ꂴꊛ:ꉒꈌꈬꇬꉂꏣ(ꑍ)http://yi.yizuren.com/plus/view.php?aid=119
ꌕ
ꋧꃅ，ꈍꄮꑌꃅꄜꇁꅊꈫ；ꍵꂫꄮꐰꉘꁮꂶꌠꆹꐍꏮꅍꊋꃤꋍꍈꑌꀋꐥ，ꇁꉚꌌꇁꌠꆹꌌꑶꇽꁡꇤꇬꏮꄉꊨꀖꌠꉬꑴꇬ，ꄚꁤꇅꀕꌠꈍꃅꑌꈊꃀꆈꏸꀕꌠꏣꀋꋌꃅꉾꃪ，ꂄꎔꌠꌋꆀꄷꅠꌠ、ꑖꉬꌋꆀꄸꑘꑠꆹꈍꄮꑌꐝꈷꃅꐧꇂꃰꊿꌧꇬꎷꌠꉬ。
ꁧꐙꈝꃀꆹꐧꃬꏢꌡꃅ，ꇓꈓꈳꅐꀊꉗꀋꐛꌦꇬꆏ，ꎇꌊꁦꀑꀉꁁꂷꇬꃹꁧꌦꀐ，ꇂꈯꆿꈪꅍꇆꆉꈬꇬꄉꂿꉆꂿꀋꉆꃅꎍꇬꎷ。
ꂚꄏꀊꉗꏢꁧꐙꈝꃀꋋꏢꇬꈴꀋꋻꀐ。ꋌꉪꇫꀋꑟꌠꆏ，ꌌꏮꄉꊨꀖꌠꆹꑤꊈꎼꏹꉘꃀꊨꀖꅉꈚꌠꆏ，ꈍꃅꌠꉬꀋꐚꃅꆿꃀꁡꇤꈚꌠꇬꉬꅊꇈ。ꋋꆹꈍꃅꑌꑸꆀꏂꌠꏡꁈꏢꉬꋭ。ꑸꆀꋋꈍꑋꈓꅿꐥꐨꊋꋠꌠꌋꆀꉌꐒꇁꎭ、ꉌꁒꑓꊰꌠꆹ，ꂚꄏꈍꃅꑌꋌꉪꇫꀋꑟ ꌠ。ꄚꎭꈐꆹꂚꄏꇫꌅꀋꄐꐛꅹ，ꇇꀤꏾꇬꑌꊋꃤꃅꇫꑟꀋꄐ，ꑠꅹꉌꃀꁦꀑꉪꇬꐰꇑꁧꑭꊰꌠꐛꇬꎷ。ꃜꁏꂴꆽꂾ，ꋋꆹꉌꐒꅍꑠꍈꌋꆀꃱꇌꃯꇌꃅꑠꇅꀉꄂꄛꅐꇁꄎ。ꄚ“ꉜꐪꆹꆙꀋꅝ”ꑴꌦ，ꑠꃅꑴꇬꄗꌦꆀꑼꁧꈭꐨꆏ，ꋋꑌꇣꋲꃅꏲꌋꇥꀯꉆꈉꇬꀋꉆꆘꅝꀐ。ꄚꑠꃅꑴꇬ，ꋍꉌꃀꈐꇬꆹꉌꆐꅑꈴꀋꄿꏭꃅꎍꇬꎷꑴꌦ，ꌧꉆꌧꀋꉆꃅꎍꑴꌦ，ꀋꇊꇬꀑꆈꋍꍂ、ꀑꐎꑍꍂꃅꌦꋍꇬꀵꎍꀐꌠꌡ。
ꈍꃅꑌꑴꁱꀊꋨꁬꉈꑴꋍꃢꀊꏀꃅꁖꇁꌠꎁꃅꈀꎭꀕꋭ，ꄽꂫꆏꋍꈴꀋꄿꉌꆐꅑꌠꉌꃀꇨꁨꏡꌠꆹꋌꋍꐛꂨꀕꀐ。ꀃꑍꑸꆀꆹꀋꉊꂚꄏꌋꆀꐮꐞꁧꄮꇬꑸꆀꂶꌠꀋꉬꀐ！ꋌꉪꑌꁇꑌꀐ，ꄷꀋꁧꇗꄃꂷꑌꃅꎍ，ꂁꑌꁿꑌꇨꀐ。ꀊꋨꄮꇬꆹ，ꋋꆹꑞꃅꑌꎹꉼꍗꑴꄹꏦꌬꌠꏭꁏꈨꀋꉬ，ꋍꏭꀞꄻꌠꆹꀋꃋꉜꎼꇁꇬꆹꊼꇅꎖꃨꅑꀐꌠꉬꋭ；ꄚ，ꀋꃋꃅꐨꆹꌌꈍꃅꉉꂯꆏ？ꋌꂚꄏꇬꅑꀵꅷꐺ，ꋌꂚꄏꇬꁒꐀꅷꐺ，ꋌꂚꄏꇬꋪꒃꅷꐺ。ꋋꆹꑸꆀꊿꐙꑌꇐꌤꃆꉬꌠꅀꍔꍞꉻꄑꈉꊸꐨꏢꉬꀋꐚ。ꀊꅰꃅꊿꋌꀋꑇꌠꆏꉻꄑꉈꈽꌤꑘꐘꌠꉬ，ꋌꈍꄮꅑꅷꇁꌠꆏ，ꀋꇊꇬꋍꍈꂚꄏꌧꇁꀑꌠꌡ。“ꌩꇽꌩꋐꌩꊪ”ꌠꆹꄀꇗꇱꌠꋧꐈꏦꇬꄉꉀꐕꅷꈝꃀꉈꈽꌤꑘꐘꌠꇬꑟ，ꋌꑠꆹꇯꍝꃅꃬꅥꀊꑙꀨꌠꌟꃅꊽꒊꒉꐘꉬ。ꀊꅰꃅꀊꄶꑴꁱꁬꌠꇬꄉꁖꇀꌦꌠꄉꀊꅰꃅꊽꒊꒉꄷꀋꁧꊽꎲꄏꉈꏠꐘꉬ。ꋋꆹꈍꃅꉈꈽꌠꉬꄷꉉꉆꂯꆏ，ꃶꐙꃅꇬꆹꀉꑳꌕꈎꈩꅍꐘꉬ，ꄷꀋꁧꀉꑳꌕꈎꒊꇐꑠꆹꑸꆀꀉꄂꇬꑵꅐꇁꇮꄎꌠꉬ。
ꂚꄏꌗꏂꁌꄹꀊꉗꏢꌗꏂꇈ，ꑭꁘꋌꆏꇬꉆꎍꀐ。
ꂴꆽꏭꆹꂱꑱꉆꅉꇬꉆꄉꑬꆏꃅꅇꁵꎼꇁꀐ。ꑸꆀꆹꃆꀞꀊꅪꑠꂷꋩꐺ，ꃅꈌꋌꏀꄉꀱꉈꑴꇁꇈꀅꌳꌺꃅꋌꆏꂚꄏꏢꁮꇬꉆꎍ。
“ꂚꄏꎼꏹꀋ，ꆏꊼꇅꉉꇬꍑꍓ，ꉪꊇꑞꐛꅹꃅꅽꏯꊨꀖꅉꂴꆽꈚꌠꌌꆿꃀꁡꇤꄻꄉꌠꉬ？”
ꂚꄏꈁꑓꋌꐕꎼꆹꇈ，ꑊꆹꐓꉩꅍꏮꑸꆀꇬꊼꇅꉜ。
“ꍑꑴ，ꉢꆏꁳꊼꇅꉪꎻꂿ。”
ꑸꆀꋋꇅꃅꃆꀞꋌꇔꇫꎭꇈ，ꊒꀕꃅꀋꉊꂴꋍꌐꃶꂶꌠꂴꆽꉆꎍ。ꂚꄏꆹꊨꀖꃀꈿꅈꇬꄉꌕꑍꌕꉖꂷꈳꅐꀐ，ꄚꑠꃅꈛꑌꃅꏮꑸꆀꆹꉜꀋꋻꑴꌦ。ꇫꄉꈨꇁꇬꑸꆀꊁꑍꃢꃜꁏꋺ，ꄚꃝꐨꅇꉩꋋꈨꆹꀊꅰꃅꐒꊀꌠꐪꌐꍈꇯꊏꋌꁳꀋꇊ。ꋌꄡꇗꋽꄻꉺꄻꇬꎷꑴꌦ！ꀍꑐꈀꌠꄻꀂꏾꊂꆈꇫꎭꄉ，ꇵꌩꁁꀊꐎꑠꂷꌌꐒꄉ；ꑊꄜꇬꉱꎍꌠꀍꑐꌄꌠꆹꏦꍠꀊꏂꑠꏢꌌꉱꄉ。ꂽꃢꈜꈫꌠꆹꌌꒈꋌꀕꌋꆀꐈꌊꀊꐎꈫꐛꀐ，ꃛꏣꉬꂷꌠꑋꆦꌊꊪꅪꌠꄀꇫꎭ。ꑠꐛꅹꋌꇣꋲꃅꎍ，ꅩꃰꐛꃅꑌꐛꇈꄡꇗꄉꒉꇴꅍꎍꇬꎷ。
“ꈍꃅꐙ，ꅽꉜꐪꊼꇅꌧꇆ？”
ꑸꆀꅞꇓꂵꂷꀂꏽꑌꇈ，ꐧꊭꇬꄉꏃꊪꀄꊭꋬꌠꋌꀖꌊꈩꐺ，ꀋꇊꇬꋋꐊꐺꌠꀧꌋꃅꌠꊿꈍꑋꑻꌠꏮꀁꐊꄉꄡꐺꀑꃅꉉꌠꑌꌡ；ꋌꉌꃶꑓꋩꉌꍀꑓꍀꀙꀐ，ꋌꊼꇅꁦꉘꀕꃅꎍꌠꄮꈉꍈꈉꐮꈉ，ꒊꈧꌠꅿꊋꃤꌌꄉꋌꃀꅿꈴꏿꌠꐬꆠꐨꃅꌗꉘꌗꈧꌠꊼꇅꈹꇫꎭꑟꉂ。
ꈛꑌꅈꇬꇈꈬꌧꂓꏬꌠꆹ，ꀋꉊꆿꃀꁡꇤꌤꃅꇀꄮꇬ，ꂚꄏꋍꂽꑼꁥꌠꏃꌊꄚꈴꇁꇬꆏꈜꑽꄉꃅꅍꎷꀋꊌꃅꃨꆰꃨꊸꌠꊜꄮꇬ，ꌌꁈꄰꅍꄉꁈꇁꌠꂛꊨꅫꃀꑋꌋꆀꊿꊇꇁꄚꄉꐮꋒ，ꂛꊨꅫꃀꑋꈜꏁꑲꆀꊿꊇꆹꄚꈳꅐꁧꄎꌠꉬ。ꇈꈬꇬꌧꂓꋋꈨꆹꐟꈯꋦꌠꌧꂓꈧꌠꌋꆀꐯꀋꌡ，ꍵꂫꉬꀐꑴꇬ，ꄚꌨꏾꆈꇗꀕ，ꂶꅑꀮꇗꀕꃅꎍꑴꌦꐛꅹ，ꌩꇇꈧꌠꋌꍑꒊꌋꅍꇂꈪꇁꌠꌡ。ꂚꄏꐏꐊꇁꌠꌍꁏꂽꊰꎖꑻꌠꆹ，ꌧꂓꋋꈨꂿꇬꆏ，ꇿꌊꀋꎺꃅꋀꊇꀥꀊꄶꌩꏪꇆꆉꈯꄔꇬꃹꁧꌐꀐ。
“ꊼꇅꉉꉚꇆ。ꆎꑟꃅꇫꀋꑌ？”ꋍꑊꏢꁮꇬꊿꇬꀋꐥꄮꇬꆏ，ꑸꆀꂶꌠꃚꊣꀁꂥꌺꃅꉉ。
ꂚꄏꅞꋍꂴꆽꑌꇈ，ꀏꃄꅉꅫꏻꀕꈧꌠꇬꅘꁧꅿꃴꇉꅍꎍꌐ，ꄚꋍꈁꑓꆹꆈꃅꆈꏸꀕꃅꎍ。
“ꊼꇅꉉꇆ！ꑞꃅꆿꃀꁡꇤꋋꂷꌋꌊꂴꆽꈚꌠꃅꄉꌠꉬ？ꂚꎼꏹ，ꉢꀋꃋꆹꐤꏦꀉꁁꑵꃅꅽꏯꉉꌠꉬ，ꆏꑊꏦꌋꀋꌸ。”
ꂚꄏꉈꋍꃢꏮꑸꆀꉜꇈ。ꋌꄡꇗꏃꊪꀄꊭꋫꌠꌌꃇꑣꇫꐺꑴꌦ，ꀂꏾꊼꇅꎎꄉꌌꀊꄶꃅꉒꃴꈌꇬꂿꃅꊌꂿꉆꅉꈧꌠꇬꄐꅷꐺ。ꉘꁮꑬꌅꄄꆈꌐꒉꇬꑆꇁꇈꀅꌳꀅꌳꃅꋍꄡꇗꊽꉌꃹꉂꑟꅑꌠꈁꑓꂶꌠꇬꌸ。ꄚꀊꅰꀉꇨꅍꀋꐥꌠꃔꌤꌧꂷꀋꏮ，ꉘꁮꑭꌸꑭꎎꌠꇂꃴꄉ， ꋍꂱꀯꊼꇅꆾꎎꏭꃅꐙ，ꑠꃅꅹꀋꅐꂁꋍꂱꀯꏢꁮꀀꎍꌠꌉꎭꋓꎭꇁꌠꌋꆀꌠꑽꆏꋌꇿꐯꇿꋋꍈꑵꌠꐛꐨꆹ，ꂁꀋꄐꃅꅔꁖꇁꇬꎷ。
“ꌤꃅꋌꑠꆹꆏꉡꅲꄻꅐꑴꌦꄷꌠꅀ？”ꂚꄏꁱꀋꐭꃅꉱꉳꃅꒊꒉꁖꀐ。
“ꏦꅍꀋꐥ，ꆏꁨꊼꇅꉉꉏꇆ，ꅽꀊꋨꄮꇬ‘ꈏꉂꊿ’ꅳꀧꐓꐔꇵꄉꇫꅲꄉꑴ。”
“ꉠꇬꍍꃤꄀꄷꐛꌠꎁꃅꌠ。”
“ꀋꉬ。”
“ꉠꇬꎲꀖꇁꌠ，ꋪꒃꇁꌠꎁꃅꌠ？”
“ꑠꑌꀋꉬ。”
“ꑠꆹꉬꑲꆏꆍꊇꊨꀖꃀꀉꒉꈿꅉꇬꄉꉉꌠꌟꃅ，ꉠꅿꊋꃤꈔꋏꇫꎭꌠꎁꃅꌠ，ꆿꃀꁡꇤꆈꌠꃺꑌꌋꆀꉠꇫꑟꅉꊨꄅꁷꐞꇫꎭꎁꃅꌠ。ꋍꇬꃅꉉꑲꆏꍔꍞꉈꈽꈉꊸꐨꎁꃅꌠ！”
“ꉿꀕꉾ……”ꑸꆀꒊꒉꁖꀐ。“ꇿꄉꈍꃅꍔꍞꉈꈾꐨꋍꑗꑘꇁꌠꉬ！ꉢꉪꇬꆹ，ꆏꎺꑴꌦꋭ，ꉡꆹꍡꑫꑵꋺ，ꑴꁱꌷꋺ，ꋍꇬꃅꉉꑲꆏ，ꉡꆹꋽꇐꑴꌡꌤꃅꌠ。ꍔꍞꉈꈽꁁꏯꆹꉢꀊꅰꇫꉌꀋꃹꌠꉬ。”
“ꅽꃀꈴꀋꄿꀐ，ꉢ……ꇫꇠꀋꄐꀐ。”
“ꉈꑴꀑꆊꊼꇅꇘꌦꇆ，ꉐ？”ꋌꏮꀋꉊꂴꋍꌐꃶꈁꑓꈧꐚꆈꏸꅍꎍꂶꌠꉜꄉꉌꂵꀉꒉꃅꉉ。
ꋋꆹꃶꐚꃅꅲꇔꌠꏭꀋꋌꃅꊽꉌꂵꐛꀋꌒ！ꀋꉊꀄꊭꄮꇬ，ꂚꄏꄰꀁꇬꆹꌢꎭꇰꏢꀕ，ꄃꌤꏢꍞꇣꁁꊐꇬꇤꇁꏦꀋꄹꐛꅹ，ꋋꀊꑙꑫꐂꈩꌠꀉꁌꐊꄉꋚꂟꋺ。ꃅꃤꀱꉇꇁꄮꇬꆏ，ꋋꆏꎭꃪꌌꈾꐺ，ꋍꀉꁌꆹꅉꀕꃅꀇꐒꈺꍠꀕꑠꍔꌌꃃꅷꐺ，ꑓꏮꀊꑙꈧꌠꉜꄉꉻꄹꁁꌗꏂꏿꇬꎷ。ꌞꊿꁳꊼꇅꒉꄉꎅꄙꌺꊌꌠꈩꅍꋋꈨꆹ，ꋍꀉꁌꃀꐚꁧꂯꄮꇬꌌꃹꅼꃅꎲꄏꐘꉬꄷꋍꏭꉙꂘꋺ。ꎬꅧꋦꈭꇬꄉꎮꑑꅉꃅꒆꌊꀉꒉꌠꂚꄏꆹꃅꐪꐛꐨꋌꑠꀋꎺꄮꀋꐥ。ꀃꑍꄚꀊꑙꌡꌠꌋꅪꋌꂷꇁꋋꊝꇬ，ꋋꆹꀊꑙꈩꌠꅀꀊꑙꄈꀱꋌꈧꌠꉬꀋꐚ？ꋋꑠꆹꀊꅰꀋꉬꀋꉆꃅꀋꐛ；ꀋꉬꀋꉆꌠꆏꊾꌦꑘꄃꐛ、ꊿꂿꇓꁨꐛꌠꌌꀠꌊꇁꌠꇩꏤꋋꂷ，ꉘꀋꇉꃅꐈꌊꋌꃀꐩꋊꇬꑠꒈꃅꐥꀋꋻꌠꀊꑙꑫꈩꅉꐛ……ꉪꅷꄚꑟꇬꆏ，ꂚꄏꋍꉌꂵꒌꀋꐊꌠꌟꃅꆄꇨꏿꇫꎍ。ꋌꊋꇤꄉꊨꏦꇨꃃꌠꋰꄉꇈ，ꄽꂫꆏꅇꀱ：“ꑠꆹꉬꑲꆏ，ꆎꆹꀊꑙꑫꈩꌠꉜꂿꄷꌠ，ꉌꊈꀂꏽꄉꉠꇬꇇꇩꍈꌠꉬꀞ，ꉢꉉꀋꑽꋭ？”
“ꉎ……”
ꂚꄏꆹꋌꇷꇈꉌꌂꑓꈋꃅꏮꑸꆀꉜꎍ。
“ꉠꅿꉂꇂꅉꌠꄊꎼꏹꇆ，ꆎꆹꇯꍝꃅꌳꉔꌳꄏꀑꁮꅺꐳꀐꄸꇈ，ꌺꇰꌩꁮꋠꑠꂷꉬꅊꇈ。”ꑸꆀꇿꌌꀋꎺꃅꒉ，“ꇯꍝꃅꉉꆎꇰꀋꆆ，ꉡꆹꀊꄶ‘ꍑꂷꌡ’ꌠꆈꌠꑮꆜꀊꋨꂷꊼꇅꉜꏾꂿꏾꌠ！ꋌꑡꂓꄷꆏ，ꐛꑘꀈꇭ？ꉢꇫꉌꌤꑓꀖꌠꆹꑤꊈꎼꏹꑠꂷ，ꊿꂾꇖꊰꈎꇁꑲꆀ，ꑮꃀꃜꁏꇫꎭ，ꋋꆹꀋꎪꃅꈀꄸꂷꇁꉚꌠꉬꉚꂿ？ꀋꃋꆹꉡꆹꄮꈉꊜꋽꋋꍈꐥꑲꆏ，ꑡꃅꇬꊼꇅꂿꀋꆹꄷꌠꉬꄜ？”
ꂚꄏꂶꌠꀭꌾꄷꋌꄓꇬꉆꇬꆏ，ꋍꑭꁆꇂꃴꅘꁧꈧꌠꋌꇱꄔꀱꏟꀱꏟꃅꂿ，ꇴꎇꆹꎅꀊꄶꐺꌠꇈꉌꑍꂷꑌꁈꉇꑴꁬꏪꇬꃹꁧꌦꀐ。
“ꉢ，……ꉢ……”
“ꆏ，ꆏꈍꃅꐙ？ꉢꋍꇬꍍꃤꋉꀋꉆꌠꅀ，ꉢꅽꇬꍍꃤꋉꀋꉆ？”
ꑸꆀꀂꏾꀏꉀꊼꇅꐕ，ꉐꆂꏡꌠꎇꌊꋍꂱꑆꂱꉐꇬꑽꅷꐺ。ꇖꂟꎸꈹꌠꑓꋪꋒ，ꀅꌳꀅꌳꃅꏭꇁꌊꂚꄏꈁꑓꇬꄉꎹꈹꇖꂟꅷꐺ。ꋌꇫꋒꌥꌠꈁꑓꋋꂷ，ꑓꊏꑓꂡꆗꁍꀕꇈꎵꑳꀕ，ꏨꆉꅳꐧꏡꌠꃀꅉꆐꀊꅰꃅꑓꏮꇬꉚꀋꉆꃅꎍ，ꀋꇎꀋꂪꅈꍈꀋꐥꌠꌡ。ꋌꇫꉌꃹꋺ，ꉈꑴꌙꈈꀕꃅꇫꑌꌂꋺ。ꀋꃋꋋꇅꇬ，ꋋꆹꈍꃅꑌꊿꋋꂷꅿꇿꌠꐒꌠꊀꌠꃃꌠꌋꆀꑤꊈꎼꏹꂷꅿꉌꃀꋧꃅꈍꃅꐙꑵꉬꌠꀉꄂꊼꇅꉜꆫꏾꌠꉬ。ꅳꍩꏃꊪꀄꊭꋫꌠꋌꍞꏢꁮꇫꎭꇈ，ꑞꉬꀋꐚꃅꋋꇅꃅꉎꉐꄹꒊꒉꁖꅐꇁꈭꐨꆏ，ꊛꄉꋌꄓꇬꉆꇈ，ꇇꑍꁆꌠꋌꇤꐧꊭꇬꌭꄉ，ꑓꋪꉈꀋꈻꃅꏮꂚꄏꇬꉜꄉꉉꇬ：“ꆎꆹꉢꋋꀋꌋꃅꎼꏹꃶꐚꂷꉬꅊꇈ！ꋌꐛꋌꐙꑞꑌꉬꇮꃅꌌꍔꍞꈉꊸꁧꎁꃅꌐꌠ。ꏲꍅꌠꉬꄿꂿ，ꋪꒃꌠꉬꄿꂿ，ꍍꋉꌠꉬꄿꂿ，ꋋꈨꉬꇮꊿꏠꋍꏠꀱꀉꁁꋍꏠꇬꉈꈽꌠꉬ。ꑞꑌꉬꇮꃅꉈꈽꅉꇬꄉꑭꄑꁧꌐ，ꌧꀕꀐ？ꋋꍈꆹꆏꌧꑲꆀꆎꆹꂷꆀꍗꑴꃀꊱꄏꉪꇐꌋꆀꀒꁨꋍꁘꃅꈛꑌꌦꀐ。”
ꂚꄏꌙꈈꀕꇈꇗꄃꀱꃅꎍꀐ。
ꋋꃅꐎꀊꉗꏢꂱꊨꐑꀋꋻꀐ，ꍵꂫꉘꁮꂶꌠꋍꈁꑓꇬꌸꇬ，ꂱꊨꁰꒌꆈꏸꅍꀊꄶꃄꅉꇬꐛꇁ。ꈍꃅꄉꀱꉈꑴ“ꈌꃶ”ꑠꂷꋒꀋꐛꌦꀐ？ꂚꄏꉪꇬ，ꋍꀉꄉꌦꈭꐨꆏꋋꆹꈜꎴꃅꄷꀿꃶꑠꂷꇱꇇꀤꌠꇂꃴꄉꄯꒉꁱꂷꈍꑋꈓꌷꋺ，ꄚꊁꆏꄜꉺꄯꒉꃑꄉꇩꂱꄉꌎꆽꁏꁥꌠꇱꒃꌊꏦꑳꇬꈢꋺ。ꀊꄶ“ꈌꃶ”ꀊꋨꈨꃅꐪꇇꋏꌭꐨꆹꑸꆀꌋꆀꋍꍈꂯꀋꍣ。ꑸꆀꆹꈍꃅ“ꇮꇐ”ꋌꐘꋌꌷꇇꈐꊐꌠꉬ？ꋍꏢꁮꇬꄉꅐꌠꉻꄑꋌꐘꆹ，ꃶꐚꃅꊿꋍꃅꐙꑠꈨꉙꂘꎼꇁꄷꐰꇑꇯꆐꑠꃅꏤꄉꇈꌠꅀ？ꋋꆹꋍꊨꏦꀃꅉꌋꅜꇈꌌꉪꇁꌠꎁꃅꉌꃀꃨꆰꇁꀐ。
ꑸꆀꏮꋍꇬꉜꇈ，ꃚꋒꇫꈌꀋꐚꃅꑠꇬꒉ。
“ꄿꀐ，ꑭꄑꅲꀐ！”
ꉉꑌꃅ，ꑸꆀꏮꌩꏪꇬꉜꄉꋍꇬꇴ，ꀏꃄꅉꇬꄉꅳꍩꏃꊪꀄꊭꋫꌠꋋꉅꆼꁠꇬꏦꄉꉉꆹꉇꆹꃅꁦꌦꀐ。
(ꉉꀽ:ꉇꇷꁰꒌꆹ ꐎꃅꊫꌓ ꍑꌠ。)
ꊁꊛ:ꉒꈌꈬꇬꉂꏣ(ꇖ)http://yi.yizuren.com/plus/view.php?aid=121
