ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꋍ)
ꄜꃑꄮꈉ: 2013-01-30  | ꁰꄻꊿ:ꀉꈌꏬꌋ

ꉒꈌꈬꇬꉂꏣ
  —ꀉꈌꏬꌋ ꁱꌠ—

ꐩꋊꒊꃀꆹꐥꍂꃅꀒꁨꉜꄉꏹꇬꎷꑵꉬꐛꅹ,ꉠꉂꏣꑌꒊꃀꐊꒈꂃꒊꆱꄓꇬꎷꇈ,ꉒꈌꈬꇬꉂꏣꆹꄚꄉꋌꇁꆈꌠꁍꁈꊂꋊꁮꅉꐛ,ꋍꇬꉉꀽꌠꆏ,ꉒꈌꈬꇬꉂꏣꆹꉢꁱꆏꁳꌠꑌꀋꉬ,ꁱꆍꊇꁵꌠꑌꀋꉬ,ꋋꆹꁱꉠꆃꎭꆈꌠꊂꋊꁵꌠꏂꀨꄯꒉꋐꉬꑴ……                ——ꁱꂾꅇ

ꉢꇁꍎꊈꎼꏹꂚꄏꌤꃅꅉꇬꑟꇁꇈ,ꉜꅊꇈꂿꆏ,ꋌꆹꈁꑓꑊꑆꍕꌐꀐ,ꄚꑓꋪꋑꌠꆹꏮꇁꊿꉚꇬꆹ,ꃀꅉꆐꑓꂷꀯꆱꍅꅍꊋꑌꐮꊋꑌꃅꎍ,ꅇꉉꅇꌬꐝꉅ,ꄚꅇꂷꋍꇬꋋꇬꆹꀊꅰꉢꋌꌥꃅꀋꐛ。
  “ꉡꆹꎃꐚꌠꇭꍣꄈꎼꏹꂷ”,ꋌꉉꇬ,“ꉡꆹꇯꍝꃅꎃꐚꇨꀐꄷ。ꀋꃋꀃꑍꆹ,ꈭꎴꈜꎴꌠꈬꊯꈬꉘꋌꈚꇬꆹꑠꃅꉉꉆ,ꇭꀧꌋꆀꀃꃀꃆꂮꌤꃆꑍꐘꌠꆹꌌꂥꀘꀐ,ꄚꋋꑠꆹꑦꈁꈝꃀꉬꀕꀐꆏ?ꉢꉜꇬꆹꀊꎳꃅꍣꑴꌦ。ꑠꅹ,ꆎꆹꄡꇗꇫꄜꄡꉺꇬꄉꍑ。”
  ꀃꈈꁬꌠꂚꎼꏹꇱꈢꇯꏢꀕꃅꄉꀐ。
  ꄜꉺꉆꀋꉆꌠꆹ,ꉠꉌꂵꀊꅰꇫꀋꊢ。ꉢꀋꃋꋋꃢꍏꑷꄆꁱꃑꅉꆃꎭꆈꌠꊨꏦꏱꅉꍏꋉꐛ60ꈎꈭꏝꐛꌠꅱꁱꄨꇬꐊꄉ,ꆃꎭꆈꌠꃅꄷꅱꁱꇁꇬ,ꀋꉬꀋꉆꌠꆏꌞꀑꑊꉜꄉ,ꉈꑴꆏꋍꑞꋍꑵꂒꉻꀵꄉꋍꑞꋍꑵꊿꏭꑌꑲꌑꑟꉂꌠ。
  “ꍑꑴꇆ,ꈾꃚꂷꌌꀉꑐꂷꏭꄀꇗꇱꀋꇿ。”ꈍꃅꀋꐚꅇꂷꑠꇬꉢꉉꎼꆹꀐꅊꇈ。
  “ꄚꑠꃅꑲꆏ,ꆏꀋꃋꋋꃢꆃꎭꇁꌊꀈꈥꀕꀐ!”
  ꄚꈍꃅꂯꆏ?ꉢꈝꃀꋍꎳꎵꃅꇁꌠ,ꆈꌠꈎꂷꀉꄂꏅꈽꇁ,ꆈꌠꎸꐡꐚꀉꄂꋠꇁꄷꌠꅀ,ꋍꃅꉉꑲꆏ,ꇯꍝꃅꉠꉌꂵꃴꀋꌦꌠ。
  ꂚꎼꏹꉠꃀꈴꀋꄿꏭꃅꐙ。
  “ꂚꎼꏹ,ꆏꅽꃆꂮꑍꇬꌧꉡꇰꇬꍑꍓ?ꌌꄜꉺꀋꁧ,ꉡꆹꅽꃆꂮꃶꐚꑍꇬꌺꅲꏾꌠ,ꆍꊇꄉꅿꌤꃅꊿꋋꋏꆹꈍꃅꇁꌠ?”
  “ꉬꑴꇆ,ꁧꐙꈝꃀꈛꎭꌊꀉꂵꁮꅉꌧꃅꌧ!ꄚꋍꃅꑴꇬꀊꄶꁧꐙꈝꃀꇂꈪꈭꅈꇬꄉꉈꈽꐺꌠꆹꄈꅿꌤꃅꊿꀉꄂꇿꉬꂯ,ꉹꁌꏓꂱꄙꇁꃪꃅꐥ。ꉪꊇꃅꄷꋌꈚꇬ,ꂿꑘꆫꑘꐯꇯꃅꒃꉇ,ꀻꎆꊫꂫꆹꁤꇅꀕ。ꆏꇫꅲꏾꑲꆏ,ꊿꈍꑌꑹꇴꌊꊼꇅꌧꇁꂿ。ꀋꄹꄷꆏꀏꄽꂫꊐꌠꂿꑘꁡꇤꇬꆹꉜꒉꏾꑳꆏ,ꀊꅰꃅꃪꀐ。ꂁꀊꄶꁧꉈꐛꌠꆿꃀꁡꇤꆹ,ꇯꍝꃅꊼꇅꇬꉚꆹꄻꅐꌠꉬ。
  “ꀊꄶꇬ,60ꈎꂾꁏꐚꉻꄑꈁꁏꑠꃢꅐꋺ。ꃅꒉꆈꏸꀕꇇꎇꇇꀋꂿ,ꃅꆳꃅꃴꋦꃅꁏꑠꉔ,ꁏꐚꉬꇮꃅꄓꄉꈁꁏꌐꇈ,ꐚꌌꁈꈧꌠꊿꌉꌦꌐꀋꇊ。ꊁꆏ,ꐚꌌꁈꈧꌠꄓꄉꎼꈁꈔꄚꈔꃅꉈꑴꋍꃢꈁꁏꇀꌦꐛꅹ,ꁏꐚꄉꀉꑌꃅꌦꇈꊿꂿꇓꁨꐛꇫꎍ,ꆺꃮꒊꃀꇬꊾꌦꏃꑍꏃꉔꈴꑲꆀꈴꌐ。ꄚꄉꐚꌌꁈꈧꌠꆹꋌꇷꏸꐷꂶꐷꌐ,ꌤꃆꋋꐘꉉꎼꇁꄷꆏ,ꊿꋋꎼꎹꀕꇤꏸꏦꑑꃹꏾꁵꀕ,ꋋꈨꐛꅹꃅꑶꇽꁡꇤꋋꂷꆹꄚꄉꊿꇱꌌꆿꃀꁡꇤꃅꂒꋉꇫꎭꌠꉬ。”
  “ꉜꅊꇈꂿꆎꑠꈨꉬꅊꇈ!”
  “ꄚ,ꆿꃀꁡꇤꆹꆿꃀꇬꀋꐥ,ꀊꄶꇬꀀꌠꃰꊿꈧꌠꌋꆀꉢꐮꐊꋺ,ꋀꊇꆹꃺꃶꀁꑳꃺꃀꑌꂵꏭꀋꋌꃅꊋꃪ。”
  “ꂚꎼꏹꀋ,ꅽꑮꃀꆷꆹꇆ?ꇫꄉꈨꇁꇬꋋꆹꆿꃀꁡꇤꀀꌠꉬꄷꀋꂸ,ꉢꂴꆽꋌꎷꄉꊼꇅꑍꇬꌺꅲꉆꉈꀒ?”
  “ꑞꃅꀋꉆꂯꀒ。ꄚꈎꏅꌐꈭꐨꆏꋋꆹꀱꁧꀐꌠꉬ。”
  “ꑞꉬ,ꋋꍏꇬꀋꀀꄜꅀ?”
  “ꄚꇬꋍꌤꃆꀋꐥꄉ,ꀊꉗꃅꐛꑲꆏ,ꋋꆹꉌꂵꎌꅉꀋꎍꃅꎸꄜꀋꃪꇬꎷ,ꄡꇗꀏꂿꑘꁡꇤꇫꐥꄈꍑꄷ。”
  ꉡꆹꌗꏂꁌꄹꉘꇉꉘꀋꅐꃅꉌꆐꅑꇫꎍ。ꇯꍝꃅꆿꃀꁡꇤꋍꏮꉜꆹꑟꉂꌠ,ꄚ,ꂿꃅꀋꋌꄏ,ꋓꇗꉏꃰꇿꇫꐥꀋꐚ,ꊛꄉꃅꐎꌕꑍꃰꐛꆈꁌꀕꇈ,ꈭꋍꈛꄙꌐꐛꅹ,ꊾꂷꈛꎼꈜꈴꐺꑠꂷꎹꅈꀋꊌ,ꇯꍝꃅꈍꃅꇬꑌꀊꄶꁧꉈꑟꁧꀋꄐꀐꌠ。ꆏꉜꉏ,ꀊꄶꌍꑓꉈꏭꃰꌦꀱꑐꀕꃅꑵꉙꀛꐂꐺꇬꎷ,ꄷꀋꁧꑵꉙꇯꅲꌒꐮꅲꌒꀒ,ꀋꇊꆏꑌꑿꐍꐷꀕꑠꁥꇤꃅꈋꉜꉚꋯꀋꐛꑠꈚꇬꏪꄉꌠꌡꇬꎍ。
  “ꂚꎼꏹ,ꆎꆹꆿꃀꁡꇤꋍꃢꐥꀋꋺꄷꌠꅀ?”ꉡꆹꃅꅍꎷꀋꊌꃅꉠꇖꂟꅍꀉꁁꑠꏢꉢꉉꎼꆹꌦ,“ꅽꊨꏦꃆꂮꑍꇬꌺꊼꇅꌧꇬꍑꍓꀋ?”
  ꂚꎼꏹꑊꁏꈁꁏꏭꃅꐙ。ꄚ,ꄽꂫꆏꂁꉌꂵꄸꈐꊐꄉꍹꐛꆰꀿꇫꎭꂿꉂꌠꁭꅉꂶꌠꆹꋍꇬꀋꊰꋹꃅꋋꉉꎼꇁꀐ。
  ꃅꈎꃅꆪꆹꌨꏾꇓꏾꊰꃅꊰꇫꈴꁧꀊꉗꏢꐛꀐ。
  ꂚꎼꏹꆹꀏꅉꂫꊐꌠꇬꄉꇁꌠꏲꌋꇥꀯꀊꋨꈨꌋꆀꐯꌟ,ꎺꏣꂄꇈꎺꇊꐝꄧꀕꑴꌦ。ꀊꄶꃅꋆꈊꃀꉪꊇꄆꄒꂷꇭꀋꄔꃅ,ꍐꀊꄶꊖꌋꃆꄔꀊꋨꇤꏢꁮꑌꄉꌧꅷꀋꑟꅈꀋꐥ。ꌧꉆꋒꀋꋒꃅꐙꌠꃆꄔꁨꑭꂚꎼꏹꈁꑓꑊꑆꍕꌐꂶꌠꋌꁨꄉ,ꄚꄉꋍꉌꂵꄸꈐꅇꈧꌠꉬꇮꋌꄝꒈꅐꃅꅐꇁꌐ,ꀊꅰꃅꄚꄉꑴꁱꇣꋲꑠꁬꀅꌳꀅꌳꃅꋌꑴꎼꇁꌠꌡ……

ꄽꂫꆏꂚꄏꀀꐚꇁꀑꅊꇈ。
  ꋋꀄꂼꇣꋲꃅꑠꂷꂻ:ꑤꑭꊂꃅꉻꄑꄉꋍꏭꊨꀖꃀꀋꃉꌌꋋꇅꇬꑲꆀꈿꌐ,ꋌꑸꆀꌋꆀꃜꁏꊂꑮꐯꁳꌦꀐ。ꃜꁏꌠꌋꆀꀱꐮꄹꐛꌦꌠꆹ,ꀉꑳꌕꈎꈩꅍꑌꌡ,ꈜꀕꇈꀱꐮꄹꐛꌦꌠꄉꀊꅰꃅꌡ。ꋌꀂꏾꇬꀎꇓꀉꒉꇈꀉꂥꄉꉬꅍꑠꂷꅑ,ꇵꆹꇬꆹꆽꈜꀉꆈꑠꏢꅑ,ꃀꅉꆐꍡꑫꉙꌠꌡ。ꋋꆹꀊꑙꑫꑵꌠꀋꉬꄷꌠꅀ?ꄚꋋꇅꇬꆏꈍꃅꌠꉬꀋꐚꂚꄏꇫꑵꀋꅲꆘꅝꀐ。ꋍꏢꁮꇬꑸꆀꂶꌠꈁꑓꆈꏸꅍꋍꏭꉜꄉ“ꃜꅐ”ꃅꑠꇬꊫ,ꀋꇊꇬꆏꋍꏭꊿꂂꊿꄸꀋꌧꄷꊨꀖꌠꌡ,ꉈꑴꆏꋍꏭꂴꆽꅇꈪꊐꌠꑌꌡ。ꄚꂚꄏꆹꀋꌦꀋꌋꌠꀄꂼꈬꇬꄉꀀꐚꇁꀐ。
  “ꇌꉻ”ꋋꂷꃅꆈꋧꋪꇫꎍ。ꋍꇇꇬꄮꈉꇇꈯꂶꌠ‘ꊸꀕ’ꃅꂿꌠꀉꄂꊌꈨꉆ,ꄚꄮꈉꈍꑋꂷꇫꐥꀐꌠꆹꋍꍈꑌꊌꂿꀋꉆ。ꋌꎺꇊꐝꄧꀕꃅꎺꄉꇬ,ꄮꈉꇇꈯꃅꐎꈍꑋꈓꅑꀐꋋꂷ,ꉾꃪꀉꇨꄷꑵꌠꑠꂷꆹꀋꉬꑴꇬ,ꄚꈊꃀꆹꄮꈉꈍꑌꂷꇫꐥꀐꌠꊌꂿꄇꇖꀕꑠꂷ。ꋍꀀꑌꇴꃱꀋꐚꈧꌠꉬꇮꇿꈴꁧꌐꀋꐚꀐ,ꐝꍠꀕꃅꋌꎺꄉꌠꆏ,ꇝꂱꌊꁏꂽꑼꑠꂷꋍꄮꈉꇇꈯꂶꌠꋌꇑꌊꀉꁁꂷꏭꆦꌊꋌꄀꇁꇫꎭꆘꅝ。
  ꀋꃉꌌꑲꆀꈿꌐꌠꑤꑭꊂꃅꉺꄒꄉꊨꀖꃀꀉꒉꃅꈿꋌꃢ,ꃅꐎꌕꑍꌕꉖꈿ。ꌕꑍꌕꉖꆹꊝꀕꃅꄮꈉꏃꊰꑋꂷꉬꑴꇆ!ꊿꆦꃅꀋꆦ,ꄷꀋꁧꌌꊨꀖꌠ“ꃆꀞ”ꋌꂷꁳꑓꋪꋍꇅꑌꂭꐯꇯꀋꎽ。ꑓꋪꀊꋨꋒꆹꃣꁧꋍꄙꏡꐥꑠꈨꌊꍑꄉꌠꌡ,ꀂꏾꇬꇓꂵꀋꃀꑠꂷꌌꍅꄉꌠꏣ,ꇯꍝꃅꀊꄶꑠꊝꋺꌠꊿꑲꆀꋍꈯꄔꇬꉪꐪꄜꎼꇁꄎꌠ。ꃀꈿꌐꈭꐨꆏ,ꋌꀱꄚ“ꇌꉻ”ꂶꌠꇬꃹꇀꌦ,ꄚꈍꃅꑌꀀꑌꃹꒉꀋꅲꀐ。ꀋꃋꋌꃢꊨꀖꌠꆹꂚꄏꁳꅲꅇꀱꄮꇬꑲꆀꄓꇬꉆꎻ,ꑠꅹꐧꊭꈢꏸꑭꈢꌠꆹꀊꅰꃅꌌꉪꎼꇁꀋꄐ。ꀑꃀꑓꏂꋩ,ꉌꊈꅼꇨꃅꃛꊸꈭꐨꐙꄏꌠꋍꇬꃙꄜꐮꃙꄜ。ꃀꆹꃅꍛꒌꄮꇬꑲꆀꈿꌐ,ꃅꄜꇁꂯꄮꇬꑲꆀꂚꄏꆹꏃꇗꉭꇍꃅꀀꑌꃹꒉ。
  ꃶꐚꃅꈍꄮꇬꉬꀋꐚ?ꃅꄜꄷꌦꆏꋋꆹꊿꇱꋇꌊꈝꃀꃬꃶꇴꄂꌡꏡꌠꍬꄉꌌꑶꇽꁡꇤꋍꂷꌐꆏꋍꂷꃅꏮꄉꊨꀖ,ꌌ“ꅋꋌꑱꋌ”。ꋋꆹꉆꐥꃅꃢꈜꊼꇅꄺꑣꈚꑟꉂꄉꋌꄓꇫꑌ,ꄚꄡꇗꇇꇬꄮꈉꇇꈯꑱꃀꑱꌺꈧꌠꌧꀋꉆꑴꌦ,ꑠꅹꏸꑭꋌꄻꑯꅮꇬꊐꌊꌍꑓꏢꁮꇬꉆꎍ。
 “ꇌꉻ”ꋋꂷꆹꑤꎭꈴꏳꄩꇊꄩꊐꌠꇬꐛ。ꑤꑭꊂꋍꉎꀋꐥꌠꌢꈚꊪꀪꈝꃀꍬꊿꋋꂷꂱꑱꀃꅉꇬꀺꌦꌠꏦꐛꅹ,ꌍꑓꋍꁬꀉꄂꁭꅉꀊꋨꈚꇬ,ꈍꄮꇯꆐꎸꑟꌊꏍꎀꇯꏢꀕꃅꄉꌐ,ꋌꁳꇇꁆꀉꄂꎇꇫꑆꒉꇎꃅꄉ,ꇭꀧꂶꌠꎪꒉꇎꃅꑠꆹꀄꂼꂻꇬꑌꂻꐛꀋꇁꀐꌠ。ꌍꑓꉈꏭꆏꀠꆿꀊꂥꐯꀊꂥꑠꎆꇫꋦ,ꋋꆹꀋꉊꀉꒉꃅꐙꐂꏿꃅꀻꎆꌠꃄꄮꇬꇓꈓꋋꂷꌌꀊꐯꃅꋈꀱꄉꊪꄉꇈꎆꉬ。ꃅꐎꈬꈎꇫꈴꁧꇈ,ꀒꋏꌩꁧꊪ,ꊂꋊꌐꒉꏿꇎꄉ,ꍵꂫꄮꇬꈊꃀꌊꆳꈺꌋꀕꑠꄲꁏꎼꇁꇬꆏ,ꂚꄏꆹꌙꈈꀕꃅꌍꑓꉈꏭꅫꏻꀕꇈꈺꌋꀕꌠꃅꌗꁠꆧꋌꏶꉦꃀꄸꈐꊐꇈ,ꄚꊂꈹꄉꇇꋌꎇꎼꒉꇬꆏꌩꇇꀉꒉꑠꇨꇁꋍꇇꊝ。ꋍꑓꋪꋋꇅꃅꅫꏻꀕꇬꅜ。
  ꌕꑍꌕꉖꊨꀖꃀꋋꂷ,ꂴꆽꆏꂚꄏꅿꊿꏠꉜꐪꍤꄻ,ꊂꊛꄉꋍꅿꌺꃰꌋꅪꃆꂮꍤꅲ,ꄽꂫꆏꄡꇗꅲꌊꈝꃀꌤꃆꀂꏽꑞꌦ;ꄚꀠꆿꋋꎆꆏꈝꃀꉈꈽꃆꂮꅉꐛꇫꎍ。ꃀꆹꂴꄉꅑꊂꄽꂫꌐꄮꑟꌠꉬꇮꃅꍏꑭꊂꇝꂱꌊꁏꉺꏒꅉꄉꁆꌊꑤꇬꑟꇁꇈꌅꈌꉬꇮꋌꏓꌊꐺꌐꌠꑸꆀꁳꊥꇬꎻ。ꑸꆀꆹꂚꄏꅿꑮꃀꂴꂶꌠ,ꆏꉜꉏ,ꌺꃰꌋꅪꃆꂮꌤꃆꋋꐘꉉꄷꆏ,ꉉꌐꇁꀋꉆꌠꉬ,ꄷꀋꁧꉉꌊꀋꃪꄷꆏꋍꊨꏦꀃꅉꇭꀧꋋꂷꃅꎲꀋꁨꑾꌙꂷꑐꑠꂷꇯꐛꉆꌠꉬ。ꑠꅹꋋꆹꏟꈯꀕꃅꊝꋽꄮꒃꉇꄉ,ꉈꈽꋣꃆꐴꀨꋌꈻꌊꈝꃀꌤꃆꀂꏽꅞꌦꀐ,ꋍꅿꊿꌕꊰꎖꈎꌠꀊꅰꑠꃅꀋꐛꀐꌠꃚꎔꉐꋽꌠꆺꄝꏡꌠꌌꉉꇬ,ꋌꊋꇨꃅꎸꅍꏷꄮꇬꀑꇬꈔꀋꑴꃅꌩꁧꊪꌠꆹ,ꈀꄸꂷꌋꆀꐮꏯꍡꑫꑵꄉꌠꉬ?ꋋꆹꑳꎎꊜꋽꉪꇐꑌꁥꌠꌋꆀꐯꀋꐞꌠ,ꄷꀋꁧꐯꋭꐯꌊꎭꅉꀋꊌꑵꌠꉬ!
  ꅇꂷꋋꇬꆹ,ꇯꍝꃅꏀꌠꋲꅐꌠꐛ,ꀉꒉꃅꌊꁏꊿꁥꌠꅿꊋꌗꇬꊥꇬꐛꅹ,ꋋꇅꃅꃀꈿꅈꇬꇳꃚꏄꃚꈍꑋꋋꍍꅜꀋꐚ。ꀋꃋꆹ,ꇳꃚꏄꃚꆹꈍꄮꇯꆐꐜꀋꈨꀐ。ꋌꎼꇓꈓꋋꂷꀊꂥꇊꀊꂥꈚꌠꌍꑓꇬꉆꄉꉜꇬ,ꃅꃤꆈꏸꀕ,ꇇꎇꇇꀋꂿ,ꉽꐯꀋꃀꀍꃈꀱꆽꃅꄂꄉꂷꀋꏮꀏꄩꐝꀋꉅ。ꋍꉌꂵꇬꊎꆲꁏꄂꈧ,ꒈꂃꒊꆱꄓ,ꑸꆀꉉꌠꅇꂷꈧꌠꉪꇁꎺꇁꇬꆏ,ꉌꂵꈐꇬꀊꅰꀊꅰꃅꐛꀋꌒꇁꇬꎷ。
  ꋋꊋꇨꃅꎸꅍꏸꌠꐊꄉꑵꍡꑫꂷꑵꀬꀱ?ꋌꉌꂵꑠꃅꀊꀋꒉ,ꀊꅰꃅꌧꑌꀬꅑꃅꀋꐛ。ꌩꇽꌩꋐꌤꃆꏡꌠꆹ,ꋍꅿꇹꄣꌠꇂꃴꄉꁦꀑꈍꑋꂷꇬꌩꋌꇽꋌꋐꌃꀠꀕꀋꐚ,ꋋꆹꄧꀕꃅꋍꅿꉌꃀꆅꇓꐘꉬ,ꈍꄮꉪꅷꋋꍈꄀꄷꆏ,ꉌꃀꋋꂷꃅꃨꆰꌊꎌꅉꀋꎍꇬꎷ,ꀋꇊꆏꌞꎝꐘꁯꇈꌠꌡꇬꎷ。ꀊꋨꄮꇬ,ꃶꐚꃅꉙꃀꀋꌧꇨꀐ,ꃛꁶꏿꇨꀕꀐ!ꂚꄏꋍꃢꇀꅉꀕꃅꎺꅷꀊꋨꄮꇬꅿꊿꋌꎼꀞꇁꐷꌠꃅꐨꄀꄷꆏ,ꋍꉌꂵꋌꑣꋠꄉꏽ。ꄚ“ꁱꀕꀉꒉꃅꇝꂱ”ꌠꅿꍩꃚꆹ,ꋌꂴꆽꇬꉚꇬꆹꃶꐚꃅꐝꉅꌠ,ꄚꊁꆏꋌꇙꌊꀑꃀꑓꏂꋧꇫꎭ。ꇯꍝꃅꊨꏦꀃꅉꀊꋨꄹꈎꉙꃀꀋꌧꌠꀋꇎ、ꃛꁶꏿꀋꇎꄷꌠꅀ?ꑡꌩꇽꌩꊪꌠꌤꉬ,ꃶꐚꃅꋌꋋꉪꐝꀋꉅꀐ。ꀊꋨꄮꇬ,ꑤꍰꇓꈓꃅꏦꎫꋍꏢꀉꄂꐛ,ꇑꇓꏦꌠꃆꀞꈧꌠꆹ,ꋍꑍꌠꆏꏦꎫꇬꄉꀱꒊꀱꇁꄹ,ꌩꀄꊭꈧꌠꉬꇮꋀꊇꇱꌃꇷꀠꀕꌐ。ꍰꇨꍔꇬꉜꅍꐥꐛꅹ,ꋌꀋꆷꀋꃹꌠꈐꏭꄉ,ꄮꈉꍈꏎꏸꄉꊿꁥꋋꏃꌊꃅꐍꋍꑍꀉꄂꃅꌩꈧꌠꋌꌌꊩꀱꏿꈴꌐ。ꄚꐪꊛꄉꄹꏦꏟꈯꀕꑠꏢꏂꄉꌬ:ꃆꀞꊿꈴꈝꃀꑍꋮꌩꌃꌠꆏꌌꊿꈴꈝꃀꑍꋯꇬꌩꑍꁧꊩꀱꏿꎻ,ꊿꉇꉈꃅꌩꀑꇬꀕꇗꇁꌠꆏꌌꇖꁧꊪꇬꇯ。ꋌꀊꋨꄮꇬꆹꑤꊈꎼꏹꑍꂷꂶꌠꌋꆀꏓꂱꃵꍋꀯꀕꍈꁥꇱꄉꌠꃅ。“ꄩꆹꂽꑼꄩꏲ,ꀏꆹꉹꁌꏓꂱꇬꏲ。”ꏤꐪꋋꏢꏂꌬꌊꃪꐯꃪꐛꅹꁭꅐꁮꐚꑍꁁꏯꀠꆿꆹꋋꇅꃅꒆꌊꉽꐯꉾꇬꅜ。ꄚꎔꌠꈯꄔꇬꀋꇎꌠꆏ,ꈍꃅꀋꐚꀠꆿꈯꄔꇬꆏꌧꂓꁧꄻꇫꊪꄉ。ꊩꀱꏿꄮꇬꀉꁁꁧꆦꄷꊿꑠꃅꉉꋺ,ꄚꋌꏟꈯꀕꃅꉉꇬꑠꃅꄻꀋꅐꀑꄷꇬꎷ,ꄷꀋꁧꊨꏦꑭꄑꄉꌧꂓꁦꌠꋌꌌꀊꏀꃅꋉꄉꌠꎭꈴꏳꀃꈈꁭꑭꊪꄉꇈ。ꃅꈎꃅꆪꈢꋒꁧꈭꐨꆏ,ꌧꂓꁧꌠꆹꒆꌊꀉꒉꀐ。ꑓꋪꇂꃴꇆ,ꀋꉊꌩꊪꊿꀋꃋꆹꎸꅍꌍꑓꇬꄉꇇꎇꎼꒉꑲꆏꌩꇇꇬꂥꀐ,ꄷꀋꁧꌧꂓꂷꇯꍵꂫꃅꆳꂷꉐꇫꊋꀋꄿꃅꒊꌋꅍꀊꄶꇬꅑꎍꑴꌦ。ꂚꄏꉌꃶꑓꋩꃅꐙꇁꀐ。ꉌꂵꑞꉪꌠꉬꀋꐚ,ꌧꂓꂶꌠꋋꑣꇇꇬꊐꄉꈭꐨꆏꋌꄻꉥꑣꌺꃅꐣꁙꇬꊐꇫꎭ。
  ꃅꆳꁏꇁꀐ,ꃅꃴꇬꀋꆏꃅꀕꇴꃅꏢꉼꏒꀕ。ꋌꃅꇴꃅꏢꃅꆗꃅꈩꀊꋨꇅꇬꄉ,ꋋꇅꃅꇇꁆꌠꋋꎇꎼꆹꀑ,ꄚꄡꇗꄮꈉꇇꈯꂶꌠꋌꀕꊊꀋꂿ。ꇯꍝꃅꈍꄮꇬꉬꀋꐚꀐ?ꂚꄏꌗꏂꁌꄹꌗꅐꇈ,ꀋꇊꇬꆏꌗꏿꌠꑌꌡ,ꉇꆏꃛꊸꃅꉌꂵꇬꉌꂅꑓꑣꐨꏓꇓꈧꌠꀞꌠꑌꌡ。

(ꉉꀽ:ꉇꇷꁰꒌꆹ ꐎꃅꊫꌓ ꍑꌠ。)

 ꊁꊛ:ꉒꈌꈬꇬꉂꏣ(ꑍ)http://yi.yizuren.com/plus/view.php?aid=119

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ