ꀨꏾꌠ > ꃆꃀꁱꇐꋽꇐ

ꀋꂓ(ꑍ)
ꄜꃑꄮꈉ: 2011-08-31  | ꁰꄻꊿ:ꇓꆈꀋꃀ
 (ꂴꊛ)
 
    ꊁꈾꒇꈾꋩꇄꌠꇬꆏ,ꀋꂓꂶꌠꉜꆐꊌꄷꉜꀋꑍꌊꈀꑌꅉꇬꀀ,ꈁꉆꅉꇬꀀ。ꋋꇅꇬꆏꌶꅉꇬꑬꆏꄉꉢꎼꈾꋩꅉꇬꈾꏤꅞꈽꁧ,ꈾꏤꋍꑍꅞꇬꇫꃏꃘꃏꂷꊌ。ꂵꆧꑬꆏꇄꌠꇬꆏꊿꃅꈽꏜꄌꌊꄚꋍꁙꀊꄶꋍꁙꃅꑸꑽꃙꋠꇫꑌꌐ。ꀋꂓꆹꋠꀋꏾꄷꋌꐚꈾꏜꁧꇬꉈꇈꑊꋌꁁꋌꄻꈁꑓꉱꄉꇬꀀ。ꀊꉘꌠꆗꑠꈨꑌꋟꅐꇈꈾꏜꀂꏽꑌꄉꑳꅝꑬꆏꇰ。ꉡꑌꋟꅐꇈꑸꑽꈨꉢꉅꉠꀂꄁꂱꏾꇬꄟꌊꀋꂓꍈꆹꂿꄷꆹꌊꌠꆗꈧꌠꂴꆽꑟꇬꆏ,ꎭꂵꊇꌺꂶꌠ“ꇁ,ꇁ”ꄷꉠꏯꇇꃭꇈ,ꉢꆹꌊꋍꋑꑟꇬꆏꀌꀠꏾꅪꑠꂷꋌꒃꌊ“ꆏꅽꀋꂓꀂꄁꁏꄉꀌꀠꋋꂷꄻꋍꀉꆂꄐꀬꀕ”ꄷꉠꏯꌕꇈ,ꉢꑠꄮꇬꊯꌕꈎꀐꑴꇬ,ꑡꑌꉢꋋꀋꌧꃅꉌꋦꇬꎷꑴꌦ,ꌞꊿꉠꏯ“ꀊꆺꄰꌺꂶꌠ”ꄷꇴꇬꎷ。ꎭꂵꊇꌺꋌꄷꇬꆏ,ꈩꌒꌠꆏꋌꐘꉬꀐꉂ,ꄇꀋꉆꃅ:“ꀬꑴꇆ,ꑡꀋꀬꅍꐥꂸ”ꄷꑸꑽꈧꌠꉢꃝꈾꏜꀂꏽꅞꄉꇈ,ꀌꀠꂶꌠꉢꒃꌊꑭꁘꂮꄉꀋꂓꀂꄁꉢꁏꎽꆹꇬꆏ,ꉠꑓꂪꃴꐎꆗꄷꑠꇅꄹꇈ,ꀋꂓꂶꌠꋌꇷꌊꀋꎺꃅꋌꑣꄑꏿꇫꑌ,ꄚꆏꉡꑌꉢꋌꇷꐂꑐꀕꄉꀌꀠꂶꌠꉢꄝꇿꎭꀋꐚꑓꍰꅍꇰꀋꂓꐏꄚꉆꇬꆏ,ꌠꆗꈧꌠꐃꁆꏩꅉꃅꇬꊎꂃꄉꒉꌦꄉꏽ。ꀋꂓꂶꌠꆹꈁꑓꅩꍠꅍꌦꀽꇁꄉꏽꃅ,ꇇꃶꇇꂿꄹꀂꏾꅑꇫꑌ。ꊿꑸꑽꋠꇫꑌꑴꌦꈧꌠꆹꌠꆗꈧꌠꑡꒉꌠꊿꊇꋋꅉꀋꐚꄉꈍꉘꑓꍝꃅꇫꑌ。ꎭꂵꆿꌺꂶꌠꑌꑬꆏꈾꏜꀉꁁꑠꁧꇬꑌꌠꉥꆀ,ꑡꑌꋌꉜꋍꑓꋪꇬꊐꄉꌐꐤꁮ,ꋘꉬꃅꋌꍻꋍꀿꃶꄰꌺꀁꑳꋒꌠꎭꂵꊇꌺꋍꄲꀵꄉꇈ,ꑊꑍꆈꁴꅍ“ꇗꀋꁨꀸꀋꁨꊿ!ꇐꇭꋋꂷꅽꈩꋏꂷꅀꑞꉬ”ꄷꎭꂵꊇꌺꋌꁒꀊꑙꈿ。ꉡꑌꄚꆏꎭꂵꆿꌺꏦꄉꀋꎺꃅꉢꂇꆹꌠꆗꈧꌠꈪꄙꑌ。ꌠꆗꈧꌠꑓꋪꀏꐱꄉꑓꃈꋏꐯꀦ,ꄷꀋꁧꆺꄝꐬꇓꊎꑡꌌꐮꌕꀋꐚ。ꀋꃋꑲꆀꉪꇁꇬ:“ꆏꌞꀋꃋꊐꇈꌞꌺꑮꃀꍯꂶꌠꄈꇗꁨꀸꁨꀐ,ꈨꑌꉘꁮꆎꊃꂿ”ꄷꉉꋭ。v3P彝族人网(彝人网)- 彝族文化网络博物馆
ꑠꄮꇬꆏꊿꋋꑍꂷꊿꉜꇬꀋꋪꀕꃅꐙꀐꐥꁮ,ꄚꈀꄸꑌꈌꋊꀋꀬ。ꎭꂵꆿꌺꄰꑭꊂꊿꐲꀉꇨꑷꉬꄉ,ꈀꄸꑌꋍꀑꋌꌌꊿꀸꇀꏦ。v3P彝族人网(彝人网)- 彝族文化网络博物馆
ꉠꀉꂿꑌꋌꉜꇬ“ꉐꆈꀉꐚꃮꄟꄸ,ꇌꆈꁍꎼꉇꄟꄸ”ꐤꁮ,ꄚꈍꏯꑌꉉꀋꌒꌊꐙꃅꃀꇭꏭ:“ꋍꃀꇭꀋ,ꉪꆹꀀꁈꀉꁧꐛꄉ,ꈂꏽꈁꏾꃅꐯꉇꀋꉆꀐ,ꆎꄉꂴꋍꏢꌠꀐꇬꀿꃅꋍꈚꇁꌠꐛ,ꉈꑴꆏꃷꇎꀋꃀꉌꂵꐮꄉꋌꑵꅇꉉꐮꇬꇉꃹꅲꑵꉬꌠꉥ,ꈀꎭꀕꆏꑴꌠꇓꂵꉅꂴꅥꅉꃅꄉꅊꇈ”ꄷꉉꇈ。v3P彝族人网(彝人网)- 彝族文化网络博物馆
ꐙꃅꃀꇭꑌꊒꆽꀕꃅꆹꉉꀋꉆꄉꁦꏮꇈꏮꃅ:“ꇐꇭꀋ,ꀋꂮꀉꑳꀵꇗꌧꐛꋋꈨꆏꀨꎹꌊꊾꒆꊿꐙꂯꄉꀐ。ꈍꌺꑌꒆꊭꉩꑴꇬꌺꃰꋋꑵꆹꋍꈓꀉꄂꃅꒆꆹꑟꑵꄸ,ꋌꉈꆏꆎꄈꐥꌒꇁꀐꌠꉬ。ꀃ——ꀊ,ꀊꆺꃅꑖꑠꑷꑌꅽꑠꂷꀋꉬꇮꇬꈍꃅꂯꀋꆾ”ꄷꉉ。v3P彝族人网(彝人网)- 彝族文化网络博物馆
ꇯꍝꑌꋋꈨ,ꀋꂓꀋꉬꇮꇬꆹꀊꑖꄰꌺꍸꇖꇜꋋꈨꌕꀥꃘꈜꃰ,ꋍꂷꋍꄷꃅꌞꀑꑊꉜꄉꐥꁧꌐꀐꌠ。v3P彝族人网(彝人网)- 彝族文化网络博物馆
ꀊꑖꄰꀋꉊꂴꆽꆹ,ꊼꇅꋙꋠꒉꅝꇎꄷꑵꌠ,“ꌟꃅꃨꈹꃝꌠꐥ,ꌠꋋꅥꄰꃝꌠꐥ”,ꀒꑍꁯꆏ“ꌠꐧꏣꉂꃝ”ꌠꉬꑴꄷ,“ꂛꊨꅫꃀꃝ,ꈴꁱꋐꒉꃝ”ꌠꉬꑴꄷ,ꈍꌺꆪꐛꇬꆏꀑꑌꄰꀋꃋꀋꂓꇐꇭꊿꊇꈌꄀꄉ。ꊁꉼꊞꎹꄻꇁꀐ,ꎆꋚꉬꇮꏮꎹꇬꇱꐮꀐꃅꈨꇬꆏ,ꇧꍻꇧꆽꑮꈎꑟꈎꉬꀋꉬꑠꈨꑌꀋꌋꃅꌺꑮꃀꋇꑍꁯꇱꃛꊸꌊꇫꄉꑮ。ꀊꋩꄹꈎꀋꂓꆹꊰꑋꈓꄉ,ꈍꌺꆹꊰꈎꄉ。v3P彝族人网(彝人网)- 彝族文化网络博物馆
ꀋꂓꋋꂷꀉꄉꀉꂿꃅꌦꏜꄉꌕꈎꃅꍸꀊꂵꇱꇈ,ꋌꃆꅉꋍꑵꋋꂨꌠꀉꏮꍢꅝꅍꊾꍸꀉꑳꂷꄷꊿꋌꀋꑇ,ꈍꌺꆹꀊꑙꀋꀮꍈꌟꃅꄹꋍꆿꃹꑉꇬꑉꉆꃅꎍ。ꊿꄹꇬꈍꌺꋋꂷꑠꃅꒆꊭꉩꅹꀿꃚꃀꃚꌠꉬꇚꑴꄷ。v3P彝族人网(彝人网)- 彝族文化网络博物馆
ꀋꂓꑮꄹꉇꌠꀋꃅꆸꈐꎺꇊꐝꄧꀕꑴꌦ。ꑮꃀꌋꆀꀉꁧꌐꃶꐮꂿꈎꀋꉬꄷꀊꑖꄰꉻꇐꇬꄉꁁꑳꂷꋈꄉꑮꌠꉥ,ꑮꃀꑟꇁꋧꌦꆏꉢꇿꌦꄉꏽꃅꉢꂇꁁꑳꈐꏭꑮꃀꂴꆽꑌꄉꑮꃀꀊꏀꀂꏾꇮꌠꇁꉚ。ꑮꃀꀊꏀ——ꉠꀋꂓꂶꌠꏤꏅꄻꈁꑓꇬꉱꄉꇬꀀꎍ,ꉌꌤꑓꀖꀀꀋꉆꐤꁮꇇꏸꌊꌿꇑꈂꑑꃅꈐꏭꄉꏤꏅꇬꌉꐺꌠꉢꂿꇈ,“ꉆꐥꃅꁨꉆꇁ,ꑮꃀꀊꏀꇙꋏꇙꋏꃅꀐꆺ”ꄷꉠꐋꀨꈧꌠꇴꇬꆏ,ꄹꃥꈧꌠꑌꌓꀖꌊ“ꑮꃀꀊꏀꉜꏾꅀ?ꈁꁠꌌꇁꑲꆏꉪꁉꆍꀦꂿ”ꄷꉠꏯꒊꈧ。v3P彝族人网(彝人网)- 彝族文化网络博物馆
ꅻꄏꅍꄚꐏꑋꀕꌋꆀꊁꃅꏸꅐꇁꇬꑲꆀꑮꃀꀂꏾꇮ、ꑮꃀꋙꍈ。ꀀꃀꆏꎭꂵꀑꇢꑌꀕꁳꃅꎻꌠꉥ,ꀑꇢꑌꀕꂶꌠꈾꆭꋍꈓꋦꄌꌊꇁꀋꂓꂴꆽꐕꄉꑖꈈꌺꃅ:“ꇐꇭꀋ,ꄓꇁꉢꅽꀂꏾꇮꂿ”ꄷꇬꆏ,ꉡꑌꁠꄻꀕꃅ:“ꀋꂓꀋ,ꄓꋙꋠꇁꌶ,ꂮꋌꐛꀐꀞ”ꄷ。ꀋꂓꂶꌠꀑꊥꁉꄉꒈꌦꈘꃅꋌꄓꇫꑌꇈꀑꇢꑌꀕꁳꋍꀂꏾꇮꎻ。ꊁꀂꏾꇮꃦꈜꆦꇈꋙꋠꌐꈭꐨꆏ,ꀋꂓꀑꇢꑌꀕꇱꏃꋇꄉꀀꁧꇈ,ꉪꀉꑳꈧꌠꑌꆀꀕꅿꃅꄚꊂꈹꀑꇢꑌꀕꅍꊐꌐꌦ。v3P彝族人网(彝人网)- 彝族文化网络博物馆
ꀑꇢꑌꀕꎺꁯꄔꌊꀋꂓꂶꌠꋌꉜꅷꀑꇬꑞꌦꑭꇬꑞꌦꃅꉜꇎꉜꅗꇁꀋꇮꌠꌡ:“ꇐꇭꀋ,ꅽꀊꂵꑡꄻꆎꍈꄉꆏꇭꀧꑠꃅꒆ,ꅪꁧꑠꃅꎔꇆ?ꍰ,ꑡꍈꆏꈚꑌꉥꑣꅍ,ꎴꁧꈬꄻꆏꇢꄉꇬꑌꋽꏭꐛ”ꄷꇬꆏ,ꀋꂓꆏꑊꏦꌊꒈꌦꃅꀂꏾꈎꇫꑌ。v3P彝族人网(彝人网)- 彝族文化网络博物馆
ꇯꍝꀋꂓꋋꂷꑮꃦꑮꈚꀕꇈꅻꊪꅻꃰꇯꅑꄉꇬꆏꑡꑠꃅꎔꀋꐚ,ꏮꇬꉚꇬꑓꋪꉈꈻꀋꏾ,ꉪꀉꑳꁥꌠꆹꊫꃺꑑꈯꃅꇬꁭꌦꇫꎍꀐ。v3P彝族人网(彝人网)- 彝族文化网络博物馆
ꊁ“ꇪꇭꏃꄤ”ꋠꇈ,ꀊꑖꃀꑘꑋꀊꉗꀋꇢꃅꐮꊂꈹꄚꈴꁧ,ꀉꑳꉬꍈꍸꇈꌠꈍꌺꆹꑠꄮꇬꑲꆀꊯꌕꈎ,ꀊꑱꂶꌠꊰꈎ,ꀉꇤꂶꌠꉆꈓ,ꀈꑘꂶꌠꉬꈎꄉ,ꀈꑘꇂꃴꌺꃄꆜꉬꄷꌕꈎꑠꍈꑌꍸꇈ。v3P彝族人网(彝人网)- 彝族文化网络博物馆
ꀋꂓꃀꑘꌥꅉꇬꇁꈭꐨꆏꀱꀋꁧꃅꑳꑋꀋꃀꂷꐛꀉꑳꋋꈨꀨꎹꇫꐥꇈ。ꃄꆜꍈꌠꆹꀋꂓꀨꎹꎸꀨꎹꆐꀋꉬꃅꀊꑖꑘꑋꊂꈹꁧꀐ。ꀊꋨꄮꇬꊿꌦꎮꈁꍈꑌꀋꊌꄮꇬꉬꄉ,ꀋꂓꂶꌠ“ꏃꄤ”ꇬꄉꑸꑽꑍꇯꋌꄽꌊꇁꇈ,ꁀꇉꄏꍈꌌꑸꑽꀉꒉꑠꑍꂷꋌꌋꄚꊐꌊꃄꆜꎮꈁꃅꎻ,ꋋꄹꉖꋋꆏꀋꋠꃅꀀ。v3P彝族人网(彝人网)- 彝族文化网络博物馆
ꀉꋩꄮꇬꈍꌺꆏꇁꂷꀉꁌꐊꎹꇬꎆꆫ,ꀊꑱꆏꎹꇬꃮꆫ,ꀉꇤꆏꉡꐊꄯꒉꀘ,ꀈꑘꆏꀋꂓꊂꈹꑘꁨꅉꇬꈩꁦꌦꀊꑱꐊꃮꆫꅉꈩꁧꌦꃅ。ꀋꂓꆹꀋꃀꊇꂷꐛꃦꅋꈚꑕꎭꎥꇬꎷꇇꀊꁌꀕꃅꄉꑠꑍꀋꐥ,ꀉꑳꈧꌠꑌꏖꊱꅍꊾꍸꀉꑳꈨꀋꌡ。ꊿꄹꇬꀋꂓꋋꂷꃬꐈꃀꍈꃬꊭꌹꁱꏃꐺꌠꌡꄷ。v3P彝族人网(彝人网)- 彝族文化网络博物馆
ꌺꒆꂓꄡꄸꄷꐯꐤꁮ。ꈍꌺꑌꈍꌺꐯꈍꌺ,ꋌꐥꌠꆗꂷꐛꇁꀋꄐꀐꌠꌡ,ꀒꈓꑌꅉꁙꀕꊂꈎꑌꅉꁙꀕ,ꀋꂓꋍꑊꁦꋠꃌꅿꋒꀋꌡꃅꀋꃀꀉꌺꋒꌡ。ꈍꌺꋋꂷꑊꏦꅑꌠꐛ,ꊾꉻꇯꆏꐯꃪꇁꌠꉬꀋꐚ,ꋍꑍꌠꃅꄜꋙꋠꈭꐨꆏꆫꁯꐱꂪꇬꈶꅉꃅꑠꂷꀵꌊꎆꊂꈹꁧꌦꐥ,ꈊꃀꑌꀀꍹꈻꉏꀋꂪꃅꑴꑆꈬꄌꀄꃹꑐꌊꉪꑷꊂꎆꉻꆸꄜꁦꋠꀞꄂꈧꌠꋑꀀꁧꌦꐥ,ꋍꑋꈓꐛꀐꇬꃆꅉꋍꑍꊒꆽꃅꏮꀋꂓꉜꀋꋻꌦ。ꑠꅹꌠꆗꈧꌠꑌꈍꌺꋋꂷꌌꒊꅍꀖꇬꎷ。v3P彝族人网(彝人网)- 彝族文化网络博物馆
“ꀃ——ꀊ,ꈍꌺ,ꉪꆹꃹꒉꅉꀋꊌꑲꆀꄚꂇꇁꌠ,ꆎꆹꑮꃀꋊꇬꄀꇬꒉꁖꇁꑠꂷꄻꑳꈣꂷꐏꄉꇬꎷ,ꀈꍂꋍꃢꆏꊿꈐꇬꅜꇁꇚꂼ。”v3P彝族人网(彝人网)- 彝族文化网络博物馆
“ꈍꌺ,ꆏꅽꑮꃀꏦꅀꑡꃅꇆ,ꀃꂰꆏꉪꆏꏁꅽꑮꃀꋑꆹ……”v3P彝族人网(彝人网)- 彝族文化网络博物馆
“ꀞꐕ,ꀞꐕ。ꎮꑑꅉꅽꈍꌺꑠꍈꊵꑵꋋꃅꀋꄐꃅꑮꃀꐃꁆꇱꆼꑐꍂꆶꌠꉬ”ꄷꌦ。v3P彝族人网(彝人网)- 彝族文化网络博物馆
“ꀈꍂ,ꈍꌺꀋ,ꆏꇬꀋꄿꀐꇬꉢꁱꆏꁳꂿꍰ……”ꃅꇫꒊꈧꇬꎷ。v3P彝族人网(彝人网)- 彝族文化网络博物馆
ꄚꄉꉎꉐꄹꋍꏿꉉꌦꋍꏿꒈꌦꃅꇬꆏ,ꈍꌺꊿꊇꇱꒊꈧꅷꑳꉨꊿꀸꑲꆀꆏꄉ。v3P彝族人网(彝人网)- 彝族文化网络博物馆
ꌠꆗꀞꄂꈧꌠꂵꆧꆏꉉꌊꑶꋦꀋꁧꈧꌠꇰ,ꑶꋦꀋꁧꈧꌠꈊꃀꀑꈑꈢꆏꉉꌊꑮꃀꈧꌠꇰ。ꑮꃀꈧꌠꂴꆏꅲꏾꌊꁦꋠꁦꎆꉉꑟꉂ,ꄚꁦꋠꈧꌠ“ꇯꍝ,ꅪꎔꅪꄿꑠꂷꄻꈍꌺꁵꄉꁧꈿꀐ”ꄷꇬꆏ,ꑮꃀꈧꌠꉌꉂꃴꆅꌊ:“ꁧꈿꑲꆏꀕꇬꎷꀋꆹꇆ”ꄷꇈ,ꁦꋠꈧꌠꑌꉇꉈꃅ:“ꉡꆹꂯꋋꈨꉪꀐ,ꆏꉢꄛꎼꆹꀊꅲꀐꐛꅹꉬ”ꄸꇈ,ꑮꃀꈧꌠꃃꌦꄉꏽꃅ:“ꁨꄓ,ꀃꂰꀃꂰꀉꄂꃅꁨꎹꆹ”ꄷꊿꊇꇱꎭꋊꁦꋠꏢꁮꄀ,ꁦꋠꈧꌠꀊꅰꌊꀕꄖꌊ:“ꋌꑲꆏꉢꇿꌦꀐ,ꌞꈍꌺꑮꃀꀉꆂꉺꂇꅍꋑꌠꉩꇬꄀꇬꀉꄂꂯꑡꁌꀒ!ꍰ,ꅽꃤꑠꆹꑷꆱꁖꈥꏢꌡ”ꄷꇈ,ꑮꃀꈧꌠꀊꅰꃃꌊꌾꄹꇱꄓꋌꏮꁦꋠꏯꄉꇈ,ꌕꑍꇖꑍꃅꏏꁦꋠꉉꀋꅲ。ꄷꀋꁧꇰꍝꋍꁦꋠꐛꇬꄀꇬꄀꇚꑴꉂ,ꀋꂓꈭꇍꐺꇬꅇꂷꃿꏯꎰꏯꄀꑠꌌꇬꏭꎯꃿꇬꎷ。v3P彝族人网(彝人网)- 彝族文化网络博物馆
ꊁꎭꂵꆿꌺꌋꆀꀋꂓꑋꐮꉂꌠꊿꊇꌋꈭꐨꑲꆀꉌꂵꊼꇅꎌꅉꎍ。ꄷꀋꁧꋋꑵꇬꎴꀊꋨꑵꇬꎴꃅꄉꀋꂓꌋꆀꎭꂵꆿꌺꑋꐮꀋꉂꆸꏦꀕꃅꁈꏂꁈꇭꐯꇯ。v3P彝族人网(彝人网)- 彝族文化网络博物馆
ꅺꌡꇬꋍꃢꆏꀋꂓꌋꆀꎭꂵꊇꌺꑮꃀꑋꄻꎭꂵꆿꌺꇱꄉꀋꆪꉘꁌꈾꆳꁧꎻꌠꉥ,ꂵꆪꆏꎭꂵꊇꌺꑮꃀꀂꎐꆅꑴꄷꁧꇉꌊꋌꀱꀁꇬꃹꁧꄉ,ꀋꂓꌋꆀꎭꂵꆿꌺꑋꀉꄂꈾꆳꌐꀋꄿꄷꌋꐓꇬꑲꆀꇫꅐꇁ。v3P彝族人网(彝人网)- 彝族文化网络博物馆
ꀋꃉꀊꂓꌦꇫꈴꁧꇬꆏꊿꊇꉌꂵꐛꀋꐛꐤꁮ,ꃰꐯꌊꀡꌦꀟꆃꅍꄉꑴꇬ,ꋍꂷꑳꀋꑌꃅꈬꋊꈭꐨꆏꐯꏑꌊꀀꇽꊂꆈꄷꉺꊾꐗꅉꊌꂿꉆꈚꌠꇬꑌꌐ。ꋍꂷꇇꃅꇇꑘꃄꂷꑌꀋꐥ,ꇇꋒꁧꂪꄙꈌꀧꉛꅍꐯꐍꑌꌐ。v3P彝族人网(彝人网)- 彝族文化网络博物馆
ꊾꐗꃅꇴꑍꁙꌠꃴꑐꄹꐯꆼꒆꃅꑆꃴꇉꀕꅉꃹꁧꀐ。v3P彝族人网(彝人网)- 彝族文化网络博物馆
ꐙꃅꃀꇭꂶꌠꌗꏂꁋꄷꇈ:“ꀃ——ꀊ,ꐙꃅꃀꇐꇭꌊꆀꎭꂵꆿꌺꑠꑍꂷꑌ,ꎴꂿꋍꉔꆹꊉꆺꊉꆺꃅꌧꈿꇬꊎꄉꑴꌦ,ꀃꑍꆏꃰꐯꌟꃅꑍꐜꀋꈨꀐꀋꆾ”ꄷ。v3P彝族人网(彝人网)- 彝族文化网络博物馆
“ꃆꅉꂿꃅꁬꌠꌠꇯꆐꋍꑎꎹꇁꌠꉬꐤꁮ,ꎴꂿꋍꉔꆹꃘꇔꏃꇗꈩ,ꃰꁧꋍꄕꑠꈨꎵꇬꊎꄉꇈ,ꆀꑍꆏꃅꊸꄂꀋꅑ,ꃰꑠꄕꑠꈨꋋꇅꃅꐯꌐ。ꋍꑎꋧꃅꆹꋍꁯꃅꀋꋦꑴꇬ,ꏃꃅꉬꉎꆏꋍꁯꋦꁧꄉꇿꌊꃅꊸꀐꌠꀋꇆ。”ꎭꂵꊇꌺꑮꃀꋌꄷ。v3P彝族人网(彝人网)- 彝族文化网络博物馆
“ꌞꃆꅉꈎꁂꂷꀉꄂꉂꑴꌦꌠꀋꂸ……”ꄷ,ꀉꁌꁮꅉꌧꃅꌧ,ꄚꑲꆀꀋꂓꌋꆀꎭꂵꆿꌺꑋꉂꐪꉂꐛꈧꌠꐙꃅꃀꇭꇱꀖꎼꇁ:“ꉡꆹꀑꇬꂪꌐꑡꑌꉢꅉꐚꌐꄹꇆ。ꎴꂿꋍꉔꑌꊿꀀꈭꐨꑲꆀ’ꏶ——’ꃅꀃꈈꁉꈍꉗꏢꐛꇬꊿꇫꈌꀋꐚꇈ,ꇐꇭꆏꑠꄮꇬꑲꆀꀱꇁꎻꀋꈁ,ꀉꑳꈧꌠꆹꃅꀋꃤꌦꇯꆐꀿꃶꅍꀀꁧꀐ,ꑡꂷꉬꀋꐚꀐꉂ,ꉢꎼꊖꑓꇬꈴꄉꆈꇬꆏꃅꁨꀕꇉꁨꇉꃅꄉ。ꊂꈍꉗꏢꐛꇬꑲꆀꇐꇭꂶꌠ‘ꍰ,ꉢꃝꄉꀐ,ꃝꄉꋋꂷꋠ’ꃅꈌꐚ,ꎭꂵꆿꌺꂶꌠꆹꌗꏂꁋꃅ’ꀈꍂ,ꐊꂾꑞꍈꋋꂷꉘꇉꉘꀋꅐꀋ……’,ꉢꎭꂵꆿꌺꁦꋠꄷꑠꂷꆹꂯꊿꁳꌌꈌꐔꑓꍂꀋꎽꀐꇬ……”ꃅꈌꐚ。ꇐꇭꂶꌠꆹ‘ꋌꉬꀋꅲꀞꐕ,ꃅꂯꃅꇫꄉꀐ,ꆏꇿꒉꆏꉢꅽꊂꈹꌦꐥ。ꐒꌊꑞꃅꂯ?ꅅꃅꀸꈻꆼꁠꄉꑲꆀꀉꑷꄹꀋꇿ。ꍰ,ꄻꋂꋐꇬꍀꋠ……’ꃅꈌꐚ。ꎭꂵꆿꌺꄡꇗꌗꏂꁋꃅ‘ꋟꑌꋠꆺꐮꃹꒉꀋꅲꀐꂼ,ꆏꁨꋠ’ꃅꈌꐚ。ꊁꆏꋍꑊꋍꃢꀀꅀꀋꀀꑌꉢꋋꀋꌋ,ꃆꅉꊾꍅꅍꇯꆏꐥꑵꉬꐤꁮ,ꑠꀋꉬꑲꆏꂪꌦꁐꌠꏅꇬꆏꉢꌋꇁꄡꑟꌠ。ꌥꆹꌦꑎꐤꁮ,ꉢꃅꄜꎆꎹꇈꀱꇁꇬꇐꇭꑭꇇꈧꌠꉢꉩꇬꄀꇬꊷꆣꃅꐙꑴꌦꃅꄉ。”v3P彝族人网(彝人网)- 彝族文化网络博物馆
“ꆏꌊꑌꈍꃅꂯꇆ?ꎭꂵꆿꌺꑠꁴꍂꃅꐚꇙ,ꀑꇬꀋꈁꀐꌠꉥ,ꆏꇯꋌꌉꇫꎭꉆꌠꉬ。”v3P彝族人网(彝人网)- 彝族文化网络博物馆
“ꀃꄷꆂ,ꑓꀠꀕꀉꐩꈋꅉꀋꆪꀀꅉꄚꎍꀐꇬ,ꀊꆺꄰꃘꇫꊝꀋꀬꆍꂾꀕꀐ。”v3P彝族人网(彝人网)- 彝族文化网络博物馆
“ꌞꀊꆺꀋꁧꑌꀋꑍꊁꆏꂗꍵꈪꏤꏅꌅꂷꇬꊐꌊꐺꀐꄷ,ꌞꀊꆺꄰꉬꄉꋍꎳꑟꇁꀋꆅ,ꀉꁁꇷꄙꑠꑷꉬꇮꇬꈍꄮꇯꆐꈀꑟꅉꑟꀐꌠ,ꌞꀋꃋꊐꇈꌞꌺꑮꃀꍯꑠꉜꄸꌕꄅꀕꀐꌠꀋꂸ,ꑠꄉꉆꑴꌦꅀ?”v3P彝族人网(彝人网)- 彝族文化网络博物馆
“ꊿꋋꑍꂷꅔꅐꇀꏦꄉꋋꇅꃅꌦꀐꌠꇆ。ꆍꌗꀋꉜꇆ,ꇐꇭꂶꌠꈾꒇꈾꋩꄮꇬꆏꆏꀋꄚꐯꀋꄚꌠꌡ,ꀁꑌꐮꀁꑌꀕꉬꁮꆪꆹꐥꀐꌠ,ꌞꊿꌋꌠꆹꌧꇯꌧꉆꄡꑟꀐ。”v3P彝族人网(彝人网)- 彝族文化网络博物馆
“ꃅꆗꃅꆗ,ꈎꁂꂷꀉꄂꉂꄉꌦꑠꉌꂵꆹꃴꀋꌦꅀꉑ?”v3P彝族人网(彝人网)- 彝族文化网络博物馆
“ꀈꍂꆏ,ꃌꄷꒆꄸꈎꇁꍁꅉꀕꑎꆹ,ꋍꑊꀉꏮꑠꃅꑍꇬꐯꀋꏈꃅꈎꁂꂷꀉꄂꉂꇈꌦꇬꄈꀞꐕ。”v3P彝族人网(彝人网)- 彝族文化网络博物馆
……v3P彝族人网(彝人网)- 彝族文化网络博物馆
ꁦꋠꈨꌠꆹꐙꃅꄰꋍꋉ,ꎭꂵꄰꋍꋉ,ꉪꀊꆺꄰꋍꋉꃅꊾꐗꅉꐮꁬꏂꏪꑠꂷꑌꄉ,ꊾꋲꊿꑞꌟꒉꈨꌠꁳꇢꆣꉉꎻ。ꌟꒉꈧꌠꀉꄂꂱꑱꁁꏯꊋꀋꐛꆸꏦꀕꃅ,ꅻꄏꅍꀑꆊꈩꇫꑌꉬ,ꀊꉘꌠꆗꈧꌠꆹ,ꏤꏅꃭꇁꍔꀏꈈꄉꑬꀜꅍꍮꃅꀕꊸꇬꊾꐗꃅꇴꐯꆼꒆꁧꑍꁙꌠꆫꄉꀋꂓꌋꆀꎭꂵꆿꌺꑋꉂꐪꃆꂮꉪꇰ。v3P彝族人网(彝人网)- 彝族文化网络博物馆
ꄚꄉꏈꇬꆏꈀꄸꉉꆏꈀꄸꑗ。ꉪꆏꐙꃅꄰꏯ“ꆍꀋꃋꉪꌺꉌꀋꃹꐛꅹꃅꍯ,ꀋꂮꆍꏭꁦꎆꀋꉉ,ꊾꁌꌋꆀꑮꈭꑮꎃꌹꌠꈪꉪꁵꇁꇈꉪꌵꉪꏢ。ꂴꋍꏢꉪꌺꋌꊐꇫꎭ,ꊁꋍꏢꌠꋌꉪꀋꃋꑋꅉꇑ,ꉜꄸꌕꄅꃅꉪꊝꌠꉥꀋꌵꀋꉆ”ꄷ;ꎭꂵꄰꏯ“ꃌꍯꑘꃅꉪꄻꉪꅊ,ꄩꄻꀏꋊꀏꄻꄩꋊꈭꐨ,ꉪꀊꃋꊐꃆꂮꉪꌵꉪꏢ,ꉪꄻꉪꐛ,ꄡꇗꄩꄻꀏꋊ,ꀏꄻꄩꋊꑲꆀꄿ”ꄷ。ꐙꃅꄰꄹꇬ:“ꈁꃅꈁꑽꌠꎭꂵꆿꌺ,ꐙꃅꀊꆺꑍꁯꋓꄉꎭꂵꄰꏯꄉꄡꑟ,ꆍꂾꆏꑠꌊꉪꉉꇁ。ꑠꃅꑲꆏꉪꀋꃋꄈꌦꆍꅍꎍꀐꌠꉥ,ꉪꄈꆍꀋꄝꀐ”ꄷꇌꁍꎼꀱꇌꅲꇬꀕꋦꇫꎍ。ꎭꂵꄰꄹꇫꑌ:“ꂴꋍꏢꌠꐙꃅꄰꌺꂘꇖꂘꄸ,ꊂꋍꏢꌠꀊꆺꄰꃌꌋꃌꀋꍅꌊ,ꉪꄉꐙꃅꃀꇐꇭꇱꉮꆈꒀꀕꀐ,ꉪꄉꆍꑍꁯꅍꊾꐇꎹꌠꉬ”ꄷ。ꃣꈌꄖꂿꃅꉚ,ꉉꀨꉉꆷꇫꀋꐥ,ꌞꊿꇢꊭꉉꈨꌠꀉꄂꈌꃴꉐꃴꋩ。v3P彝族人网(彝人网)- 彝族文化网络博物馆
ꊁꆏ“ꀊꃉꊿꑍꂷꌠꆹꌦꈢꋒꀐ,ꆍꌕꁯꆹꈾꀋꋠꃮꐯꍀ,ꋍꁯꑌꀋꅑ,ꋍꁯꑌꀋꅺ,ꏇꅉꂷꇬꀋꐛꀐꌠ。ꑳꂶꌠꄈꁴꍂꑳꐛꀀꀋꉆꀐꌠꉥ,ꎭꂵꄰꁳꑲꂷꋉꀊꆺꄰꀉꑳꈧꌠꀀꎻꇈ,ꃣꈌꄚꄉꌐꇧꎭ,ꈀꄸꑌꆽꁏꀋꉆ”ꄷꌦꋲꇌꎸꃅꐊꂾꑢꍈꉉꂱꑱꅉꎭꇈ,ꎦꈨꅥꌊꐯꄎ。v3P彝族人网(彝人网)- 彝族文化网络博物馆
ꀈꈥꎧꅥꐯꄎꄷꉬ,ꈀꋩꑌꉌꃀꒉꏂꀋꋒ。ꋍꈬꐨꆏꐙꃅꎭꂵꉪꌕꁯꐮꀋꎼꀋꈴꀐ。ꐙꃅꄰꆹꂯꈜꎴꅉꀀꄉꂿꇁꈧꄮꁨ。ꎭꂵꉪꑍꁯꆹꑍꇱꈤꌋꇯꆫꑴꇬ,ꋍꈭꐨꆏꐮꋒꇁꇬꇵꆹꎎꀉꁁꄀꌊꂱꑱꈁꌒꈴ。ꀉꁁꈨꌠꆹꂯꌁꌦꐥꀐꇬ,ꉠꀉꂿꂶꌠꀉꄂꈍꏯꑌꀋꉬꃅꇢꆣꄉꐤꎭ。v3P彝族人网(彝人网)- 彝族文化网络博物馆
ꊁ“ꊉꉸꄊꇝꂱ”ꆳꏂꁎꄮꇫꆏ,ꀋꂓꌋꆀꎭꂵꆿꌺꑋꌦꋋꄹꉖꒉꌊꐊꂾꑢꍈꋑꄉꀃꑊꐮꄹꐛꂯꄷꇖꂟꇬꆏ,“ꎭꂵꆿꌺꆏꃆꅉꊿꐙꏭꀋꐛ,ꑡꆏꃅꑌꇇꀋꏢ。ꉡꆹꌞꀋꃋꊐꇈꌞꑮꃀꍯꑠꂿꄷꀋꁧꈨꇯꈨꀋꋻ,ꑠꉢꋋꈌꁧꑲꀋꌧ。ꉈꑴꌞꊿꄹꇬꉼꊞꎹꎆꋚꑌꀉꑌꈨꆏꋟꄉꃅ。ꀋꃉ‘ꌧꏾꇪꊞꄐ’ꇁꂯꄉꀐ,ꑠꄮꇬꆏꀕꂿꇎꌠꆏꂿꇁꅉꈫ”ꄷꈌꊨꃅꐊꂾꑢꍈꇱꊨꎼꇁꇈ,ꐬꆠꌊꌦꌠꉬꑴꄷ;ꉈꑴꆏꃣꈌꉉꄮꇬꀊꆺꄰꏯꅑꄉꑲꂷꄻꀒꁳꋉꎻꀐꄷ,ꐊꂾꑢꍈ“ꉼꊉꀖ”ꌌꄳꐳꄮꇬꆏ,ꄚꎴꄉꎭꂵꄰꌳꃈꅮꈧꌠꇱꌌꐱꈬꇓꌺꊐꅗ。v3P彝族人网(彝人网)- 彝族文化网络博物馆
ꇯꍝꀋꂓꌋꆀꎭꂵꆿꌺꑋꌦꊂꀊꉗꀋꐛꇫꆏ,“ꌧꏾ”ꇪꊞꄐꑟꇁꇈ,ꌟꒉꀉꑳꇱꋓꇅꈪꇿꈴꄿꂿ“ꇪꊞꄐ——ꑣꇬꇁ——”ꃅꃙꏦꈺꄉꑵꉙꑠꂷꑵꇬꎷ。ꋋꃢꇬꊿꃅꑽꏿꑠꀉꑌꈨꌌꉈꈽ。ꊿꄹꇬ,ꎭꂵꆿꌺꑌꀋꌦꇮꇬꆹꋍꃚꅿꀐꌠꉬꄷ。v3P彝族人网(彝人网)- 彝族文化网络博物馆
ꈤꋊꊁꆏꉠꁸꎁꍇꌠꌋꆀꈍꌺꁸꎁꍇꌠꐯꇯꉢꄟꌊꎆꆫꅉꇬꈍꌺꊂꁧ。ꇱꋓꊾꐗꅉꊌꂿꉆꑠꍈꇫꆏꈍꌺꂶꌠꃭꇁꁓꋩꀋꂓꄻꇬꇢꄉꍇꌠꆙꌊꀑꈑꄉꀱꂣꉌꂵꊖꋒꑕꇬꀀ。ꎆꈧꌠ“ꇻꀕ”ꃅꏜꋠꋍꈭꋍꇍꐺꄉꉢꇁꋍꋑꑟꌠꋌꋋꀋꌋꐤꁮ,ꌨꈓꌨꈓꃅꑳꉨꇬꀀꇈ。v3P彝族人网(彝人网)- 彝族文化网络博物馆
“ꋌꂯꆏꉌꀋꃹꃅꎭꂵꆿꌺꈿꄉꌦꀐꇬ,ꑡꉩꀒ?ꄓꄉꎸꋠ。”ꉢꋍꀂꏾꇬꊎꀍꉀꆷꆽꆷꀋꄿ。ꊁꆏꋋꄉꇨꇅꃃꌊ:“ꆏꑣꏾꀐꇬꁨꑣ,ꑡꂷꉥꅳꀧꈢ”ꄷꑓꂷꅪꌊꉠꏯꄉ。ꉡꑌꀈꈥꈌꇨꏗꌊꑠꃅꉇꌠꄸ,ꇿꌋꆺꐮꊰꑴꌦꂯ。ꊁꆏꉣꑊꁸꎁꌹꌠꐯꇯꉢꄻꎆꆫꀉꑳꈧꌠꍈꇫꎭ。v3P彝族人网(彝人网)- 彝族文化网络博物馆
ꀋꉊꊂꑲꆀꈍꌺꂶꌠꌧꈿꇬꆏ:“ꀈꍂ,ꉈꏠꐛꅹꄸ,ꉠꀉꂿꀊꋩꄹꉇꆀꌦꌠꅊꇉ”ꃅꉉꇈ,ꊿꋌꊏꌊ“ꎓ——”ꃅꒉꌐ。v3P彝族人网(彝人网)- 彝族文化网络博物馆
ꊂꊾꐗꈧꌠꉉꇬ,ꀋꂓꀃꃀꇫꄉꋍꑵꂷ“ꀧ”ꋍꀑꈑꈪꅞꄷ。ꊿꄹꇬꈍꃅꑌꌹꂷꉬꏭꐛꄷ。v3P彝族人网(彝人网)- 彝族文化网络博物馆
ꀉꑳꋋꂷꆹꐥꑲꆏ,ꑍꊏꇕꉬꈎꇈꑮꃀꑌꑮꄉꀐꋭ,ꄷꀋꁧꀉꑳꑍꍈꌕꍈꀉꄉꉬꇬꂯꌬꀋꄿ。v3P彝族人网(彝人网)- 彝族文化网络博物馆
ꊁꆏꎭꂵꃅꇫꑮꃀꂶꌠꀿꑳꆹꃆꃅꌦꇈ,ꑠꃅꌦꋋꑵꑊꋌꐛꁧꑵꉬꌠꉥ,ꀘꂾꇫꎭꑲꆀꍑꄷꄉ,ꎭꂵꆿꌺꂷꅍꈻꇬꇯꄉꃺꃀꀁꑳꑋꐯꇯꀘꌊꃪꃹꊐꇫꎭꀐ。v3P彝族人网(彝人网)- 彝族文化网络博物馆
ꀋꂓꑌꂴꆹꊿꇧꊂꄴꋖꑠꀋꐥ,ꄚꏂꑌꋍꈓꆏ“ꃀꑊꋌꆽꏻꏣꀨꌌꑠꂷꐙꃅꅍꋊꀐ”ꄸꌦ,“ꈍꌺꅍꋊꀐ”ꄷꌦꃅꑠꈨꇫꈌꐚꇁ;ꊿꈊꄮꃀꎆꐏꋚꐍꌠꄹꇬꑌ,ꀒꀋꂓꐗꃝꈭꀕꇍꀕꐺꇬꆧꁨꇂꃴꄉ“ꀋꃋꌺꀒꁙꉿꃅꑠꂷꑳꉨꇫꑌ”ꑴꄷꑠꈨꑌꉉꐺꌦꄉ,ꊿꃱꀋꐚꑠꁥꐬꆠꇧꈯꋧꅸꐺ。ꈍꌺꌋꆀꋍꀑꑌꈧꌠꃅꐎꑍꊏꈎꎖꐮꅍꀋꎼꀋꈴꈭꐨꑲꆀ,ꈀꄸꑌꐯꇯꋧꄉ“ꃀꑊꋌ”ꋋꂷꉻꏂꇧꎭꂿꄷꄉ,ꀱꐮꋯꐮꒉꌊꀋꂓꂶꌠꂷꅍꊿꊇꈻꈌꀞꂷꁍꎼꏢꇬꇱꄉꆀꐪꀘꇈ,ꅤꃅꐬꇬꊐꇧꎭ,ꐗꃝꂶꌠꑌꊿꊈꇱꊨꇈꇷꌊꒉꇬꇱꇧꎭꀐ。v3P彝族人网(彝人网)- 彝族文化网络博物馆
ꋍꈬꐨꆏꌠꑊꀘꂾꇬꀋꋊꀐ,ꊿꈊꄮꃀꄚꎻꈴꐺꌠꑌ“ꑊꋌꐥ”ꅐꆠꏭꀋꉉꀐꑴꄷ。ꀋꂓꐗꅉꈚꌠꇬꆳꃰꈧꌠꀉꄂꄡꇗꋍꈓꋒꀋꋒꃅꍵꄮꐰꆏꃨꁯꅩꇬꀕ,ꐛꑿꑌꄚꊐꇖ,ꁯꆮꑌꄚꃰꐺꇬꎷꑴꄷ。ꄚ,ꋋꈨꑠꆏ,ꑊꋌꑵꆹꀋꐥꑴꇬ,ꂿꑘꁡꇤꑠꇬꄡꇗꊿꌦꑇꌊꑆꈨꐥꑴꌦꌠꁮꅉꉬꌠ。
v3P彝族人网(彝人网)- 彝族文化网络博物馆
(ꌐ)v3P彝族人网(彝人网)- 彝族文化网络博物馆
ꇁꀦ: ꆀꉙꊅ ꁰꄻꌠ: beleys  |  ꄜꃑꌠ: