ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꑍꊏ)
ꄜꃑꄮꈉ: 2013-04-21  | ꁰꄻꊿ:ꀉꈌꏬꌋ

 ꂴꊛ:ꉒꈌꈬꇬꉂꏣ(ꊯꈬ)http://yi.yizuren.com/plus/view.php?aid=135

                           ꑍꊏ
  
   ꂚꄏꆹꈬꑍꈫꄅꀕ,ꊯꊪꑍꄀꄃꃅꉪꇬꀋꑟꌠꆏ,ꋍꅿꐥꐨꋋꇅꃅꐛꐈꌊꉾꃪꀐ。
   “ꊪꀪꁨꇐꐥꌠꈝꃀꍬꊿꁥꌠ”ꇬꄉꋋꇅꃅꉀꐕꌊ“ꐋꁏꐚꐙꁧ”ꌠꐛꀕꅹ,ꄚꃆꂮꐥꌠꏦꃤꇬꏤꄉꇬꆹ,ꋋꆹꂽꇱꌌꏱꂡꀐ。ꂽꇱꌌꏱꂡꇬꆹ,ꃶꐚꃅꏦꑳꇬꀀꌠꉬꀐ。ꑤꍰꇓꈓꏦꑳꌋꅪꈢꅉꏢꁮꈚꌠꇬꆹ,ꂴꆽꆹꌌꌉꁧꀍꂷꐷꈧꌠꀀꅉꉬ,ꀋꃉꆏꄺꅐꌊꑡ“ꐋꁏꐚꐙ”ꁧꌠ“ꊪꀪꁨꇐꐥꌠꈝꃀꍬꊿꁥꌠ”ꊿꃅꑠꋍꑞꋍꑵꌠꈢꅉꃅꄉꀐ。
   ꄚꇬꆹꄮꈉꇬꈴꄉꋚꒉꋟꄮꋠꅜꄮꅝ,ꉈꆏꊽꇬꍍꋉꌠꑌꀁꑌꀐ,ꈻꌊꉈꏭꄉꊨꀖꁧꂿꄷꇬꑋꀋꎪꃅꄚꃆꂮꐥꌠꇇꈴꁱꐘꌌꄉꈋꁧꑳꆀꍑ,ꑠꐛꅹ“ꇌꉻ”ꇬꀀꌠꏮꀋꋋꃅꀑꇬꋬꂻꐨꆹꀉꒉꃅꄈꀧꄉꀐ,ꄷꀋꁧꌤꀋꐥꃅꆷꃹꐮꆷꃹꃲ。
   ꂚꄏꆹꈢꏦꑳꇬꊐꄉꑴꇬ,ꄚꋋꋍꍈꂯꉌꆐꀋꅑꑓꆐꀋꋠꌠꉬ,ꋋꆹꉌꂵꊼꇅꇿꏭꃅꌗꉻꅷꐺ:
   “ꈢꇁ‘ꇌꉻ’ꋍꈓꊐꄉꊂ,ꀊꑴ,ꀋꃉꄽꂫꆏꇯꍝꃅꉪꊇꅿꏦꑳꇬꀀꀐ!”
   ꀋꉊꃀꃰꃅꇇꍂꇬꄉꅑꅷꇁꄮꇬꇯꆐ,ꇝꂱꌤꑘꆹꏦꑳꀀꌠꇬꄉꃅꅷꁧꑠꑵꉬ,ꋋꆹꈍꃅꑌꇝꂱꌤꑘꆹꏦꑳꇬꀀꄉꌐꌠꆹꀋꑇꌠꉬ。ꀋꉊꈍꑋꈓꂿ,ꌧꇐꐥꊿꑠꁥꆏꅉꀕꃅꑍꄜꄯꒉꌋꆀꁱꇐꄀꅉꇬꄉꐯꀥꐯꑣꇬ,ꑡꐩꋊꅿꀻꎆꈴꐨ、ꐧꋦꅿꀻꎆꐨꑠꆹ,“ꃅꊀꌡ”、“ꃰꇌꈭꃅꐙ”、“ꏀꅍꏮꅍꌡ”……ꀋꃋꋋꇅꇬ,ꋋꆹꃹꅼꃅꌌꉪꇁꇬ,ꈍꃅꑌꋍꀀꅉꀉꆹꎭꄏꀡꄌꇬꈴꄉꎿꐉꁦꇉꀋꑍꀋꈤꌠꉸꉼꒊꃀꌡꐯꌡ!
   ꋋꆹꊿꇱꒃꈢꑷꄠꏦꑳꇬꊐꌠꆹ,ꃶꐚꀕꃅꀃꃀꂮꌠꏭꁏ、ꈐꇓꐯꌉꌠꏭꁏꄉꌶꌺꀉꏀꑡꑌꀋꏦꃅꇇꁮꒊꌠꄜꉺꄯꒉ,ꈍꑋꏾꃑꄻꐛꅹꌠꉬ。ꒃꈢꏦꑳꇬꊐꄉꈭꐨꆏ,ꑽꊿꀕꇱꌌ“ꉪꇅꄗ”ꃅꇴꑠꂷꆏꋋꇬꀋꎺꇁꀋꉆ。ꊿꋋꂷꆏꈍꃅꑌꉌꐒꇁꎭꌗꏂꁌꄹꑠꃢꑌꐥꀋꋺ。ꊿꈀꄸꂷꋀꇱꅥꄃꋍꉔꃅꀀꑌꇴꒉꀋꅲꄷꆏ,ꋋꆹꃅꈊꑓꀋꂿꄮꇬꄉꅑꅷꊂꄹꉇꃅꄜꑞꄸꌦꆏ,ꌞꊿꆅꀙꈧꌠꅿꆅꅉꑠꇬꌌꄉꍀꃴꅷꃅꄜ。ꊷꇨꄉꀇꐒꀋꇎꐛꅹ,ꊿꂶꌠꋍꑍꀇꐒꋍꍔꀉꄂꊌꄎ,ꄚꋋꆹꀇꐒꄩꑌꄻꂱꀯꇬꀋꊭꃅ,ꋍꊌꎂꀇꐒꈧꌠꉬꇮꃅꄖꌞꌊꊿꆅꑆꎸꊸꀙꈧꌠꄐꇬꎷ。ꐜꅖꁧꈿꌠꆏꋍꑊꏦꑳꋍꁨꇬꀊꉘꏢꀀꀋꋺ,ꊂꑲꆀꀅꌳꀅꌳꃅꅉꐙꇬꆏ,ꋋꆹꇭꍣꄈꑼꀉꆹꂷꉬ,ꀡꇊꏮꂽꑼꍤꌋꆃꀕꍈꂷꉬꅊꇈ。ꏦꑳꇬꄉꁖꇁꈭꐨꆏ,ꋋꆹ“ꉪꇅꄗ”ꈴꋺꌠꈝꃀꇬꈴꁧꀐ。ꅑꅷꀋꃋꀃꑍꑟꇁꇬꆏ,ꃄꐎꑍꊏꎖꈎꇬꈴꁧꀐ,ꉪꇁꇬꀋꑟ、ꉪꇁꇬꀋꐛꌠꆏꋀꊇꅿꀑꇫꐥꐨꆹꑠꃅꐮꆽꁱꎍꌠꉬꅊꇈ。ꄩꄉꈻꌊ“ꐋꁏꐚꐙꁧ”ꌠꀎꇓꄻꇬꄀꄉ。ꄗꌦꆀꑼꆹꈢꏦꑳꇬꊐꄉꀕꑌꀋꐚꀐ?ꋋꆹꃘꊰꈎꂯꄉꀐ,ꇭꀧꎸꄜꊿꌌꅥꐷꐕꐔꑌꀋꐚꀐ?“ꌩꋦꑌꀃꀿꃅ、ꒉꋦꑌꀃꀿꃅ”ꃅꑠꆹꀃꑍꆏꈍꃅꐙꑌꀋꐚꀐ?ꋋꆹꇯꍝꃅꇬꊼꇅꂾꁧꏾ。
   ꏦꑳꌍꑓꀄꊭꍇꌠꇬ,ꊿꈁꑓꂷꇬꁖꇁꀐ。ꎙꋚꋠꌐꊂ,ꋍꑓꋪꌋꆀꀊꄶꄿꏀꀉꋩꂷꑓꋪꆹꈍꑋꃢꃅꇁꐮꂿꐮꊝꀐ。ꑓꋪꋌꋒꆹꌺꅪꃅꇏꃅꐙꇈꉙꇉꉗꇉꀋꌧꃃꃔꌠꄿꏀꂷ,ꑞꃅꑌꋍꇬꍤꆫ、ꎥꃪꐺꌠꉬꋭ。ꄚꊋꒉꌠꆏꂿꑘꊂꋊꂽꑼꋋꈨꉌꂵꌋꆀꑓꋪꈐꏭꆹ,ꋧꃅꋋꂷꆹꊿꋋꀋꌧꃃꃔꂵꉘꇖꑠꂷꉬ:ꄈꑼꀉꆹꑠꂷ,ꇥꀯꀉꆹꑠꂷꈍꃅꑓꂭꋏꑠꇅꀉꄂꃅꐛꐈꌊꐋꁏꐚꐙꁧꌠꉬꂯꆏ?ꀋꄹꄷꇯꍝꃅꑠꆹꉬꑵꉬꑲꆏ,ꋀꊇꋋꂿꆹꑡꌤꑘꃅꌠꉬꂯ,ꉈꑴꈍꃅꉉꀽꉉꋊꂯꆏ?ꊿꂷꇭꀧꇬ,ꇯꍝꃅꐛꊈꑍꑵꐥꄷꌠꅀ?ꋋꆹꀋꎪꃅꏓꂱꈲꐪꑋꃅꄎ,ꉈꑴꆏꈀꏾꃅꏓꂱꇫꑌꉮꈔꄷꌠꅀ?
   ꀋꌧꃃꃔꂵꉘꇖꌠꑓꋪꋑꌠꋋꇅꃅꐜꀋꈨꇈ,ꐪꊛꄉꂱꀯꏢꇬꁖꇀꌦ,ꎏꂷꐎꊭꀕꇈꂱꑆꅩꍠꀕ,ꁧꃚꌦꑌꐳꑌꃅꐙꇈꁠꐬꀄꊭꑍꍈꑌꐛ。
   “ꂚꄏ,ꊭꄎꄉ!”
   ꋋꆹꑡꄜꌠꉬ?ꉾ,ꊾꈨꋍꇬꍤꅲꇁꀐ。ꏦꑳꀃꈈꁉꎼꇁꇬꆏ,ꈐꏭꃹꇁꌠꆹꀋꉻꃢꌺꉬꅊꇈ,ꂚꄏꋋꎼꊼꇅꃨꆰꏸꈧꐺ。
   ꀋꅔꉈꊨꀖꃀꈿꅉꇬꄉ,ꂚꄏꂶꌠꆹꀑꁮꅺꐳꃅꃀꈿꊥꇬꊿꂶꌠꅿꈱꅇꏅꅇ,ꄻꃚꈢꌊꉹꁌꈧꌠꊏꅰꌠꋋꇱꐴꀖꇫꎭꄮꇬꆏ,ꑸꆀꂶꌠꆹꇨꇅꃃꌊꀋꎺꃅ,ꀂꏾꇬꋯꑟꂪꌦꇙꄉꌠꀋꉻꃢꌺꂶꌠꋋꇴꌊꄩꉆꄉ,ꇬꊌꂿꋺꊿꂷꄻꄉ,ꋋꐊꄉꂚꄏꅿꂿꑘꁡꇤꆹꑤꍰꇓꈓꇬꇊꌉꄉꊽꐬꆠꌠꑽꃤꉉꀖꑌꊈꎸꀨꐺ。ꌦꐳꆹꈍꄮꑋꈍꃅꈝꐮꃅꊿꋋꊢꋋꂳꌊꐮꌂꇁꑠꑵꉬ。ꀏꏯꑌꌠꉹꁌꏓꂱꈧꌠꆹ,ꀋꆏꃅꇬꊎꌾꀖꑘꀋꒃꀙꐯꀙꃅꎍꀐ。ꎰꀕꃅꊿꈁꑓꅪꍠꀕꇈꈬꑳꀜꅷꐺꑠꈍꑋꑻꐂꄩꆹꄉ,ꄇꇖꀕꃅꂚꄏꇬꅥꇤꂯꃅꎌ。ꏟꈯꀕꃅꌦꅇꉉꅍꇬꌭꎍꌠꑸꆀꂶꌠꆹ,ꋍꁁꏯꆏꉇꉈꃅ“ꀺꑳꃅꊨꀖ,ꌌꅥꇤꑵꀋꉬ”ꃅꄉꆹꁘꀋꇎꃚꊛꏿꃅꇴꏅꅷꐺ,ꋍꁁꏯꆏꇇꁆꌌꋍꈁꑓꎭꃃꒉꇱꆽꂷꊂꅑꂶꌠꇬꉨꌎꅷꐺ,ꀋꇊꇬꆏ,ꋋꆹꌠꑽꆏꋋꇿꃅꇿꋌꍈꄉꒊꒉꅷꐺ。ꄚꃆꄔꐞꅷꑓꂿꇬꑟꄉꑡꑌꑘꀋꒃꋋꇅꇬꆏ,ꀋꉻꃢꌺꂶꌠꆹꉘꀋꇈꃅꋍꇬꇴꏅꇈ,ꋋꇅꃅꀋꎺꃅꐚꀏꅞ。ꊭꄏꄉꂚꄏꇬꅥꇤꂯꌠꊿꀉꋩꈍꑋꑻꌠꆹ,ꑌꈨꑌꃅꄓ,ꉆꈨꉆꃅꄓꌊꀋꎺꃅꀥꇁꀋꉻꃢꌺꂶꌠꇬꈭꋏꒉꌐ。ꊁꋌꊼꇅꃱꐚꌌꉪꇁꄮꇬꆏ,ꋍꇬꂶꊂꆅꀙꇨꄉꇬꉆꀋꄐꌠꉬꀕꃅꅲꅷꐺꌐ,ꄚꋋꆹꄡꇗꏸꏦꌊꑑꃹꏾꁵꀕꃅꉉꇬ:“ꀋꉬ,ꂶꊂꆅꀙꇨꄉꇬꉆꀋꄐꌠꀋꉬ,ꉠꅿꇷꇌꐬꆠꌠꈬꑳꏡꌠꀋꌒꌦꒉꄷ,ꉡꆹꆍꊇꆧꁨꇙꆞꑭꍣꅷꐺꌠꊌꂿꀋꉆ、ꇬꉚꀋꀬ!”ꑠꅹ,ꂚꄏꇬꅥꇤꂯꄸꌠꆹ,ꉘꀋꇉꃅꀋꃉꆏꀋꅥꀋꇤꀐ。ꂚꄏꉜꎼꇁꇬꆹꈍꄮꑋꃀꅉꆐꇣꋲꇬꎷ,ꋍꃢꇬꋍꇬꉘꇉꅍꀉꒉꃅꐥꌠꊿꋌꂷꆹ,ꀋꇊꇬꆏꑡꑵꉉꊿꇯꀋꉆꑠꈧꋋꇱꂁꑣꉌꂵꄸꈐꊐꄉꀵꐺꌠꌡꇬꎷ。ꄚꀋꃋ,ꋋꆹꋋꇅꃅꀥꌊꄚꇬꑞꃅꇁꌠꉬꂯꆏ?ꀥꌊꄚꇬꑞꎹꇁꌠꉬꂯꆏ?ꇯꍝꃅꂚꄏꉜꎼꇁꇬꇣꋲꇬꎷ。ꄚꋋꆹꀥꌊꄚꇬꑞꎹꇁꌠ、ꑞꃅꇁꌠꀋꉻꃢꌺꋍꊨꏦꀉꄂꇬꅉꐙꇬꐝꉅꌠꉬ。ꀉꁁꆹꃀꅉꆐꀑꁮꂓꅑꌠꌺꒉꀉꃈꏤꈧꌠꑌꇬꇠꀋꄐꇬꅉꀋꐚꌐꌠꉬ。
   ꏦꑳꈐꏭꊿꀉꁁꇬꀋꐥꀐ,ꉈꑴꀉꁁꐋꀨ“ꐋꁏꐚꐙꁧ”ꌕꑻꌠꑋꊿꇱꇴꌊꉈꏭꄉꌤꃆꅱꇬꁧꌐꀐ。ꊖꁍꆹꆈꏸꅍ,ꊿꌶꊿꀋꊸꌠꉘꁮꑭꆹꀊꄶꀉꂥꃅꅑꇈꀄꊭꌠꌍꑓꌺꍈꌠꇬꍬꄉ,ꊰꀏꏦꑳꈐꏭꌸꇬ,ꀋꇊꇬꆏꂾꃚꇬꀋꂿꌠꒉꏾꌺꍈꌡ,ꊽꐬꆠꃰꈻꇈꀊꅰꃅꈻꄂꀕꇫꎍ。
   ꀋꉻꃢꌺꀂꏾꇬꆹ,ꄡꇗꋯꑟꂪꌦꀊꐎꌠꇙꄉꑴꌦ,ꀂꏾꇬꄉꇙꈴꅷꅳꀧꇬꑟ,ꅳꀧꇬꄉꇙꅷꈁꏠꂱꁮꀏꐕꌠꇬꃅꇙꑻꄉꌐ。ꋋꆹꏮꂚꄏꇬꉜꌦ,ꏮꀊꄶꊖꁍꇬꅑꎍꌠ“ꉦꑣꀕꃅꀉꄂꄉꉆ,ꈀꏾꈁꏾꃅꒉꏈꀋꉆꃅꌠ”ꄜꅇꇬꉜꌦꃅꎌ,ꊂꆏꋋꅞꂚꄏꂲꆽꀊꄶꈀꏾꃅꌩꀻꈍꑋꀻꌊꄻꄉꌠꀀꈤꀉꁘꂶꌠꇬꑌꎍꀐ。ꏦꑳꈐꏭꆹꀉꁁꎊꈬꑡꍈꑌꇬꀋꎍ,ꌩꀻꌊꄻꄉꌠꀀꈤꀉꁘꇖꂷꈭꐨꆏ,ꂱꑱꃤꄻꀀꈤꀉꁘꏸꑮꏢꁮꇬꄉꌠꋚꋠꄮꇬꌬꌠꍔꌺꇅꈄꌋꆀꎋꀉꄂꇫꎍ。
   “ꂚ……,ꉡꆹꅽꇬꌤꍈꉉꈇ。”
   ꀋꉻꃢꌺꂶꌠꈂꀸꁉꄷꆏꈋꐚꄯꀕꃅꎌ,“ꂚ”ꑡꃅꀋ?ꂚꄏꂲꆽꄉ,ꋋꆹꈍꉘꈍꉘꏡꑠꃅꋍꅿꄉꐨꂓꃅꄉꇴꀋꋻꀐ。ꀞꐕꃅꋍꂓꇴꂯꅀꐋꀨꄷꇴꂯ,ꀋꃋꋋꇅꇬꆹ,ꈍꃅꇴꇬꑋꇴꀋꌒꐛꀋꐛꌠꌡꇬꎷ。
   “ꂚꎼꏹ,”ꋋꆹꄽꂫꆏꑠꃅꇴꀐ,“ꆏꏭꉢꁳꌠꂿꃆꆹ,ꉢꇫꃅꀋꌐꀐ。”
   “ꑡꂿꃆꉬꀒ?”ꂚꄏꂶꌠꀅꌳꌺꃅꆼꁠꊼꇅꈩꇈ,ꋋꑌꐞꀋꈷꐆꃅꏭꀋꉻꃢꌺꂶꌠꇬꉜꎍ。
   “ꑝꑟꇂꄉꍞꊙꌊꇁꌠꀋꆪꍔꂄꑐꀊꎴꀊꋨꊰꂷ,ꉬꇮꃅꋀꊇꇱꇣꋠꇫꎭꌐꀐ。”
   “ꀒ……ꉬꀐ,ꄚꑠꅹꆎꑌꀋꆪꏸꑮꑭꇇꍈꑌꀋꊌꀋꑝꀋꋠꄷꌠꅀ?”
   “ꈍꃅꇫꋠꂯꀒ?ꉡꆹꀋꆪꍔꂄꑐꀉꎴꋋꈨꋠꑎꆏ,ꉠꇭꀧꇬꄉꎸꂷꍓꄉꋠꇬꄉꀞꐕꌠꉬ!”
   ꂚꄏꆹꄚꄉꁦꋠꀋꎪꀋꑴꌠꀉꄂꑠꃅꐚꌠꑓꋪꋑꋌꊌꂾꀐ,ꋋꆹꀋꉻꃢꌺꉉꌠꅇꂷꈧꌠꇯꍝꃅꋋꇬꑅ。ꁦꋠꊿꂂꌩꋦꉀꋦꌠꏦ、ꈝꃀꇂꃺꁮꌠꍬꋻꑠꂷ,ꑠꃅꂱꑱꊇꅉꐛꀋꐈꌠꊨꏦꅉꐙꌊꃬꅜꇬꆹ,ꈀꄸꉬꄿꂿꃅꑓꐛꊋꑠꃅꐚꌐꌠꉬ。ꄚꑓꐛꊋꋋꋒꊂꆹ,ꀋꇊꇬꀉꁁꊵꑵꑡꀕꍈꂁꇬꀀꎍꌠꌡꇬꎷ。ꋋꆹꀅꌳꌺꃅꀂꏾꊼꇅꈩꉈꇈ,ꉈꋍꃢꐞꀋꉅꏭꃅꍻꋍꇬꀵꎍꌦ。
   “ꂚꎼꏹ,ꆏꋋꀋꑇꄷꌠꅀ?”ꀋꉻꃢꌺꂶꌠꃙꋒꇬꃀꅉꆐꉌꂵꎍꀋꐽ、ꐬꆠꏸꏦꌠꌋꆀꊵꑵꍈꇁꉚꌠꐛꂨꅍꇬꐊꐺꌐ。
   “ꉢꑇꑴ。ꆏꉉꋻꀑꌠꆹ,ꆎꆹꀋꆪꎸꋠꑎꆏꊨꏦꇭꀧꇬꄉꎸꂷꍓꄉꋠꇬꄉꀞꐕꃅꌠꆹꀒ?”
   “ꉡꆹꌤꋋꐘꎁꃅꇁꌠꀋꉬꀒ!”
   “ꐋꁏꐚꐙꁧꌠꎁꃅꊫꄳꎹꈹꇁꌠꅀ?ꌕꑵꏮꁏꌠꎁꃅꆸꁘꀋꇎꃚꊛꇱꇁꌠꅀ?”
   “ꐯꇯꑡꑌꀋꉬꌐ。ꉡꆹꇯꍝꃅꅽꇬꌤꍈꇖꂟꈉ,ꌤꋋꐘꆹꀋꃋꆹꑞꃅꑌꇬꀋꅐꌦꋭ,ꄚꋋꆹꈍꃅꑌꅐꇁꌠꉬ,ꄷꀋꁧꀊꉘꍈꀋꍣꀐ。”
   “ꑡꌤꐘꉬꀋ?ꉠꅿꑽꃤꈭꐨꆏ,ꆍꊇꆹꀉꁁꑡꌤꍈꉢꇫꋓꉪꁨꄻꅐꑴꌦꌠꉬ?ꐏꁈꄐꍈꀋ,ꉡꆹꆍꊇꏲꂠꌠ‘ꇌꉻ’ꂶꌠꇬꐞꇁꈭꐨꆏ,ꆏꋍꑍꌠꆏꌤꍈꑌꀋꐥꀑꄷꌠꅀ?ꀞꐕꀐ,ꆏꑴꌠꉠꇬꆽꁱꆽꑣꎭꏿꄡꇁꀐ。”
   ꂚꄏꆏꈍꃅꑌꀋꉻꃢꌺꆹꑸꆀꅇꁵꄉꇁꌠꉬꄉ,ꉈꑴꑞꑟꈩꇁꀋꐚꌦꀐꌠꉬꃅꉪꇫꎍ。ꀊꄶꐋꀋꌡꇣꋲꌠꃄꄟꑽꄟꈧꌠꆹꋋꇬꀋꏦ,ꋍꃢꋍꃢꆏꋋꆹꇯꍝꃅꇬꊼꇅꇯꂿꏾꈨꏾꉻꃅꐙ,ꄚꀋꃋꋋꇅꇬꆹ,ꋋꆹꌤꀋꉬꀋꉆꑠꐘꌌꉪꈽꑌꃅꇫꎍꄉ,ꋋꆹꇯꍝꃅꄮꈉꍈꌌꊾꁘꊿꇁꋋꈨꇬꉈꈽꏈꀋꀬꃅꎌꌠꉬ。
   “ꂚꎼꏹ,……ꉡꆹꈍꃅꈌꃴꉐꃴꋩꃅꎭꏿꅦꈠꄉꇈ,ꄚꏦꑳꇬꃱꌬꀃꈈꐏꊿꂶꌠꇬꅰꑶꄉꑲꆀꄚꈐꏭꃹꇁꄎꌠꉬ,ꉢꁳꅽꇬꊼꇅꂾꇁꌠ,ꅽꇬꅇꂷꑍꇬꉉꇁꉆꌠꉬ,ꄚꆎꆹꑠꃅꐚ……”
   ꂚꄏꂶꌠꋍꇬꉌꀋꒊꐛꅹꃅ,ꀋꉻꃢꌺꂶꌠꆹꅇꉉꇬꋍꈯꋌꀋꌅꃅꃙꊤꀊꂥꇁꀐ。ꋋꇅꇬꑲꆀꂚꄏꂶꌠꆹꈨꐚꅲꐚꐝꉅꃅ,ꋋꆹꋍꅿꄉꐨꌅꈌꂶꌠꇬꇴꅷꐺꌠꉬꅊꇈ,ꄷꀋꁧꀋꂄꀋꎔꃴꆉꉘꉩꑭꑌꌠꃆꂮꋍꍈꂯꀋꐊ,ꀊꅰꃅꋍꇬꊨꀖꒊꈧꌠꃆꂮꑌꋍꍈꂯꀋꐊ,ꋋꆹꇯꍝꃅꌤꃆꀋꉬꀋꉆꑠꐘꉉꌊꋋꇰꇁꌠꉬꅊꇈ。
   “ꍑꑴ,ꆏꁨꉉꇆ。”
   “ꉈꈽꃅꑽꒀꅞꋋꐘꇬ,ꉡꆹꃅꆹꑽꀐꌠ,ꄚꑽꃤꆹꀋꐥꌠꉬ。”
   “ꀋꃋꆹꋀꊇꀉꇨꐮꀉꇨꇅꌠꇬꉬꑴꌦ,ꄚꌎꆽꁏꏓꈉꊝꀯꇬꑆꊋꐥꊿꋋꂷꆹ,ꑞꒉꄷꃅꑠꈨꉉꇁꌠꉬꂯ?”ꂚꄏꆹꇬꀋꑇꉌꂵꃴꀋꌦꃅꉪꅷꀋꑟꅉꀋꐥ。ꇯꍝꃅꀕꒊꃅꇁꈧꌠꐛꐈꀐꄸꌠꅀ?ꋋꆹꇬꊎꉌꂵꀱꆾꀕꃅꌤꃆꋋꐘꉪꅷꐺ。ꑞꐛꅹꋌꌋꆀꀉꁁ“ꐋꁏꐚꐙꁧ”ꌠꐋꀨꌕꑻꌠꐯꇯꇤꏭꂽꁵꏱꂡꌠꉬ,ꋋꍈꇬꄉꉉꋊꎼꇁꌠꆹꂽꑼꁥꌠꑌꃶꐙꃅꉈꈽꃅꑽꒀꅞꋋꐘꇬꃹꇁꇬꌠꉬ。ꄚ,ꂽꑼꁥꌠꆹꉜꐨꈍꃅꐙꑌꐮꅉꀋꐚꌐꑴꌦ?ꑤꃶꍋꀯꀨꇬꍔꊈꂶꌠꃅꄉꇬ,ꋋꆹꃹꅼꃅꂽꑼꆹꍏꇩꇝꂱꈯꄔꇬꉆꈉꀋꉬꀋꉆꃅꐥꌠꋋꅉꐚ。ꀋꄹꄷꂽꑼꆹꐧꋦꉪꇐꀋꉾꈧꌠꇱꁣꏙꅀꊿꀋꂄꀋꎔꃴꆉꉘꉩꑌꁥꌠꇱꌅꐺꌊ,ꑸꆀꌟꃅꋍꁥꌠꌋꆀꋀꊇꇬꉘꇉꍞꁱꌠꊿꁥꌠꏯꉆꁧꇮꇬꆹ,ꃅꒊꃅꇁꆹꇯꍝꃅꊋꋠꀐꌠꉬ。ꌌꋍꊨꏦꏭꄉꉉꇁꇬꆹ,ꃄꇁꂃꀋꊌꑲꆏꏦꑳꆈꏸꀕꂶꌠꀀꐱꁍꇫꎭꌦꐥ,ꄚꌌꇩꏤ、ꊿꋅ、ꄈꅿꊫꂫꁀꌠꏯꉉꇁꇬꆹ,ꇯꍝꃅꊿꋌꉨꋌꈽꀋꀬꀑꌠꉬ。ꄚ,ꋋꆹꉌꂵꄷꈐꄉꇫꑇꌠꆏ,ꈍꃅꑌꑠꆏꇫꅐꀋꇁꌠꉬ,ꃄꐎꊰꎖꈎꃅꈐꄅꉈꄅꁮꐚꏭꄙꄉꌉꆳꌉꈿ,ꀋꌦꑗꉘꂿꋺꈧꋻꌠꍏꇩꏓꂱꁌꄝꂽꑼꋋꁥꆹ,ꑓꋪꆹꑓꂾꏸꌬꀕꌠꉬ,ꀑꆊꆹꎍꐼꇗꄃꀕꌠꉬ,ꉆꅉꆹꈫꈈꏟꈯꀕꌠꉬ。ꄷꀋꁧꋋꆹꋋꇅꃅꋋꂷꌠꏮꌊꏦꑳꇬꀀꇁꌠꆹ,ꌌꂿꆏꉈꈽꀋꂿꆏꀧꌋꃅꌠꉬꃅꉪꇁꀐ。ꉚ,ꈍꃅꇣꋲꊿꋋꀋꌧꌠꀃꑍꋧꃅꋋꂷ……
   ꋋꆹꀂꉘꌺꑠꍈꑠꃅꉪꈽꈭꐨꑲꆀꋓꉪꁨꇁꇬꆏ,ꀋꎺꃅꋋꏮꇁꋍꂴꆽꉆꎍꌠꊿꂶꌠꇬꉜꎍ。ꊿꋋꂷꆹꑊꄧꃰꇌꈭꅍꎍ,ꁧꃚꌋꆀꅳꁖꐯꇯꀉꂥꌐ,ꑓꋪꋑꌠꆹꑓꇵꉖꇈꅍꎌ。ꈍꃅꉉꄿꂿ,ꀋꉻꄰꊂꋊꋋꂷꆹꈁꑓꌋꆀꑓꋪꇬꉌꂵꅇꈐꅇꑭꂁꄉꑵꌠꊿꆹꀋꉬ。ꀋꉊꈍꑋꈓꂿꀊꄶꈬꉘꎆꆫꁍꇫꐥꌠꌡꃅ,ꋌꁳꉈꄅꇩꏤꁧꄷꇬ,ꋍꈁꑓꋋꂷꆹꂴꆽꆏꉌꇿꌠꐛꂨꀕ,ꊂꆏꉌꐒꇁꎭꐆꃅꐙꌠꄇꇖꀕ,ꋍꅿꉌꂵꄸꈐꑡꀀꌠꄜꋊꌧꉆꅔꅐꉈꏭꁖꇁꌐ。
   “ꑞꃅꑌꆎꆹꀙꀋꐥꑵꌠꉬꋭ,ꄚꑠꃅꑴꇬꆏꆹꑽꃤꀋꐥꄸꉉꀋꉆꌠꉬ。”ꂚꄏꂶꌠꋍꇬꊼꇅꎖꑣꏭꃅꉉꅷꐺ,ꋌꉜꇬꋍꂲꆽꑌꎌꌠꊿꋋꂷꆹ,ꀋꌋꀋꏡꃅꀋꉊꂴꆽꏭꀋꋌꃅꇗꄃꂶꑌꃅꎍꀐ。
   “ꉡꆹꑽꃤꐥꄷꇬꑌ,ꀋꃉꆏꉡꆹꑽꐪꌣꌶꂿ。”
   “ꄚꅽꃅꇏꂷꄟꃅꐪꑽꑌꆹꀋ?”
   “ꉠꅿꃅꇏꂷꄟꃅꐪꑽꑌꆹ,ꉢꅽꇬꇖꂟꐨꏡꐥ。ꂚꎼꏹꀋ,ꉡꆹꅽꏯꇖꂟꌠꆏ,ꆎꑴꌠꉆꐥꃅꑋꈨꑌꃅꄓ、ꉆꈨꉆꃅꄓꄉꆿꃀꁡꇤꋍꏮꆸꄻꅐ。ꀊꄶꇬ,ꈍꃅꑌꌕꊰꌕꈎꂿꅐꋺꌠꌤꐘꌠꅐꇁꉆꃅꎌꌦꀐ。ꌤꆹꀃꂰꈊꃀꅐꇬꑌꌭꀋꄿꌠ,ꃆꏂꑍꈊꃀꅐꇬꑌꊾꋌꐞꀋꉅꊿꋋꇠꀋꄐꌠꉬ。ꁏꐚꉹꁌꈧꌠꆹꅝꀕꃅꂿꌠꇌꑆꋑꇬꂾꃚꇬꐊꄉ,ꈀꄸꑌꊋꏓꋍꏢꃅ、ꉌꏓꋍꂷꃅꐙꁧꌋꅿꊂꋊꊂꒆꌟꒉꀉꑳꉬꇮꃅꒃꌊꌉꌦꌉꈔꌐꂯꌠ。ꀋꄹꄷꉡꆹꑽꃤꐥꄷꇬꆹ,ꉡꑌꐚꁦꌋꊂꋊꊂꒆꉬꄉꆈꌺꐛꒉꄷꌠꉬ;ꀋꄹꄷꉡꆹꑽꐪꌣꌶꂿꄷꇬꆹ,ꉢꉘꇉꌠꆹꐯꌉꐮꆳꋋꐘꏢꇋꇫꎭꄎꑟꉂꌠꉬ。”
   ꂚꄏꋋꇷꄸꇙꌌꇙꀙꇬꄉꀐ。
   “ꆏꑡꃅꉉꌌꆍꅿꌎꆽꁏꉻꏒꅉꊝꀯꇬꇯꀋꆹꌠꉬ?”
   “ꋀꊇꁳꇬꏢꇋꆹꄜꅀ?”ꀋꉻꃢꌺꉉꇬ,“ꋀꊇꀋꃉꇬꊎꃅꌠꆹ,ꆹꁘꀋꇎꃚꊛꏿ,ꃆꄔꀋꇎꒀꒉꇱꌠꀉꄂꃅꅷꐺ,ꊿꋋꂿꀋꏾꌠꎭꑫꋋꂷꉆꐥꃅꅐꑞꉂꃅꊢꂖꅷꐺꌐ。ꑠꃅꀕꄷꑲꆏ,ꆎꂶꌠꅥꄁꌊꐋꁏꐚꐙꁧꌠꃅꄉꀋꄐꄷꇮꇬꑌ,ꆎꆹꋀꌌꂁꊂꆈꏭꀀꄉꏂꇬꌠꁨꇐꐥꈝꃀꍬꊿꁥꌠꊧꃀꂶꌠꃅꄉꈐꋉꄸꉮꉆꌠꉬꀐ,ꊾꂿꇓꁨꐛ,ꊾꌦꑘꄃꐛꄮꇬꆏ,ꆎꆹꐥꍂꃅꄩꅐꀋꄐꀐꌠꉬ。ꉈꑴꆏ,ꋀꊇꆹꀋꃋꋋꇅꇬꌼꀖꌠꈉꐯꈉ,ꀊꅰꃅꌼꀖꀊꅰꃅꃪ,ꀊꅰꃅꌼꀖꀊꅰꃅꋀꊇꇿꒊꌋꀕꌠꉬ,ꋀꊇꆹꄚꌼꀖꌠꈯꄔꄉꊿꂂꈧꌠꇓꄃꄻꆿꐛꌐꄉ,ꊿꄷꆿꃀꇬꇉꑌꁥꌠꉀꄖꄏꐕꉆꌠꉬ!”
   ꂚꄏꋌꇷꃨꆰꌊꐚꇁꀐ!
   “ꑠꈨꉬꑲꆏ……ꆏꑡꃅꃶꍋꀯꇬꎹꀋꆹꌠꉬ?”
   “ꉑꉎꉐ……ꂚꎼꏹꀋ,ꆎꆹꇯꍝꃅꅺꅑꊿꀋꅲ,ꑓꅑꊿꀋꉜꀐꌠꅀ?ꆎꆹꇯꍝꃅꆏꋋꀋꐚꄜꅀ?ꃶꍋꀯꆹꈍꄮꇬꇰꆐꄣꇫꎍꀐ。ꋀꊇꈯꄔꆹꈍꄮꇬꇯꆐꁸꌊꑍꁥꃅꎍꀐ,ꋍꁥꆏꂱꀘ‘ꅳꍩꌌꆼꁠꆦꌠ’ꉌꃹ,ꋍꁥꆏꇬꉌꀋꃹ。ꀋꃋꆹꉌꃹꁥꌠꆏꇿꐯꇿꃅꇫꎍ,ꇀꀧꀉꒉꐯꀉꒉꃅꎌ,ꋀꉉꇬꍏꑷꁱꀕꀉꒉꃅꇝꂱꁥꌠꆹꑠꃅꅇꁵꎼꇁ,ꋀꊇꌋꆀꑸꆀꏤꆹꀑꍡꂪꋯꌊꐯꌊꂮꀋꉆꃅꎍꇈꆞꀉꄂꋍꈫꀋꈚꀐ;ꉌꀋꃹꁥꌠꆹꅉꀕꃅꋀꊇꇱꌌꌺꇱꃀꄡꀧꀕꌠꍍꂓꋈꄉꇈ,ꌤꊝꆿꊝꇬꃀꅉꆐ,ꌩꁧꀕꇂꃴꈴꒉꇬꂯꌩꏾꊰꋀꊇꌸꇁꏦꃅꎌꑠꁥꆹ,ꃅꀬꏿꀬꃅꆿꃀꁡꇤꌤꃆꀕꂮꉃꄻꄎꑴꄜꅀ!”
ꂚꄏꂶꌠꑓꂭꋍꇅꋏꇈ,ꅅꃅꌺꌌꏝꄉꌠꌡꌠꑊꈜꈍꑋꏢꌠꆹ,ꍯꃅꄹꇭꊒꆽꀕꌠꀋꏭꇁꋍꑊꄜꇬꅑꎍ。
   ꂚꄏꅿꐒꊀꐪꆹꋋꇅꃅꃹꅼꇀꌦꀐ。ꈍꉘꏢꅑꅷꇁꌠꆏ,ꋋꆹꀊꅰꃅꁌꄝꂽꑼꁥꌠꄉꇁꋍꉌꂵꇬꋦꎌ。ꌎꆽꁏꉻꏑꊝꀯꈚꌠꆹꃅꃴꃄꅉꆹꁏꀋꄐꌠ,ꑞꃅꄷꆏꍏꇩꀉꏀꆹꄙꀕꃪꀕꅳꍩꌊꄉꅥꄁꄻꐛꄉꌠ。ꂽꑼꉌꂵꆹꄈꅿꉌꂵ,ꂽꑼꃅꐨꆹꄈꅿꃅꐨ,ꂽꑼꐛꒌꆹꄽꂫꆏꄈꅿꐛꒌꁧꎁꉬ。ꂽꑼꁥꌠꀋꌾꀋꁘ,ꂽꑼꁥꌠꉹꁌꏓꂱꁧꎁꉪꈽ,ꂽꑼꁥꌠꏟꈯꃅꉹꁌꏓꂱꌋꆀꈝꃀꋍꏡꍬꄷꆏ,ꋋꉪꇬꉘꁮꆹꈍꄮꑋꄅꆈꀕꏸꀕꌠꇬꁾꀋꄐꃅ,ꄡꇗꅐꁖꇁꅉꆹꈨꑭꌸꇬꎷꌠ,ꄷꀋꁧꉘꁮꑭꇿꌸꅉꇬꃅꊷꆣꀕꇈꐽꇈꀕꃅꊽꉌꐡꑓꇗꁬꈬꐛꑿꇖꃅꌒꇬꎷꌠꉬ。
   ꃶꍋꀯꆹꈍꃅꀕꌠꉬ?ꋋꀊꄶꇫꐥꋺꌠꃶꍋꀯꆹ,ꌤꃅꊿꉬꇮꊇꁧꉾꃪꌐꀋꇊꂸ。ꊁꆏꊨꏦꆹꑤꊈꌤꃅꌠꊥꇹꁧꀐꑴꇬ,ꄚꄡꇗꃶꍋꀯꇬꀨꇬꍔꊈꂶꌠꄻꄉꑴꌦ,ꊛꄉꀊꄶꃶꍋꀯꈚꌠꇬꀀꑴꌦ,ꀑꐱꐛꐨꆹꋋꇬꊼꇅꐝꉅꌐꌠꉬ。ꈍꃅꋍꈓꎖꀉꄂꐛꑴꌦꇬꆏ,ꈍꃅꄉꁸꌊꑍꁥꃅꐛꁧꌠꉬ?ꈍꃅꄉꊿꄹꁆꆏ‘ꅳꍩꌌꆼꁠꆦꌠ’ꉌꃹꇁꌠꉬꂯ?ꀋꄹꄷꄚꆹꑽꌠꉪꇐꋋꈨꌌꄉꃶꍋꀯꇬꆹꏱꂡꄷꆏ,ꉹꁌꏓꂱꆹꉮꏣꀋꌸꄷꌠꅀ?!ꂚꄏꉪꅉꉪꅉꆏꇨꇅꃃꌊꀂꏾꊉꌊꁧꌺꒊꇁꀐ,ꈬꏣꑳꏡꉬꇮꇬꊎꂳꄹꐂꅷꐺꌐ。ꀋꎺꃅꋋꄓꇬꉆꇈ,ꌩꀻꌌꄻꄉꌠꀀꈥꀉꁘꇖꂷꌠꈯꄔꇬꐛꌠ,ꁬꃷꂷꀉꄂꈴꇎꌠꈴꏣꏡꌠꇬꄉ,ꇨꊸꌊꀱꒊꀱꇁꄹꇫꋩꅷꐺ。
   “ꀋꉬ,ꋋꆹꑠꃅꌠꀋꉬ!ꋋꆹꑠꃅꀋꋭꀒ!”
   “ꈍꃅꀋꋭꌠꉬ?”ꀋꉻꃢꌺꂶꌠꀂꏾꐕꎼꇁꀐ。ꑓꐛꐨꐒꊀꐪꐛꂨꀕꃅꀀꎍ,ꈁꑓꂶꌠꉽꐯꁌꉱꀋꏮꆈꏸꀕꇫꎍ。“ꂚꎼꏹ,ꆎꑴꌠꉠꇬꊼꇅꉌꒊꉌꑇꅊꇈ,ꉡꆹꍏꇩꊾꂷ,ꍏꇩꆃꎭꆈꌠꌺꂷ,ꉡꆹꈍꃅꑌꉠꁍꇩꇬꌤꈴꀋꄿꌠꆹꀋꃅꌠꉬ。ꌤꃆꀕꂮꇁꈜꆹꉢꉈꑴꌤꌧꃪꃭꃅꄜꆏꇯꑌꉆꑴꌦ,ꉡꆹꇫꄉꀦꀬ,ꉡꆹꋍꇬꈱꆏꀉꄉꀉꂿꌦ,ꑍꇬꈱꆏꊨꏦꇭꀧꌦ,ꉢꉉꌠꌤꃆꇁꂮꋋꈨꆹꀋꎪꃅꃶꐙꌐꌠꉬ,ꈱꅇꏅꅇꑱꅳꁖꒊꍈꂯꀋꐊ!”ꋋꄓꀍꉀꉆꄉ,ꑓꑟꉈꀋꈻꃅꊒꆽꀕꃅꍻꂚꄏꇬꉜꎍ。
   ꂚꄏꅉꐚꌠꆏꋋꉪꑽꀐ,ꀋꉻꃢꌺꉪꑽꀐ。ꋌꉉꌠ“ꑠꃅꀋꋭ”ꃅꌠꆹ,ꍏꇩꏓꂱꁌꄝꂽꑼꆹꈁꏾꈀꏾꃅ,ꀊꄶꆹꑽꆽꀠꁬꈬꁮꏂꌟꃅꊾꄵꇁꌠꌧꇗꅇꀋꅲꌠꄜ。ꋋꆹꋍꁁꏯꆏꀋꉻꃢꌺꇬꊎꆿꃀꁡꇤꃆꂮꌧꁇꌠꅲꐺ,ꋍꁁꏯꆏꊨꏦꉪꄉꌠꄽꂫꀕꇽꅇꈧꌠꉪꅷꐺ。ꇰꀋꃀꌠꇭꍣꄈꊨꏦꑭꄑꇇꄻꄉꋈꄻꄉꌠꏓꂱꁌꄝꂽꑼꆹ,ꃄꆳꂷꉐꉌꌦꑓꉘꑡꑌꋌꂿꋌꈨꋌꎟꋺ,ꋍꄸꀋꁧꀊꅰꃅꂽꏃꌊꁈꀉꆹꈧꌠꀉꑌꊋꒉꌠꃅꋧꃅꐥꌐꑴꌦ,ꀊꄶꀋꌦꀋꌋꏃꁘꏃꃪꌼꇑꀠꇁꌠꌧꇗꌋꆀꃅꐨꑽꑌꈧꌠꆹ,ꈍꃅꄉꌌꌬꈴꄏꂯꆏ?ꈍꃅꄉꌉꈿꊥꇹꊿꂽꏃꌋꁈꄙꀕꃪꀕꈧꌠꂾꂁꄉꄎꂯ、ꇷꇋꄎꂯꆏ?!
   “ꀋꉬ,ꑠꃅꌠꀋꉬ!ꋋꆹꑠꃅꀋꋭꀒ!”
   “ꈍꃅꀋ,ꂚꎼꏹ,ꇯꍝꃅꆏꋌꀋꑇꅀ?ꆎꆹꉠꇬꀋꑇꉌꀋꒊꑽꀋꐥ,ꄚꆎꆹꀋꃋꐛꐪꃅꒊꃅꇁꆹꊼꇅꉜꐝꉅꄡꑟ,ꉈꑴꆏꃅꒊꃅꇁꀻꎆꅷꁧꇬꆏꄽꂫꑞꅐꇁꂿꇐꏽꌠꉜꐝꉅꄡꑟ……”
   ꂚꄏꅉꐚꌠꆏꋌꉈꑴꋍꃢꉪꑽꌦꀐ,ꑠꅹꋋꆹꈁꎭꀕꏭꃅꏮꋍꇬꉜꄉꀍꉞꅷꐺ:
   “ꉢꈍꃅꇬꀋꑇꂯꆏ?ꉢꉜꅐꇁꀐ,ꆎꆹꍏꇩꊾꂷꀉꄂꀋꉬ,ꆎꆹꌕꈎꂿꉠꊨꏦꑭꄑꄉꌋꄺꌊꇩꉈꌧꇐꌶꁧꌠꆫꑘꇥꀯꉬ!”
   ꀋꉻꃢꌺꆹꇭꀧꊼꇅꇙꈩꇈ,ꏟꈯꀕꃅꋋꌦꂚꄏꇇꑍꁆꌠꇬꉩꅷꐺ,ꋋꉌꐡꑓꇗꄉꋍꈯꋋꀋꌅꃅꅐꇁꌠꑓꁴꈧꌠꆹ,ꋰꀋꄐꃅꁖꇁꅐꂋꉈꏭꇁꌐꄉ,ꆼꎭꋍꈁꏠꂱꁮꇬꇱꄉꌠꂪꌦꈧꌠꃅꒈꊭꀡꄠꀕꌐꀐ。
   ꀃꈈꇬꆹꇇꊭꌌꇠꀕꃅꅥꌠꂾꃚꇫꈌꐚꇁ,ꌍꑓꀄꊭꍇꌠꇬꉱꄉꈧꌠꑌꀅꌳꌺꃅꇙꀉꁁꈴꒉꇈ,ꐪꊛꄉꄿꏀꂷꅿꑓꋪꋒꇬꁖꇀꌦ。ꂚꄏꂶꌠꆹꉈꏭꊿꉣꑊꇬꆈꅷꐺꃅꌗꋏꇬꆏ,ꀋꉻꃢꌺꂶꌠꆹꑓꋪꊼꇅꌩꇈꉉꇬ:
   “ꋋꆹꎆꉘꅉꇬꐋꀨꍇꌠ,ꀋꉊꄹꈎꑲꆀꂽꄻꇁꌠꉬ。ꋋꆹꅽꉣꑊꇬꉮꃆꀋꐥꌠꉬ。”
   ꌍꑓꀄꊭꍈꌠꇬꂱꀯꀄꊭꍈꇬꁖꇁꇈ,ꇨꆰꇨꊸꃅꇴꅷꐺ:
   “ꂚꄏ,ꉆꐥꃅꊭꄎꄉ!”
   “ꊾꈨꇁꀐ。”ꀋꉻꃢꌺꂶꌠꄓꇬꉆꄉꀅꌳꌺꉉꇬ,“ꂚꎼꏹ,ꆏꑴꌠ……”
   ꊾꈨꌠꈴꈢꋒꀐ,ꋋꆹꏢꁮꏭꌋꅪꏦꑳꇬꍤꄻꒉꌠꉬꅊꇈ。
   “ꂚꎼꏹ,ꆏꑴꌠ……”
   ꂚꄏꂶꌠꇗꄃꂷꑌꃅꉉꇬ:“ꌌꉠꏯꄉꉉꇁꇬꆹ,ꇯꍝꃅꏡꁈꍈꎹꅉꀋꊌꀐ。ꍑꑴ,ꉢꁨꋍꏮꒉꂾ!”
   “ꀋꍑ。”ꀋꉻꃢꌺꉪꅷꀋꃋꋋꇅꇬꂚꄏꅿꐤꅉꄀꇬꆏ,ꀋꃉꀃꑍꆏꋍꑍꂲꆽꂾꌋꆀꀉꒉꃅꐯꀋꌡꀐ。ꋍꑍꂲꆽꂾꆹꌍꆽꁏꁥꌠꅿ‘ꇌꉻ’ꇬꀀꌠ,ꀋꃋꄚꇬꆹꏓꂱꏦꑳꇬꀀꌠ。ꏦꑳꇬꏦꑳꏦꃤꐥ,ꂽꑼꏲꂠꌠꏦꑳꇬꄉꊨꏦꃅꆶꁧꌠꆹ,ꌌꂚꄏꏭꄉꉉꇁꇬꆹ,ꇯꍝꃅꈍꃅꑌꑽꉎꑽꄅꀉꄂꇱꌠꉬ。
   “ꈍꃅꀋ,ꁖꁧꏡꁈꀋꐥꅀ?”ꂚꄏꇬꅱꐺ。
   “ꏡꁈꆹꋍꏡꀉꄂꐥ。ꀃꂯꈊꃀꌋꁁꇬꆏꅽꇬꅲꇔꇁꂿ,ꉡꆹꆏꁳꆶꁧꉆꌠꄮꈉꊝꋽꍈꄻꆏꁳꂾ。”
   “ꑠꈨꃄꄏꑲꆏ,ꆎꆹꑟꐒꑟꉪꑴꌦꌠꉬ?”
   “ꉢꉪꅷꅽꐤꅉꄀ。ꂚꎼꏹꀋ,ꅽꀀꅉꀋꃉꆏꌎꆽꁏꁥꌠꉻꏑꅉꊝꀯꅿ‘ꇌꉻ’ꀋꉬꀐ。”
   “ꉐꑴ,ꈍꄮꇬꉬꀐ,ꆏꆹꑡꐤꅉꃅꑠꈨꇯꉪꆷꑴꌦꌠꉬ?ꉡꆹꐋꁏꐚꐙꁧꌠꀎꇓꀉꒉꂶꌠꃅꆏꄻꅑꄉꀐꇬ,ꀉꁁꑡꐤꅉꈨꋋꂷꏭꀋꋌꃅꀋꉾꀐꌠꉬ?”
   “ꑠꀋꉬ,ꂚꎼꏹꀋ,ꀊꄶꌐꀋꐥꀙꀋꐥꃅꈰꏅꈧꌠꆹ,ꈍꄮꑌꋍꑍꆏꈱꁖꇁꌐꌠꉬ。ꄚ,ꏦꑳꇬꄉꆶꁧꌠꆹ,ꈍꃅꑌꑽꃤꀵꌠꌤꃆꐘꉬ。”
   ꂚꄏꂶꌠꉪꅼꃅꎍꇀꌦꀐ。
   “ꉢꉜꇬꆹ,”ꀋꉻꃢꌺꂶꌠꏡꁈꏂꄉꉉꇬ,“ꆎꆹꄯꒉꁬꁱꉆꉈ,ꉡꆹꊿꄉꄐꃅꑠꂷꎹꄉꎭꌊꁧꎻꂿ。”
   “ꈀꄸꉬ?”
   “ꄆꍣꄆꃑꅉꇬꋀꊇꊿꇫꐊꑴ。”
   “ꀋꍑ。”ꂚꄏꂶꌠꏟꈯꀕꃅꉉꇬ,“ꆿꃀꁡꇤꆹꃄꐔꅑꅷꑓꁯꇬꑟꆹꂾꇰꄉꀐ,ꄚꇬꊾꆹꈀꄸꂶꑌꇫꄙꀋꄐꀐꌠꉬ!”
   “ꂚꎼꏹꀋ,ꑠꆹꉬꑲꆏ,ꋋꊂꅽꅿꐤꅉꆹ?”
   “ꉈꑴꐤꅉꉬꌦꀋ!ꉢꉪꋺꀐ,ꉠꋋꊂꐤꅉꆹ,ꀋꉾꀋꃪꃅꉪꄷꆏꉠꅿꍔꍞꀑꇬꋋꌌꄚꄉꉱꋊꉱꋃꃅꈔꑍꀐꌠ。ꄚ,ꐋꀨꀉꆹꀋ,ꆎꉪꋺꋻꀋꐚ?ꋋꆹꇯꍝꃅꁡꇤꂷꌤꐘꀉꄂꀋꉬ,ꆍꆈꌠꇐꀳꄉꇬ‘ꃅꃴꈭꏂꋍꂷꅏꀑꈎꆏꊰꂷꄚꈿꈎ,ꅔꊂꑌꑿꋍꂷꇓꉙꏭꆏꋍꊈꄚꈿꏮ’ꄷ,ꆿꃀꁡꇤꋑꇬꂾꃚꆹ,ꁡꇤꂷꈁꐛꅉꃅꋋꏓꐯꇯꌐꌠꉬ,ꆎꊼꇅꀉꋩꄮꇬꐛꐨꉪꉚꉏ!ꀊꑴ,ꋋꆹꉪꄈꅿꂓꌗꇬꁣꏙꌠꀉꄂꀋꉬ,ꉇꑴꆏꊿꋅꁯꅿꁤꇅꀕꌠꇬꑌꍍꋉꌠꉬ,ꀊꅰꃅꊿꋅꁯꋋꌌꀻꎆꆹꀋꄐꃅꀱꉈꑴꎞꇁꌠꉬ。ꈍꃅꉉꄿꂾ,ꉪꃅꄷꋋꈚꇬꆹꑠꇅꀋꐕꌠꉬꀐ。ꉡꆹꈍꃅꑌꋍꏮꇬꆹꑲꆀꍑꌠꉬ,ꉡꆹꌤꅐꂲꆽꂾꂵꅷꇬꑟꆹꄎꄸꑲꆏ,ꈍꃅꑌꌤꋋꐘꏢꇋꄝꇬꀋꅐꌠꉬ!”
   “ꂚꎼꏹ……”
   “ꆏꉈꑴꑡꉪꑴꌦꌠꉬ?”
   “ꉢ,ꉡꑌꆎꐊꆹꂿ!”ꀋꉻꃢꌺꂶꌠꇖꂟꄉꉉꇬ,ꋍꈁꑓꋋꂷꃅꇨꃅꌦꑋꉌꆐꀋꅑ、ꑓꆐꀋꋠꌠꈄꈐꈄꊋꐛꃅꀀꈴꌐ。
   “ꆎꆹꑘꊎꑤꍰꇓꈓꇫꐥꄉꇈꇬꄈꀊꅰꌬꍩꐥꌠꉬ,ꄚꇫꅐꌠꌤꃆꋋꈨꆹ,ꉪꊇꆏꉆꐥꃅꄜꌊꉎꏯꇯꆹ。ꀙꏢꈜꎴꇨꀐ,ꉡꆹꉉꂽꑼꁥꌠꇯꏢꉨ,ꉉꉠꂽꑼꐋꀨꀉꆹꈍꑋꑼꌠꇯꏢꉨ,ꋀꊇꁳꄉꏡꁈꏂꄉ,ꄚꇬꌤꃆꈧꌠꃆꂮꉉꌊꇰꋭꅉꇬꇰꁧꎻ。”
   ꂚꄏꂶꌠꅞꀏꑌꌦꇈ,ꀋꉻꃢꌺꄻꇬꁳꄉꌠꄯꒉꀄꊭꍈꌠꇬꄉ,ꊿꈍꑌꑹꅿꂓꑫꌋꆀꀀꅉꑋꅉꋋꁱꇬꄀꄉꇈꀐ。
   ꋍꑓꋪꂴꆽꆹ,ꋋꃀꌉꈿꄉꂽꉘꂽꅪꅍꌠꌉꈿꁍꇁꇬꐙꎍ。ꋋꆹꄂꆸꈘꌠꌳꈄꀋꃀꂷꀋꉬ,ꄚꀋꌦꀋꌋꏃꁘꏃꃪꌼꇑꀠꇁꌠꉈꈽꋌꃢꇬ,ꋋꆹꈍꃅꑌꊋꐛꌠꎹꄓꈨꑭꊌꂿꄏꌠꉘꇉꌠꉬ。

      ꊁꊛ:ꉒꈌꈬꇬꉂꏣ(ꑍꊏꋋ、ꑍꊏꑋ)http://yi.yizuren.com/plus/view.php?aid=137

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ