ꐛꄃꂶꏦꉙꇐꁏꄉꌠꌋꄀ-ꃆꃀꁱꇐꋽꇐ-ꆈꌠꌧꇐꁱꀕꊅꇊꈐꏓꅉ

ꐛꄃꂶꏦꉙꇐꁏꄉꌠꌋꄀ

ꄜꃑꄮꈉ： 2011-08-31 　|　ꁰꄻꊿ：ꇓꆈꀋꃀ

　ꐛꄃꂶꏦꆹ1961ꈓ6ꆪ23ꑍꒆꌠ。ꋌꍏꇩꀋꃋꋌꄮꀁꑌꊿꋅꉙꇐꁱꂓꅑꁱꃀꂷꉬ。ꀋꃋꏾꉳꌜꃛꌜꍈꉬ。ꍏꇩꁱꃀꑠꉼꎼꏸꃅꋺ,ꍏꇩꁱꃀꑠꉼꌧꍧꃏꉼꃛꍗꑮ,ꆃꎭꍏꊉꆃꍗꑮ,《ꆃꎭꉜꇐꁱꀕ》ꍗꀜꄻꋺ。ꋌꇩꏤꑭꊂꀁꑌꊿꋅꉙꇐꁱꇐꈁꁠꋍꏠꌠ、《ꏷꌺ》ꉙꇐꄯꒉꋐꌠꇬꁰꄻꈁꁠ、《ꊿꋅꁱꇐ》“ꎭꄉ”ꈁꁠ、ꌧꍧꌜꁱꇐꈁꁠ、ꍏꇩꁱꃀꑠꉼꌕꃢꀕꌠꉙꇐꁱꇐꀊꏀ(ꋍꋐꃅꄉꌠ)ꈁꁠꑠꊌꋺ。ꉙꇐꁱꇐꀉꑌꈨꑌꊿꁏꌊꃔꇩꉙ、ꑱꇩꉙꃅꄉꌌꉇꄅꇩꏤꄛꇰꀐ。ꂴꉙꇐꁱꇐ《ꉘꃀꉂꐪꑵꉙ》、《ꂻꉪꏽꌠꆈꌠꂷ》、《ꇊꂷꅿꉘꁮ》ꌋꆀ《ꐛꄃꂶꏦꉙꇐꌋꄉꌠ》ꄷꑠꈧꅐꋺ。

　　

　　ꉠꑵꉙ——ꅇꌐꁌꎁ

　ꉠꀊꑵꉙꆹ
　　ꍤꏦꉸꉼꐯꇯꑵꌠ
　　ꃙꐂꌐꂷꌻꌺꍈ
　　ꉠꀊꑵꉙꆹ
　　ꉂꏣꎴꌠꆳ
　　ꉂꑟꅑꌠꉐ
　　ꉠꃅꁧꄩꏭ
　　ꋵꍅꀕꌠꏰꌺꍈ
　　ꌞꌌꊖꆈꉡꉘꉢꉚꋋꁕꁵꌠ
　　ꉂꐪꌞꐯꌞꌠꍰ
　　ꉠꀊꑵꉙꆹ
　　ꁦꀑꁧꄩꎔꇁꃨꌠꐮꉂꉌꊭꍈ

　　ꉠꀊꑵꉙꆹ
　　ꒈꆭꀕꄉꌠꑓꁴ
　　ꉘꃀꐮꉂꌠꒊꆱ
　　ꀊꄶꃅꑆꃄꎸꈪꅉꇬ
　　ꒊꃀꀉꆈꑠꋍꂡ
　　ꌞꌌꉠꀊꐩꋊꎵꑳꀕꌠꊿꋅꁵꌠ
　　ꃧꃨꀊꏀꑠꋍꀮ

　　ꉠꀊꑵꉙꆹ
　　ꀊꄶꃅꃴꇬ
　　ꃅꄂꃰꇁꈧꐺꑠꋍꌅ
　　ꉠꀊꑵꉙꆹ
　　ꇉꅶꌙꈇꅉꇉꁦꉼꃚꍰ
　　ꈜꎴꃅꄷꁦꀑꁧꄩꇴꇁꍜꃚꇬ
　　ꆳꇂꉏꋒꄚꈭꐨ
　　ꒊꋮꁯꇐꅑꑠꏢ
　　ꌞꌌꁍꇩꀉꂿꁵꌠ
　　ꋍꉎꀋꐥꌠꉂꏣ

ꒊꃀꀉꆈꌠ

　　ꐗꄁꇗꀹꉢꅉꐚ,
　　ꁧꇁꇉꄩꆈꌠꐗꄁꇗꀹꐩꋊ
　　ꎵꑳꀕꑠꇗꅉꐚ。
　　(ꒊꃀꀉꆈꑠꂡꇬ,
　　ꊾꊈꑓꋪꏂꅪꁨꑭꆗ。)

　　ꃰꊿꒊꃀꀋꌋꀕꃅꁦꄵꇈꈴꏽꌠꉢꊌꂿ。
　　ꃰꊿꒊꃀꉌꐒꇁꎭꒊꆱꌻꌺꄓꌠꉢꊌꂿ。
　　ꀉꇖꀕꃅꊸꇁꈻꌠꐧꋦꇥꄧꈴ,
　　ꀉꇖꀕꃅꂵꇑꂵꌋꀕꌠꋧꃅꆻꄧꈴ。
　　ꃰꊿꒊꃀꏓꇁꎿꃀꐛꌠꉢꊌꂿ,
　　ꌦꌠꏢꁮꇬꄉꂆꉔꐺ,
　　ꁍꁈꃣꌬꋀꇱꒌꉪꂿꃊꁏꈯꄉ。
　　ꉢꊌꂿꇬꆹ,ꊿꂿꎭꈧꌠ,ꒌꆠ
　　ꀄꂼꂺꌠꌟꃅꐙ。
　　ꀊꄶꑌꊮꇴꇁꍜꃚꇬ
　　ꀊꆨꁍꐛꏃꐛꇀꄮꃢꃅꎔꒌꐛꇁ

　　ꉢꊌꂿꇬꆹ
　　ꌦꌠꁧꇂꇈꒉꌟꃅꇙꁱꋏꀋꄹ
　　ꊿꇇꄙꇂꉐꃅꌍꑻꌠꇬꄉ
　　ꉂꏣꉌꎭꇖꈭꀕꌠꅲ

　　ꐗꄁꇗꀹꉢꅉꐚ,
　　ꁧꇂꇉꄩꆈꌠꐗꄁꇗꀹꐩꋊ
　　ꎵꑳꀕꌠꉢꅉꐚ。
　　(ꒊꃀꀉꆈꑠꂡꇬ,
　　ꊾꊈꑓꋪꏂꅪꁨꑭꆗ。)

ꇁꀦ： 未知 ꁰꄻꌠ： 　｜　 ꄜꃑꌠ： beley ꌤꃅꅉ

ꂴꁬꌠ：ꏨꒌꒃ ꊁꁬꌠ：ꌕꏾꐎꁬ

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ