ꂴꊛ:ꉒꈌꈬꇬꉂꏣ(ꇖ)http://yi.yizuren.com/plus/view.php?aid=121
ꉬ
ꀊꄸꀈꏦꇹꄣꄉꀞꇽꄷꈨꇬꆏ，ꂚꄏꉌꂵꆹꃆꄔꐞꃅꐞ。
ꃴꄿꏁꍅꄈꎀꍹꇬꃹꈭꐨꆏ，ꀊꄸꀈꏦꆹꆿꃀꁡꇤꄈꎀꍹꇬꃹꌠꊿꑍꂷꂶꌠꉬ。ꋌꇭꀧꀉꒉꇈꑊꄧꀊꃏ，ꑓꂷꋑꌠꀯꆫꍅꅍꒉꇸꇉꑍꂷꌡ，ꑓꊏꑓꂡꆹꎵꑳꀕꇈꇂꈪꈭ，ꅲꐧꎵꑳꀕꅍꏨꆉꂱꀯꌡ。ꐛꐪꑠꃅꎔꌠꑮꆜꋋꂷꆹꋍꐛꊈꆼꇨꌊꃆꄔꐞꃅꐞ。ꂚꄏꑍꃢꀕꌠꆿ ꃀꁡꇤꇬꍆꌠꆹ，ꊿꈧꌠꉬꇮꏸꏦꒌꈯꆟꐷꄮꇬꉬ。ꈁꁏꊿꁥꌠꆹꃅꉒꌟꃅꂁꀊꄶꁧꊂꆈꀀꎍ，ꆿꃀꁡꇤꆲꐊꅇꈨꇬ，ꐚꌊꁈꀋꉻꇈꐂꌺꆹꊨꏦꀑꇬꈔꑌꁏꐚꈧꌠꄝꇫꎭꀋꀬꌠꉬ，ꀋꄹꄷꀊꄸꀈꏦꄰꂛꊨꅫꃀꑌꋋꇅꇬꃅꁈꌩꏪꇬꃹꀋꁧꑲꆏ，ꇿꇬꄉꋑꆏꌌꇿꇬꄉꑆꐒꉐꆂꍓꌠꉬ，ꃶꐚꃅꉌꂵꊼꇅꇰꀂꀋꆓꌠꉬ。ꀊꄸꈯꉐꆹꃹꅼꃅꈁꁏꊿꈧꌠꅿꀋꌦꑗꉘꋌꅉꐚꐛꅹ，ꋌꇷꂱꇬꅍꄉꋺ。ꋍꁮꆪꂾꃅꒉꆈꏸꀕꇇꎇꇇꀋꂿꑠꋍꉔ，ꂁꍃꂁꄉꃅꋌꁈꌊꇆꆉꈬꇬꃹꋺ。ꌕꑍꐛꈭꐨꆏ，ꋌꀱꉈꑴꇀꌦ，ꌕꑍꂴꆽꂾꋋꆹꈁꁏꊿꇱꇑꌊꁧꌠꉬꃅꈰꏅ。ꋌꊿꇱꇑꌊꁧꀊꋨꄹꉖ，ꌤꃅꄐꇬꈜꏁꊿꂷꀂꇱꌉꇫꎭꇈꅳꍩꋫꌠꀂꀵꌊꁈꈁꁏꊿꁥꌠꐊꁧꄷ。ꊁꑳꆀꅉꐚꇬꆏ，ꀋꉻꇈꐂꌺꂶꌠꆹꋍꁏꃀꃨꎔꀮꌟꃅꎔꂶꌠꄻꋌꁳꑮꃀꃅꌠꉬꄷꅊꇈ，ꑮꑟꇎꏦꆏ，ꊾꀑꂷꌋꆀꅳꍩꋬ。
ꀊꄸꀈꏦꆹꉌꎭꌊꐂꋤꀕꃅꐬꉱꀋꅑꂷꇬꃹꁧꄉꏽꃅꎍ，ꉈꑴꉜꇬꆏꊨꏦꀑꑊꌌꊾꂿꀋꉆꀐ。ꑠꅹꋌꎼꃴꄿꏁꍅꐏꑌꄉꋍꉔꑓꁴꅐꅷꃅꄜꋺ，ꃅꄜꃬꀮꇴꇁꂯꄮꇬꑲꆀ，ꂚꄏꆹꌤꃅꃏꄐꁥꌠꏃꌊꀱꆿꃀꁡꇤꑟꇁ，ꈨꉆꈨꀋꉆꃅꊾꂷꉈꏭꀃꈈꇬꄉꇴꇫꈌꐚꇁ。
“ꀉꑿꀕ，ꆏꀋꑍꊂꋋꑍꀕꌕꑍꇿꇬꁧꇆ？”ꃴꄿꏁꍅꏮꀊꄸꀈꏦꇇꌦꅑꑴꌦꌠꑍꁆꌠꌋꆀꇱꄓꇬꏤꏅꑍꄀꈍꑋꈬꀵꐺꌠꉜꄉꑠꄷ。ꋋꇅꇬꆏ，ꀊꄸꀈꏦꆹꐧꊭꊼꇅꈎꇈ，ꏤꏅꑍꄀꈍꑋꈬꌠꋋꇵꀃꈈꈐꏭꊐꇬꆏ，“ꀉꑷ”ꃅꑠꇬꇫꈌꐚꇈ，ꏤꏅꑍꄀꈍꑋꈬꌠꀜꂱꑱꅉꏭꅞ，ꄚꈐꏭꄉꊿꌦꆈꇰꀮꍝꑠꂷꄚꅐꇁ。
“ꀊꑴ，ꃅꉒꆹꈱꃅꃴꀉꄂꊏꄎ，ꉐꆈꀉꐚꈱꌩꏪꇆꆉꀉꄂꊏꄎ，ꊿꈔꃺꒉꊌꅽꑠꂷꈱꅫꃀꀈꏦꑌꊏꇁꀐꄜꅀ！”ꎐꂷꋋꑝꐯꇯꄉꉉꇬ。
ꋋꆹꀋꂄꄷꅠꌠꏭꌂꇬꁮꐚꌡꌠꌋꅪꑠꂷ。ꉜꐝꉅꀐꄷꆏ，ꌤꆿꃅꇬꆹꃤꃀꄌꌊꌩꁐꋲꃅꋲ，ꊂꏭꈍꃅꐙꌠꆹꋍꇅꂯꀋꉪꀋꏢꑠꂷ。ꂚꄏꉪꅷꋋꈨꄀꇬꆏ，ꏸꑮꑍꁆꌠꊼꇅꈎꇈ，ꐳꐨꋍꉎꀋꐥꃅꏹꌧꂓꏪꇬꃹꁧꀐ。ꌩꇇꆈꄕꆈꄗꅍꈧꌠꇁꋍꑓꑟꇬꉱꎍꄉ，ꑍꍹꈋꑳꆏꑡꑌꊌꀋꂿꇫꎭ。ꃆꀞꀊꐎꂶꌠꂚꄏꇱꄝꀅꌳꀅꌳꃅꎭꒉꀐ，ꅫꏻꀕꇈꋃꅿꌠꃅꌗꆹꋍꄲꇈꋍꄲꃅꆲꐊꁏꋍꅳꁖꇬꃹꇁ，ꀋꄹꄷꌤꆿꇨꊸꑠꆹꀋꐥꑲꆏ，ꋋꆹꈍꃅꊼꇅꑬꆏꏾꀒ。ꀋꉊꂴꆽꆹ，ꂚꄏꆹꈍꃅꌩꏪꋋꂷꇬꉁꅉꇆ。ꋋꆹꆏꈉꈍꑋꂷꈐꇬꌧꂓꋦꌠꀉꄂꀋꉬꃅ，ꎼꉐꌋꆀꃪꍶꑠꐥꌒꁍꈚꑌꉬ，ꉈꑴꋍꉐꑵꐥꀋꋌꌠꂥꅾꅉꋦꅉꑠꈚꑌꉬ，ꄷꀋꁧꄚꇬꆹꃹꅼꃅꋍꅿꐥꌒꄻꌒꐨꌋꆀꎭꐨꅧꑋꃅꂁꄚꇬꀀꎍꌐ，ꋋꆏꋍꃢꀉꄂꀋꉬꃅꈍꑋꃢꃅꋍꅿꐥꌒꄻꌒꊂꈹꌠꏭꈐꊟꊋꊡꋺꀋꐚ。ꋍꂴꆽꁬꈬꏪꊼꇅꁡꉖꅉꑠꈚꇬꆏꎺꒉꀡꄍꄹꂿꇫꈌꐚꇁ，ꄧꀕꃅꃪꍶꑍꂷꑌꀂꏾꈎꌊꀊꄶꄉꀇꐒꅝꐺꇯ，ꑐꈧꌠꏁꂿꅍꒉꇬꄉꁮꅷꐺ，ꀋꇊꇬꃅꃴꇬꄉꊰꇁꌠꄂꅪꑍꌅꌡ。ꃆꀞꀥꃚꈨꇬꆏ，ꃪꍶꑍꂷꌠꆹꏸꏦꏭꃅꀂꏾꐕꌊꐺ，ꑓꋪꇬꑓꂷꃴꍗꀕꑍꋒꌠꆹꋍꇅꑌꉈꀋꈻꃅꏮꋌꉚꎌ。ꀊꑴ，ꑓꋪꋋꈨꆹꈍꃅꌡ……ꐛꐪꋋꈨꀋꇊꇬꈍꄮꂾꇰꆐꐯꌥꐮꂿꋺꀑꌠꌡ。ꄚꋋꆹꍝꇙꀕꃅꐎꊰꈎꈢꋒꁦꀑ！ꋌꎺꄉꇬꀊꋨꄮꇬꋌꌋꆀꌤꃅꄐꆹꇆꆉꈬꇬꄉꈜꑽꇈ，ꃅꌐꅉꃀꑠꈚꌋꄉꐯꏑꈭꐨꆏ，ꈀꄸꑌꁸꂱꑱꅉꈴꄉꈝꃀꅏꈌꎹꁧꌐ。ꄽꂫꆏ，ꋋꆹꎺꒉꐝꍚꀕꑠꈚꂱꋯꄉꀊꄸꀈꏦꌋꆀꋍꂛꊨꑌꇁꋋꊝ。ꌅꈌꐥꌠꄺꀱꇝꂱꌤꃅꄐꇁꀐꄷꇬꆏ，ꊰꈬꈎꃅꄉꌠꀊꄸꀈꏦꆹ，ꃅꀋꄜꌦꇯꆐꀋꉻꇈꐂꌺꇱꃷꈜꎴꃅꄷꎭꌠꂛꊨꍇꌠꈻꌊ，ꃅꈊꃅꄜꀋꐥꃅꁈꌧꂓꏪꋌꈚꇬꃹꇁ。ꈬꑍꈫꄅꀕꃅꉪꇁꇬꀋꑟꌠꆏ，ꌦꏣꈝꃀꇬꄉꁈꇁꌠꂛꊨꅫꃀꑋꆹ，ꌤꃅꄐꎁꃅꈜꏁꈭꐨꆏ，ꈝꃀꐮꀋꌡꑍꏢꇬꈴꁧꀐꅊꇈ。ꀊꋨꄹꉇꃅꄜꄮꇬꆏ，ꋋꆹꏤꏅꑍꄀꈍꑋꈬꌌꌦꂯꄉꌠꀊꄸꈯꉐꋌꄸꀳꁡꇤꇬꑟꇁ，ꂽꑼꁳꁮꐚꃆꂮꅉꐚꈭꐨꆏ，ꄿꏀꌺꋋꂷꆹꌗꊰꀐ。ꁮꐚꃆꂮꋋꇅꃅꌌꄜꇲꐛꅹꇊꄉꌉꌠꊋꐛꌠꄈꀧꄉꀐ。ꄚꆿꃀꁡꇤꄉꂽꈻꇁꂿꄷꄮꇬꆏ，ꂚꄏꅿꉌꂵꂶꌠꆹꈴꀋꄿꐆꃅꑘꀋꒃꇬꎷ。ꋋꈭꐨꆏ，ꑮꆜꐚꁦꐧꋦꇬꄉꀉꄉꀉꂿꀋꐥꆘꅝꋋꂷꆹ，ꂿꃅꋋꇂꃴ、ꊖꆈꋋꄹꄧꃅꋋꀉꄂꇫꐥꇈꀐ。ꂚꄏꆹꋰꀋꄐꃅꀊꄸꀈꏦꋋꁬꊼꇅꁵ：“ꀈꏦ，ꅽꂛꊨꏃꉈꑴꇁꑲꆏꍑꀑꌠ，ꆏꑞꃅꋍꃅꉌꇨꇁꌠꉬ！”
“ꉢꉌꇨꀕ？”ꀊꄸꀈꏦꋌꇰꏭꃅꏮꂚꄏꇬꉜꎍ，“ꅇꂷꋋꇬꆹ，ꆏꄡꉉꃅꄉ，ꆏꇬꉉꀋꋭꌠ！”
ꀈꏦꇨꇅꃃꐆꃅꂚꄏꋌꎎꋍꇅꁵꇈ，ꋌꐂꇫꏃꎭꇁꌠꊿꁥꌠꉈꈴꁧꇈ，ꋌꇁꌊꆿꃀꁡꇤꑟꇀꌦ。ꀊꄶꌉꈿꅈꇬꄉꈁꁠꃅꃑꋌꁳꌠꏃꊪꋫꌠꇤꋍꆼꁠꇬꏦꄉꇬꃀꅉꆐ，ꀊꄸꀈꏦꋌꍑꑭꁘꐕꈛꎼꆹꀋꄐꄉꏽꃅꎍ。
ꀊꄸꀈꏦꆹꑞꐛꅹꃅꇨꇅꃃꌠꆹ，ꋧꃅꋋꂷꃅꂚꄏꀉꄂꇬꅉꐚꌠ。
“ꉢꌞꎝꁯꀐ！ꀊꑴ，ꉢꌞꎝꁯꀐ！”
ꀊꉗꏢꅑꅷꇁꌠꆏ，“ꎝꀕ”ꋋꈨꆹꂚꄏꉌꃀꇬꄉꆄꇓꂷꐛꇫꎍꀐ。ꋋꈭꐨꆏꃅꑍꀉꑌꃢꌋꆀꃄꅉꀉꑌꈚꇬ，ꂚꄏꆹꃶꐚꃅꀊꄸꀈꏦꇬꊼꇅꂿꆹꄡꑟꌠꉬ，ꄚꀈꏦꉇꀕꃅꂁꁈꐺꇬꎷ。ꀃꑍꆏ，ꋋꆹꌤꃅꅍꀋꐥꀐ，ꌅꈌꑌꀋꌭꀐ，ꊨꏦꈁꌒꀕꌠꑌꀋꊌꆘꅝꄮꇬꆏ，ꂚꄏꆹꀊꄸꀈꏦꌋꆀꐮꀋꂿꀋꉆꀐ，ꊨꀖꃀꇹꌠꂱꀘꆃꍈꋋꂷꌋꆀꐮꂿꑲꆀꍑꀐ。ꂚꄏꇨꊸꇁꀐ！ꊿꋋꊯꉬꑻꅿꀑꇬꊫꂫꈍꃅꎍꀐꂯ？ꋌꀋꎪꃅꉆꐥꃅꀥꀊꄶꀞꇽꅉꀊꋨꈚꇬꁧꑲꆀꍑꀐ。ꇆꆉꌙꈈꀕꅈꇬꋋꇅꃅꂾꃚꑵꇫꈌꐚꇁ。ꋌꀂꏾꐕꌊꉜꇬꆏ，ꀇꐒꅝꅷꐺꌠꃪꍶꀊꋨꑍꂷꆹꐂꄩꃪꐬꇬꃹꆹꄉ，ꂁꀊꄶꅙꁧꏪꇂꃴꀀꎍꌠꇈꉌꈧꌠꋌꇷꅷꐂꐺ，ꇈꉌꈧꌠꆏꉈꑴꎼꉐꈧꌠꋌꇷꅷꐚꐺꌠꉬꅊꇈꄉ，ꌩꏪꋋꂷꃅꋋꇅꃅꎓꁨꄹꇬꊎꄈꌦ，ꀋꇊꇬꉽꐯꇬꄉꈾꌠꀇꐒꈨꌡ，ꉈꑴꆏꌼꇑꀡꇁꃅꂢꅍꑵꅍꈨꌌꂢꈷꐺꌠꑌꌡ，ꇿꇬꑌꎓꁨꄹꇬꊎꄈ，ꄚꄉꇆꆉꈬꇬꇙꋏꄹꂾꃚꇫꈌꐚꇬꆏ，ꋌꇫꉌꐒꌠꀊꄸꀈꏦꐛꊈꇫꄉꀜꅷꐺꌠꌡꃅꄛꅐꇬꎷ。ꋌꀊꅰꉪꀊꅰꉪꅍꀉꑌꇁꀐ！ꂚꄏꂶꌠ“ꇑ”ꌊꁧꌠꎁꃅ，ꋍꇬꌂꑭꑌꌠꀈꏦꆹ，ꋍꊨꏦꀃꅉꑭꄑꄉꀞꇽꌠꌤꃆꈭꎁꐘꀋꉬꀐ，ꃶꐚꃅꇬꆹꐛꐈꑠꃢꉬ。ꋌ――ꀊꄸꀈꏦꆹꈍꃅꑌꊿꋋꉪꋋꂿꀋꏾꌠꋌꃅꎼꇁ……
ꂚꄏꉈꑴꋍꃢꃅꈌꏮꇈꏮꈭꇍꊼꇅꉜ，ꉌꂵꇬꆹꈍꄮꑲꆀꀊꄸꀈꏦꌊꄉꌠꀞꇼꅉꈚꌠꎹꊌꀋꐚꀐꉂꃅꇨꊸꇫꎍ。ꋌꉪꅷꀋꑟꅉꀋꐥ，ꉌꂵꇬꇙꋏꄹꑠꇅꐂꌠꌡꇬꆏ，ꋍꂴꆽꈍꄮꑌꎺꇊꐝꄧꀕꇬꎷꌠꌧꂓꁦꌠꇁꋍꑓꋪꇬꐛꇁꀐ。ꉬꀐ，ꈍꃅꑌꀊꄶꇬꉬꀐꌠꉬ！
ꃆꀞꀊꐎꂶꌠꏮꃅꃴꇬꉜꄉꋍꇬꀆꇈ，ꀋꇊꇬꋍꉌꂵꉪꐪꈧꌠꋌꅉꐚꌠꌡ。ꑭꇇꇖꁄꌠꎇꌊꀒꀥꑟ，ꈂꀸꇬꆹꃅꉒꌡꌠꊸꌗꈧꌠꀞꎼꇁꇱꀋꏦꃅꎍ，ꊰꀏꃄꅉꇬꎍꌠꌨꏾꌩꇇꀉꏂꀉꃴꈧꌠꋌꄔꀱꏟꄹꐲꏢꁻꎼꒉꌠꌟꃅꇬꐱꁧꀐ。
ꌩꏪꅿꒈꀑꁆꏯꉜꄉꆹꇬꆏ，ꀅꌳꀅꌳꃅꆿꃀꁡꇤꑟꆹꀐ，ꀋꉊꊋꇨꃅꑞꅉꀋꐥꃅꌩꋐꌩꇽꄉꎷꏸꐛꅹ，ꌩꈧꌠꆹꀊꅰꀊꅰꃅꀁꑌꇁꌐꀐ。ꇬꋍꇋꌠꀋꐥꐛꅹꃅ，ꃆꀞꂶꌠꑌꀥꐳꐮꀥꐳ，ꋌꇅꃅꀥꌊꇉꅼꉼꏒꀕꅈꏢꁮꑠꈚꇬꑟꇬꆏ，ꂚꄏꑓꋪꂴꆽꐛꇁꌠꆹꐛꐪꇤꋱꑠꑵꉬꀐ，ꂚꄏꋋꇷꈌꉚꀕꇫꎍꀐ。
ꍵꂫꃹꀐ，ꀋꃉꌌꑲꆀꄚꋍꈓꇂꃴꄽꂫꃢꌠꍴꎭꋍꌐ。ꁦꋠꌕꑻꇇꎇꄉꇬꐮꀋꂥꌠꌧꂓꑠꁧꇂꃴꆏ，ꑿꈧꌠꆹꉂꑟꅑꃅꐻꒃꈤꀋꌐꑴꌦꌠꍵꊂꁬꏾꆰꏾꈧꌠꋠꅷꐺꑴꌦ。ꊿꉆꂷꂥꌠꌧꂓꉒꏡꌠꆹꁱꄜꃰꇌꈭꑠꂷꌡ，ꄩꆏꌋꅪꇧꀱꋦꊽꐬꆠꑠꂷꇬꉆꎍ，ꀍꄟꊪꅪꂷꅑ，ꏤꏅꀉꆈꈬꈚ，ꆞꀈꎽꑠꈬꈚ，ꆼꁠꇬꆏꏃꊪꅳꍩꀄꊭꋫꌠꄻꇬꏦꄉ。ꂚꄏꃆꀞꀊꐎꂶꌠꋩꇁꌠꋌꊌꂿꄮꇬꆏ，ꋋꇅꄷꃆꀞꂶꌠꋌꇱꌗꋏꊼꇅꁵꇈ，ꃆꀞꂶꌠꑌꅇꃅꅲꐮꅲꃅꀂꏾꀁꋌꊼꇅꈎꇈ，ꀅꌳꀅꌳꃅꇁꌊꋍꂴꆽꉆꎍꀐ。
“ꈝꃀꈛꑌꌠꀋꈴꃅ，ꆏꀥꄚꇬꑞꂷꎹꇁꄜ？”ꀊꄸꀈꏦꇨꇅꃃꄉꇫꅲ。
“ꉢꆿꃀꁡꇤꐞꀋꉆ。”ꂚꄏꆹꇨꀋꊸꇗꄃꀱꃅꇫꅇꀱ。
“ꑞꐛꅹ？”
“ꑞꐛꅹ？ꆏꉜꉏ，ꆎꆹꈍꃅꋀꊇꇬꈩꌠꉬꉏ！”
“ꆏꆿꃀꁡꇤꂱꀘꈧꌠꊼꇅꅲꉏ，ꈀꄸꂷꑠꃅꀕꇬꉌꀋꃹꌠꉬ？”
ꂱꀘꆃꍈꅇꉉꌐꄷꆏ，ꄸꉺꈭꇍꂱꀘꈧꌠꉬꇮꃅꅅꃅꅳꍩꌉꐳꈧꌠꑠꀉꂥꃅꐕꄉ，ꐯꇯꋓꃅꄉꉉꇬ：“ꉌꃹ，ꉌꃹꐮꉌꃹ，ꈍꄮꇯꆐꌌꑠꃅ‘ꉙꂘ’ꄡꑟꀐ！”
ꊿꇱꇊꇢꊭꇬꊐꄉꌠꐏꏃꊿꀊꋨꊯꉬꑻꆹ，ꑑꃹꏾꁵꀕꃅꎍ，ꄇꇖꀕꌠꆏ，ꋀꊇꆹꊿꌌꋍꃢꎭꃚꍈꀐꌠꉬ。ꀋꃋꆹꏸꏦꌠꉇꄉꈭꐨ，ꋀꊇꉈꑴꉈꏠꌦꄉꏽꀐ。ꋍꂷꋑꀋꋒꂱꑱꇇꁆꌠꌌꊨꏦꀂꏾꇬꉨꌎꅷꐺꌐ，ꈀꄸꑌꏮꂱꑱꑾꎭꋍꀕꃅꌌꑐꂱꑱꀁꏾꇬꄀꄉꇈꌠꌀꄝꀭꌠꉜꎍꌐ。ꂚꄏꇁꇫꑟꌠꆹ，ꋀꊇꀊꅰꃅꋌꇷꈋꉛꀕꌐ，ꊁꂚꄏꂶꌠꌋꅪꂱꀘꆃꍈꂶꌠꅿꃅꐨꈧꌠꂿꇬꆏ，ꀂꏾꎎꌊꑓꑟꉇꀋꈻꃅꉘꇉꅍꐥꏭꃅꏮꂚꄏꇬꉜꎍꌐꌦ。
“ꉏꑴ，ꆍꊇꅼꉜꍯꉜꃅꆍꀉꁌꀋꁧꂶꌠꉜꅀ？ꆍꀉꄉꅰꌋꂶꌠꉜꅀꑞꃅꄜ？”
ꀊꄸꀈꏦꋍꇬꏅꇬꆏ，ꋀꊇꆹꇤꐳꃅꀂꏾꋀꇱꈎꄈꌦ，ꏟꈯꀕꀂꏾꂶꌠꈎꀏꉦꃀꇬꇱꄉꇬꎷ。
ꂚꄏꋋꇅꃅꃆꀞꇱꄓꇬꄉꐂꀏꇁꀐ。ꋌꀊꄸꀈꏦꏭꉉꇬ：
“ꆎꆹꇭꍣꄈꑼꂷ，ꈁꏾꃅꇫꃅꀋꉆ！”
“ꉢꇿꇬꈁꏾꃅꀕꀒ？”
“ꆎꑞꃅꌞꀂꏾꑐꑠꃅꄉꌠꉬ？”
ꋌꉮꀕꃅꒊꒉꇈꋋꇅꃅꋌꆏꇫꎭꌦ。ꈁꑓꋋꂷꃅꐍꏦꀕꇈꅇꉉꅐꇁꀋꄐꃅꇗꄃꂷꑌꃅꎍ。
“ꀂꏾꑠꃅꑐꄉꌠꆹꋀꊇꇱꁧꀿꎼꇁꌠꉬ，ꃟꈌꌦꄉꏽ，ꉢꇫꉌꀋꃹꌠ。ꉡꆹꇫꊼꇅꅇꈪꀉꄂꊐꌠꉬ，ꂴꀍꑐꈍꑋꏢꊏꇬꄀꄉ，ꀋꄹꄸꆏꋀꊇꏭꅇꈪꊐꌠꆹꅲꀋꏾꑲꆏ，ꊂꃢꌠꉢꒃꅜꄮꇬꆏ，ꋀꊇꀂꏾꂶꌠꈁꀐꌠꉬ！”
ꂚꄏꆹꋍꁁꏯꆏꋓꉪꁨꄉꀊꄸꀈꏦꃅꐨꉉꋊꌠꅲꅷꐺ，ꋍꁁꏯꆏꑓꋪꌌꊿꐏꏃꇁꀊꋨꈨꃷꅷꐺ。ꈍꃅꋍꂷꍣꋍꂷꀋꇎꌠꉬ？ꋌꀱꉈꑴꋍꃢꃷꌦ，ꄡꇗꊯꇖꑻꀉꄂꐛ。ꋋꇬꊼꇅꅱꏢꉪꇬꆏ，ꋋꇅꃅꊿꇳꃚꋋꈨꇁ，ꉜꅊꇈꂾꆏ，ꄮꁧꀈꃀꃅꊭꇱꋲꈬꐙꌐꑠꁧꇬꆏ，ꑍꈬꑍꇁꈍꎴꀕꑠꏢꌌꊾꂷꏟꈯꀕꃅꋀꇱꐒꀊꄶꇬꁍꄉꌠꉬꅊꇈ。
“ꋋꆹꈍꃅꀕꌠꉬ？”ꂚꄏꀊꅰꃅꋋꇰꀐ。
“ꀋꉻꇈꐂꌺꅿꌺ，ꊾꂷꀋꉬꃅꊾꋠꆿꃀꂷꉬꅊꇈ，ꉢꂴꆽꊿꋋꂷꌉꇫꎭꂯ！”
“ꀈꏦ，ꆏꈍꃅꑠꃅꀕꌠꉬ？”ꌤꃆꊋꋠꌠꂚꄏꌌꉪꇁꀐ。
“ꉢꑞꃅꑠꃅꀕꀋꉆꇆ？ꁏꐚꉹꁌꈍꑋꋌꉮꌦꇬꎬꀋꐚꀐ，ꆎꆿꃀꁡꇤꄉꌤꃅꋺ，ꋋꈨꆹꆏꋌꀋꐚꄷꌠꅀ？”
“ꌞꊿꀋꃋꆹꇩꏤꇥꀯ，ꆏꈁꏾꃅꇫꃅꀋꉆ！”
“ꉪꇩꏤ，ꇥꀯꑠꃅꐙꌠꀋꐥ！”ꋌꎐꂷꊼꇅꑝꇈꉉꇬ：“ꊾꋠꆿꃀꌺꆹꈍꄮꑌꊾꋠꇬꎷꌠ！ꋌꀋꃋꅔꅐꇁꀐ！ꈂꀸꅽꇭꀧꋌꌃꀋꆅꄷꌠꅀ？ꆏꇤꇬꏆꉆꑌ，ꉢꄝꇬꏆꀋꉆ！”ꋌꇨꇅꃃꏭꃅꏮꃚꋒꀉꂥꃅꀁꈭꋏꇁꃅꏅꌠꀋꉻꃢꌺꇬꉜꄉ，ꂱꀘꈨꌠꏭꅇꁵ：“ꉆꐥꃅꃆꄔꏦꄉ，ꐗꌦꇫꎭ！”
ꆿꃀꁡꇤꆹꈬꊯꈬꉘꈭꎴꈜꎴꃅꄷꑠꈚꉬꐛꅹ，ꂱꀘꌤꃅꐘꌠꆹꒃꉇꌊꀉꇨꐮꀉꇨ，ꉎꏯꅇꁵꎼꇁꄉꊵꑵꍈꃅꎻꇬ，ꐥꍂꃅꋍꑍꊁꊰꀋꋺꑠꈚꉬ。ꀋꃋꀊꄸꀈꏦꆃꍈꅇꁵꎼꇁꇬꆏ，ꂱꀘꁥꌠꄿꏀꄈꀉꑌꁥꉬꐛꅹ，ꋋꇅꃅꀋꉻꃢꌺꏢꁮꇬꄉꌩꈅꊾꂷꂥꀋꋌꑠꉻꋀꄻꇬꅞꄉꀐ。
“ꉢꑞꏦꃤꈨꐆꀐ？”ꂱꀘꆃꍈꂶꌠꑌꃃꄉꉉꇬ，ꀂꏾꊼꇅꉈꈭꐨꆏ，ꃀꆏꀉꏂꑍꂷꌠꆲꐊꀜꅷꐺ。“ꋀꊇꆹꇭꍣꄈꏭꈁꁏꌠ；ꋀꊇꆹꑤꊇꎼꏹꏭꈁꁏꌠ；ꋀꊇꄉꇯꏦꃤꇬꀛꐆꐺꌠꉬ！ꉡꆹꏦꃤꌬꌠ，ꉡꆹꑊꋌꌺꋌꁥꌌꑗꉘꍈꌠ！ꉆꐥꃅꄉꃆꄔꄀ，ꉠꎁꃅꐗ，ꐗꌦꇫꎭ！”
“ꂱꀘꊈ，ꃺꑌꊈ，ꄩꅐꀐꌠꁏꐚꊈ！ꑠꃅꇬꀋꍑ，ꀋꍑ！”
“ꑞꐛꅹꀋꍑ？ꋍꀉꄉꆹꉠꀉꄉꋌꐗꌦꇫꎭ，ꉠꀉꁌ、ꀉꂿꋌꉮꌦ，ꀃꑍꆏꇭꍣꄈꇬꉮꇀꌦꀐ，ꋀꊇꆏꃅꉆ，ꉪꆏꃅꀋꉆꄷꌠꅀ？ꅽꋋꑠꆹꑡꑵꌠꑖꉬꀕ？”
ꀋꎺꃅꂚꄏꐂꀊꄸꀈꏦꏢꁮꇬꉆꇈ，ꑓꂷꍻꌊꁖꇁꄉꏽꃅꋌꍻꀊꄸꀈꏦꇬꀵꎍ。ꀊꄸꀈꏦꆹꌗꃀꌗꌺꐮꑘꀋꒃꃅꉌꂵ“ꄏ”ꄹꐂꌠꂚꄏꊌꈨꇁ。
“ꀊꄸꀈꏦꐋꀨꀋ，ꆏꑠꃅꇬꀋꍑ！”ꂚꄏꅇꂷꋍꇬꁱꂷꋍꂷꃅꉉꅷꐺ，ꄷꀋꁧꆽꋊꆼꈘꃅꉉꇬ：“ꉡꆹꑤꊈꀨꇬꎼꏹꉬ，ꄈꎀꍹꉠꌅꈌꇔꇫꀋꎭꑴꌦ，ꉢꆍꊇꇬꏢꇋꌅꈌꐥꑴꌦ！ꆍꑴꌠꉠꅇꃅꅊꇈ，ꆍꊇꃅꐪꑽꑌꆹꀋꎪꃅꏦꃤꇬꀛꐆꌠꉬ，ꄈꅿꍔꊱꌋꆀꐮꀋꊒꌠꉬꀐ！”
ꂚꄏꅿꊋꃆꎍꒉꆹꇯꍝꃅꀋꊰꑴꌦꅊꇈ。ꀊꅰꃅꈬꊯꈬꉘꊁꊰꌠꃅꄷꑠꇬꆀꃅꃰꊿꄈ，ꀊꅰꃅꎺꇊꐝꄧꀕꃅꂚꄏꆹꑤꑭꊂꈜꏁꊿꉬꌠꎺꌐꑴꌦꅊꇈ。ꀊꄶꌩꈅꏢꁮꇬꄉꃆꄔꃅꈷꀕꅷꐺꌠꇇꄝꊰꒉꀐ，ꍶꃩꇭꀕꑠꌌꃆꄔꄀꂯꌠꇇꊰꒉꀐ……ꂱꀘꊈꑭꁘꆏꄉꌐꇈ，ꑓꋪꑍꁆꌠꍻꁧꄉꏽꃅꏮꂚꄏꌋꆀꀊꄸꀈꏦꑋꇬꉜꎍꌐ，ꄽꂫꆏꑓꂭꑌꀁꋌꊰꒉꌐꀐ。
ꄚꇬꆹꄵꇓꁧꀑꂓ。ꀃꑍꆸꈐꆈꌠꌌꁮꅉꃅꌧꅷꇁꇬ，ꀃꌋꏂꀊꆨ，ꍜꇰꀉꇐꀋꄿꌦꂾꆹ，ꉘꁮꃘꂷꅐ，ꆧꁨꏃꂷꅐ，ꃅꈊꃅꄜꀋꐥꃅꈧꌺꊸꐨꃆꄔꐞꃅꐞ，ꎿꒉꆗꒉꋌꆗꌤ，ꇓꂵꋌꆗꋌꃪꐷ，ꎇꃀꍅꑓꉬꇮꃅꋌꃪꌦꌐ，ꈬꌩꈬꇓ、ꈬꉙꈬꃪꑞꑌꃅꊸꆗꌦꌐꂯꄉ，ꉜꅉꉜꅉꆏꏃꊰꃆꄔꐞꅷꀉꁌꐧꃅꍂꇬꑟꀐ。
ꊁꆏꐧꋦꈲꏣꃅꌠꆈꌠꌦꌺꌊꌺꂓꅑꋧꃅꀋꈨꅉꀋꐥꌠꍜꇰꀉꇐꉬꄷꌳꉔꌳꈄꀋꃀꑠꂷꄚꄉꑻ。ꍜꇰꀉꇐꑌ，ꌦꇂꌋꌺꉬꐛꅹ，ꒆꇈꂾꄹꉖ，ꀉꂿꆃꆂꅝꂸꅲ；ꒆꇈꂿꑍꉔ，ꀉꂿꂣꀀꂸꅲ；ꒆꇈꂿꌕꉖ，ꀉꂿꃢꈚꂸꅲ；ꌺꎼꌺꃏꉬꄷ，ꃃꇁꎺꀋꇬꃅꋍꀉꂿꇱꇵꇁꃪꃶꊐ。
ꂸꌦꂸꌋꀕ，ꉜꅊꇈꂿꆏ，ꃪꊂꆹꇐꋦꅉ，ꇐ꒿ꍜꇰꀉꇐꌧꅊꇈ。ꀁꑌꇐꉬꄷꋍꂓꋌꄜꃪꊂꇐꇰꇈ，ꍜꇰꀉꇐꆹꄚꂮꑌꇐꋚꋠ，ꌤꑌꇐꆃꆂꅝ，ꈻꑌꇐꃢꈜꈚ。ꍜꇰꀉꇐꆹꒅꑌꇐꑍꒆꌠ，ꈎꑌꇐꈎꌠ，ꑞꑌꇐꄸꉻꑟ，ꂒꑌꀉꇐꂓꌠ。ꍜꇰꀉꇐꒆꇊꂾ꒔ꈓ，ꃢꆫꌠꊂꁠ，ꂷꁐꉹꃅꌊ，ꏝꅍꉈꃅꌊ；ꒆꇊꂾꑍꈓ，ꁮꆫꌠꊂꁠ，ꂷꉹꉬꉧꊂꌊ；ꒆꇈꂾꌕꈎ，ꉈꃅꌠꊂꁠ，ꌩꉹꄵꊂꌊ，ꌉꈿꄂꀕꑌ；ꒆꊂꇖꈎꉬꈎꇈꉈꆏ，ꁻꈿꄂꀕꉆ，ꁍꎹꆹꃅꃴ，ꑗꎷꆹꃅꈌ，ꍜꇰꀉꇐꑌ，ꌦꉹꌋꉹꇖꋬꄵ，ꌦꉈꌋꉈꇖꏢꈻ，ꌦꑣꌊꑣꇖꋇꏃ，ꌦꈌꌋꈌꇖꋇꌌ，ꌦꃅꌊꃅꇖꂷꋩ，ꁍꎖꆹꂿꄷ，ꑖꎖꆹꂿꄷ，ꁰꅐꁮꐚꏍꄉꁻ，ꁻꇊꏨꄵꃅꈯꌸ，ꒈꀑꒈꃅꏍꄉꁻ，ꁻꇊꏨꄵꃅꈯꌸ。
ꍜꇰꀉꇐꄿꈭꐨꆏ，ꍜꇰꀉꇐꑌ，ꈧꁻꆹꂿꄷ，ꆪꁻꆹꂿꄷ。ꌦꉹꌋꉹꄵ，ꌦꉈꌊꉈꈻ。ꂴꆽꅘꁧꀂꏽꉆꄉꁻ，ꈧꁻꈨꀋꌸ，ꆪꁻꆪꀋꌸ，ꍜꇰꀉꇐꇨꇅꃃꄉ:“ꆏꀒꈓꀑꇵꀕ，ꊂꈎꀑꇵꀕꅊꇈ”ꄷ，ꋌꊂꈭꐨꆏꅘꁧꀑꇵꀕꌠꋌꒉꄷ。ꊁꇁ꒔ꑍꆏ，ꍜꇰꀉꇐꇁꃮ꒜ꌧꊈꀂꏽꉆꄉꁻ，ꈧꁻꈨꂸꌸ，ꆪꁻꆪꂸꌸ，ꍜꇰꀉꇐꑌꇨꇅꃃꄉ:“ꃮ꒜ꌧꊈꀒꈓꀂꏾꃄꅉꂪ，ꊂꈎꀂꏾꃄꅉꂪꅊꇈ”ꄷ，ꋌꊂꈭꐨꆏꃮ꒜ꌧꊈꀂꏾꃄꅉꂪꀐ。ꊁꆏꍜꇰꀉꇐꇁꌊꄵꇓꒉꇤꏷꌦꀁꏾꉆꄉꁻ，ꈧꁻꈨꂸꌸ，ꆪꁻꆪꂸꌸ，ꍜꇰꀉꇐꆏꇨꇅꃃꄉ:“ꏷꌦꆏꀒꈓꄾꏪꀕ，ꊂꈎꄾꏪꀕꅊꇈ”ꄷ，ꋌꊂꈭꐨꆏꏷꌦꄾꏪꀕꀐ。ꊁꆏꍜꇰꀉꇐꇁꌊꄵꇓꁧꂪꂷꁧꀁꏾꉆꄉꁻ，ꈧꁻꈨꂸꌸ，ꆪꁻꆪꂸꌸ，ꍜꇰꀉꇐꆏꇨꇅꃃꄉ:“ꂶꀑꌕꊨꈪꅊꇈ”ꄷ，ꋌꊂꈭꐨꆏꂶꀑꌕꊨꈪꀐ。ꊁꆏꍜꇰꀉꇐꇁꌊꄵꇓꁧꐧꄮꁧꀁꏾꉆꄉꁻ，ꈧꁻꈨꂸꌸ，ꆪꁻꆪꂸꌸ，ꍜꇰꀉꇐꑌꇨꇅꃃꄉ:“ꄮꇽꋊꀋꅿꅊꇈ”ꄷ，ꋌꊂꈭꐨꆏꄮꇽꋊꀋꅿꀐ。ꊁꆏꍜꇰꀉꇐꇁꌊꄵꇓꁦꀑꎺꁧꀂꏾꉆꄉꁻ，ꈧꁻꈨꌸꇈ，ꆪꁻꆪꌸꇈ，ꁦꀑꎺꋦꇦꑐꀕꌠꋌꒉꄸ。ꈧꁻꈨꄂꋒ，ꈧꄂꑓꐚꋒ，ꆪꁻꆪꄂꋒ，ꆪꄂꁁꁐꋒ。ꈧꌺꆪꌺꁻꎼꇁꈧꌠꆹ，ꍜꇰꀉꇐꌌꏃꃅꉬꐮꏭꇓꏪ꒰ꃴꍅꇫꎭꌐꀐ。
ꍜꇰꀉꇐꈧꁻꆪꁻꈭꐨꆏ，ꏃꃅꉬꐮꏭ，꒰ꒆꄹꇭꃛ，ꀠꒆꁈꆸꒊ，ꑾꃅꀋꆳꒊ，ꁬꃷꄯꇍꒊ，ꍈꀮꇌꎶꒊ，ꍜꇰꀉꇐꑌ，꒔ꑍ꒰ꅥꆹꂿꄷ，꒰ꅥꇇꏸꃛ，ꅥꇊꄹꃴꍅ；꒔ꑍꀠꅥꆹꂿꄷ，ꀠꅥꇇꁮꒈ，ꅥꇊꄹꄧꍅ；ꑾꃅꅥꅏꄅ，ꅔꐍꈬꊂꍅ；ꁬꃷꅥꐧꈯ，ꊖꃴꏂꊂꍅ；ꍈꀮꅥꐧꈯ，ꁬꈬ꒰ꊂꍅ。
ꍜꇰꀉꇐꈧꁻꆪꁻꈧꄂꆪꄂꋒꀊꋨꇈꉈꅑꅷꇁꇬꆏ，ꋧꃅꀕꈊꃅꄜꊨꄅꃲ，ꏃꃅꇘꀕꄚꄉꉀꑻꃲ，ꐧꇁꃰꊿꄚꄉꉀꑻꀻꎆꅷꇁꌠꉬꄷ。
ꀋꃋꀃꑍꑌꇁꌊꀋꉊꌡꌠꃅꈎꃅꆪꇬꑞꇀꌦꀐ，ꂱꀘꊈꆹꑓꏣꑓꑟꉈꀋꈻꃅꏮꂚꄏꌋꆀꀊꄸꀈꏦꑋꇫꉜꎍ，ꈀꄸꑌꀋꎸꀕꃅꉌꂵꇬꄉꑠꃅꉪꈽꏿꌐ：
“ꆐꑊꈀꄸꄉꍜꇰꀉꇐꉬꆏ？ꉪꊇꆹꈀꄸꅇꃅꈀꄸꃤꅲꌠꉬ？”
ꋍꈓꂾꅐꌠꇝꂱꉻꄑꋌꐘꆹ，ꋀꊇꆹꈍꃅꇫꂿꀋꏾꌠꉬ，ꋋꆹꈍꃅꇣꋲꄷꀋꁧꉌꌦꑓꉘꀙꐮꀙꑠꃢ。ꀋꇊꇬꀄꂼꂻꀋꌒꑠꂷꌟꃅ，ꀋꃋꑌꄡꇗꊽꉌꂵꇬꃹꇁꇬꎷꑴꌦ。ꋀꊇꇬꉌꁈꄏꌠꊾꆹꃅꃴꇬꄉꊰꇁꅉꃴꇬꃹꁧꌐꀐ。ꑤꊇꎼꏹꅞꀐ，ꐎꊈꎼꏹꅞꀐ，ꇪꎹꎼꏹꅞꀐ，ꇭꍣꄈꀇꐒꌟꃅꁧꀐ。ꄂꎂꏿꇈꆸꉈꇨꌠꉪꇐꈝꃀꏡꌠꇬꄉꋀꊇꌧꇁ，ꋋꆹꉬꇮꃅꊿꀋꂄꈧꌠꃅꌠ，ꋀꊇꆹꀋꎪꃅꊿꀋꂄꋋꈨꌌꎭꃚꍈꑲꆀꍑ。ꄚꇅꂚꆹꑞꐛꅹꃅꀥꌊꋀꊇꇬꏢꇋꇀꌦꌠꉬꂯ？ꋀꊇꇅꂚꅇꀋꃅꉆꄜꅀ？ꊿꈧꌠꉬꇮꃱꇌꃯꇌꃅꎍꌐꀐ。ꑓꋪꋑꌠꀉꄂꈜꎴꃅꄷꁦꌺꊂꆈꃹꁧꂯꄮꇬꉘꁮꂶꌠꀋꏮ，ꈊꃀꄂꅪꋍꌅꁿꄉꌠꌟꃅꆈꏂꋧꅍꎍꇈꀇꐒꒉꋩꂡꌡꇫꎍ。
“ꍑꑴ，ꆍꊇꇬꇇꀋꐛꑲꆏꉠꊨꏦꇬꇇꐛꂾ！”ꀊꄸꀈꏦꆹꋍꂱꀘꁥꌠ“ꇰ”ꌊꇙꀋꋏꃅꎍꌠꂿꇬꆏ，ꀋꎺꃅꋍꇱꄓꇬꄉꅳꍩꏃꊪꀄꊭꋫꌠꋌꒃꌊꐂꀏꏯꉜꄉꇁꀐ。ꄚꋋꆹꂚꄏꇱꌭꇰꃅꇯꏢꀕꃅꄉꀐ。
“ꀈꏦ，ꀊꄸꀈꏦ，ꉡꉌꈲꂚꄏꆹꆏꄛꑠꃅꀋꎽꌠꉬ！”
“ꆏ，ꆏ……”
ꀊꄸꀈꏦꀋꎺꃅꇭꀧꋌꏵꀠꎼꇁꇈ，ꑓꂷꁖꇁꄉꏽꃅꏸꃅꏷꌬꀕꃅꍻꂚꄏꇬꀵꎍ。ꑓꂡꇂꃴꑓꋪꋑꌠ，ꐝꍚꀕꇈꆈꋧꋪ，ꑖꈈꀕꇈꆼꇨꀕ。ꂱꀯꋌꑝꇰꏢꀕꃅꐯꇯꄉ，ꈁꑓꂶꌠꏦꒉꋦꌊꈻꄂꀕ。ꂚꄏꎼ“ꉻ”ꄹꌗꏂꇈ，ꀅꌳꀅꌳꃅꋍꇇꋌꄝꇫꎭꀐ。ꋋꇅꇆꋋꇅꇬꆏ，ꀊꄸꀈꏦꆹꀋꎺꃅꋌꐱꃆꀞꀊꐎꂶꌠꄩꑌꇈ，ꄎꌬꀕꇈꅲꇢꈻꃅ“ꄖ”ꄷꃅꈌꋌꄝꆿꃀꁡꇤꉜꄉꇨꆰꇨꊸꃅꁧꀐ。
ꃆꀞꀊꐎꂶꌠꏄꅉꄹꏮꇊꈍꃅꇮꀋꐚꃅꎍꌠꂚꄏꇬꊼꇅꉜꇈꊌꀋꂿꆘꅝꀐ。
ꊁꊛ:ꉒꈌꈬꇬꉂꏣ(ꃘ)http://yi.yizuren.com/plus/view.php?aid=123
