ꂴꊛ：ꉒꈌꈬꇬꉂꏣ(ꃘ)http://yi.yizuren.com/plus/view.php?aid=123
ꏃ
ꀋꃉꆏꂴꆽꇯꆐꃚꋒꀊꂥꌠꇦꀨꅇꁊꇁꀠꂶꌠꆹꇬꊎꀊꅰꃅꏄꌦꀐ。
ꇦꀨꅇꁊꇁꀠꂶꌠꆹꄻꂚꄏꅳꀧꏢꁮꇬꄀꄉꂷꀋꉬꃅ，ꐒꎤꌊꂚꄏꉌꂵꇬꁍꄉꂷꉬꌠꌡ。“ꈌꊰꄯꒉ”ꁬꌠꆹꀱꒊꀱꇁꃅꌌꁊꇬꎷꐛꅹ，ꂚꄏꋌꉺꄜꌊꃀꅉꆐꊋꀋꑌꌗꍈꀉꄂꇫꅐꀐ。ꇦꀨꅇꁊꇁꀠꑞꁊꌠꄜꇐꆹꋌꋋꐝꀋꉅ，“ꉻꇉꀕꉻꇉꀕ”ꃅꂾꃚꀉꄂꇬꄉꈨꇁꇬꎷ，ꀋꇊꇬꉺꍯꇷꋍꀂꏽꇬꄉꀋꆏꃅꇽꅷꋍꉌꂵꇬꊐꌠꌡ。ꈊꃀꌊꈯꇄꌠꇬꉬꐛꅹ，“ꉻꇉꀕꉻꇉꀕ”ꄹꉺꍯꂾꃚꆹꇿꑌꈨꁧꉆꃅꎍ，ꂚꄏꉌꂵꂶꌠꋋꇅꃅꀥꇰꏿꐂꇀꌦꀐ，ꀋꇊꇬꋋꇅꃅꌗꇑꌦꇁꌠꌡ。ꀃꈈꃱꌬꊿꅿꃚꋒꇫꈌꐚꇁꇈꀃꈈꁬꌠꋋꇅꃅꁉꎼꇀꌦꀐ。
“ꉏꑴ，ꉂꇂꅉꌠꂚꄏꐋꀨꀋ，ꉆꐥꃅꁱ！”
ꋋꑠꆹꇯꍝꃅꉌꊈꇬꄉꊿꆼꍅꌠꉬ！ꑊꋌꌺꀋꉻꃢꌺꋋꂷꆹ，ꈍꃅꉈꑴꏡꁈꑠꏢꏂꎼꇀꌦꌠꉬ？ꄚ，ꋌꁳꊼꇅꀂꉗꌺꑠꍈꑌꉪꀋꆷꀐ，ꉺꍯꇷꌠꉻꇉꀕꄹꇽꅷꋍꀂꏽꄩꈴꒉꌦꀐ。
“ꉏꑴ，ꉂꇂꅉꌠꂚꄏꐋꀨꀋ，ꉆꐥꃅꁱ！ꆏꈍꃅꀋꁱꇆ？”
“ꉢꄯꒉꀋꊌ。”
“ꄯꒉꀋꊌꑲꆏ，ꅽꉌꂵꇬꄉꁱꇆ！ꁱꅽꉌꂵꇬꊐꄉꇆ！”
ꅇꉉꌐꄷꌦꆏ，ꉺꍯꂾꃚꆹꋍꏭꉜꄉꇀꌦꀐ。
“ꉐꑴ，ꂚꄏ，ꆏꊼꇅꉪꀕꀐ？”
“ꂚꄏ，ꆏꑞꐛꅹꇫꀋꉪꀋꈾꇆ？”
……
ꂚꄏꀅꌳꀅꌳꃅꋌꌋꎼꇁꀐ。ꋍꃢꇀꅉꀕꃅꋋꌋꆀꀃꈈꃱꌬꊿꑋꐮꏯꉉꄮꇬꅀꀃꈈꃱꌬꊿꅇꉉꅈꅱꄮꇬꆏ，ꃚꌼꃚꏈꈧꌠꊼꇅꀁꑌꇁꇬꎷ。ꉜꅊꇈꂿꆏꋓꉪꁨꄉꊋꃤꋌꇱꁷꐞꇫꎭꌠꉬꅊꇈ，ꃚꋒꀉꂥꌠꇦꀨꅇꁊꇁꀠꄇꍩꋋꋬꅿꄔꊋꑌꋌꇱꁷꐞꇫꎭꌠꉬꅊꇈ。ꑠꅹꋋꆹꀃꈈꉈꏭꊿꈧꌠꅉꀕꃅꋍꇬꅲꇁꇬꎷꑞꉂ，ꀉꁁꄷꀋꁧꊨꅇꀖꅇꑌꑽꀋꐥ。ꄚꑠꃅꑴꇬꌊꁁꇬꈴꁧꀐ，ꀃꈈꃱꌬꊿꑋꀉꁁꂷꆦꎼꇀꌦꀐ，ꀋꇊꇬꋋꆹꑡꑌꋌꉜꇬꑽꀋꐥꌠꁦꋠꐵꑷꑠꂷꌡ，ꀋꇊꇬꀀꑌꇴꁧꀐꌠꑌꌡ。ꃚꋒꀉꂥꌠꇦꀨꅇꁊꇁꀠꀱꋍꐛꅉꐛꃅꄇꍩꊋꃤꃑꇫꎍꌦꀐ，ꀉꁁꄷꀋꁧꉺꍯꇶꌠꑌꀋꆏꃅꀱꋍꀂꏾꇬꄉꂃꅷꐹꌦꀐ。
ꃱꐚꃯꀋꐚꃅ，ꂚꄏꆹꋋꇅꄷꀋꉻꃢꌺꉉꋺꌠꅇꂷꇫꌠꋌꎺꇀꌦ：“ꑾꑆꈚꐺꌠꆿꃀꆹꈍꄮꑌꊿꑝꌠ，ꆿꑆꈚꐺꌠꑾꆹꈍꃅꑌꊿꑝꇁꀋꇮꌠ！”ꋋꆹꌌꁈꌺꋋꂷ，ꑾꑆꈚꐺꅀꆿꑆꈚꐺꂷꉬꂯ？ꀒ，ꋌꉈꑴꅇꂷꀉꁁꇬꂯꊏꉢꁳꄉ！ꑡ“ꉠꅿꐰꇑꁏꌊꉠꅿꑊꋌꐛ!ꉠꅿꈐꉘꐈꌊꅩꏜꅪꀖꐛ！ꉠꅿꎔꌋꁏꌊꉠꅿꁮꐛꉠꐚꐙ!”ꊿꋋꂷꉢꇱꉜꆹꑽꀐꄸꌠꄜꅀ，ꋍꅿꂄꎔꉪꐨꉢꌌꌁꑣꑘꃅꄉꉜꀐꄸꌠꄜꅀ？ꀋꉬ，ꀋꉬ，ꉢꃶꀐꌠꉬꋭ，ꈍꃅꀕꆳꈹꉍꈄꇬꊐꂿꄷꌠꉬ，ꈍꃅꈑꆠꌌꄉꃆꉙꏦꀨꃢꂿꄷꌠꉬ，ꈍꃅꆿꃀꇬꊀꄅ、ꉘꁮꇬꏣꄀꆹꃅꉪꇁꌠꉬ，ꋋꆹꀋꉊꃀꁮꅉꀉꆹꐮꀉꆹꀐꑠꂷꌡ。ꀋꉊꃀꆈꌠꑮꆜꅪꎔꃭꇤꏂꑠꂷꐥ，ꋍꊨꏦꀃꅉꆹꅪꎔꋍꉎꀋꐥꃅꎔꃨꐛꅹ，ꀍꃈꀱꆽꃅꎔꌋꁏꐈꌊꊨꏦꁮꐚꑊꋌꐛꄉ，ꎼꐥꀨꐤꑭꀋꐥꃅꏣꒃꆹꅑꌦꇫꈴꁧꋺ。ꀊꄸꀈꏦꆹꈍꃅꐙꑵꌠꉬꂯ？ꋍꅿꎔꌋꆹꋍꎁꃅꈲꏣꑞꈨꏃꇁꀐꐙꐚ？“ꉠꅿꐰꇑꁏꌊꉠꅿꑊꋌꐛ！ꉠꅿꈐꉘꐈꌊꅩꏜꅪꀖꐛ！ꉠꅿꎔꌋꁏꌊꉠꅿꁮꐛꉠꐚꐙ!”ꃅꌠꆹꋌꉙꋌꑵꋺꀕꂯ？ꋌꉙꋌꑵꋺꌠꑌꌡ，ꋌꇫꉙꇬꑵꀋꋺꌠꑌꌡ。ꉢꋍꏭꆼꍅꋺꀕ？ꀋꋻ。ꀋꋻ。ꀋꉬ，ꉢꈱꋋꊏꋺ。
ꃶꇌꂿꇌꃅ，ꂚꄏꆹ“ꄇꍩꍉꃚ”ꋌꋋꀋꎺꀐ。ꌨꏾꇓꏾꊰꃅꊰꇫꈴꁧꀐꌠꋌꃀꐥꐨꐥꄷꃆꂮꈧꌠꆹ，ꀅꌳꌺꃅꀱꇁꄏꄹꐂꌠꋍꉌꂵꇬꃹꇀꌦꀐ。ꃅꉒꇬꃅꄂꋍꌅꃅꆳꇱꁏꌊꐺꌠꌡ，ꋍꅿꎺꏣꋌꇱꇳꍝꐞꃅꐝꍚꀕꃅꄉꇁ……
ꉪꇁꇬꀋꑟꌠꌤꋋꑵꆹꃅꇴꌠꌟꃅꀋꌋꀋꏢꃅꇁꑵꉬꅊꇈ，ꄷꀋꁧꃄꄟꑌꋍꉎꀋꐥꃅꇣꋲ：ꋋꆹꋍꅿꉌꂵꈍꒈꒊꌠꇱꇷꑑꃹꏾꁵꀕꇫꎍ！
ꋋꆹꉎꏯꅇꇰꄯꒉꊪꇇꈐꇬꊐꄉꀐ，ꉎꎀꍹꇬꆹꋋꂷꃅꄷꄉꄀꌊꂽꇬꄉꌤꃅꁧꄷ。ꋍꈓꂷꅑꅷꇁꌠꆏ，ꀱꑤꇬꄉꃀꈿꁧꇄꌠꇬꀉꄂꑲꆏ，ꋋꆹꅉꀕꃅꆿꃀꁡꇤꐥꁧꇬꎷ。ꀅꌳꌺꃅꈴꐺꌠꆺꃮꒊꃀ，ꁦꈌꁧꇇꇬꈾꏪ，ꁡꇤꈭꇌꉧꑳꀕꌠꁦꌺ，ꃅꆳꁏꇫꃹꒉꀋꄐꌠꌩꏪꇆꆉꑠꉬꇮꃹꅼꐯꃹꅼꃅꇁꋍꅿꎺꏣꇬꀀꎍꌐ。ꉇꑴꆏꀊꄶꊷꆣꀕꌠꇤꈏ，ꏡꂿꀕꌠꃱꏢꒉꌋꆀꈎꇁꃅꈭꏝꃅꊽꇨꇅꃃꇈꊽꉌꇫꊂꁠꌠꃅꉒ，ꁦꂰꄉꄮꇬꆏ，ꋋꆹꇯꍝꃅꇫꐞꁧꀋꏾꀐ。ꋋꆹꂴꇯꆐꂽꇬꄉꁆꌊꀁꉘꌺꍈꀉꄂꀏꏯꄉꉹꁌꌅꈌꐥꌠꇝꂱꌤꃅꈽꇁꌠ，ꈍꄮꇬꑌꄀꌊꉈꀱꁧꉆꌠꉬ，ꄚꈎꁂꂷꂴꆽꂾꑤꇬꄉꃀꈿꆹꑠꃢꆏ，ꄧꀕꃅꍏꇬꌟꒉꂷꌋꆀꇁꐮꊝꄉꌧꈿꈭꐨꆏ，ꌟꒉꂶꌠꆹꋍꏭꀊꉗꏢꃅꉌꂵꑘꒃꃅꄉꃅꄷꌤꃅꄷꄐꌐꎼꇁ。ꀱꇁꆿꃀꁡꇤꑟꈭꐨꆏ，ꋌꆹꆈꌠꉙꌶꌠꏣꀋꑌꐨꀉꒉꃅꉀꐕꁦꎆꀐ，ꄚꄉꌤꃅꄐꇬꇥꀯꈧꌠꆹꉬꇮꃅꇣꋲꀐꃅꉪꌐ。ꄚꀃꑍꋋꇅꃅꄀꀱꌊꂽꇬꌤꃅꁦꌦ，ꄷꀋꁧꁸꌊꌤꑟꑵꌠꃅꌠꂯꅉꀋꐚ，ꀋꃋꋋꇅꇬꆹꋍꐥꍂꃅꆿꃀꁡꇤꐥꌠꊂꄽꂫꊙꌠꇬꃅꑍꃅꉖꉬꇬꑌꊿꋋꐝꀋꉅꀐꌠꉬ。
ꋋꆹꌶꌺꄺꑌꃅꄉꇥꀯꐛꂷꉬ，ꁌꄝꌉꈿꇬꂾꇯꂽꄻꄉꌉꈿꄔꅪꇬꄜꎟꋺ，ꐥꌠꌦꌠꐮꐞꌠꀉꑌꃅꊌꂿꋺꑴꇬ，ꄚꌶꌺꐛꐨꐛꊀꈧꌠꆹꐴꀕꇬꄉꍠꇫꎭꀋꌐꑴꌦꐛꅹ，ꊾꂿꇬꑊꏦꅑ，ꃅꈋꋒꀋꌧꅈꒉꇬꋌꎼꑍꀕꌕꑍꈐꆏꉌꂵꁏꇬꎷꑟꃅ。ꋑꌥꈭꐨꆏ，ꊿꈀꄸꂷꋍꑊꈍꃅꉪꐪꐮꀋꊒꄿꂿ，ꃅꄷꀊꋨꈚꈍꃅꀉꁘꊁꊰꄉꎺꄀꈨꄀꈻꇐꋍꍈꂯꀋꐥꄿꂿ，ꋍꅿꉂꏣꉂꑟꆹꃅꑍꃅꉖꐊꄉꀊꅰꃅꈛꑌꇁꇬꎷ，ꋋꁧꂯꌠꃅꑍꃅꉖꆹꀊꅰꃅꀁꑌꀂꎴꇁꄮꇬꆏ，ꋍꅿꉂꏣꉂꑟꆹꀊꅰꃅꃆꄔꌟꃅꐞꁖꇁꇬꎷꄉ，ꋋꆹꃆꄔꇱꃪꇭꀧꇖꌋꃅꐮꑘꀋꒃ，ꄷꀋꁧꋙꋠꒉꅝꀋꏾ，ꀀꑌꇴꀋꏾꇬꎷ。
ꋋꆹꉈꋍꃢꑠꃅꐙꌠꊜꌦꀐ，ꉌꂵꈐꏭꐛꀋꌒꋌꋋꉉꅐꇁꀋꇮꃅꎌ。ꆿꃀꁡꇤꌋꆀꐮꐞꂾ，ꋋꆹꌤꆿꋌꃅꋭꌠꉬꇮꋌꀞꐝꉅꄉꌐꀐ。ꋋꇅꃅꀊꄶꆺꃮꒊꃀꏢꁮꇬꀀꌠꂸꈁꆿꎰꂶꌠꊼꇅꉜꁧꏾꇁ。ꋋꆹꂚꄏꌋꆀꐮꌠꃅꎬꈐꄷꌠꁦꋠꂷ。ꂚꄏꆹꀊꄶꏃꃅꆈꋧꋪꅈꇬꄉꀥꅷꁌꄝꀐꌠꃄꁕꇬꃹꄮꇬ，ꀋꉻꇈꐂꌺꄰꏦꑳꆈꋧꋪꅉꇬꄉꁈꇁꌠꂸꈁꆿꎰꆹꃹꅉꎷꀋꊌꃅꑓꋪꂭꌊꁧꇬꎷ，ꄽꂫꆏꊰꇁꊿꀋꋦꃮꀋꀆꌠꇉꅼꇴꌅꀕꑠꈚꇬꊐ。ꉹꁌꌅꈌꐥꌠꇝꂱꌤꃅꄐꇁꆿꃀꁡꇤꑟꈭꐨꆏ，ꅉꀕꃅꉹꁌꌌꌧꇬꀊꄶꈛꑌꅈꇬꇈꊿꃪꊿꑠꂷꇫꐥꄷꅷꇁꇬꎷ。ꊁꇁꉚꅷꌤꃅꌐꄮꇬꆏ，ꀉꐯꈭꃅꇤꄉꋍꃢꎹꈹꇈ。ꄽꂫꎹꊌꇬꆏꋋꆹꃄꐎꊰꈎꅇꀋꈨꆘꅝꀐꌠꂸꈁꆿꎰꂶꌠꉬꅊꇈ。ꋍꇭꀧꋋꂷꃅꑐꀉꅪꇈꀁꃚꌺꃅꑠꑵꅿꈴꌐ，ꅇꂷꂯꉉꀋꇮꇁꄉꏽꀐ。ꄚꋌꊋꀉꒉꐨꆹꊿꇬꏡꌠꐜꀋꈨ，ꀋꉻꇈꐂꌺꄰꀀꑳꁦꎆꈧꌠꎴꏡꄮꇬꆏ，ꋋꑌꐂꄚꐊꁧꐛꅹ，ꋋꇅꃅꀋꉊꂴꋌꊿꇱꈢꇬꊎꄉꅈ，ꏦꑳꆈꋧꋪꂶꌠꌌꑿꉻꂷꋉꄉꀐꅊꇈꌠꋌꊌꂿꇬꆏ，ꁰꇬꑌꀋꐭꌗꇬꑌꀋꏂꃅꑿꉻꇬꇦꏦꏡꌠꋌꈻꇫꎭ，ꑿꉻꂶꌠꐡꇫꈴꁧ。ꋋꆹꇉꅼꇴꌅꀕꅈꇫꐥꋺꄉ，ꀇꐒꀋꐥꅈꆏꋌꇬꀀꀋꅲ。ꑠꅹꆺꃮꒊꃀꏢꁮꇬꄉꀻꑳꂷꋉꇬꏀꄉꌠꉬ。ꉈꃅꇁꂸꈁꆿꎰꇬꂾꐞꆹꌠꂚꄏꋍꑊꐮꊌꀋꂿꃅꁧ，ꇫꄉꈨꇁꇬꋌꌧꂓꇆꆉꏪꇬꌩꏓꁧꀐꄷ。ꆺꃮꒊꃀꏢꁮꄉꌧꂓꇆꆉꏪꇬꆹꇬ，ꈝꃀꉈꑴꀊꎴꑠꐕꈴꑴꌦ。ꈝꃀꈢꊼꇅꏦꏪꃅꐙꌠꐦꀞꂷꐛ，ꋋꆹꆿꃀꁡꇤꌠꏀꂱꀘꊈꌉꃆꌉꂮꅥꋑꌠꁰꍋꅉꀋꉬꀋꉆꑠꈚꉬ。ꂚꄏꊝꋽꃅꄚꌠꏀꂱꀘꊈꌉꃆꌉꂮꅥꋑꌠꁰꍋꃆꂮꉜꏾꐛꅹ，ꈛꎂꃅꊙꎿꄉꆺꃮꒊꃀꄩꐂ，ꑶꇽꁡꇤꈴ，ꑭꁘꀅꌳꌺꃅꐕꌊꂴꆽꉜꄉꒉꀐ。
ꀃꑍꆹꄩꆹꃅꊸꃅꑄꄂꀋꅑꑠꋍꑍ，ꀏꆹꆀꆳꈧꌠꆺꃮꒊꃀꈴꁧꅉꃅꍜꇬꉜꄉꁏꅷꐺ，ꉒꈌꊱꆺꀕꌠꃅꉒꈧꌠꋌꁏꌊꐪꀋꂿꁖꀋꂿꇫꎭꌐ。ꀱꁮꐚꀉꁁꏮꁧꂯꌠꉘꁮꂶꌠꋋꇅꃅꁧꀋꏾꏭꁮꇁꀊꄶꆿꃀꁡꇤꇬꌸꎌ。ꈬꉘꃅꄷꑋꈌꂶꌠꆹꇁꑎꇨꐛꅹ，ꌧꃰꈧꌠꀋꃋꋋꇅꇬꑲꆀꃨꌐ，ꁌꄝꄉꀐꌠꊖꆈꋌꏬꋌꇱꁨꌊꀊꅰꃅꎔꃨꇈꅿꉘꌒꐨꀕꇫꎍ。ꏦꏪꊼꇅꀄꊭꑠꍈꈳꅐꇬꑲꆀꌉꃆꌉꂮꅥꋑꌠꁰꍋꅉꈚꌠꉬꀐ。ꏦꏪꇬꅘꁧꈧꌠꃴꍗꃴꆧꁏꇫꎍꌐ，ꉜꉚꋯꀋꐛꌠꈇꇉꀊꃴꑠꋍꋐꌟꃅꄻꀊꄶꏦꏪꇬꄉꈈꅷꁰꍋꅈꇬꑟ。
ꇁꌊꁰꍋꅉꏢꁮꑟꇬꆏ，ꂚꄏꆹꊿꇱꇊꇯꏢꀕꃅꁨꆹꀋꉆꃅꎌꀐ。
ꀃꑍꄚꇬꄉꌉꃆꌉꂮꅥꋑꌠꁰꍋꌠꆹꌋꅪꂱꀘꁥꌠꀉꄂꉬꅊꇈ。ꋀꊇꆹꇿꇬꄉꋀꅉꐚꌠꉬꀋꐚ，ꂚꄏꂶꌠꄀꌊꁧꂯꃅꇫꆏ，ꈀꄸꑌꒌꀋꐊꆠꀋꐊꀐꌠꌡꃅꎍꌐ。ꀃꌋꀉꆩꅑꅷꀃꑍꋋꄮꑟꇁꇬ，ꉪꆈꌠꋋꁯꆹꉂꏣꉂꑟꁌꒉꄣꅼꑠꋍꁯ，ꌤꃅꄐꇬꇥꀯꌋꆀꑘꃅꑠꉼꍗꑮꃴꄿꏁꍅꈧꌠꀉꄂꑲꆏ，ꂚꄏꆹꄀꌊꀉꁁꌤꃅꁧꌠꃆꂮꆹꉉꀉꁁꈀꄸꂷꑌꀋꇰꑴꌦꌠ。ꑶꇽꁡꇤꀉꁁꀊꋨꈨꇬ，ꐛꐪꊽꐬꆠꊿꈔꅲꀱꍠꃅꑠꅐꋺ。ꉹꁌꇫꉂꅉꁌꒉꄣꅼꌠꌤꃅꄐꍈꄀꌊꁧꀐꄷꈨꇬꆏ，ꌺꃰꌋꅪꃀꌠꀉꑳꑠꉬꇮꃅꄓꌊꊨꏦꀁꇬꇚꄉꌠꀻꈧꌠꇔꄸꀳꄉ，ꇂꁮꂿꇌꑠꏣꄀꌊ“ꇭꍣꄈ”ꋋꂷꐊꀀꇙꑌꇙꀠꐷꁧꌠꉬꄸꌤꑠꅐꋺ。ꑠꅹꂚꄏꆹꉪꇊꉪꀱꃅ，ꉪꀱꆏꌧꋬꃅꌤꃆꋌꐘꋌꂁꉌꃀꄷꈐꇬꊐꄉꌠꉬ。ꋋꆹꋍꇬꋍꇬꃅꋍꇬꀋꊰꋹꃅꉉꋋꅲꐺꌠꆈꌠꑮꆜꁥꌠꇰꅷꐺ：
“ꌤꑠꀋꐥ，ꌤꑠꀋꐥ。ꄐꌐꁰꍋꌊꃪꃅꄉ，ꋍꁮꆩꐛꈭꐨꆏ，ꉡꑌꅳꍩꄌꌊꆍꐊꄉꅥꋑꌉꋓꇁꂾ。”
ꂚꄏꆹꀊꅰꃅꆈꌠꑮꆜꁥꌠꁳꋍꈱꅇꑇꎼꂿꄷꐛꅹ，ꋋꆹꀊꅰꃅꈱꆈꌠꑮꆜꁥꌠꊎꌦꀐ：“ꆍꊇꑘꃅꑠꉼꍗꑮꃴꄿꏁꍅꅇꂷꅲꀋꋻꑴꌦꅀ？ꋋꆹꆈꌠꅪꎔꃭꇤꏂꌠꑮꆜꂷꈴꌊꉢꁳꄉ，ꉠꏯꐥꋊꐥꍂꃅꆿꃀꁡꇤꀋꃋꌐꃶꄻꌠꉬꄸ。ꉢꈍꃅꁧꉆꂯꆏ，ꉡꆹꆿꃀꁡꇤꄉꑲꋦꇣꄂꌺꉘꇖꉘꂯ，ꐥꍂꃅꆿꃀꁡꇤꀀꀐꌠꇆ。”
ꃴꄿꏁꍅꆹꑍꃀꑍꊂꇯꍝꃅꑠꃅꉉꋺꐛꅹ，ꑮꆜꁥꌠꆹꉌꋬꈯꐛꉌꂵꎌꅉꎍꀐ，ꅳꍩꆽꏀꆼꁠꏦꄉꉖꀕꉎꀕꄹꒈꅉꏈꅉꃅꁧꌐꀐ。ꊯꈬꈎꀐꌠꀾꍈꀊꄸꀈꏦꂶꌠꆹꊂꄽꂫꇬꐊꐺ。ꋍꅳꀧꀊꋨꑍꁆꆹ，ꇯꍝꃅꋍꑓꋪꋑꌠꌟꃅꌇꄧꄉꀉꍆꅳꀧꌡꐛꅺ，ꂚꄏꉉꌠꆹꉬꇮꃅꋋꅲꋍꅳꀧꈐꏭꊐꄉꌐꀐ。
“ꇅꂚ，ꆏꉉꌠꆹꇯꍝꃅꅇꉬꄜꅀ？”
ꋋꆹꉇꉈꃅꑮꆜꁥꌠꌋꆀꇢꅉꀊꎴꃅꇢꄉ，ꆼꁠꇬꅳꍩꋫꌠꋌꇔꇇꇬꊐꌊꐺ。
“ꇯꍝꅇꉬꑴꇆ。ꈀꄸꂷꉉꇬꉢꂶꌠꄀꌊꁧꄷ？ꉡꆹꀑꆈꋍꍂ、ꀑꐎꑍꍂꃅꆿꃀꁡꇤꐥꅷꃀꌠꌦꀐꌠꀋꂸ。”
“ꉢꅽꏯꋋꈨꅲꌠꀋꉬꇊ。ꐪꆮꆹꐥꍂꃅꉼꉹꉙꅲꀋꇮꌠ，ꆎꆹꇯꍝꃅꆿꃀꁡꇤꌋꆀꐯꀋꐞꀐꌠꅀ？”
“ꇯꍝꃅ、ꇯꍝꃅꆿꃀꁡꇤꐥꀐꌠ……”
ꋋꇅꃅ，ꂚꄏꆹꅇꋌꆏꄉꀐ。ꋋꆹꀊꄸꀈꏦꅿꇣꋲꌠꑓꋪꀊꋨꋒꈐꏭꄉ，ꋋꉉꌠ“ꀑꆈꋍꍂ、ꀑꐎꑍꍂ”ꃅꌠꆹꑞꄜꌠꋌꅲꐝꉅꀐ，ꋋꆹꀊꄸꀈꏦꉘꇉꌠ“ꋍꐥꍂ”ꌤꑘꑍꐘꌠꉬꅊꇈ。ꋋꆹꉌꂵꎌꅉꀋꎍꃅꑘꀋꒃꌊ，ꇨꊸꑓꊸꌊꄉꅇꂷꀉꁁꑞꀕꌌꀊꄸꀈꏦꏭꉉꅷꐺꀋꐚꀐ。
“ꇯꍝꃅꄜꅀ？ꆏꇯꍝꃅꆿꃀꁡꇤꄉꑲꋦꇤꄂꀑꄷꌠꄜꅀ？”
ꑮꆜꑠꂷ，ꑓꋪꑓꊒꀕꃅꌤꋌꑠꅲꌠꆹ，ꋌꌕꊰꈎꂯꄉꀐꌠꀑꇬꈝꃀꇬꉘꃀꃢꌠꉬ。ꋌꉪꇊꀱꇊꃅꊨꏦꀃꅉꀋꃋꉆꌠꉆꈉꂶꌠꉪꇬꆏ，ꋌꇱꉪꌊꋋꆹꈬꉘꃅꄷꑮꆜꀉꎂꀕꃅꑠꂷꃅꄉ。ꋍꃅꉪꇬꆏ，ꊨꏦꀃꅉꑌꀊꅰꃅꑊꃛꑊꌎꑊꏦꎲꄏꃅꀋꐛꀐ。
“ꇯꍝꃅꄜꅀ？ꆏꉉꌠꇯꍝꃅꄜꅀ？”
ꋍꑊꑠꃅꈛꑌꇬ，ꋋꆹꇫꇬꃅꀋꃋꑮꆜꂷꉌꂵꐁꃚꋌꈨꀐ。ꋍꈯꋋꀋꌅꃅꉌꊢꑓꊢꃅꋌꏮꇫꋍꇅꉜ。ꋍꅿꆈꏸꀕꌠꀍꑐ、ꆗꁍꀕꌠꑓꊏꑓꂡ、ꉺꋽꌠꂱꀯꌋꆀꌧꅪꀉꅪꒉꁖꇁꄉꏽꂷꌡꌠꈁꑓꑠ，ꉬꇮꃅꊰꇁꋍꑓꋪꇬꊐꌐ，ꊰꇁꋍꅿꈥꇤꀕꌠꉌꃀꄸꈐꇬꊐꌐ。ꋋꆹꈀꄸꂷꌡ？ꋌꀱꒊꀱꇁꃅꊨꏦꎺꏣꇬꄉꎹꈹꌥꉩꅷꐺꌦꀐ。ꋋꇅꃅꉪꅐꇁꀋꄐ，ꋌꏮꉈꑴꋍꃢꇬꉚꌦ，ꋍꈁꑓꇬꀋꃉꌌꌟꃅꒈꌦꀕꌠꐜꀋꈨꀐ，ꑊꏦꈭꐨꏸꏦꑠꑵꑌꇫꅐꇀꌦ，ꄚꋋꇅꃅꉈꑴꇐꑌꌋꉆꌠꐛꐪꐛꊀꑠꈨꇱꎃꊐꇫꎭꌦꀐ。ꈁꑓꐛꄟꐛꐈꌠꆹ，ꁮꏮꈞꆈꃹꒉꌠꌡ，ꑴꁱꈀꋽꀕꑠꁬꑌꌡ，ꀊꄶꋍꂴꆽꌧꂓꇆꆉꏪꇬꌧꃰꃧꃨꑌꌡ，ꀋꃋꑮꆜꂱꑱꐋꀋꌡꃅꊽꉌꐡꊽꉌꂵꐂꌠꐛꐪꋌꇱꄜꑣꎼꇁꌐ。ꂚꄏꆹꂴꋌꃀꋍꈓꌠꇬ，ꀊꄸꀈꏦꌋꆀꈍꑋꃢꃅꐮꋒꈌꐮꂪꋺꀋꐚꀐꑴꇬ,ꄚꑞꒉꄷꉬꀋꐚ，ꋋꆹꌤꌧꃪꃭꃅꋍꑍꏮꀊꄸꀈꏦꇬꉜꀋꋺꑴꌦ。ꀊꑴ！ꐥꇐꄺꂡꌠꌦꌺꌊꌺꋋꂷꑌꑞꃅꋍꃅꀕꇏꂄꇁꌠꉬꐙꐚ，ꄚꁧꐙꃅꈋꋌꈚꇬꈥꇤꀕ，ꃰꊿꐥꐨꐤꊋꇨꀐꌠꎭꃅꉈꌠꉬꋭ，ꑠꅹꍑꂷꌡꌠꑮꆜꑠꂷꋋꇱꌞꎭꎼꄚꁧꐙꃅꈋꋋꂷꇫꐥꄉꇁꌠꆏ……
“ꀃꂰꈊꃀ，ꉡꆹꀊꄶꅼꁉꌧꂓꀊꋨꁧꇂꃴꄉꆎꇁꉚꄉꌠꉬ！”
ꁧꐙꃅꈋꋌꈚꇬꆈꌠꑮꆜꉂꐪꉂꐛꄜꎭꌠꏡꁈꑌ，ꃀꅉꆐꁦꀑꌋꆀꇉꅼꌟꃅꅩꀧꍓ，ꇯꍝꃅꂚꄏꋌꎼꑭꇇꎌꅉꀋꎍꅑꅉꀋꅑꌠꌡ。ꌤꃆꑡꃅꑠꃅꇁꐳꇨꌠꉬ？ꂚꄏꋋꎼꋍꇅꇯꊭꄏꊌꀋꃅꇫꎍ。ꉂꑟꀕꏣꏡꌠꈍꄮꇬꄉꇫꇬꃅꈷꂿꆹꌠꉬ？ꂚꄏꋌꎼꉌꂵꊼꇅꎌꅉꀋꎍꃅꑘꀋꒃꇁꀐ。
“ꆏꊌꂾꀕꀐ？ꉡꆹꀊꄶꅼꁉꌧꂓꀉꒉꇆꀉꒉꀊꋨꁧꇂꃴꄉꆎꇁꉚꄉꆹꂿ。ꀊꑴ，ꆏꉆꐥꃅꉜꇆ，ꀊꄶꅼꁉꃮꌧꂓꁧꌋꆀꐯꊩꎍꌠꌧꂓꀉꒉꀊꋨꁧꄜ！”
ꀊꄶꁬꏪꆈꊉꀕꌠꌉꃆꌉꂮꅥꋑꌠꁰꍋꅉꂶꌠꈳꅐꇈꐂꁧꀮꑠꍈꇬꑟꇬꆏ，ꇴꋩꀕꌠꃪꏦꑠꂷꇬꐙ，ꉜꅊꇈꂿꆏꌧꂓꀉꒉꑠꁧꑌꒊꌋꅍꇫꋦꅊꇈ。ꄚꇬ“ꄙꈎꋦꀑꌠꄮꁧꌋꆀꉐꈎꋦꀑꌠꌿꁧꑠꆹ，ꌧꂓꇇꀕꑠꇬꀋꒊ！”ꇣꋲꌠꃄꀑꃅꌗꇎꏦꐛꅹꃅ，ꄚꇬꆹꌧꂓꋦꅿꆈꊉꀕꌐ，ꄚꇬꋦꌠꌧꂓꋋꈨꆹꇷꄙꊋꌭ，ꃨꁯꈷꂷꐋꀋꌡꐛꅹ，ꊿꇱꉜꌊꁌꇐꈤꌠꌩꑵꃅꄉꌠꉬ。ꑠꅹ，ꃰꊿꑍꂷꐰꇑꐮꇴꄉꐮꉂꐮꑟꇁꌠꆹꃀꅉꆐꀊꅰꃅꁌꇐꈤꂿꇐꏽ。ꂚꄏꆹꇨꊸꌊꇫꃶꇫꋩꐺꌠꀉꄂꀋꉬꃅ，ꉈꑴꊼꇅꇰꌠꌟꃅꎍꀐ。ꉂꏣꉂꑟꌤꃆꑞꃅꑠꃅꇁꐳꇨꌠꉬ？ꀋꃉꌌꋍꇬꉌꌤꑓꀖꌠꌤꃆꐘꌠꇁꋍꉌꂵꇬꇑꌦꀐ。
“ꀃꂰꈊꃀ，ꉡꆹꀊꄶꅼꁉꌧꂓꀊꋨꁧꇂꃴꄉꆎꇁꉚꄉꂿ，ꆏꆹꇀꇁꀋ？”
ꐷꈭꑾꎭꀊꐎꈨꁻꇫꄉꌠꌡꌠꃅꃴꇬꃅꄂꈧꌠꆹ，ꀋꆏꃅꀕꑆꇬꄉꈩꀜꇙꈩꄹꀥꅷꐺꇬꎷ。ꆀꆳꆹꀊꄸꀈꏦꇬꇤꅷꐺꌠꃚꋒꈧꌠꋌꌞꎭꌊꈜꎴꐯꈜꎴꃅꁧꀐ。ꌧꂓꏪꇬꄉꊾꂷꐂꇬꁖꇁ，ꋋꆹꇁꌊꀊꄶꅼꁉꌧꂓꀉꒉꀊꋨꁧꇂꃴꉆꎍ，ꏮꂚꄏꌋꆀꀊꄸꀈꏦꑋꉆꅉꇬꊼꇅꉜꇈ，ꈀꄸꉬꌠꋌꌧꈭꐨꆏ，ꆼꁠꊼꇅꆗꇈ，ꌩꃣꌠꋌꍞꆼꁠꇫꏦꄉ，ꄔꉈꏢꁻꎼꁧꌠꀋꏮꇬꐱꁧꀐ。
“ꀃꂰꈊꃀ，ꉢꆎꇁꉚꄉꂿ，ꆏꆹꇀꇁꀋ？”
ꄔꉈꏢꁻꎼꁧꌠꀋꏮꇬꐱꁧꌠꊿꀊꋨꂷꆹ，ꄧꀕꃅꂚꄏꇬꉚꁧꂿꄷꌠꂸꈁꆿꎰꂶꌠꉬꅊꇈ。ꋍꈁꑓꂶꌠꇬꆹꇵꂷꇇꃀꀂꏾꒊꃅꊰꇁ，ꈁꑓꂶꌠꆈꏸꅍꎍꇈꀊꃏꐯꀊꃏ，ꃢꈜꀋꈚꐛꅹ，ꇭꀧꇬꑐꈧꌠꆴꀋꌐꑴꌦꅊꇈ，ꁯꋒꉘꁮꑭꇂꃴꄉꇬꆏ，ꑐꈧꌠꏂꍅꅍꊽꑓꐛꈌꐛꇫꎍ。ꂚꄏꆹꋌꇅꃅꎺꐚꇁꀐ，ꀋꉊꃄꅉꁷꄮꇬ，ꋌꆼꁱꀊꄸꀈꏦꇬꎑꎍꋺ，ꀀꃄꅉꁸꀊꄸꀈꏦꃤꇬꄀꄉꑲꆀꍑꄷꄉ，ꀈꏦꇱꌌꈌꊨꃅꊨꋺ。ꉪꅷꋌꍈꄀꇬꆏ，ꌤꃆꆹꐛꐈꌊꀊꅰꃅꊋꋠꇀꌦꀐ。ꂸꈁꆿꎰꆹꀊꅰꇁꀊꅰꈛꑌꇁ，ꀊꄸꀈꏦꆹꀋꆏꃅꂚꄏꇬꅲꀥꏿꇬꎷ，ꐛꐪꋋꈨꆹꏮꇫꎭꂿꄷꐛꅹꃅ，ꂚꄏꏮꀊꄸꀈꏦꉜꄉꊼꇅꒉꇈ，ꀱꂸꈁꆿꎰꋨꏦꁧꀐ。
ꀱꇁꑶꇽꁡꇤꇬꑞꄮꇬꑲꆀ，ꂚꄏꆹꉌꆐꅑꌦꄉꏽꃅꎍ：ꆀꃅꆸꈈꆈꌠꏦꃤꃅꄉꇬꆹ，ꋋꏮꀊꄸꀈꏦꉜꄉꒉꌠꆹꀃꂰꄡꄉꌠꉌꃹꑓꐛꀐꄸꌠꄜꌠꉬꅊꇈ。
ꆈꌠꑮꆜꂷꃅꄉꇬꑌ，ꅇꏤꌋꆀꄡꄉꁧꐮꃅꑠꆹꀉꑳꌕꈎꈧꌠꈩꅍꀜꅍꑵꌠꀋꉬꌠ。ꋍꑊꊨꏦꌧꅍꂿꅍꌋꆀꐥꐨꋻꅑꁁꏯꈍꒈꃅꐮꄩꍣꑠꆹ，ꂚꄏꀋꃋꆸꈐꇬꉨꇫꈾꀋꋺꑴꌦ。ꌤꃆꆹꈍꃅꄉꅐꇁꌠꉬꂯꆏ？ꋌꃀꋍꑊꐯꈌꋒꋺꌠꎺꇊꐝꄧꀕꃅꇁꋍꉌꃀꎺꏣꇬꃹꇁ。ꌤꃅꄐꑤꇬꄉꅐꇁꈭꐨꆏ，ꈝꃀꆏꈉꉏꎖꂷꐥꌠꁸꌊꑍꀕꃅꈴ。ꀊꋨꄹꉇ，ꇁꌊꌧꂓꇆꆉꏪꇬꈴꇁꄮꇬꆏ，ꋋꇅꃅꀕꉒꃴꌙꈈꀕꇫꎍ，ꃅꉒꀊꅰꃴꀊꅰꀊꄖꇁꐛꅹ，ꋀꊇꆹꇁꌊꃰꃅꀀꅉꈝꃀꉙꆹꃀꀋꌧꑠꏡꇬꃹꁧꌠꌡꇫꎍ。ꁸꄉꈜꎷꄮꇬꆏ，ꉌꂵꊭꑌꄏꑌꌠꆈꌠꌤꃅꄐꑼꑠꂷꆏ，ꋋꇅꃅꌧꂓꈍꑋꁧꇬꄉꅅꃅꇱꐡꄉꇈꌠꌩꐡꈌꀊꏀꑠꈨꋌꊌꂿꅜꄉ，ꋍꉌꂵꋋꇅꃅꏷꌬꀕ，ꋋꇅꃅꄚꌩꐡꈌꀊꏀꋋꈨꊂꈹꄉꎹꅷꒉꇬꆏ，ꀋꋓꀋꉪꃅꌧꂓꇆꆉꏪꋋꏬꇬꈳꅐꄉ，ꇁꌊꌩꏪꏢꁮꇬꌧꂓꀉꒉꑠꁧꇂꃴꑟꇁꀐꅊꇈ。ꄚꌩꐡꈌꀊꏀꋋꈨꅿꄐꌐꌠꇂꃴꄉ，ꌤꃅꊿꁥꌠꉬꇮꃅꇁꌊꌧꂓꀉꒉꋋꁧꇂꃴꄉꐮꏒꌐ。ꊂꄽꂫꑲꆀꇫꑟꇁꌠꆏ，ꌩꐠꈌꋋꈨꐡꄉꇈꌠꀊꄸꀈꏦꏤꂛꊨꅫꃀꑌꉬꅊꇈ。ꇁꌊꁡꇤꇬꃹꈭꐨꆏ，ꂛꊨꅫꃀꑋꆹꐚꌌꁈꆿꈌꇬꄉꆶꇁꌠꎁꃅꉪ，ꉈꑴꀁꇬꂷꑌꁦꅉꀋꊌꐛꅹ，ꋍꑊꁴꊏꌤꃅꄐꇫꐥꄉꇈꎼꌠꉬ。ꀊꄸꀈꏦꁳꌤꆿꍈꃅꎻ，ꃶꐚꃅꄉꉉꇬꆹꌌꆿꃀꁡꇤꂴꉘꃀꁥꌠꇥꀯꃅꄉꉘꉚꐺꀐꌠꉬ。ꑮꆜꋋꂷꆹꇯꍝꃅꀑꁮꅺꐳꑠꂷꉬ，ꋋꇅꃅꉌꈲꉙꌋꆀꆈꌠꁱꂷꑠꋌꌶꇇꈐꊐꀐ。ꌤꃅꄐꌤꆿꃆꂮꎥꃪꄮꈊꃀꆏ，ꋋꆹꅉꀕꃅꇤꈏꇢꇑꏢꁮꑌꄉ，ꉌꊫꑋꃅꋍꁁꏯꆏꃱꏢꒉꏬ，ꋍꁁꏯꆏꇤꋲꇈꊽꉌꑟꈻꌠꑓꋪꋑꌠꁉꄉꌙꈈꀕꃅꌤꃅꄐꌤꆿꃆꂮꎥꃪꌠꅲꇬꎷ。ꋍꅿꑓꊏꑓꂡꆗꁍꀕꌠꆹ，ꃆꄔꁨꑭꏢꁮꄉꇬꆏ，ꀊꅰꃅꆈꏸꀕꇈꏷꌬꀕꐛꅹ，ꋍꈁꑓꋋꂷꃅꈀꄸꑌꁬꏶꇬꊼꇅꄀꏾꃅꎍꄉꊿꋌꎻꀄꂼꂻꌠꌡꃅꎍꇬꎷ。
ꄚꑠꃅꑴꇬ，ꂚꄏꆹꐥꍂꃅꋍꑍꑌꏮꋍꇬꉜꀋꋻꑴꌦ。ꋋꆹꌤꃅꄐꇬꏲꌋꀋꉬꀋꉆꂷ，ꃣꁧꀉꇖꇨ。ꉇꆏꊰꈎꂾꇯꆐꂱꑱꃅꈋꐞꄉ，ꌉꈿꁻꏤꈝꃀꇬꍬꄉꀥꇬꎷ，ꍏꇩꋋꂷꀉꒉꈮꁁꌠꂯꋋꈴꋻꀐ，ꄚꈍꄮꑋꀱꒊꀱꇁꃅꉌꌦꑓꉘꋠꃅꌉꈿꇬꎷꐛꅹ，ꋌꈨꋌꂾꌠꆹ，ꄇꍩꂾꃚꀋꉬꑲꆏ，ꊾꌦꑘꄃꐛ、ꊿꂿꇓꁨꐛꌠꀉꄂꉬꌐ；ꁬꃨꌟꃅꎔꃨꌠꉂꐪꉂꏣꆹ，ꉌꂵꂶꌠꇯꆐꑠꉪꑠꈽꀋꆷꃅꎍꇬꎷ。ꄚꑠꃅꑴꇬ，ꋍꂱꀯꏢꁮꇬꈍꄮꇯꆐꆴꁧꀐꌠꑊꂿꏁꂿꀕꈧꌠꅿꅈꇬ，ꀋꃉꆏꆈꏸꀕꇈꈍꃚꃛꄷꀋꁧꈍꎳꎵꌠꂱꊨꈧꌠꇱꎃꊐꇫꎭꌐꀐ。ꋍꃢꋍꃢꇬꆏ，ꋍꐥꐨꇬꄉꁬꃨꀮꐂꇫꃨꇁꇬꑌ，ꅉꀕꃅꋍꉌꂵꇬꄉꇁꐮꋲꉌꌦꑓꉘꃅꇈꁧꇬꎷ。ꋍꉔꈊꃀ，ꀊꄸꀈꏦꂶꌠꃱꏢꒉꏡꂿꀕꂿꌠꏬꄉꈭꐨꆏ，ꂴꋍꍔꇸꌊꋐꀋꋠꌠꉌꈲꋋꂷꄐꌠꋌꋋꀋꎺꃅ，ꆈꃅꆸꈈꐥꌠꋐꌈꐮꌈꌠꌩꋐꃬꋐꉬꄷꀄꊭꀊꋨꑵꑠꋍꇱꋋꇱꍀꉽꐯꇬꇱꄉꏬ。ꊂꇁꉚꅷꃀꈿꌐꄉ，ꈀꄸꑌꂱꑱꍔꌺꄌꌊꃱꏢꒉꅜꄮꇬꑲꆀ，ꋍꊨꏦꀃꅉꌋꅜꐛꅹ，ꋍꇵꆹꐍꊭꀕꏡꌠꀋꎺꃅꑊꏦꌊꅪꁴꀕꇫꎍ，ꀋꎺꃅꂚꄏꇇꇬꄉꍔꌺꏡꌠꋋꇱꇑꌊꈴꀋꄿꃅꉉꇬ：
“ꅔꐎꏰꌺꏮꇁꃅꃴꃅꏸꉜꄷꆏ，ꆧꁨꁟꁠꋌꋋꀋꎺꃲ。ꋋꆹꉢꅑꌠ。ꆏꂴꄡꅝꃅꄉ，ꉢꀉꁁꋍꍔꏬꆏꄎꂿꀱꂾ。”
ꄮꈉꃬꀮꂶꌠꆹꇁꌊꌋꈯꇄꌠꇬꑟꀐ，ꃆꏂꄑꉈꑴꃄꅉꁸꁧꑴꌦ，ꀊꄸꀈꏦꑌꃄꅉꁷꅉꑦꊤꇬꌤꃅꊿꂷꉬ，ꅽꇬꁦꎆꃅꎭꏿꀋꉆꀐꃅꂚꄏꂶꌠꋍꃢꀋꄿꑍꃢꃅꀈꏦꏭꉉꅷꐺ。ꄚꋋꆹꂚꄏꅇꃅꀋꅲꃅ，ꉽꐯꋌꇱꒈꋌꁦꎴꇤꌃꃅꄉꇈ，ꃱꏢꆗꀊꃶꆈꏸꀕꑠꈨꌋꆀꅿꉘꌒꐨꀕꌠꂤꈐꑵꌠꑠꋍꋇꄻꐯꇯꋋꍀꃀꐛꄉꇬꏬꄉꀐ，ꀊꄶꅿꉘꌒꐨꀕꌠꃱꏢꒉꌋꆀꂤꈐꈧꌠꆹꀋꇊꇬꋍꇇꏸꈯꄔꇬꄉꁖꇁꌠꌡꇫꎍ。
ꇤꈏꏢꁮꇬ，ꊿꈧꌠꂱꑱꅉꉜꄉꁧꌐꀐ。ꇤꈏꇬꏔꌩꃆꄔꇣꌠꇬꊎꉙꄹꐞꑴꌦ，ꋍꑊꆹꄔꑭꑌꄉꃆꄔꇱꁨꅪꌬꀕ。ꂚꄏꂶꌠꃆꏂꄑꃄꅉꁷꄮꇬꊿꋋꉪꇬꀋꑟꌠꌤꆿꅐꇁꉆꌠꉪꇫꑌꎍꄉ，ꀋꎺꃅꑓꋪꋑꌠꆹꋍꇅꂯꐕꌊꀈꏦꇬꊌꀋꉜ。
“ꇅꂚ，ꆍꏤꀀꅉꆹꈜꎴꐯꈜꎴꅀ？”
“ꀔ。”
“ꀁꇬꀉꄉꀉꂿꆹꐥꀕꌦ？”
“ꀔ。”
“ꉈꑴꃺꃶꀁꑳꅫꃀꑠꆹꐤꐥ？”
“ꀔ。”
“ꊿꀉꁁꑠꀋꐥꀐꅀ？”
“ꀔ。”
ꀈꏦꀋꎺꃅꒊꒉꁖꇁꀐ：“ꆏꉜꉐꆏ，‘ꀔꀕꀔ’ꃅꌠꀉꄂꅉꐚꈭꐨꆏ，ꀇꐒꑆꌤꀐ，ꉽꐯꁧꃪꀊꅪꀐ！”
ꂚꄏꋋꇅꇬꑲꆀꈁꑓꉀꐕꎼꇁꇬꆏ，ꉜꅊꇈꂿꆏ，ꉽꐯꂶꌠꆹꁦꋠꀇꐒꌤꌌꋰꀋꉆꃅꎍꂷꌡꃅꀅꌳꀅꌳꃅꆄꇖꇫꎍꅊꇈ。ꋋꄓꇬꉆꄉ，ꈛꎂꃅꀇꐒꋍꃭꇇꋌꄝ“ꀱꌣ”ꄷꉽꐯꇬꊐ。ꋋꇅꃅ，ꃅꇴꀊꃴꑠꋍꌅꄓꇁ，ꀋꇊꇬꀁꄖꇈꂿꈴꉆꌐꎍꅉꀋꎍꑘꀋꒃꃅꆗꁏꆗꈩꏿꅷꐺꌠꌍꑓꇊꅍꑾꌙꀕꑠꋐꌡ，ꏟꈯꀕꃅꋍꑊꋌꇱꇙꐯꇯꄉ……
ꋋꆹꊨꏦꀃꅉꋓꉪꀋꁨꄷꌠꅀ？ꀊꋨꄹꉖꋌ“ꀔꀔ”ꃅꌠꆹ，ꃶꐚꃅꊋꒉꌠꆏꅲꅇꇬꉜꄉꀱꌐꈨꀋꉬꅊꇈ。ꌧꅪꅿꉗꌒꐨꀕꌠꋍꃅꈋꌋꆀꃅꉒꃴꌩꈍꀕꌠꆿꃀꁡꇤꆹ，ꃀꅉꆐꉉꄻꀋꅐꃅꀊꎴꐮꀊꎴꃅꇢꇨꀐꌠ。ꄚꋍꀉꄉꀉꂿꆹꌺꋋꂷꀉꄂꁨ，ꃺꃶꀂꑳꅫꃀꈨꇿꇫꐥꇁꂯ？ꂽꄓꑾꌋꈤꃹꇁꂾ，ꂽꑼꁥꌠꍔꏦꀕꎭꄉꑬꆏꄮꇬ，ꋋꆹꀁꇬꌋꆀꋍꃢꅇꊪꄯꒉꁱꐯꁳꋺ，ꋍꍂꌞꎁꃅꃢꈜꒈꋌꀐꌠꋍꀉꂿꆹ，ꋍꌺꌉꈿꊋꐛꄉꀑꑊꁤꇅꀕꃅꀱꀁꇬꇁꌠꆹꐥꍂꃅꊌꂿꀋꄐꀐ，ꋍꀉꂿꆹꇩꂱꄈꌎꆽꁏꁥꌠꀉꒉꃅꇇꇩꍈꑠꃢꇬꄉ，ꏛꃅꄚꁤꇅꀕꌠꇬꊎꆈꋧꋪꌠꈹꄮꇬꄉꋧꃅꐞꁧꀐ。ꂚꄏꏢꁮꇬꇯꍝꃅꏣꃀꏣꑟꊿꀉꁁꈨꇫꀋꐥꀐꌠ，ꋍꂽꑼꁥꌠꇬꐋꀨ、ꌤꃅꄐꇬꐋꀨꌋꆀꀕꃅꆸꈈꆿꃀꁡꇤꆈꌠꃺꑌꈧꌠꇤꉈꄉꑲꆏ，ꋋꆹꃶꐚꃅꊾꄂꂷꈛꄂꍬꐺꑵꌠꉬꀐ。ꄚꋋꆹꁦꋠꀞꄂꂷꉬꑴꇬ，ꆿꃀꁡꇤꄉꉂꐪꉂꐘꉉꄜꀋꉆꑴꌦ，ꋋꆹꌤꃅꄐꇬꄐꍈ，ꂽꃢꈜꈚꑴꌦꌠꍏꇩꏓꂱꁌꄝꂽꑼꂷ，ꋌꀋꎪꃅꌤꃅꁣꏙꐨꍈꋓꉪꁨꌠꌋꆀꎀꍹꄹꏦꀕꃤꇬꍬꑲꆀꍑꌠ。ꋍꇅꌺꋓꉪꀋꁨꇬꂯ，ꊨꏦꇬꁣꏙꐨꐥꌠꌤꃆꄚꁖꇁꌠ，ꋋꆹꇯꍝꃅꀕꌊꋍꆹꄀꌠꌋꆀꂱꑱꎭꃤꂱꑱꎹꌠꉬ。ꌤꋍꃅꐙꑠꆹ，ꌌꌤꃅꄐꇬꄉꉉꀋꉆꌠ，ꉈꑴꌌꐋꀨꈧꌠꁳꋍꎁꃅꏡꁈꍈꏂꎻꑌꀋꉆꌠꉬ。ꉜꅉꉜꅉꃅꀕꃤꑓꀋꂿꇁꀐ，ꀊꄸꀈꏦꆹꈍꃅꑌꀊꄶꌧꂓꀉꒉꀊꋨꁧꇂꃴꄉꉜꉚꑓꏣꈘꃅꋋꇁꉚꀐꌠꉬꋭ。ꈍꃅꂯ？ꂚꄏꋋꎼꃱꇌꃯꇌꃅꋍꄲꐛꇈ，ꈛꎂꃅꋋꎼꃴꄿꏁꍅꅿꀀꅉꇬꉜꄉꁧꀐ。
ꃴꄿꏁꍅꅿꀀꅉꀻꑳꂶꌠꆹ，ꁈꁦꀑꁧꄩꄉꉻꄑꈁꁏꁧꌠꀋꉻꇈꐂꌺꇱꐗꇫꎭꋺ，ꀋꃋꀀꋋꂷꆹꀋꉻꇈꐂꌺꄰꅍꄉꎴꌊꇁꌠꑳꀉꁁꂷꉬ。ꀃꈈꁭꑭꌧꇤꑍꁧꇫꋦ，ꌨꏾꆹꆴꌐꀐ。ꉜꅊꇈꂿꆏꃴꄿꏁꍅꇬꊎꌧꇤꑣꅷꐺꄉꌩꏾꈧꌠꋌꇤꊰꁧꌐꌠꉬꅊꇈ。ꌧꇤꆹꑣꌊꊭꄎꄉꌌꂚꄏꁳꈝꃀꈪꄉꈌꃶꒉꌤꋌꃅꂿꄷꌠꉬꅊꇈ。ꃴꄿꏁꍅꆹꇭꀧꊼꇅꀄꊭꄉ，ꅂꌩꁧꀂꏽꆹꇬꑬꊋꀊꅰꀋꇎ，ꉈꑴꆏꌧꇤꁦꌠꑌꀉꂥꇨꒉꄸꃅ，ꋋꆹꂷꏦꀊꎴꑠꏡꌌꀒꁵꇬꃬꈯꄀꄉ，ꅂꊖꁍꀁꏾꉆꄉꇈꀅꌳꀅꌳꃅꑐꑣꅷꐺ。ꂚꄏꆹꈜꎴꃅꇁꑴꌦꇯꆐꋌꊌꂿꀐ，ꋌꋍꁁꏯꆏꃴꄿꏁꍅꏭꀏꇁꃅꉉꅷꐺ，ꋍꁁꏯꆏꌤꍈꌌꅽꇬꇕꄟꂿꃅꉉꅷꐺ。
ꃴꄿꏁꍅꆹꊖꁍꇬꄉꐂꀏꇁꀐ。
ꂚꄏꆹꀒꁨꉜꄉꒉꇬꆏ，ꊾꂷꀏꃅꅉꇬꄉꐧꊭꍬꌊꄓꇁꇈꑊꏦꐆꃅꀂꏾꈎꄉꏮꊖꑭꏯꉜꄉꁧꀐ。ꋋꆹꀊꄸꀈꏦꉬ。ꃶꐚꃅꇬꆹ，ꋋꆹꇬꊎꃴꄿꏁꍅꎁꃅꊰꀏꃄꅉꇬꎍꌠꌧꇤꈧꌠꉅꅷꐺꌠꉬ，ꀊꆨꃀꆈꃅꈭꋪꏦꃤꈧꌠꇬꍬꌠꎁꃅ，ꀋꑮꀋꑟꌦꂾꌐꃶꂾꁈꌠꌋꅪꑌꇐꋌꃅꇫꑟꀐ，ꂚꄏꆹꀋꇊꇬꇁꌊꍳꆉꏪꂷꇬꃹꆹꌠꌡ，ꁨꆹꑌꀋꀬ，ꉇꎞꑌꍳꆉꇱꉀꏦꃅꎍ。
“ꃴꄿꀋ，ꉢꆏꎷꌊꌤꍈꐥ。”
ꃴꄿꏁꍅꆹꏤꏅꌌꌧꇤꊐꄉꈫꌠꋌꇔꀏꃄꅉꇬꈈꄉꂚꄏꁳꑌꎻ。ꁮꏮꇉꂿꁧꊂꈞꆈꃹꁧꃲ。ꃅꃴꇬꋒꇈꌠꃅꁨꑭꈧꌠꆹ，ꆺꃮꒊꃀꂠꌠꄩꄉꀅꌳꀅꌳꃅꊈꅷꐺꑴꌦ，ꄚꋋꇅꃅꀕꉒꇱꁿꊌꀋꂿꇫꎭꀐ。
“ꇅꂚꀋ，ꆏꊌꂿꀕꀐ？ꃅꉒꊼꇅꀁꄖ，ꀃꂰꈍꃅꑌꆧꁨꁟꁠꂶꌠꐍꇅꅍꄓꎸꇀꌦꀐꄡꑟ。”
ꂚꄏꆹꀅꌳꌺꃅꌗꇬꏂꅷꐺ。
ꌤꑠꃅꐙꑠꊝꇬ，ꇯꍝꃅꉚꊏꏡꇵꆹꇬꍣꎍꌠꌡ，ꈍꃅꄉꃴꄿꏁꍅꏭꉉꀽꋭꌠꋌꋋꀋꌧꇫꎍ。
“ꇅꂚ，ꅽꈍꃅꄉꎼꌠꉬ？ꉪꊇꌤꃅꄟꑞꍈꅽꄻꀋꈴꅍꐥꌠꉬ，ꆏꀋꃋꋋꑍꀕꀋꁧꌦꈐꃅ，ꉪꏭꊼꇅꄐꌐꄐꌐꌦꇆ！”
“ꃴꄿꀋ，ꉡꆹꉠꊨꏦꀃꅉꉢꋌꉚꄸꀙꀐ。”
“ꆏꉜꉐ，ꆏꌧꅍꂿꅍꐥ，ꄐꅍꑌꐥ，ꁦꒉꇈꉬꑠꆹꐥꋊꐥꍂꃅꐚꇮꌠꏨꆉꀈꇭꈜꋋꈛꑣꀋꄐꇬꎷꌠꉬ，ꆏꅏꊭꁈꎼꆹꀋꄐꀐꄷꐒꊀꌠꅀ？”ꃴꄿꏁꍅꀋꎺꃅꒊꁖꀐ。
ꂚꄏꆹꉈꑴꋍꃢꀅꌳꌺꃅꌗꇬꏁꌦꇈ，ꊼꇅꆏꈭꐨꆏꊨꏦꅿꊋꋠꐨꋋꉉꅐꇁꀐ。ꋋꆹꃀꌠꋋꂷꁌꒉꄣꅼꇨ，ꆺꑳꏂꃴꀉꄉꉂꃅꉂꌠꉬ。
“ꀈꏦꆹꅔꐎꏰꌺꀋꉬ，ꋋꆹꇉꅼꎽꀮꁨꅪꑠꋍꂷꇆ！ꉆꀕ，ꑓꋪꏷꌬꀕꇈꉂꑟꅑ，ꋋꆹꑡꎹꑡꊝ、ꌒꎹꌒꊝꀐꌠꇆ！”
ꃴꄿꏁꍅꆹꀋꇊꇫꐥꌒꄻꌒꑠꈚꇫꐥꌠꌡ，ꋋꆹꂚꄏꎁꃅꊿꑍꂷꐯꉂꇁꂯꇬꇢꊭꊋꋠꅍꉬꇮꋋꐝꉅꌐꀐ。ꆿꃀꁡꇤꋌꃀꑠꐥꀋꋻꑴꌦꌠꃝꐨꎔꇂꃨꌠꋌꐘꌌꂥꀘꏢꀐ。
“ꇅꂚꀋ，ꆏꅉꐙꐚꇆ？ꉡꆹꀋꑍꈍꄮꇯꆐꀈꏦꌤꃅꄐꀃꈈꂴꆽꄉ，ꑮꑟꐰꇑꄔꑟꀊꅪꏡꌠꂁꅷꐺꌠꉢꊌꂿꀐ，ꀊꄸꀈꏦꆹ，ꈍꄮꇬꇰꆐꉬꉎꌦꌺꏭꑗꇖꈨꂟꅷꐺꀐꌠꉬ。”
ꂚꄏꆹꃴꄿꏁꍅꅇꈧꌠꈨꈭꐨꆏ，ꇯꍝꃅꀃꂰꄡꄉꌠꄮꈉꌋꆀꃅꌐꅉꃀꈚꌠꇬꁦꊋꀋꑌꇁꀐ。ꀃꂰꇫꆹꂿꄷꇬꆹ，ꇯꍝꃅꌤꊋꋠꐘꉬ。ꃴꄿꏁꍅꂶꌠꋍꉉꅉꇬꅲꈭꐨꆏ，ꅐꏾꅐꀋꏾꃅꌗꇫꅐꇈꉉꇬ：
“ꆎꆹꃀꅉꈍꃅꇫꉌꀋꃹꇮꇬꑌ，ꀃꂰꆹꈍꃅꑌꇬꆹꄻꅐꀐꌠ。ꋋꆹꉪꆈꌠꋋꁯꇗꅉꏦꃤꉬ，ꆎꆹꌋꅪꂷꉌꂵꃚꌠꌤꈨꃅꀐꇬꑌꑽꀋꐥ，ꄚꌋꅪꂷꇬꀑꑊꆹꈍꃅꑌꐆꀋꉆꌠꉬ！”
ꑠꃅꏟꈯꀕꇈꏦꒉꋦꃅꅇꂷꌌꋍꏭꉉꌠꆹ，ꃴꄿꏁꍅꐥꐨꇬꉘꃀꃢꌠꉬ。ꀃꑍꏦꏪꇬꄉꐝꀋꈷꃅꒉꄉꀑꐛꅹ，ꌤꃆꆹꐛꐈꌊꀉꆈꇁꀐ。ꋋꆹꈍꃅꑌꆿꃀꁡꇤꐞꁧꂯꋍꉔꌠꇬꑲꆀ，ꃴꄿꏁꍅꏤꌋꆀꀉꁁꆈꌠꐋꀨꃺꑌꊈꈧꌠꁳꉜꄸꌊꊿꃅꀋꐛꉂꑟꀋꅑꌠꉇꇁꊾꂷꃅꄉꀋꉆꌠꉬ。
ꋌꉬꅲꀑꉞꀋꎪꃅꐮꄉꀐ。ꉉꄻꀋꅐ，ꋋꇁꉚꌠꆹꋍꇬꀋꅲꀋꇭꌠꉬꂿꇏꏾ。
ꈊꃀꆹꑠꃅꃪꐯꃪꑠꉔ，ꃴꄿꏁꍅꉉꌠꌋꆀꋍꍈꂯꀋꍣꀋꑉ。ꋋꆹꏦꏪꇬꑟꇬꆏ，ꃅꉒꈧꌠꆹꋋꇅꃅꑄꐜꀋꈨꀐ。ꆧꁨꁟꁠꂶꌠꐎꃅꐍꊭꀕꃅꆿꃀꁡꇤꃅꈯꇬꄉꀅꌳꀅꌳꃅꇙꈩꅷꐺ。ꒊꊨꎮꀕꌟꃅꊰꇁꌠꆧꑭꆹ，ꐚꇁꌧꂓꇆꆉꏪꇬꃹ，ꌩꏪꇬꁨꑭꌸꐛꅹꇉꅼꇴꌅꀕꅈꇬꃅꁤꇅꅍꎌ。ꂚꄏꅿꑓꏣꆹꀋꆏꃅꇁꌊꀊꄶꌧꂓꀉꒉꀊꋨꁧꎹꅷꐺꇬꎷ。ꋌꀋꇊꇬꈁꇲꈁꄿꎭꇁꅧꋻꌠꊾꂷꌡ，ꑅꇷꈬꑳꑠꇣꋲꃅꅪꊪꈫꅍꀉꇨꀉꏦꌐ。ꌩꌀꋇꌠꆹ，ꑐꀈꆧꑠꑵꌌꄻꄉꌠꆫꁯꂷꌡꃅ，ꆧꁨꌬꑭꈮꁁꃅꋌꁿꄉ，ꄚꌬꑭꈮꁁꆏꇫꁿꅍꀋꐥꄉꊰꇁꋍꏢꁮꌧꃰꁦꌠꇬꌸꎌ，ꃨꈍꀕꇫꎍꌠꌧꃰꁦꌠꆹꃆꄔꉐꆂꌡ，ꀊꎴꃅꇢꑴꇬ，ꄡꇗꂚꄏꅿꑘꀋꒃꌠꑓꋪꋑꌠꋌꇱꁨꌊꏷꌬꀕꃅꇫꎍ。
ꋋꆹꀈꏦꉫꉬꂯ？
ꂚꄏꅉꀕꃅꌌꐺꌠꎴꆫꅍꇶꌠꀖꌌꄉꉜꇬꆏ，ꀈꏦꈁꑓꆹꌧꃰꃨꃧꌟꃅꋍꑓꐛꈌꐛꀒꇁꑟ。ꋍꉌꂵꆹꄚꄉꄏꄹꐂꀐ。ꀈꏦꅿꇁꉚꌠꑓꋪꋑꌠꆹꏮꇆꀊꄶꏦꏪꇬꉜꃅꎌ，ꉂꑟꅑꌦꄉꏽ。ꀈꏦꋋꀋꐚꒉꄸꉬ，ꂁꀊꄶꌐꒉꇂꃴꀀꎍꌠꂚꄏꆹꈍꄮꇯꆐꋌꊌꂿꅜꉆꀐꌠꉬ。ꋋꆹꂃꀊꏂꀊꅪꌠꐮꋲꌐꑠꈬꈚꇊ，ꅞꀏꃄꅉꇬꑌꎌ，ꂃꂪꈧꌠꏸꑭꏢꁮꇬꁘꎍꇬꆏ，ꀋꇊꇬꁬꃨꇬꊏꃨꑠꀮꌡꃅꎔ，ꄃꐛꇙꀋꋏꀐꌠꃅꄂꋍꌅꑌꌡꑴꌦ。
ꃅꑄꄂꀋꅑ，ꆧꁨꐍꊭꀕ，ꃅꏸꐍꐷꀕꌠꈬꉘꈊꃀꆹꈍꃅꌙꈈꀕꀒ。ꆺꃮꒊꃀꄩꃅꆳꁎꌦꀐ。ꏦꈫꏦꏪꇬꇫꈭꋍꈜꇈꌠꀋꐥꐛꅹ，ꈊꆳꈧꌠꀅꌳꌺꃅꑗꈈꀕꄹꋍꈁꑓꇬꁬꏶꅷꐺ。ꂚꄏꆹꏽꌌꃅꑠꇅꄹꇈ，ꐮꂿꄮꇬꑡꈨꉉꋭꂯ？ꏡꁈꑞꑵꌊꋌꇬꁭꌠꀋꅲꀋꇭꂯ？ꃴꄿꏁꍅꄹꇬꋋꆹꌤꃅꄐꀃꈈꁭꑭꄉꑟꅪꂁꋺꄷ，ꋋꇅꃅꋌꎺꇁꀐ，ꉜꅊꇈꂿꆏꃶꐚꃅꌤꑠꐘꐥꐯꌠꉬꅊꇈ。ꋌꈍꑋꃢꃅꌤꃅꄐꄉꀱꀊꄶꈿꅪꏪꀊꋨꏬꇬꈛꌎꍇꌠꇬꈴꇁꄮꇬꆏ，ꃀꅉꆐꑓꋪꋒꋍꑭꁘꊂꈹꐺꌠꌡꇬꎷ。ꉪꆈꌠꑮꆜꆹꋍꉌꂵꈐꇬꉂꊿꂷꐥꑲꆏ，ꋍꈜꄉꉂꏣꄜꆹꂾꆹ，ꅉꀕꃅꑟꅪꏢꌌꄝꆹꆅꁘꌐꂷꑍꂷꄝꇬꄀꄉ，ꀅꌳꃅꂁꋌꇫꉂꌠꀕꆗꀊꋨꂷꅉꀕꃅꇫꈴꐺꌠꈝꃀꇬꊐꄉꇈ，ꋋꇱꄔꇬꄀꇫꀋꄀꌠꉜꄉꂱꑱꉂꏣꄜꊋꐛꊋꀋꐛꌠꎕꑣꇬꎷꅷꇁꑵꉬ。
ꀊꄸꀈꏦꑓꋪꇂꃴꄉꄛꑣꅐꇁꌠꉂꏣꆹ，ꑠꃅꇁꐳ、ꑠꃅꉌꂵꀉꒉ、ꑠꃅꄊꇪꇨ，ꂚꄏꋋꎼꈌꃶꉐꃶꃅꐙꇁ——ꑟꅪꏡꌠꉢꄔꇬꄀꋺꀑꄷꌠꅀ？ꋋꆹꐥꍂꃅꐰꇑꎭꈐꌋꆀꌦꅇꌋꅅꃆꂮꑠꆹꀋꑇꂷꉬꐛꅹ，ꎴꆫꅍꇶꌠꉈꑴꋍꃢꋌꄌꌊꉜꌦꀐ。ꀊꄸꀈꏦꅿꈁꑓꂶꌠꌋꆀꇭꀧꂶꌠꆹ，ꋋꇅꃅꐂꋍꑓꋪꂴꆽꐛꎍꄉꇇꎇꇇꒃꉆꃅꎍ。ꄚꀈꏦꅿꉌꂵꐁꃚꆹꅳꀧꈍꃅꍔꄉꅱꑌꊌꈨꀋꉆ，ꑠꃅꑴꇬꀊꄶꊿꋌꎼꉌꂅꑓꑣ、ꉈꃶꑓꋩꌠꑓꊏꀊꋨꈨꆹ，ꀋꇊꇬꂁꀊꄶꈝꃀꇬꊐꄉꌠꑟꅪꀊꋨꏢꌡ，ꊾꂷꋌꐒꄉꄎ。ꀊꅰꃅꉌꂵꂷꋌꐒꇯꏢꀕꃅꄉꄎ。ꋋꆹꀅꌳꌺꃅꈁꑓꐕꌊꑓꋪꉈꀋꈻꃅꏮꀊꄶꈍꐮꐰꌠꂿꃅꁬꌠꇬꉜꎍ。ꋌꎇꌊꐺꌠꇇꏸꏡꌠꀋꆏꃅꈩꅷꐺ，ꑓꋪꈐꏭꆹꈮꈜꉌꂵꇿꌠꐛꂨꀕꃅꀀꎌ，ꀋꇊꇬꉬꉎꃰꃅꄰꅍꑗꇖꈨꂟꊌꌠꌡ。ꂚꄏꇭꀧꊼꇅꎎꄉꉜꇬꆏ，ꉌꂵꂶꌠꀊꅰꃅꐁꌦꀐ。ꈜꎴꃅꄷꂿꃅꁬꌠꆹ，ꀋꇊꇬꎿꃀꅼꇻꀕꅈꇬꄉꃅꇴꋍꌅꇫꅐꇁꌠꌡꌦꀐ，ꆧꁨꁟꁠꂶꌠꑌꀅꌳꀅꌳꃅꀋꌬꒉꄮꇬꆏ，ꃅꏸꋍꎆꇁꌊꏸꃅꏷꌬꀕꃅꊽꄩꅑꎍꌦꀐ。ꋋꆹꃅꏸꑞꂷꌌꑭꄒꈌꃅꄉꀋꐚ，ꉈꑴꆏꑞꂷꌌꑞꅉꌐꅉꃅꄉꑌꀋꐚ，ꋋꆹꀊꆩꆈꌠꈭꋪꏦꃤꏢꉫꌦꀐ！ꂚꄏꑭꁘꐕꎼꒉꌦꀐ，ꋋꇅꃅꋌꏮꉈꑴꇀꌦꃅ。ꋍꉌꂵꆹꇯꍝꃅꉌꐡꑓꇗꉌꇙꀕꇫꎍꀐ。ꋋꆹꀊꄸꀈꏦꎔꃨꌠꒉꄷꀋꉬꃅ，ꀊꄶꉈꇬꉪꐨꉌꊈꐘꌠꉬ。ꂚꄏꆹꇯꍝꋍꏢꁮꇬꆹꉆꉈꂯꆏ？ꀋꃋꐛꐪꋌꈨꆹ，ꈍꃅꑌꊨꏦꋰꄉꄎꌠꊋꊑꄝꆘꅝꉆꌠꉬ，ꇬꀋꅲꀋꇭꌠꉌꊋꄚꄉꊰꑍꉆꌠꉬ，ꌠꏀꉂꏣꅿꃆꄔꉐꆂꄚꄉꋋꇅꃅꐞꁖꁧꉆꌠꉬꀑꍰ。ꄚꌤꆿꄽꂫꐛꐪꆹ，ꊿꈔꅲꀱꍠꉆꌠ……
ꂚꄏꆹꃴꄿꏁꍅꋍꏭꊡꀱꄉꌠꅇꋌꀕꀋꎺꀐ，ꋌꉈꑴꋍꃢꇭꀧꎎꌊꅪꎔꊿꋌꁭꌠꀊꄸꀈꏦꇬꉜꎍꌦꀐ，ꎴꆫꅍꇶꌠꒃꇬꊐꄉꈭꐨꆏ，ꀬꅑꃅꇭꀧꏮꌊꒉ，ꀋꎺꃅꑭꁘꐕꐳꐛꅹ，ꐚꄑꏿꃅꋌꀱꑷꇽꁡꇤꇬꃹꁧꀐ。
ꄚ，ꄚ，ꄽꂫꆏ，ꋋꆹꉌꆐꅑꑓꆐꋠꇷꍠꀕꇫꎌꀐ。
ꃅꑍꍠꇙꀕꋍꑍꂷ，ꀊꄸꀈꏦꋌꋋꊌꀋꂿꀐ。ꋋꄹꉇꃅꄜꄮꇬꆏ，ꋋꆹꃅꆳꐊꇿꄉꅐꇁꀋꐚꃅꋋꇅꃅꋍꂴꆽꅐꇁꀐ。ꑊꑍꐛꄟꂶꌠꑍꃀꑍꊂꌋꆀꐯꌟꃅꎌ，ꑓꈭꈚꌠꇬꀉꄂꆈꏸꅍꎌ，ꋋꆹꉌꂵꎭꃤꈍꑋꋌꋰꉌꃀꈐꏭꊐꄉꀐꌠꉬꒉꄷ。ꂚꄏꐣꁙꄻꃆꀞꇬꏦꄉꀐ，ꃆꀞꀊꐍꂶꌠꀉꄂ“ꃃꃆꀕꉍꀕ”ꄹꏅꅷꐺ，ꀂꏾꂶꌠꆏꀋꆏꃅꉈꅷꐺꇬꎷ，ꀋꇊꇬꊽꏯꁧꅲꀐꃅꌗꋏꐺꌠꌡ，ꉈꑴꐮꐞꊊꀋꉂꌠꑌꌡ。ꀈꏦꆹꃆꀞꐒꏣꏡꌠꋌꌭꇯꏢꀕꄉ，ꋌꀉꄂꃅꂚꄏꇬꋍꐕꏃꎭꏡꉪꀐꌠ，ꋋꆹꊿꋋꂷꌧꂓꇆꆉꏪꇬꄉꋌꋩꌊꇁꌠꉬꐛꅹ，ꀋꃉꋌꁦꄮꇬꑌꉈꑴꋍꃢꏃꎭꇫꎭꂿꉂꌠ。
ꂚꄏꋌꎼꉌꂵꑋꅉꀋꑌꇀꌦꀐ：ꋋꆹꉈꑴꆈꌠꈭꋪꏦꃤꏢꉬꄷꌠꅀ！
ꃴꄿꏁꍅꆹꇙꁱꀋꋏꃅꏢꁮꇬꉆꎍ。ꋻꅑꐆꃅꋍꂱꊨꀭꌠꇬꊼꇅꌎꇈ，ꀈꏦꇇꇬꄉꃅꐒꏣꀨꏡꌠꇑꅷꐺ，ꄚꋋꆹꀈꏦꇖꅒꀋꄐꃅꀈꏦꏭꂚꄏꆐꑊꂴꋍꐕꇬꑷꃅꌕꅷꐺ。
ꀊꄸꀈꏦꆹꄡꇗꂃꀊꋨꈬꈚꐺꑴꌦ，ꄷꀋꁧꍣꌊꀊꂥꃅꄩꐧꊭꇬꄀꄉꐛꅹ，ꁡꊭꀋꃀꈍꐯꃅꉈꏭꁖꎍ。ꋋꆹꈛꎼꐲꇨꐛꅹ，ꅩꂿꃶꅍꎍꌠꅻꊪꅻꃰꌋꆀꃀꆏꈧꌠ，ꆼꎭꀂꏾꀍꏶꈀꌠꇬꇱꄉꆐꀋꉬꃅꊪꇖꏮꇉꄹꂿ，ꇁꌊꏦꏪꈚꌠꇬꑟꇬꆏ，ꊂꈹꄉꏃꎭꇁꌠꊿꈧꌠꋀꇤꋀꊇꊂꈍꎴꈍꎴꃅꊰꇈꌐꀐ。
ꂚꄏꂶꌠꆹꁰꇬꑌꀋꐭꃅꋍꊂꐊꐺ。ꋍꇱꄓꐛꒌꇬꄉ，ꇨꃃꇫꊰꌠꈁꑓꀊꋨꂷꆹꈍꃅꐙꌠꋍꉪꅐꇁꄎ。ꂚꄏꂶꌠꆹꈍꃅꐞꅇꑖꈈꀕꌠꈍꑋꉉꏾꀒ，ꉈꑴꋍꏭꈴꀋꄿꀐꌠꃆꂮꈍꑋꌧꏾ，ꄚꋌꊋꇤꌊꋰꄉ，ꅇꂷꋋꈨꄝꈂꀸꇫꅐꇁꀋꎽ。
ꄽꂫꆏꅂꅷꌧꂓꇆꆉꏪꀊꋨꏬꏢꁮꇬꏦꏪꈛꅂꀊꋨꈚꇬꑟꀐ。ꁦꀑꃅꉒꀀꄓꀋꇀꌦꐛꅹ，ꆺꃮꒊꃀꄩꒉꉒꈧꌠꀋꇊꇬꊽꇨꇅꃃꃆꂮꐪꎹꐪꈹꉩꁖꅷꐺꌠꌡꃅ，ꋍꑊꑭꁘꊂꈹꄉꐚꅷꐺ。ꀑꏮꉈꑴꉜꇬꆏ，ꐍꇬꀕꇫꎍꅊꇈ。ꂚꄏꐊꄉꄀꌊꁧꌠꆹ，ꉈꑴꃅꄷꐋꀨꑍꂷꑌꐊ，ꋀꉉꌠꐞꅇꆹꈍꎴꈍꎴꀐꇬꊿꈨꇁꉆ，ꄚꊿꈧꌠꆹꃅꉒꀊꐎꈧꌠꇱꇢꊭꄀꇫꎭꄉꐮꊌꂿꀋꄐꌐ。
ꀊꄸꀈꏦꂶꌠꆹꑮꏸꌗꋏꎼꆹꇈ，ꃆꀞꀊꐎꂶꌠꆹꅇꅲꇮꄉꆏꇬꉆꎍꀐ。ꋋꆹꄧꀕꃅꆏꎳꂿꄹꉖꋋꇁꉚꅉꈚꌠꇬꉆꎍꅊꇈ。ꌧꂓꁦꌠꆹꁱꀋꐭꌗꀋꏂꃅꇫꋦ，ꀊꄶꇪꇇꉿꉬꅍꎍꌠꌨꏾꌩꇇꈧꌠꀉꄂꁮꎐꈨꑋꃅꑞꑟꌌꏈꀋꐚꊿꇫꅲꇮꌠꀋꐊ。ꂚꄏꆹꋍꏭꀅꌳꑌꇈꄷꊌꀋꉉꑴꌦꇯꆐ，ꀊꄸꀈꏦꂶꌠꆹꇭꀧꏮꀉꁁꉜꄉꉉꇬ:
“ꂚꄏ，ꉢꆎꅲ！”
ꋌꆹꇯꍝꃅꑊꑍꁏꐯꈽꇁꄉꏽꃅꎍ！ꁁꆈꃹꌠꂱꀯ、ꁁꆈꃹꌠꑓꑆ，ꑓꋪꋑꌠꇣꋲꃅꏷꌬꀕ、ꌬꌊꆈꏸꀕ、ꌬꌊꊽꐬꆠ。ꂚꄏꉪꇬꆹ，ꑠꃅꐙꌠꑊꃅꋥꄟꆹ，ꈁꏾꃅꏸꏦꄷꄉꄝꇫꀋꎭꀐꌠ。ꑓꂭꋏꉗꍈꀉꄂ，ꀬꅑꃅꁨꂵꌠꄚꄉꅐꀐ。
“ꆎꑞꐛꅹꃅꀋꇁꇆ？！ꉆꐥꃅꉉ，ꆎꑞꐛꅹꃅꀋꇁꌠꉬ？！”
ꀋꃉꆏ，ꇯꍝꃅꇤꈏꇢꇑꏢꁮꇬꊷꆣꀕꌠꆹꐜꀋꈨꀐ，ꏦꈫꏦꏪꇬꉂꐪꆺꀕꂃꌠꑋꀋꐥꀐ，ꂁꀊꄶꈿꅪꏪꊂꆈꀀꄉꇁꉚꌠꑌꄚꄉꑍꀐ……，ꂚꄏꄽꂫꈍꃅꉉꀽꑌꋍꅇꂷꆹꀨꀋꐊꒉꎰꀕꑠꇬꀉꄂꐛꀐꌠ。ꋌꊌꌠꆹꇨꃃꌠ，ꌂꑭꏷꈌꀕꌠ。ꋋꆹꊭꄎꄉꌠꑌꉪꀋꐛ，ꉈꑴꆏꇯꍝꃅꇫꊭꄎꑌꀋꏾꌠꉬ。ꋋꆹꀈꏦꉂꐪꁯꀐ，ꋋꆹꌌꃀꅉꆐꎆꀵꉌꌦꎬꃚꍈꋭꌠꉬ。
“ꆎꅉꐙꐚꇆ？ꄚꌧꂓꋋꁧꇂꃴꄉ，ꉢꋍꉔꆏꇁꉚꅷꃅꄜ。ꌧꂓꋋꁧꆹꉠꎁꃅꇢꊭꇬꉉꅊꈫ，ꆧꁨꁟꁠꉠꎁꃅꉉꇮꌠꉬ。ꆎꇆꆏꉌꈲꎰꀮꋋꂷ，ꆏꈱꑮꆜꑠꃅꎔꑠꂷꊏꀐ！ꆈꃅꈭꋪꏦꃤꃅꄉꇬꆹ， ꉢꌦꆏꁳꉆꀐꌠ，ꉠꑊꋌꒌꆠꂶꌠꁳꅽꏯꅑꁧꀵꎻ，ꆼꒆꅽꉌꂵꎑꎍꎻ，ꆼꒆꅽꉌꂵꇬꋍꈓꑍꈓ，ꌕꈎꇖꈎꃅꎑꎍꇈꅑꅷꆏ，ꆏ……”
ꅇꂷꋋꈨꀕꇬꆏ，ꂚꄏꋋꇷꎹꀕꇤ，ꇭꀧꇖꌋꃅꀍꑐꌾꎬꈠꍅꁍꀕꀐ。ꑭꁘꑍꁘꐕꎼꆹꇈ，ꇁꌊꇴꋩꀕꅉꂱꋯꇬꉆꄉꋋꇅꃅꁏꐈꏿꌠꇬꊜꄻꂿꉂꊭꄎꅷꐺ。
ꎸꄓꉘꁮꐍꌬꅍꌦꀋꑌꐳꀋꑌꃅꇉꈫꇁꄿꄉꇙꅷꐺ。ꌩꏪꆈꊉꀕ，ꉒꐎꆈꃃꃆ，ꇉꅼꇴꌅꀕꅈꇬꀊꅰꃅꊽꃨꆰꏸꈧꃅꎌ。
“ꀊꑴ……”ꀈꏦꌗꏂꁌꄷꇈ，ꀋꇊꇬꁱꐭꀋꇮꌠꈊꃀꇬꄉꄓꁖꇁꌠꌡ。“ꉢꇰꀐ，ꉢꇰꀐ，ꉡꆹꇯꍝꃅꁡꇤꂷꇬꉮꀋꉆ，ꉡꆹꆈꌠꃺꑌꊇꁳꉠꎁꃅꉌꐒꀋꉆ！ꍑꑴ，ꉢꄻꆏꑵꀐ！”
ꋋꆹꋌꇅꃅꇇꑍꁆꌠꎇꌊꇁꇈ，ꀋꎺꃅꁦꃚꇬꄉꅻꊪꅻꃰꈧꌠꋌꑣꎼꇁ，ꀍꑐꇣꌠꇁꋍꈁꁊꑓꁊꎍꌐ，ꇨꃃꇫꋩꐺꌠꑓꋪꀉꒉꋑꌠꀉꄂꇬꁖꎍ；ꅻꊪꅻꃰꈧꌠꏟꈯꀕꃅꋌꋏꇇꇁꑳꁆꌠꇬꊐꄉ，ꇇꊭꊼꇅꉇꇈ，ꋌꇱꇵꇨꁨꇁꄿꉱꀋꅑꅈꇬꊐꇫꎭꀐ。
“ꍑꑴ，ꆏꁧꌶ，ꆏꁧꌶ，ꉢꄻꆏꏆꀐ！”
ꋋꆹꇭꀧꊼꇅꏮꇈ，ꀋꇊꇬꐚꐺꌠꌟꃅꀥꇬꈴꁧꀐ。ꇨꃃꇫꋩꌠꇱꄓꐛꒌꂷꀉꄂꋌꊏꇫꎭꇈ，ꉇꑴꅳꌺꇬꄧꀕꊰꌠꌦꅪꈧꌠ，ꆚꀕꆣꃅꂚꄏꉌꂵꇬꄉꂃꅷꐺ。
ꂚꄏꋌꇷꑑꃹꏾꁵꀕꀐ。
ꋍꅿꅻꊪꅻꃰꈧꌠꆹꋍꀑꇬꎃꊐꇫꎭꀐꌠꉬ。ꂚꄏꆹꁦꀑꇗꀋꋌꌠꉂꏣꎝꁯꀐ。ꀋꃉꀃꑍꆹ，ꌧꂓꀉꒉꁦꌠꆹꈍꄮꇯꆐꊿꇽꊿꋐꏦꈑꆠꋍꇱꐛꇿꇬꃹꁧꀋꐚꀐ，ꎝꈣꆹꄡꇗꀋꇔꀋꊱꑴꌦ；ꇭꀧꇖꌋꋍꃀꉌꂵꃅꀖꄉꉌꆐꅑꌠꌋꆀꈭꋏꁈꇱꌠꆹ，ꂚꄏꄛꑣꅐꇁꀋꋻꈨꀋꉬ，ꋋꈍꃅꑌꇫꊪꇫꋩꀋꅲꇬꎷ。
ꀋꃋꋌꃢꆹ，ꐏꎭꊿꀊꋨꊯꉬꑻꃆꂮꀞꇽꇁꂿꄷꄉꌧꂓꇆꆉꏪꋋꂷꏢꁮꇬꄉꇁꐮꋒꌦꀐ。ꉈꑴꋍꃢꀈꏦꅿꉪꐪꇬꀛꐆꌦꀐ。ꇯꍝꃅ，ꋋꆹꉈꑴꋍꃢꂚꄏꋍꎝꁭꌦꀐꄷꌠꄜꅀꑞꉬꇆ？
ꄚꀉꇖꃅꎍꌠꌊꁁꈊꃀꋋꂷꇬ，ꂚꄏꆹꎸꅍꌍꑓꇬꉈꉆꄉ，ꌙꈈꀕꃅꉪꈽꅷꐺꇬꆏ，ꊂꄽꂫꇬꆏꄡꇗꀋꌋꀋꁁꏃꇗꉭꇍꃅꀀꑌꃹꁧꀐꅊꇈ。
ꊁꊛ：ꉒꈌꈬꇬꉂꏣ(ꉆ)http://yi.yizuren.com/plus/view.php?aid=125
