꄉ
ꅉꀕꃅ
ꉪꊇꊨꏦꐛꒌꊊꂿ

ꃄꅉꌋꆀꐮꐞꀋꉆꌠꑸꑽꆹ
ꃄꅉꌞꉪꊇꁵꌠ
ꉪꊇꃄꅉꌋꆀ
ꐮꐞꀋꉆ
ꋌꈨꀉꄂꀋꉬꃅ
ꇗꅉꃅꐨꐥꇬꎷ

ꃆꏂꑍꆏꁧꂯ
ꃆꏂꑍꎸꄑ
ꆏꁧꂯ
ꆧꁨꃅꄂꊂꆈꂁ
ꆳꂁꌩꊂꎍ
ꉢꀉꄂꌗꏿꀮ
ꐝꉅꐯꐝꉅꃅ
ꅽꑓꋪꈐꏭꄉꇙꈧ

ꃆꏂꑍꎸꄑ
ꆏꁧꂯ
ꋍꑍꋒꀋꋒꏃꃅꈊꇁꄮ
ꉢꉌꏣꎴꃅꄉꆧꁨꇁꉚ
ꆧꁨꈐꇬꄉꅽꑓꋪꎹꈹ
ꅽꑓꋪꈐꄉ
ꉠꌗꏿꊂꆈꐒꎭꐪꎹꈹ

ꃆꏂꑍꎸꄑ
ꆏꁧꂯ
ꉠꉌꐛꐨꌦꆒꆔꌠꆹ
ꃅꌋꎳꆹꃴꌠꇱ
ꌌꁨꇈ

ꀉꂿ
ꉂꑟꅑꌠꑓꑭꌌ
ꑓꏯꆏꉚꄉꄮꇬ
ꉢꀉꂿ
ꅽꈁꑓꑊꈜꁮꌐ
ꀑꐎꐍꎭꀕ

ꊿꀉꑌꈨꅉꀕꃅꉠꏯ
ꆎꀊꏀꃅꇬꎔꐯꎔꄷ
ꀊꋨꄮꇬ
ꆎꆹꅽꀉꄉꀋꃋ
ꆎꆹꉠꀉꄉꑮꃀ

ꉠꀉꂿꈁꑓꑊꑆꍕ
ꀑꐎꐍꎭꀕ
ꉢꅇꂷꀉꄂꀋꉬꃅ
ꉈꑴꉢꉌꃀꆏꑖꒆꄮꇬ
ꆏꉡꐞꁧꀐ
ꆏꉡꐞꁧꈭꐨꆀ
ꉢꒆꌟꒉꐛꌠꅀ?
ꉠꀉꂿ
ꉡꆹꈍꃅꆎꉂꇆ

ꉒꐎꁦꀑꏣ
ꃅꄂꐍꊭꀕꌠꂿꇬ
ꉪꊇꌙꈈꅍꅇꀋꊌ
ꒊꌋꀕꌠꁧꏡꐯꇯꅲ
ꌩꏪ
ꉪꊇꌙꈈꅍꅇꀋꉉ
ꃅꄂꐎꐷꀕꌠꂿꇬ
ꋍꑠꏡꄉꑵꉬ

ꁧ—ꆈꌠꅿꀁꇬ
ꁧ—ꆈꌠꅿꀉꂿ
ꁧꏡꐺꌠꃅꉒꃅꄂꆹ
ꆈꌠꀉꁌꀋꁧꁦꎴꌠꒌꆠ

ꐍꊭꀕꌠꃅꄂꂿꇬ
ꉪꊇꌕꈈꅍꁱꀋꐭ
ꉪꇐꇭꀧꈑꍀꂷꌠꇬꄉꐞꁧ
ꑘꒃꈾꋠꑠꇅꊌ
ꉪꊇꌙꈈꅍꁱꀋꐭ
ꉌꃀꈁꏾꉪꉆ

ꎯꂚ
ꃨꀋꈤꌠꃧꃨ
ꐥꍂꃅꃨꀋꊰꌠꃧꃨ

ꃅꑌꑞꄮꆏ
ꁧꏡꆏꉙꈴ
ꎯꂚꇆꎯꂚ
ꉂꑟꅑꌠꑓꋪ
ꉪꊇꒌꆠꇬꁨ
ꒌꆠꈬꏡꀑꑭꇬ
ꃨꏀꃨꈴꌐ

ꃅꑌꇫꑟꀋꇁꌦ
ꑋꈌꇫꈴꁧꀐ
ꎯꂚꇆꎯꂚ
ꃆꄔꉐꆂꁨꐞ
ꉪꊇꑵꃚꊷꆣꀕ
ꑵꃚꇇꁮ
ꀅꌳꃅꅥꇁꉌꃀꌸ

ꃨꀋꈤꌠꃧꀕ
ꐥꍂꃅꃨꈤꀋꉆꌠꃧꃨ

    ꉉꀽ:《ꇈꃶꆿꐂꉙꇐꁱꇐꌋꄉ》ꋐꌠꇬꌋꄀꌠ
 

ꇁꀦ: 《ꆃꎭꉜꇐꁱꀕ》 ꁰꄻꌠ:  |  ꄜꃑꌠ: beley ꌤꃅꅉ