ꎭꂵ,ꆈꌠ,ꉌꈲꂓꅑꅊꋌ,ꁮꐚꁁꏯꈬꉘꊾꒆꌺ。ꌶꅉꀉꂥꊐꌠꇬꌶꅐ,ꈨꏀꃆꂮꌋꆀꎆꏣꆿꂷꏲꂠꑠꃆꂮꌷꋺ,ꁱꇐ、ꊝꏫ、ꉹꁌꐥꀺꑠꃆꂮꉌꃶ。ꉆꊰꋊꄮꅉꆏ《ꍏꇩꁱꃀ》ꄩ、《ꉌꐡꁱꇐꌋꄀ》ꁬꌠ、《ꃅꏸꉙꇐ》ꁬꌠ……ꇩꈐꇩꉈꇬꄀꄜꄯꒉꉙꇐꁱꇐ、ꉌꐡꁱꇐ、ꈋꍣꁱꇐ、ꌤꄜꁱꇐꌋꆀꅇꄜꁱꇐꑠꀉꑌꃅꄀꋺ；ꀋꃅꈨꏀꃆꂮꌤꃅꐺ。
ꄚꐰꉙꇐꌊꁏꄉꋋꈨꇁ,ꋍꉙꇐꁱꇐꄯꒉ《ꀄꂼꈐꇬꃪꌧꇤ》ꋐꌠꇬꎑꌐ,ꉙꇐꁱꇐꋌꋐ“ꍏꇩꀁꑌꊿꋅꁱꇐꃆꇭꈁꁠ”ꏃꃢꀕꌠꊌ。
ꇢ ꇑ
ꈊꄮꃹꆹꃲ,ꃅꈻꅷꇁ
ꁡꇤꇬ,ꑿꆘꅝꀉꑌꈎꐛꀐꈨꌠ
ꐋꀋꌡꃅꈾꋦꁍꄉꀱꒊꀱꇁꃅ
ꋋꄮꐰ,ꌩꀃꈈꁉꄉ
ꏣꃀꏣꑟꈨꌠꌗꉻꌊꐺ,ꐵꑷꃅꐙ
ꊿꋅꁯꌠꈊꃀꑠꃅꅷꁧ
ꇢꇑꃆꄔꐞꇁ
ꋲꌼꑳꀋꋨꈨ
ꁮꐚꏭꁆꈬꉘꄩꄉꀅꌳꃅꇙꈧ
ꎧꏸꌋꆀꑶꆈꅿꉗ
ꄮꈉꌩꉻꇗꄃꌠꈴꄉꃰꈧꐺ
ꇢꇑꃆꄔꐞ,ꊿꋅꁯꌠ
ꈍꄮꑌꐯꊩꑌꇬꎷ
ꑓꌧꈊꃀꇬꈴꄉꃅꄜꌠꊌꂿ
ꃅꅸꊁꈹ,ꈜꎴꅉꁧꌠꊿꀊꋨꈨ
ꈁꏾꃅꁉꄉꌠꌩꀃꈈꃹꆹ
ꇭꀧꊸꃅꄉ,ꎧꍔꊌꅝꄉ
ꐥꋊꒊꃀꇬꐋꏣꑵꉙꒉꇈꁧ
ꌦꅇꌋꅅꃅꆳꈐꆹꃹ,ꃀꌠꒊꌋꀕ
ꀉꑳꈧꌠꉈꅐꁧꀐ,ꉂꏣꃨꇗ
ꊿꊇꁊꁧꏡꀉꎴꃅꄷꎭꌐ
ꊂꋍꑍꀑꏭꄉꉜꇁꇬ
ꇢꇑꌋꆀꊿꊇꇢꅉꎴꅉꑟꀐ
ꀉꑳꀿꏂꍈꐆꁯꄸꊿꇱꑐꇨꎭꌠꌡ
ꊿꀊꋨꈨ,ꇭꀧꍕꑕꄉꀀ
ꀄꂼꈐꄉꉂꏣꌋꆀꊴꎹꈹꐺ
ꀄꂼꈤꑭꂷꐈꀉꁁꋍꂷꐛ
ꃆꄔꆹꇢꇑꈐꄉ”ꀺꁁ”ꃅꐞ
ꈀꄸꉬ?ꐰꇑꇇꈻꌊꐺ
ꉌꐡꑓꇗꌠꀉꄂꀋꉬꃅꊽꉈꃶꑓꋩ
ꃅꏸꋦꋯꀋꐛꌠꃅꑆꇂꃴꄉ,ꀃꃅꇢꇑꉂꇁ
ꎭꃅꉈꇈꑖꈈꀕꃅꐙꇁ
ꋋꄮꐰꐥꌒꉌꐡꑠꐩꉠꉌꂵꈐꑌꇁ
ꉂꐛꅹ ꑓꁴꊰ
ꈜꎴꃅꄷꐥꌠꐋꀨꂷꄯꒉꁬꁱꌊꉠꏯꉉꇬ:ꋧꃅꋌꂷꇬ,ꊿꁳꀊꉗꃅꉌꐡꇈꑓꁴꊰꇁꌠꀊꅰꇁꀊꅰꀁꑌꀐꄷ。
ꑠꃅꀋꐛꄷꉢꇬꏭ!
ꉢꆹꃅꆳꎁꃅꑓꁴꊰꋻ。
ꊯꉆꈓꄹꈎ,ꉢꉈꇬꉡꉂꉡꅉꌠꉠꃺꃀꇢꂶꌠ,ꁧꄩꄉꌩꇽꆹꇈ,ꌩꁧꀉꒉꁧꐚꇁꄉꋌꅥꐧꌧꌋꆀꉌꂵꇬꌸ。ꀊꋨꇅꇬ,ꉢꈜꎴꃅꄷꄁꃰꐺ,ꀁꇬꊿꈧꌠꉢꎹꊊꄮꉠꏯ:ꅽꃺꃀꆎꇁꉚ,ꆏꉆꐥꋍꇅꇫꂿꇁꄷ。ꅇꈨꇈ,ꉢꃅꈊꀋꐥꃅꄜꀋꐥꃅꀁꇬꉜꄉꁧ,ꑷꈐꃹꄮ,ꃺꃀꌗꋍꁘꀉꄂꇫꋒꇈꀐ。“ꃺꃀ,ꆏꈍꃅꑌꌤꀋꐥꌠꉬ!”ꉢꇬꏭꋍꇬꇴ,ꉌꃀꅅꃅꏼꇱꌉꄉꌠꌡ。ꉠꃛꁙꈨꇈ,ꃺꃀꑓꋪꊼꇅꁉꎼꇁꏹꃰꏷꃰꃅꐙꄉꉠꏯ:“ꀂꑳꀋ—ꆏꎺꄉ—ꅽꃺꃀꋋꍂꌠꆎꉈꇬ……”ꇇꉢꌫꄉꁆꌠꀅꌳꃅꋌꄝꇧꎭ。ꃺꃀꑠꃅꄉꊷꈻꌠꐧꋦꋌꂷꐞꁧꀐ。ꉢꑓꁴꋰꄉ,ꀥꑳꉈꅐꁧ。ꋋꄮ,ꃅꆳꌙꈈꅍꉠꀍꑐ、ꉠꈁꑓꇬꌎꄉꁏ,ꉌꂵꎔꌠꉠꃺꃀꇇꁆꌠꌡ,ꉠꑓꋪꈐꏭꑓꁴꈍꃅꑋꋰꀋꄐꃅ,ꒈꅐꌟꃅꅐꇁ。
ꋋꊂ,ꉌꂵꀋꇿꄮꇬꆏꉢꀉꄂꇧꐺꑟꃅ。ꋋꄮ,ꃅꆳꀊꇨꇈꍞꊟꉌꌒꄀꌠꌡꆏ,ꉠꑓꁴꋰꀋꄚꃅꊰꇁꑟꃅ。
ꉢꉂꐪꐛꅹꑓꁴꅐ。
ꀄꊭꄮꇬ,ꉠꒆꑍꄹꉇꑟꑲꆏ,ꀁꇬꌢꎭꑴꇬ,ꀉꂿꃬꏿꂷꏬꄉꇈꆈꄉꌕꈈꅍꄻꉠꇇꈐꊐꑟꃅ。ꉢꃬꏿꂶꌠꌭꄉ,ꇇꈐꊷꆣꀕ。ꀉꂿꒊꆭꀕꃅꃢꈜꀊꏀꈪꉢꇢꃅ,ꈂꀸꇬꑵꉙꀉꆹꑠꎴꍡ:“ꀉꑳ,ꊂꋍꑍ,ꆏꒆꀉꒉꐛ,ꒆꌊꌳꈄꐛ,ꄇꆺꀊꊛꋩ,ꈜꎴꃅꄷꁧ。ꉈꋍꑍꆏꀱꀁꇬꇁꄮꆏ,ꆎꉂꌠꀉꂿꋧꃅꐞꁧꃲ,ꆏꑴꌠꇫꄡꎹ,ꅽꑓꁴꆹꄡꅐ,ꀉꂿꆹꌙꈈꅍꊖꆈꋌꁕꀀꎍꃲ……”
ꊁꆏ,ꉢꋍꑍꋍꉙꃅꒆꀉꒉꐛ。
ꋍꑍꆏ,ꇯꍝꃅꉢꀉꂿꐞꄉꈜꎴꃅꄷꁧ,ꁧꂯꄮꇬ,ꅉꇌꂿꌙꅍꉢꉪꑟꀕꄀꇁꀋꐚ。ꀉꂿꌩꁧꀕꇂꃴꉆꎍ,ꋍꈭꋍꇍꃧꀕꃨꐛꌐ。ꋌꍡꉙꍡꄉꌺꏃꌺꎭꇁ。ꋌꀈꃀꀐ,ꀍꑐꐍꎭꀕꌠꃅꆳꇱꁏꌊꃰ,ꉘꁮꈞꆈꃹꁧꀐ,ꉢꀑꏭꄉꀉꂿꋍꇬꇴꇈ,ꑓꁴꆺꀕꂃꃅꊰꇁ……
ꉢꊽꉌꐡꌠꌤꆿꎁꃅꑓꁴꊰ。
ꀊꋨꇅꇬꇖꆪꄮꐰ,ꂷꉐꐛꄮꑟꇁꂯꀐ,ꑓꂷꀯꆫꍅ,ꅪꎔꅪꃨꀋꃋꌺꂷꑺꂖꃅꇁꌊꉠꏢꁮꇬꉆ。ꋌꉠꀄꂻꈐꇬꁍꄝꌩꁧꀕ,ꇗꄃꀕꇈꁦꉘꀕ。ꋍꄮꋋꄮꋌꇇꑍꁆꌠꋍꀂꏾꄙꄉꇈ,ꑓꋪꑍꁆꌠꑓꃈꊼꇅꋏꃅꉢꁱꂷꁰꅉꉜꄉ;ꋍꄮꋋꄮ,ꋌꀛꅉꐁꅉꃅ,ꋍꒈꃚꈧꌠꉣꑊꈀꐺꇈꌠꈝꃀꄩꁊꌐ。
ꐋꀨꈧꌠꉉꇬꉢꁱꀋꐭꋋꂷ,ꐈꌊꇗꄃꀕꇈꁮꁞꂷꐛꀐꄷ。
ꀊꉗꀋꐛꇬꆏ,ꋌꆅꄉꀀꅉꄩꀀ,ꋍꆅꀊꅰꇁꀊꅰꊋꋠꅉꑟ。ꄚ,ꉢꋍꂴꆽꐥꑳꆏ,ꋌꈁꑓꐍꊭꀕꑴꇬꒊꆭꀕꃅꎍꇬꎷ,ꉢꁳꉪꌊꉌꐒꇁꎭꌠꄀꀋꀬ,ꋍꂴꄉꅐꇁꊁꑳꆏ,ꉠꈯꉢꋌꀋꌅꃅꑓꁴꇗꄹꊰ。
ꊿꋍꈨꋋꈨꉉꇬꉢꑓꁴꊰꇬꎷꉌꂵꀁꆓꇨꏭꃅꐙ,ꉢꋀꊇꏭꑠꃅ:ꑠꀋꉬ,ꇯꍝꃅꇬꆹꉢꉌꇨꂷꉬꄷ。
ꋧꃅꋋꂷꇬ,ꋍꑍꇫꐥꑲꆏ,ꐧꋦꋋꂷꇬꅐꌠꉂꐪ、ꎭꐨꃆꂮꉪꇁꇬꑋꊽꉌꐡꑓꇗ,ꋧꃅꋋꂷꉂꐛꅹꉢꀋꆏꃅꑓꁴꅐ、ꍡꉙꍡꇈꃲ。
