ꋍ.ꑙꈓ
ꉠꃅꑆꇂꃴ，ꇢꇑꈷꂷꌋꆀꐂꇓꋖꂷꉬꇮꐈꇁꉙꇐꁱꂷꐛꀊꋨꄹꈎꆹꑙꈓꉬ。——ꇬꅇ
ꑙꈓ，ꉢꎺꇓꆈꀋꃀꄀ。
ꉠꉌꂵꇓꆈꀋꃀꌡ，ꉠꉪꇐꑌꇓꆈꀋꃀꀋꏯꇤꆽꏦꆽ；ꉠꉐꆂꇓꆈꀋꃀꌡ，ꉠꅇꂷꑌꇓꆈꀋꃀꌟꃅꇤꆽꏦꆽ。ꑙꈓꇓꅇꄜ，ꇓꅇꇗꄃꀕ，ꇓꅇꊷꆣꀕ，ꇓꅇꐓꂿꀕ，ꇓꅇꅩꌬꀕ——
ꇓꂵꉢꌌꋽꒃꋽꇱ，ꇢꇑꉢꌌꈷꂷꈷ，ꏣꌺꈻꃅꈻ；ꇓꂵꉢꌌꎔꄩꎔꄅ，ꐂꇓꉢꌌꋖꂷꋖ，ꎐꂷꊪꃅꊪ。
ꇢꇑꌕꃈꅮ，ꐮꇷꉽꐯꋍꂷꄙ，ꋍꂷꀄꀋꊭ，ꋍꂷꀊꀋꒉ。ꉽꐯꋋꂷꒉꈻꄽꀊꄶꊐ，ꒉꈾꇾꀕꈾꇬꎷ；ꉽꐯꋋꂷꌂꐪꄝꀊꄶꊐ，ꉂꐪꐛꂨꀕꇬꎷ。ꇢꇑꂴꆽꑌꄉꇓꅇꀁꆓꇨꀐꄷ，ꉢꌌꃅꇴꌧꉢꌌꃆꄔꃪ，ꇓꅇꉢꐒꉢꈄꇢꇑꑴꄩꄀꋺꑌ，ꉽꐯꁏꉱꎟꀋꒃ！
ꃅꃴꃄꅉ，ꀀꀨꈈꇉ。ꐂꇓꂴꆽꉆꄉꇓꅇꀉꇨꀕꀐꄷ，ꉢꃴꋧꐛꉢꐷꃀꐛ，ꇓꅇꉢꄹꉢꎙꐂꇓꑓꐬꈐꏭꎰꋺꑌ，ꐂꇓꄉꈤꀯꀋꐛ！
ꑙꈓ，ꂾꃚꅲꇢꈻ。ꏬꀴꈭꇖ，ꍀꁮꆿꉩ，ꉐꍻꎼꊝ，ꃮꀆꃬꀍ，ꃅꀆꇌꂇ，ꈌꃮꃬꂇ……ꃅꃴꉐꌦꐊꄉꊰ，ꁦꀑꃰꌦꐊꄉꐯ，ꂾꃚꉬꇮꃆꄔꐝꃚꌋꆀꐂꇓꈺꃚꐊꄉꊰꇁꇓꄅꒉꐑꉔ！
ꑙꈓꋋꈓꇈꉈ，ꀑꇬꇓꂵꌟꃅꈬ，ꉂꏣꇓꂵꌟꃅꈈ……
ꋌꇈꉈ，ꇢꇑꌕꂷꐯꈽꋦ。ꑌꂾꐛꅉꑌꂾꐛ，ꀊꐯꀋꇨ；ꇤꇀꐛꅉꇤꇀꐛ，ꀊꂥꀋꇨ；ꇤꐮꐛꅉꇤꐮꐛ，ꀉꒉꀋꇨ。ꇢꇑꁳꋍꋥꅉꋦꎻ，ꇇꎇꇬꀋꍠ，ꇢꇑꁳꋍꉆꅉꉆꎻ，ꑭꎅꇬꀋꑃ。ꇢꇑꑴꄩꉽꐯꀋꐷ，ꈍꃅꍠꌊꀊꄶꄁꑌꐽ；ꉽꐯꑴꄩꈂꑷꀋꊭ，ꈍꃅꄌꌊꀊꄶꉱꑌꈬ。
ꋌꇈꉈ，ꐂꇓꇍꃀꀊꋨꋬ，ꋖꂷꆸꐔꋛꃀꈐꏭꉔꇁꑋꀋꐥ，ꋛꃀꌌꇁꁡꁠꍀꄉꋠꄹꉇ，ꎐꂷꄚꈿꆸꐔꑋꀋꐥ……
ꑙꈓ，ꉢꎺꇓꆈꀋꃀꄀ。ꇢꇑꈷꂷꌋꆀꐂꇓꋖꂷꉬꇮꐈꇁꉠꉙꇐꁱꂷꐛ，ꉠꉙꇐꇓꏵꑌ……
ꑍ.ꇐꆪ
ꇐꆪ，ꑵꉙꑵꏾ，ꃮꆽꉊꃛꁙꅑꐛꅹꉢꋰꄉ。ꉠꑵꃚ，ꉠꀃꅉꋌꌌꉌꐡꑓꇗꀋꄐꑴꌦ。ꑠꀋꉬꑲꆏꈀꅐꇓꅐ，ꑵꅇꑍꇁꌔꇬꉢꏅꄮꐰꌙꈈꀕꋋꂷꇰꏭꐛ！
ꇐꆪ，ꉙꇐꁱꏾ，ꉠꁱꂷꉢꆺꂷꆸꀮꃅꄉꈧꌠꀒꄅꊁꄅꐯꃅꐯꄕꇁꌠꐒ，ꉠꅇꂷꉢꎵꁦꄂꌺꃅꄉꈧꌠꀏꊥꄩꊥꐯꃅꐯꎳꇁꌠꏦ。ꉙꇐꅇꂷꋍꇬꋍꇬꃅꉢꋋꄌꐮꄩꄅꀋꏾꐛꅹꉢꋰꄉ。ꉠꉙꇐ，ꂵꆧꑊꏦꅑꑴꌦ，ꃅꈊꏸꏦꅑꑴꌦ。ꑠꀋꉬꑲꆏꈀꅐꇓꅐ，ꉙꇐꑍꇁꌕꊱꉢꀞꈎꆪꌙꈈꀕꋋꊭꁵꏭꐛ！
ꇐꆪ，ꈌꌋꉆꈹꆹꂿꉂ，ꅳꍩꀉꑌꈎꌌ“ꇞꄐ”ꃅꄉꅥꀋꋻꀐꋫꌠꉢꉠꆼꁠꏦꄉꇈ，ꇆꆉꈬꊂꉜꄉꊼꇅꏹꂿꉂ！ꁁꆸꄏꀉꑌꈎꌌꑋꎸꉆꎸꊐꀋꋻꀐꏡꌠꉢꈻꆼꁠꏦꄉꇈ，ꇈꈬꇉꃪꉜꄉꊼꇅꆹꂿꉂ！ꄚ，ꄡꇗꉢꋰꄉ！ꑞꑌꉠꃤꉬꌐꄹꇆ，ꉠꇈꈬꇉꃪ，ꉠꌩꏪꇓꏪ，ꉠꈭꇁꈝꃀ，ꉠꑋꁮꉆꁮ，ꉠꃅꈋ，ꉢꈌꃅ……
ꇐꆪꑟꀐꇬ，ꇐꑐꏢꑋꉢꄝꊿꁳꍠꀋꎽ；ꇐꆪꉬꑴꇬ，ꇐꐪꀕꂯꉢꄝꊿꁳꄔꀋꎽ！
ꋧꃅꋋꂷ，ꉠꃤꄹꇆ，ꑞꑌꉠꃤ！ꀃꌋꀊꆨ，ꇖꑭꅑꌠꇷꆴꀊꄶꊰꇈꈧꌠꉠꃤꄹꇆ；ꀃꑍꋋꄮ，ꑍꑭꅑꌠꇭꀧꀊꄶꐺꑴꌦꈧꌠꉠꃤꄹꇆ；ꃆꏂꊂꑋ，ꌕꑭꅑꌠꑭꐨꀊꄶꁮꇈꈧꌠꄡꇗꉠꃤꄹꇆ！
ꃅꆪꊰꑋꆪ，ꇐꆪꋋꆪꄌꌊꂴꆽꀋꄉꇂ？ꇐꂿꀋꋻꑴꇬ，ꇓꂵꊿꌌꇐꁱꋖꇐꁱꁶ，ꐎꏂꊿꌌꇐꁱꋩꇐꁱꎵ，ꄯꒉꂷꋶꊿꌌꇐꁱꑴꇐꁱꀕ……
ꉢꊌꂿꌠꇐꆪꆹ，ꇐꆪꌺꒆ，ꇐꆪꅩꒆ，ꈁꉜꇐꑌꌋ。ꇐꆪꊾꒆꌺ，ꂮꑍꋙꋠꀃꃀꂊꊫꀕꑴꀞ？ꌤꑍꒉꅝꉌꃀꐝꍠꀕꑴꀞ？ꈠꑍꃢꈚꇭꀧꊷꆣꀕꑴꀞ？ꉢꊌꈨꌠꇐꆪꆹ，ꅇꉉꇐꀳꐛ，ꇐꀳꀈꈥꇬꀋꐥ。ꇐꆪꅇꂷ，ꀊꏢꇬꊎꏢꎼꇁ，ꀊꈪꇬꊎꅧꎼꇁ，ꇐꀳꀵꌠꌦꌺꐛ，ꃆꃀꀵꌠꅡꈭꐛ。ꉢꉪꐙꌠꇐꆪꆹ，ꑞꃅꑞꐛ，ꑞꉉꑞꊌ，ꑞꎹꑞꊝ，ꑞꉪꑞꇁ。
ꇐꆪ，ꇐꑌꌋꉆ！
ꇐꆪ，ꈌꇐꑌ！……
ꌕ.ꉌꉖ
ꀊꋨꄹꉖ，ꄯꁯꏢꒉꅸꒉꋮꅞ。ꉢꀱꆺꑳꏂꃴꄉꃅꈎꃅꆪꃅꉖꊼꇅꁏꉚꄮꇬꑲꆀ，ꑙꈓꇐꆪꉌꉖꉬꅊꇈ！
ꀉꑌꑍꀋꐛꇬꆏ，ꃱꆉꀋꃀꑠꁧꐛ，ꃰꌦꏪꈘꏿ，ꃰꉙꉢꇠꉠꅇꐛ。ꁍꂮꃰꒉꂷꋶꈍꑋꄩ，ꉢꌌꑴꁱꑴ，ꉢꌌꃄꁱꑴ，ꄯꒉꁎꅉꐍꅉꑟ，ꂷꋶꁰꅉꆇꅉꑟ。ꎺꄉꇬ，ꀋꉊꋍꃢꆹ，ꉌꌋꆀꐮꃆꂮꐥꌠꊝꄷꆏ，ꁈꄎꁈ，ꐵꉆꐵ。ꉌꑓꋪꑔꍛꀕ，ꉌꂱꀯꂱꏢꀕ，ꉌꎐꂷꉧꑳꀕ，ꉌꂴꊨꏺꂳꀕ，ꇇꎇꉌꀋꒃ，ꑭꎅꉌꀋꄔ，ꑓꁉꉌꀋꉜ，ꅳꀧꉌꀋꅲ，ꉌꃀꉌꀋꉪ！ꈜꀕꇈ，ꉌꐛꄿꃴꂇꌠ，ꉌꍔꃅꐬꅤꌠ，ꉌꀊꈪꃝꌠ，ꉌꂽꅐꎭꌠ……ꉌꑍꉌꉖꉌꆪꉌꈎ，ꈀꄸꀕꌠꉬꇮꉢꌌꉌꐬꎙ！
ꀊꋨꄹꉖꇈꉈꆏ，ꉌꑍꉌꉖꉌꆪꉌꈎꆹꉢꌌꄈꅉꆦ，ꍍꃤꉢꋌꇧꎭ，ꊋꃤꉢꀖꄚꇱ。ꈜꀕꇈ，ꉌꉖꆹꉢꌌꃅꉖꈁꂄꀕꈁꎔꀕꑠꉔꃅꄉ，ꅇꃅꉐꌒꅇꎔꉐꃨꈀꐥꌠꃅ，ꉢꀱꉢꏢꉌꉖꋋꉔꁵ！
ꉌꉖꁮꅉꌧ，ꉌꑍꈝꃀꍬꀋꌒꏢꀋꐥ，ꈜꌒꇓꀋꎍ，ꇓꎍꑭꀋꋍ；ꉌꑍꒉꑋꀒꁨꑟ，ꀱꑍꉈꑴꑟ。
ꉌꉖꁮꅉꌧ，ꉌꉖꀄꂼꂻꀋꌒꂷꀋꐥ，ꌊꁁꉂꅇꌌꄉꀀꀨꄺꑌꊷꆣꀕ，ꌌꄉꈈꇉꏿꑌꀨꆐꀕ；ꉌꉖꁮꅉꌧ，ꉌꉖꉌꁬꉌꎶꉌꇨꉌꌈ，ꉌꀕꂵꉌꇭꀧꒊꀋꋌ，ꉌꉪꇐꉌꁍꎼꎵꀋꋌ。ꉌꀞꊚꐂ，ꉌꃀꂴꏻ，ꉌꌺꑔꍛ，ꊖꃴꑆꊖꄩꀥꊖꐬꅤꊖꁱꋏꊖꆺꀨ。ꋌꇈꉈ，ꉌꈩꅉꈎꃅꆪꌒꑍꂄꉖꎔ，ꉌꐤꅉꋠꁮꀋꈘ，ꇁꏖꀋꋠꌩꃅꏦ，ꎧꏸꀋꅝꇇꋌꒉ。
ꉌꉖꃰꐛ，ꇇꇐꃰꌦꃘ，ꃰꌦꐈꇁꐎꂷꏂꂷꐛ。ꉌꉖꃨꀕ，ꐎꃨꏂꃨꀕꈍꀕ；ꉌꉖꂷꌵ，ꐎꂷꏂꂷꀱꋓꀕ；ꉌꉖꐴꁘ，ꐎꐴꏂꐴꅼꇻꀕ。
ꉌꉖ，ꅇꉉꂫꎤ，ꑟꈻꂫꄝ。
ꉌꉖ，ꉂꐪꁮꅉꑟꌦꀋꇎꑱꉀꀋꇎꑠꍈꉢꌌꀱꇊꀱꃅꌧꇬꎷ……
ꇖ.ꈾꋩꄸꉺ
ꀄꊭꄮꇬꉬꄿꂿ，ꀉꒉꈭꐨꉬꄿꂿ，ꈾꋩꄸꉺꆹ，ꉢꂿꋺꌠꐦꀞꀉꒉꐯꀉꒉꂶꌠꉬ。ꃅꈎꃅꆪꃅꑍꃅꉖꈍꑋꇧꈴꁧꈭꐨ，ꉡꆹꄡꇗꐦꀞꋋꂷꈳꅐꁧꀋꄐ，ꈾꋩꄸꉺ，ꉢꋌꇰ！
ꁡꇤꇬ，ꊂꋊꊁꒆꈧꌠꈾꏿꈾꃃꈾꒇꈾꋩꑲꀋꌧꀋꐚ？ꈾꃚꁡꁠꍀꄹꉇ，ꈿꅫꊿꌌꈍꃅꍀꏾꍀ，ꈍꃅꏪꏾꏪ，ꈍꃅꆺꏾꆺꑴꄷ，ꈱꅇꊿꌌꀉꂿꊏꀋꐚ，ꅇꄸꊿꀞꇤꈏꇢꇑꉖꀋꐚ？ꈾꃚꁡꁠꅿꉗꅿꇁꄮ，ꈌꌦꅲꁘꇁꀋꐚ？ꈾꃚꁡꁠꊿꍀꎼꇁꈧꌠꑌ，ꄡꇗꈌꌦꅲꁘꇁꀋꐚ？ꐂꇓꃅꆳꐔꌊꁧ，ꁈꆸꀉꉌꌃꆼꈘꄮꇬꑲꆀ，ꈿꃀꊿꃬꐯꁊꌐ，ꈌꎼꑓꄏꅍ，ꄵꎭꈑꆠꈩꌠꌡ。
ꈾꋩꄸꉺ，ꁬꋦꃴꇉꀕ，ꌩꋦꆈꊉꀕ，ꅀꀋꉬꀐꇬꀎꌃꃅꊸꆗ，ꀣꈜꇁꄿꒊ，ꈾꋩꄸꉺꈭꇍꊾꒆꌺ，ꇭꀧꊰꀊꄶꊐ，ꉌꂵꊰꀊꄶꊐ，ꒌꆠꑌꊰꀊꄶꊐꏭꐛ。ꈾꋩꄸꉺꑴꄩꀣꈜꆈꉘꀕꈌꉛꀕꋋꈨ，ꑊꈜꈨꌡ，ꒉꈜꈨꑌꊼꇅꌡ，ꈍꄮꒈꂃꒊꆱꄓꀋꐚ？
ꈌꎐꈌꍠ，ꐛꃽꐚꈻ，ꈾꋩꄸꉺꎐꂷꅑꅀ？ꈾꋩꄸꉺꐛꃽꀀꅀ？ꌩꁧꅂꂯꀋꉬꃅꃪꐛ，ꁬꈬꂇꂯꀋꉬꃅꍑꒉꇗ，ꈾꋩꄸꉺꀡꆂꀟꆂ，ꈾꋩꄸꉺꇤꆽꏦꆽ，ꈾꋩꄸꉺꈁꀣꈁꏅ……
ꈍꄮꇈꉈꆏ，ꑓꋪꋍꁆꁉꄉ，ꋍꁆꂭꄉ，ꀎꋏꋠꁍꏬꌠꊼꇅꃸꆽꆹꂿꉂ，ꇇꏸꐔꌊꌩꈪꅱꎙꊐꑌꀞꐕ！ꈾꋩꄸꉺꊿꌌꄃꀕꌋꆀꁟꏪꀐꇬꑌꀊꑷꏅꀋꋻꀊꋨꂷꑌ，ꉜꅉꉜꅉꆏ，ꃅꐬꉱꀋꅑꑠꐬꌡ——
ꑞꇁꑌꊝꀋꌋ，ꋌꄽꈂꀸꊐꇬꎷ，ꈌꁒꉏꍅꌠ，ꃪꉩꃪꏵꌠ，ꀉꁱꀈꋓꀊꏂꀊꅪꀊꃴꀈꆧꀊꐎꀉꆈꌠ，ꀉꇨꌠ，ꀁꆓꌠ……
ꀋꉜꇂ！ꃅꅂꐍꐷꀕꄮꂷꇭꄔꊿꀦꂿꄷꈧꌠ，ꃅꊸꅩꌬꀕꄮꃆꄔꏦꊾꇬꂿꄷꈧꌠ，ꉘꁮꆧꁨꏣꄀꂿꄷ，ꇇꁮꇙꋏꀕ，ꍀꉘꆿꅪꊀꄅꂿꄷ，ꉌꃀꇙꋏꀕ。ꈧꌺꆪꌺꆹꏣꄀꄎꑲꆏ，ꆽꏀꀊꃴꏣꄀꌷꁧꁍꄉꎟꋠꇁꂯꄉꋫꌠꁌꁨꎭ，ꋌꁳꂷꅿꃅꅿꎻ，ꎃꂳꀕꎻ；ꍀꌺꆿꌺꆹꊀꄅꄎꑲꆏ，ꀎꇔꀉꆈꍅꉱꈐꊐꄉꍹꐛꇁꂯꄉꂶꌠꁉꁨꎭ，ꋌꁳꌩꃨꃅꃨꎻ，ꃨꈍꀕꎻ……ꑠꀋꉬꑲꆏ，ꊽꃀꃅꐬꁮ，ꊽꊂꃅꐬꁮ，ꃅꐬꀃꈈꊿꄀꄎꑌ，ꎤꂷꊿꋋꎤꀋꄐꏭꐛ！
ꄯꒉꀊꐎꑴꌦ，ꂷꋶꀉꆈꑴꌦ，ꀊꈪꀋꊌꇈꈿꃀꀋꐥꑲꆏ，ꈾꃚꁡꁠꁰꒌꍈꊼꇅꀋꑴꀋꁱꇂ？ꈾꃚꁡꁠꁰꒌꃰꇌꈭꃅꉪꑴꉪꁱꌊꄉꈁꉜꈀꋽꀕꑲꆏ，ꉪꏤꁡꇤꈾꋩꄸꉺꁬꉱꑓꀋꂿꀊꋨꂷ，ꈾꋩꄸꉺꌩꒌꈁꀋꉆꀊꋨꂷ，ꈍꄮꉫꑌꆚꈈꏶꈌꀊꄶꁮꌠꉬ，ꈍꄮꉫꑌꅏꐞꎟꐪꀊꄶꐛꌠꉬ！（ꅫꃀꌱꃀꈾꆡꁠꇽꐯꒈꄎꈧꌠꌳꉔꇇꅑꑲꆏ，ꈾꃚꁡꁠꁰꒌꋌꑴꋌꁱꌊꋽꐯꋽꈧꌠꑌꌳꉔꉌꃀꀀꀋꐚ？）
ꑠꀋꉬꑲꆏ，ꃆꏂꊂꑋꀱꇁꀊꄶꑟꆹꇬ，ꈾꋩꄸꉺꋋꂷꑅꇷꀊꄖꇨꄉ，ꊿꋌꉔꀂꏾꃄꅉꋦ，ꊿꋌꐵꄸꉺꈁꆷꄚꇁꇚꑴꇆ？ꈾꋩꄸꉺꋋꂷꀃꃀꀉꒉꇨꄉ，ꀉꑳꋛꋚꉬꇮꋌꈍꈂꀸꊐ，ꈾꋩꄸꉺꋋꂷꈁꐞꀊꐯꇨꄉ，ꃀꌠꈌꆹꂿꉘꉬꇮꋌꑍꀃꃀꊐꇁꇚꑴꇆ？
ꑠꀋꉬꑲꆏ，ꁬꃷꀊꐎ，ꁬꃷꀉꆈ，ꁬꃷꀊꏂ，ꁬꃷꀊꅪ……ꄙꇁꉐꈎꈾꋩꄸꉺꈭꇍꋦꅷꍆꅸꇁꌠꁬꃷꄰꑭꊂ，ꑬꇰꇂꑍꍔ，ꂴꐩꊁꊛꏿ，ꂽꄓꁡꇤꁨꇊꈵꃴꈵꍽꊐꇁꇚꑴꇆ？
ꈾꏿꃅꏿ，ꈾꃃꃅꃃ，ꈾꒇꃅꒇ，ꈾꋩꃅꋩ，ꈾꆳꃅꆳ，ꈾꀵꃅꀵ，ꈾꃴꃅꃴ，ꈾꍀꃅꍀ，ꈾꋠꃅꋠ……ꁡꇤꀊꋨꂷ，ꑞꑌꊿꉠꌊꁧꌐ，ꑞꑌꊿꃬꈂꀸꊐꌐ，ꋍꑵꀉꄂꈍꄮꉫꑌꊿꇬꀋꈁ，ꁱꂷꀞꄂꇖꂷ，ꅇꂷꀞꄂꋍꇬ——
ꈾꋩꄸꉺ！
ꉬ.ꃅꆳꉎꉐꍔ
ꊾꂷꆏꋧꃅꀄꊭꍈꀵꐺ，ꁮꑍꃀꏿꀵꃅꀵ。
ꀋꄸꄷꋧꃅꀄꊭꋋꍈꁡꆑꇁꇮꇬ，ꃅꆳꄚꀕꄚꋖꌠꀋꉬ，ꇓꆈꀋꃀꊿꅤꊿꆷꃅꆳꈳꅉꋍꇈꄉꈧꌠ，ꃅꆳꁏꌊꋧꃅꀄꊭꋋꍈꈐꏭꊐ，ꋧꃅꋌꅥꁡꆑꌠꅀꑞꉬꑌꀋꐚ……
ꃅꆳꀊꋨꄲꁎꄮꇬ，ꀋꄸꄷꇱꄓꁑꍠꀕ，ꀃꃀꁑꍠꀕ，ꉌꃀꁑꍠꀕꇮꇬ，ꃅꆳꊿꉀꌠꀋꉬ，ꑱꊿꃬꃅꆳꇱꌠ，ꃅꆳꁏꌊꊿꉀꇁꅀꑞꃅꑌꀋꐚ；ꃅꆳꀊꋨꄲꁎꄮꇬ，ꀋꄸꄷꇱꄓꁂꄠꀕ，ꀃꃀꁂꄠꀕ，ꉌꃀꁂꄠꀕꇮꇬ，ꃅꆳꑓꁴꏻꊿꉖꌠꀋꉬ，ꊫꃺꊿꁐꃅꆳꇱꌠ，ꃅꆳꁏꌊꊿꍀꇁꅀꑞꃅꑌꀋꐚ？！
ꊿꋌꀋꑇ！ꀋꐥꅍꀋꐥ，ꉘꁮꏭꇇꏸꄂꄉ，ꅇꉉꃅꆳꇰꌠꐥꅊꇈ——
“ꀊꄶ……ꃅꃴꈧꌺꀊꋨꂷ……ꁭꅐꀋꁖꁮꐚꁖꅊꈫ……”
ꃅꆳꆲꌙꀕꃅꁎꄮꇬ，ꄼꁱꆻꄧꑌꄉꀘꋒꑊꋒꃅꌠ，ꉘꁮꈞꆈꃹꂯꄉꂷꊿꈻꁧꎐꈁꄽꑐꄉꋺꑌꁦꌺꋍꂷꋌꀋꂿ；ꒊꃀꅶꁉꑌꄉꇇꃭꌠ，ꀬꐯꀬꃅꄯꁯꊿꇵꒊꃀꁵꌠꊿꋌꌊꄉꈛꁧꍑꇤꄯꁯꃄꑌꑭꐨꋍꐪꋌꀋꂿ；ꁦꀑꑌꄉꑓꆫꌠ，ꈄꐯꈄꃅꇓꂃꊿꀨꁧꑭꎭꌠꊿꄡꀜꇓꈐꏭꊐꄉꅥꇓꄺꑌꅥꂿꋍꂷꋌꀋꂿ……ꄚ，ꃅꆳꋋꄲ，ꄡꇗꆲꌙꀕꃅꁏꇁꉪꏤꁡꇤꊐ。
ꉍꈄꎀꇮꌠꐤꐥꑴꌦ？ꃅꆳꈹꉍꈄꊐꂿꄷꄹꉇ，ꉍꈄꑓꁴꑰꀕꇤ，ꃅꆳꉎꉐꍔ！
ꃅꆳꀊꋨꄲ，ꈂꀸꅑꌠꌡ，ꃀꆏꀊꐎꑠꇱꋌꀞꃅꐬꀕꇬꊐ；ꃅꐬꈂꀸꅑꌠꌡ，ꃀꆏꋋꇱꋍꁠꆤꀉꄂꃅꋌꑍꀁꋌꊐ；ꃀꆏꑌꈂꀸꅑꌠꌡ，ꃅꐬꈐꏭꃀꆏꀱꃀꆏꋠ，ꃀꆏꊁꄽꂫꋒꇈꂶꌠꆹ，ꐴꁘꊖꆈꈬꊂꊐ……
ꃅꆳꀊꋨꄲ，ꈍꄮꉫꑌꊽꂴꆽꄉꆲꌙꀕꃅꁏ，ꊽꊂꆈꄉꆲꌙꀕꃅꁏ，ꊽꉌꃀꈐꏭꄉꆲꌙꀕꃅꁏ。ꈍꑋꑍꈍꑋꉖꐛꈭꐨ，ꅀꀋꉬꀐꇬꈍꑋꈎꈍꑋꆪꐛꈭꐨ，ꃀꆏꀊꐎꀊꋨꂷ，ꒆꌊꌩꁧꇪꒌꈘꑠꁧꐛ——
ꒊꃀꅶꁉꑌꄉꇇꃭꋺꌠ，ꒉꋮꑌꄉꃅꆳꐜ；
ꁦꀑꑌꄉꑓꆫꋺꌠ，ꁧꑭꏮꄉꃅꆳꑭꐨꎹ；
ꄼꁱꆻꄧꑌꄉꀘꋒꑊꋒꃅꋺꌠ，ꄼꁱꆻꃹꀀꄉꃅꆳꒈꃚꅲ！
ꃘ.ꇓꆈꀋꃀꅿꁯꇙ
ꇓꆈꀋꃀꋋꂷꆏꐵꇧꎭꈭꐨ，ꂃꇁꃄꅉꅽꀊꉘꄮꐰꑭꐨꈍꑋꐪꀊꄶꁮꑴꌦꀊꋨꏬꄩꅞ。
ꊨꊭꍈ，ꄓꇁꇓꆈꀋꃀꄩꑌꄉꈁꄽꏅ，ꊨꊭꂾꃚ，ꒉꐑꁖꃅꁖ，ꅽꉌꃀꋌꌌꒈꊭꀠꑙꑜ。
ꇓꆈꀋꃀꈭꇍ，ꆏꌌꑲꅉꌆ，ꆏꌌꋠꃅꊨ，ꆏꌌꆫꁍꉘ。ꅽꇂꁮꂾꅉ，ꅽꑌꑿꆫꁍ，ꅽꁍꁈꁍꃀꈃꅉꎔꅉ，ꅽꊂꋊꊁꒆꈩꅉꐤꅉ，ꅽꈌꌋꉆꈹꅉ，ꅽꌩꏓꒉꇸꅉ……ꇓꉅꈛꄻ，ꍲꋐꃄꈷ，ꃄꅉꏫꇅꏩꇅꃅꑠꈍꑋꏬ，ꆏꐏꆏꇊꇬꐓꄉ，ꆏꐒꆏꈄꐯꄀꄉ，ꆏꌌꅽꋦꁍꄻ。
ꈍꑋꈓꅑꅸꇁꌠ，ꊨꃀꈂꇔꑠꀸꆏꄌꆼꁠꈢꌊꐺ，ꇡꀕꇠꃅꑞꄵꇬꎷꌠꉬꀋꐚ，ꃄꅉꋋꈍꑋꏬ，ꆏꍧꆏꃿꅷꇬꎏꅍꀋꐥꀐꑴꇬ，ꆏꀊꄶꐏꉆꀊꄶꏮꐺꇬꎷ，ꆏꀊꄶꅤꐺꀊꄶꊨꐺꇬꎷ。
ꊨꃀꄌꌊ，ꐚꒉꆏꂄꀊꄶꊐꀋꐚ？ꊨꃀꄌꌊ，ꏠꇑꆏꅤꀊꄶꁖꀋꐚ？
ꌞꉪꇐꅽꉌꂵ，ꌞꀠꇐꅽꂱꀯ。ꆎꆹꌙꈈꀕꃅꄉ，ꌙꈈꀕꃅꄉ，ꃄꅉꋋꈍꑋꏬꃿꇬꎷ。ꈍꑋꃢ，ꃆꇭꃅꃨꋩ，ꃅꈌꆏꏀꌌ，ꅽꃅꈋꃄꏦꆫ，ꅽꁦꇉꒉꃪꉜ！
……
ꊴꐷꃙꃚꈍꄮꅿꌠ，ꆏꅉꐚ；ꀋꆪꅳꀧꈍꄮꄂꌠ，ꄡꇗꆏꅉꐚ。ꀂꀋꈱꌞꅇꑇ，ꆎꆹꅉꀕꑠꃅꉉ——ꀇꀆ，ꀋꂿꅍꑌꊿꂿꀐ，ꀋꋠꅍꑌꊿꋠꀐ！ꉠꑠꍈ，ꌺꇰꃅꐬꅤ，ꀂꋠꀂꂊ，ꀂꈚꀂꊸ，ꀂꃅꀂꈄꆫꌠꁦꀑꑌ，ꀂꎔꀂꃨꉜꌠꈛꁧꉆ……
ꊨꊭꑋꅉꅿꁯꇙ，ꇓꆈꀋꃀꅿꁯꇙ。ꅽꅇꂷ，ꆏꄝꆶꇁꀃꈈꑓꐬꑆꁧꇈ，ꃄꇖꄹꊂꉼꌠꆹ，ꆏꀄꂼꊯꈁꂻꋺꇬ，ꋍꈁꑠꀋꂻ。
ꇓꆈꀋꃀꅿꁯꇙꈭꐨ，ꄹꃥꆍꏤꁹꇈꁧꈧꌠ，ꈢꅵꄉꑠꃅꌧꌠꀋꃷꎵ——ꋇꏤꀃꈈꈵꁱꀉꒉꀐ，ꌣꈚꇁꏭꐛ！！
ꏃ.ꄄꁁꎿꆈ
ꊿꌌꌧꇬ，ꀊꄶꇬꎿꆈꂷꀀꄷ。
ꊿꌌꌧꇬ，ꎿꈭꎿꇍꋦꅷꇁꐛꅹ，ꅽꁍꁈꈄꐪ，ꅽꁍꃀꎔꐪ，ꎿꋋꂷꌋꆀꐯꀋꐞꑴꄷ。ꅽꑫꅽꂓꆏꋖꆏꁶꎿꄩꄀ，ꎿꈭꎿꇍ，ꅽꈝꃀꀊꄶꁮ，ꅽꑭꐨꑌꀊꄶꁮ……
ꆏꏥꏦꎿꆈꋋꂷꏦ，ꉁꉂꎿꆈꋋꂷꉂ……
ꎿꆈꀀꅉ，ꀣꈜꈌꉛꀕꄡꀋꑟꂼ；ꎿꆈꂆꃚ，ꅳꀧꈢꋩꀕꄡꀋꑟꂼ！
ꀃꌋꀊꆨ，ꍜꇰꀉꇐꌦꃅꅏꄅꋩꄉꎿꄩꈁꄽꃰꌠꆏꈨꋺꏭꐛ，ꇁꌊꎿꋴꑟꄷꆏ，ꆎꆹꊼꇅꉌꌤꑓꀖꐆꃅꐙ，ꅽꈯꆏꀋꌅ：ꎿꒉꅩꍠꀕ，ꁍꃀꅩꒌꄚꄉꄀꌦꌕꄧꌸꀋꐚ？ꎿꒉꆈꏸꀕ，ꐧꃅꌻꑘꄚꄉꃅꇴꌕꁙꋊꀋꐚ？ꎿꒉꏁꀠꀕ，ꇤꃀꀈꑘꄚꄉꂃꏾꌔꏾꁏꀋꐚ？
ꎿꃀꇆ！ꄄꁁꎿꆈꇆ！ꐩꋊꑓꁴꄩꑌꌡ！
ꎿꈭꎿꇍ，ꀉꁌꄚꄉꈄꋺ，ꀋꁧꄚꄉꉔꋺ，ꅽꌺꅽꇖꄚꄉꈭꑽꈜꑽꇚꑴꂼ？ꑞꐛꅹꄄꁁꎿꆈꍃꅉꂆꅉ，ꃅꈊꃅꄜꀋꐥ，ꃅꊸꃅꉩꀋꌋ，ꃅꉒꌩꇙꈍꇍꅍꎍꇬꎷ？ꄄꁁꎿꆈꐈꌌꐩꋊꑓꁴꑠꄩꀉꄂꐛꇮꇬ，ꑓꁴꋌꄩꒉꈾꌟꃅꇾꀕꈾꇁꇚꑴꂼ？ꑓꁴꋌꄩꅋꒉꑱꒉꐊꄉꆺꀕꂃꇁꆀꃅꇖꈋꊐꇁꇚꑴꂼ？ꈬꉙꈬꃪꈬꌩꈬꇓꑞꑌꅋꑱꏁꀠꀕꇁꇚꑴꂼ？
ꎿꃀꇆ！ꄄꁁꎿꆈꇆ！ꆀꌺꉌꃀꈐꏭꑊꈻꇓꂷꑌꌡ！（ꑊꈻꇓꋋꂷ，ꈁꃠꈀꈌ，ꈀꋽꈁꎔ，ꑞꑌꐝꍠꀕꃅꀊꄶꎑꇁꌐ！……）
ꆏꎿꋴꑌꄉꉪꃅꉪꇐꈤ，ꆏꎿꋴꉆꄉꉜꀕꑓꏣꈘ……
ꄄꁁꎿꆈꎿꒉꋍꀮꇸꌊꄉ，ꄝꇁꆀꃅꌺꇖꀋꄐꇂ？ꀿꅇꎸꇺꋯꄷꑌ，ꎸꇺꋋꏢꊿꄝꎟꋠꁧꌠꏦ；ꃀꅇꂷꋶꒉꄷꑌ，ꂷꋶꋌꄩꊿꄝꍹꐛꁧꌠꐒ！ꄄꁁꎿꆈꎿꒉꋍꍔꈈꌊꄉ，ꃝꇁꆀꃅꇖꈋꀋꁊꇂ？ꇣꋦꅈꇬꁬꋦꆈꊉꀕꁧꏦ，ꊿꋦꅈꇬꍀꆿꈳꐥꏿꇁꏦ！
ꎿꃀꇆ，ꄄꁁꎿꆈꇆ！ꄙꇁꃪꈎꅑꅸꇁꌠ，ꌙꃅꌙꈈꀕ！ꀋꄸꄷꃆꏂꊂꑋꑐꄉꏼꄃꆺꃅꄄꁁꎿꆈꑴꄩꅑꑴꄷ，ꌠꑊꑠꃅꋊꌠꐥꄷꑌ，ꆏꃨꄡꆰ，ꆏꏸꄡꏦ——ꄄꁁꎿꆈꋍꀀꅉꋌꀀ，ꎿꐴꅼꇻꀕꑴꌦ；ꄄꁁꎿꆈꋍꂆꄮꋌꂇ，ꎿꆈꂆꃚꅽꉌꃀꄚꐊꐝꍠꀕ，ꅽꎺꏣꄚꈿꐝꍠꀕ，ꅽꉂꐪꋌꌌꐝꍠꀕꑴꌦ……
ꑠꀋꉬꑲꆏ，ꈭꂯꏸꂯꑌꄄꁁꎿꆈꀊꅼꇨ，ꀵꂯꄌꂯꑌꄄꁁꎿꆈꀉꇖꇨ。
ꉆ.ꃪꃹꆿꈩꅉ
ꌦꇁꌊꌺꆿꈩꅉꋌꄻꃪꃹꐕꄉꇈꉈ，ꋭꃅꋭꇬꆹ，ꊿꐤꅉꆿꂿ，ꆿꈩꅉꑌꊿꂿ。
ꆿꈩꅉꌩꁧꈤꀋꐛ，ꌩꏪꊿꌌꀂꏾꐑꃅꐑ，ꌩꁧꂸꃃꅿꃅꅿꇬꎷ；ꆿꈩꅉꒉꐑꍹꀋꐛ，ꒉꐬꊿꌌꉌꐬꋍꃅꋍ，ꒉꐑꋍꅉꁖꅉꑟꇬꎷ……
ꈛꐞꅉ，ꃪꊭꅩꑳꀕꌠꇂꃴꐛ；ꈜꏑꈌ，ꄡꇗꃪꊭꅩꑳꀕꌠꇂꃴꐛ。
ꃪꐬꆳꇁꉐꀋꃹ，ꐧꇁꃰꊿꑀꅷꅂꅷꀊꄶꑟꆹꌠ，ꆿꃀꉌꂵꀀ，ꊿꐥꆿꃅꐥꑴꄷ，ꃪꐬꈭꀕꇍꀕ，ꊿꐥꆿꈿꐥ，ꏥꑌꆿꏦ，ꉁꑌꆿꉂ。
ꃪꃹꆿꈩꅉ，ꆿꂴꊨꏠꄹꉇ，ꃪꊭꑴꄩꋍꑍꄮꐰꇖꂷꆦ，ꋍꇅꆏꃨꀕꃨꈍꀕ，ꋍꇅꆏꈧꅐꅩꌬꀕ，ꋍꇅꆏꂷꅑꀮꇗꀕ，ꋍꇅꆏꃰꐛꀱꑐꀕ。
ꃪꊭ，ꑭꅑꇇꅑꉬꇮꃪꅪꂾꆏꅂ，ꋌꅂꐱꁍꄎꌠꀊꅰꀉꑌꃅꀋꐥ。ꌩꑭꑙꌺꂷꀉꄂ，ꋌꅂꃪꄩꑌꏾꑌ，ꋌꐂꃪꃹꅞꏾꅞ。ꃪꅪꈬꁕꇢꅉ，ꃬꐎꃬꆈꂆꐥꏽ，ꃬꀮꇳꃚꋍꑍꏛꃅꇫꈌꐚꀋꋻ，ꃬꀮꇳꄮꇴ，ꃬꂵꀌꃚꋍꑍꑎꃅꇫꑟꇁꀋꋻ，ꃬꂵꏿꄮꏿ……
ꃪꃹꌩꏪꆿꈩꅉ，ꆿꂴꊨꇿꂪꇿꇬꂴꍀꅩꇅꀕꃅꀜ，ꂴꍀꀛꑌꃄꐔꅑꀋꋻ；ꆿꁍꎼꇿꏶꇿꇬꒉꐑꆺꀕꂂꆏꂃ，ꌩꁧꐴꍠꆏꐴꍠ；ꆿꑭꑂꅉꃄꇙꃅꇙ，ꃪꊭꑴꄩꌩꁧꊉꄹꐚ，ꀒꑍꋍꁧꐚꊂꑋꋍꁧꅿ；ꆿꀀꈉꃅꀋꐡꊖꀋꑳ，ꎰꆳꏶꅉꅫꏻꀕ，ꆀꆳꁎꅉꃵꌣꀕ。
ꃪꃹꒉꐬꆿꃀꒉꅜꅉ，ꆿꂴꊨꒉꐑꄧꀕꊰ，ꋍꈭꋍꇍꆿꐪꀕꆏꒉꐑꋍꍔꀀ，ꆿꐪꅼꇻꀕ，ꒉꐑꐝꇅꀕ。
ꃪꃹ，ꊿꋦꅉꊿꋦ，ꆿꐤꅉꆿꐥ，ꊿꆿꀋꅥ，ꆿꑌꊿꀋꑝ。ꆿꈜꊿꂿꑌꆿꐹꅉꊿꋌꀋꂿ，ꆿꏄꃚꊿꈨꑌꆿꀀꅉꊿꋌꀋꐚ。ꈄꀕꀵꌊꆿꐔꉅꆹꂿꄷꌠ，ꃪꃹꌕꈎꎹꇬꆿꐔꁙꑌꋌꀋꊌ；ꇃꈡꄌꌊꆿꑐꃬꆹꂿꉂꌠ，ꌩꏪꇓꃴꌕꈎꏮꇬꆿꑐꏢꑋꋌꀋꂿ……
ꃪꅪꅡꊪꀕ，ꃪꅪꊅꆀꀕ，ꃪꃹꒌꁿꆠꍃꅉ，ꀋꈩꉈꉩꀕ，ꀋꐥꉈꉩꀕ！
ꈍꄮꇈꉈꆏ，ꀉꐔꂷꀊꄶꄉꀆꐒꇸꇬꎷ，ꆗꌺꂷꀊꄶꄉꌩꇺꄩꇬꎷ……
ꈬ.ꐩꋊꃴꂷꋜ
ꍜꇰꀉꇐꄵꇓꁦꀑꉆꄉꈧꁻꈨꄂꋒ，ꆪꁻꁁꁐꋒꇈꉈ，ꉪꈧꁻꆪꁻꄎꌠꀋꈁꀐ，ꆏꌦꉹꌋꉹꄡꉤꀐ，ꆏꌦꉈꌊꉈꄡꄵꀐ。ꀋꄸꄷꉕꇅꉓꇅꃅ，ꈧꌺꆪꌺꇫꋒꇈꌠꆏꁻꇧꎭꌐꇮꇬ，ꉪꋧꃅꆈꋧꋪꌠꏦ！
ꉪꈧꁻꆪꁻꄎꌠꀋꈁ，ꈧꇴꆪꄀꄎꌠꑌꀋꈉ……
ꊖꁋꐻꒃꀢꑌꀞꐕ，ꀻꑳꃰꍑꐙꑌꀞꐕ，ꍓꃯꃰꋠꈗꑌꀞꐕ，ꋅꊂꌕꆪ，ꃅꈋꃰꐎꈉꌠꇁꉚ，ꃅꃴꃰꌦꁊꅉꉜꏾ。ꃰꌦꆏꃬꁮꆗꁊꄉ，ꃰꐎꆏꌌꈈꇉꀋꏿꀞ？ꎹꄓꈨꑭꆏꄝꃰꐊꐯꇮꇬ，ꈧꌺꆶꁧꏦ；ꑲꅉꆏꌆꁮꌋꐕꄉ，ꐻꄿꆏꁶꃀꄳꀋꄻꀞ？ꌊꁁꆪꑭꆏꄝꐻꎵꀃꈈꃀꄳꑴꄩꎑꇮꇬ，ꆪꌺꈯꁧꏦ。
ꉪꈧꁻꆪꁻꄎꌠꀋꈁ，ꈧꇴꆪꄀꄎꌠꑌꀋꈉ……
ꃅꈊꃅꄜ，ꃅꒉꃅꅂ，ꈧꌺꄸꋍꅑꅉꅑꄉ，ꆪꌺꄸꋍꈳꅉꈴꎻ。ꃅꒉꆈꏸꀕꄮꇬꑲꆀ，ꅽꂴꆽꌩꏪꇆꆉꇿꇬꐛ，ꅽꊂꆈꇓꆈꀋꃀꇿꇬꀀ，ꅽꐰꒊꃀꈍꂤꒈꂪꈍꏯꁘ，ꅽꉎꁦꌺꈍꂤꁧꑭꈍꏯꊒꌠ，ꐝꍠꀕꃅꆏꂿꇁꀋꐚ？ꋍꈭꐨ，ꃮꑌꎐꄚꅉ，ꊴꐷꉺꌦꅉ，ꏂꆨꈻꐪꆏꎺꑴꌦꀞ？ꈭꏂꈜꏑꅉ，ꇪꀮꈛꐞꅉ，ꃮꆪꊸꐨꆏꌧꑴꌦꀞ？
ꉪꈧꁻꆪꁻꄎꌠꀋꈁ，ꈧꇴꆪꄀꄎꌠꑌꀋꈉ……
ꐩꋊꊭ，ꑐꄉꏼꇱꑐꆼꈘ，ꊰꇁꄄꁁꎿꆈꎿꉱꊐ。ꌦꃅꌊꃅꅏꅐꑍꄀꎑꂶꌠ，ꆏꌌꉈꑴꋍꃢꅐꅑꃅꃴꐚꇮꇬ，ꄄꁁꎿꆈꀋꃅꄈꆏꀁꂥꑌ，ꑐꄉꀋꃅꄈꆏꄧꀋꐚ？ꄄꁁꎿꆈꎿꒉꌤꉆꑌ，ꑐꄉꋍꏼꎟꋠꋍꏼꎟꀋꋠꀋꐚ？ꈧꌺꆪꌺꆏꊌꂿꄎꑌ，ꑐꄉꋌꏼꄡꇗꆏꋌꊊꂿꀋꄐꀋꐚ？ꌦꃅꌊꃅꆏꋌꀵꐺꄎꑌ，ꄡꇗꑐꄉꋌꏼꀵꀋꄐꀋꐚ？
ꉪꈧꁻꆪꁻꄎꌠꀋꈁ，ꈧꇴꆪꄀꄎꌠꑌꀋꈉ……
ꈧꌺꄂꃅꎑꄉꌬ，ꄂꐎꄙꃅꏃꑴꌦ；ꆪꌺꄂꃅꅐꄉꎔ，ꏷꌺꄙꃅꏃꑴꌦ。ꀋꄸꄷꃆꏂꊂꑋꉘꁮꆧꁨꌺꏃꇁꑲꆏꉪꍜꇰꀉꇐꊼꇅꀀꄖꂿ！（ꎹꅉꊌꀕ？ꋍꈚꎌꎍ？ꍜꇰꀉꇐꌌꈧꁻꆪꁻꋺꌠꌦꉹꌋꉹꋫꌠꌋꆀꌦꉈꌊꉈꈍꑋꏢꌠꆹ，ꁍꍸꀿꁵ，ꀿꍸꌺꁵ，ꌺꍸꇖꁵ……ꊌꉆꑲꆏ，ꍜꇰꀉꇐꌦꉹꌋꉈꇖꋬꈭꌠꆹ，ꐤꐥꊿꋅꋋꁯꐊꄉꐥ，ꑍꀕꊿꋅꋋꁯꐊꄉꑍꑟꁈ！）
ꋧꃅꋋꂷ，ꍜꇰꀉꇐꋍꂷꀉꄂꅓꀋꐚ？ꊿꋅꋋꁯ，ꍜꇰꀉꇐꋍꂷꀉꄂꈁꀋꐚ？
