ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꊰꌕ)
ꄜꃑꄮꈉ: 2013-04-01  | ꁰꄻꊿ:ꀉꈌꏬꌋ

ꂴꊛ:ꉒꈌꈬꇬꉂꏣ(ꊯꑌ)http://yi.yizuren.com/plus/view.php?aid=129

                         ꊰꌕ

   ꑠꃅꐙꌠꃅꈎꃅꆪ,ꑠꃅꐙꌠꈊꃀ,ꀀꑌꇴꒉꀋꅲꌠꆹꁨꇐꀋꐥꏠꌠꌋꆀꁨꇐꐥꏠꌠꀉꄂꉫꈨꇿꇬꉬꂯꆏ!
   ꄚꉪꊇꈬꉐꃘꊰꃪꐽꎏꉻꆏꐥꌠꁍꇩꀉꂿꊖꆈꋋꄹꄩ,ꀀꑌꇴꒉꀋꅲꌠꆹ,ꑸꆀꌋꆀꂚꄏꑋꐤꅉꑤꍰꇓꈓꀄꊭꋋꂷꀉꄂꉫꈨꑌꇿꉬꂯꆏ!
   ꀊꄶꁧꉈꈜꎴꃅꄷꐛꌠꆿꃀꁡꇤꀀꑌꃹꒉꀋꅲꀐ。ꆺꃮꒊꃀꀀꑌꃹꒉꀋꅲꀐ。ꃪꍶꌋꆀꎻꉐꑠꑌꀀꑌꃹꒉꀋꅲꀐ。ꃅꃴꃄꅉꇬꉱꎍꌠꃅꉒꀊꄖꀉꇖꀊꋨꈧꆹ,ꀊꄶꈍꇖꇗꌠꃅꍵꉈꐎꈧꌠꏦꄉꇬꄽꀋꄐꀐꐛꅹ,ꀅꈓꍻꃅꆄꇖꇫꎍ,ꀋꇊꇬꋀꊇꑌꀀꑌꇴꒉꀋꉆꀐꌠꌡ。ꆺꃮꒊꃀꑍꋯꀻꑳꆈꐷꀕꌠꇂꃴ,ꇤꈏꇬꃆꄔꅪꇬꀕꃅꇬꊎꐞꑴꌦ,ꃱꏢꒉꈧꌠꏬꏮꌋꆀꀛꆽꄹꎧꑆꌋꆀꐙꄏꀙꀐ,ꃰꊿꈧꌠꆹꌕꑍꌕꉖꃅꑓꋪꊼꇅꑌꂭꐯꀋꇱꀐ,ꑡꑌꉬꇮꃅꀀꑌꃹꒉꀋꅲꌐꀐ。
   ꃰꊿꈧꌠꆹꇫꄉꇁꉚꇱꀋꏦꃅꎍꑴꌦ。ꉒꈌꈬꇬꄉꇁꉚꇱꀋꏦꃅꎍꑴꌦ,ꇤꈐꏢꁮꇬꄉꇁꉚꇱꀋꏦꃅꎍꑴꌦ,ꀋꉊꂴꋌꃀꈴꅐꁧꀐꌠꎺꏣꌋꆀꀃꑍꉘꇉꐨꈯꄔꇬꄉꇁꉚꇱꀋꏦꃅꎍꑴꌦ。ꇅꂚꆹꑞꃅꀱꉈꑴꀋꇁꑴꌦꌠꉬ?ꋋꆹꄵꇓꁦꀑꏨꆉꇱꉀꌊꁧꀐꄷꌠꅀ?ꋋꆹꌧꂓꇆꆉꏪꇬꄉꊴꃀꐜꅪꇱꌭꇬꊏꄉꇈꀐꄷꌠꅀ?ꈛꌋꊿꈧꌠꋍꁥꇈꋍꁥꄹꀊꏀꏃꌠꅲꇐꈨꇐꉉꀱꎼꇁꇬꎷ:ꌧꂓꇆꆉꏪꇬꂚꄏꅿꑭꁘꂿꃚꊌꀋꈨꇬꎷ:ꄵꇓꁦꀑꑌꄡꇗꂚꄏꅿꑭꐪꀕꌐꍈꑌꊌꀋꂿ……
   ꀊꑴ,ꌤꀞꊿꋋꈨꇆꌤꀞꊿꋋꈨ!ꌤꈍꒈꌺꑠꍈꀞꇬꑌꁮꏂꀍꀠꌤꀞꃅꀞ!ꃄꐎꌕꑍꌕꉖꇫꈴꁧꀐꇬꑌ,ꑞꐛꅹꌤꑠꍈꀞꌊꊋꐛꀋꄐꌠꉬꂯꀋꆾ?ꆿꃀꁡꇤꃰꊿꈧꌠꆹꎭꂵꊞꐂꊂꅑꁧꎹꇬꎍꌐꀐ;ꄚꑠꃅꑴꇬꊾꂷꀊꄸꀈꏦꊂꅇꀋꂄꑠꇬꆹꉉꂷꑌꀋꐥꀋꐊꑴꌦ,ꀊꄸꀈꏦꆹꀋꉊꂴꋌꃀꎲꄏꋺꌠꀋꑴꃅ,ꊨꏦꑭꄑꄉꂚꄏꇬꈭꋏꋨꏦꁧꌠꆹꋍꉎꀋꐥꃅꁌꇐꈤꀐꌠꅿꑌꇐꑳꇐꉬ。
ꆿꃀꁡꇤꆈꌠꃺꑌꈧꌠꉌꂵꆶꊸꌊꌌꉽꐯꇬꄉꃪꌠꁬꃷꈨꀋꏮ,ꋍꁥꆏꋍꁥꄹꐚꀥꏿꇁꃴꄿꏁꍅꅿꀻꑳꆈꏸꀕꂶꌠꈐꏭꊐꌐꀐ。
   ꋀꊇꉌꂵꇬꆹ,ꃴꄿꏁꍅꆹꐥꋊꐥꍂꃅꋀꊇꅿꄐꍈꂶꌠꉬ,ꐥꋊꐥꍂꃅꋀꊇꅿꑘꃅꑠꉼꇬꍗꑮꂶꌠꉬ。ꃴꄿꏁꍅꅿꀁꇬꂶꌠꆹ,ꇣꍤꄹꉇꌟꃅꊿꈧꌠꐮꆼꑐꌊꊾꑭꐯꄔꊿꅳꁖꐯꍀꌠꏣꇬꎍ。ꄚꑠꃅꑴꇬꇤꍤꇤꄻꄹꉇꌠꌟꃅꎓꁨꄹꆹꀋꎍ,ꐋꀋꌡꇣꋲꌠꆏꋋꆹꇣꍤꄹꉇꌟꃅꃰꊿꈧꌠꅿꎓꁨꃅꎍꌠꉂꅇꑟꅅꄜꐯꇯꌠꒈꃚꉐꃚꑠꆹꊿꋋꀋꈨ,ꃷꌠꃼꌠꐮꏯꁌꏤꈼꌠꃚꋒꊿꋌꀋꈨ,ꀊꅰꃅꎧꑱꈭꐨꃶꏈꂿꏈꃅꎍꌠꒉꏈꂇꃚꌋꆀꐯꊨꐯꀖꅇꑌꊿꋌꀋꈨ,ꀊꅰꃅꉂꊿꈧꌠꅿꉂꅇꑟꅅꐝꂿꀕꌠꌋꆀꉂꏣꐞꍠꀕꌠꉼꉹꂢꃚꊿꋌꀋꈨ……ꆿꃀꁡꇤꆈꌠꃺꑌꈧꌠꅿꉂꏣꌋꆀꉘꇉꐨꆹ,ꀊꄶꊾꋩꁧꀊꋨꈨꌋꆀꇫꋩꆹꌠꊿꂶꌠꇬꀋꇁꐛꅹ,ꄂꆼꈘꅍꊽꉌꌤꑓꀖꌦꄉꏽꃅꎌ。
   ꐒ!ꐒ!ꐒ!
   ꆿꃀꁡꇤꆈꌠꃺꑌꈧꌠꆹꂚꄏꅿꀑꇬꋬꂻꒈꎴꌠꎁꃅꐒꊀꇁꌐꀐ,ꆿꃀꁡꇤꅿꊫꂫꃰꇌꎁꃅꐒꊀꌊꅇꉉꀋꄚꌐꀐ。
   ꆿꃀꁡꇤꋋꂷꆹ,ꀊꄶꁗꏒꈬꊰꈬꉘꆹꏮꇬꐛꎍꌠꁦꐚꁡꇤꀉꁁꈧꌠꌋꆀꐮꌠꃅ:ꑞꈎꑞꆪꑞꑍꇬꄉꅑꅷꇁꌠꉬꀋꐚ,ꊾꐥꒉꌠꌋꆀꌠꋋꌠꁘꋋꑍꏠꆹꈍꄮꇬꇯꆐꂿꃅꈼꄟꇱꌄꇤꌊꐺꌐꀐ。ꀉꑳꂷꒆꋧꃅꅞꀐꄷꆏ,ꋌꒆꊿꐙꅀꊿꀋꐛꃅꀋꐚꑴꌦꇬꆏ,ꉈꑴꆏꌤꆿꀋꑗꀋꈨꑠꍈꇯꊌꀋꃅꑴꌦꇬꇯꆐ,ꄚꋍꅿꃰꊿꐥꐨꐥꒉꌠꌋꆀꌠꋋꌟꁘꌠꆹ,ꇓꆈꀋꃀꂷꀋꏭꅡꊪꀕꃅꇫꎍꇈꀐ。ꐚꌊꁈꄻꑌꉆ,ꁏꐙꐛꑌꉆ;ꒊꌋꀕꃅꄩꑌꄉꌞꄩꆼꍅꑌꉆ;ꎮꑑꅉꃅꌞꊿꇱꌌꎇꃀꍅꑓꌟꃅꆼꍅꑌꉆ;ꈁꏾꃅꌞꊿꇱꌌꃷꃼꅀꈁꏾꃅꌞꄩꆼꍅꑌꉆ……ꋋꆹꐚꌊꁈꂷꅀꁏꐚꂷꅿꋍꐥꍂꉬ。ꌠꋋꌟꁘꅷꃶꐙꃅꐥꀋꄐꒉꄮꇬꆏ,ꀋꉊꋍꃢꁡꇤꈍꑋꂷ、ꁡꇤꈍꑋꊰꂷꃅꇬꁏꐙꈧꌠꉬꇮꊋꏓꋍꁥꃅꄓꄉ,ꀑꇬꀋꑴꃅꄓꇁꇬꈁꁏꋺ,ꐚꌊꁈꅿꌦꐳꈧꌠꆹꁏꐚꁡꇤꅿꄓꈁꁏꌠꂽꌒꁬꌠꋋꇱꉙꅪꍠꀕꋺ。ꄽꂫꆏ,ꌠꋋꌟꁘꈧꌠꅿꃃꄔꂇꃚꈧꌠꆹꒊꃀꒉꌤꌠꌟꃅꑍꇫꈴꁧ,ꐤꒉꌠꈧꌠꅿꃰꊿꑋꅉꂶꌠꆹꒊꃀꈯꄔꇬꇓꃀꀋꃀꌡꇫꎍ,ꒊꃀꆹꑍꁧꀐꄚꇓꆈꀋꃀꆹꅡꊪꀕꃅꇫꎍꇈ,ꄚꄉꈜꎴꃅꄷꐛꌠꁡꇤꋋꂷꆹꄡꇗꂴꆽꌟꃅꐥꋊꐥꍂꃅꐛꐈꀋꉆꌠꐙꁧꐧꋦꄹꏦꌬꇫꎍꌦꀐ。ꋍꃢꇀꅉꀕꃅꉘꇉꄉꈧꌠꐈꇁꉘꇉꋚꀋꎑꃅꈥꏢꀕꇬꈴꁧꇬꎷ,ꄷꀋꁧꃹꅼꃅꇁꀎꋏꀿꃀꈧꌠꅿꀉꆩꁮꅉꌧꌠꎺꏣꈐꏭꃹꁧꀐ。ꄚꑠꃅꑴꇬ,ꀋꃋꋋꇅꇬꆏ,ꋋꇅꃅꊿꁥꄓꎸꇁꀐ,ꋀꊇꆹꁧꉈꈜꎴꐮꈜꎴꅉꇬꄉꇁꌠ,ꉇꑴꆏꁧꈐꄉꁈꁧꉈꁧꇈ,ꀋꃉꆏꀱꉈꑴꇁꌠꑌꐊ。ꋀꊇꑫꆹꐯꇯꐮꌠꌐꄷ,ꂓꆏꇭꍣꄈꂓ。ꀋꄹꄷꄀꇗꇱꄉꋀꊇꅿꂓꑫꈧꌠꉉꎼꇁꄷꑵꉬꇬꆹ,ꇿꑟꆏꇿꋦ,ꇿꑟꆏꇿꀀ,ꆿꃀꁡꇤꑟꇁꑲꆏꆿꃀꁡꇤꌤꃅꄐꂓꀐꌠ。ꊁꀉꉘꏢꐛꈭꐨꑲꆀ,ꆿꃀꁡꇤꆈꌠꃺꑌꊇꆹꇬꐝꉅ,ꆿꃀꁡꇤꌤꃅꄐꁥꌠꅿꌟꒉꂶꌠꆹꋀꊇꌟꃅꄡꇗꂓꑫꐥꅊꇈ,ꊂꆏꉬꇮꃅꇅꂚꄷꇴꅷꇁꌐꌠꉬꀐ。
   ꇅꂚꌋꆀꌤꃅꄐꈐꏭꊿꈧꌠꅿꃢꈜꈚꄟꆹꐯꀋꌡ。
   ꋍꅿꀎꇓꇬꆹꉬꎏꏸꅪꂷꇬꅑ,ꇭꀧꆹꂽꃢꈜꀈꆧꈬꈚ,ꇭꀧꀉꒉꇈꈁꑓꆏꊼꇅꏠꈭꏭꃅꐛ,ꃢꈜꌋꆀꇭꀧꐯꋭꐯꀕꋭꐛꅹ,ꌺꏦꉧꑳꅍꎍꇈꃀꅉꆐꈃꀱꋦꃅꎍ。ꀋꉊꂴꆽꆹ,ꁡꇤꇬꊿꈧꌠꆹꇫꉌꀋꒊꋺ,“ꀉꑳ”ꀉꒉꑍꊏꉆꈓꈬꈎꐥꋋꂷ,ꆼꁠꌋꆀꐧꊭꇬꊋꃤꈯꊋꈍꑋꑌꀋꐚ,ꋋꆹꆿꃀꁡꇤꄩꆼꍅꆼꉱꎍꌠꃅꉒꈧꌠꄹꑄꁻꂱꑱꅉꎭꄎꄏꀋꐚ?
   ꆿꃀꁡꇤꆹꇉꂾꁦꀑꅿꁦꑭꇬꐛꑠꈚ,ꋍꈓꇖꄮꐰꊨꀋꄅ,ꃅꄂꀊꄖꇈꃅꉒꃴꌩꈍꀕꇬꎷ,ꉘꁮꂶꌠꆹꇯꍝꃅꂿꇁꈨꄮꁨꇬꎷ。ꁡꇤꇬꑶꋦꋍꉐꎖꁯꌠꆹꉈꑴꁷꐞꌊꁦꌺꈍꑋꂷꈯꄔꇓꇬꐛꎍꑴꌦ。ꇢꊭꇬꆏꆺꃮꒊꃀꄷꀇꐒꑠꂡꇫꈴꒉꑴꌦ。ꆺꃮꒊꃀꅿꁰꅐꁀꌠꏯꆹꑶꋦꀁꄖ,ꁮꐚꁀꌠꏯꆏꃀꅉꆐꑶꋦꐛꁓꄅꇫꎍ。ꁰꅐꁀꌠꏯꆹꌟꈚꅿꋦꁍ,ꁮꐚꁀꌠꏯꆏꀋꉻꅿꋦꁕ。ꌠꈚꀋꉻꋋꑍꁯꆹꋊꃅꇯꆐꄚꀀꄉꐮꃝꐮꐊꅷꇁꐛꅹ,ꇯꍝꃅꅽꃀꉠꍯꏬ、ꉠꃀꅽꍯꆗꃅꋠꇐꌋꆀꌺꇖꑠꆹꌩꄩꑙꌺꌡꃅꐥꅷꇁꇬꎷꌠ,ꐙꀠꏭꌉꄿꂿ,ꁏꐙꇫꆼꍅꄿꂿ,ꊋꏓꋍꋧꃅꐮꇬꇇꀤꇇꄻꄉꐮꐊꅷꇁꐛꅹ,ꇯꍝꃅꀊꄶꁡꇤꇬꉱꎍꌠꃅꉒꀉꄖꀊꋨꈨꌡꇨꎍ。ꈀꄸꑌꇫꇽꇬꒇꂱꑱꅉꎭꀋꄐ,ꈀꄸꑌꋀꏭꄙꌉꄏꌠꆹꀋꐥꀋꐊꃅꅡꊪꀕꃅꄚꋦꄚꀀꅷꀃꑍꋋꄮꇬꑟꇁꌠꉬ。
   ꄚꋧꃅꇣꄧꌤꃅꋋꑵꆹ,ꈍꄮꑋꃅꐛꃄꐚꁏ,ꃅꐛꃅꄏꀕ;ꈬꑍꈫꄅꀕ,ꊯꊪꑍꄀꄃ;ꃣꈌꉌꉪꐛꀋꉆ,ꐦꐛꃅꌒꅞꀋꉆꑠꑵꉬꅊꇈ。ꇅꂚꄷꀉꑳꀉꒉꋋꂷꇁꆿꃀꁡꇤꑟꇁꊁꋍꁮꆪꀋꐛꃅ,ꃅꉒꈍꄕꄗꋋꈨꆹꇙꈩꌽꂰꅷꐺꀐ。ꀋꇊꇬꆏꐦꀞꐦꑳꎴꑠꂷꇬꄉꃅꆳꋍꄲꆏꋍꄲꄹꁏꇬꈴꇁꌠꀋꏮ,ꃅꉒꈧꌠꆹꋋꇱꁏꅷꑘꀋꒃꃅꀅꌳꀅꌳꃅꇫꁮꇬꐂꅷꐺꀐ。ꌟꈚꄰꌟꒉꈧꌠꆹꄽꂫꆏꉈꏭꉌꈲꃅꄷꉜꅲꆫꃨꁧꌐꀐ,ꄚꄉꋍꅿꋊꃤꈧꌠꆹꀋꉻꄰꌋꆀꐛꐈꌊꐮꄮꌠꌡ,ꐮꀋꄮꌠꌡꃅꊾꋌꀋꌧꇫꎍꀐ。ꁏꐚꈯꄔꇬꆹ,ꂿꐯꑌꈨꑌꇈꅡꈭꌟꒉꄷꌠꆹꃴꄿꏁꍅꉬ。ꋋꆹꂵꆧꈊꃀꀋꌋꃅꌤꃅꄐꇬꉜꄉꀥꇬꎷ,ꌤꃅꄐꑟꆹꋺꄉꀱꇁꌠꊿꀊꋨꈨꆹ,ꈀꄸꑌꏃꊰꈌꋓꀕꃅꇅꂚꂶꌠꇬꉜꒉꐯꉜꒉꃅꇇꋓꀍꃈꄚꌐ。ꋋꆹꊁꆏꉹꁌꋍꏅꌠꇱꌋꌊꆿꃀꁡꇤꑘꃅꑠꉼꇬꍗꑮꄻꄉ,ꃄꅉꍤꃄꅉꎴꃄꅉꁸꌟꃅ,ꂱꀘꁥꌠꇬꊥꇬ,ꆼꁠꑍꂶꌠꇫꅐꋒꅿꇬꅑꎍꌠꌡꃅꐙꃅꃴꇬꃹꁧꄉꏾꃅꎍ,ꑡꀕꂿꀋꋻꈨꀋꈨꑠꑞꑵꌠꌤꉬꄿꂿ,ꋌꇱꀞꄻꌊꐛꒆꅍꎍꇈꊱꁨꀕꃅꄉꇬꎷ。ꌞꊿꋍꊂꍖꀳꀮꄑꄉꉉꇬ,ꃴꄿꏁꍅꆹꈬꉘꃅꄷꏨꆉꀈꇭꂶꌠꌡꃅꐚꆹꃅꃴꇬꑟꆹꄏꑴꄷꃅꉉꌐ,ꄚꋍꊨꏦꆹꅉꀕꃅꀒꆺꇤꄉꉉꇬꎷꇬ,ꑠꈨꇿꉬꂯꀒ,ꉠꅿꅐꋑꌠꆹꇅꂚꏤꇱꄻꇬꄀꄉꅿꇁꌠꉬ,ꇯꍝꃅꐚꃅꃴꇬꑟꆹꄎꌠꆹꇅꂚꏤꃅꇭꍣꄈꁥꌠꀉꄂꐥ,ꆿꃀꁡꇤꃅꄉꇬꆹꇅꂚꀉꄂꐥꄷꉉꇬꎷ!
   ꊾꑌꐚꃅꃴꇬꑟꆹꄎꄸꑲꆏ,ꇯꍝꃅꌦꌺꌋꌺꍜꇰꀊꇐꀋꉬꄷꌠꅀ!
   ꀊꉘꄨꍈꎭꂵꊞꐃꂶꌠꆹꇅꂷꎹꇁꀐ。ꀒꅡꂫꅡꇈꑓꂷꀯꆱꍅꅍꎍꌠꀊꉘꄨꍈꋋꂷꆹ,ꑍꃀꑍꊂꆏꈭꐏꈜꐏꈿꌬꌠꃅꈭꐨ,ꂷꌌꄻꄉꌠꉹꋬꀵꇈꇇꇬꆏꐳꆺꁘꀉꅪꑠꏢꌌꄉ,ꅉꀕꃅꈌꁍꎼꏢꀋꏮꇅꂚꊂꈹꐺꇬꎷ。“ꑠꃅꇬꀋꍑꌠꉬ,ꇝꂱꌤꃅꌟꆹꏦꃤꐥꑵꉬ,ꑞꑷꄰꈁꏾꃅꈿꌬꊿꌬꉆꄷꌠꉬ!”ꇅꂚꆹꑠꃅꋍꏭꅇꀱꅇꏮꇬ,ꄚꋌꇬꀋꑇ。“ꆎꆹꌦꌺꌋꌺꍜꇰꀊꇐꀋꉬꄷꌠꅀ?ꃴꄿꏁꍅꅉꀕꃅꑠꃅꉉꇬꎷ,ꆎꆹꐚꃅꃴꇬꑟꆹꄎꄷ,ꉡꑌꆎꐊꄉꐙꃅꃴꇬꁧꂯ!”ꇅꂚꒈꌦꀕꃅꉉꇬ,ꉡꆹꐥꋊꐥꍂꃅꇬꀋꄿꇫꐚꆹꀋꄐꌠꄹ,ꉠꅿꄐꐪꀊꋨꍈꆹꉬꇮꃅꇭꍣꄈ、ꁌꄝꂽꑼꄻꉢꁴꌠꉬ。“ꄚꑠꃅꑲꆏ,ꉡꑌꇭꍣꄈꂶꄻꂯ!”ꇭꍣꄈꆹꇇꎇꇬꑌꇇꒃꀋꉆ,ꑓꁉꇬꑌꊌꂿꀋꉆꐛꅹ,ꊾꋌꉇꐞꉅꀋꄐ,ꎭꂵꊞꐂꆹꋌꆼꒆꇅꂚꇬꎑꄉꀁꑌꁌꄝꂽꑼꄻꌠꉬꄷꎍꇬꎷ。ꃚꋠꈑꆠꇤꀋꇮ、ꉘꅝꂱꀯꌩꀋꇮꌠꀊꉘꂷꏦꋩꋋꂷꆹ,ꇯꍝꃅꂽꄻꈎꄜꑌꀋꇎꑴꌦꐛꅹ,ꇅꂚꆹꊼꇅꑓꑣꌺꃅꇬꊼꇅꉌꏹꑓꏹꉌꌒꊐꄻꅐꌠꉬꀐ,ꉌꂵꇬꆹꊫꂫꀉꎴꌠꊂꆹꐥꑴꌦ,ꀊꉘꂷꏦꋩꌠꊂꆹꎍꑴꌦꃅꉪꇫꎍ。
   ꉈꑴꊾꈍꑌꑼꈧꆏꊨꏦꈎꄜꆹꇅꂚꌋꆀꋍꑵꍈꀋꍣꇈ,ꊨꏦꑴꅉꆹꂽꄻꇬꈎꄜꀉꒉꇨꌠꊨꏦꅉꐙꐛꅹ,ꐯꇯꊿꋅꁱꂷꌶꅉꇬꄉꌧꇐꌶꁧꌠꉬꄷꎍꌐ。ꂚꄏꇫꄉꉪꋬꉪꈽꅷꐺ。ꆿꃀꁡꇤꋋꈚꇬ,ꑞꐛꅹꇗꂷꋋꈍꑋꂷꌌꊪꏿ、ꅿꁮꇙ、ꁧꅑꂷꅑꀋꆹꌠꉬꂯ?ꀅꌳꃅꇬꄉꉜꎼꇁꇬ,ꑘꃅꎀꍹꑠꉼꀉꄂꐥꇬꀋꍑꑴꌦ,ꆿꃀꁡꇤꄉꄈꅿꎀꍹꂷꑋꋈꐛꄡꑟꋭ。ꄈꁴꄚꄉꐴꅑꅿꊧꅑꃨꇈꉹꁌꉪꐚꉪꋬꈧꌠꁳꏜꃅꈠꃅꐂꄈꎀꍹꇬꃹꇁꎻ,ꋍꁘꋍꁘꃅꍠꑋꐴꀋꄓꄳꑋꀑꀋꉞꌠꋍꉻꄻꐛ。ꋀꊇꁳꄉꉜꌧꐝꉅꎻ,ꇭꍣꄈꆹꇇꎇꇇꒃꀋꉆꌠꀋꉬ,ꀊꅰꃅꌦꌺꌋꌺꑌꀋꉬ,ꋋꆹꄈꅿꉈꈽꂿꃆꁻꌐꅿꏶꊋꃤꀉꇨꌠꇂꃴꄉ,ꑓꋪꁉꄉꍻꇯꏢꀕꃅꊨꏦꃆꏂꊁꑌꊫꂫꉜꐝꉅꇈ,ꐪꊛꄉꆿꃀꁡꇤꄉꉹꁌꌅꈌꐥꃅꄺꀱꌠꊌꐨꌌꀒꁨꋍꁘꃅꈫꈈꄉ,ꎹꉼꍗꑴꐥꐨꀉꏀꌠꋈꄻꎻ。
   ꐚꁦꐧꋦꅿꉌꊈꄚꌧꆽꈜꆹꈍꃅꅱꀋꅐꀉꇖꇨꀐꌠꉬ,ꃄꐎꈍꉘꍈꈍꈐꆹ,ꂚꄏꆹꊨꏦꅿꉪꐪꋋꈨꃅꌊꇫꑟꀋꄐꌠꉬ,ꇯꍝꃅꉌꂵꁦꀑꉪꇬꐰꇑꁧꑭꊰꄷꉉꉆꄉꏾꌠꄹꇆ。ꊿꈍꑌꑼꂷꌌꄈꇬꃹꄉꑴꇬ,ꄚꋀꊇꅿꄐꐨꆹꀊꀋꇨꀊꀋꂥ,ꈜꀕꇈꉌꂵꉪꇐꀂꏾꉈꈽꐘꌠꄉꑋꈜꀕꃅꀙꑴꌦ。ꂚꄏꆹꌦꌺꉬꄷꌠꉜꐪꋀꇤꇫꎭꈭꐨꆏ,ꊨꏦꅿꀑꇬꊫꂫꌋꆀꂚꄏꅿꀑꇬꊫꂫꆹꋀꌌꏟꈯꀕꃅꏣꄀꋍꈚꁍꄉꌠꀋꏭꉜꄉꀐ。ꂚꄏꆹꋀꊇꅿꀑꇬꈭꋏꌩꁧꉬ!ꂚꄏꆹꋀꊇꅿꀑꇬꇇꒉꀕꐬꉬ!ꂚꄏꆹꊌꂿꉆꌠ、ꇇꎇꇇꒃꉆꌠꇭꍣꄈꂷꉬ!ꋀꊇꆹꉁꅉꌠꉂꏣꌋꆀꃆꏂꊁꑌꊫꂫꉘꇉꐨꉬꇮꄻꂚꄏꇬꊂꁠꄉꌐꌠꉬ。ꂚꄏꋍꊨꏦꀃꅉꑌꉪꇁꇬꀋꑟꌠꆏ,ꀋꆠꀋꄶꊈꌃꌠꉂꐪꉂꏣꈧꌠꀻꎆꌠꆹ,ꃀꅉꆐꑡꄩꑌꋌꇱꐂꇫꎭꌐꐛꅹ,ꄽꂫꆏꐛꐈꇁꐮꉂꌠꐛꅊꇈ,ꄚꐮꉂꀕꏣꋋꈨꆹ,ꅼꇻꀕꌠꇨꊨꉂꏣꀉꄂꐊꈧꀋꉬ,ꀊꅰꃅꀋꎪꀋꑴꌠꁌꒉꄣꅼꌠꑌꐊꈴꌐ……
   ꀊꄸꀈꏦꋍꑊꅿꃝꐨꋋꏢꆹꈌꁈꄸꑴꇬ,ꆿꃀꁡꇤꐥꌒꄻꌒꐨꆹꊂꆏꂿꃅꉮꌠꌋꆀꊿꇱꉮꇫꎭꑴꇬ,ꄚꁡꇤꇬꐧꇁꃰꊿꈧꌠꆹ,ꄡꇗꊴꃀꐜꅪꌟꃅꉂꑟꅑꇈꐥꍂꃅꑘꊐꉹꁌꉌꂵꇬꀀꎌ。ꋋꆹꒈꂃꌟꃅꁖꅐꏿꌠꑌꀋꉬ,ꄡꇗꐝꍚꀕꌠꇉꅼꎺꒉꂷꒉꉬ,ꄡꇗꀊꄶꆺꃮꒊꃀꄩꉱꎍꇈꁯꇐꅑꌠꄂꐎꄂꅪꉬꑴꌦ。ꉌꌤꑓꀖꌠꌋꆀꉌꇬꑓꇬꌠꉂꐪꈧꌠꆹ,ꄚꄉꀊꄶꁡꇤꄩꇊꎍꌠꃅꉒꈧꌠꀋꏮ,ꀅꌳꌺꃅꇙꈩꅷꐺ,ꄚꃄꆳꈧꌠꆹꈍꃅꑌꇫꁏꅷꁧꀋꄐꌠꉬꑴ。ꇅꂚꂶꌠꑞꃅꋩꌊꑟꀋꇁꑴꌦꌠꉬꂯ?ꀊꄸꀈꏦꌋꆀꎭꂵꊞꐂꑌꁦꊂꌕꑍꌕꉖꀋꐛꑴꌦꄷꌠꅀ?ꎭꂵꊞꐂꂶꌠꆹꀞꇁꐷꌊꑛꆪꄮꐰꒊꃀꌡꇫꎍ,ꋋꆹꌭꀋꄿꃅꅇꂷꉉꑽꇫꑌꐥꀋꄿꌠ。ꄚꀈꏦꆹꁡꇤꋋꂷꑬꊂꃅꇫꐥꍂꃅꃴꍗꀕꌠꑍꈬꑍꇁꏢꉬꑴ,ꋋꑌꇯꍝꃅꇅꂚꂶꌠꐒꈻꌊꇁꀋꄏꄷꌠꅀ?ꀊꄶꌧꂓꏪꇬꆹ,ꇅꂚꇬꇁꀋꅲꌠꆹꇅꂚꀋꅑꌠꉬ,ꇯꍝꃅꇬꆹꄇꄜꋊꄉꑓꅑꌠꈀꄸꑌꋋꂿ、ꅺꅑꌠꈀꄸꑌꋋꈨꃅꑤꊈꎼꏹꂷꇑꌠꆹꍑꍓꐘꑌꀋꉬ?ꄚꋋꇑꇬꋌꇬꉬꀋꅲꑲꆏꈏꇬꆹꋋꉬꅲꄷꌠꅀ?ꃰꊿꈧꌠꉌꃀꉬꇮꃅꉒꃴꃅꃴꇬꎍꌐꄉ,ꉌꐒꇁꎭꌐꌦꀐ。
   ꀋꃉꆏꁡꇤꋋꂷꇬꆹ,ꋍꑍꌠꆏꃨꆰꏸꈧꅷꋍꑍꃅꈊꇀꉛꀋꑍꃅꎍ。ꀉꐔꅪꎔꈧꌠꆹꃢꌩꈚꎵꀋꄚꃲ,ꁨꂿꑋꑿꈧꌠꆹꁦꀑꁧꄩꏜꎹꏜꋠꁧꀋꄚꌐꃲ……ꐥꐨꆹꑍꃀꑍꊂꌟꃅꊱꁨꊭꁨꃅꀋꐛꃲ,ꉌꃈꑓꌒꃅꀋꐛꃲ,ꀑꇬꐤꒉꃅꀋꐛꃲ。ꇅꂚꆹꊨꏦꊿꉬꐛꅹ,ꋋꉪꅷꋋꍈꇬꆹꄀꄎꌠꉬꃅꉪꇫꎍꌐ。ꑠꄮꇬꆏꃰꊿꈧꌠꆹꉌꂵꆹꊼꇅꁦꉘꀕꇁꌐꌦ:ꇅꂚꆹꈍꃅꑌꀱꇁꌠꉬ。ꋋꉪꅷꁡꇤꇬꊋꋠꐨꈧꌠꄀꇬꆏ,ꋋꆹꀋꎪꃅꀱꇁꌠꉬꃅꇫꎍꌐꌦꀐ。
   ꉈꑴꉉꄷꇬꑌ,ꁡꇤꇬꉹꁌꈧꌠꆹꀊꄸꀈꏦꁨꌊꎼꇁꇬ,ꌤꑘꀄꊭꐘꑌꀋꉬ,ꋋꑌꐒꇁꊀꐪꌋꆀꉌꐒꇁꎭꐨꆹꀋꃷꎵꃅꋋꇤꉈꄉꇈ,ꉇꃅꂚꄏꇬꋩꁦꌠꀋꂸꍰ!
   ꑘꃅꁡꇤꇬꊿꈧꌠꆹꉬꇮꃅꇓꈓꇬꊿꈧꌠꅿꐥꐨꁯꌐꑵꀋꉬꍰ。ꆿꃀꁡꇤꆹꋀꊇꅿꀊꄸꀈꏦꂶꌠꇬꉜꒉꐯꉜꒉꌐꌠ。ꋋꆹꋀꊇꊌꂿꋺꌠꇓꈓꑮꆜꈧꌠꏮꀋꋌꃅꎔꃨꇈꀑꁮꅺꐳ,ꌳꃈꌳꉔꑞꑌꐊꐙꌐꑵꌠꉬ。ꇓꈓꇬꈀꄸꑷꄰꀋꃋꑮꆜꂷꉌꂵꀉꒉꇈꀬꅑꃅꌩꏪꇆꆉꈬꇬꄉꁌꄝꂽꑼꂶꊂꌸꌠꋋꇱꁠꄉꇈ,ꃆꀞꀊꐎꂷꊙꌊꋬꂻꃅꁌꄝꂽꑼꋋꇱꏃꎭꀁꇬꇁꄎꌠꆹꈀꄸꂷꋋꂿꋺ?ꇓꈓꇬꊿꑞꑷꄰꀋꃋꑮꆜꂷ,ꊨꏦꀉꄂꃅꂵꅷꏄꍿꀀꈍꇬꄉ,ꊨꏦꇇꒃꄉꇭꍣꄈꏮꉂꏣꇽꌠꋍꂛꊨꃈꌺꋋꆼꋏꌦꀋꇊꌠꈀꄸꂷꋋꂿꋺ?ꇓꈓꇬꊿꑞꑷꄰꀋꃋꑮꆜꂷ,ꉂꏣꏭꉜꇬꑠꃅꀋꎪ,ꑠꃅꀉꅼ,ꑠꃅꐙꎴꀕ?ꆿꃀꁡꇤꃰꊿꈧꌠꀊꅰꉪꀊꅰꃅꉌꋬꈬꐛ、ꉌꂵꑘꒃꇁꌐꀐ:ꇅꂚꆹꈍꃅꑌꀱꇁꌠ,ꋋꆹꀋꎪꃅꀱꇁꌠꉬꄷ!ꀊꄸꀈꏦꊨꏦꑭꄑꄉꇫꋩꁧꇬ,ꋌꈍꃅꀋꇁꄷꌠꉬ?
   ꃴꄿꏁꍅꅿꇤꈐꇢꇑꋮꆹ,ꑠꅹꃅꋌꃀꀋꏭꉌꌒꑓꌒꌠꆹꀱꐛꀕꌦꀐ。
   ꃱꏢꋐꒉꉈꑴꋍꃢꏬꌌꇀꌦꀐ,ꑋꎸꉆꎸꉈꋍꃢꄻꇬꐓꄈꌦꀐ。ꎧꒉꅝꂯꅀꎧꆈꅝꂯꆏ?ꊿꈧꌠꌌꋍꃢꐮꀥꇈ,ꊁꄽꂫꆏꌩꌌꊨꄻꄉꇈꉇꇷꆏꍀꁱꆿꁱꈷꇬꄀꄉ,ꐛꐪꐮꃅꐯꌠꌡꌠꒈꀮꄸꇈꑍꂷꄌꌊꇁ。ꄚꒈꀮꄷꇉꋋꑍꂷꆹꃥꌋꄰꉌꂵꇬꀉꄂꐝꉅ:ꑞꂷꇬꆏꎧꌈꈌꌠꀀ,ꑞꂷꇬꆏꅝꇬꑛꅍꀕꌠꀀ。
   “ꇁꀐ,ꇁꀐ,ꋀꊇꀱꇁꀐ!”
   ꅇꈨꉌꌤꄜꑵꌟꆹꃄꆳꄲꌟꃅ,ꄵꇓꁧꀑꄉꁏꌞꅷꌧꂓꏪꇬꑟ,ꌧꂓꏪꇬꒉꂪꁁꌠꏯꄉꁏꅷꒈꀑꑟ,ꄽꂫꆏꁏꅷꆿꃀꁡꇤꃹꇁꀐ。
   ꋋꇅꃅ,ꐩꋊꎵꑳꀕꌠꆈꌠꇌꑆꇬꋒꂶꌠꊿꇱꅥꂾꏒꀕꀐ:
   “ꅝ,ꅝ,ꅝ,ꅝꀕꅝ……”
   ꁦꀑꇉꄩꃅꋋꌌꄻꇙꌌꇙꇫꎍ,ꀋꉊꑘꃅꑠꉼꂶꌠꋉꐛꄹꈎꌠꀉꄂꑠꃅꐙ。ꉇꆏꁏꐚꉬꇮꄓꉺꁏꄮꇬꑌꑠꃅꐙ。ꄚ,ꑠꃅꑴꇬ,ꈀꄸꂷꋌꉉꐝꉅꄎꂯꆏ?ꀋꉊꊾꌦꑘꄃꐛꅉꇬꄉꇁꌠꀎꋏꀿꃀꈧꌠꆹ,ꀋꃉꆏꃴꄿꏁꍅꀉꄂꋒꇈꀐ。ꐩꋊꒊꃀꆹꋍꃢꋍꃢꆏꃰꊿꎺꏣꋌꌎꋌꑻꐜꀋꈨꑵꉬꅊꇈ,ꀋꉊꌤꅐꄮꇬꄉꅑꀋꃋꑟꌠꃀꅉꆐꀉꉘꏡꐛꀐ。
   “ꅝ,ꅝ,ꅝ,ꅝꀕꅝ……”
   ꄚ,ꋑꇬꂾꃚꇱꄕꊪꅰꑷꎼꇁꌠꆹꉌꊋꌋꆀꉌꌒꌠꆹ,ꊽꑓꁯꂴꆽꐛꎍ。ꊿꈧꌠꆹꉬꇮꃅꃴꄿꏁꍅꅿꀻꑳꆈꐷꀕꂶꌠꇬꄉꁖꅐꇁꇈꆏꂅꉢꂅꏿ、ꆏꄿꉠꄩꐂꃅꆺꃮꒊꃀꋮꉜꄉꀥꁧꌐꀐ。
   ꈜꎴꃅꄉꉜꇬꆏ,ꊿꁥꃆꀞꋩꌊꀊꄶꁧꀮꇬꀁꋌꉜꄉꇁꌐꀐ。
   ꎭꂵꊞꐂꂶꌠꆹꂴꇆꂴꇫꇬꀕꐊꐺ,ꋋꆹꎽꁁꀍꄟꌋꆀꆞꑭꀉꐯꑵꌠꆞꈬꌠꀋꈚꀐꐛꅹ,ꋍꅿꐛꄟꂶꌠꆹꄡꇗꀒꅡꂫꅡꅍꎍ。ꋍꇇꆹꌦꃆꀞꀊꐎꂶꌠꅿꐒꏣꏡꌠꇬꌭꎌ,ꑭꁘꆹꐳꃬꇈꀉꇖꈍꃅꎍ。
   ꃆꀞꂶꌠꇱꄓꇬꆹꊿꇬꀋꋩꃅ,ꊾꂷꎇꇂꃺꏭꀀꎍ,ꊿꋋꂷꄩꆏꀊꄸꀈꏦꌋꆀꎭꂵꊞꐂꑋꏤꏅꃭꇁꄻꇬꉱꄉ,ꀋꇊꇬꊿꋋꂷꆹꄻꁁꆸꄏꏢꇬꊐꄉꌠꌡ。
   “ꀉꁧꀕ,ꇑ,ꉪꇫꇑꀋꄐ,ꄽꂫꆏꇅꂚꆹꉪꇱꈐꌊꇁꀐ!”
   ꊿꈧꌠꋍꁁꏯꆏꀥ,ꋍꁁꏯꆏꐯꀥꉉꅍꐥꇫꎍ,ꋍꁁꏯꆏꇳꉔꇴꏅꅷꐺ。
   “ꀃꈈꁭꑭꑟꀐꇬ,ꉆꐥꃅꇅꂚꁳꃅꇔꀏꇁꎼꇆ!”
   “ꀊꑴ,ꆍꊇꑞꃅꉌꂵꇬꀋꑌꌠꉬ,ꇅꂚꂶꌠꐒꃆꀞꂶꌠꇱꄓꇬꇱꌊꑞꃅꌠꉬ,ꉆꐥꃅꏣꀨꁌꇫꎭꄉ,ꇅꂚꁳꉆꐥꃅꀏꇁꎼꉏ!”
   ꃴꄿꏁꍅꀉꄂꋌꉜꇬꈍꃅꑌꇣꋲꃅꐙꐛꅹ,ꎭꂵꊞꐂꌋꆀꌗꉻꌗꏂꃅꎍꌠꃆꀞꀊꐎꂶꌠꋋꇱꏆꇫꎭꇈ,ꀊꄸꀈꏦꋋꇱꌭꏟꈯꀕꃅꇬꉆꄉꅲꇬ:
   “ꀈꏦꀋ,ꀊꄶꀊꋨꂷꇯꍝꃅꇅꂚꉬꄜꅀ?”
   “ꃴꄿꀋ,ꉡꆹꂿꃆꃅꇬꀋꑟꀐ。”ꀊꄸꀈꏦꅿꀍꄟꂶꌠꆹꌌꏦꀨꃅꊿꐒꄉ,ꀍꑐꈧꌠꆹꁭꁘꄉꀒꈍꑮꈍꅍꎍ,ꑓꋪꈐꏭꆹꐒꇁꊀꌠꃅꉒꈨꌠꆈꃴꃷꃅꀀꈴꌐ。
   “ꇓꈓꄉꇬꊿꎹꀋꊌꅀ,ꄆꃑꅉꄆꑌꐥꑴꄜꅀ?”
   “ꊿꎹꋭꈧꌠꆹꉬꇮꃅꎹꊊꌐꑴ,ꄆꃑꅉꑌꉪꊇꇖꂟꐨꇬꈴꄉ,ꊛꄉꃄꐎꌕꉖꄆꀋꃑꄆꀋꌞꀐ。”
   “ꑠ……ꉬꑲꆏ,ꆎꆹꇅꂚꌋꆀꐮꂿꀐꅀ?”
   “ꂾꆹꂯꐮꂿꀐ,ꄚꋋꆹꉪꊇꅿꍛꀯꂷꋈꄻꌠꆹꈌꁧꇇꏢꀋꅲ,ꋋꑌꇫꇁꀋꅲ。”ꀈꏦꑭꁘꋍꁘꋋꇱꐕꁨꎼꇁꇈ,ꀂꏾꂶꌠꑕꃴꄿꏁꍅꆼꁠꇬꇱꄉ,ꌨꈓꌥꈓꃅꉨꁮꄃꀐ。
   “ꀊꑴ,ꇅꂚꋋꂷꇆ!”ꃴꄿꏁꍅꂶꌠꉌꐒꇁꎭꃅꉉꇬ,“ꑠꃅꑲꆏ,ꆍꊇꅿꌤꐘꌠꆹꈍꃅꂯꆏ?ꋌꇫꉬꀋꅲꄷꌠꅀ?”
   ꀈꏦꂶꌠꉩꆏꇈꒉꌦꀕꃅ“ꀔ”ꄷꑠꇬꉉ,ꐪꊛꄉ,ꆼꁠꑍꂷꌠꊼꇅꇙꈩꇈ,ꀊꅰꃅꉌꎭꉌꆅꋧꇱꏿꃅꄉꉨꌦꀐ。
   “ꑠꆹꉬꑲꆏ,ꋋꄡꇗꉪꊿꉬꑴꌦ。”ꃴꄿꏁꍅꂶꌠꆹꋍꀂꏾꇬꌎꄉꉉꇬ,“ꀋꏦ,ꀉꑳꀋ,ꄡꉩꀐ,ꉪꊇꉈꑴꏡꁈꏁꌦꂿ。”
   ꀊꄸꀈꏦꂶꌠꑓꁴꌩꇈ,ꑓꋪꑍꁆꌠꑓꏣꆹꎭꂵꊞꐂꂶꌠꎹꅷꐺ。
   “ꐒꃆꀞꄩꏦꄉꂶꌠꆹꈀꄸꉬ?”ꃴꄿꏁꍅꂶꌠꇬꅲꐺ。
   ꆺꃮꒊꃀꋯꇳꃚꎓꃚꈧꇬꈌꐚꇀꌦꀐ。ꃆꀞꀊꐎꂶꌠꋀꊇꇱꇊꇢꊭꇬꊐꄉ,ꊿꈧꌠꆏꄿꉠꄩꐂꃅꂴꏭꉜꄉꑇꌐ,ꄹꁆꆏꇵꊫꋏꌊꐺ,ꄹꁆꆏꇇꇬꇓꂵꉅꌊꐺ,ꄹꁆꆏꌌꍴꈾꏬꌠꏢꁮꇬꄉꌌꎇꃀꍅꑓꈧꌠꇊꄉꌠꍳꆉꈧꌠꐔꇇꇬꊐꌊꐺꌐ。
   “ꈀꄸꉬ?ꀈꏦꀋ,ꐒꄉꂶꌠꈀꄸꉬ?”
   “ꀋꉻꇈꐂꌺꑊꋌꉱꃀꌡꌠꀋꉻꃢꌺꂶꌠꉬ!”ꀈꏦꂶꌠꃃꐯꃃꃅꉉꇬ,ꃴꄿꀋ,ꉪꊇꉆꐥꃅꑊꋌꌺꋋꂷꌌꄉꀞꇽꂿ,ꌌꄚꆺꃮꒊꃀꋮꄉ,ꋲꌉꈨꑗꉘꁮꀨꇫꎭꂿ!”

          ꊁꊛ:ꉒꈌꈬꇬꉂꏣ(ꊰꇖ)http://yi.yizuren.com/plus/view.php?aid=131

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ