ꂴꊛ：ꉒꈌꈬꇬꉂꏣ(ꊰꃘ、ꊰꏁ)http://yi.yizuren.com/plus/view.php?aid=133
ꊰꉆ
ꂚꄏꏭꊨꀖꃀꀉꒉꂶꌠꆹꌌꑤꍰꇓꈓꏓꂱꃀꈿꐦꀞꀉꒉꂶꌠꇬꄉꈿ。
ꄵꇓꁦꀑꌤꅐꒉꄷꃅ，ꌊꁏꅉꉻꏑꊝꀯꈚꌠꇬꆹꂿꑘꊿꇓꈓꆹꇬꋀꊇꀑꇬꋬꂻꐨꁣꏙꌠꉬꄷ，ꇨꌠꆓꌠꐊ、ꅰꌠꇷꌠꐊꃅꄉꃶꍋꀯꇬꄉꅳꍩꈨ“ꉛ”ꌊꇁ。ꀋꃉꃀꈿꐦꀞꀉꒉꂶꌠꈴꈌꈧꌠꇬꀃꈈꐏꃱꈿꌬꊿꈧꌠꆹꉬꇮꃅꅳꍩꀕꈌꆈꑳꀕꌠꌌꌐ。ꃀꈿꐦꀞꀉꒉꂶꌠꈭꇍꑠꇬꆏ，ꅳꍩꀵꌠꀃꈈꐏꃱꈿꌬꊿꀱꒊꀱꇁꃅꏮꆫꏮꐏꏿ，ꀋꇊꇬꁮꐚꀉꇨꇁꇬꌉꇁꂯꄉꌠꌡ。
ꊿꌧꈧꌠꂾꂁꄉꂿꄷꐛꅹ，ꀈꏦꌋꆀꄿꏀꑍꂷꈨꆹꃢꈜꆦꈚꄉꁰꐂꌋꐺ。ꄿꏀꑍꂷꌠꆹꂃꐡꀉꒉꑠꈚꐺꐛꅹ，ꈁꏾꃅꇁꌊꈳꈌꈚꌠꇬꄉꏮꆫꏿꉆ。ꄚꀈꏦꆹꇬꀋꍑꀐ，ꌞꊿꋍꐛꏦꀕꒉꋦꂶꌠꂿꇬꆏ，ꃀꈿꐦꀞꀉꒉꂶꌠꏢꁮꇬꄝꋌꁳꊼꇅꇯꉆꀋꅲ。
ꄚꑠꃅꅹꀋꅐ，ꃅꃴꃄꅉꃅꇙꌠꇴꏅꃚꈧꌠꆹ，ꀑꄔꂪꄓꇁꋍꅳꀧꇬꃹꇁꌐꄉ，ꋌꎼꉌꂵꐂꌊꀀꅉꀋꀀꃅꁖꅔꅐꇁꄉꏽꃅꎍ。
“ꐋꁏꐚꐙꁧꌠꂚꄏꂶꌠꅥꆿꐛ！”
“ꂿꑘꊿꊢꀖꌊꑤꍰꇓꈓꇬꆹꌠꇇꆈꁆꌠꆼꐡꇫꎭ！”
“ꌦꎝꌦꌌꄉꌣꇁ!”
“ꂚꄏꈌꀋꊰꑲꆏꅥꌉꐴꀋꊌꇫꎭ!”
……
ꋋꇅꇬꆏ，ꋍꊂꇴꏅꃚꒈꅐꃅꅐꇫꈌꐚꇁ，ꂚꄏꆹꊿꑍꂷꇱꆼꍅꌊꇁ，ꊂꏭꍩꈌꆈꉘꀕꑠꈍꑋꋬꇬꊂꈹꄉꈜꎴꃅꍅꐒꌊꇁꀐ。ꍅꅷꀊꄸꀈꏦꏢꁮꇬꈴꄮꇬꆏ，ꀈꏦꆹꀋꎺꃅꌗꉈꑴꏶꅷꐺ。ꂚꄏꆹꉌꋽꑓꋽꃅꋋꌋꅜꀐ，ꀂꏾꎎꄉꉂꑟꅼꐯꅼꃅꏮꀈꏦꊼꇅꉜ，ꂴꆽꆹꉌꇿꏮꃅꐙ，ꊛꄉꇬꆏꉌꐒꇁꎭꌠꐛꂨꅍꇁꋍꑓꁯꇬꀀꐛꈴ。
ꃀꈿꐦꀞꀉꒉꂶꌠꇬꆹꐪꊛꄉꇳꃚꏄꃚꃢꇫꈌꐚꇁꄮꇬꆏ，ꂚꄏꂶꌠꆹꊿꇱꄹꅷꊨꀖꅉꈚꌠꑟꀐ。ꀉꎴꃅꇢꇨꐛꅹ，ꀊꄸꀈꏦꆹꈍꃅꏡꁈꏁꑌꂚꄏꈁꑓꂶꌠꊌꂿꐝꉅꀋꄐ，ꂿꐚꂿꀋꐚꃅꐚꌟꆹꂚꄏꅿꐛꒌꂶꌠꀉꄂ。ꋋꆹꉌꆐꅑꀱꍠꋠꀙꐯꀙꃅꎌ，ꄚꐜꅖꌠꆏ，ꅑꅷꀋꃋꀃꑍꋋꄮꑟꇁꇬ，ꋧꃅꇣꄧꋋꂷꇬꉌꆐꅑꑓꆐꋠꁬꋌꑠꑵꆹꄻꅐꀋꇁꑴꌦ。ꀊꋨꄹꉖꈊꃀ，ꑷꂿꀉꒉꀊꋨꂷꄩ“ꇌꉻ”ꀊꋨꂷꄉꇬ，ꉂꑟꋍꑗꇣꇬꁳꌊꑟꃅꌠꉬ？ꉈꑴꆏꋌꁳꋍꑖꃅꉉꀽꌊꑟꃅꌠꉬ？ꋋꆹꋋꇅꃅꁰꈘꄉ,ꄿꌦꋨꃅꂚꄏꂶꌠꏃꎭꌊꆿꃀꁡꇤꑟꇁꑲꆀꉉꋭꌠ。ꀱꇁꁡꇤꑞꄸꆏ，ꋋꌋꆀꉹꁌꋍꏅꌠꋬꀕꂻꀕꃅꐥꈭꐨꑲꆀꋍꇬꉉꀽꇬꑋꍑꈨ，ꋌꁳꊨꀖꎻꇬꑌꄾꈨ，ꋌꄮꈉꈍꑋꈁꄷꆏꈍꑋꄻꇬꁴꋭ。ꉪꅷꑮꃀꂷꅿꐙꒉꌟꃅꐓꂿꀕꌠꉂꐪꄀꄷꆏ，ꀈꏦꆹꉌꂵꐂꆹꀐ：
ꉡꆹꇰꑴꇬ，ꄚꉠꊋꃤꆹꉬꇮꇤꋌꁳꌐꌠ，ꋌꁳꐥꋊꐥꍂꃅꌬꌐꈤꀋꉆꎻ，ꄚꄽꂫꆏꊨꏦꅿꀋꐳꀋꊸꒉꄸꃅ，ꀃꑍꆏꑽꃤꑠꒈꒊꌠꐛꄉꋋꆹꊿꇱꌌꏃꊰꈌꋓꀕ，ꉆꊰꆈꅊꀕꃅꊨꀖꁒꐀꀙꀐ。
ꊨꀖꃀꇬꊎꈿꀐ，ꅇꉉꌠꆹꌋꅪꃚꎔꉏꄧꑠꂷ，ꀋꇊꇬꆏꆺꃮꒊꃀꋮꍴꈾꇬꄉꄓꌊꉈꀕꃅꑵꉙꑵꊾꇰꇁꌠꅔꐎꏰꌺꂷꑌꀋꇊꌡ。
ꀊꄸꀈꏦꆹꀃꑍꉪꇁꀋꑍꈛꌬꄉꂚꄏꁌꁧꀊꋨꄹꉈꄀꇁꄷꆏꉌꆐꅑꑴꌦ，ꋋꆹꇨꆰꇨꊸꃅꌧꂓꏪꂶꌠꇬꐞꁧ，ꇨꆰꇨꊸꃅꌧꂓꏪꂶꌠꇬꐞꀋꁧꑲꆏ，ꀃꑍꆏꀊꄶꊨꀖꃀꈿꈯꄔꇬꉆꎍꌠꅔꐎꏰꌺꌡꌠꌋꅪꂶꌠꊌꂿꐝꉅꀋꄐꀑꌠꉬ。ꅲꉏ，ꋋꆹꃚꎔꉐꄧꌊꇆꆉꑭꊂꎽꀮꊜꃚꌟꃅꅲꌒ！ꄚꋌꇬꊼꇅꐜꅖꌠꆏ：ꈍꃅꄉꅇꃠꅇꈌꅲꀨꅲꑭꀋꐥꑠꉉꅐꎼꇁꌠꉬ！
“ꁨꇐꀋꐥꇝꂱꌊꁏꂽꑼꐋꀨꁥꌠꀋ！ꀃꑍꆹ，ꉪꊇꑊꋌꉱꃀꈹꄮꉬꀐ！ꑊꋌꉱꃀꈹꇬꀋꎭꄸꆏ，ꋋꀱꊿꉮꇁꌠꉬ！ꆍꊇꊼꇅꉜꉐ，ꈍꉘꏢꃅꂁꄚꉪꄈꎀꍹꈐꏭꐥꄉ，ꑤꊈꉘꃀꎼꏹꌅꈋꇑꌠꂚꄏꋋꂷ，ꋋꆹꑊꋌꉱꃀꈍꃅꐙꂷꉬꉐ？！ꋋꆹꀋꉊꊂꄚꇬꄉꉘꃅꄏꑽꌠꄗꌦꆀꑼꐋꄉ，ꐯꇯꇭꍣꄈꏮꁏꄉꇩꂱꇁꄉꌍꆽꁏꁥꌠꂴꆽꄉꈌꊰꀐ，ꋀꊇꆹꈌꐬꇬꑉꇁꌠꐋꁏꐚꐙꁧꌠꉬ！ꈏꐚꀉꒉꈧꌠꉬ！……
ꈍꃅꄉꌤꑠꈨꐥꇁꌠꉬ？ꋋꆹꈰꏅꌠꀋꉬꄷꌠꅀ？ꄗꌦꆀꑼ，ꉘꃅꄏꑽꏿꀋ？ꄓꈁꁏꌠꍅꆌꑘꒃ，ꉪꊇꁏꐚꇇꀤꄉꄩꅐꄉꂱꑱꌅꈌꊨꏦꌬꌠꃅꇬ，ꋋꆹꉘꃅꄏꑽꌠꉬꄷꌠꅀ？ꑠꆹꉬꑲꆏꐙꁧꌋꈧꌠꆹꑡꉬ？ꀋꉻꇈꐂꌺꆹꑡꉬ？ꉠꀉꄉꀉꂿꋋꌉꌦ，ꉠꂛꊨꃺꑌꋌꉮꆈꒀꀕ，ꈍꃅꄉ“ꑊꊰꌺ”ꑠꆏꌌꁍꌒꃅꄉꌠꉬ？ꈍꃅꄉꉘꃅꄏꑽꌠꆏꌌꀉꇨꉾꃪꃅꄈꌠꉬ？ꂵꆧꌌꈊꃀꃅꉉ，ꈊꃀꌌꂵꆧꃅꉉ，ꑊꋌꁳꐥꌒꎻ，ꊿꂂꌠꁳꐤꎭꎻꌠꆹꋀꊇꅿ“ꇝꂱ”ꂿꃅꉬꋭ？！
“ꂚꄏꆹꐋꁏꐚꐙꁧꀋꁧꌠ，ꉪꊇꀃꑍꄚꇬꑌꇁꉆꌠꋍꏅꊈꇬꀋꑇꌐꏭꐛ。ꑡꑵꌤꑘꉬꄿꂿ，ꇯꍝꃅꉈꇷꀉꄂꉜꀋꉆꌠ，ꀋꉬꀋꉆꌠꆏꌤꑘꊇꅉꉜꑲꆀꍑꌠ，ꀊꅰꃅꊫꄳꉜꑲꆀꍑꌠ，ꀃꀂ，ꑌꇁꉆꌠꋍꏅꐋꀨꊈꀋ，ꆍꊇꑴꌠꂚꄏꉉꄚꃚꈢꏸꇬꊐꄉꌠꋍꃛꁙꊼꇅꅲꌐꉏ！”
ꇦꀨꅇꁊꇁꀠꀉꒉꂶꌠꋋꇅꃅꂚꄏꅇꉉꃛꁙꃚꇫꈌꐚꇁ。ꂚꄏꅇꉉꃛꁙꆹꇗꄃꇈꊋꑌ，ꀈꏦꆹꈍꃅꇫꋒꌥꐝꉅꌠꉬ！ꄚ，ꋋꆹꇯꍝꃅꈬꑍꈬꄅꀕ，ꊯꊪꑍꄀꄃꇬꑌꉪꇬꀋꑟ，ꀊꄸꀈꏦꋌꇰꊾꇰꂷꐛꀐ。
“ꉢꉜꇬꆹ，ꄗꌦꆀꑼꆹꐋꁏꐚꐙꁧꌠ……ꉢꉜꇬꆹ，ꄗꌦꆀꑼꆹꐋꁏꐚꐙꁧꌠ……”
ꇅꂚꋋꂷꆹꈍꃅꄉꑠꃅꉉꇁꌠꉬ？ꋌꃶꀐꅀ？ꄗꌦꆀꑼꆹꊿꂂꊿꄸꉬꌠ，ꋌꇫꅉꀋꐚꄷꌠꅀ？ꋌꈍꃅꄉꑠꃅꉉꇁꌠꉬ？ꉢꂶꌠꉜꑽꅲꑽꀐꄸꌠꅀ？ꋋꂷꌌꉠꌐꃶꃄꇬꆹꑽꀐꄸꌠꅀ？ꋋꈍꃅꄉꑠꃅꉉꇁꌠꉬ！ꈨꑗꉘꁮꇬꉚꇁꀋ！ꃅꉒꈍꃅꃴꑌꅔꐎꏰꌺꑓꋪꇬꁿꄉꀋꄏꌠ，ꋋꈍꃅꄉꑠꃅꉉꇁꌠꉬ？ꇅꂚꀋ，ꆏꑞꃅꁱꀋꐭꌠꉬ？ꆏꑞꃅꅇꀋꀱꌠꉬ？ꆏꑞꃅꉹꁌꋍꏅꌠꂴꆽꄉꉉꀽꐞꀋꉅꌠꉬ？！
ꄚꋍꎴꉘꀋꇉꌠꆏ，ꀊꄸꀈꏦꅿꅑꀵꅫꏒꌠꀋꌐꑴꌦꄮꇬꆏ，ꋋꆹꉈꋍꃢꋋꇰꇬꎍꌦꀐ：ꋋꊌꂿꇁꇬ，ꉦꃀꇬꌎꀻꀉꆈꅑꌠꂚꄏꂶꌠꆹ，ꋋꇅꃅꑭꁘꋍꁘꀉꄂꐂꒉꇈ，ꅇꉉꅍꏡꌠꋌꇑꌊꇇꇬꊐꄉ，ꄿꏀꈍꑌꑹꑌꀋꎺꃅꐂꇁꂚꄏꎑꄉ，ꋀꊇꐯꇯꅇꉉꅍꏡꌠꌌꐮꇐꅷꐺ。
ꃚꎔꉐꄧꅔꐎꏰꌺꋶꃅꋶꌠꌋꅪꂶꌠꊼꇅꌗꋏꇬꆏ，ꄿꏀꀊꋨꈍꑋꑽꆏꀕꎍꇈꉉꄻꀋꅐꃅꂚꄏꁴꅇꉉꅍꌬꎼꀐ。
ꂚꄏꂶꌠꇵꆹꊼꇅꈩꎇꅷꐺ，ꑞꃅꑌꌎꀻꀉꆈꌠꇬꎸꑟꈧꌠꐒꄉꆅꌠꉬꋭ，ꑞꃅꑌꑠꃅꊼꇅꇵꆹꈩꎇꑲꆀꋋꆹꊋꋠꏡꋠꃅꃚꋊꌗꅐꄎꌠꉬꋭ。ꋌꐂꅇꉉꅍꏡꌠꂴꆽꉆꄉꃃꐯꃃꃅꉉꇬ：
“ꉢꉜꇬ，ꄗꌦꆀꑼꆹꐋꁏꐚꐙꁧꌠꉬ……ꉢꉜꇬ，ꄗꌦꆀꑼꆹꐋꁏꐚꐙꁧꌠꉬ……”
ꊾꀑꆈꅊꀕ，ꊿꑭꐯꄔ，ꊿꅳꁖꐮꍀꌠꃀꈿꐦꀞꀉꒉꂶꌠꋋꇅꃅꌙꈈꀕꇫꎍ，ꈀꄸꑌꑓꏣꉈꀋꈻꃅꍻꀊꄶꄆꇤꇬꂚꄏꅿꃚꋒꇬꁖꇁꌠꇦꀨꅇꁊꇁꀠꂶꌠꇬꉜꎍꌐ。
ꂚꄏꆹꋍꀃꅉꑌꋌꇰꇬꉆꎍ。ꋌꅳꀧꎎꄉꊼꇅꅲꇬꆏ，ꊨꏦꃛꁙꀊꄶꇦꀨꅇꁊꇁꀠꂶꌠꇬꄉꁖꇁꈧꌠꐦꀞꃀꈿꅉꈚꌠꇬꄉꇉꁦꉼꇫꎍ。ꋌꊼꇅꃱꇌꃯꇌꃅꐙꇈ，ꊛꄉꅇꉉꅍꏡꌠꂴꆽꉉꏅꌦꀐ。
ꇦꀨꅇꁊꇁꀠꂶꌠꇬꄡꇗꃛꁙꀊꋨꈨꇫꈌꐚꇀꌦꀐ。
ꂚꄏꋋꇅꃅꅇꉉꅍꏡꌠꋋꇵꇫꎭꇈꁧꀐ。
ꇦꀨꅇꁊꇁꀠꇬꃛꁙꀊꋨꈨꇬꊎꂿꑴꌦ。
ꀒ，ꊿꐝꉅꀐ，ꀊꄸꀈꏦꑌꐞꉅꀐ：ꃀꈿꊥꇬꊿꂶꌠꐈꋓꃅꅇꉉꅍꏡꌠꄆꋌꇱꈢꇫꎭꇈ，ꇦꀨꅇꁊꇁꀠꇬꂿꇁꌠꆹꄡꇗ“ꄗꌦꆀꑼꆹꐋꁏꐚꐙꁧꌠꃅ”ꃚꈢꈧꌠꌌꃑꌦꀐ。
ꈞꆈꏂꄉꇓꄃꄻꌠ！ꈞꆈꏂꄉꇓꄃꄻꌠ！！
ꂚꄏꀥꇁꃀꈿꐦꀞꂶꌠꂴꆽꄉ，ꇵꆹꐞꏅꄉꏽꃅꇳꏅꅷꐺ。
ꄚꇦꀨꅇꁊꇁꀠꏅꂿꌠ、ꊿꈧꌠꏞꏈꃚꈧꌠꂴꆹꄉꇬꆏ，ꋍꃛꌞꌠꃛꁙꆹꁯꌺꂶꇬꂿꐺꌠꀋꏭꌗꅉꀋꌗ，ꄷꀋꁧꇊꆏꀊꍆꅳꀧꅑꈧꌠꑌꇬꀋꈨꃅꑘꇿꃹꁧꂯꀋꐚ。
ꀊꄸꀈꏦꆹꑡꑌꋋꐞꉅꌐꀐ：ꉜꅊꇈꂿꆏ，ꌊꁏꊿꋋꁥꆹꑠꃅꄉ“ꇝꂱ”ꌠꉬꅊꇈ！ꆺꃮꒊꃀꆹꁮꅐꄉꁮꐚꈴꁧ，ꉘꁮꆧꁨꆹꁮꐚꄉꁮꅐꈴꁧꌠꉬꅊꇈ，ꋀꊇꈴꌠꆹꉬꇮꃅꌋꁏꌠꈝꃀ，ꉉꌠꆹꉬꇮꃅꌋꁏꌠꅇꀉꄂꉬꌐꅊꇈ！
ꀊꄸꀈꏦꉌꂵꇬꄅꆈꈧꌠꋌꇅꃅꑄꁧꌐꀐ。
ꄚꋍꃅꑴꇬ，ꀊꄸꀈꏦꆹꂚꄏꐤꅉꎁꃅꉌꐒꇁꎭꇀꌦꀐ。ꂚꄏꇬꆽꃴꇁꌠꊿꁥꆹꑠꃅꀑꉈꂪꈩꎽꇑꃏꆹꃅ，ꀊꑙꈁꑓꅑ，ꆿꃀꇬꇉꑋ，ꅇꂄꉬꇮꋀꉉꌐ，ꌤꄸꉬꇮꋀꃅꌐ，ꇯꍝꃅꊿꋋꎼꌗꇑꋏꁁꌦꉆꄷꌠꅀ？ꀈꏦꆹꑓꋪꊼꇅꍀꈭꐨꆏ，ꆈꌠꑮꆜꄻꄉꌠꄿꏀꑍꂷꌠꑌꊈꇁꋋꊪꄉꉆꎍ，ꐛꐨꆹꀈꏦꌋꆀꐯꌟꃅꈁꑓꋍꇅꇯꑊꑍꒉꀋꋒꀙꐯꀙ。ꀋꃋꋋꇅꇬ，ꈍꃅꉉꄿꂿ，ꋀꊇꆹꄡꇗꊋꇤꏡꇤꄉꂱꑱꂿꃆꃅꌐꑲꆀꍑꌠꉬ。ꀈꏦꆹꄿꏀꑍꂷꌠꏮꊼꇅꏭꄀꇈꉉꂘꇬ，ꈍꄮꑌꋬꂻꌠꋓꉪꁨ，ꄷꀋꁧꇊꆏꋀꊇꋩꌊꇁꌠꃆꀞꀊꐎꂶꌠꀨꎹꋑꃅꄉꃅꈭꐨꆏ，ꌙꈈꀕꊿꈫꇬꄉꋌꁖꉈꏭꅐꇁꈭꐨꆏ，ꇣꐳꃅꋋꀥꄆꃑꅉꇬꉜꄉꁧ。ꋋꆹꇯꍝꃅꀊꄶꄆꃑꅉꇫꐥꌠꊿꀊꋨꁥꈉꊸꀙꐯꀙꌠꉬ，ꋋꇅꃅꂚꄏꀉꏀꃅꀀꇙꄉꌠ“ꇌꉻ”ꂶꌠꇿꐛꌠꅉꐚꌠꈉꊸꀙꐮꀙ。
ꄡꇗꃴꄿꏁꍅꉪꐨꌋꆀꋍꍈꂯꀋꍣ，ꌤꃆꐛꐈꌊꊋꋠꀙꀐ。
ꄆꃑꅉꇬꊿꋒꌥꈧꌠꆹꀈꏦꏭꉉꇬ，ꌊꁏꅉꇬꊿꊼꇅꀋꉬꀋꉆꄷꈧꌠꂯꀋꃉꆏꂚꄏꈢꌊꇿꇬꊐꄉꌠꅉꀋꐚꌐꀐ。ꄆꃑꅉꇬꊼꇅꌟꒉꈎꄜꀉꏀꌠꆏꋍꏭꑠꃅꉉ，ꀋꃋꑓꂿꄮꋋꇅꇬꊜꋽꐨꒃꉈꄉ，ꀃꌐꊨꀖꃀꈿꌐꄷꆏ，ꂁꆈꐏꎭꊿꁥꌠꊂꆈꐊꄉꇬꆹ，ꑞꃅꑌꂚꄏꌌꇿꇬꈢꄉꌠꊼꇅꐝꉅꇁꄏꏮꐛꄷ。
ꄚꆐꀋꉬ，ꀊꄸꀈꏦꆹꄡꇗꉘꇉꉘꀋꅐꌦꀐ。
ꊨꀖꃀꆹꌌꈿꅷꃅꈊꑓꀋꂿꄮꇬꑟ，ꊾꈻꁧꌐꀐꇬꄡꇗꂚꄏꌋꆀꐏꎭꊿꈧꌠꁱꒌꍈꑌꊌꀋꂿ。ꊁꑲꆀꅉꐚꇬꆏ，ꋀꊇꁦꄮꇬꆏꈝꃀꀉꁁꏢꇬꈴꁧꌠꉬꅊꇈ。
ꀊꄸꀈꏦꆹꑠꃅꊿꇱꊏꅜꐛꅹꃅ，ꇨꇅꃃꌊꋪꀕꋪꃅꇬꐂꐺꄮꇬꆏ，ꄿꏀꑮꆜꄻꄉꑍꂷꌠꑌꌗꉻꌗꏂꄹꌗꃀꌗꌺꐮꑘꀋꒃꃅꀥꇫꅐꇁ。
“ꀋꍑꀐ！ꉪꊇꅔꁖꀐ！”
ꊿꑍꂷꌠꀍꄟꇔꁧꄉ，ꄿꏀꑍꂷꉬꌠꐛꐨꅔꁖꈭꐨꆏ，ꀥꐳꂿꄷꐛꅹꃅꂃꐡꑍꈬꌠꋍꑊꇱꍣꀉꂥꃅꈚꇈ，ꏸꑮꀉꒉꇖꁆꌠꑭꐨꈧꌠꇿꄔꅉꃅꑘꀋꒃꃅꇿꇬꑌꇳꃚꏄꃚꉼꏒꀕꇫꎍ：
“ꂿꑘꊿꇓꈓꄉꊿꌉꇁꀐ！”
“ꁏꐚꇓꈓꄉꌅꈌꇑꇁꀐ！”
“ꈏꃹꇁꉆꄝꉈꏭꎭꀋꉆ，ꀃꈈꈢꄉꈌꅥꌶ！”
……
ꅳꍩꆼꁠꀵꐺꌠꌊꁏꂽꈧꌠꆹꀋꆏꃅꇳꏅꅷꐺ，ꄆꄬ、ꂷꇭꑠꄔꌊꏦꀑꏦꂪꃅꀥꅷꐺꌐ。
“ꉆꐥꃅꎹ，ꉆꐥꃅꎹ！ꈳꈌꋍꄉ，ꉆꐥꃅꎹ！”
ꑤꍰꇓꈓꇬꆹꈍꃅꑌꂁꍅꇫꐥꀋꉆꀐ。ꀊꄸꀈꏦꆹꉌꂵꊸꌊꇭꀧꃆꄔꐞꃅꐞ，ꄿꏀꑮꆜꄻꄉꑍꂷꌠꑋꇨꊸꌊꋪꅷꐺ，ꉌꂵꈐꏮꆹꑠꃅꉪꎍ：ꑤꍰꇓꈓꊿꋋꑵꑞꃅꑠꃅꐈꋓꇁꌠꉬ，ꉪꏭ“ꀃꈈꈢꄉꈌꅥꌶ”ꃅꇯꆏꊨꀐ！
“ꉠꃆꀞꀊꐎꂶꌠꆹꇿꇬꁧꀐ？”ꀊꄸꀈꏦꀅꌳꌺꃅꉉꇬ。
“ꀋꇷꋠ，ꈀꅑꃆꀞꀊꐎꂶꌠꅑꌐꌠꉬ，ꃆꀞꀊꐎꋌꂷꀋꉬꑲꆏꉪꊇꅔꁖꑘꀋꐥꌠ。ꀋꉻꄰꅍꄉꁖꉈꏭꅐꇁꌠꆿꃀꌺꀊꋨꑍꂷꆹ，ꉪꊇꄷꋩꇁꌠꃆꀞꌕꂷꌠꋀꊇꌧꎼꇁꌠꉬ！”
ꀈꏦꅲꌐꈭꐨꆏ，ꋀꊇꃅꐪꉈꋍꃢꀋꉻꄰꇱꀜꐆꆿꐛꇫꎭꌦꀐ！ꀋꉻꄰꀋ，ꀋꉻꄰꀋ！ꋋꆹꇨꇅꃃꌊꀋꎺꃅꄸꅤꅷꐺ，ꑓꋪꑍꁆꌠꈐꏭꆹꌂꑘꏷꈌꀕꌠꐛꂨꅍꀀꎍ。
“ꑓꂿꅉꃅꃪꐛꑵꀋꉬꀐ，ꁈ！ꃅꄜꈋꈐꃅꁈꆿꃀꁡꇤꑞꁧꄉꉉꌊꃴꄿꏁꍅꇰꁧꂾ，ꃆꏂꑍꃅꄜꄷꌦꆏꁏꐚꁡꇤꂶꌠꋈꐛꄉ，ꊋꋓꋀꏭꉜꄉꌉꂿ！”
ꊁꊛ：ꉒꈌꈬꇬꉂꏣ(ꊯꈬ)http://yi.yizuren.com/plus/view.php?aid=135
