ꀒꎂꅚꍃꁧꈩꆹꋍꑍ
ꄜꃑꄮꈉ： 2012-02-11 | ꁰꄻꊿ：ꊇꉂꍿꆈ ꁱ
ꀒꎂꎿꃀ (ꀋꇐꏠꆧ ꍑ)
ꉡꀄꊭꃅꄉꄮꇬꇯꆐ,ꀒꎂꅚꍃꁧꉬꄷꑠꂷꉠꅳꀧꀂꏽꎟꋻ,ꄷꀋꁧꀊꆨꃀꇍꈩꀋꏂꄰꁍꈩꅉꉬꄷꂓꅑꇊ。ꀋꉆꊂꑌꋍꃅꍣꌠꌐꀋꉆꃅꈨ。ꀋꃋꋌꃢꊿꋅꇢꀯꌶꅉꄉꅇꂷꁱꂷꁎꄻꃆꂮꌷꇁꄉ,ꀒꎂꇁꈭꐨꑌ,ꊿꉬꇮꀒꎂꅚꍃꁧꇬꈍꃅꈩꌒꄷꉉꌐꄉ,ꉢꋌꎼꀊꄶꈩꁧꏾꌦꄉꏽ。ꄚꀉꑌꃢꄐꏤꅸꇁꀐꇬꄡꇗꇫꆹꀋꄐꇬꎷ。
ꀒꎂꅚꍃꁦꆹ,ꀒꎂꎽꃀꎿꋮꒈꂪꏭꐛꂶ。ꀒꎂꇓꈓꄉꀊꅑꁧꇬ,ꆏꈉꊰꃘꂶꀒꂪꐥ,ꋍꏅꑌꌠꍮꊪꑌꇬ,ꎆꃀꋍꄙꏁꉐꑟ。ꉢꉜꇬꀊꂥꐨꀒꎂꎿꆸꈈꄉꎖꎼꇁꇬ,ꉆꉐꂰꎖꐥꅀꑞꃅꀋꐚ。ꋋꆹꁦꉩꁦꑣꒊꌋꀕꑠꍈ,ꌩꋦꃴꇉꀕ,ꁧꀂꏾꂷꌠꆏꇂꁮꁵꌺꂶꑌꀋꇊꌡ,ꏝꍄꃛꏃꁧꂶꌠꀉꒆꅉ,ꄚꋌꆏꊼꇅꀄꊭꒉꄸꉬ。
ꋍꄙꈬꉐꉆꊰꌕꈎꉬꆪꊯꉬꑍꄹꉇꆏ,ꉪꐋꀨꌕꑻꐮꐊꅚꍃꁧꇬꈩꆹꀐ。ꋋꄹꉇꆹꑬꆏꑍ。ꀒꄹꉖꂷꉐꐛꅷꃅꄜ,ꊁꄹꉇꆏꃅꊸꅩꍠꅍꑠꑍ。
ꉪꊇꒉꌊꅚꍃꁧꃴꉹꁌꈩꅉꄉꆫꀾꃼꇈ,ꋍꈚꋍꈜꃅꆫꅸꆹ。ꉪꋋꌕꑻꇢꊭꇬ,ꋍꂷꀉꄂꀋꉆꋍꏮꄚꇁꋺꑲꆏ,ꉡꌋꆀꀊꇉꎞꀮꑋꆏꐥꅷꇁꇫꇁꀋꋻꄉ,ꑞꑌꉣꑊꉜꇬꇣꋲ、ꂵꇖꀕꌐ。“ꀊꁣ……ꄚꉜꇁ,ꀊꁣ……ꀊꄶꉜꇁ”ꃅꉜꇱꀋꏦꃅꆏꇬꉆꄉꀏꏯꎿꂶꌠꀉꄂꉜꇫꎍ。ꀉꇉꎞꀮꂶꌠꉣꑊꎿꄩꊿꆳꂾꈩꐺꈧꌠꉜꏾꄉ,ꌞꇖꉬꃪꏂꂶꌠꇬꉆꀋꅲꃅꁧꇬꆏ,“ꀈꍂꆏꑡꊸꂷꉬꀒ?ꄚꉆꄉꊼꇅꉜꂿ”ꃅꇬꎷ。ꋋꑌ“ꀈꍂꄚꇬꑡꂶꉜꅍꐥꇆ?ꀃꌐꀊꄶꄩꆏꑡꉜꄎꇆ”ꄷꍝꇬꎷ。
ꉪꊇꆹꌊꏦꏪꃄꎭꃪꅧꑠꈚꇬꈴꇈꁱꑳꂶꋑꑟ。ꄚꇬꆏꀊꅰꃅꀑꁮꌊꇿꑌꊌꂿꉆꀐ。ꉣꑊꂴꇫꇁꀋꋻꑍꂶꌠꎼꇿꑌꊃꀋꉜꃅ,ꂴꄩꁧꀂꏽꇬꉜꑲꆀꀱꉈꑴꁱꑳꉜꇁꂿꄷꆹ。ꀊꇉꉣꑊꁱꑳꉜꏾꄉꐰꆈꉎꆈꃅꐺꇬꆏ,ꇗꉬꂶꌠꇁꉚꀋꄿꃅ“ꑷꀕꀕ……ꄩꄈꀊꅰꃅꉜꅍꐥꄸ”ꃅꍝꇬꎷ。ꉪꊇꆹꌊꁧꀂꏾꇬꑟꇬꆏ,ꌩꃨꇓꃨꅿꉗꌑꐩꀕ、ꌩꄩꑍꈬꃴꇉꀕ、ꌩꏽꀂꏽꍑꒉꐍꇅꀕ。ꋌꈚꇬ,ꇉꅶꂿꏒꀕ,ꌩꏪꆈꊉꀕ,ꌩꋇꀍꑐꌡ,ꌩꃀꂿꃅꁿ,ꌐꒉꆈꈥꀕ,ꁮꈬꁮꆰꎿꈴꏾ,ꉌꊭꉌꇓꎓꄹꄉ。ꉌꊭꀊꏂꌠ、ꀈꆧꌠ、ꀊꃴꌠ、ꀊꅪꌠꌕꇮꇱꑠꌐꀋꉆ。ꋍꈧꋋꈨꉉꂯꉡꋌꉇꑲꀋꌧ。ꏅꇬꑌꌕꇮꃅꈌꐙ:“ꋋ—ꏾ—ꁉꋊ—”ꃅꑠꑌꇫꈌꐚ,“ꀂꀋꌌꑲꇆ,ꀂꀋꌌꑲꇆ”ꃅꑠꑌꇫꈌꐚ,“ꆼꇨꀕ—ꇨ,ꆼꇨꀕ—ꇨ”ꃅꑠꑌꇫꈌꐚ“ꀉꁧꁧꇭ”ꃅꑠꑌꇫꈌꐚ“ꐤꐥ—ꑠꐛ,ꎭꑿꀨꆐꀕ,ꃝꑆꃝꅐꀕ,ꀋꐥꑠꐛ,ꐤꑌꇤꇁꅐ”ꃅꑠꑌꇫꈌꐚ,“ꀆ—ꀆ—”ꃅꆅꇖꇬꀉꏯꑠꑌꇫꈌꐚ,ꀉꁁꊿꋋꋒꃅꑲꀋꌧꑠꌐꀋꉆꑴꌦ。“ꉐꊭꏄꆏꇈꈬꅼ”ꄷꉌꈲꇐꀳꑠꇬꐥ。ꋋꑌꀋꐯꐤꀋꁨ。
ꎙꋠꊂꄮꈉꌕꂷꇄꌠꇬꆏ,ꉪꊇꀱꀁꋋꁱꑳꈧꌠꋍꂷꋍꂷꃅꉜꅷꒉ。ꁱꑳꈧꌠꇬꌞꊿꑌꆏꒉꉢꇁꇬꉜꐺꌠꌐꀋꉆ。ꁱꑳꋋꈨꑳꎔꑳꃨꉜꌒꌦꇫꎍ,ꁍꌒꊾꁱꉜꌐꀋꉆ。ꊿꋍꁯꋍꑷꃅꐮꐊꁍꌒꂟꇁꌠꑌꐥ,ꀊꅰꃅꀉꁌꀊꂵꈧꌠꄈꆏꉿꄹꈜꅂꀕꄉꄚꂟꇁꌠꀉꑌ。ꉢꉜꇬ,ꀉꁌꀊꂵꈧꌠꆹꂯꀒꋏꊿꉨꅑꀋꀵꏭꃅꐙ,ꀊꏀꀉꑳꌺꈧꌠꑠꃅꇬꆏꉠꒊꒉ:“ꊿꀊꏀꈨꋑꀋꌡ,ꑞꇿꌠꉬꂯꀋ”ꉂ。
ꁱꑳꌋꆀꁱꌺꋋꈨꂿꇬ,ꉠꉌꂵꇬꑠꏢꉪ:ꏦꏪꅩꑳꀕ、ꈛꅂꋍꎳꎵ,ꑳꑠꌊꈍꃅꄚꋉꇁꌠꉬꂯꉂ,ꉪꍏꉸꊿꋅꋋꑵꑌꀉꇨꑵꉬꅊꇈ,ꀉꁌꀋꁧꑠꑌꊿꋌꉚꒉꑵꉬꀐꉂ。
ꉪꊇꉜꅉꇀꅉꃅ,ꇁꌊꂴꈴꇁꅉꑟꇬꆏ,ꉢꀉꁁꑞꑌꊌꀋꉜꃅ,ꂴꇯꆐꌊꌩꃀꌔꁧꀉꄂꉜꇬꎍ。ꀒꈈꃹꆹꉏꀋꂪ,ꌩꃀꀋꇰꀋꉈꃅꀊꂥꑠꑍꁧꇫꋦꇈ:ꏮꌩꁧꀁꏾꉜꇬ,ꀎꇓꆹꂯꇔꁧꀐꇬ,ꃪꐛꀜꇤꏁꍻꉈꄚꉆ。ꆹꌊꋍꇂꃴꄉꉜꇬꆏ,“ꄤꍨꌿꁧ”ꄷꁱꂷꀉꇰꑠꇖꂷꁱꌿꁧꑍꁧꌠꇬꄀꄉ。ꆹꌊꈐꏭꀉꁁꋍꈚꑞꌦꇬꆏ,ꂴꑍꁧꌠꐯꇯꄉꇬꂯꇬꀋꃛꑠꁧꇫꋦꇈꌦꀐ。ꋋꁧꀊꂥꐨꑌꂴꑍꁧꌠꂫꀋꋌ,ꄷꀋꁧꀉꒉꃅꍣ。ꋋꁧꑌꄡꇗꁱꂷ“ꉴꍨꌿꁧ”ꄷꑠꈨꁱꇬꄀꄈꌦ。ꉢꏮꄩꉜꇬꂿꃅꇬꉜꌠꌡ,ꎖꉚꇬꆹ,ꈍꃅꑌꋍꉐꉻꎖ(ꇪꍹ)ꀋꋌꐥꄜꄸ,ꋌꐯꆹꀋꇁꏭꐛ。ꀊꃚꐨꆹꉺꍯꋒꑭꌡ,ꊿꊯꑻꀋꉬꑲꑌꉆꑼꆹꀕꇎꏭꐛ。ꀋꇰꀋꇊꀊꉗꃅꋦꄉ,ꋍꄩꇪꇅꀊꃴꌠꌕꇨꇖꇨꀉꄂꇬꅑꊊꂿꀐ。ꐋꀨ,ꌩꁧꋋꁧꈎꄜꈍꑋꐥꌠ,ꉴꍨꄮꇬꄉꌗꅸꇁꑲꆏꅉꐚꀐ,ꌕꄙꈎꀋꉬꑲꑋꑍꄙꉆꉐꈬꉐꈎꆹꐥꀐ。ꄤꍨꌿꁧꑍꁧꌠꑌꀁꑌꃅꌗꇬꑍꄙꈎꐥꀐ。ꆏꋌꀋꑇꑲꆏꅽꊨꏦꊼꇅꌗꉜꒉꉏ。ꆈꌠꇐꀳꇬ“ꌩꃀꀑꈤꌦ,ꇓꃀꇫꄅꌦ”ꄷꀋꐯꐤꀋꁨ。
ꌩꁧꋋꌕꁧꀉꄂꉜꇫꎍꄉ,ꉜꅊꇈꂾꆏꄮꈉꉬꂷꀐꅊꇈꄉ,ꀉꁁꑞꑌꊃꀋꉜꃅꇧꍠꇨꆽꃅꀱꇁ。
ꊿꉬꇮꃅꈩꌒꌠꆹ“ꉹꁌꈩꅉꐥꀋꆆ”ꄷꇬꎷ。ꉢꉜꇬꆹꉹꁌꈩꅉꆹꈍꃅꅚꍃꁧꌩꏪꏣꇁꉆꂯ?ꐋꀨ,ꆫꇁꃬꅍꆹꀒꎂꅚꍃꁧꇬꐥ,ꀑꁮꆫꌒꅚꍃꁦꂷꐥ。ꆏꑴꌠꆷꇁꃬꋍꑍꆏ,ꇬꈧꀋꆹꇂ!
ꀒꎂꅚꍃꁦꆹ,ꀒꎂꎽꃀꎿꋮꒈꂪꏭꐛꂶ。ꀒꎂꇓꈓꄉꀊꅑꁧꇬ,ꆏꈉꊰꃘꂶꀒꂪꐥ,ꋍꏅꑌꌠꍮꊪꑌꇬ,ꎆꃀꋍꄙꏁꉐꑟ。ꉢꉜꇬꀊꂥꐨꀒꎂꎿꆸꈈꄉꎖꎼꇁꇬ,ꉆꉐꂰꎖꐥꅀꑞꃅꀋꐚ。ꋋꆹꁦꉩꁦꑣꒊꌋꀕꑠꍈ,ꌩꋦꃴꇉꀕ,ꁧꀂꏾꂷꌠꆏꇂꁮꁵꌺꂶꑌꀋꇊꌡ,ꏝꍄꃛꏃꁧꂶꌠꀉꒆꅉ,ꄚꋌꆏꊼꇅꀄꊭꒉꄸꉬ。
ꋍꄙꈬꉐꉆꊰꌕꈎꉬꆪꊯꉬꑍꄹꉇꆏ,ꉪꐋꀨꌕꑻꐮꐊꅚꍃꁧꇬꈩꆹꀐ。ꋋꄹꉇꆹꑬꆏꑍ。ꀒꄹꉖꂷꉐꐛꅷꃅꄜ,ꊁꄹꉇꆏꃅꊸꅩꍠꅍꑠꑍ。
ꉪꊇꒉꌊꅚꍃꁧꃴꉹꁌꈩꅉꄉꆫꀾꃼꇈ,ꋍꈚꋍꈜꃅꆫꅸꆹ。ꉪꋋꌕꑻꇢꊭꇬ,ꋍꂷꀉꄂꀋꉆꋍꏮꄚꇁꋺꑲꆏ,ꉡꌋꆀꀊꇉꎞꀮꑋꆏꐥꅷꇁꇫꇁꀋꋻꄉ,ꑞꑌꉣꑊꉜꇬꇣꋲ、ꂵꇖꀕꌐ。“ꀊꁣ……ꄚꉜꇁ,ꀊꁣ……ꀊꄶꉜꇁ”ꃅꉜꇱꀋꏦꃅꆏꇬꉆꄉꀏꏯꎿꂶꌠꀉꄂꉜꇫꎍ。ꀉꇉꎞꀮꂶꌠꉣꑊꎿꄩꊿꆳꂾꈩꐺꈧꌠꉜꏾꄉ,ꌞꇖꉬꃪꏂꂶꌠꇬꉆꀋꅲꃅꁧꇬꆏ,“ꀈꍂꆏꑡꊸꂷꉬꀒ?ꄚꉆꄉꊼꇅꉜꂿ”ꃅꇬꎷ。ꋋꑌ“ꀈꍂꄚꇬꑡꂶꉜꅍꐥꇆ?ꀃꌐꀊꄶꄩꆏꑡꉜꄎꇆ”ꄷꍝꇬꎷ。
ꉪꊇꆹꌊꏦꏪꃄꎭꃪꅧꑠꈚꇬꈴꇈꁱꑳꂶꋑꑟ。ꄚꇬꆏꀊꅰꃅꀑꁮꌊꇿꑌꊌꂿꉆꀐ。ꉣꑊꂴꇫꇁꀋꋻꑍꂶꌠꎼꇿꑌꊃꀋꉜꃅ,ꂴꄩꁧꀂꏽꇬꉜꑲꆀꀱꉈꑴꁱꑳꉜꇁꂿꄷꆹ。ꀊꇉꉣꑊꁱꑳꉜꏾꄉꐰꆈꉎꆈꃅꐺꇬꆏ,ꇗꉬꂶꌠꇁꉚꀋꄿꃅ“ꑷꀕꀕ……ꄩꄈꀊꅰꃅꉜꅍꐥꄸ”ꃅꍝꇬꎷ。ꉪꊇꆹꌊꁧꀂꏾꇬꑟꇬꆏ,ꌩꃨꇓꃨꅿꉗꌑꐩꀕ、ꌩꄩꑍꈬꃴꇉꀕ、ꌩꏽꀂꏽꍑꒉꐍꇅꀕ。ꋌꈚꇬ,ꇉꅶꂿꏒꀕ,ꌩꏪꆈꊉꀕ,ꌩꋇꀍꑐꌡ,ꌩꃀꂿꃅꁿ,ꌐꒉꆈꈥꀕ,ꁮꈬꁮꆰꎿꈴꏾ,ꉌꊭꉌꇓꎓꄹꄉ。ꉌꊭꀊꏂꌠ、ꀈꆧꌠ、ꀊꃴꌠ、ꀊꅪꌠꌕꇮꇱꑠꌐꀋꉆ。ꋍꈧꋋꈨꉉꂯꉡꋌꉇꑲꀋꌧ。ꏅꇬꑌꌕꇮꃅꈌꐙ:“ꋋ—ꏾ—ꁉꋊ—”ꃅꑠꑌꇫꈌꐚ,“ꀂꀋꌌꑲꇆ,ꀂꀋꌌꑲꇆ”ꃅꑠꑌꇫꈌꐚ,“ꆼꇨꀕ—ꇨ,ꆼꇨꀕ—ꇨ”ꃅꑠꑌꇫꈌꐚ“ꀉꁧꁧꇭ”ꃅꑠꑌꇫꈌꐚ“ꐤꐥ—ꑠꐛ,ꎭꑿꀨꆐꀕ,ꃝꑆꃝꅐꀕ,ꀋꐥꑠꐛ,ꐤꑌꇤꇁꅐ”ꃅꑠꑌꇫꈌꐚ,“ꀆ—ꀆ—”ꃅꆅꇖꇬꀉꏯꑠꑌꇫꈌꐚ,ꀉꁁꊿꋋꋒꃅꑲꀋꌧꑠꌐꀋꉆꑴꌦ。“ꉐꊭꏄꆏꇈꈬꅼ”ꄷꉌꈲꇐꀳꑠꇬꐥ。ꋋꑌꀋꐯꐤꀋꁨ。
ꎙꋠꊂꄮꈉꌕꂷꇄꌠꇬꆏ,ꉪꊇꀱꀁꋋꁱꑳꈧꌠꋍꂷꋍꂷꃅꉜꅷꒉ。ꁱꑳꈧꌠꇬꌞꊿꑌꆏꒉꉢꇁꇬꉜꐺꌠꌐꀋꉆ。ꁱꑳꋋꈨꑳꎔꑳꃨꉜꌒꌦꇫꎍ,ꁍꌒꊾꁱꉜꌐꀋꉆ。ꊿꋍꁯꋍꑷꃅꐮꐊꁍꌒꂟꇁꌠꑌꐥ,ꀊꅰꃅꀉꁌꀊꂵꈧꌠꄈꆏꉿꄹꈜꅂꀕꄉꄚꂟꇁꌠꀉꑌ。ꉢꉜꇬ,ꀉꁌꀊꂵꈧꌠꆹꂯꀒꋏꊿꉨꅑꀋꀵꏭꃅꐙ,ꀊꏀꀉꑳꌺꈧꌠꑠꃅꇬꆏꉠꒊꒉ:“ꊿꀊꏀꈨꋑꀋꌡ,ꑞꇿꌠꉬꂯꀋ”ꉂ。
ꁱꑳꌋꆀꁱꌺꋋꈨꂿꇬ,ꉠꉌꂵꇬꑠꏢꉪ:ꏦꏪꅩꑳꀕ、ꈛꅂꋍꎳꎵ,ꑳꑠꌊꈍꃅꄚꋉꇁꌠꉬꂯꉂ,ꉪꍏꉸꊿꋅꋋꑵꑌꀉꇨꑵꉬꅊꇈ,ꀉꁌꀋꁧꑠꑌꊿꋌꉚꒉꑵꉬꀐꉂ。
ꉪꊇꉜꅉꇀꅉꃅ,ꇁꌊꂴꈴꇁꅉꑟꇬꆏ,ꉢꀉꁁꑞꑌꊌꀋꉜꃅ,ꂴꇯꆐꌊꌩꃀꌔꁧꀉꄂꉜꇬꎍ。ꀒꈈꃹꆹꉏꀋꂪ,ꌩꃀꀋꇰꀋꉈꃅꀊꂥꑠꑍꁧꇫꋦꇈ:ꏮꌩꁧꀁꏾꉜꇬ,ꀎꇓꆹꂯꇔꁧꀐꇬ,ꃪꐛꀜꇤꏁꍻꉈꄚꉆ。ꆹꌊꋍꇂꃴꄉꉜꇬꆏ,“ꄤꍨꌿꁧ”ꄷꁱꂷꀉꇰꑠꇖꂷꁱꌿꁧꑍꁧꌠꇬꄀꄉ。ꆹꌊꈐꏭꀉꁁꋍꈚꑞꌦꇬꆏ,ꂴꑍꁧꌠꐯꇯꄉꇬꂯꇬꀋꃛꑠꁧꇫꋦꇈꌦꀐ。ꋋꁧꀊꂥꐨꑌꂴꑍꁧꌠꂫꀋꋌ,ꄷꀋꁧꀉꒉꃅꍣ。ꋋꁧꑌꄡꇗꁱꂷ“ꉴꍨꌿꁧ”ꄷꑠꈨꁱꇬꄀꄈꌦ。ꉢꏮꄩꉜꇬꂿꃅꇬꉜꌠꌡ,ꎖꉚꇬꆹ,ꈍꃅꑌꋍꉐꉻꎖ(ꇪꍹ)ꀋꋌꐥꄜꄸ,ꋌꐯꆹꀋꇁꏭꐛ。ꀊꃚꐨꆹꉺꍯꋒꑭꌡ,ꊿꊯꑻꀋꉬꑲꑌꉆꑼꆹꀕꇎꏭꐛ。ꀋꇰꀋꇊꀊꉗꃅꋦꄉ,ꋍꄩꇪꇅꀊꃴꌠꌕꇨꇖꇨꀉꄂꇬꅑꊊꂿꀐ。ꐋꀨ,ꌩꁧꋋꁧꈎꄜꈍꑋꐥꌠ,ꉴꍨꄮꇬꄉꌗꅸꇁꑲꆏꅉꐚꀐ,ꌕꄙꈎꀋꉬꑲꑋꑍꄙꉆꉐꈬꉐꈎꆹꐥꀐ。ꄤꍨꌿꁧꑍꁧꌠꑌꀁꑌꃅꌗꇬꑍꄙꈎꐥꀐ。ꆏꋌꀋꑇꑲꆏꅽꊨꏦꊼꇅꌗꉜꒉꉏ。ꆈꌠꇐꀳꇬ“ꌩꃀꀑꈤꌦ,ꇓꃀꇫꄅꌦ”ꄷꀋꐯꐤꀋꁨ。
ꌩꁧꋋꌕꁧꀉꄂꉜꇫꎍꄉ,ꉜꅊꇈꂾꆏꄮꈉꉬꂷꀐꅊꇈꄉ,ꀉꁁꑞꑌꊃꀋꉜꃅꇧꍠꇨꆽꃅꀱꇁ。
ꊿꉬꇮꃅꈩꌒꌠꆹ“ꉹꁌꈩꅉꐥꀋꆆ”ꄷꇬꎷ。ꉢꉜꇬꆹꉹꁌꈩꅉꆹꈍꃅꅚꍃꁧꌩꏪꏣꇁꉆꂯ?ꐋꀨ,ꆫꇁꃬꅍꆹꀒꎂꅚꍃꁧꇬꐥ,ꀑꁮꆫꌒꅚꍃꁦꂷꐥ。ꆏꑴꌠꆷꇁꃬꋍꑍꆏ,ꇬꈧꀋꆹꇂ!
ꇁꀦ： ꆃꎭꉜꇐꁱꀕ
ꁰꄻꌠ：
beleys ｜
ꄜꃑꌠ：
