ꀨꏾꌠ > ꃆꃀꁱꇐꋽꇐ

ꏨꒌꒃ
ꄜꃑꄮꈉ: 2011-09-28  | ꁰꄻꊿ:ꃅꁁꈬꄜ


ꁱꀘꀋꌠꆿꋒꁵ

ꉠꑠꍈ—
ꈛꎼꇁꄹꉇ ꑭꁆꈜꀋꌧ
ꅇꉉꂯꄹꉇ ꈂꀸꅇꀋꇁ
ꑠꃅꑴꇬ—
ꉂꏣꑠꑵꑌ ꉠꅿꊋꃤꐛꐨꁮ
ꊋꃤꋌꑵꐈ ꉠꅿꉂꅇꐛꐨꁮ
ꑠꃅꄉ—
ꉠꊿꋅꅇꂷ ꉢꈻꐯꄀꉙꇐꋋꎴꁱ
ꉠꊿꋅꅇꂷ ꉢꌦꐯꇯꉙꇐꋋꎴꐛ
ꉬꃅꉬꇬꆹ—
ꉙꇐꋋꎴ
ꋍꑭꋌꐓꇁꑠꎴ ꋍꈜꋌꍬꇁꑠꎴ
ꄡꃅꄡꇬꆹ—ꉙꇐꋋꎴ
ꋍꅇꋌꐭꇁꑠꎴ ꋍꂓꋌꄜꇁꑠꎴ
ꑠꃅꑴꇬ—
ꉙꇐꋋꎴ
ꋍꒌꋋꐊꀕꀋꐚ ꋍꎃꋋꀠꀕꀋꐚ
ꑠꃅꐛꅹ—
ꉙꇐꋋꎴ
ꌙꈈꀕꃅꐥꑎꆏ ꌙꈈꀕꃅꑍꎻꑟ
——ꅇꌐ

1
ꈍꑋꈍꑋꂾꅉꆐ
ꌦꏬꌋꏬꑠꊈ—
ꁍꁈꋦꁍꇬꄉ ꃰꅷꇁ
ꁍꁈꈄꁍꇬꄉ ꃰꅷꇁ
ꃰꌊ ꌺꇖꋥꅉꑟꅉꄷ
ꃰꌊ ꌺꇖꐹꅉꊫꂿꄷ

2
ꈍꑋꈍꑋꈎꂾꇯꆐ
ꏬꌦꏬꌋꑠꁥ—
ꁍꃀꎔꁍꇬꄉ ꏹꅷꇁ
ꁍꃀꐗꁍꇬꄉ ꏹꅷꇁ
ꏹꌊ ꊂꋊꆗꅉꉜꂿꄷ
ꏹꌊ ꊂꋊꎔꅉꆫꂿꄷ

3
ꐩꋊꒊꃀ ꌕꉐꃘꊰꈪ
ꀉꇐꊂꋊ ꋍꋏꇈꋍꋏ
ꏨꆉꃰꈜꇬ
ꏨꅐꆗꅉꇬ
ꃅꐛꃅꐙ ꀋꇊꁏꐨꁮ
ꌕꀥꃘꈜ ꀋꇊꃰꐨꁮ

4
ꐥꋊꑠꊭꇬ
ꇈꈯꋍꃢꍀꌈꆿꄧ
ꅔꐍꑿꐥꑿꁋꀘꐛꅹ
ꌳꈄꀋꃀꈧꌠꀑꇬꏍꈿꏿ
ꍀꅥꆿꌉꑌꇁꑾꈜꏂꈛꁮ

5
ꄡꇗꐥꋊꋋꊭꇬ
ꃈꈯꋍꏿꏬꐥꏬꌈ
ꈵꃴꃬꐥꃬꁋꀘꀐꄷ
ꃰꊿꑠꁥ ꍀꐋꆿꐋꎹ
ꍀꆿꊋꏗ ꍀꉌꆿꉌꑌ
ꏬꈹꏬꒃ ꏬꐴꒇꐨꁮ

6
ꐥꋊꐥꆪꆈꋧꋪ
ꃅꒉꃅꅂꊨꀋꄅ
ꍀꐥꆿꐥ ꇆꆉꂁꀕꈭꀋꅐ
ꍀꌺꆿꌺ ꋀꑣꒀꃀꄀꇬꎷ
ꍀꎐꆿꎐꂰꑳꀕꌠ
ꈍꑋꊖꈌꎙꀋꐚ
ꎮꑑꅉꌠꏨꆉꈧꌠꑌ
ꃪꐬꃪꈌ ꂁꇊꍃꇈꃅꀋꄿ
ꏬꏿꏬꌺ ꋀꑣꃬꂵꇱꇬꎷ
ꏬꑭꏬꅐꉧꑳꀕꌠ
ꈍꑋꃆꄔꐗꀋꐚ

7
ꏃꃅꄜꐛꐍꄮꇬ
ꊖꆈꀀꐚꇀꄮꇬ
ꍀꑍꑌꀋꐚ
ꆿꈔꑌꀋꐚ
ꃰꊿꍀꎹ ꍀꀋꊌ
ꃰꊿꆿꈹ ꆿꀋꂿ
ꑌꑿꀉꄂꑌꁬꑿꎶꇥꀋꏦ
ꃰꊿꈧꌠꄡꇗꑌꑿꌊꁈꐛ

8
ꎮꑑꅉꌠꏨꆉ
ꉈꑟꈻꌠꏨꆉ
ꊨꊭꉬꇮ ꐥꈤꐥꑋꏿꂯꄮ
ꑌꉆꉬꇮ ꑍꈔꑍꐥꏽꂯꄮ
ꏬꋊꏬꀥ ꃪꅪꈬꊂꏣꐨꁮ
ꏬꒌꏬꆠ ꃪꅪꀣꈜꁿꐨꁮ
ꀉꁌꊂꌒ ꅉꃅꅉꄜꎼꇁꇬ
ꃪꅪꀋꃀ ꃅꃴꉹꏣꉤꑠꈚ
ꏬꈌꇬꊎ ꋠꇖꈨꂟꐺꑴꄷ
ꄜꅇꆳꐊ ꂋꇁꃄꇖꄹꊂꅞ

9
ꉈꑭꈻꌠꏨꆉ
ꄁꃰꏿꌠꏨꆉ
ꀒꑍꁭꅐꁮꐚꉜꄉꏭꑌ
ꋌꂾꋊꎹꃤꇯꄉ
ꊈꐊꌐꐊꂿꄷ ꏮꅊꇈ
ꊂꑋꒈꀑꒈꂪꉜꄉꏹꑌ
ꋌꂾꈭꀺꈜꎷꄉ
ꁍꄻꑖꄻꂿꄷ ꏹꅊꇈ

10
ꐩꋊꀊꎴꌠꏨꆉ
ꁮꅉꇣꋲꌠꏨꆉ
ꁍꁈꋦꁍ ꋌꏮꃰꇌꈭꄮꇬ
ꁭꅐꁮꐚ
ꋊꎹꌠꋊꊌ
ꃤꎷꌠꃤꊊ
ꃅꃴꆪꌺ ꄚꈿꃰꇌꈭꅅꈨ
ꁍꃀꋦꁍ ꋌꏹꐼꇉꇈꄮꇬ
ꒈꀑꒈꂪ
ꈭꀺꑌꈭꊌ
ꈜꎷꑌꈜꊊ
ꃅꈋꐦꐛ ꄚꐊꐼꇉꀕꅅꈨ

11
ꁮꅉꇣꋲꌠꏨꆉ
ꉂꏣꀊꅼꌠꏨꆉ
ꉆꊰꀉꁌꃴꂷꋝꄹꉇ
ꃈꈯꏨꆉꉬꇮ
ꀎꋏꀉꁌꍸꇐꇇꊂꉬꑴꄷ
ꌺꇖꄹꇬ ꁮꅉꌡꄷꌠ
ꁮꅉꀎꋏꀉꁌꑭꐨ ꃶꐚꀕꐪꉬꅊꇈ
ꏃꋍꀉꁌꉂꅇꀖꄹꉇ
ꃪꐬꏬꏿꉬꇮ
ꊂꋊꌺꇖꁨꇐꐎꏂꉬꑴꄷ
ꌺꇖꉉꇬ ꈱꅇꉬꄷꌠ
ꈱꅇꊂꋊꌺꇖꈝꃀ ꁤꇅꀕꏢꐛꅊꇈ

12
ꋬꂻꈨꅪꌠꏨꆉ
ꋊꎹꃤꇯꌠꏨꆉ
ꀉꁌꏦꏅꏿꑠꂷ
ꀂꂾꏤꏃꀊꐎꈬꏿꌊ
ꏨꆉꇢꆹꂯꄷ
ꎭꋰꉒꐎꄓ
ꌕꑍꏿꃅꈊ
ꌕꉖꏿꃅꄜ
ꀊꂵꃭꇁꍹꑠꂷ
ꀂꂾꃭꇁꀉꆈꈬꍹꌊ
ꏨꆉꇢꁧꂯꄷ
ꑱꇺꃅꏸꋦ
ꃭꇁꍹꍸ
ꏃꑍꍹꃅꈊ
ꏃꉖꍹꃅꄜ

13
ꋊꎹꃤꇯꌠꏨꆉ
ꈭꀺꈜꎷꌠꏨꆉ
ꏬꐰꇑ ꏬꁨꇈꐛꅹ
ꏬꇱꃏ ꏬꐊꇈꐛꅹ
ꀎꋏꀉꁌ ꉌꃀꉪꉩꁦꀑꉪ
ꊂꋊꀋꁧ ꐰꇑꁦꀑꑟꅊꇈ
ꈎꂄꆪꂄ ꂷꅑꀮꇗꀕꑠꈓ
ꑍꂄꉖꂄ ꈨꑭꐝꇅꀕꑠꑍ
ꏬꏿ 819ꂷ ꃹꇁ
ꏬꌺ 819ꂷ ꐛꃲ

14
ꃅꈋꏹꂯꌠꏬꌺ
ꃈꈯꃰꂯꌠꏬꌺ
ꃬꊭꌟꃅꋊꇁꁡꇤꅞ
ꁡꇤꃰꊿꇴꇁꄚꉜꄮ
ꏬꌺꇁꉚ ꀿꇁꉚꌠꃰꊿ
ꏬꌺꇁꉚ ꃀꇁꉚꌠꃰꊿ
ꏬꌺꉪꌺꉪꇖꉬꃲꄷ
ꏬꌺꋀꃬꂣꈐꀒꊐꑟ

15
ꃈꈯꃰꂯꌠꏬꌺ
ꂓꄜꆹꂯꌠꏬꌺ
ꄯꒉꅇꅑꎼꇁꇬ
ꂷꋶꅇꄜꎼꇁꇬ
ꐛꅍꈳꅉꇁꂟꈴꀐꄷ
ꍶꁮꍬꅉꑻꇁꍬꀐꄷ
ꄯꒉꎭꆱꇬ
ꏬꒌꌵꆹꃲ
ꏬꆠꁠꆹꃲ
ꎿꏣꈴꏣꇬ
ꏬꅇꇱꆹꃲ
ꏬꉐꐊꆹꃲ
ꄀꌆꇃꌒꇬ
ꏬꂓꎑꆹꃲ
ꏬꌗꅑꆹꃲ

16
ꂓꄜꆹꂯꌠꏬꌺ
ꀻꎆꆹꂯꌠꏬꌺ
ꋍꑍꋍꉙ ꏬꒆꂸꐛꆸꄮꇬ
ꋍꈓꋍꉙ ꏬꂓꏬꄜꆸꄮꇬ
ꇉꐤꊨꌠꊖꆈꄩꄉ ꏬꒌꈻ
ꇉꅶꂿꌠꊖꆈꄩꄉ ꏬꆠꈎ
ꃮꆫꀊꉘꊖꆈꄩꄉ ꏬꉙꁊ
ꎆꆫꀉꑳꊖꆈꄩꄉ ꏬꁱꑴ
ꏬꏿꃹꊿꊖꆈꄩꄉ ꅿꁯꇙ
ꏬꌺꊪꊿꊖꆈꄩꄉ ꃨꁯꈻ
ꏬꌺꃰꊿꊖꆈꄩꄉ ꂷꅑꆹ
ꏬꌺꉜꊿꊖꆈꄩꄉ ꂶꈯꇁ

17
ꊖꆈ—
ꐩꋊꎴꌠꊖꆈ
ꉂꏣꅼꌠꊖꆈ
ꌩꋇꅡꈭꇁꅅꈨ
ꇓꂵꌳꈄꇁꅅꈨ
ꉢꉳꑾꉘꇁꅅꈨ
ꅔꁈꍯꊪꇁꅅꈨ
ꏬꌺ—
ꆏꄡꇗꑌꇁꑾꈜꍬ
ꑌꑿꊂꈹ ꀻꎆꆸꏢꉨꇬꎷ
ꏬꌺ—
ꆏꄡꇗꆿꇁꍮꈜꍬ
ꑌꑿꊂꈹ ꀻꎆꆸꏢꉨꇬꎷ
ꏬꌺ—
ꆏꄡꇗꆿꇁꍮꈜꍬ
ꆿꍯꌟꃅ ꂷꌵꆹꏭꄐꇬꎷ

18
ꀿꉎꎆꆹꌠꏬꌺ
ꃀꉎꎆꆹꌠꏬꌺ
ꅽꀿꃯꃰ ꁍꁈꈄꁍꀉꄂꃰꐛꅹ
ꅽꃀꏹꏸ ꁍꃀꎔꁍꀉꄂꏹꐛꅹ
ꆏꃰꋧꃅꉜꄉ ꃰꂿꄷ
ꆏꏹꋧꃅꉜꄿ ꏹꂿꄷ
ꃅꋊꉓꁱꅩꐂꄑꄮꇬ
ꃰꊿꆏꐈꉢꐈꋓꄮꇬ
ꅽꑊꎔ ꆏꁉꋧꃅꀨ
ꅽꅇꋽ ꆏꌞꋧꃅꁵ
ꅽꁮꅉ ꆏꌧꋧꃅꇰ
ꅽꐩꋊ ꆏꎥꋧꃅꇖ
ꅽꉂꏣ ꆏꀖꋧꃅꇱ
《ꅺꊈ》ꆏꌌ ꋧꃅꏭꌧꈿ
《ꂘꃅ》ꆏꌌ ꋧꃅꏭꉙꂘ
《ꇐꀳ》ꆏꌌ ꋧꃅꏭꉉꀥ
《ꈍꎞ》ꆏꌌ ꋧꃅꏭꈍꈩ
《ꀉꇐ》ꆏꏃ ꋧꃅꄉꌳꈄ
《ꅩꌺ》ꆏꏃ ꋧꃅꄉꉂꅶ
《ꀈꑘ》ꆏꏃ ꋧꃅꄉꎔꌋ
ꀉꁌꏿꌠꏤꏅꆏꈚ ꋧꃅꃰ
ꀊꂵꍹꌠꃭꇁꆏꈚ ꋧꃅꏷ

19
ꋧꃅ—
ꉌꌤꅑꌠꋧꃅ
ꉌꐡꅑꌠꋧꃅ
ꋌꇰ ꇇꃀꄕꄮꇬ
ꋌꅗ ꉐꆂꎇꄮꇬ
ꋌꇷ ꑓꂷꍺꄮꇬ
ꋌꃪ ꎸꀕꇣꄮꇬ
ꏬꌺ—
ꆏꉌꇿꑴꇬꆺꀋꒉ
ꑭꁘꎖꄉ ꈝꃀꍬꅉꍬꇬꎷ
ꏬꌺ—
ꆏꉌꐡꑴꇬꄉꀋꒉ
ꀂꏾꈎꄉ ꊫꂫꏁꅉꏂꇬꎷ

20
ꂓꄜꌠꏬꌺ
ꂒꈨꌠꏬꌺ
ꏬꄿꀿꉎꎅꄮꇬ
ꏬꄿꃀꆹꇔꄮꇬ
ꌦꏬꌋꏬ—
ꁍꁈꋦꁍꇬꄉ ꃰꇁꌠꏨꆉ
ꁍꁈꈄꁍꇬꄉ ꃰꇁꌠꏨꆉ
ꃯꅷ ꌺꇖꋥꅉꑟꀐꄷ
ꃯꅷ ꌺꇖꐹꅉꊫꀐꄷ
ꐩꋊꏂꀨꄈꅉꉜꄉꃰꁧꃲ
ꏬꌦꏬꌋ—
ꁍꃀꐗꁍꇬꄉ ꏹꇁꌠꏨꆉ
ꁍꃀꎔꁍꇬꄉ ꏹꇁꌠꏨꆉ
ꏹꅷ ꊂꋊꆗꅉꉜꀐꄷ
ꏹꅷ ꊂꋊꎔꅉꆫꀐꄷ
ꍸꇐꇇꊂꄈꅉꉜꄉꐚꁧꃲ

21
ꏬꌺ—
ꋊꃅꃰꂯꌠꏬꌺ
ꍂꃅꏹꂯꌠꏬꌺ
ꅽꁍꅽꀿ ꐩꋊꏂꀨꄈꅉꑌꄉ
ꑓꋪꆏꉚ ꀊꄙꊰꉐꈎ
ꅽꀿꅽꃀ ꍸꇐꃘꊰꈎ
ꏬꌺ—
ꋧꃅꉜꄉꃰꌠꏬꌺ
ꋧꃅꆏꃰ ꈭꇗꀕꆹꃲ
ꏬꌺ—
ꏃꃅꉜꄉꏹꌠꏬꌺ
ꌧꃅꆏꏹ ꐽꈭꀕꆹꃲ

21
ꏬꌺ—
ꋊꃅꃰꂯꌠꏬꌺ
ꍂꃅꏹꂯꌠꏬꌺ
ꅽꁍꅽꀿ ꐩꋊꏂꀨꄈꅉꑌꄉ
ꑓꋪꆏꉚ ꀊꄙꊰꉐꈎ
ꅽꀿꅽꃀ ꍸꇐꇇꊂꄈꅉꀀꄉ
ꅳꀧꆎꅲ ꊰꉐꃘꊰꈎ
ꏬꌺ—
ꋧꃅꉜꄉꃰꌠꏬꌺ
ꋧꃅꆏꃰ ꈭꇗꀕꆹꃲ
ꏬꌺ—
ꏃꃅꉜꄉꏹꌠꏬꌺ
ꌧꃅꆏꏹ ꐽꈭꀕꆹꃲ

22
ꏬꌺ—
ꋬꂻꈨꅪꌠꏬꌺ
ꌄꆣꀻꎆꌠꏬꌺ
ꀃꑍꋋꄮꇬ
ꊨꊭꉬꇮ ꐥꈤꐥꑋꏿꅉꂾꇁꄮ
ꑌꉆꉬꇮ ꑍꈔꑍꐥꏽꅉꂾꇁꄮ
(ꏥꆹꀋꏦꀞꑴꇬ
ꀋꏦꀋꏦꀞꑴꇬ)
ꅽꒌꅽꆠ ꆏꄝꁮꑋꂵ
ꅽꋊꅽꁆ ꆏꄝꈔꑍꂵ
ꀎꋏꑭꐨ ꆏꄝꐻꎵꂵ
ꅏꀑꆗꄉ ꃈꈯꃰꅊꇈ
ꅏꂪꇤꄉ ꃅꈋꏹꅊꇈ
ꀎꋏꈝꃀ ꉜꄉꂵꅊꇈ
ꊂꋊꊫꂫ ꉜꄉꏂꅊꇈ

23
ꏬꌺ—
ꆀꌺꆏꉚ ꐰꇑꉜꃅꉜꄉꌠꏬꌺ
ꆀꅪ ꆏꉚ ꇱꃏꉜꃅꉜꄉꌠꏬꌺ
ꀃꑍꋋꄮꆏ
ꃅꋊꉓꁱꅩꐂꄑꅉꈨꇁꇬ
ꃰꊿꆏꐈꉢꐈꋓꅉꈨꇁꇬ
(ꀋꏦꀋꏦꀞꑴꇬ
ꏥꆹꀋꏦꀞꑴꇬ)
ꃅꐛꃅꐙꁏꄿꂿ
ꌕꀥꃘꈜꃰꄿꂿ
ꐰꇑꊾꁏꇁꄿꂿ
ꑊꋌꊿꈻꇁꄿꂿ
ꑍꆏꈧꅐ ꄎꌬꌫꌦꍂ
ꌊꆏꆪꅐ ꁤꇅꇄꌦꍂ
ꏨꆉꂓꅑ ꏬꃀꀊꃴꐥꐯꅹ
ꌦꏬꌋꏬ
ꏬꃀꀊꃴꌋꆦꆏꇯꄉ
ꅽꌋꆎꐊ ꈍꄮꂾꈋꄮ
ꀙꃀꂓꅑ ꀋꌠꆿꋒꐥꐯꅹ
ꌦꀘꌊꀘ
ꀋꌠꆿꋒꒌꈻꆏꇯꄉ
ꅽꒌꆎꐊ ꈍꄮꀉꈋꄮ

24
ꏨꆉꇆ
ꉪꏨꆉ
ꁍꍸꇖꁵꌠꏨꆉ
ꀿꍸꌺꁵꌠꏨꆉ
ꏨꆉꑊꋌꐛꑌ ꉪꑊꋌ
ꏨꆉꐰꇑꐛꑌ ꉪꐰꇑ

25
ꏬꌺꇆ
ꉪꏬꌺ
ꌺꉘꋊꏦꌠꏬꌺ
ꅩꉘꉪꏦꌠꏬꌺ
ꏬꌺꈔꀕꆀꐊ ꈔꆹꇐ
ꏬꌺꋥꋦꆀꐊ ꋦꆹꇐ

 

ꇁꀦ: 未知 ꁰꄻꌠ:  |  ꄜꃑꌠ: beley ꌤꃅꅉ