ꂴꊛ:ꉒꈌꈬꇬꉂꏣ(ꋍ) http://yi.yizuren.com/plus/view.php?aid=118
ꑍ
ꄚ，ꉌꂵꇬꉌꂅꑓꑣꐨꏓꇓꈧꌠꆹꈁꏾꃅꊿꋌꀞꋋꐷꎼꇁꄎꑠꑵꑌꀋꉬꅊꇈ。
ꌊꈯꇄꌠꇬ，ꂚꄏꋋꇅꃅꊿꇱꇴꌊꉈꏭꈴꁧ，ꉜꅊꇈꂿꆏ，ꋌꁳꌋꐓꆺꄜꀕꃅꄺꑣꎼꇁꌠ“ꊪꀪꁨꇐꐥꌠꈝꃀꍬꊿꁥꌠꅑꑘꍔꆫꅉ”ꉜꁧꌠꉬꅊꇈ。ꃆꏂꄑꈵꃀꈍꎳꏢꍬꄉ，ꑶꇽꁡꇤꋍꂷꇊꋍꂷꄹꌌꊨꀖꁧꄿꂿ，ꀊꅰꑠꃅꌦꌋꃅꄉꌊꀋꌸꌠ！ꄚꋋꆹꇯꍝꃅꈬꑍꈬꄅꀕ，ꊯꊪꑍꄀꄃꉪꇁꇬꀋꐛꇬꎷ。ꊂꄽꂫꆏꋌꄡꇗꋍꍈꆹꅉꐚꀐ，ꋋꆹꄚꍔꆫꅉꇬꏂꇫꊿꋋꂷꋌꇬꀋꃪꀋꏦꀋꄐ。ꊿꋋꂷꆹꋍꅿꈏꇓꃆꂮꃹꅼꃅꋌꅉꐚꌐ，ꀋꇊꇬꆏꑓꂭꋏꑠꇅꀉꄂꃅꎷꏸꇓꅩꇉꀕꑠꂷꌌꂁꋍꉌꂵꄸꈐꊐꄉꌠꂷꊂꈧꌠꇬꆽꅷꐺꌠꌡꄉ，ꋋꎼꀑꃀꑓꉱꏂꐚꀊꄶꇬꅞꀋꇊ。
ꁱꂷꀉꒉꀨꋍꁬꇊꋍꁬ，ꋌꊿꇱꀖꍰꅷꏃꊰꂷꊂꐎ，ꄚꋋꆹꀋꃉꆏꑞꂿꑌꇬꌤꀋꏸꀐ。ꁱꂷꀉꒉꀨꈧꌠꉬꇮꃅꋌꉜꌐꈭꐨꆏ，ꋍꉂꆏ“ꅇꆹꂾꈠꀧ”ꌠꉬꎻꈁ，ꄚꋋꇅꃅꉪꁱꑴꁱꑠꁬꇁꋍꑓꊝ，ꀋꇊꇬꆏꄯꁯꇁꄵꏢꇁꋍꀂꏾꇬꌸꌠꌡꃅꀑꃶꑓꈹꊐꇫꎍꀐ。ꂴꆽꌌꑤꊈꃀꈿꑳꀃꈈꁭꑭꃼꏯꄀꄉꌠ“ꑴꁱꋍꉎꀋꐥꌠ”ꋌꁬꆹ，ꈁꄷꇇꇬꈴꇁꌠꉬ？ꑴꁈꌋꆀꑴꏦꑠꆹꉬꇮꃅꋌꋒꌦꌐ……ꋌꉬ，ꋌꄽꂫꆏꌞꊖꁌꀉꆹꐴꇵꌤꃆꃄꌦꀐꅊꇈ。
ꂚꄏꎼ“ꑽꃤꍔꆫꅉ”ꄉꀱ“ꇌꉻ”ꇬꑟꇁꇬ，ꇭꀧꉌꂵꐯꇯꐙꄏꀙꐯꀙ。ꋌꎇꀀꈤꇬꊼꇅꀀꈭꐨꆏ，ꀋꎺꃅꋌꄓꇫꑌ，ꊛꄉꀋꆏꃅꋌꄓꇤꐮꏮꅷꐺ。ꋧꃅꈍꐯꐰ，ꄚꋍꈩꅉꀜꅉꐤꅉꃅꃴꃅꅉꆹꃘꍹꐽꎐꐥꌠ“ꇌꉻ”ꂷꀉꄂ，ꌌꋍꏭꍍꋉꆐꄀꇁꌠꁱꇐꆹꁱꂷꀉꒉꀨꇬꄀꄉ，ꈍꄮꇯꆐꌐꀋꉆꀐ，ꑞꐛꅹꃅ“ꑴꁱꋍꉎꀋꐥ”ꋌꁬꆏꌌꋂꒉꌟꃅꋍꂷꊂꇬꉖꇁꌠꉬ？ꇯꍝꃅꉌꌦꑓꉘꅼꇨꀕꀐ，ꀋꇊꇬꍔꍞꀂꏽꈉꊸꐨꄩꀉꒉꃅꁦꎆꇨ，ꋌꇯꍝꃅꉌꂵꎌꅉꀋꎍ，ꋍꃀꑋꅉꀋꑌꀐ。
ꑞꃅꑌꃅꄜꌦꀐ。ꌍꑓꉈꏭꃅꆳꂾꃚꃅꊭꂾꃚꈍꄮꇯꆐꑍꏃꃅꉬꉎꀉꁌꀋꁧꐊꁧꌐꀐ。ꂷꉐꑌꊂꈘꄉꐛꀋꄚꃅꆏꀐ。ꄚꂿꃅꇬꆹꆈꃅꆈꏸꀕꑴꌦ，ꀋꃋꋌꃢꆏꉽꐯꀋꃀꁏꉱꀍꃈꏵꀠꃅꄂꄉꂷꆹꀋꌡꀐ，ꋋꆏꀋꇊꇬꉜꉚꋯꀋꂿꌠꃄꅉꏬꌡꇫꎍ。ꑤꍰꇓꈓꑭꊂꃅꂷꇭꍈꇬꀋꅋ，ꀋꇊꇬꄆꍣꌤꃆꅐꌦꀐꄸꌠꅀ，ꋧꃅꀊꅰꃅꆈꏸꀕꇈꊽꃨꆰꐨꋌꌌꁦꎆꌦꌠꉬ。ꉘꀋꇉꌠꆏꆿꃀꁡꇤꃅꍜꀊꋨꁁꏯꆏ，ꂷꇭꂱꍀꋍꁙꑍꁙꇫꐂꐺꑴꌦ，ꄚꋋꆹꈍꃅꄂꆸꈘ，ꈍꃅꈜꎴꀒ，ꀋꇊꇬꃅꃴꇬꃅꏸꄽꂫꂶꌠꌡꃅꄂꆼꈘꅍꉌꌤꑓꀖꀙꐯꀙꃅꎌ。
ꋍꉌꂵꑌꋋꇅꃅꉜꉚꋯꀋꐛꃅꉌꌤꑓꀖꌠꆲꁏꑊꋌꇫꃹꇁꌠꋍꊨꏦꀃꅉꌌꉪꇁꀐ。
ꋋꆹꊋꇨꌠꍔꍞꉈꈽꃢꀋꉬꄷꌠꅀ？ꈍꃅꑴꁱꑠꁬꄚꁖꇁꌠꉬꂯ？
ꃅꈎꃅꆪꆹꆳꐊꁏꁧꌠꌡꃅꊰꈎꈢꋒꁧꀐꑴꇬ，ꄚꌤꆿꑠꆹꀋꎺꇁꀋꉆꇬꎷ，ꂚꄏꀋꃋꆹꈐꉌꆐꅑꑓꆐꋠꇶꍠꀕꇫꎍꑴꌦ。ꀊꋨꄹꈎ，ꑞꃅꋍꃅꑾꌙꂷꑐꇈꅉꀋꐚꑴꀋꌧꌠꉬꂯ？ꑽꃤꑍꏢꇁꐯꈽ，ꋠꌐꈤꀋꉆꌠ“ꎮꈁ”ꋋꐊꇁ。
ꂚꄏꆹꇯꍝꃅꊨꏦꄸꀖꌠꀋꏦꀐ。ꀎꇓꀉꒉꂶꌠꋌꅑꋻ，ꏦꈫꏦꎫꆹꋌꊿꌌꀊꄶꄉꊨꀖꀋꋺꑠꏢꇬꀋꐊ，ꑤꊈꎼꏹꅿꇐꑌꌋꉆꐨꐜꀋꈨꌠꑠ，ꑞꑌꋍꉌꂵꇬꀋꃹ；ꄚꑴꁱꋌꁬꆹ，ꊿꀉꁁꑠꂷꋌꌌꄉꒉꇴꅍꎍ，ꋋꆹꈍꃅꑌꉪꀋꀽ，ꃶꐚꃅꉪꀋꀽꌠꉬ。
ꊰꈎꂾꐮꐞꂱꑱꅉꁧꌠꄽꂫꒉꄷꀋꉬꀋꉆꍇꌠꑌꋋꍈꇬꉬꑴ。
ꀊꋨꄮꇬꂚꄏꆹꆿꃀꁡꇤꉹꁌꌅꈌꐥꌠꇝꂱꌤꃅꀨꇬꌤꃅꐺ，ꂽꇬꃨꆰꅇꇰꑠꁬꋋꇅꃅꂚꄏꋌꇱꄀꌊꉈꑴꐥꁧꌦꀐ。ꋍꇬꋨꏦꌠꏮꃏꐎꀊꏀꑴꌦꌠꄗꌦꆀꑼꂶꌠꆹ，ꀊꋨꄹꉇꂵꆧꈧꊝꀕꄮꇬ，ꅿꉗꌑꐩꀕꌠꏪꊪꍔꄌꌊ，ꀊꉗꏢꐯꀋꂿꀐꌠꃺꃶꀂꑳꌟꃅꂚꄏꏭꉌꌤꑓꀖꅇꄜꉏꄜꇁ。
“ꍨ，ꑦꂚꀋ，ꉣꑊꃅꄷꐛꑆꋦꌠꏪꊪꊼꇅꅝꉏ。”
ꂚꄏꎋꒃꌊꐹꄮꇬꆏ，ꌦꆀꑼꇱꇬꄉꌦꇈꉉꇬ，ꊼꇅꇁꉚꄉꄹꃥꂷꀊꄶꐥꑴꌦꄷ。ꃶꐚꃅꇬꆹꁦꎆꄀꌠ，ꄹꃥꆹꈍꄮꇯꆐꃅꆳꀋꏮꁏꑳꃹꇁꀐꌠ。ꋍꇇꇬꆹꇭꍏ“ꃀꄤ”ꎧꀻꄌꌊꐺ，ꑓꋪꑓꑟꉇꀋꈻꃅꏮꌉꈿꈆꀕꍈꄻꂯꎍꌠꂚꄏꇬꉜꎍ。
“ꀐ，ꑸꆀ，ꆏꀊꄶꉆꌊꑞꃅ！ꐳꃅ，ꂽꑼꋍꁥꇬꐋꀨꀉꆹꉬꀐ，ꉢꉉꄻꅐꑴꌦꄷꌠꅀ？”
ꋀꊇꌕꑻꆹꋟꑌꋠꌧꑌꌧꃅ，ꎧꅝꈁꑓꅩꄮꇬꆏ，ꄗꌦꆀꑼꂶꌠꋋꇅꄷꂚꄏꏭꉉꇬ：“ꆏꑞꈎꌠꉬꆏꀋ？ꎼꈎ……ꊿꂾꌕꊰꈎꂯꄉꀐꇬ，ꌤꃆꋌꐘꌌꂥꀘꐝꉅꄿꀐ，ꊝꋽꑲꆏꀒꁨꋍꂷꎹꅲꀐ。ꆏꉜꇬꑸꆀꈍꃅꐙ？ꀊꋨꄹꈎ《ꂛꊨꅫꃀꋓꄉꃅꏀꀖ》ꌠꐂꂶꌠꋌꉬ，ꀋꃋꆹꄜꉺꈆꇬꑴꁱꌤꃅ，ꉢꉜꇬꆹ，ꆐꑊꆹꋍꁯꃅꇬꍑ。”
ꈍꃅꐙꄿꂿ，ꌦꆀꑼꅇꁵꎼꇁꑲꆏ，ꀊꅰꃅꑸꆀꆹꂴꇰꆐꉌꃹꉬꅲꀐ，ꋍꑊꏓꋍꁯꐛꂯꈯꄔꇬ，ꈍꃅꑌꌦꆀꑼꌉꈿꃀꂷꈿꌠꀋꎵꌠ……
ꀋꄹꄷꋋꆹꑽꈜꏢꃅꆹꉉꑲꆏ，ꄚꅑꑘꆹꈀꄸꀵꌠꉬꂯꆏ？
ꎸꅍꌍꑓꉈꏭ，ꄡꇗꃅꒉꆈꏸꀕ。ꀊꄶꃅꄂꈯꄔꇬꋋꇅꃅꀕꏸꈍꑋꂷꐂꄓꎸꇁ，ꈍꃅꑓꌂ，ꈍꃅꏷꇅꅍ，ꈍꃅꈛꑌꎼꈀꀒ。ꂚꄏꉜꇬꄗꌦꆀꑼꆹꋍꏢꁮꇬꑌꎍꌟꃅꐛ，ꅑꅷꀋꃋꑟꇁꇬ，ꄗꌦꆀꑼꄡꇗꋍꇬꉌꁠꎍꑴꌦꄡꑟ。ꈍꃅꅑꑘꌌꌦꆀꑼꁳꀵꎻꉆꂯꆏ？ꊨꏦꅑ，ꉬꇮꃅꊨꏦꅑꌐꌠ。
ꋋꆹꌋꅪꉌꃃꇨꑠꂷꑌꀋꉬ，ꄚꋌꑸꆀꏭꆹꈍꃅꅱꀋꅐꄡꇗꑴꃅꇧꍈꐥꌠꉬ。ꀊꋨꄮꇬ，ꈬꉘꃅꄷꄓꈁꁏꌠꌉꈿꊋꀋꐛꑴꌦ，ꌉꈿꅉꈚꌠꄡꇗꀋꆷꇰꏢꀕꃅꎍ。ꄚꄜꉺꈆꈚꌠꆏ，ꀊꅰꃅꑴꁱꑴꅉꈚꌠꄉꆷꃹꎍꌒ，ꌤꆿꃅꅍꐜꀋꈨꃅꎍ。ꋍꑍꆏ，ꂚꄏꌉꈿꅉꇬꄉꀱꀁꇬꑟꇁꇬꆏ，ꑸꆀꂶꌠꃅꅍꀋꐥꃅ，ꑊꈷꇓꂴꆽꑌꄉꑓꊏꑓꂡꑴꅷꐺ。
“ꉐꑴ，ꉠꅿꑴꁱꌧꃀꇆ，ꆏꁳꉈꑴꋍꃢ《ꂛꊨꅫꃀꋓꄉꃅꏀꀖ》ꑫꂶꌠꆹꀋꑵ，ꆏꀉꑳꌕꈎꈩꅍꋋꈨꈩꌊꑟꃅꂯ？”ꌐꃶꋍꏭꊨꏈꐆꃅꉈꑴꉁꐆꃅꉉꅷꐺ。
ꋋꇅꃅꀙꋌꍞꇫꎭꇈ，ꏮꂚꄏꏭꉜꄉꉌꂵꆅꐆꃅꉉꇬ：
“ꉠꅿꈆꍈꌠꒉꀋ，ꆏꉢꑓꊏꑓꂡꑴꌠꉌꀋꃹꑲꆏ，ꉢꁳꃅꉒꑴꄷꌠꅀ？”
“ꃅꉒꑴ，ꑞꃅꃅꉒꈨꑴꄜ？”
“ꉚ，ꀋꑇꆺꌋꀕꃅꇯꄉ，ꈍꉗꏢꆏꂁꄉꄎꂿ！”
“ꑡꈍꉗꏢꂁꄉꄎꂿꄜ？ꃅꉒꈨꌋꆀꑓꊏꑓꂡꈨꑞꑵꐯꃆꂮꐥꄷꌠꉬ？”
“ꉚ，ꑞꃅꐯꃆꂮꀋꐥꀋ？ꊼꇅꄺꑣꀋꄉꇬꆹ，ꑞꄹꉈꆏꊿꎔꂚꃨꐎꑠꂷꇬꁖꇁꄉ，ꉠꂚꈆꍈꌟꒉꋌꅰꋌꑷꋌꇑꌊꁧꑲꆏ，ꉢꈍꃅꂯꆏ！”
“ꀉ——ꑴ，ꆏꑡꉉꅷꐺꌠꉬꄜ！”
“ꉆꀕ！ꑡꉉꅷꐺꌠꉬꃅꇯꉉꑴꌦꀐ！ꅽꅿꐛꃆꊇꁧꊼꇅꉜꇁꉏꇆ！ꑸꆀꀱꉇꈄꁨꌺꂷꇬꄉ，ꂚꄏꅿꑍꎺꁱꄯꒉꋐꌠꒃꌊꁏꄉ，ꃚꈪꃚꐕꃅꋌꀘꎼꇁꀐ：ꀒ！ꉡꆹꇯꍝꃅꉪꇬꀋꑟ，ꄚꃄꎭꃪꅧ、ꃅꉒꃴꌩꈍꀕꃅꎍꌠꑷꇽꁡꇤꑠꂷꇬꄉ，ꉡꆹꆈꌠꑮꆜꑠꂷꉡꉂꇁꎻꀋꈁ！ꃷꇎꃷꇤꈧꌠꋍꏭ‘ꍑꂷ’ꍈꌡꄷꍗꀴꌐ，ꄚꇯꍝꃅꅇꐚꉉꑲꆏ，ꉡꆹꑓꏮꋍꅿꐛꐨꐛꄟꂶꌠꇬꋍꇅꇯꉜꀋꋺꑴꌦ。ꌤꆹꈍꃅꅐꇁꌠꉬꀋꐚ，ꉡꆹꇯꍝꃅꀕꉒꈬꇬꀀꎍꌠꌡ……”
“ꉐꑴ！ꆏꋋꈨꀘꌊꑟꃅꂯ？ꋋꆹꁱꇐꉾꃪꀉꇨꑠꈨꑌꀋꉬ？”ꂚꄏꆹꑸꆀꈌꇑꄉꉉꇬ，“ꋋꆹꀋꉊꈍꄮꇬꌤꉬꀐ，ꉢꉉꆎꇰꀋꋺꑴꌦꄷꌠꅀ？”
“ꈍꄮꇬꉬ？”
“ꉣꑊꑮꂴꆽꅀ，ꑮꄉꊂꉬ？”
“ꆏꊿꄸꑊꋌꑊꏦꇯꀋꇮꃅꉉꉡꇰꋺꀐꃅꇯꉉꑴꌦ，ꉬꇮꆏꉉꐝꈷꌐꀑꅀ？ꉜꉏ，ꀏꏯꄉꀊꅰꃅꅲꌒꌠꅑꑴꌦ……ꀋꇷꀒꀋꇷꋠ，ꈨꑗꇬꉚꇁ，ꉘꁮꇬꉚꇁ，ꉢꈍꃅꂯꀋ？ꊽꐬꆠꌠꆲꇨ，ꊽꉌꂵꇫꑘꀋꒃꌠꉂꏣ！ꉚ，ꑞꈨꃅꅍꎸꀋꊌꄜ，ꑡꂷꐬꆠꇆ？ꑞꈨꑘꀋꒃ？ꂽꑼꏃꂠꌋꆿꃀꁡꇤꇫꐥꁧꑲꆏ，ꅽ‘ꍑꂷ’ꆐꑊꉌꂵꐯꇯꌦꌺꌡꌠꀋꉬꄜꅀ？”
“ꅽꃬꂱꀯꋑꌠꂭꐯꇯꄉꉏ，ꆏꋍꇬꑋꍍꋉꀋꉆ！”
ꂚꄏꆹꇨꇅꃃꌊꀋꎺꃅꋌꁶꁱꄜꇬꌸ。ꑊꈷꇓꊰꇫꐷꇈꀈꃀꐛꌐꀐ。ꌌꑓꊏꑓꂡꑴꌠꀙꏡꌠꑌꐂꇁꇈꊰꀏꃄꅉꇬꏶꄉꐷꑍꐦꅐꇫꈴꁧ，ꑸꆀꋌꇷꈌꉛꀕ，ꋍꉌꂵꇬꄚꄉꇤꋲꌠꅇꐕꌐꂷꀕꁦꎆꌦꀐ！
ꑸꆀꂴꆽꆹꋌꇷꈌꉛꅍꇬꉆꎍ，ꋌꉪꄉꇬꆹꈁꑓꇬꀙꒉꈧꌠꌨꑻꇫꎭꏢꉨꌠ，ꄚꋌꏮꂚꄏꑊꑍꂶꌠꉜꇬꆏ，ꀋꎺꃅꋌꅞꀏꃄꅉꇬꀀꄉꀜꆽꄹꑳꉨꀐ。ꂚꄏꋋꄖꒉꇬꆏ，ꋌꌦꏟꈯꀕꃅꂚꄏꀂꄂꇬꀵꄉꇈ，ꄓꇬꉆꄉꏸꑮꀛꅉꐁꅉꃅꉉꇬ：
“ꑷ，ꌦꆀꑼꎹꁧ，ꌦꆀꑼꎹꁧ！ꆏꊽꇬꆼꍅꇨꀐ，ꉢꋌꎷꄉꑗꉬꉉꁧꂯ，ꉢꋌꎷꄉ……”
ꂚꄏꂶꌠꑸꆀꇱꈻꌊꉈꏭꈴꒉꄮꇬꆏ，ꄧꀕꃅꄗꌦꆀꑼꂶꌠꈏꃹꇁꀐ。
“ꉢꁨꏭꌉꈿꅈꇬꃆꂮꅲꇁꌠ， ꄗꌦꆀꑼꉉꇬ。ꋍꑓꊏꑓꂡꊼꇅꈩꇈꄻꀋꈴꐆꃅꎍ，ꆐꑊꌤꃆꆹꇤꊁꊼꇅꄉꇬꉆꉈ？”
ꑸꆀꑓꁴꌩꇈ，ꇨꇅꃃꌌꁖꉈꏭꈴꁧꀐ。
ꄗꌦꆀꑼꆹꂚꄏꅿꁨꏭꌉꃆꄛꇰꌠꅲꌐꈭꐨꆏ，ꑓꋪꇬꉌꆐꅑꈴꀋꄿ、ꉌꂵꐛꀋꐛꐆꃅꉉꇬ：
“ꉡꆹꄀꇗꇱꉪꏦꑽꃤꀵꀐ，ꑸꆀꆐꑊꆹꉜꎼꇁꇬꇯꍝꃅꐯꋭꑠꋍꋒꀋꉬꅊꇈ。”
ꂚꄏꑓꑟꉈꀋꈻꃅꏮꄗꌦꆀꑼꉜꎍ，ꀋꇊꇬꃅꒉꆈꏸꀕꄮꇬ，ꏮꁖꅔꅐꇁꌠꃅꏸꈍꑋꂷꇬꉜꎍꌠꌡ。ꌦꆀꑼꃶꐚꃅꄀꇗꇱꉪꏦꑽꃤꃅꀐꄜꅀ？ꄚꈐꏭꋍꅿꃝꐨꑌꐊ，ꃅꈎꃅꆪꀊꋨꄮꇬ，ꈀꄸꑌꃜꇤꇱꈴꌊꐯꁳꌐꌠ，ꋌꁳꅑꑘꀵꄷꑎꆹ，ꃅꋊꁳꅑꑘꀵꄷꄈꈜꁧꐥꌠꉬ。ꃶꐙꃅꉉꇬꆹ，ꂱꑱꄿꐨꃅꐮꄹꐛꌠꑌ，ꄡꇗꀋꉊꑮꑟꂾꅇꏤꇬꀜꐆꇬꑌꋒꀋꄿꌠꉬ。
ꄗꌦꆀꑼꅿꐛꊈꆹ，ꋍꐥꍂꃅꌉꈿꌠꌋꆀꐮꐞꀋꉆꌠꉬ。ꁋꑟꀕꌠꉌꃹ，ꑻꈭꀕꌠꉌꃹ，ꃆꋐꌟꃅꋐ，ꁰꈘꎭꈘꄏꌠꉌꃹ。ꋌꑸꆀꀋꑍꊂꋋꇅꃆꂮꈨꅲꇈ，ꀱꇊꀱꃅꂚꄏꏭꉉꇬ：
“ꈏꇓꃆꂮꉢꀖꆏꁳꀐ。ꌞꊿꉂꆹꆏꎬꀱꏿ，ꊿꅽꂴꆽꅇꎹꐺ，ꌤꋌꑠꆹ，ꅽꊨꏦꇫꏲꂠꀋꌒ，ꉎꎀꍹꇫꊂꇁꅉꈫ。ꑦꂚ，ꆎꆹꌤꃅꇬꁣꏙꀋꉆꌠꉬ！ꃆꏂꑍꆏꑭꄑꁦꌦꀐ，ꆏꇫꁧꌠꆹꄧꀕꃅꆿꃀꁡꇤꉫꌦꀐ。ꅽꉂꏣꋍꇅꇯꆏꄝꐰꉎꇙꈧꀋꉆ，ꀋꎪꃅꌉꈿꊋꐛꌠꌌꁠꀋꐥꃅꄉꀧꄉꌶ！”
ꀊꋨꄹꉇꆏ，ꂚꄏꆹꑭꄑꄉꁧꀐ。
ꏮꃏꐎꇬꐞꁧꀊꋨꄹꉖ，ꋌꀱꀀꅉꇬꀋꆹꃅꃥꈿꅉꈐꏭꊫꄉꌠꑳꁨꇬꀀꁧ。ꌊꁁꇄꌠꇬꆏ，ꂚꄏꆹꌞꊿꅿꉌꇿꑓꇿꌠꏇꃚꇱꄖꀀꐚꐝꍠꀕꇫꎭ。ꅲꇫꄨꉙꑵꌠꀋꃉꌌꑲꆀꌐ，ꑫꉜꌠꊿꌋꆀꑫꑵꌠꊿꉬꇮꀱꇁꌐꄉ，ꂚꄏꀉꄂꋌꄖꀀꐚꄚꎭꈨꀋꉬꃅ，ꑳꈐꏭꑾꃅꈧꌠꑌꋌꇷꅷ“ꊉꀕ”ꃅꏅꐚꏿꌐ，ꋌꉈꈍꃅꑌꀀꑌꇴꒉꀋꅲꀐ。ꋌꆿꃀꁡꇤꐞꇁꊂꋍꈭꏝꀉꄂꐛꑴꌦ，ꄚꃅꒊꃅꇁꐛꐨꆹꀉꒉꃅꐛꐈꌦꀐ。ꒈꂪꁆꏯꄓꈁꁏꁥꌠꊿꅥꀙꅼꇨꐛꅹ，ꀋꆏꃅꁈꒉꀑꁆꏯꂁꇁꄉ，ꆿꃀꁡꇤꊂꆈꇉꂾꁧꉈꑴꋍꃢꄓꈁꁏꊿꁥꌠꇱꇑꍆꌊꁧꌦꀐ。ꂚꄏꉌꂵꐒꊀꇀꌦ。ꆿꃀꁡꇤꃺꑌꈧꌠꅿꀑꇬꋬꂻꐨꈧꌠꉪꇁꇬꆏ，ꋌꀊꅰꃅꐒꊀꇀꌦꀐ。ꄚ，ꋍꏢꁮꇬꑳꈐꏭꂾꃚꈨꆲꁏꃅꌗꇬꐊꇁꄉꋍꅿꉪꈜꋌꇱꃸꆽꇿꎭꌐꀋꐚ。ꋍꉌꂵꄚꄉꌙꈈꀕꃅꎌꌦꀐ，ꀋꇊꇬꉌꂵꌋꆀꈬꑳꉬꇮꃅꇬꀋꐂꌐꀐꌠꌡ。
“ꊿꁘꑊꋌꀋ，ꆎꑟꈨꏦꅍꐥꄜ？ꌤꆹꋌꇱꋣꌉꎼꇁꌠ，ꉡꆹꋍꇬꋪꒃꌠꉬ！ꆎꑟꂷꏦꅍꐥꂸ？”ꌋꅪꂶꌠꃚꋒꆹꊿꋌꅰꑷꌊꀑꑆꃺꌦꄈꏾꃅꎍ。
“ꉢꇫꏦ，ꆎꏦ……”ꌺꃰꂶꌠꃚꋒꆹꀋꄚꈍꃅꐙꇈꃀꑌꂾꑌꃅꎍ。
“ꑞꈨꉡꏦꅍꐥꄜ？”
“ꅽꑓꋪꀊꋨꋒꉢꋋꏦ。”
“ꇯꍝꃅꅀ？ꉆꀕ，ꉠꑓꋪꋒꑞꂷꏦꅍꈨꐥꄷꌠꉬꄜ？”
“ꅽꑓꂡꆏꇱꑴꌊꑠꃅꆈꏸꀕ，ꑓꋪꋑꌠꈍꃅ……ꆿꃀꑓꋪꋒꌡꉏ。”
“ꉆꀕ，ꆿꃀꑓꋪꋒ！ꆏꇫꏦꅀ？ꆏꇫꏦꋭ？ꆏꉢꇱꇣꋠꇫꎭꌠꏦ！”
……
ꂚꄏꑓꋪꋑꌠꋌꇷꇰꇫꄉꀐ。ꑾꃅꈧꌠꀊꅰꏅꀊꅰꊋꑌꇁꀐ，ꀋꆏꃅꏅꐚꏿꅷꐺꇬꎷ，ꐚꌊꋍꈁꑓꇬꌸꇬꑌ，ꋍꉌꂵꇬꀉꄂꒉꈾꌟꃅꈾꇫꎍ。ꋋꆹꇯꍝꃅꐯꄷꌠꅀ？ꀀꈤꇬꄉꋌꄓꇫꑌꇈꀋꇊꇬꀋꐂꀐꌠꉌꂵꂶꌠꋋꇅꃅꄏꀕꄹꄩꐂꀏꅞꃅꎍ，ꋋꆹꈍꃅꄚ“ꆿꃀ”ꇣꋠꇫꎭꏦꌠꊿꋋꂷꌧꂿꏾꌠꉬ。ꄚ，ꋍꊨꏦꀃꅉꄽꂫꆏꋌꋰꄉꀐ。ꋋꆹꑞꌗꂯ？ꃆꏂꑍꆏꑭꄑꁧꀐ，ꂽꑼꇬꊎꌦꅐꐲꑷ，ꋦꐋꃷꇎꇬꊎꎭꈠꋠ，ꌦꆀꑼꇬꊎꉌꂵꊸ，ꊨꏦꀃꅉꑡꑖꉬꐥꄉꄚꁍꇗꎴꇉꌠꌤꑠꁳꆼꁱꑭꑴꈜꑲꌊꐺꉆꂯꆏ。
ꋍꏢꁮꇬꑳꈐꏭꊛꄉꅇꀨꋋꇅꃅꏭꆦꎼꒉꌦꀐ，ꋋꆹꇴꌊꈊꋚꍈꇁꌠꄹꃥꈧꌠꇁꀐꐛꅹ，ꎲꀋꑌꌠꉌꂵꑍꂷꌠꐮꏯꉉꅐꇁꌐꂿꄷꄐꄉꌠꅇꈧꌠꋇꇱꄹꂱꑱꉌꃀꇬꊐꄉꍹꐛꎻꌦ。ꄚꑠꃅꑴꇬꋍꅿꉂꏣꆹꌦꆀꑼꅇꁵꌠꅇꃅꀋꅲꇬꎷ，ꃅꄵꀕꃅꆿꃀꁡꇤꇬꃅꉒꈧꌠꌡ，ꀋꆏꃅꇙꈧꆺꀕꂃꐺꇬꎷ。ꑠꃅꑴꇬ，ꋍꅿꉂꏣꆹꄽꂫꆏꎌꅉꎍꑘꒃꀐ，ꂚꄏꆹꌊꇁꆿꃀꁡꇤꑟꈭꐨꆏ，ꀋꆏꃅꌉꈿꈧꌠꇁꋍꅿꐥꐨꉬꇮꃅꋌꇱꇑꍆꈥꊐꇫꎭꌐꀐ。ꋍꅿꉪꇐꆹꀋꇊꇬꌌꋍꃢꊞꇸꎼꇁꌠꌡꃅ，ꀊꌃꐝꍚꅍꎍꀐ，ꋍꑓꐛꈌꐛꇁꌠꌉꈿꌠꌋꆀꊋꐛꄮꇳꃚꇿꃚꒈꃚꉏꃚꀉꄂꉬꌐ。ꀋꌦꑗꉘꋠꃅꉈꈽꈯꄔꇬꄉ，ꊋꐛꐨꀉꒉꃅꊌꌠꎁꃅ，ꋍꊋꃤꃅꋌꌞꄚꊐꌐꀐ。
ꌤꆹꃅꌐꂯꀊꎴꃅꍣꑴꌦ,ꂁꆿꃀꁡꇤꊂꇉꂾꁧꇬꀀꌠꄓꈁꁏꊿꈧꌠꋌꎼꌸꉻꈭꐨꆏ，ꂚꄏꀱꏮꃏꐎꇬꋍꏮꇁꇈ，ꌦꆀꑼꋍꑊꐮꂿꄮꇬꆏ，ꌦꆀꑼꅇꂷꂴꆽꇫꌠꆹ:
“ꏟꈯꀕꃅꋰꄉꄷ!”
ꈬꉘꃅꄷꑭꁘꈍꃅꐕꑌ，ꄡꇗꐟꈯꃅꄷꌡꃅꐳꀋꄐꇬꎷ。ꌞꃅꄷꆹꑳꎎꉻꄑꌠꈍꄮꇯꆐꌐꀐꇬ，ꄚꇬꆹꀋꃋꑲꆀꇬꊎꉻꄑꐺꇯ。ꄚꌤꆿꅿꀻꎆꃆꂮꆹ，ꈍꄮꇬꑌꊽꉌꊋꇬꐊꄉꀋꏮꀋꆦꇬꎷꑠꑵꉬ。ꂽꑼꇬꊎꌉꈿꌦꅐꐶꑷꑴꌦ，ꏲꌋꏷꇨꉻꄑꌠꂴꆽꊭꄏꄉꇬꆹꌌꐛꐪꈴꌠꇬꀉꄂꃄꏢꉪꄉ，ꏛꃅꂽꈻ。ꄽꂫꆏ，ꊖꁍꇬꉱꎍꌠꁱꂷꀉꒉꀨꑠꏾꇱꎼꑭꁘꋌꌭꄉꀐ：
ꄗꌦꆀꑼ，ꆏꑞꃅꂁꅉꉱꅉꃅꐺꌠꉬ?!
ꊛꄉꉜꅷꆹꇬꆏꊽꃨꆰꌠꁱꂷꀉꒉꀨꑠꁬ，ꋌꌋꆀꏮꃏꐎꄈꊈꇬꅲꍮꌦꀐ：
ꆍꊇꀋꎪꃅꇥꀯꈍꃅꐙꈨꌠꌌꌬꂿꄷꌠꉬ?!
ꊛꄉꀏꉜꅷꒉꇬꆏ，ꋍꁬꋍꁬꃅꉙꇐꁱꇬꇯꄉꌠꑴꁱꈨꌋꆀꏲꌋꇱꌌꌬꅷꐺꌠꇥꀯꄸꐪꈧꌠꉬꅊꇈ。ꄚꈯꄔꇬꊋꇨꃅꌌꅇꀮꉏꍝꌠꆏꌉꈿꈆꇬꈈꍈꂚꄏꉬ。ꋌꆹꆿꃀꁡꇤꄉꌤꃅꄐꍈꄺꄮꇬ，ꇭꍣꄈꑼꂷꌋꆀꇝꂱꂽꑼꂷꅿꐛꊈꋌꄝꆘꅝꇫꎭꄉ，ꉇꉈꃅꆈꌠꑮꆜꂷꇬꅰꈻꅷꐺ，ꌞꆈꌠꑮꆜꂶꌠꋍꌌꈩꇎꈩꅗꃅꈩꈭꐨꆏ，ꌞꊿꋌꇤꇫꎭꌦꀐ。ꑴꁱꇬꄜꅐꎼꇁꌠꆏ，ꊿꈀꄷꑌꑓꏭꇬꉚꑲꆏꋍꅿꄷꅠꌠꃅꐪꑽꑋꈧꌠꇬꌂꏷꈌꀕꎻꌠꄜꇐꉬ。
“ꏟꈯꀕꃅꋰꄉ!”
ꂚꄏꆹꄗꌦꆀꑼꇱꇴꌊꋍꌤꃅꅉꇬꉆꄉ，ꈁꑓꐈꌊꊿꋌꀋꌧꂷꐛꇫꎍ，ꑓꋪꇬꆹꉪꈾꅍꐛꂨꃅꀀꎍꌠꌡ。
“ꌦꆀꑼ，ꁱꂷꀉꒉꀨꌋꆀꑴꁱꐯꇯꉢꉜꀐ，ꉡꆹꑸꆀꂶꌠꆹꀊꅰꑠꃅꐙꎼꀋꈁ，ꉢꋍꅿꌐꃶꂷꃅꄉꇬꆹ，ꉣꑊꈯꄔꇬꑞꈨꐥꄿꂿ，ꉡꆹꉬꇮꅑꑘꐥꌐꌠꉬ。”“ꐋꀨꀉꆹꀋ，ꆎꆹꅑꑘꑞꈨꐥꂯꆏ？ꅑꑘꐥꌠꆹꉢꄉꉬ，ꉡꌦꆀꑼꋋꂷꆹꇯꍝꃅꌺꇰꃀꄡꀧꀕꀐ！ꀊꑴ，ꆐꑊꃝꐨꋌꐘꆹꉢꃶꐚꃅꅽꃀꈴꀋꄿꀐ。ꀋꃉꆏꁨꂄꃅꂄꌐꇬꎷꅀ，ꁨꀞꐕꃅꈁꋧꋍꈭꋧꃅꃜꁏꁨꎭ，ꊯꎖꑍꇬꆏꇇꈴꅍꄯꒉꀞꇫꎭꂿ。”
ꆀꐪꈍꈩ，ꃜꐪꈍꀋꈩ。ꃜꁏꅿꏤꐪꑌꄡꇗꑮꑟꌠꏤꐪꌟꃅꄺꀱꀋꉆꀐ。ꋋꆹꇨꊸꇨꀐꉂ！ꂚꄏꉌꂵꇬꆹꃀꅉꆐꃨꆰꎌꅉꀋꎍꃅꐙ。ꆿꃀꁡꇤꋍꉻꅓꑘꀊꋨꐘ，ꋌꆹꐥꍂꃅꉌꆐꀋꅑꑓꆐꀋꋠ。ꑸꆀꆹꏟꈯꀕꃅꄝꇫꎭꀋꅲ，ꊿꈀꄸꑌꇬꉚꅐꇁꉆꌠꉬ，ꋋꆹꂄꃅꌠꌌꄸꐛ，ꄸꃅꌠꌌꂄꐛ，ꑊꋌꉱꃀꌌꐰꇗꎭꈐꃅꆦꌠꉬ。ꊨꏦꐥꐨꀂꏾꌌꊼꇅꂁꉱꄉꌠꎁꃅꌠ。ꄚꇯꍝꃅꑮꑟꌠꆹꀊꉘꂷꏦꋨꄮꇬꐋꀨꆹꀋꉬꌠ，ꈁꉪꈁꏾꃅꀋꉆꑠꑵꉬꐛꅹ，ꋋꆹꁨꉪꊁꉪꃅꎍꀐ。
“ꑞꉬ，ꑓꊏꑓꂡꌌꑴꋺꀊꋨꋒꆏꋌꀋꀬꅀ？ꉈꑴꆿꃀꑓꋪꀊꋨꋒ？ꌞꊿꑫꑵꑫꉜꌠꃅꇫꏦꌐ，ꆎꆹꇬꀋꏦꅀ？”
“ꌦꆀꑼꀋ，ꉢꉪꇬꆹ……”
“ꉈꑴꀉꁁꑞꂷꉪꅍꈨꐥꌠꉬ!ꌞꊿ《ꂛꊨꅫꃀꋓꄉꃅꏀꀖ》ꑵꌠꆹꇇꀤꐋꀉꆹꌠꉬꀐ，ꌞꊿꆹꇯꍝꃅꀕꌠꉬ，ꐮꂿꄷꆏꉂꏣꌧꑵꌠꍰ。”
“ꉢꉪꇬꆹ，ꋌꈎꄜꀊꏀꑴꌦ，ꉡꆹꋍꇬꊼꇅꇇꀤꉆꌠꉬꏭꐛ。”
ꄗꌦꆀꑼꆹꑋꅉꇬꄉꄓꇬꉆꇈ，ꈁꑓꇬꀋꑇꆺꌋꀕꌠꑊꑍꂶꌠꋋꇅꃅꐜꀋꈨꒉꀐ，ꑓꋪꋑꌠꋋꇅꃅꐈꌊꏟꈯꀕꌠꐛꇫꎍ。ꑞꑌꉬꇮꀋꎪꃅꏤꄉꌐꀐ！ꂚꄏꆹꃶꐚꃅꌦꆀꑼꅿꋻꅑꐨꋌꅉꐚꌠ，ꋋꆹꇬꊎꑸꆀꅿꎭꈐꈍꃅꐙꌠꇠꅷꐺꌠꉬ。
“ꉢꌧꆎꇰꂿ。”ꄗꌦꆀꑼꏦꒉꋥꐆꃅꉉꇬ:“ꀋꃉꆏ，ꉣꑊꐯꇯꅑꃤꀋꐥꀐ，ꆼꍅꌤꏲꅉꁳꋍꇇꀤꎻ。”
“ꈍꃅ，ꋋ……”
“ꄈꊈꐮꇖꄉꏤꄉꀐ：ꃆꏂꑍꆏꁏꄉꌉ！ꂴꆽꏭꇫꄉꌉꈿꑴꌦ，ꉪꊇꆹꈁꏾꃅꑸꆀꏤꋋꈨꁳꌌꈩꀋꉆ。ꁏꄉꌉꌠꆹꏃꑍ，ꃣꈌꀞꌠꆹꑍꀕ，ꉈꑴꋍꑍꄻꆏꁳꃜꁏꇇꈴꅍꄯꒉꀞꎻ。ꂚꄏꐋꀨꀋ，ꋋꆹꐥꍂꃅꇏꀋꉬꀐ，ꋋꈴꌊꈜꎴꇨꀐ！ꊾꋠꆿꃀꆹꐥꍂꃅꊿꋠꌠ，ꀉꐩꆹꐥꍂꃅꃬꑝꃬꋠꌠ，ꈋꆹꐥꍂꃅꊾꐔꋠꇬꎷꌠ，ꋋꆹꁨꇐꐥꏠꌠꅿꇗꂷꀕ，ꀉꒉꄮꇬꆏꈍꃅꑌꄡꇗꁨꇐꐥꊿꏠꌠꊿꉬ，ꋋꆹꉪꊇꄹꏦꌋꆀꈝꃀꇬꉌꀋꃹ，ꋋꈨꆹꉬꀋꉬꌠꈯꄔꇬꉬꀐ。ꉡꆹꏲꂠꈆꏮꉉꋺꀐ，ꀀꅉꀉꁁꁨꁸꎸꆏꁳꐮꄉꀐ。”
ꌤꆿꀞꃆꂮꆹꇯꍝꃅꁣꀋꐥꃅꀕꌐꀐ。ꊰꑋꐛꈭꐨꆏ，ꑸꆀꌋꆀꂚꄏꑋꂱꑱꅉꀀꁧꀐ。ꎊꈬꀉꆹꈧꌠꎴꍤꄹꉇꆏ，ꋍꑊꆹꉈꑴꋍꃢꐮꂿꌦ。ꂚꄏꆹꋌꀃꑍꈍꉈꆏꐥꐨꐤꊋꇨꌠꉪꄉ，ꑸꆀꏭꆏꑞꈉꆏꑞꒃꌊꁧꄷ。ꋌꅞꁱꄜꂴꆽꑌꎍ，ꑓꋪꋑꌠꃅꆈꁮꀕ，ꂽꀎꇓꁏꄉꌉꄮꇯꆐꇔꇨꎭꀐ，ꀑꑐꇣꌠꆹꀒꈍꑮꈍꃅꀂꏾꂶꌠꇬꀋꐕꃅꎍ。ꋌ“ꉻ”ꄹꌗꏂꁌꃅꄓꇬꉆꇈ，ꄚꊼꇅꎹ、ꀊꄶꊼꇅꆷꃅꐺ，ꄽꂫꆏꄡꇗꋍꊨꏦꃢꈜꈧꌠꀉꄂꋌꒃꌊꇁ。
“ꅽꁦꅉꇬ，ꃅꌗꄚꇬꏭꀋꋌꃅꈺꇨꀕ，ꆎꆹꁧꎆꃅꎭꌧꀂꄁꈫꌠꌌꁧ，ꉈꄚꎭꌧꈇꇉꋐꌠꑌꆏꌌꁧꍨ。”
ꂚꄏꆹꈄꁨꋌꁉꄉ，ꎭꌧꀂꄁꀊꏂꈬꌠꋌꒃꎼꇁ，ꋋꆹꋍꑊꑮꑟꂾꑸꆀꎀꂚꄏꇢꄉꈬꉬ，ꇇꈌꀁꐯꇨꐛꅹꃅ，ꂁꈄꁨꇬꊐꄉꇬꎷꌠ。ꋋꉈꑴꀀꈤꇬꄉꎭꌧꈇꇉꀊꄖꋐꌠꋌꒃꌊꇤꐒꄉꀋꌐꑴꌦꌠꑸꆀꅓꁧꈧꌠꇬꇱꄉꀐ。ꄚꁱꀋꐭꌙꈈꀕꃅꑸꆀꇱꒃꀉꁁꎭ。
“ꅽ……ꌌꁧꇆ，ꀉꁁꑞꈉꑴꌦ？”
ꂚꄏꆹꎭꌧꀂꄂꈫꌠꌋꆀꎭꌧꈇꇉꋐꌠꐯꇯꉈꋍꃢꋌꇤꑸꆀꅓꁧꇬꇱꄉꌦꀐ。ꋌꏮꂚꄏꇬꊼꇅꉜꇈ，ꌙꈈꀕꃅꀑꉞꀐ，ꄚꄡꇗꌗꏂꁌꄹꎍꑴꌦ。
ꋍꑊꀊꉗꏢꂱꑱꂱꀯꂱꑱꂭꌊꈀꄸꑌꁱꀋꐭꃅꌙꈈꀕꃅꎍ。ꑸꆀꆹꀋꇊꇬꊵꑵꍈꇁꉚꌠꌡ，ꅑꅷꂚꄏꁦꄮꇬꑲꆀ，ꋌꏮꂚꄏꇱꄓꐛꒌꂶꌠꇬꉜꄉꑑꃹꌊꉉꇬ:
“ꆏ，ꇯꍝꃅꉢꎸꉼꍗꑴꄹꏦꇬꁏꄷꌠꑇꌠꅀ？”
ꑸꆀꋍꈯꋌꀋꌅꃅꑓꁴꈧꌠꑓꁯꇬꄉꇁꐮꄚꐮꇤꌐ。
ꂚꄏꆹꏮꉈꑴꋍꇅꉜꇈ，ꊒꆽꀕꃅꑸꆀꏭꅇꀋꀱ。
“ꋍꃢꃅꑽꏿꑽꇬꆹꑽꀋꐥ。ꌦꌺꇯꆏꃅꑽꄮꐥꑵꉬ，ꃆꇭꇯꆏꄔꎪꄮꐥꑵꉬ，ꀋꉬꀋꉆꌠꆏꇿꇬꄉꑽꆏꇿꇬꄉꄓꇁꌶꅊꇈ。”
ꑸꆀꆹꋍꏭꅇꉉꏾꑴꇬ，ꄚꅇꆹꉉꆺꄝꈍꉈꁖꅐꆹꀋꄐ，ꄽꂫꆏꋌꄡꇗꌗꏂꁌꄹꌗꏂꌦꀐ，ꋋꈍꑋꈓꅑꅷꇁꌠꆏ，ꋍꎺꏣꇬꌗꏂꁌꄹꋋꈨꆹ，ꃀꅉꆐꂚꄏꋌꎼꋍꃀꉌꂵꐮꑘꀋꒃꇬꎷ。ꋌꎸꉼꍗꑴꄹꏦꇬꁏꌠꉬꀕ？ꀋꇊꇬꀊꅰꃅꑠꃅꊋꀋꋠ。ꃅꇏꌤꃆꀕꂮꆹ，ꄺꀱꉆꑴꌦꌠ。ꋌꈎꄜꀊꏀꑴꌦ，ꀊꉘꂷꏦꋩꌠꊁꆹꎴꑴꌦ。ꑸꆀꌤꐘꌠꀞꄮꇬ，ꄗꌦꆀꑼꇇꁆꌠꀉꇖꇨꀐꌠꉬꀕ？ꂚꄏꉪꐨꐥꑴꇬꉉꎼꇁꀋꄐꇫꎭ。ꄗꌦꆀꑼꆹꎀꍹꇬꇱꄀꌊꉎꊐꌠꇫꐥꁧꈭꐨꆏ，ꂚꄏꉈꏭꁧꅀꃀꈿꒉꊖꁧꄿꂿ，ꄮꈉꍈꁸꌊꄗꌦꆀꑼꉜꆹꇬꎷ。ꄗꌦꆀꑼꆹꈎꄜꀉꒉꀐꐛꅹ，ꈁꑓꇬꇨꁨꇈꃪꈧꌠꋍꑍꉜꋍꑍꃅꀉꑌꀊꅼꇁꀐ。ꋍꃢꇀꅉꀕꃅꋍꑊꐮꂿꄷꆏ，ꌦꆀꑼꆹꂚꄏꅿꋍꍂꀑꇬꌤꃆꐘꌠꅲꍮꇬꎷ，ꄚꋍꃢꇀꅉꀕꃅꂚꄏꏭꈴꀋꄿꃅꉉꇬ：
“ꈍꃅ，ꄡꇗꀞꄂꆗꉼꃅꐥꑴꌦꌠꉬ？！ꀋꃋ、ꀋꃋꋌꃢ……”
ꌦꆀꑼꆹꊨꏦꂴꊂꃅꄀꇗꇱꉪꏦꃅꌠꎁꃅꉌꆐꅑꑓꆐꋠꀋꏦꇬꎷ，ꑠꅹꋌꃚꋒꀉꂥꃅꃥꌋꀋꃀꏮꉉꇬ，ꋍꏢꌠꆏꉆꐥꃅꉪꃅꄷꏪꊪꐚꏬꂚꄏꄐꇁ，ꑍꏢꌠꆏꋋꇅꃅꂚꄏꎁꃅꑮꃀꉾꃪꂷꈴꇫꁴꄷꇬꎷ。
ꂚꄏꆹꏪꊪꅜꄮꇬꆏ，ꌦꆀꑼꅿꋍꉎꀋꐥꌠꉂꐪꏭꋍꃢꇈꋍꃢꄹꈀꎭꀕꇬꎷ。
“ꑞꉬ，ꉡꌂꑴꌦꅀ！ꑸꆀꆹꈍꃅꐚꀐ？”ꌦꆀꑼꉉꇬ。
“‘ꀎꇓ’ꂶꌠꆹꇔꇨꎭꀐ，ꌤꃅꅈꆹꁸꌊꍏꁱꀕꇨꄯꒉꏲꂠꌠꃅ。”
“ꀒ，ꆐꑊꐮꂿꀑꅀ？”
“ꐯꀋꂿ。ꋋꆹꁱꀕꇨꇫꐥꁧꀉꉘꀋꐛꃅꑮꀐ！”
“ꈁꄷꉬ？ꑫꑵꀊꋨꂷ？”
“ꑠꆹꉬꑲꆏ，ꅽꉣꑊꉌꂵꇬꉌꁠꅍꆹꀋꐥꀐ。”ꌦꆀꑼꒈꌦꀕꃅꒊꒉꇁꀐ，“ꌋꅪꋋꂷꆹꑶꋦꇣꄂꑵꌠꆹꀋꉬꀐ。ꄚꃪꑴꌦꌠꆏ,‘ꈋꀧ’ꂷꋌꎹꊌꀐ。ꀋꃋꊁ，ꆎꆹꈍꃅꂯꆏ？ꄡꇗꀞꄂꆗꉼꃅꐥꂯꅀ？ꊿꂾꇖꊰꈎꀐꇬ，ꑡꇁꉚꑴꌦꌠꉬ？ꊜꋽꑲꆏꉆꐥꃅꁨꋍꂷꒃꄿꀐ。”
……
ꂚꄏꑌꋌꋋꉉꐝꉅꀋꄐ，ꋌꆹꇯꍝꃅꑡꇁꉚꌠꉬꀋꐚ。ꎸꅍꌍꑓꉈꏭꃅꆳꁎꌦꀐ，ꌧꂓꇬꌩꇇꈧꌠꆹ，ꌍꑓꇬꑆꋍꈁꑓꇬꌸꌐ。ꋋꆹꋍꈯꋌꀋꌅꃅꀂꄁꀑꇤꅷꐺ，ꀊꄶꌧꂓꀉꇨꏟꈯꀕꀊꋨꂷꆹꇬꅑꑴꌦ。ꉪꇐꇬꄉꀱꇁꀋꃋꐛꐨꇬꑞꌦ，ꋍꉌꂵꀊꅰꃅꆅꌊꐛꀋꐛꇀꌦꀐ。ꑓꏭꈜꎴꃅꄷꆿꃀꁡꇤꃅꍜꏭꉜꇬꀉꄂ，ꂷꇭꋍꁙꑍꁙꇬꊎꐂꅷꐺ；ꄚꄡꇗꈍꃅꄂꆹꈘ，ꈍꃅꈜꎴ，ꈍꃅꌙꈈꀕꇈꉌꌤꑓꀖꇫꎍꀒ。
(ꉉꀽ:ꉇꇷꁰꒌꆹ ꐎꃅꊫꌓ ꍑꌠ。)
ꊁꊛ:ꉒꈌꈬꇬꉂꏣ(ꌕ)http://yi.yizuren.com/plus/view.php?aid=120
