ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꇖ)
ꄜꃑꄮꈉ: 2013-02-03  | ꁰꄻꊿ:ꀉꈌꏬꌋ

ꂴꊛ:ꉒꈌꈬꇬꉂꏣ(ꌕ)http://yi.yizuren.com/plus/view.php?aid=120

ꌧꂓꇆꆉꌩꏪꈐꏭꄉꇬꆹ,ꑸꆀꇳꃚꀉꉌꏄꃚꀉꄂꌡ。ꈍꉗꏢꐛꑲꆀ,ꎽꁁꀍꄟꀊꃴꂷꅑꏤꏅꀉꆈꈬꈚ,ꈎꄜ60ꈎꅼꍯꐥꏭꐛ,ꂱꀯꇬꂱꊨꀊꐎꀭꌠꆲꐊꀅꌳꀅꌳꃅꁏꌠꃀꌠꀉꁌꑠꂷꉉꆹꉇꆹꃅꇬꁖꇁ。
  “ꈀꄸꉬ?ꆏꈀꄸꉬ?ꑸꆀꏮꄚꌩꏪꈯꄔꇬꄉꁖꇁꌠꆈꌠꀉꁌꋋꂷꉜꄉ,ꀋꆏꃅꇫꅲ:ꉪꊇꊾꆹ?ꃀꌠꀉꁌꀋ,ꉪꊿꆏꊌꂾꀕꀐ?”
  “ꂿꀐ,ꉬꇮꃅꂿꀐ?”
  ꃀꌠꀉꁌꂶꌠꊒꀕꃅꂚꄏꏯꉜꄉꇁꇈ,ꇇꑍꁆꌠꌌꂚꄏꆼꁠꇬꌭꄉ,ꌤꌧꃪꃭꃅꉜꅷꐺ。
  “ꃴꄿꏁꍅ,ꆏꈍꃅꄉꄚꇬꁖꇁꌠꉬ?”ꂚꄏꆹꃀꌠꀉꁌꂶꌠꋌꌧꑴꌦꅊꇈ,ꀃꑍꄚꄉꃴꄿꏁꍅꌋꆀꐮꂿꇬ,ꋌꀕꇰꏭꃅꑌꐛꋌꇿꏭꃅꑌꐛ,ꋌꉈꑴꃀꌠꎁꃅꉌꂵꐒꊀꅌꑌꐥꇀꌦꀐ。
 “ꉢꆎꋩꌊꆿꃀꁡꇤꄉꆈꌠꈎꏅꁧꂿ!ꑷ,ꑷ,ꌩꏪꇬꃆꀞꂷꊭꄎꌊꆎꋩꂿꄷꄉꀐ。”
 ꑸꆀꋌꇰꀐ:“ꃀꌠꋋꂷꆹꉜꅊꇈꆏꆿꃀꁡꇤꀀꌠꉬꅊꇈ!”ꑠꃅꑲꆏ,ꉠꊿꀊꋨꈨꆹꇿꁧꀐ?……ꉠꅿꄈꀧꊿ、ꍅꏃꊿꀊꋨꈨꆹ?ꋌꏮꌩꏪꇆꆉꅼꅉꇬꉜꇬ,ꑓꂿꅍꑵꐜꀋꈨ。ꌤꆹꅐꄡꀋꑟꇆ?ꑸꆀꉌꂵꃨꆰꅍꀉꒉꃅꐥꇁꀐ。”
 “ꂚꄏ,ꃀꌠꋋꂷꈀꄸꉬꌠꐞꀋꉅꌦꂾ,ꆏꋋꐊꐺꀋꉆ!”
 ꂚꄏꋰꀋꄐꃅꒈꒉꌋꆀꀃꃀꈢꌦꄈꏾꀐ。
 “ꃴꄿꏁꍅꆹꆿꃀꁡꇤꂴꉘꃀꑘꁨꏓꏲꑠꉼꍗꑮ、ꌜꍣꄐꍈꀉꆹꂶꌠꉬ,ꋍꅿꃅꐪꑽꑌꌋꆀꌤꆿꀞꐨꑠꉬꇮꃅꉢꅉꐚꌐ。ꆏꉌꐒꌋꀋꌸ,ꆿꃀꁡꇤꄉꇁꌠꆀꃅꃰꊿꆹꊾꀋꋠꌠꉬ。”
 ꑸꆀꆹꀊꅰꃅꃨꆰꇁꀐ。ꑘꁨꏓꏲꑠꉼꍗꑮꌋꆀꀊꋨꄮꇬꌤꃅꄐꍈꑌꇁꐮꋒꇈ,ꀊꅰꃅꏣꉎꏣꄅꇱ,ꉂꏣꎵꑳꀕ,ꄚꉡꆹꊾꄂꈜꄂꍬ,ꇇꏸꏢꀉꄂꆖꂷꀕꉅꀋꉆ。ꇨꊸꌊꀋꎺꃅꆼꁠꇬꄉꅳꍩꏃꊪꀄꊭꋫꌠꒃꌊꍩꃚꌌꀥꀊꄶꌧꂓꏪꇬꃹꁧꌠꋍꊿꈧꌠꏭꌗꋏꏢꉨ。ꄚꋍꇇꆹꏟꈯꀕꃅꎸꅍꎮꑑꋬꇱꑐꇯꏢꀕꀐ。ꀋꃉꌌꋍꑬꆏꅈꇬꇓꂵꀊꋨꂷꊂꆈꄉ,ꌠꆗꄿꏀꑅꆈꀕꏸꀕ,ꆿꏾꆿꉌꑌ、ꃀꆏꀊꏂꂷꅑ、ꂗꍵꐎꄣꀵꑠꂷꋍꂴꆽꄉꀱꒊꀱꇁꃅꐺ,ꀊꅰꃅꋍꇨꊸꐨꇬꁦꎆꄀꌦꀐ。
 “ꆏꑟꃅꂯ?ꏨꆉꐚꇁꌧꂓꏪꇬꊐꇬꂯꑏꌅꊰ,ꆎꆹꑞꃅꂯ?”
 ꑸꆀꋌꇷꈌꉛꀕꇫꎍ。ꋍꇇꁆꌠꍕꉈꑴꎭꇁꂯꇬꑌ,ꊿꇱꌭꇯꏢꀕꇫꄉ。ꃅꅍꎷꀋꊌꃅꋍꅳꍩꏃꊪꀄꊭꋫꌠꄝꇫꎭꑲꆀ,ꇇꁆꌠꈁꌒꀕꌠꐛ。ꄚꄉꋌꉪꐙꇁꏭꁮ,ꉜꎼꇁꇬꆹꆿꃀꁡꇤ“ꆿꃀ”ꊝꀐ,ꑠꃅꑲꆏꂚꄏꆹꂚꄏꌬꈉꐥꅊꇈ,ꏟꈯꀕꃅꑸꆀꇱꌦꂚꄏꇬꀵꎌ。
 “ꂚꄏ,ꈍꃅꑠꃅꐙꌠꉬ?ꅑꑘꉬꇮꆏꀵꌐꌠꉬ。”
 ꂚꄏꉜꇬꑌꇣꋲꌠꌡ,ꋌꎼꌠꆗꄿꏀꂶꌠꏭꅲ:“ꎭꂵꊞꐂ,ꆎꑌꈍꃅꇀꌦꌠꉬ?”
 “ꂚꀯꍈ”,ꂚꄏꑤꊈꎼꏹꄻꁧꄉꂽꑼꌋꆀꐮꐞꀐꑴꇬ,ꄚꂱꀘꈧꌠꆹꄡꇗꋍꂓꀉꆹꇫꌠꀋꇴꃅꇤꇫꎭꀋꄐ,“ꉢꀉꄂꇁꌠꀋꉬ,ꉪꊇꆃꍈꌋꆀꆿꃀꁡꇤꂱꀘꈧꌠꉬꇮꃅꇁꌐꀐ!”
 “ꊿꈔꃌꅪꏡꌠꀋ,ꅽꀉꁌꀋꁧꂶꌠꇴꄜꅀ!”ꎭꂵꊞꐂꐁꁨꋍꁘꉆꇈ,ꇵꊫꋌꋏꌊꑸꆀꂱꀯ、ꅳꁖꏢꁮꇬꄉꇷꇋꅷꐺ。
 “ꆏ,ꆏꀕꑞꃅꐺꌠꉬ……”ꑸꆀꀋꎺꃅꉈꑴꎞꇬꆏꃆꀞꀊꅪꂶꌠꇱꄙꇯꏢꀕꇫꄉ,ꑸꆀꋌꇷꌊꀋꎺꃅꇇꑍꁆꌠꋌꎇꌊꀂꏾꇬꉱꅷꐺ。
 “ꊞꐂꌺ,ꈁꏾꃅꇫꃅꇬꄡꎹꉏ!ꉆꐥꃅꅽꇵꊫꄝꎼꇁ,ꇤꐳꃅꃆꀞꌌꇀꀕꀑꉚꒉ,ꆏꂴꂚꄏꏃꁡꇤꇬꑷ。”
  ꑸꆀꆹꃴꄿꏁꍅꑠꃅꉉꌠꂾꈨꇬꆏ,ꉌꂵꀊꅰꃅꇨꊸꏸꏦꇁꀐ:“ꈨꑗꇬꉚꇁ,ꉘꁮꇬꉚꇁ,ꄩꆹꃅꃴꇬꀋꑟ,ꀏꆹꅉꃴꇬꀋꑟꌠꌧꂓꇆꆉꏪꋋꂷꇬ,ꉢꀉꄂꋀꊇꇱꊏꄚꎭꇈꌠꆹ,ꋀꊇ……ꋋꇅꃅ,ꂚꄏꐥꍂꃅꈂꀸꀋꁉꃅꁨꇐꐥꏠꌠꏮꎎꇬꎷꂶꌠꆹꋍꀑꇬꀕꈭꋏꄎꌠꆀꃅꒋꒌꁦꌠꐛꀐ。ꀋꄹꄷꏟꈯꃅꌦꂚꄏꀵꀋꄉꇮꇬꆹ,ꄁꆹꈘꃅꐺꌠꌅꈌꉬꇮꌭꌠꁧꎁꋋꂷꆹ,ꄽꂫꊰꇿꇬꅞ,ꋍꀑꇬꊫꂫꈍꃅꐙꌠꆹꃶꐚꃅꊿꋌꉨꀋꀬꌠꉬꀐ。”ꋌꃶꐚꃅꉪꑽꀐ:ꀋꃉꌌꑞꐛꅹꋍꊿꈧꌠꄝꌧꂓꇆꆉꏪꇬꊐꇫꎭꌠꉬ?ꋍꆹꋪꒃꌠꉌꂵꉪꐨꃅꇫꑟꌠꎁꃅꌠ,ꀋꅞꉖꈊꃀꂚꄏꇴꌊꋍꂓꅑꌠ‘ꁱꇐ’ꉜꇁ,ꃶꐚꃅꂚꄏꆹꉌꂵꌥꀱꆱꀙꀐꌠꉬꇬ,ꄚꋌꆹꃰꄩꉈꐎꄅ、ꃆꄔꀋꇎꃚꊛꇱꌠꃄꌦꀐ?ꇓꂵꄌꌊꌞꊿꅥꂿꄷꀋꉬꃅ,ꄽꂫꆏꇓꂵꊰꇁꂱꑱꊨꏦꏸꑮꇬꐷ,ꃰꊿꉪꑽ,ꋍꈌꋌꀛꐆ;ꇂꁮꉪꑽ,ꃪꇬꏜꑣꋠꀐ;ꑋꑿꉪꑽ,ꊫꇬꒉꏺꅝꀐ!ꑸꆀꂶꌠꆹꀑꑊꈁꀋꄚꃅꇇꎇꌊꉈꑴꄉꇭꀧꂶꌠꐃꎎꇂꂮꅍꉉꇬ:“ꂚꄏ,ꆏꆹꁧꀋꉆ!ꆎꁧꑲꆏꉡꑌꆎꐊꁧ。”
  ꑸꆀꆹꎭꂵꊞꐂꇱꇊꄉꉉꇬ:“ꂚꀯꍈꆹꉪꏤꁡꇤꇬꄉꉪꆈꌠꈎꏅꈽꁧꌠ,ꆎꆹꅽꀋꁍꀋꁧ、ꅽꀉꄉꅰꌋꂶꌠꎹꁦꄷꌠꅀ?ꆎꆹꉥꑣꌺꃅꄚꄉꇁꉚꄉꇈ,ꋍꈪꌺꇬꆏꊿꀉꁁꅽꇬꇹꄣꇁꌠꐥ。”
  ꄚꄉꑸꆀꆹꀊꅰꃅꃨꆰꏸꏦꇁꀐ,ꈁꑓꂶꌠꃅꁋꌙꅍꌦꇬꀋꈴꀐꌠꌡꇫꎍ。
  “ꃴꄿꏁꍅ,ꃴꄿꏁꍅꀋ,ꆍꉢꂷꌠꌊꇿꁧꂯ?ꉡꆹꈧꊰꀕꀉꂿꎮꑑꅉꃅꇯꍝꃅꆍꏮꇖꂟꀐ,ꉠꇬꑠꃅꑵꀋꉬꀐ,ꉡꆹꆍꆈꌠꄿꏀꇰꇗꌬꈧꌠꇱꆹꍑꇬꊎꇈ,ꄽꂫꆏꉢꋌꌌꀋꌦꃅꌉꄉꑆꐒꌠꏦ……”
  “ꉎꉐꉑ……ꉮꀕ……,ꉠꉂꆎꆹꏨꆉꌟꃅꏦꅍꀋꐥꌠꎰꃀꂷꉬꎻꈁ,ꉜꅊꇈꂿꆏ,ꆎꆹꀉꆩꉪꆈꌠꁮꅉꏸꏦꃬꑐꋦꂶꌠꌡꌠꎰꃀꂷꉬꅊꇈ!”ꃴꄿꏁꍅꂶꌠꀋꎺꃅꒊꒉꁖꀐ,“ꎰꈔꎰꆅꅥꎰꃀꂶꌠꀋ,ꆎꆹꐒꌋꆹꀋꌸ,ꉪꆈꌠꄿꏀꑠꆹ,ꅽꌟꃅꑊꋌꉱꃀꑌꀋꌡꌠ,ꅽꌟꃅꊿꉮꊾꋠꉌꂵꑌꀋꑌꌠ,ꋀꊇꆹꋧꃅꇣꄧꃅꇬꋍꉎꀋꐥꃅꇗꁨꀸꁨꌠꉬ,ꅽꊨꏦꆞꇔꄉꅽꁮꄲꀊꋨꂷꁉꎻꋀꊇꂲꆽꄉꇬꑋ,ꋀꊇꆹꊾꂷꅽꇬꆹꍑꇁꄷꀋꁧ,ꊾꂷꑓꏮꆎꉛꌠꇯꀋꊌꌠꄹ。ꀊꄶꀬꅑꌠꌋꎎꁥꌠꆹ,ꆎꇴꌊꊨꀖꃀꀉꇨꑠꂷꈿꁧꂿꄷꌠ!ꅽꊿꑊꋌꌺꌡꀊꋨꊰꉬꑻꌠꆹꀋꃉꌌꇯꆐꇫꑟꀐ,ꋀꊇꀊꄶꌩꏪꈬꇬꄉꆎꇁꉚꎍꌐꀐ!”
  ꑸꆀꆹꃴꄿꏁꍅꇱꁒꐀꈌꎸꀋꀮꍈꇯꀋꒊꃅꇬꄉ,ꑸꆀꋋꎼꑊꏦꌊꁈꃅꐬꉱꀋꅑꑠꂷꇬꃹꁧꄈꏾꃅꎌ。“ꉢ……ꀊꑴ,ꂚꄏ,ꇅꂚꀋ,ꆏꁨꊼꇅꑍꇬꌺꉉꇆ,ꆏꑠꃅꑵꀋꉬ,ꆏꌦꌠꂿꇬꈭꀋꋏꑵꅀꑞꃅꇆ!”ꑸꆀꇭꀧꇖꌋꃅꊋꀋꑌꇈꎺꀋꇬꃅꋋꅞꀏꃄꅉꇬꑌꄉꀉꑳꌕꈎꂷꀋꏭꑳꉨꁖꀐ。
  ꋌꇅꇬꆏ,ꆈꌠꄿꏀꑠꂷꃆꀞꀊꐎꂷꏣꄀꌊꌩꏪꇬꄉꅐꇁ。ꃆꀞꂶꌠꆹꂚꄏꋌꊌꂿꇬꆏ,ꀂꏾꉈꈩꅷꅲꇢꈻꃅꏅꅷꐺ。ꂚꄏꌧꑴꌦ,ꃆꀞꋋꂷꆹꀋꉊꋌꌤꃅꄐꇬꐤꄮꇬꋩꋺꌠꀊꋨꂷ。ꄚꄉꋋꇅꃅꀊꄶꁧꉈꐛꌠꆿꃀꁡꇤꂶꌠꋌꎺꇁꀐ,ꀊꄶꇬꆹꋍꇵꂷꄧꀕꊰꌟꐊ,ꋍꌦꅪꄧꀕꊰꌠꉔ,ꉈꑴꊿꋌꉉꑲꀋꌧꌠꉂꏣꑌꐊ。ꎭꈐꄸꌊꄉꃅꈎꃅꆪꑠꃅꌼꀖꑠꊭꇬꀋꊝꇮꇬꆹ,ꆿꃀꁡꇤꋍꅿ‘ꐥꌒꁍ’ꉬꇬꑌꋒꀋꄿꀐꌠꉬ。ꄚ,ꀋꃋꋌꇄꇬ,ꋌꐱꃆꀞꀊꐎꋋꂷꋩꄉꆿꃀꁡꇤꉜꄉꀥꆹꉆꉈꂯꆏ?ꋌꃱꇍꃯꇌꃅꐙꇁꀐ。ꌅꈌꉬꇮꊿꇱꇑꌊꁧꌐꇈꑬꆏꄮꀋꑟꑴꌦꌠꑤꊇꎼꏹꋋꂷ,ꋍꅿꂿꃆꆹꌌꉜꉚꋯꀋꐛꃅꊨꀖꌠꀉꄂꄽꄐꇫꎍ。ꄚꑠꃅꅹꀋꅐ,ꆿꃀꁡꇤꑠꃅꎍꇬꆹꈍꃅꀻꎆꂯ,ꄽꂫꈍꃅꐙꑵꉬꂯ,ꋌꉜꇬꋍꊨꏦꀃꅉꑭꄑꄉꇬꀋꉜꀋꅲꀋꉆꀐ。ꀉꑌꈎꃅꌤꃅꂿꃆꀵꌠꊿꑠꂷꆹ,ꈍꄮꇬꑌꉪꇁꊨꏦꀃꅉꃣꁧꂿꃆꐘꌠꄀꇬꎷꌠꉬꅊꇈ。ꋌꉪꇬꆿꃀꁡꇤꄓꉀꉆꀐꌠꁏꐚꈧꌠꑠꆏꉂꃆꌂꑘꃆꂮꑠꆹꇯꍝꃅꁧꀐꎺꒉꂷꒉꌟꃅꐝꍠꀕꇈꇣꋲꐋꀋꌡꌠꉪꇐꈝꃀꐥ。ꋀꊇꄷꅠꌠꂿꇬꉌꂵꀖꆏꌥꑌꀋꑴꌠꐛꊈꆹ,ꋀꊇꋌꇱꊢꂖꅷꃆꄔꉐꆂꅝꀬ、ꆿꃀꁍꎼꇬꑝꀬꌠꉬ。ꀋꃋꀃꑍꆏ,ꋀꊇꑌꊨꀖꃀꂷꈿꌦꀐ!ꈀꄸꏭꊨꏈꂯꆏ?ꉉꄻꀋꅐꃅꑸꆀꌋꆀꋌꏃꇁꌠꊿꀊꋨꊰꉬꑻꏭꉬꂿꇐꏽ。ꄚꑠꃅꇬꍑꍓꂯ?‘ꂿꑘꊿꇓꈓꏮꇊꑴ’ꄷꌠꀎꇓꂶꌠꆹꈍꃅꑌꄻꅑꀐꎂꀕ,ꄚꋌꑠꆏ“ꉹꁌꀱꉹꁌꐮꉈꈽ”ꄷꌠꉫꉬꂯꆏ?ꂚꄏꉪꅉꉪꅉꏸꏦꇁ,ꋋꆹꌦꋒꅿꌠꉹꁌꀱꉹꁌꐮꉈꈽꌠꐛꂨꅍꎍꌠꀉꄂꀋꉬꃅ,ꐧꋦꋌꎼꄚꍬꄚꁠꄉꌼꀖꇫꈴꁧꂿꇐꏽ。ꂚꄏꉌꂵꐒꌠꆹꊨꏦꀃꅉꀋꉬ,ꊨꏦꊫꂫꑌꀋꉬ,ꈍꃅꐙꄿꂿꋋꆹꊰꀐꌠ;ꂚꄏꉌꐒꇁꎭꌠꆹ,ꑠꃅꀕꑲꆏꆿꃀꁡꇤꆹꐥꐨꑘꒃꎍꐽꌠꀋꐥꁦꏦ,ꂿꑘꆫꑘꉹꌠꌜꍣꄚꍬꀜꐡꆽꊀꇫꈴꁧꄉ,ꋠꃆꈚꂮꌤꃆꊋꋠꇁꌠꏦ,ꐎꑭꊂ、ꑤꑭꊂ,ꄷꀋꁧꍏꑭꊂꃅꊿꋋꉪꀋꏾꌠꐛꐪꁖꇁꏦ。ꋋꆹꇯꍝꃅꆿꃀꁡꇤꁧꀋꉆ,ꋋꆹꄚꇫꐥꇈꄡꑟ,ꄚꇫꐥꄉꋌꃢꊨꀖꂯꃀꈿꌠꏢꇋꄡꑟꌠꉬ。
  “ꉆꐥꃅꐂꃆꀞꄩꑌ,ꂚꀯꍈ。”ꎭꂵꊞꐂꉈꋍꃢꂚꄏꏮꇤꅷꐹꌦꀐ。
  ꃆꀞꀊꐎꂶꌠ“ꄵꇓ”ꄷꇈꀂꏾꎇꌊꂚꄏꇭꀧꇬꄉꉂꑟꅑꇈꃨꆰꃨꊸꏭꃅꅫꅷꐺ。ꊽꃆꂮꌧꌠꃆꀞꀊꐎꋋꂷꂿꇬꆏ,ꂚꄏꉌꂵꂶꌠꉈꑴꉪꅍꎺꅍꐥꇀꌦꀐ。ꀊꋨꄹꈎ,ꌤꃅꄐꆹꆿꃀꁡꇤꍆꇁꊂꀊꉗꀋꐛꃅ,ꋀꊇꎁꃅꈝꃀꏃꋺꌠꀊꄸꀈꏦꌋꆀꋍꂛꊨꑋ,ꉈꏭꀇꐒꇸꁧꄮꇬꆏ,ꋋꇅꃅꁈꁦꀑꀀꄉꈁꁏꁧꂿꄷꊭꄎꌠꐚꌌꁈꀋꉻꇈꐂꌺꇱꇑꈐꌊꁦꀑ。ꈝꃀꈢꄉ,ꂛꊨꀊꄸꈯꉐꆹꎭꈐꂄꄉꁈꁧꀐꑴꇬ,ꄚꋍꅫꃀꀊꄸꀈꏦꆹꀄꊭꃅꋍꑍꇯꆐꈁꁏꊿꈧꌠꏭꌂꏷꈌꀕꄉ,ꊿꇱꅥꀕꌋꆀꀙꐯꀙ,ꄷꀋꁧꐚꌌꁈꀋꉻꇈꐂꌺꇱꆹꍑꇬꀋꇊꊐꋺ;ꉈꑴꀊꄸꀈꏦꆹꌤꃅꄐꇬꎁꃅꈜꏁꋻꐛꅹ,ꀊꅰꃅꊿꅥꀙꂿꇐꏽ。ꅇꈨꈭꐨꆏ,ꂚꄏꆹꑌꈨꑌꃅꄓ,ꉆꈨꉆꃅꄓ,ꊿꑍꂷꏃꌊꄺꑣꄉꈁꁏꊿꉬꄷꂁꈁꁏꊿꁥꌠꀀꅉꇬꃹꒉ。ꄚꋀꊇꆹꎭꈐꄸꄉꂁꀋꄐꃅꅔꁖꀐ。ꋀꊇꀱꉈꑴꎞꄮꇬꆏ,ꊿꀊꋨꑍꂷꀑꇬꁮꀐ。ꂚꄏꏸꑭꇬꑌꍩꇓꌸꇈꃅꅍꎷꀋꊌꃅꂁꀊꄶꅘꁧꏪꇬꀀꎍ。ꇁꉚꅷꃅꄜꇁꂯꄉꄮꇬꆏ,ꈨꉆꈨꀋꉆꃅꆄꇖꃚꈨꆲꐊꁏꋍꅳꀧꇬꃹꇁ,ꀂꏾꐕꎼꆹꇈ,ꉜꅊꇈꂿꆏ,ꀊꄸꀈꏦꂶꌠꂃꐡꈫꌠꍔꐕꌊꇁꀐ。ꂚꄏꀋꎺꃅꋋꇅꃅꄓꇫꑌꇈꉉꇬ:“ꀊꄸꀈꏦ!”
  ꄚꄉꋋꇅꃅꃢꈜꈌꎓꅲꐡꌐꇈꇭꀧꇖꌋꃅꂷꊂꀉꄂꌠꑮꆜꂶꌠꆏꇬꉆꎍꀐ。ꋋꆹꏸꏦꄉꁈꉈꏭꐺꌠꀉꄂꑠꃅꐥꌠꑓꋪꋑꌠꍻꌊꏸꏦꐆꃅꏮꂚꄏꇬꉜꎍ。ꋍꂴꆽꏸꑭꁆꌠꌦꅪꇰꀮꒉꌠꊿꂶꌠꋌꉜꐝꈷꄮꇬꆏ,ꋌꀕꇷꇈꀊꅰꃅꏸꏦꇁ,ꀋꎺꃅꂃꐡꈬꌠꇬꄉꂪꌦꂷꋋꇱꏅꌊꂚꄏꅿꂷꊂꂶꌠꋌꄟꄉ,ꑑꃹꏾꁵꀕꃅꉉꇬ:“ꉆꐥꃅꁈꑷ,ꉢꆎꁠꂿ!”“ꆏ……”ꂚꄏꅇꉉꅐꀋꇀꌦꇯꆐ,ꑮꆜꂶꌠꎐꂷꊼꇅꑝꇈꂚꄏꋌꀵꌊꇁꀐ,ꈍꃅꊋꋠꃅꁈꅷꌩꏪꑠꈚꇬꑟꇬꆏ,ꃆꀞꀊꐎꂶꌠꀊꄶꐥꇈꀕꋍꑊꐱꄩꑌꄉ,ꃅꄜꃅꉒꇱꁿꄉꌠꇂꃴꄉꐯꇯꁈꇁꌊꆿꃀꁡꇤꑟ。
  ꀋꃋꋍꑓꋪꂴꆽꃆꀞꀊꐎꂶꌠꑠꃅꊨꏦꇫꈮꈜꌠꂿꇬꆏ,ꂚꄏꉂꏣꎵꑳꀕꌠꀋꎺꀋꄐꃅꋌꂨꅷꅔꁖꇀꌦꀐ:ꀋꄹꄷꉡꆹꑤꊇꎼꏹꂷꀋꉬꑲꆏ,ꈍꃅꑌꐒꊀꅍꀋꐥꃅꈁꒉꈁꌒꀕꃅꐥꀐꌠ!ꄷꀋꁧꃅꐎꌘꁮꇖꁮꆪꃅꄉꆿꃀꁡꇤꇫꐥꁧꇬꑌꉆ,ꉈꑴꑲꋦꇤꄂꐥꍂꃅꀊꄶꇬꀀꁧꇬꑌꍑ。ꄚꀋꃋꀃꑍꆹꉢꋌꎼꂴꄷꂴꀋꉬ,ꊂꄷꊂꀋꉬ,ꁨꆹꑌꀋꄐ,ꉈꎞꑌꀋꄚ,ꀀꁏꀄꆽꃅꇬꇯꆏꀋꍑꀐ。ꂚꄏꃶꐚꃅꀀꁏꀄꆽꃅꀋꄐꀐ,ꀉꇖꐆꃅꑓꋪꋑꌠꁉꎼꆹꇬꆏ,ꊿꀊꋨꌕꑻꐯꇯꑓꑟꉈꀋꈻꃅꏮꋌꉚꎍꅊꇈ。
  ꑸꆀꆹꑓꋪꌌꉜꅉꀋꉜꃅꎍꇬꎷ,ꀋꇊꇬꑠꃅꉉꌠꌡ:“ꆏꑤꊇꎼꏹꋋꂷꑞꑵꃅꐺꌠꉬ?ꉪꊇꈝꃀꈴꑽꄉꊰꇁꅽꂣꈐꇬꊐꌠꆹ,ꆎꆹꉌꂵꇿꄡꑟꌠ,ꆎꑌꄡꇗꉠꌟꃅꄸꃅꌠꄷꀱꄉꋌꁳꇨꇅꃃꄡꑟꌠꉬ!”
  ꎭꂵꊞꐂꆹꄡꇗꆿꃀꑓꋪꌡꋑꌠꁉꌊꉇꀋꎞꃅꂚꄏꇬꇤꅷꐺ:“ꂚꀯꍈ,ꉆꐥꃅꑷ!ꉪꊇꆿꃀꁡꇤꁦꒉꌩꏪꇆꆉꅼꇨꌠꉬ,ꂽꑼꈍꑋꊰꃪꏯꄙꄎꌠꉬ,ꅽꇭꀧꀕꌋꃅꌠꆹ,ꑡꑌꏦꅍꀋꐥꌠꉬ!”
  ꃴꄿꏁꍅꂶꌠꀉꄂꇯꍝꃅꃹꅼꌠꉜꐨꐥꇫꎍ。ꋋꆹꐚꁦꌋꐧꋦꇬꄉꃅꐎ50ꎖꈎꂷꎲꊐꋺꀑ,ꌕꃢꊰꒉꃹꋺ,ꈬꃢꃪꇬꄉꃪꐛꆺꀕꂃꋺꑴꇬꋋꄡꇗꏦꈫꏦꏪꅘꁧꌟꃅꏟꈯꀕꃅꐥꅷꇁꇬꎷ。ꀑꇬꆺꌠꏦꑴꇬꄡꇗꏟꈯꀕꇬꎷ。ꋋꆹꆿꃀꁡꇤꂴꆽꄈꎀꍹꇬꃹꂶꌠ,ꂚꄏꆹꋍꇬꐝꈷ,ꋋꑌꂚꄏꇬꐝꈷꐯꃆꂮꌧ。ꂚꄏꀱꑤꋋꂷꇬꄉꌤꃅꇁꈭꐨꆏ,ꋍꃢꇀꅉꀕꃅꆈꌠꈎꏅꄷꆏ,ꋋꆹꃆꀞꀊꐎꂶꌠꋩꄉꆱꃀꆱꌺꀵꀋꎪꃅꇓꈓꇬꇁꇬꎷ。ꆱꃀꆱꌺꈐꏭꄉꆿꃀꁡꇤꅿꃮꀂꏾꌋꆀꀉꁁꑌꁮꉆꁮꎸꑠꀵꂚꄏꋑꏮꇴꇁꇬꎷꌠ,ꂚꄏꆹꎧꏸꐝꍚꀕꌠꀖꌊꃴꄿꏁꍅꄐꑟꃅ,ꋍꑊꆹꂵꆧꃀꄉꌧꅷꌊꁁꈯꍠꀕꄮꇬꑟꇬꎷꌠ。ꉉꌐꈤꀋꉆꌠꅇꂷ,ꄜꌐꑘꀋꉬꌠꉂꏣ,ꋋꆹꏣꀨꏢꌟꃅꂚꄏꌋꆀꆿꃀꁡꇤꋌꐒꇰꏢꀕꃅꐯꇯꄉꀐ。ꀋꉊꄹꈎꆏ,ꈍꃅꌠꉬꀋꐚ,ꋌꑍꃀꑍꊂꌟꃅꉌꇿꋋꈨꐜꀋꈨꆘꅝꀐ。ꋋꆹꑤꊇꎼꏹꄰꀁꇬꆹꀋꄐꆘꅝꀐ。ꀃꈈꆹꎤꂷꀉꒉꑵꌠꌌꎤꇫꎭꀐ,ꎼꏹꆹꈢ“ꇌꉻ”ꇬꊐꄉꀐꃅꌠꄯꒉꑠꁬꁱꑕꇬꄀꄉ。ꃴꄿꏁꍅꆹꑘꀋꒃꌠ、ꐬꆠꌠꌋꆀꉌꐒꌠꋌꌌꆿꃀꁡꇤꑟꇁꀐ。ꆿꃀꁡꇤꊾꆹꉜꉚꑓꏣꈘꃅꇁꉚꅷꇁꇬꎷ,ꄚꇅꂚꆹꇿꇫꐥꃅꌠꅇꇰꌠꆹꊪꀋꊌꑴꌦ。ꎼꈎꆈꌠꈎꀋꏅꑴꌦꇬꇯꆐ,ꋀꊇꆹꃮꀂꏾꌋꆀꑋꁮꉆꁮꎸꊭꄎꄈꌦꀐ。ꀋꃋꋌꃢꆏꉘꀋꇉꃅꇅꂚꃆꂮꃶꐚꅇꆲꐊꁏꄉꈨꇁꀐ:ꌕꑍꌕꉖꃅꌌꊨꀖꃀꈿꈭꐨꆏ,ꊛꄉꌌꑤꑭꊂꇪꎹꂷꈀꐥꃅꏮꈴꄉꊨꀖ。ꈍꄮꇬꑲꆀꆿꃀꁡꇤꑟꇁꀋꐚ?ꃶꐚꃅꆿꃀꁡꇤꇀꀕꑌꊿꋌꀋꐚ?ꋀꊇꈯꄔꇬꊾꂷꇫꅉꐚꌠꀋꐥꌐ。
  ꊂꄽꂫꇬꆏ,ꐟꈯꇓꆈꌟꃅꅡꊪꀕꌠ、ꁧꀐꎺꒉꂷꒉꌟꃅꐝꍚꀕꌠꆿꃀꁡꇤꆹꋌꇱꋣꌉꅷꑘꀋꒃꃅꎍꇁꀐ:ꃅꃴꃄꅉꐛꐈꁏꀐ,ꃅꃴꃄꅉꐛꐈꁏꐯꈽꀐ!ꇫꄉꈨꇁꇬ,ꄈꍏꑷꇬꄉꅑꂱꑱꃅꄷꑟꌠ,ꎼꏹꄻꋺꈧꌠꉬꇮꃅ“ꊰꒉꊐꌐ”ꀐꄷ!ꀋꇷꇆꀋꇷꋠꈍꃅꂯ!ꊿꁏꐚꄻꀋꏾꈧꌠꑓꋪꉌꂵꈐꇬꆹ,ꄈꆹꈍꃅꐙꌠꒃꑌꒃꀋꉆ,ꄚꎼꏹꆹꈍꃅꐙꌠꃅꈊꃅꄜꃅꋀꊇꊌꂿꉆ。ꃅꉒꃴꀱꍠꀕꌠꆿꃀꁡꇤꆹ,ꀙꏢꇓꈓꃅꑆꉇꄅꐛ,ꆿꈹꃅꀕꈬꑍꈬꉖꋩꇬꑌꇬꀋꑟ,ꄚꂚꄏꆹꋀꊇꏢꁮꇫꐥ。ꋋꆹꁏꐚꈧꌠꐊꄉꇤꈏꇢꇑꏢꁮꇬꀀꋺ;ꁏꐚꈧꌠꐊꃱꏢꑸꑽꋉꅝꋺ;ꋀꊇꋠꈚꌤꃆꐘꌠꐛꅹꃅꋌꑓꂷꅪꋺ;ꋀꊇꋚꅗꋚꄉꃪꅪꎆꃅꊌꄮꇬ,ꋌꇿꌊꒉꇎꇁꀋꉆ……ꆿꃀꁡꇤꆹꃶꐚꃅꎬꇨꅦꇨꀕꀐ,ꋍꈓꇂꃴꌠꉈꀋꐛꌠꃅꑍꆹꋍꁮꆪꐥꀋꋺ,ꄚꇬꃰꌵꌙꈈꀕꇈꋤꀕꇁꄵꃛꀋꋌꌠꆹꃅꐎꇖꁮꆪꐥꇬꎷ。ꆿꃀꁡꇤꊾꆹꈍꃅꊷꆣꀕꌠꈉꊸꌠꉬ!ꑠꅹ,ꃴꄿꏁꍅꅿꀻꑳꆈꐷꀕꂶꌠꈐꏭꆿꃀꁡꇤꑭꊂꁧꎁꊿꈧꌠꉬꇮꐯꏑꌊꄚꄉꐮꇖꐮꄟꌐꀐ。
  “ꁦꋠꈧꌠꀋ,ꈍꃅꂯ?ꇑ!ꇅꂚꂶꌠꇑꌊꆿꃀꁡꇤꐥꇁ!”
  ꌤꃆꆹꑠꃅꏤꄻꄉꀐ,ꄷꀋꁧꁣꀋꐥꃅꇬꊎꃄꇰ。ꄚꃴꄿꏁꍅꆹꃱꇌꃯꇌꃅꐙꇁꀐ。ꂚꄏꅿꐛꄟꇬꄉꉜꎼꇁꇬ,ꋋꆹꈁꏾꃅꐱꃆꀞꄩꑌꀋꅲꀐꌠ。ꉘꀋꇉꃅꂚꄏꆹꇁꌊꋍꂴꆽꉆꄉ,ꀅꌳꀅꌳꃅꉉꇬ:“ꃴꄿꀋ,ꉡꆹꇬꊼꇅꅉꐚꏾ,ꊿꀊꋨꊯꉬꑻꌠꆹ,ꀋꃋꇿꇫꐥꐚꐙ?”
  “ꋀꊇꆹꌌꇬꊎꃣꈌꀞꇽꅷꐺ。”ꎭꂵꊞꐂꅇꉉꈌꊐꄉꉉꅷꐺ。
  “ꈀꄸꂷꇫꇹꄣꐺꌠꉬ?”
  “ꉪꊇꆃꍈ。”
  “ꀊꄸꀈꏦꅀ?……ꃴꄿꀋ,ꑠꃅꀕꀋꉆ,ꉆꐥꃅꀥꄉꏢꇋꇫꎭꆹ。”
  ꑸꆀꂶꌠꉌꀋꒊꐆꃅꋌꐂꂚꄏꂴꆽꉆꇈ,ꋌꌦꂚꄏꇇꈌꇬꌭꄉꉉꇬ:
  “ꑠꃅꌠꉬꑴ,ꇅꂚ,ꀋꎪꃅꉆꐥꃅꀥꄉꏢꇋꇫꎭꆹ!”
  ꂚꄏꇫꌂꐆꃅꏮꋍꇬꊼꇅꉜꇈ,ꇇꋌꎇꎼꇁ,ꋌꀱꉈꑴꃴꄿꏁꍅꂴꆽꉆꄉꉉꇬ:“ꃴꄿꀋ,ꑷ!ꀞꇽꅉꇿꇬꉬꀋ?”
  ꎭꂵꊞꐂꂶꌠꆹꉌꀋꃹꐆꃅ,ꋌꐂꎇꂚꄏꌋꆀꃴꄿꏁꍅꑋꇢꊭꇬꉆꎍꇈ,ꂚꄏꅇꂷꋌꇑꌊꉉꇬ:
  “ꂚꀯꍈ,ꌤꋌꐘꆹꆏꇫꏲꌋꀋꌸ,ꋋꆹꉪꊇꆿꃀꁡꇤꌤꑘꉬ!”
  “ꆏ,ꆎꅽꉉꄟꉜꉏ,ꑡꆿꃀꁡꇤꌤꑘꉬꀋ,ꋋꆹꇭꍣꄈꌤꑘꉬ!”
  ꂚꄏꐂꃆꀞꀊꐎꂶꌠꄩꑌꇈ,ꃅꍋꊼꇅꈩꇬꆏ,ꆲꁏꌟꃅꁏꇁꌧꂓꇆꆉꈬꇬꃹꁧꀐ。

(ꉉꀽ:ꉇꇷꁰꒌꆹ ꐎꃅꊫꌓ ꍑꌠ。)


ꊁꊛ:ꉒꈌꈬꇬꉂꏣ(ꉬ)http://yi.yizuren.com/plus/view.php?aid=122

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ