ꂴꊛ:ꉒꈌꈬꇬꉂꏣ(ꉬ)http://yi.yizuren.com/plus/view.php?aid=122
ꃘ
ꂚꄏꆹꉈꑴꋍꃢꄓ“ꊨꏦꃤꉬꌠ”ꎸꅍꌍꑓꁬꌠꇂꃴꉆꎍꌦꀐ。
ꌧꂓꇆꆉꈯꄔꇬꆹ，ꊿꋍꇬꉌꒊꌠꉘꇉꄉ，ꄽꂫꆏꄀꇗꇱꄉꉉꌠꌗꃅꄉꃴꄿꏁꍅꏤꁥꌠꋀꊇꇱꉉꐛꀐ，ꀋꃉꆏꑸꆀꌋꆀꌍꆽꁏꊝꀯꉻꏑꅉꇬꐏꏃꌠꂽꑼꀊꋨꊯꉬꑻꌠꆹꋀꊇꄝꎼꇁꃲ，ꄷꀋꁧꋀꊇꁳꀱꂚꄏꐊꑤꇬꁧꎻꌦꀐ。ꋋꆹꑓꀠꀕꃅꑤꊈꎼꏹꂶꇑꌊꆿꃀꁡꇤꁧꇬꆹ，ꇯꍝꃅꊿꊇꊨꏦꉜꇬꑌꊼꇅꐛꀋꐛꌠꉬ。
ꎸꅍꌍꑓꂴꆽꌧꂓꁦꌠꄩ，ꋍꉔꀉꄂꃅꇦꀨꇁꀠꅇꁊꅍꂷꄻꇬꄀꄉꀐ。ꄆꆚꈧꌠꀋꆏꃅ“ꍻꀕ”ꃅꂿꐛꅹ，ꀋꇊꇬꈜꎴꃅꄷꃅꃴꇬ，ꃅꇴꃅꏡꄉꃅꊭꄲꇫꈴꇁꌠꌡꇫꎍ。ꃅꇴꃅꊭꈧꌠꆹꄽꂫꆏꏓꋍꈚꑟꌐꇈ，ꐩꃪꃅꃪꇬꊎꎓꁨꄹꂿꇁꀐ。
……ꆍꊇꀋꃉꆏꇁꌊꌩꈤꂷꋧꂫꍈꃅꐙꅉꇬꑟꇁꀐ。ꉸꊉꀘꂽꄨꁥꌠꆹꉬꇮꃅꊯꉬꑍꈊꃀꄹꉖꌠꆏꅥꈔꌉꈔꉱꇤꌐꀐ，ꑸꆃꂽꄨꁥꌠꆹꀂꏾꈎꁍꎼꇬꇱꌊꒈꂪꏯꉜꄉꁈꁧꌐꀐ，ꋀꊇꇬꁨꊫꁨꄉꁧꂿꄷꌠꆹꊫꂫꈝꃀꀋꁮꀐ……
ꇦꀨꇁꀠꅇꁊꋋꊱꆹ，ꃅꐎꋍꈓꂷꅑꅷꇁꌠꆏ，ꈍꑋꃢꇬꅲꋺꌠꋌꋋꀋꎺꀐ。ꄚꇦꀨꇁꀠꅇꁊꅍꂶꌠꆹꑠꃅꈛꑌꃅ，ꋍꅳꀧꏢꁮꇬꄉꂿꌠꆹꀋꃋꋌꃢꀉꄂꐥꋺꑴꌦ。
……ꆍꊇꆹꂨꁖꂿꄷꉪꌠꅀ？ꃅꇕꄹꊂꇿꇬꑌꉪꊇꁌꄝꂽꑼꀉꄂꉬꌐ，ꆍꊇꇬꂨꁖꄐꑴꄜꅀ？ꆍꊇꆹꀋꑍꊂꋋꇅꇬꂨꁖꇫꎭꌠꌤꃆꏢꀉꄂꉪꇬꎷ，ꄚꄽꂫꆹꈍꃅꐙꀐ？ꆍꅿꃏꏸꄣꈍꌌꌫꅉꀋꊌꇫꎭ。ꉪꅿꃏꏸꄣꈍꆹꆍꃤꑘꀋꋌ……ꆍꊇꆹꊼꇅꉪꉚꉏ！ꀋꄹꄷꆍꊇꄹꇬꑠꃅꇬꍑꑲꆏ，ꑠꃅꄉꃅꂿ。ꀋꄹꄷꆍꊇꉈꑴꋍꃢꆹꅥꌉꏾꑴꌦꑲꆏ，ꉈꑴꋍꃢꅥꌉꌦꂿ，ꈍꃅꄿꂿꆍꊇꆹꊿꇱꈔꋏꐴꀋꊌꇫꎭꌐꀐꌠꉬ。
ꀀꀋꇎꑌꀋꌒꐛꅹꃅ，ꂚꄏꅿꐙꄏꀋꄚꈍꃅꎍꀙꀐꌠꈁꑓꂶꌠꆹ，ꒈꆭꅍꏝꂮꈧꌠꑠꉈꑴꋍꄀꁦꎆꌦꃲ。ꌌꋍꏭꄉꉉꇁꇬꆹ《ꍞꊠꄉꄗꒄꂱꏤꏮꈌꊰꄯꒉ》ꄷꊱꌠꌌꀋꆏꃅꅇꁊꌠꆹ，ꃶꐚꃅꅲꉆꀋꇬꃅꌌꁒꐀꌠꉬ。ꀊꋨꄹꈎꉸꉰꄉꀉꇨꃅꌉꈿꄮꇬ，ꂴꆸꈈꇬꅿꍝꄐꑼꂷꃅꄉꌠ，ꋋꆹꈍꑋꊰꂰꀉꄂꇢꌠꏦꏧꏃꅿꂽꏃꌋꁈꈧꌠꏭ，ꈍꑋꃢꊋꃤꊾꍅꌠꈌꊰꄯꒉꌌꅇꁊꋺꀋꐚ。ꄗꌦꆀꑼꀊꋨꄮꇬꆹꂚꄏꇫꐊꐺꌠꄨꀊꋨꂷꇬꄉꄨꍈꃅꄉ，ꋋꆹꅉꀕꃅꌉꈿꌐꀋꐥꄮꇬꑲꆀꂴꆸꈈꌉꈉꇬꄉꀱꇁꑟꃅꇬꎷꌠ。
“ꂚꄏ，ꈍꃅꐙ，ꈍꑋꇫꋨꏦꂯ？”
“ꄨꍈꏭꅇꄜ，ꀋꃉꌌꀾꁥꐥꈨꇁꀐ，ꇫꄉꈨꇁꇬ，ꀋꃋꊁꆃꁥꐥꈨꐥꑴꌦꄷ。”
“ꃪꐯꃪꉽꐯꉾꀐ！ꄇꍩꌌꋨꏦꇬꆹꈍꃅꑌꇫꇁꀋꅲꌠꉬ，ꅽꅿꅇꁊꌠꇱꊾꇬꃅꋌꋨꏦꌊꇁꌐꀐ。”
ꌉꈿꌐꊂ，ꄨꈐꏭꑆꊋꐥꌠꋨꏦꀮꄑꃀꀉꒉꑠꂷꌌꇨꐯꇨꃅꈿ，ꄨꍈꆹꉦꃀꇬꀑꑊꁤꇅꀕꃅꊌꌠꁬꃨꀉꅪꅑꎍꌠꂚꄏꋌꈻꌊꋍꏢꁮꂴꆽꎅꌠꇬꑌꄉ。ꑫꑵꅈꇬꆏ《ꂛꊨꅫꃀꋓꄉꃅꏀꀖ》ꄷꑫꂶꌠꌌꇫꄉꑵꌦꀐ。ꋋꆹꋍꁁꏯꆏꉌꇿꑓꇿꃅꑫꑵꌠꉜ，ꋍꁁꏯꆏꀋꆏꃅꃹꅼꃅꂚꄏꏭꆃꄐꇬꌤꃆꆿꂮꑠꅲꅷꐺ。ꇫꄉꈨꇁꇬ，ꂽꑼꈧꌠꆹꃅꄷꅇꁊꌠꉌꃹꐯꉌꃹꌐꄷ，ꑬꆏꄮꇬꆏ，ꈀꄸꑌꀋꃉꆏꋍꂷꄻꄉꁨꌐꀐ。ꄗꄨꍈꈁꑓꇬꋋꇅꃅꉌꀋꃹꌠꑊꑆꄀꌠꅪꇉꀕꇈ，ꂚꄏꏭꀒꊨꑟ：
“ꋋꆹꃀꅉꆐꈍꃅꑌꑠꃅꀕꀋꉆꌠꉬ。ꂽꌤꑘꀂꏽꊋꄖꌠꀉꒉꃅꀋꍆꑲꆏ，ꅽꇦꀨꅇꁊꇁꀠꈧꑞꂷꄙꄏꂯ？ꀋꃉꆏꂽꋋꇅꃅꆈꒉꆗꒉꈴꁧꂯꄉꀐ，ꉈꐪꊛꄉꇐꄷꉻ、ꑾꌋꈤꏭꉜꄉꌉꁧꑴꌦ，ꆎꆹꏟꈯꀕꃅꊋꇤꄉꅽꂽꁥꌠꌌꁰꍋꌶ，ꀋꎪꃅꂽꌉꈿꏡꁈꊋꃤꑠꌌꉀꐕ。”ꂱꀯꋌꄖꌊꄩꑫꑵꅉꇬꊼꇅꄂꇈꉉꇬ,ꀊꄶꇦꀨꅇꁊꇁꀠꃆꂮꈧꌠꆏ， “ꀋꃉꋋꊂꈭꐨꆏꏭꇤꋀꊇꁵꃅꇁꎻꂿ。ꆏꉜꉏ，ꀊꄶꇬꑮꆜꀊꋨꂷꉙꑵꌊꈍꃅꃪꉏ，ꌉꈿꄮꇬ，ꅇꌬꉏꌬꈉꇬꆏꇤꋋꁳꃅꇬꃅꄎꐯꃅꄎꌠꉬ。ꌞꊿꇐꀳꇬꌋꅪꅇꆹꉐꅋꌡꃅꅋꋌꐊꌟꉬꑴꄷ。”
ꑮꆜꀊꋨꂷꆹꄧꀕꃅꑸꆀꉬꅊꇈ。ꀊꉗꀋꐛꇬꆏ，ꂚꄏꆹꈬꑍꈬꄅꀕ、ꊯꊪꑍꄀꄃꃅꄀꌊꌉꈿꁰꍋꄊꄐꇫꐥꁧꄉ，ꑸꆀꆹꇦꀨꇁꀠꇬꄉꅇꁊꋺꀋꋻꌠꀊꅰꃅꋌꋋꅉꀋꐚꆙꅜꀐ。ꄚꀋꃋꋋꇅꇬꆏ，ꈬꉘꃅꄷꐛꌠꑤꍰꇓꈓꋋꂷꃅꃴꇉꀕꃅꀕꍑꁱꄉꇄꌠꇬꉬꄉ，ꋌꅲꌊꐝꈷꐮꐝꈷ，ꀊꄶ“ꈌꊰꄯꒉ”ꀊꋨꈨꆹꇯꍝꃅꑸꆀꈂꀸꇬꄉꅐꀞꅔꁖꎼꇁꌐꌠꉬꀐ。
ꋋꆹꋌꃀꑠꃅꉾꃅꐥꀋꋻꑴꌦꌠꍵꂫꄮꐰꃅꄜꄮꇬꑠꋍꑍ。ꂿꃅꁬꌠꃴꇉꅍꌌꑊꈷꇓꂷꃅꄉꌬꉆꉜꉆꃅꎍ，ꋋꆹꈍꒈꒊꇈꉜꉚꋯꀋꐛꌠꉬꅊꇈ。ꃅꉘꃅꌗꐙꍗꀕꌠꈐꏭ，ꑸꆀꃛꁙꂄꐛꅹꃚꋒꄎꌬꄹꆲꐊꁏꇁ。ꋍꃚꋒꆹꈍꃅꋌꀧꌋꃅꅷꇁꌠꉬꀋꐚ，ꎵꃀꅝꄉꀧꌋꃅꄉꌠꅀꃬꏿꋠꄉꀧꌋꃅꄉꌠꉬꂯ，ꅀꅉꀕꃅꍣꋚꃮꎸꋠꄉꀧꌋꃅꄉꌠꅀꀇꐒꀊꄁꅝꄈꑠꃅꐚꌠꉬꂯ？ꃅꈎꃅꆪꆹꌩꏾꊰꃅꊰꃄꐎꈍꑋꈓꇫꈴꁧꀐꇬ，ꋍꃚꋒꉏꋒꈧꌠꆹꀋꉊꋋ《ꂛꊨꅫꃀꋓꄉꃅꏀꀖ》ꄷꑫꑵꄮꇬꌟꃅꄡꇗꐓꂿꅍꎍꑴꌦ。ꄚ，ꋋꆹꇳꄻꏦꄻꈁꑓꒉꋌꀑꆗꌺꀨꂾꉩꌠꉫꉬꂯ？ꂚꄏꎺꇁꀐ，ꀊꋨꃢꃥꀀꅉꇬꄉꋋꆹꅲꀋꋭꌠꈊꃀꌊꈯꅇꋋꈨꌋꇁꃲ，ꐓꂿꀕꌠꈐꏭꄉꏡꂿꀕꌠꌋꆀꅙꉩꀕꌠꐊꑠꋌꌌꉪꇁ，ꀊꋨꇅꇬꆏ，ꋍꇭꀧꇖꌋꋋꂷꃅꐛꀋꌒꋰꀋꉆꄽꇩꐯꄽꇩꃅꇫꎍꅷꃅꄜ。
ꎸꄑꍪꋠꌐꈭꐨꆏ，ꃚꋒꀉꁁꑵꆦꄉ“ꈌꊰꄯꒉ”ꌌꅇꁊꇦꀨꇁꀠꇬꄉꅇꁊꌦꀐ。ꂚꄏꆹꋍꇬꅲꑲꆏꋌꅲꐝꈷꃲ，ꃚꍔꏸꏢꁮꇬꉆꎍꌠꆹꌦꀋꇈꃅꎭꈐꂄꄉꀱꄓꇁꌠꀋꉻꃢꌺꂶꌠꉬ。ꉜꎼꇁꇬ，ꊿꌧꂓꇆꆉꏪꇬꄉꎭꃚꋠꋺꈧꌠꆹꉬꇮꃅꐮꆦꄉ“ꌉꈿ”ꆹꌐꃲ。ꋍꇫꋨꏦꇁꌠꆹꀉꁁꋍꃢꃅꐮꆦꄉꐩꎵꃀꃪꃅꃪꌠꀋꏭꎍꌠꅇꁊꂿꄷꌠꉬꌦꀐ。
ꈌꊰꅀꈌꀋꊰꌠꆹ，ꌌꋍꏭꁆꄉꉉꇁꇬꆹꃶꐚꃅꈻꇐꑱꃀꅳꁖꐫꇓꒊꍈꂯꀋꐥꀐꌠꉬ。
ꍏꇩꇭꍣꄈꎼꏹꂷ，ꁨꇐꀋꐥꏠꌠꇝꂱꏭꉜꄉꈌꊰꉆꄷꌠꅀ？ꈌꀋꊰꇬꑌꑞꈨꋌꃅꄎꂯ？ꋍꅿꌤꃅꀕꎆꆹ，ꋍꁮꆪꌠꋠꁌꅜꁌꑍꊏꂷꀉꄂꋒꀐ，ꋍꅿꌅꈌꆹ，ꑍꇁꌊꀋꐥꃅꉪꈾꏽꌠꀉꄂꋒꀐ，ꋍꅿꐤꅉꆹ，ꈍꃅꉉꑌꀋꃅꄗꒄꂱꐤꅉꆹꀋꏣꀐꌠꉬ。ꑠꈨꉬꎼꈀꑲꆏ，ꋀꊇꆹꑞꃅꌌꋍꃢꀋꀞꀋꇽꌠꉬꂯ？ꆿꃀꁡꇤꊿꊇꇬꀞꇽꌠꀉꏮꌌꋍꇬꀞꇽꌠꀋꃅꌠꉬꂯ？
ꇯꍝꃶꐚꃅꇬꆹ，ꃅꇴꃅꏢꌠꌡꌠꃚꋒꉏꋒꋋꈨꆹ，ꂚꄏꋌꇙꅷꀑꃀꑓꏂꋩꀙꀐꌠꉬ，ꋟꑌꋠꀋꄐ，ꀀꑌꀀꀋꉆ，ꈻꌊꀞꇽꁧꌠꏭꀋꋌꃅꄽꇩꐛꀋꌒꋰꀋꉆꃅꎌ。
ꋍꅿꂿꃅꃄꅉꆹ“ꇌꉻ”ꂷ；ꋍꅿꂾꅉꆹꃅꑆꃴꇉꀕꑠꍈꀉꄂ。ꈧꌺꂶꌠꄓꎸꇀꌦꀱꁧꎏꃹꁧꌦꃅ。ꀊꄶꐍꌬꀕꌠꎹꄓꈨꑭ，ꀊꄶꅩꌬꀕꌠꁯꋒꈨꑭ，ꊰꇁꋍꐙꄏꁁꄏꌠꑓꋪꈐꏭꃹꇁꄷꆏ，ꋍꑓꋪꋋꎼꂪꌦꀉꆈꁬꌌꉱꄉꌠꀉꏮꑓꀋꃀꑡꍈꑌꊌꀋꂿꇬꎷ。ꈨꌋꏣꋌꎼꉮꌸꀙꇨꐛꅹ，ꂵꆧꃀꋍꑍꀉꄂꃅ，ꋋꆹꀋꄚꈍꃅꇭꀧꇖꌋꋋꂷꃅꑆꆅꎸꆅꀙꀐ，ꀋꇊꇬꑐꐴꐫꇓꍈꈁꐛꅈꇬꃅꑱꃀꑱꌺꈍꑋꌊꉀꇫꍣꄉꌠꌡ。
ꂽꄓꇨꑭꃹꁧꄮꇬ，ꋋꆹꉜꉛꋯꀋꐛꌠꁦꀑꇆꆉꁮꈹꐚꈹꌠꈝꃀꇬꄉ，ꁮꐚꇱꂁꇬꊎꄉꌠꅉꂨꍩꇓꋌꄔꁖꇫꎭꋺ。ꄚꎭꈐꃅꊭꒊꄉꌥꎭꆹꀋꐥꀑꑴꇬ，ꅳꀧꑍꁆꌠꅿꅱꇉꆹꋋꇱꉮꀙꐮꀙ。ꊁꆏꌌꆅꉚꅉꇬꄉꁬꋌꉖꇈ，ꈨꌋꏡꌠꆹꉖꌒꀧꌋꃅꄉꀐ，ꆅꉃꆄꄻꊿꈧꌠꆹꀱꒊꀱꇁꃅꋍꏮꏤꄻꇬ，ꆏꑴꌠꈧꊰꀕꃅꎺꄉ，ꃚꋒꉏꋒꀊꂥꀉꇨꌠꂾꅉꑠꇬꆹꄡꆹꂸꄹꊡꀱꇬꎷ。ꋋꈨꆹ，ꑸꆀꅉꐚꌠꉬ。ꑞꃅꑌ，ꋋꈨꋌꅉꐚꐛꅹꑳꆀ，ꑸꆀꆹꉇꉈꃅꑠꃅꀕꌠꉬꄡꑟꋭ。
ꀋꐯꄡꍏꀕ！
ꀃꈈꁬꌠꊿꁉꎼꇁꀐ，ꆿꃀꈁꑓꅑꌠꂴꅐꇁ，ꀊꍆꈋꀧꀂꏾꅑꌠꊁꈹꇁ。ꀑ,ꋌꄚꈐꏭꋍꀉꄉꅰꌋꋍꀉꂿꆀꌋꂶꌠꎹꇁꌠꅀꑞꉬꂯ？ꂚꄏꂶꌠꆹꑓꏂꇅꄷꋌꏮꀃꈈꃱꌬꄐꍈꀋꉻꃢꌺꂶꌠꋍꇅꉜ。
ꊿꋋꂷꆹꁰꀕꀉꒉꃅꇝꂱꂾꆹ，ꌺꇰꑶꀠꂷꌡꑠꂷ。ꄚꃅꐛꃄꄏꀕ，ꈫꑍꈬꄅꀕ，ꊯꊪꑍꄀꄃꈍꃅꌠꉬꀋꐚ，ꀋꑍꊁꋌꇅꇬꆏ，ꋋꆹꋌꇅꃅꌍꆽꁏꊝꀯꉻꏒꅉꇬꀕꉚꒉꐯꒉꃅꇫꎍꀐ，ꄷꀋꁧꌌꏟꈯꀕꃅꇯꌬꅷꐺꀐ。ꋍꃢꇀꅉꀕꃅꂚꄏꏭꊨꀖꃀꈿꄮꇬꆏ，ꋋꆹꃀꅉꆐꂴꅑꄉꋍꎴꇯꉉꇬꎷ。ꄚꋍꉉꅇꈯꄔꄜꇐꈧꌠꆹꌺꇰꃀꄡꀧꀕꅉꀕꃅꀱꒊꀱꇁꃅꋍꈨꀉꄂꉬꇬꎷꄉ，ꌞꊿꆹꀊꅰꇬꅲꀋꏾꀐꑴꇬ，ꄡꇗꋍꅿꀉꐩꆿꊋꏗꌠꃅꇏꐛꄟꆹꊿꇫꀋꏦꂷꀋꐥꌠꉬꑴ。
“ꂚꄏꀋ，ꌦꇬꑌꉌꆐꅑꄉꄺꀱꑲꀋꌧꌠꁨꇐꐥꏠꌠꈝꃀꍬꊿꊾꇰꅽꑠꂷ，ꀋꎪꃅꅽꅿꑽꃤꆈꏸꀕꈧꌠꉉꎼꇁ！ꀋꉉꇬꆹꈍꃅꑌꀋꍑꌠ，ꐥꋊꐥꍂꃅꀋꍑ，ꀋꍑꌠꉬ！”
ꑠꄮꇬꆏ，ꋋꆹꄡꇗꌺꇰꃀꄡꀧꀕꃅꂴꅑꄉꇬꅇꊱꌠꉉꇬꎷ。ꂚꄏꆹꈍꄮꇬꇯꆐꇫꅲꀋꏾꏸꈌꀕꀐꐛꅹ，ꀂꏾꋋꎎꌊꌍꑓꉈꏭꉜꎍ，ꁱꀋꐭꃅꋍꇬꒉꇈꆏꇬꉆꎌꇬꎷ。
“ꂚꄏ！ꅽꀉꄉꅰꌋꅽꀉꂿꆀꌋꂶꌠꒉꅀ？”ꉉꀥꉉꀥꏿꃅꋌꑇꈐꏭꃹꇁꌠꆹ，ꍏꇬꄉꑸꆀꇱꏃꌊꇁꌠꂱꎼꂶꌠꉬꅊꇈ，“ꆏꏮꋍꏯꊼꇅꉜꉐ，ꉢꁳꊼꇅꉜꉏꈅ，ꆏꅽꀂꏾꂶꌠꑞꈨꅽꒉꅍꐥꉚꂿ！”
ꂱꎼꋋꂷꆹ，ꈎꄜꀊꏀꇈꌺꏦꑠꂷ。ꄚꑠꃅꑴꇬ，ꀋꅔꉇꆹꋋꑌꄡꇗꈐꀋꐊꉘꀋꐊꃅꎭꈐꄸꑠꋍꑍꉬ，ꀂꏾꋋꂷꃅꊿꇱꐑꇨꀠꀕꇈꉉꄻꀋꅐꃅꌀꄝꀮꀉꄂꄻꇬꄀꄉꇈ。ꀱꇁꈭꐨꑲꆀ，ꋋꇅꃅꌀꄝꀭꌠꐎꇫꎭꐛꅹ，ꀒꅗꆽꇈꇨꀠꅍꃠꈌꌦꇫꎍ。ꋌꅇꉉꇬꆹꃀꅉꆐ，ꑌꁯꌺꂷꇫꂿꌠꀋꏯꀊꍆꅳꀧꅑꌠꊿꀋꉬꑲꆏꃀꅉꆐꈀꄸꑌꇫꊌꈨꀋꄐ。
“ꃮꂱꎼ！”ꀋꉻꃢꌺꂶꌠꉉꇬ，“ ꇦꀨꅇꁊꇁꀠꊼꇅꈢꄉꅀ”ꄷ。
“ꆏꁳꅇꂷꉉꌒꎻꂿꄜ，ꀂꉗꌺꍈꊼꇅꁨꈢꄉꂿ。”
ꃮꂱꎼꂶꌠꀑꉞꈭꐨꆏ，ꄻꌍꑓꇬꊒꄉꌠꇦꀨꅇꁊꇁꀠꂶꌠꇬꀋꂿꀐ。
ꂚꄏꋋꇅꃅꌌꉪꇁꇬꃚꑫꉐꑫꉬꇮꃅꆈꍃꇬꃅꎍꌠꌡ，ꀋꇊꇬꇉꅼꇴꌅꀕꅈꇬꈌꀋꋦꃮꀋꀆꌠꑠꈚꇫꐥꌠꌡ。ꉌꊭꈧꌠꊨꏫꄹꂿ，ꇉꅼꒈꌺꉼꀕꄹꂇ，ꌨꏾꆲꁏꌊꎰꀕꃅꋍꅳꀧꇬꃹꇁꌐꌠꌡ。ꀂꉗꌺꍈꐛꈭꐨꑲꆀꌌꉪꇁꇬꆏꊨꏦꌊꎙꉜꏍꌠꉬꅊꇈ。ꌍꑓꉈꏭ，ꊿꒈꃚꏇꃚꃮꀆꃅꀆꇫꎍ，ꄷꀋꁧꇳꃚꏄꃚꉏꃚꑠꋍꄲꇈꋍꄲꄹꇬꊂꐊꇁꌐꅊꇈ。ꉜꅊꇈꂿꆏ，ꑤꍰꇓꈓꋋꂷꇬꁨꇐꐥꏠꌠꈝꃀꇬꍬꌠꊿꆹꋌꀉꄂꀋꉬꅊꇈ，ꑠꃅꐙꋋꇅꇬꆹ，ꊿꈀꄸꂷꉬꑌꑾꌙꀕꁦꉘꌺꃅꀋꐛꌐꌠ，ꈀꄸꑌꁈꋍꁈꆽꀕꃅꅍꎷꀋꊌꌐꌠ。ꀊꑙꑫꌌꅺꌡꌠꋌꎺꇀꌦꀐ，ꒊꈧꌠꒊꆭꅍꉈꋍꃢꋍꈁꑓ、ꂱꀯꇬꎑꎍꌦꀐ。
“ꉆ，ꆏꒈꌦꀐꅀ！”ꃮꂱꎼꉪꇬꋍꅿꇐꑌꌋꉆꇗꄃꂷꑌꐨꇬꀉꒉꃅꁣꏙꅍꐥꐛꅹ，ꋋꆹꇇꏸꄖꇇꃀꂖꌊꂚꄏꑓꋪꇬꊒꄉꃛꁶꃛꁶꏿꃅꊨꏈꌦꀐ。“ꆏꉜꉏ，ꅽꐛꄟꂶꌠꉜꇬ，ꃀꅉꆐꃶꐚꃅꁨꇐꐥꏠꌠꈝꃀꍬꂷꉬꅊꇈ！ꂱꊨꆈꒉꅍꅿꈈꂶꌠꌋꆀꐯꌟ。ꅿꈈꃤꃀꌕꏼꁨ，ꆎꑌꄡꇗꃤꃀꌕꏼꁨ，ꋍꏼꌌꄉꇭꍣꄈꇬꋲ，ꋍꏼꌌꇁꎹꉼꍗꑴꇩꏤꇬꋲ，ꉈꑴꋍꏼꌌꄉꃀꊱꄏꉪꇐꏂꌯꀕꌠꇬꋲ。ꉆ，ꉆꀕꉆ……”ꋋꆹꊨꏦꌋꅜꐨꃆꂮꃅꉌꇿꑓꇿꇁꀐ，“ꆏꉉꉐ，ꂚꄏ，ꆎꆹꅿꈈꂶꌠꉫꉬ？”
“ꉡꆹꅿꈈꀋꉬꂾꇐꏽ。ꅿꈈꆹꌊꆽꁏꁥꌠ，ꉡꆹꁨꇐꀋꐥꈝꃀꍬꏠꌠ。”
“ꅽꑠꆹꑊꋌꉱꃀꅇ，ꆏꌊꆽꁏꁥꌠꇬꎻꋉꃏꄀꀬꄜꅀ！”ꃮꂱꎼꂶꌠꇨꇅꃃꌌꋰꀋꄐꃅꆧꁨꇙꌊꊾꇤꇁꂯꃅꎍꄮꇬꆏ，ꀋꎺꃅꀋꉻꃢꌺꂶꌠꇱꈻꉈꑴꎭ。
“ꉈꏭꄆꅇꊪꇖꇫꂿꀐ！”ꀋꉻꃢꌺꅇꉉꑌꃅꄉꄮꇬꆏ，ꉈꏭꈳꅉꇬꄆꅇꊪꇖꂶꌠꆹꇬꊎꌪꆷꀕꃅꂿ，ꋋꇴꌠꉬꅊꇈ。
“ꈍꃅꑌꑸꆀꐋꀨꉬꄡꑟ！”ꃮꂱꎼꂶꌠꆏ，“ꆏꄈꁨꄆꅇꊪꒉ”ꃅꉉꅷꐺ。
ꀋꉻꃢꌺꂶꌠꑓꋪꌌꃮꂱꎼꋌꉜꉈꏭꎭꈭꐨꆏ，ꈁꑓꏮꌊꂚꄏꇬꉜꄉꅲꇫ：
“ꉪꊇꑞꎹꇁꌠꆏꐙꐚ？”
ꂚꄏꆹꇫꅇꀋꀱꃅꆹꏮꌊꌍꑓꂴꆽꉆꎍ，ꋍꀂꏾꆅꌊꐞꏅꁖꁧꄉꏽꂶꌠꆹ，ꅇꁊꇀꀠꂶꌠꋋꇅꃅꇬꀋꂿꀑꐛꅹ，ꀋꃋꆹꊼꇅꑾꌙꀕꁦꉘꌺꃅꎍꀐ。
ꎭꈴꏳꈐꏭ，ꊿꈧꌠꁬꃷꈨꀋꏮꆏꒉꉢꇁꄹꌐꀋꉆꃅꇫꎍ。ꁰꀕꀊꒉꃅꇝꂱꈭꐨꅑꅷꇁꌠꆏ，ꄯꒉꄉꑳꂶꌠꈢꇫꎭꀐ，ꁰꀕꇨꃅꐨꈩꐪꆏꇫꎭꌐꐛꅹ，ꃰꊿꈧꌠꋋꇅꃅꁦꅉꃹꅉꀋꊌꆘꅝꀐ。ꑍꄜꄯꒉꇬꆹꅉꀕꃅꄙꁬꃪꁬꃅꐯꌟꌠꄯꒉꁱꂷꀉꄂꅑꇁꇬꎷ，ꁉꄉꉜꇬꆏꊋꒉꌠꅇꀨꌋꆀꁱꀨꈧꌠꀉꄂꉜꇬꎷ；ꊼꇅꊿꇬꉚꏾꌠꆏ，ꋩꑍꊝꄹꉇꌠꅐꈧꌠꇬꀊꄶꊾꂓꊿꑫꈧꌠꀉꄂ，ꊿꇫꋒꌥꌠꈀꄸꂷꂓꇬꀋꅑꀐ，ꊿꋌꀋꌧꌠꈀꄸꂷꂓꁦꎆꃅꇬꅑꇀꌦꀐ。ꋋꈨꉜꈭꐨꆏ，ꊿꀉꑌꌠꆹꇯꍝꃅꀕꅍꀋꊌꃅꎍꌐꀐ。ꁱꂷꀉꒉꄊꊫꀨꈧꌠꑌꃶꐚꃅꉉꀱꅲꀋꌒ、ꏬꀱꒉꀋꑭꃅꊿꇬꉚꀋꏾꌐꃲ，ꑡꀉꒉꃅꊨꀖꃀꈿ、ꀉꒉꃅꐯꀥꃀꑠꆹꃀꅉꆐꈽꃚꂷꌊꀉꑐꂶꏭꄀꇗꇱꌠꀋꏭꀊꅰꃅꊿꇫꉌꌤꑓꀖꌠꀋꐥꌐ。ꌬꀮꌬꀏꃷꅉꌋꆀꋠꇐꅝꒉꃷꅉꑍꂷꌠꇬꄈ，ꄚꈬꉘꃅꄷꐛꌠꑤꍰꇓꈓꀄꊭꋋꂷꇬꃀꅉꆐꀊꅰꃅꊿꇫꀋꋧꊿꇫꀋꅲꃅꎌ。ꌬꀮꌬꀏꃷꅉꂶꌠꆹꂪꌦꀈꆧꈨꌠꌋꆀꀊꉗꃅꌬꄎꌠꒀꉱꀉꆈꑵꌠꀉꄂꃷꇬꎷ，ꋠꇐꅝꒉꃷꅉꇬꑌꃀꅉꆐꅿꉗꍈꇯꀋꐥꀐꌠꏤꒀꈨꌠꌋꆀꀉꁁꆏꁌꑡꑌꀋꒊꌠꃰꃨꋂꈧꌠꀉꄂꐥ。ꊿꄚꎼꄚꈴꐺꌠꆹꋍꇅꋋꇅꑓꋪꀉꄂꏮꇫꊼꇅꉜꑲꆏ，ꊾꂷꁨꉜꆹꌠꆹꀋꐥ。
ꑠꃅꊿꇫꀋꋧꀋꀞꌠꆹ，ꉈꑴꑝꉸꎺꄆꄯꒉꃷꅉꂶꌠꑌꉬ，ꎭꈴꏳꑳꂶꌠꆹꀁꂥꑴꇬ，ꄚꀃꈈꁬꌠꆹꄻꌊꃀꅉꆐꇣꋲꐯꇤꋲꃅꄉ。ꈀꄸꑌꇫꅉꐚ，ꋋꆹꂚꄏꅿ“ꑽꃤꊰꐘ”ꌠꇬꋍꐘꌠꉬ。ꋋꈍꑋꈓꂾꄯꒉꄉꑳꇬꆹ，ꊋꒉꌠꆏ“ꁨꇐꐥꏠꌠ”ꁱꀕꀉꄂꉬꌐ，ꉈꑴꆏꌠꆗꑮꆜꈍꃅꄉ“ꐯꄡꐮꉂ”ꂿꄷꌠꇮꇐꑴꇐꏡꁈꄯꒉꀉꄂ，ꇤꋲꌠꆏ，ꑳꋋꂷꋈꄮꇬ，ꄧꀕꃅꂚꄏꑤꊇꀨꇬꎼꏹꂶꌠꇫꊋꄏꄉꋈꄻꄉꌠꉬꅊꇈ。ꇫꋒꇈꌠꆹ，ꎭꈴꏳꂶꌠꀉꄂꊼꇅꊿꇬꉚꏾꀐ。ꄚꇬꄉꑍꄜꄯꒉꊾꂓꈧꌠꉜꈭꐨꆏ，ꉇꑴꉌꌤꑓꀖꅇꄜꄯꒉꁬꅀꎆꃀꆿꂷꍈꎬꄻꌠꃅꇬꉆ；ꉇꑴꆏꄚꇬꆹꅇꈨꈝꃀꆳꇴꅈꑌꉬꐛꅹ，ꉉꄻꀋꅐꃅꄚꇬꄉꊿꋧꊿꀞꌐꌠꉬꂾꇐꏽ。
ꁬꃷꈨꀋꏮꆏꒉꉢꇁꃅꐺꌠꊿꀊꋨꈨꆹ，ꋓꉪꀋꁨꌠꅀꉇꉈꃅꌠꉬꀋꐚ，ꀂꏾꂶꌠꐕꌊꀊꄶꑳꄩ“ꇌꉻ”ꂶꌠꇬꊼꇅꉜꃅꎍꇬꎷ。
ꆹꏮꌊꌋꆽꁏꉻꏒꊝꀯꇬꄉꉉꇁꇬꆹ，ꂚꄏꂶꌠꈢꀊꄶꊐꄉꌠꌌꉹꁌꀨꂿꄷꌠꉬ；ꄚꇬꆏꄧꀕꃅꂚꄏꅿꋍꉘꇉꐨꐥꌠꑠꈚꉬꅊꇈ。ꋋꆹꅉꀕꃅꇁꌊꌍꑓꏢꁮꇬꉆꄉ，ꊿꁱꀋꐭꃅꏮꇊꋋꉛꃅꋋꈨꇁꉚꌠꉬꅊꇈ。ꀊꄶꆏꒉꉢꇁꃅꎍꌠꊿꀊꋨꈨꐛꄟꇬꄉ，ꋋꆹꀱꒊꀱꇁꃅꌗꀋꅐꁱꀋꐭꃅꈌꉪꌗꎖꐺꇬꎷ。ꁰꀕꀊꒉꃅꇝꂱꂾꀊꋨꇅꇬ，ꀊꄶꊋꄓꉌꇿꃅꎍꌠꌋꆀꃵꂿꌠꈁꑓꈧꌠꆹ，ꋍꑍꋍꉙꃅꐜꀋꈨꇁꀐ。ꄚꀋꈯꀋꈜꃅꎽꇓꎺꇓꌠ、ꀉꇨꇈꇨꃃꌠꇬꐛꐨꐛꊀꈧꌠꆹ，ꅉꀕꃅꋌꇫꋒꌥꌠꈁꑓꀊꋨꈨꇬꄉꀱꒊꀱꇁꄹꐮꏮꆦꇬꎷ。ꋋꄮꇬꆏ，ꊼꇅꋍꉌꂵꈴꒉꌒꃅꎍ，ꋋꆹꉌꃀꈐꏭꄉꌙꈈꀕꃅꌧꊨꏦꇰꇬ：ꉠꅿꉂꏣ，ꉠꅿꉜꐨ，ꋀꊇꌋꆀꐮꀋꐞꑴꌦꅊꇈ！ꄚ，ꋍꅿꉌꎭꑓꁧꌠꆹꈜꀕꇈꃹꅼꇁꀐ。ꋍꏅꋌꀋꏾꑠꈨꉬꑲꆏ，ꑞꐛꅹꌤꆿꑠ，ꃅꄵꀕꃅꅐꇀꌦꌠꉬ？ꑞꐛꅹꋀꊇꑠꈨꊢꂖꌊꄚꇬꄉꀊꑙꑫꋋꂷꇬꑵꒉꌐꌠꉬ？
ꀃꑍꇆꀃꑍꋋꑍ，ꏦꎫꇬꐛꄟꆹꑍꃀꑍꊂꌋꆀꐯꀋꌡꃅꎍꀐ。ꎭꈴꏳꇬꇁꌠꌋꆀꁖꅐꁧꌠꊾꆹꀁꑌꐯꀁꑌ，ꄚꁱꂷꀉꒉꄊꊫꀨꈧꌠꂴꆽꉆꎍꌠꊾꆹꀋꆏꃅꁦꎆꇁꇬꎷ。ꇢꅉꀊꎴꇨꐛꅹ，ꁱꂷꀉꒉꄊꊫꀨꇬꀊꏀꃅꆦꇬꄀꄉꌠꁱꂷꈧꌠꆹꈍꑋꃢꃅꉜꑌꋌꀕꉚꐝꉅꀋꄐꃅꎍꌐ。
ꋌꉌꇓꑓꈪꇁꀐ。ꇭꀧꏪꀠꉈꑴꉜꉆꇬꆏ，ꀋꉻꃢꌺꅿꅲꅇꈧꌠꆹꋋꇁꉚꎍꑴꌦ：
“ꉪꊇꑞꎹꇁꌠꆎꅉꐙꐚꀋ？”
“ꉢꅉꐚꑴ！ꀋꐚ，ꉢꋋꅉꀋꐚ。”
“ꉪꊇꅿꇁꃆꇁꂮꑠꆹ，ꀊꄶꀏꏯꁱꂷꀉꒉꄊꊫꀨꌋꆀꋍꍈꂯꐮꀋꌡꌠꉬ。”
“ꀊꄶꀏꏯꁱꂷꀉꒉꄊꊫꀨꇬꑡꈨꁱꇬꄀꄉꀐ？”
“ꅇꀨꆹ，ꆸꉈꇨꅼꃅꁨꇐꐥꏠꌠꈝꃀꍬꌠꂚꄏꉜꐪꐝꀋꉅꌠꐙꁏꃥꌋꐛꌠꉹꁌꊢꂖꌊ，ꁨꇐꀋꐥꏠꌠꇝꂱꇬꉮꇁꌠꊫꂫꆹꐥꍂꃅꈔꐴꀋꊌꌠꉬꄷ。”
“ꅇꀨꆹꃪꑴꇬ，ꄚꀊꎳꇨ。ꄡꇗꉢꁳꆍꎁꃅꇇꀤꄉꋍꇬꁱꂾ！”“ꂚꄏꈌꀋꊰꑲꆏ，ꈔꋏꐴꀋꅿꇫꎭ！ꑠꃅꁱꄉꑲꆏ，ꆍꇦꀨꅇꁊꇁꀠꇬꅇꀨꅇꂫꄜꇐꌋꆀꐮꄉꄐꀐ！”
ꀋꉻꃢꌺꋋꇰꐆꃅꏭꂚꄏꇬꉜꎍ。
ꂚꄏꑌꉜꋧꌙꈈꀕꃅꏮꋍꂴꆽꊿꋋꂷꇬꉜꎍ。ꀊꋨꄹꈎꋍꀉꄉꁈꁦꀑꄉꆼꁏꉻꄑꁧꈭꐨ，ꂚꄏꆹꉈꃅꋌꎷꄉꀉꑌꃢꃅꋍꇬꉪꇐꌤꃅꋺ，ꋌꁳꑓꇢꁉꀉꐯꃅꉜꎻ，ꉹꁌꌅꈌꐥꃅꄺꀱꌠꆹꆈꌠꐧꋦꀒꁨꉜꄉꀻꎆꌠꌋꆀꇁꌊꌧꑳꈝꃀꇬꍬꌠꈝꃀꀋꉬꀋꉆꑠꋍꊙꉬꄷꌧꋋꇰꋺ。ꉘꇉꌠꆏꋍꀉꄉꅿꁣꏙꐨꈧꌠꍞꐩꋊꒊꃀꇬꇱꇫꎭꄉ，ꆈꌠꏓꂱꈲꐪꐥꁁꌠꏯꇬꉆꇁꄷ。ꇯꍝꃅ，ꋋꆹꃅꐪꉪꐨꀉꇨꐛꅹ，ꌊꆽꁏꁥꌠꈍꑋꃢꃅꋍꇬꅰꈻꇁꇬꋌꇫꁧꀋꅲꇬꎷ。ꊁꆏ，ꋌꁳꀒꁨꋍꁘꃅꀻꎆꆹꂾꄸꐛꅹꄉ，ꂚꄏꆹꈍꑋꃢꃅꉎꏯꄚꃆꂮꐥꌠꌤꃅꅈꇬꇖꂟꄉꈌꁧꄉ，ꋋꆏꎭꌊꑾꌋꈤꊿꋅꌶꅉꇬꄉꌧꇐꁱꂷꌶꁧ。ꄚꈀꄸꑌꈬꑍꈬꄅꀕ，ꊯꊪꑍꄀꄅꃅꉪꇬꀋꑟꌠꆏꀊꄸꀈꏦꉉꅇꐯꅊꇈ：“ꊾꋠꆿꃀꌺꆹ，ꈍꄮꑌꊾꋠꇁꇬꎷꌠ……”ꀋꃉꆏ，ꋋꆹꇯꍝꃅꋰꀋꄐꂁꀋꄐꃅꇈꅐꐂꅔꁖꇁꀐ，ꄷꀋꁧꂚꄏꇬꉜꄉꁨꋠꀒꇁꑟꀐ。
“ꆍꊇꅿꇁꃆꇁꂮꆹꑞꈨꐯꀋꌡꅍꐥꂸ？ꆏꀒꁨꊼꇅꉉꉏ。”ꂚꄏꇫꅲ，ꋍꎐꏂꑳꏭꃅꏮꋍꇬꊼꇅꉜꌦ。
ꀋꉻꃢꌺꆹꊨꀖꃀꀉꒉꃅꈿꄮꇬꌋꆀꐯꀋꌡ，ꋋꆹꋍꇬꑌꀋꇴꀋꏅ，ꀍꃈꀱꆽꃅꃚꋒꀉꑌꀊꀋꂥ，ꀁꑌꀂꀋꂥꃅꉉꇬ：“ꅇꁊꌠꆹꌌꅽꉌꊈꇬꍑꊋꍈꁦꎆꃅꊼꇅꍅꌠꉬ。”
“ꑞꈨꍅꌠꉬ？ꉢꂶꌠꆹꍑꌊꆍꏭꈌꊰꄷꌠꅀ？”
“ꑠꃅꇬꆹꁻꌐꀊꎳꇨꀐ。ꍑꊋꀃꅉꇯꆐꁻꌐꑵ，ꆏꋌꀋꌧꑴꌦꅀ？”
“ꉚ，ꉜꅊꇈꂿꆏ！ꇭꀧꇬꉮꌠꌋꆀꉌꊈꇬꄉꉮꌠꑍꑵꋓꄉꃅꌠꉬꅊꇈ。ꊿꁳꀀꑌꀋꇴ，ꊽꀑꆊꁳꊼꇅꑭꀋꆏ。ꋋꆹꆍꊇꅿꁻꌐꂿꃆꉬꀞ。ꍑ，ꊽꇬꉮꌠꆏꁻꌐꂿꃆ，ꎲꄏꑌꀋꇮ！”
ꂚꄏꀊꅰꉉꀊꅰꇨꇅꃃꇁꀐ！ꀋꉻꃢꌺꂶꌠꆹꇣꋲꃅꁰꇬꑌꀋꐭꃅꇬꑌꎌ。ꋋꇅꇬꆏ，ꃮꂱꎼꂶꌠꆹꈐꏭꃹꇁꀐ。ꋍꅿꃅꐪꑽꑌꌋꆀꅇꉉꉐꉇꄟꆹꃀꅉꆐꈍꃅꑌꌋꅪꂷꐛꄟꌡꐯꌡ。ꂚꄏꇨꇅꃃꇁꌠꋌꊌꂿꇬꆏ，ꀋꎺꃅꉐꆂꏡꌠꎇꌊꏮꊁꉜꅷꐺ，ꄚꀋꉻꃢꌺꑓꍻꅍꏮꋌꉚꎍꌠꂿꇬꆏ，ꊼꇅꏮꂚꄏꇬꉜꄉꃚꋒꀊꂥꃅꊨꏈꇀꌦꀐ：
“ꆎꆹꑊꋌꉱꃀꌺꂷ，ꊾꇷꊿꇋꅷꐺꌦꀐꅀ？”
“ꑡꂷꇷꇋꌠꉬ，ꁨꇐꐥꏠꌠꐛꄟ！ꈋꆹꈍꃅꑌꊾꐔꋠꇬꎷꌠꉬ！”ꀋꉻꃢꌺꇫꅲ“ꑸꆀꐋꀨꅥꎼꇁꌠꄆꅇꉬꀞ！？”
“ꋌꅥꎼꇁꌠꉬꑴ。ꋋꉉꇬꅇꁊꑞꃅꆏꄉꌠꉬ，ꉪꊇꏭꉆꐥꃅꇦꀨꅇꁊꇁꀠꄻꅇꁊꎼꇁꄷꅇꀵꎼꇁ。”
“ꍑꑴ，ꆏꂿꃆꏮꄀꋌꁳꂸ。”
“ꉚ，ꂚꄏ，ꆏꅲꄉ。ꆏꁳꀈꈥꃅꐥꀋꉆꌠꀒ。ꆏꅇꁊꌠꅲꈭꐨꆏꉇꑴꌤꆿꍈꃅꌦ。ꆏꌋꆀꀊꄶꆈꌠꃀꑊꋌ，ꑞꂓꌦꇆ？”ꋍꈁꑓꂶꌠꏮꌊꀋꉻꃢꌺꇬꉜꄉꉉꇬ，“ꃆ，ꉬꀐ，ꀊꄶ‘ꍑꂷ’ꌡꌠꀊꄸꀈꏦꀊꋨꂷ，ꀋꎪꃅꆐꑊꑡꃆꂮꐥꌠꉉꐝꉅꑲꆀꍑ。”
“ꃮꂱꎼꂶꌠꆹꀋꉻꃢꌺꇇꇬꄉꄯꒉꁬꌠꋌꊪꌊꒉꇈꋌꍞꀀꈤꇬꄉꈭꐨꆏ，ꀋꉻꃢꌺꂶꌠꋌꈻꌊꉈꏭꈴꁧꀐ。”
ꂚꄏꀊꅰꃅꇨꇅꃃꀋꎺꀐ。ꑞꐛꅹꋌꌋꆀꀊꄸꀈꏦꑋꌤꃆꇬꄉꄯꒉꁱ、ꂷꋶꃴꇀꌦꌠꉬ？ꋋꆹꋂꁍꋍꇱꃬꋍꂷꊂꇬꁊꌠꉬꀐ，ꋋꆹꈍꃅꉌꂵꀋꆅꂯꆏ？ꋋꆹꇯꍝꃅꀕꆳꐊꄉꌩꁧꏀ、ꑊꋌꐊꄉꀋꃀꌺꄂꆜꌠꉬꀐ！ꉌꂵꂶꌠꄏꄹꐁꅉꃅꂴꅐꊂꊛꏿꃅꌗꅐꇈ，ꄯꒉꈧꌠꋌꒃꌊꇵꌍꑓꉈꏭꎭꏡꉪ。
ꄚ，ꄧꀕꃅꑞꉬꀋꐚꇇꁆꌠꎇꎼꆹꄮꇬꆏ，ꋍꈯꋋꀋꌅꃅꏯꄹꀱꉈꑴꊰꇀꌦꀐ。ꀊꄶꌍꑓꉈꏭꀉꒉꇈꆈꊉꀕꌠꌧꂓꀊꋨꁧꋌꊌꂾꌦꀐ。ꀋꇊꇬꑋꆳꁏꅷꊖꆈꀉꅠꀕꑠꏬꇬꈴꒉꌠꌡ，ꀋꇊꇬꑋꈌꍑꂷꊰꇁꋚꅿꁭꌺꇬꌸꌠꌡꃅꋍꉌꂵꁦꉘꀕ，ꇗꄃꀕꃅꐙꇁ。ꄯꒉꋌꇙꀀꈤꇂꃴꊐꄉꌌꑖꑣꌺꃅꀧꌋꃅꄉꀐ。
ꀋꉻꃢꌺꀃꈈꉈꏭꈴꒉꇈꀱꉈꑴꄉꀋꇊꇬꀑꐱꃅꉉꌠꌡꃅꉉꇬ：
“ꉢꅇꂷꋍꇬꉉꆎꇰꂿ，ꉠꅿꐰꇑꁏꌊꉠꅿꑊꋌꐛ!ꉠꅿꈐꉘꐈꌊꅩꏜꅪꀖꐛ！ꉠꅿꎔꌋꁏꌊꉠꅿꁮꐛꉠꐚꐙ！”
“ꅽꑡꄜꇆ？”
ꀋꉻꃢꌺꃱꇌꃯꇌꃅꑠꇅꐛꇈ，ꄽꂫꉉꇬ：“ꆏꁳꉉꎻꂿ，ꏡꁈꋋꏢꆹꉢꏂꌠꉬ。ꑾꑆꈚꐺꌠꆹꆿꃀꆹꈍꄮꑌꊿꑝꌠ，ꆿꑆꈚꐺꌠꑾꆹꈍꃅꑌꊿꑝꇁꀋꇮꌠ。
ꊁꊛ：ꉒꈌꈬꇬꉂꏣ(ꏃ)http://yi.yizuren.com/plus/view.php?aid=124
