ꀨꏾꌠ > ꃆꃀꁱꇐꋽꇐ

ꐛ ꑿ
ꄜꃑꄮꈉ: 2012-03-21  | ꁰꄻꊿ:ꒉ ꆈ

ꐚꋌꑵꀉꑌꄹꁆꆏꃪꅪꈬꊂꈌꑵ。ꃪꅪꈬꊂꆏ,ꐛꑿꈌꃅꌒ,ꊾꑌꇫꆹꀋꄐ,ꈬꉆꈬꎹꑌꇫꆹꀋꄐ,ꑠꅹꑞꑌꇫꑲꁌꇤꀘꆹꀋꄐꄉ,ꀀꃅꑌꑭꌒꑵꉬ。ꊁꆏꋍꈨꊿꇱꎹꈹꌊꐚꀮꊐꄉꐚꒉꄵꅝꀐ。

    ꐚꒉꋌꑵꆏꊨꋌꑵꑌꉬ。ꆅꇿꈻꇿ,ꀉꑳꌟꒉ,ꃀꌠꃅꐚꒉꎹꌊꁬꋌꃅꅝ。ꋋꆹꐛꑿꁬꃨꊰꑋꑟꌠꃅꋌꍘꐯꇯꐚꒉꄻ,ꁬꃨꆰꃨꋋꈨꇬꆅꇿꈻꇿꌠꁬꋌꀉꑌꃅꐊ。ꉌꈲꉬꄿꂿ,ꆈꌠꉬꄿꂿ,ꐚꒉꌌꁬꋌꃅꄉꅝꑵ。

  “ꐩꎵꃀꆹꎔꑴꇬ,ꐨꁌꊿꋊ;ꐚꒉꆹꐔꑴꇬ,ꐛꃼꊿꋊ”ꄷ。ꉢꀉꑳꃅꇬꉠꀉꄉꐚꄵꅉꈩꇈ,ꐚꋊꈌꊉꑓꁊꋻ。ꄚꐚꋌꑵꆏꇫꀋꌾꇬꀋꐈꑲꆏ,ꋋꑌꈁꌒꃅꊿꀋꋊꄸ。ꆏꋌꅣꋋꇤ/ꋋꐆꋋꀘꑲꆏ,ꋌꌦꀋꑴꈔꀋꑴ,ꀑꇬꀋꈁꃅꅽꏯꄉ。ꋌꐛꃼꅐꊾꍣꄷꆏ,ꋌꑌꌦꌠꉬ。ꆏꇓꂵꇵꇬꅣꇬꆹ,ꋌꅽꇓꂵꇬꍬꄉꆏꋊꇁ。ꑠꃅꄉꊿꇫꌾꇬꐈꄉ,ꋌꅸꒉꃹꃪꃹꁧꌠꐥ。ꆏꇫꀋꋣꀋꌉꇬꆹ,ꋌꌒꃅꌑꐨꀕ,ꑗꃅꑖꈈꀕ,ꊿꏭꀋꇁꌠꉬ。ꀋꉊꉠꑳꃺꃶꂷꀂꄁꇔꃅꊸꇬꉈꏭꑌꇬꆏ,ꐙꈌꇿꄉꇁꀋꐚ,ꈁꉬꇁꌊꋌꂅꇈ,ꋌꎼꀋꇙꀋꑐꄚꑌ。ꋍꈪꌺꐛꇬꆏꐚꋋꈌꃅꋍꄩꎑꌐꄉ,ꀅꌳꃅꊖꀧꄉꋌꀵꑳꑟꇁ。ꊂꃨꇭꈨꎹꌊꌧ,ꂶꇉꌺꍈꇬꎭꐚꍈꄻꇫꁌꄉꄻꄚꇭꀧꇬꐚꈧꌠꄷꄉꇈ,ꐛꃀꐛꌺꃅꇗꀕꇖꃅꐮꊂꈹꄚꂶꇉꌺꂶꌠꃹꇁꌐ,ꋍꇅꑌꋊꉠꃺꃶꀋꄀ。

    ꐛꑿꆹꁦꎴꇤꌃꌠꏝꐯꏝ,ꋍꀀꈌꇬꇤꀋꌃꑲꆏ,ꋌꎼꁧꌠꉬ。

    ꐚꀮꈐꏭꁯꄸꁮꆰ,ꁮꑍꃀꁮꑟꑠꐥꀋꉆ,ꅉꀕꃅꌨꑻꑲꆀꍑ。ꉈꑴꊷꇨꑌꀋꉆ,ꈺꇨꑌꀋꉆ。ꐚꒉꄵꄮꇬꆏ,ꃨꄀꄉꌧ,ꐛꀵꂴꆼꄀꌠꌧꎼꒉꑲꆀꐚꒉꄵ。ꐚꒉꈀꑌꌠꃅꄵꌐꇬꆏ,ꋆꊂꌕꆪꆏꐚꋚꈁꀋꊌꃅꂮꌦꑵ。

    ꐙꆏꌕꑵꐥ,ꋍꑵꆏꃨꍘꌊꐚꒉꄻ,ꋍꑵꆏꃨꀋꍘ,ꇭꀧꀉꄂꑵ,ꇬꏭꐚꀋꃋꌺꄷ,ꋋꑵꆏꊿꀋꋊ。ꐛꆈꋌꑵꆏ,ꁸꇬꁳꃅꎻꌠꑘꃤꆏꐛꃀꐛꌺꄻ。ꐛꁓꆹꏮꇬꄉꇇꃀꒈꑠꀉꑌꂷꄻꄉ,ꑠꆹꐛꃀꄻꌠꉬ。ꈍꑋꂷꄻꄉꆏ,ꊂꏭꈍꑋꀮꈤꁧꂯꄉ。ꊿꐚꃆꐚꂮꌧꌠꆏ,ꏛꃅꈠꃅꅉꆐꐛꃀꄻꄉꌠꋌꍓꇫꎭ。ꑠꃅꑲꆀꐚꂷꃷꁨꀉꑌꃅꁸꅐꀋꁧ。ꋍꈌꌠꋍꀮꃅ。ꐚꂷꃷꁨꀉꑌꆏ,ꊁꐚꒉꄻꄎ。ꋌꀋꉬꑲꆏ,ꋍꀮꌠꇬꐚꂷꋍꏂꐥꇬ,ꁸꀉꑌꈌꃅꅶꇨꑲꆏ,ꋍꀮꌠꇅꋒꀉꄂꐥꀐ。ꑠꃅꇬꆹ,ꑘꁨꐚꂷꊋꃤꀁꑌꀐ,ꐚꒉꀉꑌꃅꄻꀋꄐ。

    ꐚꑱꈤꇬꆹ,ꐛꃀꄓꐛꌺꏃ。ꐛꃀꆹꐧꊭꀊꎴ,ꐛꌺꑍꂷꎵ,ꊿꀋꋊ,ꅏꆏꋍꍈꀁꎴꀕꃅꐙ。ꊿꌌꅫꃀꌱꃀꏭꅺꌡꇬꆏ,“ꅪꎔꃭꇤꏂ,ꐛꃀꐧꊭꅑ”ꃄꉉꑵ。ꐛꃀꑭꄑꂯꄮꇬꆏ,ꂴꆽꐚꀮꇬꄉꐛꌺꁸ,ꊁꅐꐚꀮꉈꏭꄉꐚꑄ。ꋌꈀꇁꅉꇬꐛꌺꄓꁧꌐ。ꐚꃆꐚꂮꌧꌠꆹ,ꐛꃀꂶꌠꅐꇁꄷꆏꒃꄉ,ꅐꑍꁆꌠꋊꇧꎭꇈ,ꋌꁳꈜꎴꃅꁧꀋꄐꃅ,ꒃꐚꀮꀊꏀꂷꇬꊐꇬꆏ,ꐛꌺꈧꌠꋍꊂꈹꄚꃹꇁ。ꐛꃀꇿꇬꎑꆏ,ꐛꌺꇿꇬꅑ。ꐚꑱꈤꃅꃴꇬꐹꄮꇬꆏ,ꈑꋍꈑꆠꃬꄉꁊ。ꃼꏯꁊꑳꏯꆹ,ꉎꏭꁊꐰꏭꆹ,ꁊꄉꋌꁳꈛꑌꅉꇬꐛꎻ,ꋍꈭꐨ,ꉇꑴꅰꑻꐚꀮꇬꊐ。

    ꐛꑿꋌꑵꇭꀧꆹꀀꊭ,ꃅꎳꆏꀉꒉꑵ,ꋯꑌꃯꉻ,ꌦꀋꏦꎭꀋꏦꑵ。ꐛꑿꑬꐳꇇꃷꃭ,ꋍꍈꑌꐵꀋꑷ。ꋀꊇꑘꁨꃨꎹꃨꈹꏋꋍꀕ,ꐛꁓꄻꌠꄻ,ꐚꒉꊐꌠꊐ,ꑘꁨꂱꑱꃅꐨꂱꑱꃅ。ꋀꊇꐯꇯꃅꐯꇯꋠ,ꄷꀋꁧꀉꑌꃅꀕꄉꋌꄖꃰꊿꍈꑴꌦ。ꇐꀳꑠꇬꐥ:“ꐛꑿꌟꃅꐯꇯꃨꎹꃨꈹꐚꒉꄻ,ꁮꑍꃀꌟꃅꂱꑱꁮꑟꀉꄂꄡꃮ”ꄷ。ꅇꂷꑠꆹꉪꃰꊿꏭꑌꂘꅍꐥꌠꉬ。

ꇁꀦ: 《ꆃꎭꉜꇐꁱꀕ》ꄩꄉꌋ ꁰꄻꌠ:  |  ꄜꃑꌠ: beley ꌤꃅꅉ