ꀋꂓ(ꑍ)
ꄜꃑꄮꈉ： 2011-08-31 | ꁰꄻꊿ：ꇓꆈꀋꃀ
(ꂴꊛ)
ꊁꈾꒇꈾꋩꇄꌠꇬꆏ,ꀋꂓꂶꌠꉜꆐꊌꄷꉜꀋꑍꌊꈀꑌꅉꇬꀀ,ꈁꉆꅉꇬꀀ。ꋋꇅꇬꆏꌶꅉꇬꑬꆏꄉꉢꎼꈾꋩꅉꇬꈾꏤꅞꈽꁧ,ꈾꏤꋍꑍꅞꇬꇫꃏꃘꃏꂷꊌ。ꂵꆧꑬꆏꇄꌠꇬꆏꊿꃅꈽꏜꄌꌊꄚꋍꁙꀊꄶꋍꁙꃅꑸꑽꃙꋠꇫꑌꌐ。ꀋꂓꆹꋠꀋꏾꄷꋌꐚꈾꏜꁧꇬꉈꇈꑊꋌꁁꋌꄻꈁꑓꉱꄉꇬꀀ。ꀊꉘꌠꆗꑠꈨꑌꋟꅐꇈꈾꏜꀂꏽꑌꄉꑳꅝꑬꆏꇰ。ꉡꑌꋟꅐꇈꑸꑽꈨꉢꉅꉠꀂꄁꂱꏾꇬꄟꌊꀋꂓꍈꆹꂿꄷꆹꌊꌠꆗꈧꌠꂴꆽꑟꇬꆏ,ꎭꂵꊇꌺꂶꌠ“ꇁ,ꇁ”ꄷꉠꏯꇇꃭꇈ,ꉢꆹꌊꋍꋑꑟꇬꆏꀌꀠꏾꅪꑠꂷꋌꒃꌊ“ꆏꅽꀋꂓꀂꄁꁏꄉꀌꀠꋋꂷꄻꋍꀉꆂꄐꀬꀕ”ꄷꉠꏯꌕꇈ,ꉢꑠꄮꇬꊯꌕꈎꀐꑴꇬ,ꑡꑌꉢꋋꀋꌧꃅꉌꋦꇬꎷꑴꌦ,ꌞꊿꉠꏯ“ꀊꆺꄰꌺꂶꌠ”ꄷꇴꇬꎷ。ꎭꂵꊇꌺꋌꄷꇬꆏ,ꈩꌒꌠꆏꋌꐘꉬꀐꉂ,ꄇꀋꉆꃅ:“ꀬꑴꇆ,ꑡꀋꀬꅍꐥꂸ”ꄷꑸꑽꈧꌠꉢꃝꈾꏜꀂꏽꅞꄉꇈ,ꀌꀠꂶꌠꉢꒃꌊꑭꁘꂮꄉꀋꂓꀂꄁꉢꁏꎽꆹꇬꆏ,ꉠꑓꂪꃴꐎꆗꄷꑠꇅꄹꇈ,ꀋꂓꂶꌠꋌꇷꌊꀋꎺꃅꋌꑣꄑꏿꇫꑌ,ꄚꆏꉡꑌꉢꋌꇷꐂꑐꀕꄉꀌꀠꂶꌠꉢꄝꇿꎭꀋꐚꑓꍰꅍꇰꀋꂓꐏꄚꉆꇬꆏ,ꌠꆗꈧꌠꐃꁆꏩꅉꃅꇬꊎꂃꄉꒉꌦꄉꏽ。ꀋꂓꂶꌠꆹꈁꑓꅩꍠꅍꌦꀽꇁꄉꏽꃅ,ꇇꃶꇇꂿꄹꀂꏾꅑꇫꑌ。ꊿꑸꑽꋠꇫꑌꑴꌦꈧꌠꆹꌠꆗꈧꌠꑡꒉꌠꊿꊇꋋꅉꀋꐚꄉꈍꉘꑓꍝꃅꇫꑌ。ꎭꂵꆿꌺꂶꌠꑌꑬꆏꈾꏜꀉꁁꑠꁧꇬꑌꌠꉥꆀ,ꑡꑌꋌꉜꋍꑓꋪꇬꊐꄉꌐꐤꁮ,ꋘꉬꃅꋌꍻꋍꀿꃶꄰꌺꀁꑳꋒꌠꎭꂵꊇꌺꋍꄲꀵꄉꇈ,ꑊꑍꆈꁴꅍ“ꇗꀋꁨꀸꀋꁨꊿ!ꇐꇭꋋꂷꅽꈩꋏꂷꅀꑞꉬ”ꄷꎭꂵꊇꌺꋌꁒꀊꑙꈿ。ꉡꑌꄚꆏꎭꂵꆿꌺꏦꄉꀋꎺꃅꉢꂇꆹꌠꆗꈧꌠꈪꄙꑌ。ꌠꆗꈧꌠꑓꋪꀏꐱꄉꑓꃈꋏꐯꀦ,ꄷꀋꁧꆺꄝꐬꇓꊎꑡꌌꐮꌕꀋꐚ。ꀋꃋꑲꆀꉪꇁꇬ:“ꆏꌞꀋꃋꊐꇈꌞꌺꑮꃀꍯꂶꌠꄈꇗꁨꀸꁨꀐ,ꈨꑌꉘꁮꆎꊃꂿ”ꄷꉉꋭ。
ꑠꄮꇬꆏꊿꋋꑍꂷꊿꉜꇬꀋꋪꀕꃅꐙꀐꐥꁮ,ꄚꈀꄸꑌꈌꋊꀋꀬ。ꎭꂵꆿꌺꄰꑭꊂꊿꐲꀉꇨꑷꉬꄉ,ꈀꄸꑌꋍꀑꋌꌌꊿꀸꇀꏦ。
ꉠꀉꂿꑌꋌꉜꇬ“ꉐꆈꀉꐚꃮꄟꄸ,ꇌꆈꁍꎼꉇꄟꄸ”ꐤꁮ,ꄚꈍꏯꑌꉉꀋꌒꌊꐙꃅꃀꇭꏭ:“ꋍꃀꇭꀋ,ꉪꆹꀀꁈꀉꁧꐛꄉ,ꈂꏽꈁꏾꃅꐯꉇꀋꉆꀐ,ꆎꄉꂴꋍꏢꌠꀐꇬꀿꃅꋍꈚꇁꌠꐛ,ꉈꑴꆏꃷꇎꀋꃀꉌꂵꐮꄉꋌꑵꅇꉉꐮꇬꇉꃹꅲꑵꉬꌠꉥ,ꈀꎭꀕꆏꑴꌠꇓꂵꉅꂴꅥꅉꃅꄉꅊꇈ”ꄷꉉꇈ。
ꐙꃅꃀꇭꑌꊒꆽꀕꃅꆹꉉꀋꉆꄉꁦꏮꇈꏮꃅ:“ꇐꇭꀋ,ꀋꂮꀉꑳꀵꇗꌧꐛꋋꈨꆏꀨꎹꌊꊾꒆꊿꐙꂯꄉꀐ。ꈍꌺꑌꒆꊭꉩꑴꇬꌺꃰꋋꑵꆹꋍꈓꀉꄂꃅꒆꆹꑟꑵꄸ,ꋌꉈꆏꆎꄈꐥꌒꇁꀐꌠꉬ。ꀃ——ꀊ,ꀊꆺꃅꑖꑠꑷꑌꅽꑠꂷꀋꉬꇮꇬꈍꃅꂯꀋꆾ”ꄷꉉ。
ꇯꍝꑌꋋꈨ,ꀋꂓꀋꉬꇮꇬꆹꀊꑖꄰꌺꍸꇖꇜꋋꈨꌕꀥꃘꈜꃰ,ꋍꂷꋍꄷꃅꌞꀑꑊꉜꄉꐥꁧꌐꀐꌠ。
ꀊꑖꄰꀋꉊꂴꆽꆹ,ꊼꇅꋙꋠꒉꅝꇎꄷꑵꌠ,“ꌟꃅꃨꈹꃝꌠꐥ,ꌠꋋꅥꄰꃝꌠꐥ”,ꀒꑍꁯꆏ“ꌠꐧꏣꉂꃝ”ꌠꉬꑴꄷ,“ꂛꊨꅫꃀꃝ,ꈴꁱꋐꒉꃝ”ꌠꉬꑴꄷ,ꈍꌺꆪꐛꇬꆏꀑꑌꄰꀋꃋꀋꂓꇐꇭꊿꊇꈌꄀꄉ。ꊁꉼꊞꎹꄻꇁꀐ,ꎆꋚꉬꇮꏮꎹꇬꇱꐮꀐꃅꈨꇬꆏ,ꇧꍻꇧꆽꑮꈎꑟꈎꉬꀋꉬꑠꈨꑌꀋꌋꃅꌺꑮꃀꋇꑍꁯꇱꃛꊸꌊꇫꄉꑮ。ꀊꋩꄹꈎꀋꂓꆹꊰꑋꈓꄉ,ꈍꌺꆹꊰꈎꄉ。
ꀋꂓꋋꂷꀉꄉꀉꂿꃅꌦꏜꄉꌕꈎꃅꍸꀊꂵꇱꇈ,ꋌꃆꅉꋍꑵꋋꂨꌠꀉꏮꍢꅝꅍꊾꍸꀉꑳꂷꄷꊿꋌꀋꑇ,ꈍꌺꆹꀊꑙꀋꀮꍈꌟꃅꄹꋍꆿꃹꑉꇬꑉꉆꃅꎍ。ꊿꄹꇬꈍꌺꋋꂷꑠꃅꒆꊭꉩꅹꀿꃚꃀꃚꌠꉬꇚꑴꄷ。
ꀋꂓꑮꄹꉇꌠꀋꃅꆸꈐꎺꇊꐝꄧꀕꑴꌦ。ꑮꃀꌋꆀꀉꁧꌐꃶꐮꂿꈎꀋꉬꄷꀊꑖꄰꉻꇐꇬꄉꁁꑳꂷꋈꄉꑮꌠꉥ,ꑮꃀꑟꇁꋧꌦꆏꉢꇿꌦꄉꏽꃅꉢꂇꁁꑳꈐꏭꑮꃀꂴꆽꑌꄉꑮꃀꀊꏀꀂꏾꇮꌠꇁꉚ。ꑮꃀꀊꏀ——ꉠꀋꂓꂶꌠꏤꏅꄻꈁꑓꇬꉱꄉꇬꀀꎍ,ꉌꌤꑓꀖꀀꀋꉆꐤꁮꇇꏸꌊꌿꇑꈂꑑꃅꈐꏭꄉꏤꏅꇬꌉꐺꌠꉢꂿꇈ,“ꉆꐥꃅꁨꉆꇁ,ꑮꃀꀊꏀꇙꋏꇙꋏꃅꀐꆺ”ꄷꉠꐋꀨꈧꌠꇴꇬꆏ,ꄹꃥꈧꌠꑌꌓꀖꌊ“ꑮꃀꀊꏀꉜꏾꅀ?ꈁꁠꌌꇁꑲꆏꉪꁉꆍꀦꂿ”ꄷꉠꏯꒊꈧ。
ꅻꄏꅍꄚꐏꑋꀕꌋꆀꊁꃅꏸꅐꇁꇬꑲꆀꑮꃀꀂꏾꇮ、ꑮꃀꋙꍈ。ꀀꃀꆏꎭꂵꀑꇢꑌꀕꁳꃅꎻꌠꉥ,ꀑꇢꑌꀕꂶꌠꈾꆭꋍꈓꋦꄌꌊꇁꀋꂓꂴꆽꐕꄉꑖꈈꌺꃅ:“ꇐꇭꀋ,ꄓꇁꉢꅽꀂꏾꇮꂿ”ꄷꇬꆏ,ꉡꑌꁠꄻꀕꃅ:“ꀋꂓꀋ,ꄓꋙꋠꇁꌶ,ꂮꋌꐛꀐꀞ”ꄷ。ꀋꂓꂶꌠꀑꊥꁉꄉꒈꌦꈘꃅꋌꄓꇫꑌꇈꀑꇢꑌꀕꁳꋍꀂꏾꇮꎻ。ꊁꀂꏾꇮꃦꈜꆦꇈꋙꋠꌐꈭꐨꆏ,ꀋꂓꀑꇢꑌꀕꇱꏃꋇꄉꀀꁧꇈ,ꉪꀉꑳꈧꌠꑌꆀꀕꅿꃅꄚꊂꈹꀑꇢꑌꀕꅍꊐꌐꌦ。
ꀑꇢꑌꀕꎺꁯꄔꌊꀋꂓꂶꌠꋌꉜꅷꀑꇬꑞꌦꑭꇬꑞꌦꃅꉜꇎꉜꅗꇁꀋꇮꌠꌡ:“ꇐꇭꀋ,ꅽꀊꂵꑡꄻꆎꍈꄉꆏꇭꀧꑠꃅꒆ,ꅪꁧꑠꃅꎔꇆ?ꍰ,ꑡꍈꆏꈚꑌꉥꑣꅍ,ꎴꁧꈬꄻꆏꇢꄉꇬꑌꋽꏭꐛ”ꄷꇬꆏ,ꀋꂓꆏꑊꏦꌊꒈꌦꃅꀂꏾꈎꇫꑌ。
ꇯꍝꀋꂓꋋꂷꑮꃦꑮꈚꀕꇈꅻꊪꅻꃰꇯꅑꄉꇬꆏꑡꑠꃅꎔꀋꐚ,ꏮꇬꉚꇬꑓꋪꉈꈻꀋꏾ,ꉪꀉꑳꁥꌠꆹꊫꃺꑑꈯꃅꇬꁭꌦꇫꎍꀐ。
ꊁ“ꇪꇭꏃꄤ”ꋠꇈ,ꀊꑖꃀꑘꑋꀊꉗꀋꇢꃅꐮꊂꈹꄚꈴꁧ,ꀉꑳꉬꍈꍸꇈꌠꈍꌺꆹꑠꄮꇬꑲꆀꊯꌕꈎ,ꀊꑱꂶꌠꊰꈎ,ꀉꇤꂶꌠꉆꈓ,ꀈꑘꂶꌠꉬꈎꄉ,ꀈꑘꇂꃴꌺꃄꆜꉬꄷꌕꈎꑠꍈꑌꍸꇈ。
ꀋꂓꃀꑘꌥꅉꇬꇁꈭꐨꆏꀱꀋꁧꃅꑳꑋꀋꃀꂷꐛꀉꑳꋋꈨꀨꎹꇫꐥꇈ。ꃄꆜꍈꌠꆹꀋꂓꀨꎹꎸꀨꎹꆐꀋꉬꃅꀊꑖꑘꑋꊂꈹꁧꀐ。ꀊꋨꄮꇬꊿꌦꎮꈁꍈꑌꀋꊌꄮꇬꉬꄉ,ꀋꂓꂶꌠ“ꏃꄤ”ꇬꄉꑸꑽꑍꇯꋌꄽꌊꇁꇈ,ꁀꇉꄏꍈꌌꑸꑽꀉꒉꑠꑍꂷꋌꌋꄚꊐꌊꃄꆜꎮꈁꃅꎻ,ꋋꄹꉖꋋꆏꀋꋠꃅꀀ。
ꀉꋩꄮꇬꈍꌺꆏꇁꂷꀉꁌꐊꎹꇬꎆꆫ,ꀊꑱꆏꎹꇬꃮꆫ,ꀉꇤꆏꉡꐊꄯꒉꀘ,ꀈꑘꆏꀋꂓꊂꈹꑘꁨꅉꇬꈩꁦꌦꀊꑱꐊꃮꆫꅉꈩꁧꌦꃅ。ꀋꂓꆹꀋꃀꊇꂷꐛꃦꅋꈚꑕꎭꎥꇬꎷꇇꀊꁌꀕꃅꄉꑠꑍꀋꐥ,ꀉꑳꈧꌠꑌꏖꊱꅍꊾꍸꀉꑳꈨꀋꌡ。ꊿꄹꇬꀋꂓꋋꂷꃬꐈꃀꍈꃬꊭꌹꁱꏃꐺꌠꌡꄷ。
ꌺꒆꂓꄡꄸꄷꐯꐤꁮ。ꈍꌺꑌꈍꌺꐯꈍꌺ,ꋌꐥꌠꆗꂷꐛꇁꀋꄐꀐꌠꌡ,ꀒꈓꑌꅉꁙꀕꊂꈎꑌꅉꁙꀕ,ꀋꂓꋍꑊꁦꋠꃌꅿꋒꀋꌡꃅꀋꃀꀉꌺꋒꌡ。ꈍꌺꋋꂷꑊꏦꅑꌠꐛ,ꊾꉻꇯꆏꐯꃪꇁꌠꉬꀋꐚ,ꋍꑍꌠꃅꄜꋙꋠꈭꐨꆏꆫꁯꐱꂪꇬꈶꅉꃅꑠꂷꀵꌊꎆꊂꈹꁧꌦꐥ,ꈊꃀꑌꀀꍹꈻꉏꀋꂪꃅꑴꑆꈬꄌꀄꃹꑐꌊꉪꑷꊂꎆꉻꆸꄜꁦꋠꀞꄂꈧꌠꋑꀀꁧꌦꐥ,ꋍꑋꈓꐛꀐꇬꃆꅉꋍꑍꊒꆽꃅꏮꀋꂓꉜꀋꋻꌦ。ꑠꅹꌠꆗꈧꌠꑌꈍꌺꋋꂷꌌꒊꅍꀖꇬꎷ。
“ꀃ——ꀊ,ꈍꌺ,ꉪꆹꃹꒉꅉꀋꊌꑲꆀꄚꂇꇁꌠ,ꆎꆹꑮꃀꋊꇬꄀꇬꒉꁖꇁꑠꂷꄻꑳꈣꂷꐏꄉꇬꎷ,ꀈꍂꋍꃢꆏꊿꈐꇬꅜꇁꇚꂼ。”
“ꈍꌺ,ꆏꅽꑮꃀꏦꅀꑡꃅꇆ,ꀃꂰꆏꉪꆏꏁꅽꑮꃀꋑꆹ……”
“ꀞꐕ,ꀞꐕ。ꎮꑑꅉꅽꈍꌺꑠꍈꊵꑵꋋꃅꀋꄐꃅꑮꃀꐃꁆꇱꆼꑐꍂꆶꌠꉬ”ꄷꌦ。
“ꀈꍂ,ꈍꌺꀋ,ꆏꇬꀋꄿꀐꇬꉢꁱꆏꁳꂿꍰ……”ꃅꇫꒊꈧꇬꎷ。
ꄚꄉꉎꉐꄹꋍꏿꉉꌦꋍꏿꒈꌦꃅꇬꆏ,ꈍꌺꊿꊇꇱꒊꈧꅷꑳꉨꊿꀸꑲꆀꆏꄉ。
ꌠꆗꀞꄂꈧꌠꂵꆧꆏꉉꌊꑶꋦꀋꁧꈧꌠꇰ,ꑶꋦꀋꁧꈧꌠꈊꃀꀑꈑꈢꆏꉉꌊꑮꃀꈧꌠꇰ。ꑮꃀꈧꌠꂴꆏꅲꏾꌊꁦꋠꁦꎆꉉꑟꉂ,ꄚꁦꋠꈧꌠ“ꇯꍝ,ꅪꎔꅪꄿꑠꂷꄻꈍꌺꁵꄉꁧꈿꀐ”ꄷꇬꆏ,ꑮꃀꈧꌠꉌꉂꃴꆅꌊ:“ꁧꈿꑲꆏꀕꇬꎷꀋꆹꇆ”ꄷꇈ,ꁦꋠꈧꌠꑌꉇꉈꃅ:“ꉡꆹꂯꋋꈨꉪꀐ,ꆏꉢꄛꎼꆹꀊꅲꀐꐛꅹꉬ”ꄸꇈ,ꑮꃀꈧꌠꃃꌦꄉꏽꃅ:“ꁨꄓ,ꀃꂰꀃꂰꀉꄂꃅꁨꎹꆹ”ꄷꊿꊇꇱꎭꋊꁦꋠꏢꁮꄀ,ꁦꋠꈧꌠꀊꅰꌊꀕꄖꌊ:“ꋌꑲꆏꉢꇿꌦꀐ,ꌞꈍꌺꑮꃀꀉꆂꉺꂇꅍꋑꌠꉩꇬꄀꇬꀉꄂꂯꑡꁌꀒ!ꍰ,ꅽꃤꑠꆹꑷꆱꁖꈥꏢꌡ”ꄷꇈ,ꑮꃀꈧꌠꀊꅰꃃꌊꌾꄹꇱꄓꋌꏮꁦꋠꏯꄉꇈ,ꌕꑍꇖꑍꃅꏏꁦꋠꉉꀋꅲ。ꄷꀋꁧꇰꍝꋍꁦꋠꐛꇬꄀꇬꄀꇚꑴꉂ,ꀋꂓꈭꇍꐺꇬꅇꂷꃿꏯꎰꏯꄀꑠꌌꇬꏭꎯꃿꇬꎷ。
ꊁꎭꂵꆿꌺꌋꆀꀋꂓꑋꐮꉂꌠꊿꊇꌋꈭꐨꑲꆀꉌꂵꊼꇅꎌꅉꎍ。ꄷꀋꁧꋋꑵꇬꎴꀊꋨꑵꇬꎴꃅꄉꀋꂓꌋꆀꎭꂵꆿꌺꑋꐮꀋꉂꆸꏦꀕꃅꁈꏂꁈꇭꐯꇯ。
ꅺꌡꇬꋍꃢꆏꀋꂓꌋꆀꎭꂵꊇꌺꑮꃀꑋꄻꎭꂵꆿꌺꇱꄉꀋꆪꉘꁌꈾꆳꁧꎻꌠꉥ,ꂵꆪꆏꎭꂵꊇꌺꑮꃀꀂꎐꆅꑴꄷꁧꇉꌊꋌꀱꀁꇬꃹꁧꄉ,ꀋꂓꌋꆀꎭꂵꆿꌺꑋꀉꄂꈾꆳꌐꀋꄿꄷꌋꐓꇬꑲꆀꇫꅐꇁ。
ꀋꃉꀊꂓꌦꇫꈴꁧꇬꆏꊿꊇꉌꂵꐛꀋꐛꐤꁮ,ꃰꐯꌊꀡꌦꀟꆃꅍꄉꑴꇬ,ꋍꂷꑳꀋꑌꃅꈬꋊꈭꐨꆏꐯꏑꌊꀀꇽꊂꆈꄷꉺꊾꐗꅉꊌꂿꉆꈚꌠꇬꑌꌐ。ꋍꂷꇇꃅꇇꑘꃄꂷꑌꀋꐥ,ꇇꋒꁧꂪꄙꈌꀧꉛꅍꐯꐍꑌꌐ。
ꊾꐗꃅꇴꑍꁙꌠꃴꑐꄹꐯꆼꒆꃅꑆꃴꇉꀕꅉꃹꁧꀐ。
ꐙꃅꃀꇭꂶꌠꌗꏂꁋꄷꇈ:“ꀃ——ꀊ,ꐙꃅꃀꇐꇭꌊꆀꎭꂵꆿꌺꑠꑍꂷꑌ,ꎴꂿꋍꉔꆹꊉꆺꊉꆺꃅꌧꈿꇬꊎꄉꑴꌦ,ꀃꑍꆏꃰꐯꌟꃅꑍꐜꀋꈨꀐꀋꆾ”ꄷ。
“ꃆꅉꂿꃅꁬꌠꌠꇯꆐꋍꑎꎹꇁꌠꉬꐤꁮ,ꎴꂿꋍꉔꆹꃘꇔꏃꇗꈩ,ꃰꁧꋍꄕꑠꈨꎵꇬꊎꄉꇈ,ꆀꑍꆏꃅꊸꄂꀋꅑ,ꃰꑠꄕꑠꈨꋋꇅꃅꐯꌐ。ꋍꑎꋧꃅꆹꋍꁯꃅꀋꋦꑴꇬ,ꏃꃅꉬꉎꆏꋍꁯꋦꁧꄉꇿꌊꃅꊸꀐꌠꀋꇆ。”ꎭꂵꊇꌺꑮꃀꋌꄷ。
“ꌞꃆꅉꈎꁂꂷꀉꄂꉂꑴꌦꌠꀋꂸ……”ꄷ,ꀉꁌꁮꅉꌧꃅꌧ,ꄚꑲꆀꀋꂓꌋꆀꎭꂵꆿꌺꑋꉂꐪꉂꐛꈧꌠꐙꃅꃀꇭꇱꀖꎼꇁ:“ꉡꆹꀑꇬꂪꌐꑡꑌꉢꅉꐚꌐꄹꇆ。ꎴꂿꋍꉔꑌꊿꀀꈭꐨꑲꆀ’ꏶ——’ꃅꀃꈈꁉꈍꉗꏢꐛꇬꊿꇫꈌꀋꐚꇈ,ꇐꇭꆏꑠꄮꇬꑲꆀꀱꇁꎻꀋꈁ,ꀉꑳꈧꌠꆹꃅꀋꃤꌦꇯꆐꀿꃶꅍꀀꁧꀐ,ꑡꂷꉬꀋꐚꀐꉂ,ꉢꎼꊖꑓꇬꈴꄉꆈꇬꆏꃅꁨꀕꇉꁨꇉꃅꄉ。ꊂꈍꉗꏢꐛꇬꑲꆀꇐꇭꂶꌠ‘ꍰ,ꉢꃝꄉꀐ,ꃝꄉꋋꂷꋠ’ꃅꈌꐚ,ꎭꂵꆿꌺꂶꌠꆹꌗꏂꁋꃅ’ꀈꍂ,ꐊꂾꑞꍈꋋꂷꉘꇉꉘꀋꅐꀋ……’,ꉢꎭꂵꆿꌺꁦꋠꄷꑠꂷꆹꂯꊿꁳꌌꈌꐔꑓꍂꀋꎽꀐꇬ……”ꃅꈌꐚ。ꇐꇭꂶꌠꆹ‘ꋌꉬꀋꅲꀞꐕ,ꃅꂯꃅꇫꄉꀐ,ꆏꇿꒉꆏꉢꅽꊂꈹꌦꐥ。ꐒꌊꑞꃅꂯ?ꅅꃅꀸꈻꆼꁠꄉꑲꆀꀉꑷꄹꀋꇿ。ꍰ,ꄻꋂꋐꇬꍀꋠ……’ꃅꈌꐚ。ꎭꂵꆿꌺꄡꇗꌗꏂꁋꃅ‘ꋟꑌꋠꆺꐮꃹꒉꀋꅲꀐꂼ,ꆏꁨꋠ’ꃅꈌꐚ。ꊁꆏꋍꑊꋍꃢꀀꅀꀋꀀꑌꉢꋋꀋꌋ,ꃆꅉꊾꍅꅍꇯꆏꐥꑵꉬꐤꁮ,ꑠꀋꉬꑲꆏꂪꌦꁐꌠꏅꇬꆏꉢꌋꇁꄡꑟꌠ。ꌥꆹꌦꑎꐤꁮ,ꉢꃅꄜꎆꎹꇈꀱꇁꇬꇐꇭꑭꇇꈧꌠꉢꉩꇬꄀꇬꊷꆣꃅꐙꑴꌦꃅꄉ。”
“ꆏꌊꑌꈍꃅꂯꇆ?ꎭꂵꆿꌺꑠꁴꍂꃅꐚꇙ,ꀑꇬꀋꈁꀐꌠꉥ,ꆏꇯꋌꌉꇫꎭꉆꌠꉬ。”
“ꀃꄷꆂ,ꑓꀠꀕꀉꐩꈋꅉꀋꆪꀀꅉꄚꎍꀐꇬ,ꀊꆺꄰꃘꇫꊝꀋꀬꆍꂾꀕꀐ。”
“ꌞꀊꆺꀋꁧꑌꀋꑍꊁꆏꂗꍵꈪꏤꏅꌅꂷꇬꊐꌊꐺꀐꄷ,ꌞꀊꆺꄰꉬꄉꋍꎳꑟꇁꀋꆅ,ꀉꁁꇷꄙꑠꑷꉬꇮꇬꈍꄮꇯꆐꈀꑟꅉꑟꀐꌠ,ꌞꀋꃋꊐꇈꌞꌺꑮꃀꍯꑠꉜꄸꌕꄅꀕꀐꌠꀋꂸ,ꑠꄉꉆꑴꌦꅀ?”
“ꊿꋋꑍꂷꅔꅐꇀꏦꄉꋋꇅꃅꌦꀐꌠꇆ。ꆍꌗꀋꉜꇆ,ꇐꇭꂶꌠꈾꒇꈾꋩꄮꇬꆏꆏꀋꄚꐯꀋꄚꌠꌡ,ꀁꑌꐮꀁꑌꀕꉬꁮꆪꆹꐥꀐꌠ,ꌞꊿꌋꌠꆹꌧꇯꌧꉆꄡꑟꀐ。”
“ꃅꆗꃅꆗ,ꈎꁂꂷꀉꄂꉂꄉꌦꑠꉌꂵꆹꃴꀋꌦꅀꉑ?”
“ꀈꍂꆏ,ꃌꄷꒆꄸꈎꇁꍁꅉꀕꑎꆹ,ꋍꑊꀉꏮꑠꃅꑍꇬꐯꀋꏈꃅꈎꁂꂷꀉꄂꉂꇈꌦꇬꄈꀞꐕ。”
……
ꁦꋠꈨꌠꆹꐙꃅꄰꋍꋉ,ꎭꂵꄰꋍꋉ,ꉪꀊꆺꄰꋍꋉꃅꊾꐗꅉꐮꁬꏂꏪꑠꂷꑌꄉ,ꊾꋲꊿꑞꌟꒉꈨꌠꁳꇢꆣꉉꎻ。ꌟꒉꈧꌠꀉꄂꂱꑱꁁꏯꊋꀋꐛꆸꏦꀕꃅ,ꅻꄏꅍꀑꆊꈩꇫꑌꉬ,ꀊꉘꌠꆗꈧꌠꆹ,ꏤꏅꃭꇁꍔꀏꈈꄉꑬꀜꅍꍮꃅꀕꊸꇬꊾꐗꃅꇴꐯꆼꒆꁧꑍꁙꌠꆫꄉꀋꂓꌋꆀꎭꂵꆿꌺꑋꉂꐪꃆꂮꉪꇰ。
ꄚꄉꏈꇬꆏꈀꄸꉉꆏꈀꄸꑗ。ꉪꆏꐙꃅꄰꏯ“ꆍꀋꃋꉪꌺꉌꀋꃹꐛꅹꃅꍯ,ꀋꂮꆍꏭꁦꎆꀋꉉ,ꊾꁌꌋꆀꑮꈭꑮꎃꌹꌠꈪꉪꁵꇁꇈꉪꌵꉪꏢ。ꂴꋍꏢꉪꌺꋌꊐꇫꎭ,ꊁꋍꏢꌠꋌꉪꀋꃋꑋꅉꇑ,ꉜꄸꌕꄅꃅꉪꊝꌠꉥꀋꌵꀋꉆ”ꄷ;ꎭꂵꄰꏯ“ꃌꍯꑘꃅꉪꄻꉪꅊ,ꄩꄻꀏꋊꀏꄻꄩꋊꈭꐨ,ꉪꀊꃋꊐꃆꂮꉪꌵꉪꏢ,ꉪꄻꉪꐛ,ꄡꇗꄩꄻꀏꋊ,ꀏꄻꄩꋊꑲꆀꄿ”ꄷ。ꐙꃅꄰꄹꇬ:“ꈁꃅꈁꑽꌠꎭꂵꆿꌺ,ꐙꃅꀊꆺꑍꁯꋓꄉꎭꂵꄰꏯꄉꄡꑟ,ꆍꂾꆏꑠꌊꉪꉉꇁ。ꑠꃅꑲꆏꉪꀋꃋꄈꌦꆍꅍꎍꀐꌠꉥ,ꉪꄈꆍꀋꄝꀐ”ꄷꇌꁍꎼꀱꇌꅲꇬꀕꋦꇫꎍ。ꎭꂵꄰꄹꇫꑌ:“ꂴꋍꏢꌠꐙꃅꄰꌺꂘꇖꂘꄸ,ꊂꋍꏢꌠꀊꆺꄰꃌꌋꃌꀋꍅꌊ,ꉪꄉꐙꃅꃀꇐꇭꇱꉮꆈꒀꀕꀐ,ꉪꄉꆍꑍꁯꅍꊾꐇꎹꌠꉬ”ꄷ。ꃣꈌꄖꂿꃅꉚ,ꉉꀨꉉꆷꇫꀋꐥ,ꌞꊿꇢꊭꉉꈨꌠꀉꄂꈌꃴꉐꃴꋩ。
ꊁꆏ“ꀊꃉꊿꑍꂷꌠꆹꌦꈢꋒꀐ,ꆍꌕꁯꆹꈾꀋꋠꃮꐯꍀ,ꋍꁯꑌꀋꅑ,ꋍꁯꑌꀋꅺ,ꏇꅉꂷꇬꀋꐛꀐꌠ。ꑳꂶꌠꄈꁴꍂꑳꐛꀀꀋꉆꀐꌠꉥ,ꎭꂵꄰꁳꑲꂷꋉꀊꆺꄰꀉꑳꈧꌠꀀꎻꇈ,ꃣꈌꄚꄉꌐꇧꎭ,ꈀꄸꑌꆽꁏꀋꉆ”ꄷꌦꋲꇌꎸꃅꐊꂾꑢꍈꉉꂱꑱꅉꎭꇈ,ꎦꈨꅥꌊꐯꄎ。
ꀈꈥꎧꅥꐯꄎꄷꉬ,ꈀꋩꑌꉌꃀꒉꏂꀋꋒ。ꋍꈬꐨꆏꐙꃅꎭꂵꉪꌕꁯꐮꀋꎼꀋꈴꀐ。ꐙꃅꄰꆹꂯꈜꎴꅉꀀꄉꂿꇁꈧꄮꁨ。ꎭꂵꉪꑍꁯꆹꑍꇱꈤꌋꇯꆫꑴꇬ,ꋍꈭꐨꆏꐮꋒꇁꇬꇵꆹꎎꀉꁁꄀꌊꂱꑱꈁꌒꈴ。ꀉꁁꈨꌠꆹꂯꌁꌦꐥꀐꇬ,ꉠꀉꂿꂶꌠꀉꄂꈍꏯꑌꀋꉬꃅꇢꆣꄉꐤꎭ。
ꊁ“ꊉꉸꄊꇝꂱ”ꆳꏂꁎꄮꇫꆏ,ꀋꂓꌋꆀꎭꂵꆿꌺꑋꌦꋋꄹꉖꒉꌊꐊꂾꑢꍈꋑꄉꀃꑊꐮꄹꐛꂯꄷꇖꂟꇬꆏ,“ꎭꂵꆿꌺꆏꃆꅉꊿꐙꏭꀋꐛ,ꑡꆏꃅꑌꇇꀋꏢ。ꉡꆹꌞꀋꃋꊐꇈꌞꑮꃀꍯꑠꂿꄷꀋꁧꈨꇯꈨꀋꋻ,ꑠꉢꋋꈌꁧꑲꀋꌧ。ꉈꑴꌞꊿꄹꇬꉼꊞꎹꎆꋚꑌꀉꑌꈨꆏꋟꄉꃅ。ꀋꃉ‘ꌧꏾꇪꊞꄐ’ꇁꂯꄉꀐ,ꑠꄮꇬꆏꀕꂿꇎꌠꆏꂿꇁꅉꈫ”ꄷꈌꊨꃅꐊꂾꑢꍈꇱꊨꎼꇁꇈ,ꐬꆠꌊꌦꌠꉬꑴꄷ;ꉈꑴꆏꃣꈌꉉꄮꇬꀊꆺꄰꏯꅑꄉꑲꂷꄻꀒꁳꋉꎻꀐꄷ,ꐊꂾꑢꍈ“ꉼꊉꀖ”ꌌꄳꐳꄮꇬꆏ,ꄚꎴꄉꎭꂵꄰꌳꃈꅮꈧꌠꇱꌌꐱꈬꇓꌺꊐꅗ。
ꇯꍝꀋꂓꌋꆀꎭꂵꆿꌺꑋꌦꊂꀊꉗꀋꐛꇫꆏ,“ꌧꏾ”ꇪꊞꄐꑟꇁꇈ,ꌟꒉꀉꑳꇱꋓꇅꈪꇿꈴꄿꂿ“ꇪꊞꄐ——ꑣꇬꇁ——”ꃅꃙꏦꈺꄉꑵꉙꑠꂷꑵꇬꎷ。ꋋꃢꇬꊿꃅꑽꏿꑠꀉꑌꈨꌌꉈꈽ。ꊿꄹꇬ,ꎭꂵꆿꌺꑌꀋꌦꇮꇬꆹꋍꃚꅿꀐꌠꉬꄷ。
ꈤꋊꊁꆏꉠꁸꎁꍇꌠꌋꆀꈍꌺꁸꎁꍇꌠꐯꇯꉢꄟꌊꎆꆫꅉꇬꈍꌺꊂꁧ。ꇱꋓꊾꐗꅉꊌꂿꉆꑠꍈꇫꆏꈍꌺꂶꌠꃭꇁꁓꋩꀋꂓꄻꇬꇢꄉꍇꌠꆙꌊꀑꈑꄉꀱꂣꉌꂵꊖꋒꑕꇬꀀ。ꎆꈧꌠ“ꇻꀕ”ꃅꏜꋠꋍꈭꋍꇍꐺꄉꉢꇁꋍꋑꑟꌠꋌꋋꀋꌋꐤꁮ,ꌨꈓꌨꈓꃅꑳꉨꇬꀀꇈ。
“ꋌꂯꆏꉌꀋꃹꃅꎭꂵꆿꌺꈿꄉꌦꀐꇬ,ꑡꉩꀒ?ꄓꄉꎸꋠ。”ꉢꋍꀂꏾꇬꊎꀍꉀꆷꆽꆷꀋꄿ。ꊁꆏꋋꄉꇨꇅꃃꌊ:“ꆏꑣꏾꀐꇬꁨꑣ,ꑡꂷꉥꅳꀧꈢ”ꄷꑓꂷꅪꌊꉠꏯꄉ。ꉡꑌꀈꈥꈌꇨꏗꌊꑠꃅꉇꌠꄸ,ꇿꌋꆺꐮꊰꑴꌦꂯ。ꊁꆏꉣꑊꁸꎁꌹꌠꐯꇯꉢꄻꎆꆫꀉꑳꈧꌠꍈꇫꎭ。
ꀋꉊꊂꑲꆀꈍꌺꂶꌠꌧꈿꇬꆏ:“ꀈꍂ,ꉈꏠꐛꅹꄸ,ꉠꀉꂿꀊꋩꄹꉇꆀꌦꌠꅊꇉ”ꃅꉉꇈ,ꊿꋌꊏꌊ“ꎓ——”ꃅꒉꌐ。
ꊂꊾꐗꈧꌠꉉꇬ,ꀋꂓꀃꃀꇫꄉꋍꑵꂷ“ꀧ”ꋍꀑꈑꈪꅞꄷ。ꊿꄹꇬꈍꃅꑌꌹꂷꉬꏭꐛꄷ。
ꀉꑳꋋꂷꆹꐥꑲꆏ,ꑍꊏꇕꉬꈎꇈꑮꃀꑌꑮꄉꀐꋭ,ꄷꀋꁧꀉꑳꑍꍈꌕꍈꀉꄉꉬꇬꂯꌬꀋꄿ。
ꊁꆏꎭꂵꃅꇫꑮꃀꂶꌠꀿꑳꆹꃆꃅꌦꇈ,ꑠꃅꌦꋋꑵꑊꋌꐛꁧꑵꉬꌠꉥ,ꀘꂾꇫꎭꑲꆀꍑꄷꄉ,ꎭꂵꆿꌺꂷꅍꈻꇬꇯꄉꃺꃀꀁꑳꑋꐯꇯꀘꌊꃪꃹꊐꇫꎭꀐ。
ꀋꂓꑌꂴꆹꊿꇧꊂꄴꋖꑠꀋꐥ,ꄚꏂꑌꋍꈓꆏ“ꃀꑊꋌꆽꏻꏣꀨꌌꑠꂷꐙꃅꅍꋊꀐ”ꄸꌦ,“ꈍꌺꅍꋊꀐ”ꄷꌦꃅꑠꈨꇫꈌꐚꇁ;ꊿꈊꄮꃀꎆꐏꋚꐍꌠꄹꇬꑌ,ꀒꀋꂓꐗꃝꈭꀕꇍꀕꐺꇬꆧꁨꇂꃴꄉ“ꀋꃋꌺꀒꁙꉿꃅꑠꂷꑳꉨꇫꑌ”ꑴꄷꑠꈨꑌꉉꐺꌦꄉ,ꊿꃱꀋꐚꑠꁥꐬꆠꇧꈯꋧꅸꐺ。ꈍꌺꌋꆀꋍꀑꑌꈧꌠꃅꐎꑍꊏꈎꎖꐮꅍꀋꎼꀋꈴꈭꐨꑲꆀ,ꈀꄸꑌꐯꇯꋧꄉ“ꃀꑊꋌ”ꋋꂷꉻꏂꇧꎭꂿꄷꄉ,ꀱꐮꋯꐮꒉꌊꀋꂓꂶꌠꂷꅍꊿꊇꈻꈌꀞꂷꁍꎼꏢꇬꇱꄉꆀꐪꀘꇈ,ꅤꃅꐬꇬꊐꇧꎭ,ꐗꃝꂶꌠꑌꊿꊈꇱꊨꇈꇷꌊꒉꇬꇱꇧꎭꀐ。
ꋍꈬꐨꆏꌠꑊꀘꂾꇬꀋꋊꀐ,ꊿꈊꄮꃀꄚꎻꈴꐺꌠꑌ“ꑊꋌꐥ”ꅐꆠꏭꀋꉉꀐꑴꄷ。ꀋꂓꐗꅉꈚꌠꇬꆳꃰꈧꌠꀉꄂꄡꇗꋍꈓꋒꀋꋒꃅꍵꄮꐰꆏꃨꁯꅩꇬꀕ,ꐛꑿꑌꄚꊐꇖ,ꁯꆮꑌꄚꃰꐺꇬꎷꑴꄷ。ꄚ,ꋋꈨꑠꆏ,ꑊꋌꑵꆹꀋꐥꑴꇬ,ꂿꑘꁡꇤꑠꇬꄡꇗꊿꌦꑇꌊꑆꈨꐥꑴꌦꌠꁮꅉꉬꌠ。
ꑠꄮꇬꆏꊿꋋꑍꂷꊿꉜꇬꀋꋪꀕꃅꐙꀐꐥꁮ,ꄚꈀꄸꑌꈌꋊꀋꀬ。ꎭꂵꆿꌺꄰꑭꊂꊿꐲꀉꇨꑷꉬꄉ,ꈀꄸꑌꋍꀑꋌꌌꊿꀸꇀꏦ。
ꉠꀉꂿꑌꋌꉜꇬ“ꉐꆈꀉꐚꃮꄟꄸ,ꇌꆈꁍꎼꉇꄟꄸ”ꐤꁮ,ꄚꈍꏯꑌꉉꀋꌒꌊꐙꃅꃀꇭꏭ:“ꋍꃀꇭꀋ,ꉪꆹꀀꁈꀉꁧꐛꄉ,ꈂꏽꈁꏾꃅꐯꉇꀋꉆꀐ,ꆎꄉꂴꋍꏢꌠꀐꇬꀿꃅꋍꈚꇁꌠꐛ,ꉈꑴꆏꃷꇎꀋꃀꉌꂵꐮꄉꋌꑵꅇꉉꐮꇬꇉꃹꅲꑵꉬꌠꉥ,ꈀꎭꀕꆏꑴꌠꇓꂵꉅꂴꅥꅉꃅꄉꅊꇈ”ꄷꉉꇈ。
ꐙꃅꃀꇭꑌꊒꆽꀕꃅꆹꉉꀋꉆꄉꁦꏮꇈꏮꃅ:“ꇐꇭꀋ,ꀋꂮꀉꑳꀵꇗꌧꐛꋋꈨꆏꀨꎹꌊꊾꒆꊿꐙꂯꄉꀐ。ꈍꌺꑌꒆꊭꉩꑴꇬꌺꃰꋋꑵꆹꋍꈓꀉꄂꃅꒆꆹꑟꑵꄸ,ꋌꉈꆏꆎꄈꐥꌒꇁꀐꌠꉬ。ꀃ——ꀊ,ꀊꆺꃅꑖꑠꑷꑌꅽꑠꂷꀋꉬꇮꇬꈍꃅꂯꀋꆾ”ꄷꉉ。
ꇯꍝꑌꋋꈨ,ꀋꂓꀋꉬꇮꇬꆹꀊꑖꄰꌺꍸꇖꇜꋋꈨꌕꀥꃘꈜꃰ,ꋍꂷꋍꄷꃅꌞꀑꑊꉜꄉꐥꁧꌐꀐꌠ。
ꀊꑖꄰꀋꉊꂴꆽꆹ,ꊼꇅꋙꋠꒉꅝꇎꄷꑵꌠ,“ꌟꃅꃨꈹꃝꌠꐥ,ꌠꋋꅥꄰꃝꌠꐥ”,ꀒꑍꁯꆏ“ꌠꐧꏣꉂꃝ”ꌠꉬꑴꄷ,“ꂛꊨꅫꃀꃝ,ꈴꁱꋐꒉꃝ”ꌠꉬꑴꄷ,ꈍꌺꆪꐛꇬꆏꀑꑌꄰꀋꃋꀋꂓꇐꇭꊿꊇꈌꄀꄉ。ꊁꉼꊞꎹꄻꇁꀐ,ꎆꋚꉬꇮꏮꎹꇬꇱꐮꀐꃅꈨꇬꆏ,ꇧꍻꇧꆽꑮꈎꑟꈎꉬꀋꉬꑠꈨꑌꀋꌋꃅꌺꑮꃀꋇꑍꁯꇱꃛꊸꌊꇫꄉꑮ。ꀊꋩꄹꈎꀋꂓꆹꊰꑋꈓꄉ,ꈍꌺꆹꊰꈎꄉ。
ꀋꂓꋋꂷꀉꄉꀉꂿꃅꌦꏜꄉꌕꈎꃅꍸꀊꂵꇱꇈ,ꋌꃆꅉꋍꑵꋋꂨꌠꀉꏮꍢꅝꅍꊾꍸꀉꑳꂷꄷꊿꋌꀋꑇ,ꈍꌺꆹꀊꑙꀋꀮꍈꌟꃅꄹꋍꆿꃹꑉꇬꑉꉆꃅꎍ。ꊿꄹꇬꈍꌺꋋꂷꑠꃅꒆꊭꉩꅹꀿꃚꃀꃚꌠꉬꇚꑴꄷ。
ꀋꂓꑮꄹꉇꌠꀋꃅꆸꈐꎺꇊꐝꄧꀕꑴꌦ。ꑮꃀꌋꆀꀉꁧꌐꃶꐮꂿꈎꀋꉬꄷꀊꑖꄰꉻꇐꇬꄉꁁꑳꂷꋈꄉꑮꌠꉥ,ꑮꃀꑟꇁꋧꌦꆏꉢꇿꌦꄉꏽꃅꉢꂇꁁꑳꈐꏭꑮꃀꂴꆽꑌꄉꑮꃀꀊꏀꀂꏾꇮꌠꇁꉚ。ꑮꃀꀊꏀ——ꉠꀋꂓꂶꌠꏤꏅꄻꈁꑓꇬꉱꄉꇬꀀꎍ,ꉌꌤꑓꀖꀀꀋꉆꐤꁮꇇꏸꌊꌿꇑꈂꑑꃅꈐꏭꄉꏤꏅꇬꌉꐺꌠꉢꂿꇈ,“ꉆꐥꃅꁨꉆꇁ,ꑮꃀꀊꏀꇙꋏꇙꋏꃅꀐꆺ”ꄷꉠꐋꀨꈧꌠꇴꇬꆏ,ꄹꃥꈧꌠꑌꌓꀖꌊ“ꑮꃀꀊꏀꉜꏾꅀ?ꈁꁠꌌꇁꑲꆏꉪꁉꆍꀦꂿ”ꄷꉠꏯꒊꈧ。
ꅻꄏꅍꄚꐏꑋꀕꌋꆀꊁꃅꏸꅐꇁꇬꑲꆀꑮꃀꀂꏾꇮ、ꑮꃀꋙꍈ。ꀀꃀꆏꎭꂵꀑꇢꑌꀕꁳꃅꎻꌠꉥ,ꀑꇢꑌꀕꂶꌠꈾꆭꋍꈓꋦꄌꌊꇁꀋꂓꂴꆽꐕꄉꑖꈈꌺꃅ:“ꇐꇭꀋ,ꄓꇁꉢꅽꀂꏾꇮꂿ”ꄷꇬꆏ,ꉡꑌꁠꄻꀕꃅ:“ꀋꂓꀋ,ꄓꋙꋠꇁꌶ,ꂮꋌꐛꀐꀞ”ꄷ。ꀋꂓꂶꌠꀑꊥꁉꄉꒈꌦꈘꃅꋌꄓꇫꑌꇈꀑꇢꑌꀕꁳꋍꀂꏾꇮꎻ。ꊁꀂꏾꇮꃦꈜꆦꇈꋙꋠꌐꈭꐨꆏ,ꀋꂓꀑꇢꑌꀕꇱꏃꋇꄉꀀꁧꇈ,ꉪꀉꑳꈧꌠꑌꆀꀕꅿꃅꄚꊂꈹꀑꇢꑌꀕꅍꊐꌐꌦ。
ꀑꇢꑌꀕꎺꁯꄔꌊꀋꂓꂶꌠꋌꉜꅷꀑꇬꑞꌦꑭꇬꑞꌦꃅꉜꇎꉜꅗꇁꀋꇮꌠꌡ:“ꇐꇭꀋ,ꅽꀊꂵꑡꄻꆎꍈꄉꆏꇭꀧꑠꃅꒆ,ꅪꁧꑠꃅꎔꇆ?ꍰ,ꑡꍈꆏꈚꑌꉥꑣꅍ,ꎴꁧꈬꄻꆏꇢꄉꇬꑌꋽꏭꐛ”ꄷꇬꆏ,ꀋꂓꆏꑊꏦꌊꒈꌦꃅꀂꏾꈎꇫꑌ。
ꇯꍝꀋꂓꋋꂷꑮꃦꑮꈚꀕꇈꅻꊪꅻꃰꇯꅑꄉꇬꆏꑡꑠꃅꎔꀋꐚ,ꏮꇬꉚꇬꑓꋪꉈꈻꀋꏾ,ꉪꀉꑳꁥꌠꆹꊫꃺꑑꈯꃅꇬꁭꌦꇫꎍꀐ。
ꊁ“ꇪꇭꏃꄤ”ꋠꇈ,ꀊꑖꃀꑘꑋꀊꉗꀋꇢꃅꐮꊂꈹꄚꈴꁧ,ꀉꑳꉬꍈꍸꇈꌠꈍꌺꆹꑠꄮꇬꑲꆀꊯꌕꈎ,ꀊꑱꂶꌠꊰꈎ,ꀉꇤꂶꌠꉆꈓ,ꀈꑘꂶꌠꉬꈎꄉ,ꀈꑘꇂꃴꌺꃄꆜꉬꄷꌕꈎꑠꍈꑌꍸꇈ。
ꀋꂓꃀꑘꌥꅉꇬꇁꈭꐨꆏꀱꀋꁧꃅꑳꑋꀋꃀꂷꐛꀉꑳꋋꈨꀨꎹꇫꐥꇈ。ꃄꆜꍈꌠꆹꀋꂓꀨꎹꎸꀨꎹꆐꀋꉬꃅꀊꑖꑘꑋꊂꈹꁧꀐ。ꀊꋨꄮꇬꊿꌦꎮꈁꍈꑌꀋꊌꄮꇬꉬꄉ,ꀋꂓꂶꌠ“ꏃꄤ”ꇬꄉꑸꑽꑍꇯꋌꄽꌊꇁꇈ,ꁀꇉꄏꍈꌌꑸꑽꀉꒉꑠꑍꂷꋌꌋꄚꊐꌊꃄꆜꎮꈁꃅꎻ,ꋋꄹꉖꋋꆏꀋꋠꃅꀀ。
ꀉꋩꄮꇬꈍꌺꆏꇁꂷꀉꁌꐊꎹꇬꎆꆫ,ꀊꑱꆏꎹꇬꃮꆫ,ꀉꇤꆏꉡꐊꄯꒉꀘ,ꀈꑘꆏꀋꂓꊂꈹꑘꁨꅉꇬꈩꁦꌦꀊꑱꐊꃮꆫꅉꈩꁧꌦꃅ。ꀋꂓꆹꀋꃀꊇꂷꐛꃦꅋꈚꑕꎭꎥꇬꎷꇇꀊꁌꀕꃅꄉꑠꑍꀋꐥ,ꀉꑳꈧꌠꑌꏖꊱꅍꊾꍸꀉꑳꈨꀋꌡ。ꊿꄹꇬꀋꂓꋋꂷꃬꐈꃀꍈꃬꊭꌹꁱꏃꐺꌠꌡꄷ。
ꌺꒆꂓꄡꄸꄷꐯꐤꁮ。ꈍꌺꑌꈍꌺꐯꈍꌺ,ꋌꐥꌠꆗꂷꐛꇁꀋꄐꀐꌠꌡ,ꀒꈓꑌꅉꁙꀕꊂꈎꑌꅉꁙꀕ,ꀋꂓꋍꑊꁦꋠꃌꅿꋒꀋꌡꃅꀋꃀꀉꌺꋒꌡ。ꈍꌺꋋꂷꑊꏦꅑꌠꐛ,ꊾꉻꇯꆏꐯꃪꇁꌠꉬꀋꐚ,ꋍꑍꌠꃅꄜꋙꋠꈭꐨꆏꆫꁯꐱꂪꇬꈶꅉꃅꑠꂷꀵꌊꎆꊂꈹꁧꌦꐥ,ꈊꃀꑌꀀꍹꈻꉏꀋꂪꃅꑴꑆꈬꄌꀄꃹꑐꌊꉪꑷꊂꎆꉻꆸꄜꁦꋠꀞꄂꈧꌠꋑꀀꁧꌦꐥ,ꋍꑋꈓꐛꀐꇬꃆꅉꋍꑍꊒꆽꃅꏮꀋꂓꉜꀋꋻꌦ。ꑠꅹꌠꆗꈧꌠꑌꈍꌺꋋꂷꌌꒊꅍꀖꇬꎷ。
“ꀃ——ꀊ,ꈍꌺ,ꉪꆹꃹꒉꅉꀋꊌꑲꆀꄚꂇꇁꌠ,ꆎꆹꑮꃀꋊꇬꄀꇬꒉꁖꇁꑠꂷꄻꑳꈣꂷꐏꄉꇬꎷ,ꀈꍂꋍꃢꆏꊿꈐꇬꅜꇁꇚꂼ。”
“ꈍꌺ,ꆏꅽꑮꃀꏦꅀꑡꃅꇆ,ꀃꂰꆏꉪꆏꏁꅽꑮꃀꋑꆹ……”
“ꀞꐕ,ꀞꐕ。ꎮꑑꅉꅽꈍꌺꑠꍈꊵꑵꋋꃅꀋꄐꃅꑮꃀꐃꁆꇱꆼꑐꍂꆶꌠꉬ”ꄷꌦ。
“ꀈꍂ,ꈍꌺꀋ,ꆏꇬꀋꄿꀐꇬꉢꁱꆏꁳꂿꍰ……”ꃅꇫꒊꈧꇬꎷ。
ꄚꄉꉎꉐꄹꋍꏿꉉꌦꋍꏿꒈꌦꃅꇬꆏ,ꈍꌺꊿꊇꇱꒊꈧꅷꑳꉨꊿꀸꑲꆀꆏꄉ。
ꌠꆗꀞꄂꈧꌠꂵꆧꆏꉉꌊꑶꋦꀋꁧꈧꌠꇰ,ꑶꋦꀋꁧꈧꌠꈊꃀꀑꈑꈢꆏꉉꌊꑮꃀꈧꌠꇰ。ꑮꃀꈧꌠꂴꆏꅲꏾꌊꁦꋠꁦꎆꉉꑟꉂ,ꄚꁦꋠꈧꌠ“ꇯꍝ,ꅪꎔꅪꄿꑠꂷꄻꈍꌺꁵꄉꁧꈿꀐ”ꄷꇬꆏ,ꑮꃀꈧꌠꉌꉂꃴꆅꌊ:“ꁧꈿꑲꆏꀕꇬꎷꀋꆹꇆ”ꄷꇈ,ꁦꋠꈧꌠꑌꉇꉈꃅ:“ꉡꆹꂯꋋꈨꉪꀐ,ꆏꉢꄛꎼꆹꀊꅲꀐꐛꅹꉬ”ꄸꇈ,ꑮꃀꈧꌠꃃꌦꄉꏽꃅ:“ꁨꄓ,ꀃꂰꀃꂰꀉꄂꃅꁨꎹꆹ”ꄷꊿꊇꇱꎭꋊꁦꋠꏢꁮꄀ,ꁦꋠꈧꌠꀊꅰꌊꀕꄖꌊ:“ꋌꑲꆏꉢꇿꌦꀐ,ꌞꈍꌺꑮꃀꀉꆂꉺꂇꅍꋑꌠꉩꇬꄀꇬꀉꄂꂯꑡꁌꀒ!ꍰ,ꅽꃤꑠꆹꑷꆱꁖꈥꏢꌡ”ꄷꇈ,ꑮꃀꈧꌠꀊꅰꃃꌊꌾꄹꇱꄓꋌꏮꁦꋠꏯꄉꇈ,ꌕꑍꇖꑍꃅꏏꁦꋠꉉꀋꅲ。ꄷꀋꁧꇰꍝꋍꁦꋠꐛꇬꄀꇬꄀꇚꑴꉂ,ꀋꂓꈭꇍꐺꇬꅇꂷꃿꏯꎰꏯꄀꑠꌌꇬꏭꎯꃿꇬꎷ。
ꊁꎭꂵꆿꌺꌋꆀꀋꂓꑋꐮꉂꌠꊿꊇꌋꈭꐨꑲꆀꉌꂵꊼꇅꎌꅉꎍ。ꄷꀋꁧꋋꑵꇬꎴꀊꋨꑵꇬꎴꃅꄉꀋꂓꌋꆀꎭꂵꆿꌺꑋꐮꀋꉂꆸꏦꀕꃅꁈꏂꁈꇭꐯꇯ。
ꅺꌡꇬꋍꃢꆏꀋꂓꌋꆀꎭꂵꊇꌺꑮꃀꑋꄻꎭꂵꆿꌺꇱꄉꀋꆪꉘꁌꈾꆳꁧꎻꌠꉥ,ꂵꆪꆏꎭꂵꊇꌺꑮꃀꀂꎐꆅꑴꄷꁧꇉꌊꋌꀱꀁꇬꃹꁧꄉ,ꀋꂓꌋꆀꎭꂵꆿꌺꑋꀉꄂꈾꆳꌐꀋꄿꄷꌋꐓꇬꑲꆀꇫꅐꇁ。
ꀋꃉꀊꂓꌦꇫꈴꁧꇬꆏꊿꊇꉌꂵꐛꀋꐛꐤꁮ,ꃰꐯꌊꀡꌦꀟꆃꅍꄉꑴꇬ,ꋍꂷꑳꀋꑌꃅꈬꋊꈭꐨꆏꐯꏑꌊꀀꇽꊂꆈꄷꉺꊾꐗꅉꊌꂿꉆꈚꌠꇬꑌꌐ。ꋍꂷꇇꃅꇇꑘꃄꂷꑌꀋꐥ,ꇇꋒꁧꂪꄙꈌꀧꉛꅍꐯꐍꑌꌐ。
ꊾꐗꃅꇴꑍꁙꌠꃴꑐꄹꐯꆼꒆꃅꑆꃴꇉꀕꅉꃹꁧꀐ。
ꐙꃅꃀꇭꂶꌠꌗꏂꁋꄷꇈ:“ꀃ——ꀊ,ꐙꃅꃀꇐꇭꌊꆀꎭꂵꆿꌺꑠꑍꂷꑌ,ꎴꂿꋍꉔꆹꊉꆺꊉꆺꃅꌧꈿꇬꊎꄉꑴꌦ,ꀃꑍꆏꃰꐯꌟꃅꑍꐜꀋꈨꀐꀋꆾ”ꄷ。
“ꃆꅉꂿꃅꁬꌠꌠꇯꆐꋍꑎꎹꇁꌠꉬꐤꁮ,ꎴꂿꋍꉔꆹꃘꇔꏃꇗꈩ,ꃰꁧꋍꄕꑠꈨꎵꇬꊎꄉꇈ,ꆀꑍꆏꃅꊸꄂꀋꅑ,ꃰꑠꄕꑠꈨꋋꇅꃅꐯꌐ。ꋍꑎꋧꃅꆹꋍꁯꃅꀋꋦꑴꇬ,ꏃꃅꉬꉎꆏꋍꁯꋦꁧꄉꇿꌊꃅꊸꀐꌠꀋꇆ。”ꎭꂵꊇꌺꑮꃀꋌꄷ。
“ꌞꃆꅉꈎꁂꂷꀉꄂꉂꑴꌦꌠꀋꂸ……”ꄷ,ꀉꁌꁮꅉꌧꃅꌧ,ꄚꑲꆀꀋꂓꌋꆀꎭꂵꆿꌺꑋꉂꐪꉂꐛꈧꌠꐙꃅꃀꇭꇱꀖꎼꇁ:“ꉡꆹꀑꇬꂪꌐꑡꑌꉢꅉꐚꌐꄹꇆ。ꎴꂿꋍꉔꑌꊿꀀꈭꐨꑲꆀ’ꏶ——’ꃅꀃꈈꁉꈍꉗꏢꐛꇬꊿꇫꈌꀋꐚꇈ,ꇐꇭꆏꑠꄮꇬꑲꆀꀱꇁꎻꀋꈁ,ꀉꑳꈧꌠꆹꃅꀋꃤꌦꇯꆐꀿꃶꅍꀀꁧꀐ,ꑡꂷꉬꀋꐚꀐꉂ,ꉢꎼꊖꑓꇬꈴꄉꆈꇬꆏꃅꁨꀕꇉꁨꇉꃅꄉ。ꊂꈍꉗꏢꐛꇬꑲꆀꇐꇭꂶꌠ‘ꍰ,ꉢꃝꄉꀐ,ꃝꄉꋋꂷꋠ’ꃅꈌꐚ,ꎭꂵꆿꌺꂶꌠꆹꌗꏂꁋꃅ’ꀈꍂ,ꐊꂾꑞꍈꋋꂷꉘꇉꉘꀋꅐꀋ……’,ꉢꎭꂵꆿꌺꁦꋠꄷꑠꂷꆹꂯꊿꁳꌌꈌꐔꑓꍂꀋꎽꀐꇬ……”ꃅꈌꐚ。ꇐꇭꂶꌠꆹ‘ꋌꉬꀋꅲꀞꐕ,ꃅꂯꃅꇫꄉꀐ,ꆏꇿꒉꆏꉢꅽꊂꈹꌦꐥ。ꐒꌊꑞꃅꂯ?ꅅꃅꀸꈻꆼꁠꄉꑲꆀꀉꑷꄹꀋꇿ。ꍰ,ꄻꋂꋐꇬꍀꋠ……’ꃅꈌꐚ。ꎭꂵꆿꌺꄡꇗꌗꏂꁋꃅ‘ꋟꑌꋠꆺꐮꃹꒉꀋꅲꀐꂼ,ꆏꁨꋠ’ꃅꈌꐚ。ꊁꆏꋍꑊꋍꃢꀀꅀꀋꀀꑌꉢꋋꀋꌋ,ꃆꅉꊾꍅꅍꇯꆏꐥꑵꉬꐤꁮ,ꑠꀋꉬꑲꆏꂪꌦꁐꌠꏅꇬꆏꉢꌋꇁꄡꑟꌠ。ꌥꆹꌦꑎꐤꁮ,ꉢꃅꄜꎆꎹꇈꀱꇁꇬꇐꇭꑭꇇꈧꌠꉢꉩꇬꄀꇬꊷꆣꃅꐙꑴꌦꃅꄉ。”
“ꆏꌊꑌꈍꃅꂯꇆ?ꎭꂵꆿꌺꑠꁴꍂꃅꐚꇙ,ꀑꇬꀋꈁꀐꌠꉥ,ꆏꇯꋌꌉꇫꎭꉆꌠꉬ。”
“ꀃꄷꆂ,ꑓꀠꀕꀉꐩꈋꅉꀋꆪꀀꅉꄚꎍꀐꇬ,ꀊꆺꄰꃘꇫꊝꀋꀬꆍꂾꀕꀐ。”
“ꌞꀊꆺꀋꁧꑌꀋꑍꊁꆏꂗꍵꈪꏤꏅꌅꂷꇬꊐꌊꐺꀐꄷ,ꌞꀊꆺꄰꉬꄉꋍꎳꑟꇁꀋꆅ,ꀉꁁꇷꄙꑠꑷꉬꇮꇬꈍꄮꇯꆐꈀꑟꅉꑟꀐꌠ,ꌞꀋꃋꊐꇈꌞꌺꑮꃀꍯꑠꉜꄸꌕꄅꀕꀐꌠꀋꂸ,ꑠꄉꉆꑴꌦꅀ?”
“ꊿꋋꑍꂷꅔꅐꇀꏦꄉꋋꇅꃅꌦꀐꌠꇆ。ꆍꌗꀋꉜꇆ,ꇐꇭꂶꌠꈾꒇꈾꋩꄮꇬꆏꆏꀋꄚꐯꀋꄚꌠꌡ,ꀁꑌꐮꀁꑌꀕꉬꁮꆪꆹꐥꀐꌠ,ꌞꊿꌋꌠꆹꌧꇯꌧꉆꄡꑟꀐ。”
“ꃅꆗꃅꆗ,ꈎꁂꂷꀉꄂꉂꄉꌦꑠꉌꂵꆹꃴꀋꌦꅀꉑ?”
“ꀈꍂꆏ,ꃌꄷꒆꄸꈎꇁꍁꅉꀕꑎꆹ,ꋍꑊꀉꏮꑠꃅꑍꇬꐯꀋꏈꃅꈎꁂꂷꀉꄂꉂꇈꌦꇬꄈꀞꐕ。”
……
ꁦꋠꈨꌠꆹꐙꃅꄰꋍꋉ,ꎭꂵꄰꋍꋉ,ꉪꀊꆺꄰꋍꋉꃅꊾꐗꅉꐮꁬꏂꏪꑠꂷꑌꄉ,ꊾꋲꊿꑞꌟꒉꈨꌠꁳꇢꆣꉉꎻ。ꌟꒉꈧꌠꀉꄂꂱꑱꁁꏯꊋꀋꐛꆸꏦꀕꃅ,ꅻꄏꅍꀑꆊꈩꇫꑌꉬ,ꀊꉘꌠꆗꈧꌠꆹ,ꏤꏅꃭꇁꍔꀏꈈꄉꑬꀜꅍꍮꃅꀕꊸꇬꊾꐗꃅꇴꐯꆼꒆꁧꑍꁙꌠꆫꄉꀋꂓꌋꆀꎭꂵꆿꌺꑋꉂꐪꃆꂮꉪꇰ。
ꄚꄉꏈꇬꆏꈀꄸꉉꆏꈀꄸꑗ。ꉪꆏꐙꃅꄰꏯ“ꆍꀋꃋꉪꌺꉌꀋꃹꐛꅹꃅꍯ,ꀋꂮꆍꏭꁦꎆꀋꉉ,ꊾꁌꌋꆀꑮꈭꑮꎃꌹꌠꈪꉪꁵꇁꇈꉪꌵꉪꏢ。ꂴꋍꏢꉪꌺꋌꊐꇫꎭ,ꊁꋍꏢꌠꋌꉪꀋꃋꑋꅉꇑ,ꉜꄸꌕꄅꃅꉪꊝꌠꉥꀋꌵꀋꉆ”ꄷ;ꎭꂵꄰꏯ“ꃌꍯꑘꃅꉪꄻꉪꅊ,ꄩꄻꀏꋊꀏꄻꄩꋊꈭꐨ,ꉪꀊꃋꊐꃆꂮꉪꌵꉪꏢ,ꉪꄻꉪꐛ,ꄡꇗꄩꄻꀏꋊ,ꀏꄻꄩꋊꑲꆀꄿ”ꄷ。ꐙꃅꄰꄹꇬ:“ꈁꃅꈁꑽꌠꎭꂵꆿꌺ,ꐙꃅꀊꆺꑍꁯꋓꄉꎭꂵꄰꏯꄉꄡꑟ,ꆍꂾꆏꑠꌊꉪꉉꇁ。ꑠꃅꑲꆏꉪꀋꃋꄈꌦꆍꅍꎍꀐꌠꉥ,ꉪꄈꆍꀋꄝꀐ”ꄷꇌꁍꎼꀱꇌꅲꇬꀕꋦꇫꎍ。ꎭꂵꄰꄹꇫꑌ:“ꂴꋍꏢꌠꐙꃅꄰꌺꂘꇖꂘꄸ,ꊂꋍꏢꌠꀊꆺꄰꃌꌋꃌꀋꍅꌊ,ꉪꄉꐙꃅꃀꇐꇭꇱꉮꆈꒀꀕꀐ,ꉪꄉꆍꑍꁯꅍꊾꐇꎹꌠꉬ”ꄷ。ꃣꈌꄖꂿꃅꉚ,ꉉꀨꉉꆷꇫꀋꐥ,ꌞꊿꇢꊭꉉꈨꌠꀉꄂꈌꃴꉐꃴꋩ。
ꊁꆏ“ꀊꃉꊿꑍꂷꌠꆹꌦꈢꋒꀐ,ꆍꌕꁯꆹꈾꀋꋠꃮꐯꍀ,ꋍꁯꑌꀋꅑ,ꋍꁯꑌꀋꅺ,ꏇꅉꂷꇬꀋꐛꀐꌠ。ꑳꂶꌠꄈꁴꍂꑳꐛꀀꀋꉆꀐꌠꉥ,ꎭꂵꄰꁳꑲꂷꋉꀊꆺꄰꀉꑳꈧꌠꀀꎻꇈ,ꃣꈌꄚꄉꌐꇧꎭ,ꈀꄸꑌꆽꁏꀋꉆ”ꄷꌦꋲꇌꎸꃅꐊꂾꑢꍈꉉꂱꑱꅉꎭꇈ,ꎦꈨꅥꌊꐯꄎ。
ꀈꈥꎧꅥꐯꄎꄷꉬ,ꈀꋩꑌꉌꃀꒉꏂꀋꋒ。ꋍꈬꐨꆏꐙꃅꎭꂵꉪꌕꁯꐮꀋꎼꀋꈴꀐ。ꐙꃅꄰꆹꂯꈜꎴꅉꀀꄉꂿꇁꈧꄮꁨ。ꎭꂵꉪꑍꁯꆹꑍꇱꈤꌋꇯꆫꑴꇬ,ꋍꈭꐨꆏꐮꋒꇁꇬꇵꆹꎎꀉꁁꄀꌊꂱꑱꈁꌒꈴ。ꀉꁁꈨꌠꆹꂯꌁꌦꐥꀐꇬ,ꉠꀉꂿꂶꌠꀉꄂꈍꏯꑌꀋꉬꃅꇢꆣꄉꐤꎭ。
ꊁ“ꊉꉸꄊꇝꂱ”ꆳꏂꁎꄮꇫꆏ,ꀋꂓꌋꆀꎭꂵꆿꌺꑋꌦꋋꄹꉖꒉꌊꐊꂾꑢꍈꋑꄉꀃꑊꐮꄹꐛꂯꄷꇖꂟꇬꆏ,“ꎭꂵꆿꌺꆏꃆꅉꊿꐙꏭꀋꐛ,ꑡꆏꃅꑌꇇꀋꏢ。ꉡꆹꌞꀋꃋꊐꇈꌞꑮꃀꍯꑠꂿꄷꀋꁧꈨꇯꈨꀋꋻ,ꑠꉢꋋꈌꁧꑲꀋꌧ。ꉈꑴꌞꊿꄹꇬꉼꊞꎹꎆꋚꑌꀉꑌꈨꆏꋟꄉꃅ。ꀋꃉ‘ꌧꏾꇪꊞꄐ’ꇁꂯꄉꀐ,ꑠꄮꇬꆏꀕꂿꇎꌠꆏꂿꇁꅉꈫ”ꄷꈌꊨꃅꐊꂾꑢꍈꇱꊨꎼꇁꇈ,ꐬꆠꌊꌦꌠꉬꑴꄷ;ꉈꑴꆏꃣꈌꉉꄮꇬꀊꆺꄰꏯꅑꄉꑲꂷꄻꀒꁳꋉꎻꀐꄷ,ꐊꂾꑢꍈ“ꉼꊉꀖ”ꌌꄳꐳꄮꇬꆏ,ꄚꎴꄉꎭꂵꄰꌳꃈꅮꈧꌠꇱꌌꐱꈬꇓꌺꊐꅗ。
ꇯꍝꀋꂓꌋꆀꎭꂵꆿꌺꑋꌦꊂꀊꉗꀋꐛꇫꆏ,“ꌧꏾ”ꇪꊞꄐꑟꇁꇈ,ꌟꒉꀉꑳꇱꋓꇅꈪꇿꈴꄿꂿ“ꇪꊞꄐ——ꑣꇬꇁ——”ꃅꃙꏦꈺꄉꑵꉙꑠꂷꑵꇬꎷ。ꋋꃢꇬꊿꃅꑽꏿꑠꀉꑌꈨꌌꉈꈽ。ꊿꄹꇬ,ꎭꂵꆿꌺꑌꀋꌦꇮꇬꆹꋍꃚꅿꀐꌠꉬꄷ。
ꈤꋊꊁꆏꉠꁸꎁꍇꌠꌋꆀꈍꌺꁸꎁꍇꌠꐯꇯꉢꄟꌊꎆꆫꅉꇬꈍꌺꊂꁧ。ꇱꋓꊾꐗꅉꊌꂿꉆꑠꍈꇫꆏꈍꌺꂶꌠꃭꇁꁓꋩꀋꂓꄻꇬꇢꄉꍇꌠꆙꌊꀑꈑꄉꀱꂣꉌꂵꊖꋒꑕꇬꀀ。ꎆꈧꌠ“ꇻꀕ”ꃅꏜꋠꋍꈭꋍꇍꐺꄉꉢꇁꋍꋑꑟꌠꋌꋋꀋꌋꐤꁮ,ꌨꈓꌨꈓꃅꑳꉨꇬꀀꇈ。
“ꋌꂯꆏꉌꀋꃹꃅꎭꂵꆿꌺꈿꄉꌦꀐꇬ,ꑡꉩꀒ?ꄓꄉꎸꋠ。”ꉢꋍꀂꏾꇬꊎꀍꉀꆷꆽꆷꀋꄿ。ꊁꆏꋋꄉꇨꇅꃃꌊ:“ꆏꑣꏾꀐꇬꁨꑣ,ꑡꂷꉥꅳꀧꈢ”ꄷꑓꂷꅪꌊꉠꏯꄉ。ꉡꑌꀈꈥꈌꇨꏗꌊꑠꃅꉇꌠꄸ,ꇿꌋꆺꐮꊰꑴꌦꂯ。ꊁꆏꉣꑊꁸꎁꌹꌠꐯꇯꉢꄻꎆꆫꀉꑳꈧꌠꍈꇫꎭ。
ꀋꉊꊂꑲꆀꈍꌺꂶꌠꌧꈿꇬꆏ:“ꀈꍂ,ꉈꏠꐛꅹꄸ,ꉠꀉꂿꀊꋩꄹꉇꆀꌦꌠꅊꇉ”ꃅꉉꇈ,ꊿꋌꊏꌊ“ꎓ——”ꃅꒉꌐ。
ꊂꊾꐗꈧꌠꉉꇬ,ꀋꂓꀃꃀꇫꄉꋍꑵꂷ“ꀧ”ꋍꀑꈑꈪꅞꄷ。ꊿꄹꇬꈍꃅꑌꌹꂷꉬꏭꐛꄷ。
ꀉꑳꋋꂷꆹꐥꑲꆏ,ꑍꊏꇕꉬꈎꇈꑮꃀꑌꑮꄉꀐꋭ,ꄷꀋꁧꀉꑳꑍꍈꌕꍈꀉꄉꉬꇬꂯꌬꀋꄿ。
ꊁꆏꎭꂵꃅꇫꑮꃀꂶꌠꀿꑳꆹꃆꃅꌦꇈ,ꑠꃅꌦꋋꑵꑊꋌꐛꁧꑵꉬꌠꉥ,ꀘꂾꇫꎭꑲꆀꍑꄷꄉ,ꎭꂵꆿꌺꂷꅍꈻꇬꇯꄉꃺꃀꀁꑳꑋꐯꇯꀘꌊꃪꃹꊐꇫꎭꀐ。
ꀋꂓꑌꂴꆹꊿꇧꊂꄴꋖꑠꀋꐥ,ꄚꏂꑌꋍꈓꆏ“ꃀꑊꋌꆽꏻꏣꀨꌌꑠꂷꐙꃅꅍꋊꀐ”ꄸꌦ,“ꈍꌺꅍꋊꀐ”ꄷꌦꃅꑠꈨꇫꈌꐚꇁ;ꊿꈊꄮꃀꎆꐏꋚꐍꌠꄹꇬꑌ,ꀒꀋꂓꐗꃝꈭꀕꇍꀕꐺꇬꆧꁨꇂꃴꄉ“ꀋꃋꌺꀒꁙꉿꃅꑠꂷꑳꉨꇫꑌ”ꑴꄷꑠꈨꑌꉉꐺꌦꄉ,ꊿꃱꀋꐚꑠꁥꐬꆠꇧꈯꋧꅸꐺ。ꈍꌺꌋꆀꋍꀑꑌꈧꌠꃅꐎꑍꊏꈎꎖꐮꅍꀋꎼꀋꈴꈭꐨꑲꆀ,ꈀꄸꑌꐯꇯꋧꄉ“ꃀꑊꋌ”ꋋꂷꉻꏂꇧꎭꂿꄷꄉ,ꀱꐮꋯꐮꒉꌊꀋꂓꂶꌠꂷꅍꊿꊇꈻꈌꀞꂷꁍꎼꏢꇬꇱꄉꆀꐪꀘꇈ,ꅤꃅꐬꇬꊐꇧꎭ,ꐗꃝꂶꌠꑌꊿꊈꇱꊨꇈꇷꌊꒉꇬꇱꇧꎭꀐ。
ꋍꈬꐨꆏꌠꑊꀘꂾꇬꀋꋊꀐ,ꊿꈊꄮꃀꄚꎻꈴꐺꌠꑌ“ꑊꋌꐥ”ꅐꆠꏭꀋꉉꀐꑴꄷ。ꀋꂓꐗꅉꈚꌠꇬꆳꃰꈧꌠꀉꄂꄡꇗꋍꈓꋒꀋꋒꃅꍵꄮꐰꆏꃨꁯꅩꇬꀕ,ꐛꑿꑌꄚꊐꇖ,ꁯꆮꑌꄚꃰꐺꇬꎷꑴꄷ。ꄚ,ꋋꈨꑠꆏ,ꑊꋌꑵꆹꀋꐥꑴꇬ,ꂿꑘꁡꇤꑠꇬꄡꇗꊿꌦꑇꌊꑆꈨꐥꑴꌦꌠꁮꅉꉬꌠ。
(ꌐ)
ꇁꀦ： ꆀꉙꊅ
ꁰꄻꌠ：
beleys ｜
ꄜꃑꌠ：
