ꂴꊛ：ꉒꈌꈬꇬꉂꏣ(ꑍꊏ)http://yi.yizuren.com/plus/view.php?aid=136
ꑍꊏꋋ
ꃆꀞꑭꈁꂾꃚꅠꀕꅠꃅꇬꊎꂿꇫꎍ，ꃆꀞꂶꌠꀥꀧꌋꆀꐙꄏꌊꃙꍻꆏꃙꍻꄹꌗꃀꌗꌺꐮꑘꀋꒃꃅꌗꅐꅷꐺ。
ꄵꇓꁦꀑꐂꇈ，ꌧꂓꏪꇬꈴꄉ，ꃅꋩꐙꃰꏿꌠꂚꄏꆹ，ꀋꋓꀋꉪꃅꇁꌊꁱꄜꃰꇌꈭꂶꒊꌠꌧꂓꌩꉖꇺꀕꏡꌠꂴꆽꑟꇁꀐꅊꇈ。ꑓꏮꈁꉜꅉꇬ，ꃅꉒꈧꌠꁠꆠꌺꃅꆺꃮꒊꃀꄩꁮꄉꄂꃰꏿꐺꌐꑴꌦ。ꌙꉂꋍꅍꎌꌠꂿꃅꁬꌠꇬꆹ，ꈜꈼꀙꀐꌠꃅꏸꈍꑋꂷꈧꆹ，ꑓꍀꌺꅍꀁꇬꀉꄉꀉꂿꍤꁆꊌꀋꁧꑴꌦꃅꊎꀊꄶꃄꈯꇬꄉꐞꄚꐞꀋꄚꃅꀛꐂꄽꂫꊱꌠꐁꅷꐺꑴꌦ。ꆿꃀꁡꇤꆹꀋꇊꇬꆏꀀꌞꉿꇍꄹꇬꀀꎌꌠꌡꑴꌦ。ꁡꇤꑭꊂꃅꃆꄔꃄꇴꁙꑌꁨꀋꅿꊌꀋꂿꑴꌦ，ꀊꅰꈌꀞꄇꑴꈧꌠꃮꃚꌋꆀꈍꃀꀈꇭꈧꌠꌺꐜꌺꉂꂾꃚꍈꂯꊌꀋꈨꃅꎌꑴꌦ，ꃬꀮꄍꏸꈍꑋꂶꌠꀉꄸꀒꅇꉖꀃꃀꀋꂊꅊꑞꃅꀋꐚ，ꇴꄚꇴꀋꄚꃅꑍꇁꌕꇬꇴꇫꈌꐚ，ꀋꇊꇬꑡꑌꌦꌐꀐꌠꌡꇫꎍꌐ。
ꋋꀱꇁꀐ，ꀋꀀꃅꌋꏡꐚꃰꏿꇁꐛꅹ，ꊿꌋꆀꃆꀞꃅꐯꇯꐙꄏꀙꐯꀙꀐ。ꋋꆹꃅꇔꄉꊼꇅꑭꆏꇬꑋꎌ。ꃆꀞꂶꌠꆹ“ꅐꇙꄹ”ꋍꈭꋍꇍꄉꌗꋏꅉꃅꁧꉘꌺꃅꁬꐴꈧꌠꇬꌃꋠꅷꐺ。ꋋꅞꇁꌩꉖꇺꀕꏡꌠꄩꑌꎌ，ꑓꋪꏷꌬꅍꋋꍻꇁꀋꇊꇬꆏꋍꑓꁯꇂꃴꐛꎌꌠꌡꌠꁡꇤꂶꌠꇬꉜꎍ，ꋍꅿꉪꇐꎺꏣꇊꑴꁬꌠꇬꆹ，ꐪꊛꄉꏣꃀꏣꑟꈧꌠꇁꇬꃹꇁꌐꀐ，ꀋꇊꇬꆏꄆꒌꃑꃅꃑꌠꌡꇫꎍ。
ꃴꄿꏁꍅꀿꃶꀋ，ꊖꆈꋋꄹꄩꆀꃅꆸꈈꆈꌠꈎꏅꇁꂯꄉꀐ，ꆏꋌꀋꎺꃅꃮꀂꏾꊭꄎꀋꄉꑴꌦꋭ？ꀿꃶꀋ，ꀋꃋꋋꇅꇬ，ꆎꆹꑡꃅꅷꐺꇆ？ꉡꆹꅽꇬꑍꇬꌺꀋꊨꀋꉆꀐꌠꉬ！ꐋꀨꀉꆹꑠꂷ，ꑡꃅꄉꌧꇐꄐꅍꈧꌠꀱꈻꌊꀋꉊꁏꐚꁡꇤꇬꃹꁦꌠꉬꂯ？ꆎꆹꀉꂿꎮꑑꈧꊰꀕꃅꌂꃆꃮꑭꃅꃴꑟꌠꊝ，ꆎꆹꐥꐨꐥꌒꄻꌒꑞꑌꐯꄮꐽꌠꇫꐥꏽ，ꈬꉘꃅꄷꋋꈚꋈꄻꌊꀊꅰꃅꉾꇁꑟꉂꌠ；ꄚꇯꍝꃅꐚꁦꌋꀉꋩꈍꑌꑹꌉꈔꇫꎭꑲꆏ，ꅽꉌꂵꁧꀐꉪꇬꐰꇑꁧꄩꑟꌠꉬꀕꂯꆏ？ꏟꈯꀕꃅꄈꅿꍔꊱꇗꅉꒃꇇꈐꊐꄉꄎꑲꆀ，ꑡꃅꇬꑋꅉꂫꐴꀕꍇꌠꄈꀧꄉꄎꌠꉬ！……
ꆏ，ꎭꂵꊞꐂ，ꑞꃅꑠꃅꀒꅡꁓꅡ、ꀑꀋꉪꑭꀋꉪꃅꀒꆷꃅꄉꀕꇬꎷꑴꌦꌠꉬ？ꅽꀂꏾꀑꆊꇬꀋꇎꌠꆹꌳꈄꀬꅑꌠꀋꉬ，ꇯꍝꃅꀋꇎꌠꆹꉪꇐꏡꇐꌋꆀꁈꏂꁈꇭꌠꏡꁈꉬ，ꉈꑴꋍꍈꌠꆏꄈꅿꍔꊱꇗꅉꌋꆀꇝꂱꉪꏣꀉꎴꌠꉬ。ꄿꏀꌺꀋ，ꋋꆹꉪꊇꐯꇯꐥꌠꀑꇬꉬꀋꂸ！ꆏꑴꌠꑌꈨꑌꃅꄓ、ꉆꈨꉆꃅꄓꄉꋋꊱꌶꀱꇬꇯꅊꇈ。ꅽꐥꍂꃅꌬꌐꀋꄐꌠꊋꌗꈧꌠꅐꌊꅅꃅꈌꇬꇱꄉꌬꇈ，ꎔꇂꃨꌠꆃꎭꀉꏀꋈꄻꌠꎁꃅꈭꀺꈜꀺꊋꇤꏀꑘꄖꅊꇈ……
ꀈꏦꀋ，ꅽꇬꆹ，ꉢꈍꃅꉉꂯꆏ？ꃴꄿꀿꃶꌋꆀꊞꐂꑋꇭꀧꇬꉾꃪꈧꌠꃅꆏꀵꐺꌐ；ꋀꊇꅿꀋꇎꀋꂪꅉꈧꌠꑌꄡꇗꆏꑌꐥ，ꄷꀋꁧꑠꃅꊽꑓꐛꈌꐛꃅꎍ。ꆎꆹꉠꇨꊨꏣꑟꈛꑌꀋꉬꀋꉆꂶꌠꉬ，ꉠꅽꇬꊨꌠꆹꀊꅰꃅꋍꍈꇯꊎꉌꂵꄷꈐꊐꄉꀋꋭꌠꉬ。ꑠꀋꉬꑲꆏ，ꉢꀋꃋꋋꃢꀋꌦꀋꌋꏃꁘꏃꃪꌼꇑꀠꇁꌠꃅꐪꏢꄉꇈꇬ，ꄚꉢꄚꇬꐞꁧꄷꌦꆏ，ꉈꑴꑍꃢꀕꌠꅐꇁꉆꌠꉬ……
ꆎꆹꈍꃅꑌ“ꐞꁧ”ꄷꁱꂷꋋꑍꂷꅲꀋꏾꌠꉬ。ꀈꏦꀋ，ꄚꉡꆹꈍꃅꑌꀋꁧꀋꉆꌠꉬ！ꉡꆹꏦꑳꇬꀀꊿꂶ，ꄷꀋꁧꇊꆏꉢꀀꌠꏦꑳꆹꂽꌤꏦꄉꌠꏦꑳꂷ，ꈍꃅꑌꀱꁧꑲꆀꍑꌠꉬ。ꏦꑳꀃꈈꊇꅉꆹꉪꊇꎁꃅꁉꄉꌠꀋꉬꌠ。ꄚ，ꈐꏭꃹꆹꄷꑲꆏ，ꌤꆿꉉꐞꀋꈷꂥꀋꀘꄷꑲꆏ，ꉡꆹ“ꂁꄉꁈꇁ”ꀋꉆꌠꉬ，ꊂꏭꋍꑍꀱꁖꇁꄷꇬꑌ，ꃀꅉꆐꉉꐞꈷꂥꀘꊖꑣꃅꄉꑓꅑꌠꋋꂿ、ꅺꅑꌠꋋꈨꃅꄉꑲꆀꅐꁖꇁꌠꉬ。ꆎꉜꇬꑠꉬꀕꀋ？ꀈꏦꀋ，ꑠꃅꊋꋠꌠꐩꋊꂴꆽꃅꄉꇬꆹ，ꇭꍣꄈꑼꂶꃅꄉꇬ，ꌤꈍꃅꐝꉅꑠꐘꀞꇬꑌ，ꐛꐈꌊꐞꀋꉅꇁꉆꌠꉬ。ꑠꅹ，ꉪꊇꆹꀊꅰꃅꀉꑌꃅꄈꁧꎁꃅꉪ，ꀊꅰꃅꄈꇬꉌꒊꑇꄻꌐꄡꑟꋭ！
ꀈꏦꆹꀋꇊꇬꆏꋍꏢꁮꇬꑌꎌꌠꌡ，ꄷꀋꁧꋋꌋꆀꆼꁠꋓꄉꌧꂓꌩꉒꇺꀕꏡꌠꇬꑌꎌꌠꌡ。ꋋꆹꀋꇊꇬꆏꀈꏦꇭꀧꇬꐋꀋꌡꌠꅿꉗꈧꌠꋋꅿꎼꇁꌠꌡ，ꈬꉘꃄꄸꀉꄂꑠꃅꅾꉘꌒꌠꐥꌠꉬ，ꋋꆹꈽꃨꃧꄮꇬ，ꀉꁁꆏꂥꈐꌋꆀꇌꎴꀉꄂꑠꃅꅾꉘꌒꄎꌠꉬ。
“ꀈꏦꀋ，ꀋꃋꊂꏭꆏ，ꉪꊇꑌꐥꐨꐥꌒꐚꒉꌟꃅꐔꌠꇫꐥꇁꌠꉬ！ꆏꇨꄡꊸꃅꄉ，ꆏꊼꇅꇁꉚꄉ，ꉢꉪꇬꆹ，ꉪꊇꈍꃅꑌꑠꑍꐥꌠꉬ……”
ꄚ，ꑠꃅꑴꇬ，ꋍꉌꂵꄷꈐꄉꅔꁖꇁꌠꅇꂷꈧꌠꆹ，ꋋꇅꃅꑍꇿꈴꁧꀋꐚꀐ。ꋋꆹꃰꐚꌋꐚꇁꀐ！ꋍꏢꁮꇬꀈꏦꇿꇬꁧꀋꐚꀐ，ꋋꆹꃆꄔꅪꇉꀕꑠꁙꋋꊌꂿꀐ。
“ꅝ，ꅝ，ꅝꀕꅝ……”
ꇌꑆꋑꇬꋍꂷꀉꄂꂿꌠꀋꉬ，ꁦꀑꇈꀑꃅꂿꈴꏿꌐ，ꋍꂷꇈꋍꂷꃅꊛꄉꂿꇁꌐꀐ。ꁮꅐꂿꃅꀉꌦꀕꉘꁮꁖꇁꅉꇬꊼꇅꊌꂿꉆꀐ，ꃅꍑꁱꌠꆹꄽꂫꆏꃱꐚꃯꀋꐚꃅꑓꋪꋑꌠꁉꎼꇁꀐ，ꄚꑠꃅꑴꇬ，ꋌꊌꂿꇁꌠꆹ，ꐩꋊꆹꑽꑠꊭꇬꄉꄓꁏꆹꑽꌠꏭꋪꒃꀵꄜꇁꌠꉬ。
ꈝꃀꏢꈁꐛꅉꇬꄔꊏꉬꇮ，ꀥꇁꆺꃮꒊꃀꏭꉜꄉꁧꌐ。
ꉹꁌꐯꇯꄓꄉꅥꌉꌠꌤꐘ，ꀊꄶꇬꄉꅐꂿꇐꏽꌠꌧꉆ。
ꃆꀞꂶꌠꇇꑭꄓꇈ，ꑓꏮꀊꄶꋑꇬꂾꃚꃅꃴꃄꅉꉼꃅꎍꌠꃅꍜꈚꌠꇬꉜꄉ“ꉊꉍ”ꄹꏅꅷꐺ。ꂚꄏꐂꇁꃆꀞꄩꑋꄉꃅꄀꏦꀨꏡꌠꌭꈬꃅꄉꀐ。ꋋꀂꏾꐕꄉꑓꏮꈜꎴꃅꄷꉜꄮꇬꆏ，ꋋꇅꃅꀊꄶꃅꃴꃄꅉꉼꃅꊽꅳꀧꏢꁮꇬꄉꂾꌠꋑꇬꂿꃙꈧꌠꆹꋋꉜꇬ，ꉈꑴꋍꃢꄸꐙꌠꇫꇬꌐꀺꌠꑌꀋꉬ，ꋋꆹꈜꎴꃄꄸꐛꌠꁦꀑꋍꇬꇳꍝꌠꉬ！ꋋꆹꋀꊇꌋꆀꐮꐊꄉ，ꀉꋩꄹꈎꐚꁦꌋꐧꋦꂶꌠꆷꐩꋊꒊꃀꇬꇱꇫꎭꌠꀋꏭ，ꊋꇤꏡꇤꄉꀋꌦꀋꌋ、ꌼꇑꀠꇁꂵꇖꀕꀋꐥꅍꀋꐥꄉ，ꊿꋌꎼꌗꅐꇬꂯꊋꋠꏡꋠꌠꎬꈌꊝꋋꊙꄺꀱꇫꎭꄉ，ꃆꏂꊂꑋꊫꂫꁤꇅꀕꌠꏭꋨꏦ！
“ꅝ，ꅝ，ꅝꀕꅝ……”
ꂚꄏꆹꉌꂵꇿꌊꀋꎺꃅ，ꃅꋩꐙꃰꏿꄉꐚꌊꀊꄶꃆꄔꅪꇈꀕꅉꇬꑟꆹꀐ……
ꑍꊏꑋ
“ꉢꉉꌠꆹ，ꋋꈨꀉꄂꐥꀐ。ꄡꇗꅇꂷꀊꋨꇬ，ꉡꆹꎃꐚꌠꇭꍣꄈꎼꏹꂷ，ꆎꆹꄡꇗꇫꄜꄡꉺꇬꄉꍑ。”
ꍏꊈꎼꏹꂚꄏꂶꌠꋌꃀꈴꅐꌠꌤꑘꈧꌠꇬꎺꀱꏿꌐꄉꆏꄉꈭꐨꆏ，ꈍꉗꏢꇬꁱꀋꐭ，ꄚꉈꑴꋍꃢꋋꇅꃅ“ꇫꄜꄡꉺꇬꄉꍑ”ꄷꅇꂷꑠꇬꋋꉉꎼꇀꌦ。
ꃅꃤꆈꏸꀕꀐ，ꌤꃅꅉꇬꊖꌋꃆꄔꀊꋨꇤꆹ，ꂿꐚꂿꀋꐚꌠꈊꃀꃅꌋꈬꇬꄉꀊꅰꃅꄔꑭꅩꌬꀕꇈꁤꇅꀕ、ꊽꉌꂵꋋꌌꀊꅰꃅꊷꆣꀕꇫꎍ。
“ꈍꃅ，ꀋꇎꑴꌦꅀ，ꏹꍓꐋꀨꀋ？”
ꉢꀊꉗꏢꃅꁱꀋꐭꌠꂿꇬꆏ，ꂚꄏꎼꏹꆹꅇꂷꌓꋗꀕꑠꇬꇯꋋꉉꎼꇁꇈ，ꄓꌊꀅꌳꌺꃅꀱꒊꀱꇁꃅꊖꌋꃆꄔꇣꌠꈭꇌꏮꐺ。
“ꉬꑴ，ꀋꇎꑴꌦ。ꆏꑞꃅꆏꇁꆿꃀꁡꇤꑞꇁꈭꐨ，ꈍꃅꄉꀊꄶꄸꐙꂿꇯꌠꌤꃆꐘꌠꏢꇋꌠꌤꌧꃪꃭꃅꉉꉢꀋꇯ，ꄾꌦꋩꃅꌤꌧꃪꃭꃅꉉꉢꀋꇯꌠꉬ？ꆏ，ꆎꆹꈍꃅꄉꑡꑵꊋꃤꉘꇉꄉ，ꀊꄶꊋꑌꌗꇰꄩꅐꁌꄝꄉꀐꌠꆈꌠꁏꐚꈧꌠꆏꉉꅽꅇꅲꄉ，ꌌꅅꃅꄅꀱꇢꊭꇬꄉꌉꐡꂯꌠꐚꁦꌋꀊꋨꊰꎖꑻꊋꐛꃅꆏꈭꋏꎼꇁꌠꉬ？ꋋꈨ，ꆏꑡꃅꐯꇯꉉꉢꇯꀋꌐꌠꉬ？ꉈꑴꀉꁁꆏ，ꆎꌋꆀꀊꄸꀈꏦꑌꆹ……”
ꑞꃅꑌꌤꃅꋻꅑꌠꉬꏭꐛ，ꉡꆹꊿꋋꂷꑞꃅꑞꄻꂶꉬꌠꀋꑴꃅ，ꄡꇗꅱꁱꊿꂶꅱꁱꌠꀋꏭꑠꃅꋍꇬꅲꅷꐺꑴꌦ。
ꂚꄏꄓꇁꌍꑓꏢꁮꇬꉆꎍꀐ，ꑓꏮꇁꌍꑓꉈꏭꃰꌦꀱꑐꀕꃅꑵꉙꀛꐂꐺꇬꎷꈧꌠꇬꈍꉗꏢꉜꎍꑲꆀ，ꀅꌳꀅꌳꉉꇁꇬ：
“ꃶꐚꃅꈝꐮ，ꌤꆿꍈꀋꌗ。ꄹꃥꂲꆽꄉꇬ，ꃥꌋꄰꆹꈍꃅꑌꌼꇑꌼꀠꌠꎊꈬꂷꇁꈧꌠꄌꌊꊿꊌꀋꂿꅉꇬꄉꁧꇬꎷꑠꑵ；ꉪꊇꈀꄸꑋꏦꈬꏦꎫꈩꁧꂯꄉꄮꇬꆏ，ꃦꆰꃦꈜꎔꌠꎹꈹꈚꄉꇈꀂꏾꊼꇅꌩꎳꄉꁧꏦꐤ。ꄚꈯꄔꇬꆹ，ꐥꐨꎔꃆꎔꂮꊁꈹꌠꌧꇗꀋꐊꄷꌠꅀ？ꉢꐧꇂꃰꊿꆹꄚꎔꃆꎔꂮꊁꈹꑵꉬꒉꄷꃅ，ꉡꆹꀊꄶꆿꃀꁡꇤꄉꅐꌠꄸꐙꀉꋩꈨꃆꂮꆹꌤꌧꃪꃭꃅꉉꆏꀋꇯꌠꉬ。ꃀꅉꆐꌤꌧꃪꃭꃅꉉꄻꀋꅐ，ꇯꍝꃅꌤꌧꃪꃭꃅꉉꄻꀋꅐꌠꉬ。ꀉꂿꈍꃅꄸꂷꁨꄿꂿ，ꀉꑳꈧꌠꆹꃀꅉꆐꈍꃅꑌꊨꏦꀉꂿꄸꂁꇬꎷꑵ。ꄷꀋꁧꇊꆏ，ꃴꄿꏁꍅꏤꈧꌠꆹ，ꀊꅰꃅꅑꁧꑽꃤꀋꐥꌠꉬ，ꊿꇱꐒꌌꐺꌠꐚꁦꌋꈧꌠꑌꀊꅰꃅꌂꑘꃅꃴꑟꌠꀋꐥꌠꉬ。
“ꅽꌤꃆꑍꏢꏡꌠꆹ，ꉢꉠꉪꐨꍈꊼꇅꌧꆏꇯꉆꑴ。ꇯꍝꃅꉉꇬꆹ，ꀉꋩꄮꇬ，ꉡꆹꇨꆰꇨꊸꃅꃆꀞꋩꄉꐚꁦꄉꏽꃅꀥꁧꌠ，ꀋꎪꃅꐩꋊꄸꐙꇁꌠꋌꐘꏢꇋꇫꎭꄎꀋꄐꌠꆹ，ꉡꑌꉌꂵꈐꇬꏡꁈꋍꍈꂯꀋꐥꌠꉬ。ꉡꆹꌦꌺꌊꌺꀋꉬ，ꃅꃴꃄꄅꁉꄎꌠꏡꁈꀋꐥ，ꃀꅉꆐꎃꐚꊾꂷꄹ。ꀋꃋꄚꇬꆹ，ꉢꆏꌌꉠꇬꅹꌠꄉꉉꇬꆹ，ꀊꅰꀋꋭꀋꋽꌠꌤꐘꉉꆏꇯꂿ，ꆏꑴꌠꋍꈻꇐꀉꄂꌊꃬꉆ，ꊿꂶꌠꃅꄉꆹꌌꉪꈽꀋꉆꌠ：
“ꏹꍓꐋꀨꀋ，ꆏꆹꄡꇗꆏꎺꑴꌦꋭ！1998ꈎ8ꆪꄮꐰ，ꍤꏦꒊꃀꐩꋊꇬꑠꃢꐥꀋꋻꌠꀉꇨꐮꀉꇨꃅꑠꃢꒈꅐꇁꇈ，ꑓꉜꄉꇬꒉꋍꅍꐡꁧꂯꄉꇄꌠꄮꇬꆏ，ꄚꃄꐔꅑꅷꑓꁯꇬꑟꆹꂯꋋꇅꇬ，ꄚꄙꀕꃪꀕꀑꇬꇇꇐꒉꌌꁧꂯꄈꄮꋋꇅꇬꆏ，ꏦꊱꂱꊝꎼꏹꇁꌊꄚꒉꋍꒉꅏꅉꇬꑟꇁꀐ。ꇯꍝꃅꉉꇬꆹ，ꋋꆹꈲꒉꌷꃆꂮꌧꃀꑌꀋꉬ，ꈍꃅꄉꒉꁭꈴꐪꌗꏢ，ꈍꃅꄉꒉꁭꁸꈴꌠꊨꄐꌠꆹ，ꏦꊝꎼꏹꆹꈍꃅꑌꈲꒉꌷꃆꂮꌧꃀꈧꌠꌧꅍꀋꌧꌠ。ꄚ，ꈍꃅꉉꄿꂿ，ꋋꇁꒉꋍꒈꅐꅉꈚꌠꇬꑟꇁꀐ，ꒈꅐꒉꁭꌠꑌꄽꂫꆏꋍꊋꐛꀐ。”
“ꄈꅿꇥꀯꂷꃅꄉꇬ，ꌅꈌꌬꌠꄈꅿꇥꀯꂷꃅꄉꇬ，ꈍꃅꄉꑲꆀꉹꁌꌋꆀꐮꐊꄉꋍꃀꁨꀋꑌ、ꉌꂵꄅꀋꑌꃅ，ꉹꁌꏓꂱꈧꌠꏃꂡꌊꄈꅿꍔꊱꏦꃤꈧꌠꃄꌬꂯꆏ？ꄚꈐꏭꌧꇐꈧꌠꆹ，ꆍꊇꏹꍓꈧꌠꆹꊼꇅꊋꇤꄉꌌꄜꉺꄻꅐꌠꉬ！”
“ꋲꉙꍈꐥ，ꋋꍈꆹꇯꍝꃅꉉꆎꇰꇬꑽꀋꐥ：ꀊꋨꄹꈎ，ꄗꌦꆀꑼꂶꌠꆹꊿꌌ‘ꐋꁏꐚꐙꁧ’ꌠꃅꄉꌅꈌꇔꇫꎭꄉꍤꄺꑴꇬ，ꄚꋋꄡꇗꆃꎭꆈꌠꃄꈌꇬꉌꇬꑓꇬꀕꎷꄹ，ꆿꃀꁡꇤꇬꉌꇬꑓꇬꉌꁠꇬꎷꄹ。ꋌꉬꑴ，ꑸꆀꏤꁥꌠꉢꂶꌠ‘ꉀꐕ’ꌊꆽꃴꂿꄷꉌꂵꑌꊸꌠꊜꋽꃅꋌꇱꌋꅜꄉ，ꀊꄶ‘ꇌꉻ’ꇬꄉꉢꋌꏮꌊꏦꑳꇬꊐ，ꉈꆏꈢꎴꃅꈏꆏꉠꇬꀦꌋꃅꌠ，ꑠꃅꄉꉢꑌꊜꋽꃅ‘ꁈ’ꌊꆿꃀꁡꇤꃹꆹꄎꌠꉬ。ꄚꅲꎼꇁꇬꂵꉘꇖꌠꀦꌋꃅꏡꁈꋋꏢꆹ，ꃶꐚꃅꐩꋊꈴꏦꑠꏢꋌꇱꉉꋊꁱꋊꎼꇁꀐ：ꈍꄮꑌꏟꈯꀕꃅꉪꊇꏓꂱꁌꄝꂽꑼꁥꌠꇬꉌꒊ，ꏟꈯꀕꃅꉪꊇꄈꅿꇬꉌꒊꅊꇈ！”
“ꅽꅿꄽꂫꌤꃆꍇꌠꆹ，ꉢꇯꍝꃅꅽꇬꑊꏦꉉꀋꀬ。ꈍꃅꉉꂯꆏ？ꀊꄸꀈꏦꆹꄡꇗꑠꃅꎔ，ꀋꇊꇫꐥꍂꃅꀊꏀꌠꌡ，‘ꍑꂷ’ꍈꌡꇬꎷ；ꄚ，ꑠꃅꑴꇬ，ꉡꆹꃀꌠꀐ。ꄚꉡꆹꋋꉂ。ꉡꆹꀍꆈꋍꍂ，ꀑꐎꑍꍂꃅꀈꏦꉂ……”
ꊁꊛ：ꁱꊿꅇꂫꑍꇬhttp://yi.yizuren.com/plus/view.php?aid=138
