ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꊯꈬ)
ꄜꃑꄮꈉ: 2013-04-21  | ꁰꄻꊿ:ꀉꈌꏬꌋ

 ꂴꊛ:ꉒꈌꈬꇬꉂꏣ(ꊰꉆ)http://yi.yizuren.com/plus/view.php?aid=134kpX彝族人网(彝人网)- 彝族文化网络博物馆
kpX彝族人网(彝人网)- 彝族文化网络博物馆
                     ꊯꈬ  kpX彝族人网(彝人网)- 彝族文化网络博物馆
   kpX彝族人网(彝人网)- 彝族文化网络博物馆
   ꁱꎿꂷꉔꏃꊰꂷꊂꐎꄉꂁꁾꇓꈓꏭꊖꋒꅫꏻꀕꌠꇬꀀꎍꌠꀋꉻꃢꌺꂶꌠꆹ,ꋋꇅꃅꉪꏣꀁꋌꊰꀋꐳꇁꀐ。kpX彝族人网(彝人网)- 彝族文化网络博物馆
   ꃶꐚꃅꇬꆹ,ꊿꋋꂷꆹꀋꂄꂶꑌꀋꉬꌠꄹ。ꋋꆹꇯꍝꃅꏃꊰꋋꂿꈌꋓꀕ、ꉆꊰꋋꂿꇇꏸꄂꌠꌎꆽꁏꑵꌠꑌꀋꉬ。“ꁱꀕꀉꒉꃅꇝꂱ”ꂾꄮꇬꆹ,ꋋꆹꀀꊈꀂꎴ、ꀀꆹꀂꇲꃅꁱꂷꀉꒉꀨꌠꇬꐞ,ꊨꀖꃀꈿꌠꇬꐞ,ꉌꇿꑓꇿꌠꃰꊿꀊꋨꈨꇬꐞꄉ,ꊨꏦꂶꌠꀉꄂꃅꌙꈈꀕꃅꂁꀊꄶꌧꅪꏪꇬꄉ,ꑟꑝꇂꄉꊙꎹꌊꇁꌠꑐꀉꎴꍔꂄꌠꀋꆪꀊꋨꊰꂷꀨꎹꆽꃴꅷꐺ。ꊨꏦꀃꅉꀋꃀꒆꐨꑌꀋꉾꐛꅹ,ꀉꄉꀋꉻꇈꐂꌺꂶꌠꑌꐋꁏꐚꐙꁧꌠꌎꆽꁏꌉꈿꅉꇬꄉꊿꇱꌉꌦꇫꎭ。“ꁰꅐꀋꉻ,ꁮꐚꇊꉙ。”ꋍꅿꀋꃀꌺꒆꐨꆹꇯꍝꃅꂓꅑꂓꈨꌠꋊꃤꀉꇨꑠꁯꉬ。ꐩꋊꒊꃀꇬꐊꄉ,ꐙꀠꐯꌉꐯꅣ,ꁏꐚꇬꍅꆌꇨꌠꆹꃀꅉꆐ,ꆀꃅꆹꈈꃅꀋꈨꅉꀋꐥꑠꋍꁯ。ꇭꍣꄈꄷꑷꌠꄰꉢꐚꁧꌋꌺꋋꂷꇬꆹꀋꅥꀋꌉꑴꇬ,ꄚꊨꏦꀃꅉꆹꃶꐚꃅꒆꌊꐩꋊꀋꉾꀋꃪꑠꋍꊭꇬꊝꀐ!ꋋꆹꃀꅉꆐꉌꈲꇭꍣꄈꐊꌤꃅꁧꄹꉇꌠꅑꅷꇁꌠꆏ,ꌞꊿꂴꆽꄈꇬꆹꀊꅰꃅꁱꀋꐭ,ꌞꊿꊂꄉꇬꆏꉌꂵꉪꇐꀋꈘꏣꃅꉪꅷꇁꇬꎷꂶꉬ。ꋋꆹꀂꏾꈎꄉꌤꃅ,ꁍꎼꑕꄉꊾꂷꄻꌠꉬ。ꒆꊇꄸꐛꅹ,ꋋꀊꅰꃅꀀꆹꀂꌧꃅꊋꀥꇱꄉꌤꃅꅷꇁꇬꎷꌠ。ꊿꋅꌶꅉꇬꄉꄯꒉꁱꂷꌷꑴꌦꇬꇰꆐ,ꋋꆹꆫꑘꑵꌠꌋꌊꐥꍂꃅꌌꃅꌠꃅꅍꃅꄉꌠꉬ。ꃅꅍꋋꏢꆹ,ꋍꑵꌠꆏꑟꑌꍔꍞꌌꀨꇬꄉꌠꌋꆀꐯꃆꂮꀊꅰꃅꀋꐥꄉ,ꀊꅰꃅꌺꇰꀁꇬꑌ,ꃅꊭꀁꇬꌸꇁꑵꌠꃆꑘꑳꁭꁉꌠꀁꑌ;ꑍꑵꌠꆏꎇꃀꍅꑓꇬꀉꄂꑌꑲꒉꄸꃅ,ꊨꏦꅇꂷꀉꑌꃅꀋꉉꌠꌦꌋꂘꃅꍬꏦꇬꄉꄐ;ꌕꑵꌠꆏꌤꑘꋋꐘꃅꇬꁧꀋꎴꇤꀋꌃ,ꐙꄏꌊꎭꏿꅦꇨꐛꅹ,ꃶꐚꃅꊨꏦꀀꈐꌋꆀꋊꃤꈧꌠꑽꃤꌩꎳꇧꎭꂿꄷꇬꈲꏣꀉꒉꃅꐥꌠꉬ。kpX彝族人网(彝人网)- 彝族文化网络博物馆
   ꋋꆹꂴꆽꉪꃅꉪꄉꇬꆹ,ꏟꈯꃅꏤꁨꋋꌕꏢꌌꌬꈬꃅꄉ,ꋬꀕꂻꀕꃅꋍꐥꍂꃅꌌꁣꀋꐥꃅꈴꅐꇫꎭꂿꄷꌠ。ꄚ,“ꂿꃅꀋꋌꄏ,ꋓꇗꉐꃰꇿꇫꐥꀋꐚ;ꌺꇰꀁꇬꑌ,ꃅꊭꀁꇬꌸ,ꃆꑘꑳꁭꁉ;ꃰꊿꉌꃀꉪꅉꐛꀋꉆ,ꐦꐛꃅꌒꅞꀋꉆ。”ꃅꑠꑌꋧꃅꋋꂷꇫꐥꑵꉬꅊꇈ!ꀋꉊꑠꋍꑍꆏ,ꑤꊈꀨꇬꎼꏹꂚꄏꂶꌠꀏꅉꂫꊐꌠꇬꍤꆗꏮꆫꆹꇈ,ꉘꀋꇈꇁꅷꋍꐤꅉꎆꉘꅉꈚꌠꇬꑟꇁ,ꂴꊂꃅꏲꌋꀕꆀꌤꃅꊿꈧꌠꇫꅲꇬꌐꈭꐨꆏ,ꀱꇁꃆꀞꇂꁮꈧꌠꌋꆀꑿꈧꌠꇬꋍꃢꉜꇁ,ꄚꇬꌤꃅꌠꇮꇐꐥꊿꀋꉻꃢꌺꂶꌠꅿꌤꃅꊌꐨꆹꀉꇨꐯꀉꇨꃅꋋꌌꋍꃢꀮꄑꍖꀴꇱꀋꏦ。ꁧꂯꄈꄮꇬꆏ,ꀋꉻꃢꌺꇇꋋꌭꄉꑠꃅꉉ:kpX彝族人网(彝人网)- 彝族文化网络博物馆
   “ꄿꏀꌺꀋ,ꃄꐎꌕꑍꄻꆏꁳꊼꇅꊭꄏꎼ,ꆏꁳꉈꃅꉈꏭꋍꏭꉜꁧꎻꂿ。”kpX彝族人网(彝人网)- 彝族文化网络博物馆
   “ꇿꇬꁧ?”kpX彝族人网(彝人网)- 彝族文化网络博物馆
   “ꈜꎴꐮꈜꎴ。”kpX彝族人网(彝人网)- 彝族文化网络博物馆
   “ꆿꁮꀒꎂꅀ?”kpX彝族人网(彝人网)- 彝族文化网络博物馆
   ꎼꏹꀒꉈꃅꉈꅷꐺ。kpX彝族人网(彝人网)- 彝族文化网络博物馆
   “ꍰꄖꇓꈓꅀ?”kpX彝族人网(彝人网)- 彝族文化网络博物馆
   ꎼꏹꇇꉈꃅꉈꅷꐺ。kpX彝族人网(彝人网)- 彝族文化网络博物馆
   “ꀙꏢꇓꈓꅀ?”kpX彝族人网(彝人网)- 彝族文化网络博物馆
   ꎼꏹꒈꌦꀕꃅꒊꒉꀐ。kpX彝族人网(彝人网)- 彝族文化网络博物馆
   “ꀒ?”ꀋꉻꃢꌺꂶꌠꈂꀸꁉꌊꀊꅰꃅꇬꐞꀋꉅꀐ。kpX彝族人网(彝人网)- 彝族文化网络博物馆
   “ꉎꉑꉐ,ꄿꏀꌺꀋ,ꇂꑸꎿꅔꇩꏤꂷꇬꁧꌠꇆ!ꑟꑝꇂꄷꇩꏤꋋꂷꆎꈨꋻꀕꀋ?ꀊꄶꇫꐥꌠꑐꀉꎴꌠꀋꆪꑠꑵꆹ,ꑐꎔꇈꊈꁧꂄꃪꄉ,ꋧꃅꃷꎏꇬꃅꁌꐥꐮꁌꐥ,ꀋꆪꋍꂷꌠꑐꆹꉪꄚꇬꑿꌕꂷꑐꑘꀋꋌꃅꅑ。ꉪꃅꄷꋋꈚꇬꆹ,ꑐꀉꎴꍔꂄꌠꀋꆪꋋꈨꉘꉚꇎꏦꆹꀉꇨꃅꐥꐛꅹ,ꄚꃆꂮꐥꌠꌤꃅꅉꈧꆹꍏꇬꇖꂽꐨꉌꃹꑓꐛꄉ,ꊿꑍꂷꁆꌊꇩꉈꄉꍤꆫꌶꄻꁧꐮ。ꌤꃆꋋꐘꆹꂴꆽꉪꑤꇬꉉꌠꉬꐛꅹ,ꉎꊐꌠꀊꅰꃅꇬꉜꂄꄉꂂꒉꄷꃅ,ꅽꃤꋍꐘꐊꌠꉬ。ꄿꏀꌺꀋ,ꂿꃆꑿꀋꌙ,ꏟꈯꃅꊼꇅꃅꂸ!”kpX彝族人网(彝人网)- 彝族文化网络博物馆
   “ꂚꎼꏹꀋ,ꀋꍑ,ꉡꆹꈍꃅꑌꁧꀋꉆꌠ。”ꐙꁧꌋꀉꑳꈁꑓꐍꏮꀕꇫꎍꀐ。kpX彝族人网(彝人网)- 彝族文化网络博物馆
   “ꑡꒉꄷꉬ?”kpX彝族人网(彝人网)- 彝族文化网络博物馆
   “ꆏ,ꆏ,ꆎꆹ……ꆎꆹꉠꃆꂮꆏꋋꀋꐚꄷꌠꅀ?”kpX彝族人网(彝人网)- 彝族文化网络博物馆
   ꂚꄏꋋꇰꇬꊼꇅꉆꎍꈭꐨꆏ,ꊛꄉꉎꉐꃅꒊꒉꄉꉉꇬ:kpX彝族人网(彝人网)- 彝族文化网络博物馆
   “ꒆꐨꄸꌠꉬꀞ?ꐋꀨꀋ,ꀋꉬꀋꉆꌠꆏ,ꆎꆹꍏꇩꀉꏀꊿꂷ,ꆎꆹꆈꌠꉘꃀꋏꌠꆫꑘꇮꇐꐥꊿꉬ,ꇩꏤꆏꈇ,ꄩꅐꀐꌠꁏꐚꆏꈇ。ꅽꇬꉌꒊꌐꃅꄉ,ꆎꆹꐧꊭꍬꎇꄉꄚꉂꇂꅉꌠꆃꎭꆈꌠꎁꃅꌤꐘꃅꄡꑟꀋꂸ!”kpX彝族人网(彝人网)- 彝族文化网络博物馆
   ꑤꊈꎼꏹꅿꉘꁮꃆꄔꏮꀋꋋꃅꊷꆣꀕꌠꅇꋋꊱꆹ,ꀋꉻꃢꌺꋋꅲꉌꐡꌊꑓꁴꇗꀕꃅꊰ。kpX彝族人网(彝人网)- 彝族文化网络博物馆
   ꄚ,ꃅꐛꃅꄏꀕ,ꀄꂼꊯꈁꂺꑌꋍꈁꋌꀋꂻꌠꆏ,ꇂꑸꎿꅔꇩꏤꑟꑝꇂꄉꍤꆫꀱꇁꄉ,ꄧꀕꃅꌧꅪꏪꇬꄉꀋꆪꊐꅍꂶꈄꌺꎀꄺꇬꄉꋧꌦꆏ,ꀋꉻꃢꌺꋋꇷꋌꇙꈌꁧꑓꇰꉚꌠꉻꄑꌤꑘꃅꐪꑠꐘꄚꄉꄓꀐ。kpX彝族人网(彝人网)- 彝族文化网络博物馆
   “ꀊꄶꐙꁧꌋꄰꅿꈍꌺꈧꌠꉬꇮꃅꈹꌊꉹꁌꀨꇁꌐ!”kpX彝族人网(彝人网)- 彝族文化网络博物馆
   “ꑊꋌꀋꉬꃅꊾꋠꈧꌠꉬꇮꃅꈹꌊꉹꁌꀨꇁꌐ!”kpX彝族人网(彝人网)- 彝族文化网络博物馆
   “ꉱꋃꃅꇮꇐꐥꊿꀋꉻꂶꌠꁮꆗꋍꁁꏯ、ꁮꌋꋍꁁꏯꌠꑽꃤꈧꌠꉬꇮꌌꌗꐴꀋꅿꊧꀋꅑꇫꎭꌐ!”kpX彝族人网(彝人网)- 彝族文化网络博物馆
   ꀋꉻꃢꌺꄷꀋꉉꑴꇬ,ꈀꄸꑌꇫꅉꐚ,ꋍꅿꈔꄮꑟꇁꀐ。ꄚꊿꋋꉪꇬꀋꑟꌠꆏ,ꋍꉔꀉꄂꃅꁱꂷꀉꒉꀨꈧꌠꆹꑤꍰꇓꈓꋋꂷꇬꃅꅑꈴꌐꀐ。ꃅꄜꄷꌦꆏ,ꂚꄏꂶꌠꆹꇁꌊꀋꉻꃢꌺꅿꀋꆪꂶꈄꌺꈧꌠꏢꁮꇬꑟꇁ,ꉌꂵꀉꇖꐆꃅꋍꏭꉉꇬ:kpX彝族人网(彝人网)- 彝族文化网络博物馆
   “ꆎꆹꊨꏦꑞꃅꋭꌠꄡꇗꑞꃅꅊꇈ!ꇩꏤꎆꃀꌌꁌꄡꀘ,ꀋꆪꍔꂄꈧꌠꄈꀧꄉꄎꄷꆏ,ꉹꁌꋍꏅꌠꆹꈍꃅꑌꅽꑆꊋꎺꌠꉬ!ꄈꌋꆀꍔꃚꑌꄡꇗꅽꑆꊋꎺꌠꉬ!”kpX彝族人网(彝人网)- 彝族文化网络博物馆
   ꊁꑲꆀꋋꅉꐚꇬꆏ,ꐳꈌꏮꌊꋍꇬꌉꇁꌠꆹꑤꊈꅿꉪꐪꑌꀋꉬꅊꇈ。ꂚꄏꍏꇬꄉꃀꈿꇈꀱꇁꊌꀋꃅꀕꌤꋋꐘꇬꏢꇋꀐ。ꃶꐚꃅꉉꑲꆏ,ꋋꆏꋌꑤꊈꀨꇬꎼꏹꂶꌠꄻꌠꐥꐨꇬꄽꂫꃢꌠꄐꌐꌠꉬꅊꇈ。ꋋꆏꑤꊈꆹꋋꇅꃅꂓꐥꌗꀋꐥꀐ,ꐪꊛꄉꄻꀃꈈꀉꒉꁬꌠꇬꄀꄉꌠꂓꀻꁱꄉꏡꌠꑌꇿꇬꃹꁧꀋꐚꀐ。ꑤꊈꀨꇬꎼꏹꃅꄈꌠꂚꄏꂶꌠꆹꊿꇱꈢꌊꄩꆹꂿꃅꇬꀋꑟ、ꀏꆹꅉꃴꇬꀋꑟꌠ“ꇌꉻ”ꂷꇬꊐꇫꎭꀐ。kpX彝族人网(彝人网)- 彝族文化网络博物馆
   ꀋꉻꃢꌺꃨꆰꏸꈧꀙꐯꀙ,ꎭꃤꆹꋋꇅꃅꋍꇬꇁꌠꋋꌧꄇꇖꀕꀐ。ꋋꆹꊨꏦꂶꌠꄈꀧꄉꄎꑟꉂꌠ,ꀋꆪꍔꂄꑐꀉꎴꈧꌠꄈꀧꄉꄎꑟꉂꌠ。ꎹꉼꍗꑴꉙꂘꌠꌌꇨꐯꇨꃅꀕꃄꄮꇬ,ꋌꁳꇩꉈꇂꑸꎿꅔꇬꐛꌠꑟꑝꇂꇩꏤꄉꍤꆫꁧꄎꌠꆹ,ꋋꉜꉪꇬꑤꊈꆹꄐꅍꀄꊭꃅꐥꌠꀋꉬꌠꉬ!ꂚꎼꏹꆹꄐꅍꀄꊭꃅꐥꌠꌠꀋꉬꌠꉬ!ꀋꄹꄷꇤꐳꃅꆀꃅꆹꈈꊁꊰ、ꌟꎭꌠꐛꐪꄺꀱꂿꄷꇬꆹ,ꂚꎼꏹꋋꂷꌟꃅꌳꉔꌧꅍꐥꑠꈉ、ꑠꀋꐥꀋꉆꌠꉬ!ꋋꆹꀱꆽꀰꆽꃅꋍꉔꇀꅉꀕꃅꀋꀀꃅꌋꏢꇬꎷ。ꑠꃅꊼꇅꉪꇬꎷꇬꆏ,ꋋꇅꃅꊨꏦꆹꁱꂷꀉꒉꀨꇬꅑꌠ“ꁮꆗꋍꁁꏯ、ꁮꌋꋍꁁꏯ”ꃅꌠꑽꃤꈧꌠꑌꋋꎺꇁ。ꀋꉊꂴꆽꆹ,ꉌꃀꉪꅉꆹꑟꉆꑵꉬꑲꆏ,ꋋꆹꉌꂵꀖꆏꇭꀧꌦꃅꉌꂵꂶꌠꀖꌊꄉꊿꀦꑟꉂꌠ,ꀖꌊꄉꄻꉹꁌꋍꏅꌠꀨꑟꉂꌠ,ꋋꆹꇯꍝꃅ“ꁮꆗꋍꁁꏯ、ꁮꌋꋍꁁꏯ”ꄉꈂꀸꑍꂷꆹꅑꀋꋻ、ꃄꇐꑍꑵꆹꃅꀋꋻ;ꀃꑍꆏ,ꋧꃅꋋꂷꃅꐛꐈꁏꀐ,ꌎꆽꁏꉺꏒꅉꈚꌠꇬꌄꈌꌬꀐ,ꋋꆹꈍꃅꑌꑊꋌꋋꁥꇬꊼꇅꈹꒃꀬꀱꑵꉬꀋꆾ?kpX彝族人网(彝人网)- 彝族文化网络博物馆
   ꊿꄹꁆꆏꂽꍫꏁꇙꀱ,ꂚꄏꇝꂱꏭꁏꇥꀯꈝꃀꊨꀖꃀꈿꄉ,ꊭꄏꄉꋋꂷꌠꌌꇇꋏꑗꉘꍈꂿꄷꄮꇬꆏ,ꁮꅐꊖꆈꇬꄉꉱꅷꁮꐚꊖꁍꇬꃅꑞꌠꁱꂷꀉꒉꑠꈧꊿꇱꑕꇬꄀꄉꌐꌦꀐ:kpX彝族人网(彝人网)- 彝族文化网络博物馆
   ꏟꈯꃅꁨꇐꐥꌠꈝꃀꍬꌠꂚꄏꌋꆀꁷꐞꐝꉅꇫꎭ!kpX彝族人网(彝人网)- 彝族文化网络博物馆
   ꀑꇬꀋꑴꃅꃀꍗꑮꅿꇝꂱꈝꃀꏡꌠꐏꁈꊋꐛꅊꇈ!kpX彝族人网(彝人网)- 彝族文化网络博物馆
   ꀍꃈꀱꆽꃅꋍꃢꇬꊝꇬꑋꑆꊋꐥ,ꄷꀋꁧꄜꇲꎼꇁꌠꌤꃆꈧꌠꆹꈨꂰꊿꋋꈨꀋꋻꌠꈧꇐꀉꄂꉬꌐ;ꉈꑴꆏꋋꆹꃛꁙꀉꃚ、ꀂꏾꀉꒉ、ꐛꐨꊽꐬꆠꄉꊿꇬꏦꌐꐛꅹ,ꋋꆹꋋꇅꃅꊿꇱꌌꌅꈌꀉꒉꌠꁵꄉꌬ,ꋌꁳꌎꆽꁏꉺꏒꅉꇬꏠꍤꌠꒉꄻꄉꎻꀐ。kpX彝族人网(彝人网)- 彝族文化网络博物馆
   ꄚ,ꐏꁈꄐꍈꃅꄉꌠꋋꆹ,ꀀꈭꎂꑵꌠꐤꅉꐥꅉꆽꇨꇁꀐ。kpX彝族人网(彝人网)- 彝族文化网络博物馆
   ꋍꉔꇀꅉꀕꃅ,ꌋꁁꌞꊿꀀꃅꆈꌣꀕꄮꇬꆏ,ꋋꆹꑓꍻꀕꃅꎇꀀꈤꄩꀀꎍꇬꎷ,ꋋꆹꉌꎭꈌꌂꌠꇱꆽꒆꀀꑌꇴꒉꀋꅲꑟꃅ。ꋋꆹꀋꇊꇬꆏꇓꐚꉹꁌꈧꌠꉬꇮꃅꑠꃅꇴꏅꌠꋋꈨꇁꇬꎷ:kpX彝族人网(彝人网)- 彝族文化网络博物馆
   “ꆿꃀꌺꈧꌠꄩꅐꆹꂯꄷ,ꀋꉻꃢꌺꂶꌠꌉꈔꇫꎭ!”kpX彝族人网(彝人网)- 彝族文化网络博物馆
   “ꈌꆹꐥꍂꈍꄮꑋꊾꐔꋠꇬꎷꌠ,ꆿꃀꆹꈍꄮꑋꊾꎸꋠꇬꎷꌠꉬ,ꀋꉻꃢꌺꆹꇷꐈꊈꀋꐈꇬꎷꌠꉬ,ꉆꐥꃅꒃꌊꌉꈔꇫꎭꇁ!”kpX彝族人网(彝人网)- 彝族文化网络博物馆
   ꋋꆹꀄꂼꂻꀋꌒꑠꈁꀋꉬ,ꑳꈐꏭꊖꁍꇬ,ꀙꐎꀊꐎꌠꌌꁱꄉꌠꀋꉻꃢꌺꂶꌠꅥꆿꐛꇫꎭꃅꌠꄀꅇꋋꊌꂿꐝꄧꀕꀐ。ꑠꃅꑴꇬꀋꉻꃢꌺꆹꇯꍝꃅꉌꆐꀋꅑꑓꆐꀋꋠꌠꉬ。ꂚꄏꇬꈭꋏꁌꄺꂿꄷꐛꅹ,ꇩꏤꎆꃀꌌꊙꌊꇁꌠꀋꆪꍔꂄꑐꀉꎴꈧꌠꀧꌋꃅꂿꄷꐛꅹ,ꋋꆹꃶꐙꃅꉪꉩꌋꆀꀒꇬꐬꇓꁭꇁꄉꏾꃅꎌ。ꋍꃢꇀꅉꀕꃅꊨꀖꃀꈿꌐꄮꇬꆏ,ꋋꆹꃶꐙꃅꂿꃅꇳꃚꀉꒉ,ꂶꉐꀄꊭꃅꐛꌠꃅꐙꇬꎷ。ꋋꆹꉇꉈꃅ、ꃶꇌꂾꇌ、ꃄꈌꄐꃅꊾꋋꅲꑲꀋꌧꌠꑡꀕꌌꏈꀋꐚ,ꃶꐙꃅꃄꆳꈹꉍꈄꇬꊐꑵꌠꉬ。ꋋꆹꋍꉪꐪꉪꇐꐋꀋꌡꌠꐥ――ꋋꉜꇬꑠꃅꐙꌠꃅꈎꃅꆪꆹ,ꇯꍝꃅꈢꋒꈴꅐꆹꀋꁧꑲꆏ,ꊾꂃꃶꐙꌠꆹꈍꄮꑋꌩꑻꌊꁧꎴꇁꀋꉆꀐꌠꉬ;ꑠꃅꐙꌠꃅꈎꃅꆪꆹꀋꄹꄷꈴꅐꈢꋒꌐꄷꆏ,ꇇꃀꍑꄯꒉꁱꑲꆏꈍꃅꐙꌠꊨꄅꐞꉅꇁꌠꉬ。ꑞꑌꁯꒌꁭꒌꃅꃰꐺꌐꌠ,ꂱꑱꊨꏦꇭꀧꂶꌠꀉꄂꇯꍝꃅꀕꌠꉬ!ꁧꀑꁨꄷꆏꌩꏦꅐꀋꐒ,ꎵꃀꁨꄸꆏꀇꐒꆹꀋꐒ。ꑠꅹ,ꊨꀖꃀꈿꅉꇬꉬꄿꂿ,“ꇌꉻ”ꇬꀀꄿꂿ,ꋋꆹꅉꀕꃅꒃꇮꉉꇮꃅꂚꄏꋋꄝꎬꃚꆹꍈꀋꋻ,ꀊꅰꃅꂶꊂꂷꅑꀋꋻꌠꉬ。kpX彝族人网(彝人网)- 彝族文化网络博物馆
   ꋋꈨꃅꇬꑞꂿꄷꐛꅹ,ꋋꆹꇯꍝꃅꎭꅗꅧꅗꀉꂿꈧꊰꀕꀐꌠ,ꄷꀋꁧꑍꑵꐯꇯꄈꀧꌠꂿꃆꄝꇬꀋꎭꀋꉆ,ꉌꂵꆅꌠꋰꄉꀋꆪꍔꂄꑐꀉꎴꈧꌠꄝꀑꇬꁮꇫꎭꀐ。ꑸꆀꇁꄷꆏ,ꀋꉻꃢꌺꆹꑸꆀꋚꇢꒉꇢꌠꋋꅉꐚꅞ。ꋋꉪꇬꆹ,ꇩꏤꎆꃀꑌꀅꌳꃅꎹꈹꉆ,ꉾꃪꌠꀋꆪꍔꂄꑐꀉꎴꈧꌠꑋꀅꌳꃅꉈꋍꃢꊙꎹꉆ,ꈍꃅꉉꄿꂿ,ꂚꄏꂶꌠꄈꀧꄉꄎꑲꆏ,ꀉꁁꆹꑡꑌꃅꉆꌐ。ꄽꂫꆏꋋꆹꉌꂵꀉꇨꃅ,ꉌꃀꈐꏭꄉꎏꂷꑝꄉ、ꀉꐩꆿꊋꏗꃅꎭꐚꋄꒉꇱꄉꌠꀋꆪꍔꂄꑐꀉꎴꈧꌠꎸꌊꑸꆀꋍꊨꏦꇬꉌꒊꌠꏭꆦꑝꏮꀠꌌꇁꃲ,ꄚꐪꊛꄉꐏꁈꄐꍈꑋꅉꑌ。ꑓꏮꑸꆀꂶꌠꎭꐚꋄꒉꇱꄉꌠꀋꆪꍔꂄꑐꀉꎴꈧꌠꎸꈧꌠꄹꈂꀸꇬꊐꄉ,ꀋꂄꂂꂿꉘꃅꌌꀅꌳꀅꌳꃅꈽꌠꂿꇬꆏ,ꋍꉌꂵꆹꌦꅪꅐ,ꉌꊭꅐꀱꉌꊭꉦꃀꇬꍣꌠꌡꇫꎍ。ꋍꊨꏦꀃꅉꂶꌠꆹꑸꆀꇱꌌꈽꋠꑝꋠꅷꑍꅝꌠꌡ:ꀋꆪꍔꂄꑐꀉꎴꋋꊰꂷꌟꆹꋍꅿꌤꑘꐘꉬ!ꌤꑘꆹꃅꋊꋋꂷꅿꋠꄮꉬ!kpX彝族人网(彝人网)- 彝族文化网络博物馆
   ꊿꋋꉪꇬꀋꑟꌠꆏꊂꏭꊛꄉꇁꌠꌤꈧꌠꄉꀊꅰꃅꊽꉌꂵꃚꅊꇈ。ꋋꆹꊨꏦꌋꆀꐏꎭꊿꊰꇖꑻꌠꌧꂓꏪꇬꄉꐯꇯꉮꌸ,ꊿꇱꇓꄃꄻꇫꎭꀋꇈꌠꉬ,ꑡꃅꄉꌤꃆꑠꐘꇫꅐꇁꌠꉬꂯꆏ?ꋧꃅꋋꂷꇬꈨꑛꉘꁮꆹꐥꐮꑴꌦꑲꆏ,ꈨꑛꉘꁮꑞꃅꇬꉚꀋꇁꌠꉬ。ꋍꉪꇐꄃꐛꀋꇊꁧꈧꌠꋋꇅꃅꍄꇽꁮꁞꇀꌦꀐ。ꋋꆹꇬꊎꌧꂓꏪꇬꄉꋍꎴꉘꀋꇈꃅꅐꌠꌤꃆꐘꌠꅿꃶꐙꈻꇐꉪꈽꅷꐺ。kpX彝族人网(彝人网)- 彝族文化网络博物馆
   ꋍꅿꉪꇐꉪꏣꆹ,ꄧꀕꃅꄚꇬꄉꇬꅷꁧꌠꉬ!kpX彝族人网(彝人网)- 彝族文化网络博物馆
   ꉹꁌꏓꂱꆹꇰꌠꀋꉬ,ꋀꊇꆹꀑꁮꅺꐳꇈꌳꃈꌳꉔ、ꌳꃈꌳꈄ,ꊋꃤꁧꀑꒊꀋꋌ,ꋧꃅꐩꋊꆹꏓꂱꇱꁰꄻꅐꇁꌠꉬ。ꌧꂓꏪꇬꄉꉘꀋꇉꃅꀱꑤꍰꇓꈓꇬꑟꇁꊂ,ꋋꆹꈧꌦꀋꈨꌦꃅ、ꒊꇙꒈꇙꃅꊋꃤꋋꈨꋌꂿꀐ,ꄷꀋꁧꂁꆈꄉꊋꃤꋋꐘꇬꊋꄏꐺ。ꎭꂵꊞꐂꌋꆀꀊꄸꀈꏦꑌꂁꄉ“ꇌꉻ”ꇬꃹꆹꌠꆹ,ꈍꄮꇬꇰꆐꍶꑭꁆꅔꅐꑵꌠꉬꀐ。ꐒꀊꄶꎸꅍꌍꑓꂴꆽꌧꂓꇬꄀꄉꌠꃆꀞꀊꐎꀉꋩꂷꆹ,ꀋꉊꂴꆽꋍꀉꄉꅿꋩꃅꉬ,ꀋꑍꊂꀉꉘꀋꐛꌦꂿꄡꇗꌧꂓꏪꇬꄉꋍꊌꂿꋺ,ꋋꆹꉉꄻꀋꅐꃅꑡꑌꋋꅉꐙꐝꉅꌐꌠꉬ。ꋋꆹꉈꀕꃅꇬꀧꌋꃅꂿꄷꐛꅹ,ꄽꂫꆏꌤꊽꃨꆰꑠꀋꅐꌠꉬ。ꋋꆹꂯꂚꄏꂶꌠꋀꊇꐊꁧꌠꉘꇉꌠꉬ。ꋍꅿꉪꇐꉪꏣꆹꀊꅰꃅꑓꂿꐝꉅꇁꃲ,ꋋꇬꉌꑇꌠꆏꆿꃀꁡꇤꃰꊿꆹꈍꃅꑌꂚꄏꇬꈴꄿꌠꌤꃆꃅꄏꌠꉬ、ꈍꃅꑌꆃꎭꃅꇬꈴꄿꌠꌤꃆꃅꄐꌠꉬ。kpX彝族人网(彝人网)- 彝族文化网络博物馆
   ꌕꊰꎖꈎꂿ。ꇓꐚꁡꇤꅐꁖꀋꋻꄷꌠꅀ?ꋋꆹꊿꏠꐮꆼꍅꌠꃆꄔꇱꐗꎼꇁꌠꉬ。ꀃꑍꆏꃆꄔꀉꒉꋋꁙ,ꑡꈧꋌꐗꎼꇁꂾꄸꀋꐚꀐ?ꋋꆹꌙꈈꀕꃅꉪꇐꉪꏡꊌꀋꃅꀕ,ꋋꆹꄆꍣꇬꄉꀱꑤꍰꇓꈓꇁꌠꈝꃀꇬꄉ,ꉘꀋꇈꃅꇴꒉꉻꒉꌠꌋꆀꈌꁯꑓꂷꊽꉌꈴꌠꄿꏀꂷꇱꒃꅜꀐ。ꄚꋋꈨꆹꀊꅰꃅꋍꅿꉪꐪꑞꅉꐛꅉꋋꇱꀊꅰꃅꄹꆷꎼꆹꀐ。kpX彝族人网(彝人网)- 彝族文化网络博物馆
   ꌞꊿꈧꌠꋍꇬꅥꄂ、ꊨꀖ,ꄷꀋꁧꊾꇰꃅꇏꌟꃅꋍꇬꁒꐀꎲꊐꈧꌠꉬꇮꃅꋋꋰꄉꌐ。ꋋꆹꌕꊰꀋꈎꌦꇰꆐ,ꇭꀧꃀꀋꌠꃅꉌꂵꂴꆽꂿꌠꀐ,ꊿꏠꐮꆼꍅꌠꒆꐨꒆꄷꐛꅹ,ꋋꆹꊿꏠꇱꆼꍅꆹꍑꄉꐥꐨꐥꌒꌠꈍꑋꐜꀋꈨꀐ。ꋧꃅꃰꊿꈁꄷꂷꀋꌦꀋ?ꊿꐤꀋꌦꌠꐥꀕ?ꃮꐥꀋꐗꌠꐥꀕ?ꊿꐥꀋꌦꌠꀋꐥ,ꃰꃅꄇꏓꑌꇬꌦ,ꀉꑳꇨꀠꑌꇬꌦ,ꀑꐎꀍꆈꑌꇬꌦ;ꊿꐥꀋꌦꌠꀋꐥ,ꊿꐥꀋꌦꆏ,ꃄꊂꊿꀋꅓ;ꃮꐥꀋꐗꌠꀋꐥ,ꃮꐥꀋꐗꆏ,ꊫꊂꃮꀋꅓꑠꑵꉬ。ꌦꆹꌦꄮꀋꉬꑴꌦꇬ,ꄚꌦꇬꃅꅉꆹꃪꈚꉬꀐ。kpX彝族人网(彝人网)- 彝族文化网络博物馆
   ꆿꃀꁡꇤꆹꋍꒅꅉ。ꄚꇬꃰꊿꌋꆀꊖꆈꆹꋍꇬꉘꉚꋻ。ꋋꆹꇬꑆꊋꊌꀱꀋꂥꐛꅹ,ꅉꀕꃅꑊꏦꎲꄏꇬꎷ。ꀋꆪꍔꂄꑐꀉꎴꑵꌠꑤꋋꂷꇬ,ꃅꀑꃅꌗꌋꆀꐮꄏꐯꅉꄷꑲꆏ,ꋋꆹꂴꆽꌌꆿꃀꁡꇤꄉꉘꅉꂷꄻꄉꉘꇈ,ꉹꁌꋍꏅꌠꁳꀉꏀꃅꄻꀱꄉꌠꎇꃀꍅꑓꉘꉚꏡꁈꁁꌠꏯꈲꏣꐓꂿꀕꌠꈋꑟꑞꉂꌠꉬ。ꄚꀃꑍꆏ,ꉪꇐꋋꈨꆹꉬꇮꃅꐈꇁꀊꄶꒉꐊꇿꈴꁧꌐꀋꐚꃲ,ꐛꒆꃅꀈꈥꉪꌠꐛꀐ!ꋋꂚꄏꎼꏹꇱꀊꄶꌦꌠꇇꈐꇬꄉꇑꌊꇁꌠꇭꀧꋋꂷꆹ,ꀋꃉꀃꑍꆏꌬꐨꆹꋍꍈꀉꄂꐥꀐ。ꋋꆏꐞꌐꀐꌠꌩꇵꈑꆠꈧꌠꐊꄉ,ꐈꇁꈲꋌꑭꐛꀖꐛꄉ,ꊏꑍꀊꄶꋍꃅꄷꁧꀑꇉꄩꐥꄉꁬꃨꆰꌺꈧꌠꒆꄉꍔꄅꄕꑟꉂꌠꉬ。kpX彝族人网(彝人网)- 彝族文化网络博物馆
ꁡꇤꇬꃅꐙꐛꐨꈧꌠꆹꇯꍝꃅꀋꉻꃢꌺꋋꎼꌗꇑꄉꏽ。ꃰꊿꈧꌠꀅꌳꌺꃅꆈꄉꇫꈌꍣꐺꌠ,ꃰꊿꈧꌠꇣꐳꃅꈛꎼꌠꑭꁘ,ꃰꊿꈧꌠꐮꌂꏸꈌꀕꌠꑓꋪ,ꃰꊿꈧꌠꅿꑘꀋꒃꌠꐛꄟ……ꄽꂫꆏꋋꆹꉪꏡꄽꂫꆏꊌꐨꐥꀐ,ꋋꀊꅰꃅꃨꆰꏸꈨꃅꀋꐛꀐ:ꈍꃅꌠꉬ,ꆿꃀꁡꇤꎁꃅꑤꍰꇓꈓꌟꃅ,ꀊꄶꊿꄷꌠꄩꅐꄉꌽꀖꌠꌤꃆꀋꅐꂿꄷꇬꆹ,ꁡꇤꑭꊂꐙꁧꌋꈧꌠꉬꇮꃅꏓꐯꇯꈢꋍꈚꊐꄉꌉꇫꎭꌐꄷꌠꅀ?!ꋋꆹꐩꋊꉈꑴꎞꌠꉬꀋꉬꅀ?……ꋋꆹꀊꅰꃅꃨꆰꏸꈨꌊꉌꂵꑌꅉꀋꑌꃲ。ꌾꀖꌠꉪꇐꈐꏭ,ꋋꇅꃅꉘꁮꑭꌟꃅꐍꌬꀕꑠꂷꐛꄉꐂꅔꁖꇁꀐ。ꋋꎺꇁꑝꑟꇂꄉꍤꆫꌶꄻꄮꇬꄀꇁꀐ,ꋋꆹꊾꇱꁨꌊꈁꑓꉱꄉꌠꀛꐂꂷꉜꆹ,ꀊꄶꌞꇩꏤꊿꈧꌠꆹꆫꑘꌤꃅꊿꋋꂷꆹ,ꀊꄶꁱꅐꀉꁁꈜꎴꃅꄷꐛꌠꆀꃅꆸꈈꉬꄷꄉ,ꀋꃋꑲꆀꐙꁧꐧꋦꇬꄉꇰꀋꃀꌠꍏꇩꇭꍣꄈꄰꇱꁌꄝꄉꈭꆶꇁꌠꅉꐚꅜꈭꐨꆏ,ꀛꐂꅉꋋꂷꃅꒉꈾꌟꃅꈾꇁꀐ。ꀊꄶꀛꐂꑵꉙꅉꇬꉘꃹꌠꉌꃹꊿꈧꌠꆹ,ꐩꋊꎵꑳꀕꌠꃅꀺꀋꑴꃅ,ꐮꊂꈹꄉꂱꑱꈁꑓꇬꉱꎍꌠꉱꁁꈧꌠꇔꇫꎭꄉ,ꆏꂅꉢꂅꏿꃅꀋꉻꃢꌺꂶꌠꋀꊇꇱꐕꌊꈍꂥꃅꀕꄉꇴꏅꐺ:“ꍏꇩꃪꈎ!”“ꍏꇩꃪꈎ!”ꑡꉂꏣꑵꋀꊇꉌꃀꉂꑟꋋꌌꑠꃅꈷꄏꌠꉬꂯ?ꋋꆹꋍꅿꑭꍔꀒꁨꉜꄉꏹꌠꇰꀋꃀꌠꁍꇩꂷꁨꒉꄷ。ꋋꈭꐨꆏ,ꋋꆹꀊꅰꃅꊨꏦꇰꀋꃀꌠꁍꇩꂶꌠꉂ,ꀊꅰꃅꂱꑱꊨꏦꃄꈌꉂ。ꑠꅹ,ꀋꃋꋌꇅꇬ,ꋋꆹꀊꅰꃅꉌꎭꌤꑘꂱꑱꃄꈌꄉꅐꂯꌠꏢꇋꂿꃆꆹꑟꐥꀐꌠꉬ。kpX彝族人网(彝人网)- 彝族文化网络博物馆
   ꋋꆹꀋꇊꇬꊾꂿꇓꁨꐛ、ꊿꌦꑘꄃꐛꃅꐮꌉꌠꐛꐪꀊꋨꈧꋋꂿꀐꌠꀋꇊꌡ。ꋍꊨꏦꀃꅉꃅꄉꇬꆹ,ꋋꆹꂱꑱꊿꏠꑽꃤꆈꏸꀕꌠꎁꃅꀕꑽꃤꀵꄉ,ꋍꌦꐳꈧꌠꑘꆘꅝꌐꇬꑌꑽꀋꐥꌠ。ꄚꑭꋧꃅꊿꏠꑠꆏ,ꈍꃅꇭꀧꀂꏾꄉꋀꊇꇬꌉꈔꉆꂯꆏ?ꃴꄿꏁꍅ、ꀊꄸꀈꏦ,ꉈꑴꎭꂵꊞꐂ,ꉢꀋꉻꃢꌺꆹꇯꍝꃅꆍꊇꇭꍣꄈꏭꊿꏠꉂꏣꅼꐯꅼꃅꐥꌠꉢꅈꐚꌠꉬ;ꄚꑠꃅꑴꇬ,ꆍꊇꅿꊽꐬꆠꌠꏤꐪꋌꏡꆹ,ꇯꍝꃅꀉꇨꀑꁮꌠꃅꐪꉬ,ꋋꆹꐥꍂꃅꉌꂵꋍꂷꑌꄉꏓꂱꁧꃤꃅꌠꄈꅿꍔꊱꑌꉬ。ꆍꊇꉠꇬꉌꀋꒊꄷꌸ,ꉠꇬꉪꑽꄷꌷ,ꄚꉢꀋꉻꃢꌺꆹꀋꅑꑘꀵꀙꀋꐥꃅꆍꅥꌦꇫꎭꄷꑌ,ꉡꆹꑓꀠꀕꃅꆍꅿꋍꇅꉪꀋꐚꌠꒉꄷꃅ,ꇰꀋꃀꌠꇭꍣꄈꋋꂷꇬꆹꍍꋉꅫꋉꀋꉆꌠꉬ。ꆿꃀꁡꇤꃄꁕꋋꂷꇬ,ꉘꃀꄚꇬꄉꀖꄻꇁꌠꆹꂚꄏꎼꏹꉬꄷꆏ,ꋍꅿꁣꏙꐨꆹꀋꎪꃅꀊꄶꄉꐴꅿ、ꃨꈭ、ꂷꅑꂷꈯꀐꌠꉬ。kpX彝族人网(彝人网)- 彝族文化网络博物馆
   ꑽꃤꀵꌠꉂꏣꈧꌠꉉꋊꀐ,ꋋꆹꊖꋒꅫꏻꀕꌠꅉꇬꄉꄓꇫꑌꈭꐨꆏꄓꇬꉆꆹꏡꉪ,ꋋꆹꌉꆳꋋꐘꏢꇋꇫꎭꁦꏢꉪ。kpX彝族人网(彝人网)- 彝族文化网络博物馆
   ꄚ,ꋋꆹꊾꇱꅥꇭꀧꇖꌋꋋꂷꃅꀙꇨꀕꐛꅹ,ꋋꆹꊖꋒꁯꄸꏡꀋꏮꃄꅉꇬꄉꊼꇅꀉꄂꇙꋏꇙꋏꃅꈩꅷꐺꄎ。ꍵꂫꄮꐰꃄꆳꆹ,ꇁꊿꌶꇬꇯꍝꃅꃀꅉꆐꈻꅷꃷꅍꄖꀕꇬꑟ。ꋍꂱꀯꌦꅑꏡꌠꌦꏮꀉꋒꈧꑕꇬꎏꎍꑴꌦ。ꀅꌳꌺꃅꌌꊼꇅꏶꂿꉚꇬꆏ,ꉌꂵꋋꂷꃅꁦꉘꀕꇈꁤꇅꀕꇫꎍ。ꃹꅼꃅꋋꅉꐙꌠꆏ,ꌉꆳꋋꐘꇬꏢꇋꂿꄷꇬꆹ,ꋋꀋꉻꃢꌺꅿꊋꃤꑌꀋꉬꌠ,ꋋꀋꉻꃢꌺꀉꄂꑘꑌꀋꉬꌠꉬ。ꋋꈂꀸꊼꇅꁉꄷꆏ,ꉐꆂꈘꉆꌠꉬ;ꅇꉉꀋꌐꌦꇬꆏ,ꃛꆺꁙꊨꊾꇱꆽꋏꈘꇫꎭꉆꌠꉬ。ꑤꋋꂷꑭꊂꃅ,ꊿꇯꃅꇏꋋꐘꇬꏢꇋꄎꌠꆹ,ꀉꁁꊿꂷꇬꀋꐥꀐꌠ,ꇯꍝꃅꂚꎼꏹꀉꄂꐥꌠꉬ!ꋋꆹꈍꃅꑌꀋꎪꃅꉆꐥꃅꌉꆳꋋꐘꈨꇐꃆꂮꄜꌞꌊꂚꄏꇰꑲꆀꈔꀋꇊꑲꆀꈭꅐꇁꉆꌠꉬ。kpX彝族人网(彝人网)- 彝族文化网络博物馆
   ꋍꉪꇐꀊꅰꃅꍄꇽꀕꇈꁮꁞꇀꌦꀐ,ꋋꆹꈍꃅꌦꌠꇬꄉꆶꈭꅐꌠꉪ,ꋋꆹꈍꃅꑲꆀꈨꇐꋋꏢꄜꑣꌊꂚꄏꇰꌠꉪꇫꎍ。ꋋꇅꃅ,ꋋꈢꅉꁿꇓꉈꏭꇴꃚꑠꄲꇫꇰꐚꇀꌦ,ꉘꀋꇈꃅꇯꍝꈀꄸꂷꆶꁧꀋꐚꀐ。ꋍꇬꐏꁇꌠꂱꀘꈧꌠꈀꐞꆜꄉꈀꄸꂷꉬꃅꇴꐺꌠꌡ,ꄚꌞꊿꑡꉬꄷꅇꀱꌠꆹꀊꅰꃅꋋꇬꅲꐝꀋꉅ,ꀊꅰꋌꅲꉌꂵꇬꇯꊐꀋꄐ。kpX彝族人网(彝人网)- 彝族文化网络博物馆
   ꃅꆳꈧꌠꀃꈈꌍꑓꇬꄉꑆꈐꏭꃹꇁꌐꀐ,ꐪꊛꄉꊿꏇꃚꌋꆀꈌꃮꃚꑌꇬꂿꇫꈌꐚꇁ。ꀃꈈꉈꏭꀧꇖꊪꇖꃅꑭꁘꂾꃚꑌꇬꂿꇁ,ꁡꇤꋋꂷꃅꌾꁘꀙꐯꀙꃅꎍꀐ。ꋋꀂꏾꐕꎼꆹꇬꆏ,ꃄꆳꈧꌠꇁꋍꈁꑓꇬꌸꇬꅅꃅꌺꌌꍓꌠꌡ,ꂷꉐꐊꄉꐛꌠꃰꈧꌠꇁꋍꀇꐒꌤꀙꐯꀙꌠꂱꀯꋑꌠꋋꎼꅫꏻꀕꀐ。ꋋꇭꀧꇖꌋꃅꊋꇤꄉꑓꋪꊼꇅꁉꎼꆹꇬꆏ,ꃅꃴꁬꌠꆹꉽꐯꀋꃀꁍꉱꂷꀋꏮꆈꃅꆈꏸꀕꇬꎍ。ꋍꇬꐏꁈꌠꂱꀘꈧꌠꆹ,ꅳꍩꐧꑭꀵꌊꀱꒊꀱꇁꃅꁿꇓꂶꌠꈭꇌꏭꅷꐺꌐ,ꋍꇅꆏꈐꃹꇀꌦ,ꋍꇅꆏꉈꅐꁧꌦꃅ,ꋀꊇꐛꐪꐛꄟꈧꌠꇬꄉꉜꎼꇁꇬ,ꃀꅉꆐꇨꊸꐯꇨꊸꃅꃄꐡꊖꑳꇁꂾꑌꅉꑌꀋꄐ,ꉆꅉꉆꀋꄐꃅꀥꅷꐺꌠꀍꀠꈧꌠꌡ……kpX彝族人网(彝人网)- 彝族文化网络博物馆
   ꌍꑓꉈꏭꆹ,ꃆꀞꀆꃚꇬꊎꀋꆏꃅꀆꅷꐺ。ꅳꍩꀵꐺꌠꂱꀘꈧꌠꁖꉈꏭꈴꁧꌦꀐ。ꋋꆹꊋꋠꐯꊋꋠꃅꇭꀧꋍꃢꁏ,ꉈꑴꋍꃢꊛꄉꁏꌦꇬꆏ,ꄽꂫꆏꆺꀕꂃꅷꌍꑓꂴꆽꅞ,ꑓꋪꁉꄉꊼꇅꉜꇬꆏ,ꃆꀞꃅꊀꄅꀋꄉꑠꂷꆹꀊꄶꁿꇓꂶꌠꇂꃴꊖꁍꏢꁮꇬꄉꏜꋠꅷꇬꐺ。ꁡꇤꇬꋑꇬꂿꃚꉺꏒꄹꇫꈌꐚꇁ,ꊛꄉꄔꊏꂷꇭꋍꁙꇈꋍꁙꃅꄔꌊꌬꅪꇅꀕꇫꎍꀐ。ꑞꃅꑌꋑꇬꂿꃚꌋꆀꁤꇅꀕꌠꆹꋍꈐꊋꋌꇱꀀꄖꎼꇁꌠꉬꈜꁭ,ꊾꇱꅥꌦꂯꄉꌠꊾꋌꂷꆏ,ꀋꎺꃅꐂꇁꏨꆉꂷꀋꏮꃰꌍꑓꇬꎑꎌ。ꋋꆹꇭꀧꋋꂷꃅꀂꋌꏭꉜꄉꐂꂯꄉꄮꇬꆏ,ꇇꁆꇱꌭꇯꏢꀕꃅꄉ――ꉜꅊꇈꂿꆏ,ꅳꍩꀵꐺꌠꂱꀘꂶꌠꀱꉈꑴꇀꌦꄉ,ꋋꌋꅜꅊꇈ。ꇯꍝꃅꀉꑳꀋꀬꑲꆏꈍꃅꑌꆿꃀꇬꒃꅥꀋꄐꌠ,ꂱꀘꋋꂷꅥꇬꄉꁈꀋꁧꇮꇬꆹ,ꈍꃅꑌꆿꃀꁡꇤꅿꉮꃆꎭꃤꆹꏢꇋꀋꄐꀐꌠꉬ;ꋋꇅꃅꀋꉻꃢꌺꂶꌠꎏꂷꊼꇅꑝꇈ,ꊋꃤꈍꃅꑠꃅꇨꇁꌠꉬꀋꐚ,ꋋꀜꇁꂱꀘꂶꌠꇬꄀ。ꂱꀘꂶꌠꀉꂷꀉꑷꄹꆅꇖꌠꇬꄉꋋꐂꌍꑓꉈꏭꈴꁧꀐ,ꄧꀕꃅꐂꇁꃆꀞꂶꌠꇬꋩꇈ,ꇇꎇꌊꃆꀞꆸꂿꇬꌭꄉ,ꏸꑮꑍꁆꌠꆽꃬꃆꀞꐧꑭꇬꇱꄉꈭꐨꆏ,ꐳꏢꁻꎼꒉꌠꀋꏭꐚꇁꁡꇤꉈꏭꈴꁧꀐ。kpX彝族人网(彝人网)- 彝族文化网络博物馆
   ꈍꎳꏢꀥꇁꀐꇬ,ꋋꄡꇗꃅꃴꃄꅉꉼꃅꂿꌠꋑꇬꂾꃚꋋꈨꑴꌦ。kpX彝族人网(彝人网)- 彝族文化网络博物馆
   ꋍꇅꆏꀊꂥꇀꌦ,ꋍꇅꆏꀁꂥꇀꌦꃅꂿꌠꋑꇬꂾꃚꆹ,ꋍꇅꑌꐯꀋꐞꃅꋋꐊꄉꇁꌊꑤꍰꇓꈓꇬꑟꇁ,ꋍꇅꑌꑭꀋꆏꃅꋍꅳꀧꄻꇢꇬꄉꇙꅷꇁꇬꎷ:kpX彝族人网(彝人网)- 彝族文化网络博物馆
   “ꅝ,ꅝ,ꅝꀕꅝ……”kpX彝族人网(彝人网)- 彝族文化网络博物馆
   ꀋꃋꋋꇅꇬ,ꂚꄏꅿꊨꀖꃀꀉꒉꃅꈿꌐꌠꇬꄉꇁꈭꐨꆏ,ꋋꀉꄂꀕꆼꈘꃅꎇꀀꈤꄩꀀꎌ,ꀋꉻꃢꌺꂶꌠꆹꉌꂵꇬꋑꇬꂾꃚꄈꑌ,ꀊꅰꃅꀉꑌꇀꌦꀐ:ꋋꇨꃃꉌꆐꅑꌠꆏ,ꂚꄏꈢꅉꈚꌠꏭꆦꌊꀉꁁꈚꇫꎭꐛꅹ,ꂚꄏꌋꆀꊼꇅꐮꂿꀋꄐꌠꎁꃅꇨꇅꃃꌊꎽꀮꊝꌠꌡꃅꇬꋨꐺ。kpX彝族人网(彝人网)- 彝族文化网络博物馆
   ꀊꄶꊉꇪꄨꑼꀉꋩꂷꇱꌾꂖꊢꀖꌠꇂꃴꄉ,ꑸꆀꆹꂚꄏꇬꊨꀖꌠꌌꋋꇅꃅꐤꅉꅼꅉꑟꀐ。ꋋꆹꈍꃅꑌꆿꃀꁡꇤꅿꏦꉅꐨꋋꌌꐤꅉꃛꅉꑟꌠꑓꇓꀕꂾꇐꏽ。ꋋꆹꈍꄮꇯꆐꀊꄶꁦꋠꃢꈜꈚꌠꌋꅪꂱꀘꆃꍈꂶꌠꌋꆀꀊꄶꏸꑭꀕꇇꀉꒉꌠ“ꆈꌠꑮꆜ”ꀉꋩꂷꋋꋓꉪꁨꄉꀐꌠ。ꋀꊇꑤꍰꇓꈓꇁꌠꑞꎹꇁꌠꉬ,ꑡꂿꃆꐥꌠꉬ?ꋋꆹꈧꇐꍈꀉꄂꅲꌊꉌꌤꅇꀺꌠꅀ,ꄡꇗꂚꄏꎼꏹꇬꇑꇁꂾꄸꌠꉬ?ꇑꌊꁧꂾꄸꇬꆹ,ꌤꆿꈝꐯꃅꀄꊭꐘꀋꉬ!ꑤꍰꇓꈓꇬꆹꀋꃋꇬꊏꑡ“ꅳꍩꌌꆼꁠꀠ”ꌠꃅꅷꐺ,ꂱꀘꆼꁠꇬꅳꍩꈧꌠꆏꉬꇮꃅꆦꌊꏟꈯꀕꌠꌎꆽꁏꁥꌠꃅꄉꌐꄷ,ꇣꋲꐋꀋꌡꀋꀵꀕꂵꇖꀕꌠꃅꈎꃅꆪꆏꄡꇗꇣꋲꐋꀋꌡꀋꀵꀕꂵꇖꀕꌠꌧꇗꅐꅊꇈ,ꃶꍋꀯꆹꇯꍝꃅꌼꀖꌊꏦꀋꈴꀐ。kpX彝族人网(彝人网)- 彝族文化网络博物馆
   ꀊꅰꃅꑠꃅꐙꄮꇬꆏ,ꀊꅰꃅꂚꎼꏹꂶꌠꀋꉬꀋꉆꇁꇬꎷ。kpX彝族人网(彝人网)- 彝族文化网络博物馆
   ꉢꆃꎭꆈꌠꇐꀳꇬ:ꃅꃴꄀꈩꆏꆳꁏ,ꐷꈭꈌꃮꆏꃥꇁ,ꉏꐚꇁꂯꆳꏂꂴꆽꐊꄉꁏꄷ。ꑓꀠꀕꃅꉮꐪꁖꇁꂯꌠꋋꈨꂿꇬꆏ,ꀋꉻꃢꌺꆹꉌꂵꀊꅰꃅꀉꇨꃅꑌꇁꀐ:ꀑꇬꈔꑲꑌꀋꇝꃅ,ꈍꃅꑌꊨꏦꑭꄑꄉꆿꃀꁡꇤꉮꃆꎭꃤꌸꂿꇯꈧꌠꐛꐪꄚꌞꌊꂚꄏꎼꏹꇯꁧꂾꄸꎍꀐ!kpX彝族人网(彝人网)- 彝族文化网络博物馆

    ꊁꊛ:ꉒꈌꈬꇬꉂꏣ(ꑍꊏ)http://yi.yizuren.com/plus/view.php?aid=136 kpX彝族人网(彝人网)- 彝族文化网络博物馆

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ