ꀨꏾꌠ > ꃆꃀꁱꇐꋽꇐ

【ꉙꇐ】Ⅱ「ꃈꊭꀊꃴ」: ꇔꇷꀉꃈꉙꇐꉬꊱ
ꄜꃑꄮꈉ: 2015-01-16  | ꁰꄻꊿ:ꇔꇷꀉꃈ

1ꃅꃤꄮꇬ

 
ꃅꃤꄮꇬ
ꉠꃅꄷꀊꋨꈚꇬ
ꑿꈻꄮꑭꅪ
ꃢꈻꊫꉻꆈ
ꋧꈻꃪꏦꐎꌦꀐꀞ
ꀃꂰ
ꌄꇁꆣꌠꇓꈓꏦꎫ
ꈺꄂꀕꌠꉠꀀꑳꁨꌠꇬꄉ
ꈜꎴꃅꄷꒌꇴꆠꐘꃚꈨꉢꈨꇁ
ꈜꎴꐯꈜꎴꃅꄷꇁꌠꁧꏡꃚꋒ
ꊨꄅꃅꉠꅲꀧꈐꃹꇁ
ꉠꊨꏦꀉꄂꇬꈨꄎ
ꋋꆹꑳꂾꇭꋓꄩꀉꂿꃀꇭꌺꇖꇳꃚꉬꏭꐛ
 
ꃅꃤꄮꇬ
ꉠꃅꄷꀊꋨꈚꇬ
ꆫꇁꂿꌠꑳꑟꇁ
ꀿꇁꌺꀱꆺꑳꏂꃴꈻ
ꁯꋒꃅꇴꋊ
ꑷꈐꉂꏣꁊ
ꋚꃅꒉꑽꋚꑌꉘꁇꁉꌦꀐꀞ
ꀃꂰ
ꈜꎴꃅꄷꐛꌠꈬꉘꃅꈋ
ꅑꆹꏂꃴꅍꌠꆺꑳꀉꂿꑠꂷ
ꌺꉂꑓꁴꄧꀕꊰꌦꀐꀞ
ꏃꃅꈊꅉꇀꅉꑞꄮ
ꀉꂿꐛꒌꈜꀕꄇꇖꀕꇁꇬꎷ
 
2.ꄃꁧ
 
ꀊꄶꇬ
ꁮꐚꐮꌂꆈꏸꀕꌠ
ꌂꃆꑷꑘꂿꃋꑟꌠ
ꐮꄮꐮꐊꈁꒉꈁꌒꀕꇬꎭ
 
ꀊꄶꇬ
ꎭꇁꈚꌠꑌꀋꍣ
ꐭꇁꒉꌠꑌꀋꐥ
ꌄꈌꏲꅉꑌꀋꍣ
ꎭꌠꈚꌠꐮꇷꆫꁯꋍꂷꅑ
ꋚꂟꊿꌋꆀꌣꈚꀋꃀꐮꇷꋠꄜꋍꂷꑌꄉꋠ
 
ꀊꄶꇬ
ꉂꇁꅉꌠꉂꏣꈜꀕꎴ
ꎔꇁꃨꌠꐤꅉꎔꅉꑟ
ꃪꇁꄙꈎꄙꇁꃪꈎꀋꑍꀋꈤ
 
3ꀊꉘꄮꐰ
 
ꍯꃅꄄꍅꀕꌠꇬ
ꉪꑵꉙ
ꎆꇌꀕꌠꍯꅿꃴꍚꀕꌠꐛ
ꂙꃨꀕꈍꀕꌠꇬ
ꉪꊇꀄꂻ
ꁦꀑꉒꐎꁧꇁꇉꄩꏣꌠꐛ
ꅔꈌꏂꆙꀕꌠꇬ
ꉪꊇꑭꐨ
ꅔꊂꋃꆦꀊꐎꐛꄉꈹꌦꅐꌦꃅ
ꁧꄩꆫꁍꏜꁍꇬ
ꉪꊇꇵꂷ
ꑌꑿꂾꃚꐝꄧꀕꌠꐛ
ꌶꅉꂘꁍꈬꊂ
ꉪꊇꒊꇐ
ꂘꃀꂷꏦꇷꇁꇍꅉꃅꌠꐛ
 
4ꄮꈉ·ꑭꐨ
 
ꁭꅐꈨꅐ
ꁮꐚꈨꊰ
ꁧꄩꑘꃅ
ꁧꑭꑘꈻ
ꄹꁆꒆꅔꅐ
ꄹꁆꌦꈢꋒ
ꁬꏜꌥꌦꅾꌦꃅ
ꃨꎔꃧꌦꆴꌦꃅ
ꃅꉒꃴꌦꑄꌦꃅ
ꌩꏪꇬꉌꊭ
ꃰꁧꌠꃰꁧ
ꐚꇁꌠꐚꇁ
ꈌꐎꃮꇬꎷ
ꃅꒉꄮꃅꒉ
ꃅꅂꄮꃅꅂ
ꃪꀮꇴꇬꎷ
ꃅꈊꄮꃅꈊ
ꃅꄜꄮꃅꄜ
ꆿꆪꍵꒉꑋꈌꉐꒉꉬꄿꂿ
ꒈꅐꄮꒈꅐ
ꒉꌤꄮꒉꌤ
ꄮꈉꌭꇁꉳꀋꉆ
ꑭꐨꆳꇁꉐꐊꑍ
 
 
5ꏃꃅꉬꉎ
 
ꐧꃅꌹꂷꇬꈀꐥꌠꃅꌥꄮꇬꆏ
ꉬꇮꀱꏃꃅꉬꉎꐥꁧꌠꉬꄷ
ꑓꂿꅺꈨꀋꉆꈭꐨꈍꏯꐛꈚꉬꑌꅉꀋꐚꌠꏃꃅꉬꉎꆹ
ꈭꇁꈛꎴꇨꈭꐨꃅꄷꂵꇖꀕꑠꈚ
ꉠꆈꌠꋋꁯꌦꅪꊋꃤꊫꂫꆹꌊꀊꄶꑟꆏꎵꑳꀕ
ꑞꅉꌐꅉꀋꐥ
ꉠꆈꌠꋋꁯꑭꐨꄔꇁꀊꄶꄀꆏ
ꐥꍂꀋꑍꀋꈤ
ꑠꐛꅹꄮꋍꑍꀋꀧꀋꄒꉌꎭꑓꁧꄻꀋꅐ
ꋍꈜꋌꍬꏃꃅꉬꉎꏹꎂꀕ
                  
ꐮꐞꌠꄮꈉꀊꎴꀊꉗꇨꄉ
ꄹꆙꀕꌠꃄꇖꄹꊂ
ꆀꌺꐯꀋꌧꌠꀉꑌꃅꐥ
ꋀꊇꈀꄸꑌꀀꑌꇴꇈꀀꐚꇁꀋꄐꄮꇬ
ꇭꀧꈯꄿꃅꏮꃄꅉꁵꇈꄮꇬ
ꒌꆠꈜꍬꆸꄮꇬꑲꆀ
ꀎꋏꁍꁈꏃꇁꂠꌠꇂꃴꄉ
ꄙꇁꃪꈎꅑꅸꇁꌠꏣꑟꊈꌐꈧꌠ
ꏃꃅꉬꉎꑷꈐꀉꒉꋋꂷꇬꄉꐯꌥꐮꂿ
ꐮꉂꐮꅉꐥꍂꃅꐯꀋꐞ
                 
ꉇꑴꏣꑟꊈꌐꋍꂷꌗꄽꂫꄱꌠꑍꀐ
ꏣꑟꐋꀨꉬꇮꑓꁴꑰꀕꇤ
ꄸꅥꉼꏒꀕ
ꈀꄸꑌꋍꀄꂼꎔꀕꀀꄡꄖꅊꇈ
ꉪꊇꈀꄸꑌꉌꊨꈬꇱꋍꎁꃅꈭꄐꈜꂘꂿ
ꋌꁳꐱꆹꑾꌙꀕꃅꁍꇁꀿꐊꆹꎻ
ꊁꇁꋍꑍ
ꅽꉪꈀꄸꑌꈝꃀꋋꏢꍬꄉ
ꀱꏃꃅꉬꉎꑟꁧꎂꀕ
 
ꀘꎥ:

ꇔꇷꀉꃈꉙꇐꆹꐝꍠꀕꃅꐥꃆꒆꇗꄇꇖꀕꋍꏢꎵꃪꇫꄉ,ꀊꉘꄮꐰꂘꃀꂷꏦꇷꇁꇍꅉꃅꋋꏢꀊꉘꄸꀳꆀꃅꎰꈢꈁꇲꈁꄿꏹꄿꂿ,ꉬꐮꉬꉎꑟꄿꂿ,ꄇꇖꀕꇬꎷꑠꏢꐛꄮꈉꑌꄮꈉꉬꎂꀕ,ꑭꐨꑌꑭꐨꉬꎂ,ꐥꇗꐤꏦꄃꁧꌟꃅꌣꈚꌟꎭꀋꌋ,ꌅꌺꁏꐚꀋꌋ,ꐭꌠꒉꌠꀋꌋꋍꑠꇫꐥꌠ,ꆏꉬꅲꂿ,ꀋꅲꂿ,ꋍꐤꅉꋌꐥ,ꅽꉪꐨꏢꐨꇬꀋꈴꀋꍬꇔꇷꀉꃈꉙꇐꇬꑄꌺꉌꊈꑠꑌꇫꐊ,ꀿꇁꃀꉂꉙꀕꐚꌠꉂꐪꋌꑵꆹ,ꊿꋅꋍꁯꄓꎞꄂꑄꄮꀋꎪꀋꑴꏮꈪꉪꇐꐥꑠꄜꋊꉜꇁꂿꌠꇰꏭꐛ

ꇁꀦ: 彝文网 ꁰꄻꌠ:  |  ꄜꃑꌠ: beley ꌤꃅꅉ