ꑘꌧꐂꎼꈎꉬꊰꈎꄹꉇ,ꀈꊞꃀꋍꑊꐮꐊꃀꁧꏦꎫꋍꃺꃶꏤꅍꄉꒆꑍꋩꒉꇈ,ꃺꃶꃺꃀꌋꆀꌺꅤꀋꃋꅤꈧꌠꇱꇖꂟꄉꁰꒌꂷꍑꌌꇁ｡ꁰꒌꈐꏭꑘꌧꐂꆏꀀꄁꀊꐎꈬꄻꈐꏭꊐ,ꉈꏭꆏꃴꆈꈬꈚꊂꉆ,ꀈꊞꃀꆏꂴꑋꅉꂷꄩꑌ,ꇇꇀꑳꁆꌠꄻꀈꊞꃀꆼꃬꄉ｡ꀈꊞꃀꆏꀂꄁꀈꆧꇂꃴꏯꋍꄿꑳꃅꑠꈬꈚ,ꀂꄁꇇꋩꊪꅪꈬꄻꉈꏭꄅ,ꑊꑍꒈꌠꀕꄉꑊꈜꍈꁮꀐ｡ꋍꑊꐮꐊꎭꌠꌒꌠꈁꄽꋒꀐꌠ｡
ꑘꌧꐂꆹꉌꈲꂷ,ꃀꑴꑘꏤꇅꈪꊾꒆꌺ,ꀉꄉꑘꑴꊛꆹꀋꉊꂴꆈꉼꆈꃨꏃꌊꈬꉘꃅꄷꀋꑟꅉꀋꐥ,ꑮꃀꑍꂷꁨ｡ꑘꌧꐂꆹꑭꃀꂴꂶꌠꅿꌻꑘꂶꌠ,ꋇꂴꀋꃀꋍꂷꌠꃺꃶꀁꑳꌕꑻ,ꅫꃀꑍꂷ｡ꑮꃀꊁꂷꌠꄷꌺꑍꂷꐥ｡ꑘꌧꐂꀋꁧꆹꋍꉻꋙꋠꄮꇬ,ꎧꅝꎧꑱꄉꃪꐛꌦ｡ꋌꊯꉬꈎꄹꈎꆏ,ꀉꂿꑌꌦꇧꈴꁧ,ꐧꌶꅉꇬꁱꂷꌷꇈꌶꆏꀱꀁꇬꇁꇈ｡ꋌꃺꃶꌋꆀꋍꑷꃅꋦ,ꄚꃺꃶꑮꃀꂶꌠꇬꏭꋙꇨꒈꇨꇬꎷꄉ,ꊁꆏꋌꀉꄂꁸꑳꁥꂷꇬꀀ,ꊰꉆꈓꇬꆏꂿꑘꎹꇪꃏꁱꊿꄻ,ꊰꈬꈎꇬꆏꃀꑴꋂꇬꂱꀡꂘꃀꄻꀐ｡
ꀈꊞꃀꆹꆈꌠꂷ,ꄡꇗꃀꑴꑘꇅꈪꊾꒆꅪ｡ꀉꄉꌤꃅꉈꏭꐥ,ꀉꂿꀉꄂꊿꊇꂛꊨꅫꃀꇖꑻꌠꀨꎹꆽꃴꐥ｡ꀈꊞꃀꆹꇐꈎꌠ,ꊰꈎꄮꇬꆏ,ꋍꀉꂿꐣꁙꂷꈪꇬꁳꇈ,ꁡꇤꌶꅉꇬꁱꂷꌷꎻ｡ꊯꌕꊯꇖꈎꇬꆏ,ꀈꊞꃀꂘꃀꂴꂶꌠꄀꀉꁁꁧꄉ,ꑘꌧꐂꊿꊇꂘꃀꃅꀐ｡ꑘꂘꃀꉜꇬꀈꊞꃀꋋꂷꋍꑊꉆꈎꒉꑴꇬ,ꃦꇁꈚꌌꋽꁱꐭꅇꄜꏰꌺꋶꄉ,ꉌꂵꀈꊞꃀꉌꃹꐛꅹ,ꀃꑍꁱꃅꋋꍈꐛꀋꐛꀐꉢꄐꆏꀧꄷ,ꃆꏃꑍꁱꃅꋋꍈꐛꀋꐛꀐꉢꄐꆏꀧꄷ,ꃆꏃꑍꌗꄝꋍꄝꑽ,ꉢꆏꂘꂿꃅ,ꀈꊞꃀꌋꆀꈛꑌꆹꀐ｡
ꀈꊞꃀꆹꋍꄮꇬ,ꂘꃀꂶꆏꂘꃀꂷꉬꉂ,ꑞꑌꋌꋋꅉꀋꐛ｡ꄚꑘꌧꐂꆹ,ꋍꈓꋍꉙꃅꀈꊞꃀꋌꉜꇬ,ꉜꅉꇐꑌꅉꑟ｡ꇱꀧꐧꀠꀕꃅꐛꑴꇬ,ꑓꊏꆗꁍꀕꋑꌠꇂꃴ,ꑓꂷꀯꆱꍅꋒꎑ｡ꅳꂷꉨꊝꀕ,ꂱꑆꁠꍠꀕ,ꂱꀯꑳꏯꋍꍈꁠꅋꑴꇬ,ꋌꅋꌠꋽ｡ꁨꀕꉐꀕ,ꈁꃅꑻꈭꄉ,ꀊꉘꌠꆗꋋꂿꐙꃰꐚꆗꏿ｡
ꀈꊞꃀꀉꄉꉈꏭꌤꃅ,ꀉꂿꆅꅑꈻꀳ｡ꀉꑳꆹꀉꒉꂶꌠꀈꊞꃀꐛꄉ,ꇌꂿꑌꀈꊞꃀꂿ,ꃣꁧꑌꀈꊞꃀꀵ｡ꑘꌧꐂꆏꐛꐨꋋꈨꋌꉜꄉ,ꏣꀋꑌꃅꀈꊞꃀꇇꀨꄉꇌꂿ,ꀆꐒꇸꇬꇇꀨ｡ꈊꃀꀀꃆꐒꑌꐯꇯꐒ,ꆫꃅꐯꇯꃅꐛꅹ,ꀈꊞꃀꑌꑘꂘꃀꆹꊿꂂꒉꐚꅿ,ꃪꂷꉬꀐꉂ｡
ꀈꊞꃀꐭꌶꅉꌶꅐꂯꀐ｡ꑘꂘꃀꉂꐪꄯꒉꀋꆏꃅꁱꌊꀈꊞꃀꂛꊨꁵꌌꀈꊞꃀꁵꆹꇬꎷ｡ꀈꊞꃀꉌꂵꈐꆹꑘꌧꐂꋍꍈꉌꃹꆹꀐꑴꇬ,ꄯꒉꀋꏮꇬꎷ｡ꑞꃅꆏ?ꀈꊞꃀꆹꉆꈎꈬꈎꄮꇬꇯ,ꋍꀑꑌꀉꒉꑶꌠꈌꄀꄉꀐꂷ｡ꀑꑌꀋꇖꌠꋃꃀ,ꀑꑌꈌꄀꄉꌠꆹꆿꃀꑝꌠꊭꄷꑠꑵ｡ꀑꑌꄰꌺꐙꈬꀈꄟꆹꈎꄜꀈꊞꃀꀋꒉꑴꇬ,ꄡꇗꊿꇫꁌꒉꑠꂷ｡ꋌꈭꐨꑘꌧꐂꉌꈲꂷꉬꄉ,ꀋꁧꂶꌠꇫꉬꅍꀋꉬꌠ｡
ꀈꊞꃀꊰꃘꈓꄹꈎ,ꐭꌶꅉꌶꅐꇈ,ꂷꏢꌅꐧꌶꅉꁱꂷꌷꁧ｡ꋍꃢꆏ,ꑘꌧꐂꂶꌠꀂꂷꏢꌅꃀꈿꁧꌠꉬꄷꄉ,ꌶꅉꇬꀈꊞꃀꉜꒉ｡ꋌꄹꉇꆏꊂꃘꑍꉬ,ꌋꅪꌷꐋꍰꃀꑝꂶꌠꀈꊞꃀꏭ“ꃆꏃꑍꑬꆏꁱꂷꀋꌷꑲꆏ,ꀃꑊꑘꂘꃀꐊꀱꀁꇬꋌꏮꁧꇂ”ꄷ｡ꀈꊞ꒜ꑌꀁꇬꇁꏾꄉ“ꍑꑴ”ꄷꐮꐊꇁ｡꒧ꌧꋀꊇꐕꍯꑌꇁꌊꉘꐩꈛꅂꑟꇬꆏ,ꍰꃀꑝꂶꌠ“ꉠꊵꑵꌶꅉꇬꊰꇈꀐ,ꉢꀱꉈꑴꒃꁧ,ꆐꑊꄚꑌꄉꉠꇁꉛꄉ”ꄷ｡ꋌꀱꌶꅉꇬꁧꀐ｡ꇁꉚꇊꇁꉚ,ꇁꉚꅸꁯꋓꄮꈉꇖꂷꎖꑟꀐꇬ,ꇬꀋꇁ｡ꋌꂾꋀꆹꂱꇯꐯꋯꄉꑍꂷꉬꐨꁮ｡ꑘꌧꐂꆏ:“ꀈꊞꃀ,ꃀꑝꀋꇁꑲꆏ,ꉣꑊꀉꄂꐮꐊꁧ"ꄷ｡ꈝꃀꈪꆏ,ꑘꌧꐂꍞꇁꀈꊞꃀꀵꀐ｡ꀈꊞꃀ:“ꀊꇰ,ꑘꂘꃀꑠꄡꃅ,ꉢꅽꏯꀿꃶꃅꇳꂷ,ꆏꈍꏯꐛꂷꉬ”ꄷ｡
“ꑞꀿꃶꀒ,ꉢꈍꄮꇯꆐꅽꉌꃹ,ꄯꒉꈁꄽꁱꆏꁳꀐꇬ,ꆏꉠꅇꀋꏮꇬꎷ”ꄷ｡
“ꀋꄿ,ꆏꋌꀋꐚꇂ?ꉢꈍꄮꇯꆐꀐꒉꏤꈌꄀꄉꀐꂷ｡”
“ꀃꑍꃆꏂꄑꊿꐥꉬꇮꐯꌟ,ꉌꈲꆈꌠꈨꀋꐥ,ꂱꑱꉌꃹꌠꐯꄹꐛ,ꑞꂷꐒꅍꐥ”ꄷꇖꅷꇁꇬꎸ｡ꅔꈌꏁꆙꀕ,ꈊꄮꐯꑎꀀꃀꊿꀋꆹ,ꀀꊂꊿꀋꇁ,ꌋꅪꂷꈍꃅꌺꃰꂷꄿꂯ｡ꐪꂷꁮꆏ,ꈜꂷꐛ,ꋌꈍꉈꆏ,ꀈꊞꃀꌋꆀꑘꌧꐂꑊꀊꅰꋍꑵꃅꐛꀐ｡
ꃅꍵꀀꃆꑢꄮꐰ,ꑘꌧꐂꏤꀀꃆꀉꒉꁧꑣꄉ,ꀈꊞꃀꌋꆀꃷꇎꌠꆗꑮꆜꐋꀨꃅꄚꀀꃆꐒꈿ｡ꐒꌐꊂꆏ,ꀊꉘꌠꆗꈧꌠꄚꄉꎰꐆꈩ,ꀈꊞꃀꄚꄉꑘꌧꐂꍀꈩꀐ｡ꊿꈀꄸꑌꂱꑱꅉꀱꁧꌐꀈꊞꃀꂛꊨꂶꌠꀀꑌꇴꈤꄩꎍꄉ,ꈍꃅꀀꄖꑌꑳꉨꄉꁧꀋꅲꄚꎍ｡ꑘꌧꐂꅿꀋꂓꍰꌗꃏꂶꌠꆏ:“ꀈꊞꀋ,ꅽꂛꊨꁧꀋꅲꑲꆏ,ꀃꑊꐯꇯꄚꀀ”ꄷ｡ꀈꊞꃀꑌꂛꊨꂶꌠꋌꋋꈻꀋꄐꄉꉬꅲꀐ｡ꍰꌗꃏꂶꌠꀂꉈꏭꊼꇅꁧꄷ,ꈁꄽꐛꀐꇬꀋꇁꀐ｡ꄚꆏꀈꊞꃀꉪꇬꋍꑊꐮꇖꄉꌠꉬꀐꉂꄉ,“ꀂꁧꀐ”ꄷꀃꈈꁉꆹꄮꆏ,ꑘꌧꐂꇱꄌꄉ,“ꆏꄡꁧꀐ,ꀃꂱꉠꄹꀀ”ꄷꋌꌭꄉ｡
ꋌꉈꆏ,ꀈꊞꃀꌋꆀꑘꌧꐂꑊꑌꆫꃅꐯꇯꃅꂿꏿꐯꇯꏿ,ꇤꍤꇤꄻꐯꀋꐞꀐ｡ꀃꑊꐤꑍꋍꑷꋦ,ꌦꑋꋍꇤꐗꂿꄷꐯꏤꄉꀐ｡
ꀈꊞꃀꑘꌧꐂꄹꐛꐮꄉꈭꐨ,ꋍꃢꆏꀈꊞꃀꀉꂿꇤꅷꁠꀈꍔꅉꀑꑌꈧꌠꅍꏮꇴꁧ｡ꀑꑌꌋꆀꀉꁧꀋꂓꈧꌠꇫꂿꈬꐯꂿꈬ,ꀈꄜꂶꌠꑌ“ꀊꌱꇊꀊꌱ”ꄷ｡ꀑꒉꂶꌠ:“ꉪꀈꄜꏤꑌꑲꋉꄉꀐ,ꋌꉈꉌꈲꎰꏮꇬꆏꑮꂿ”ꄷ｡ꀈꊞꃀꅇꋋꈨꀕꇬꆏ,ꀈꄜꏤꅍꑌꆹꀋꅲꄉ｡ꃮꀂꏾꁆꌠꀉꄂꋌꇵꇧꎭꇈ,ꋌꁈꀱꀁꇬꇁ｡
ꉌꈲꑘꌧꐂꌋꆀꐮꊂꈹꐺꄷꌠ,ꀑꑌꀐꒉꏤꅉꐚꅜꄉ,ꀑꑌꏤꃺꃶꀁꑳꇕꉬꑻꇁꀈꊞꃀꏤꅍꊐꄉꑠꃅꉉ:“ꀒꌱꃀꀈꊞꑌꎼꈎꆏꊰꏁꈓꀐ,ꎰꏮꁧꈐꃅꑭꄡꉬꀐ,ꀋꃋꆍꄷꑮꇖꇁ”ꄷ｡ꀐꒉꂶꌠꃃꐆꃅꄹꇬ:“ꌺꄿꁨꉆꅩꄿꁨꀋꉆ,ꉪꈨꇁꇬ,ꉪꋃꃀꉌꈲꂷꌋꆀꐮꊂꈹꐺꄷꈨ,ꉪꀑꑌꀑꆗꍔꑌꑠꀋꐥ,ꆍꐛꊫꄰꑌꑠꀋꐥꄡꑟ,ꀀꍔꎼꀋꃏ,ꑙꆉꈾꀋꋠ｡ꋃꃀꀋ,ꌠꐭꆏꀋꐭꀐ,ꌠꒉꆏꀋꒉꀐ,ꃄꈌꄐꃅꀁꋌꀑꉀꑠꄡꃅ,ꅽꀉꂿꑓꀋꐎꊏꀋꆴꃅꄚꐥꑴꌦ｡ꀋꎔꀑꑌꂾ,ꀋꉔꀊꁦꌺ,ꊿꐮꄉꄐꌠꐮꃝꇮ,ꉪꄝꌠꀋꁵꌠ,ꆏꐂꃪꃹꑌꉪꏸꑭꇬꈻꌠ,ꆏꐂꒉꃹꑐꉪꀍꏶꇬꄉꍠꌠꉬ,ꐥꑋꉪꃰꊿ,ꌦꑋꉪꑊꋌ”ꄷ｡
“ꆍꐛꊫꀋꁧꂛꊨꈧꌠꋍꍈꈩꄡꑟ,ꉛꂪꉛꅐꀋꆗꋍꍈꆗ,ꃀꑍꂶꀑꀋꈩꋍꍈꈩ,ꃌꍅꃌꀋꁨ,ꌺꍅꌺꀋꁨ｡ꑠꐥꇮꇂ!ꆍꊿꉚꄸꂯꀋꀵꀕ”ꄷꎼꀋꁧꂛꊨꈧꌠꌋꆀꐮꏈꅲꀱꍠꀐ｡
ꀈꊞꃀꆹꀄꊭꃅꋍꑍꇯꆐꉐꆂꀊꎴꂷꉬꄉꋍꂷꑌꑊꀋꏦꃅ:“ꀁꆹꈍꃅꑌꀑꑌꅍꀋꐛ,ꎸꊈꏢꌌꈌꑍꂷꐱꌠꐥꀋꇮ｡ꉌꈲꑌꊾꂷ,ꆈꌠꑌꊾꂷ｡ꉌꈲꃷꅍꋍꏢꀁꑌꄉꇂ?ꆈꌠꆏꃷꅍꀊꃴꀈꆧꎍꇂ?ꊿꐙꊾꄮꇀꂷꐥ,ꃅꐛꊀꄮꇁꌠꐥ,ꀂꇫꉌꃹ,ꉣꑊꐥꑋꋍꑷꋦ,ꌦꑋꋍꇤꐗꐮꄉ”ꄷ｡
ꀈꊞꃀꀉꂿꂶꌠꃶꇌꂿꇌꃅꎍꀐ｡ꀑꄔꃅꊂꅫ,ꀒꉜꁭꂪꋍꑊꏦ､ꊂꉚꀿꃅꑌꋍꑊꏦ,ꈍꏯꑌꏈꅇꊌ｡“ꀈꊞꃀꀋ,ꉪꀁꇬꌢꎭꅇꀋꐕꈑꆠꒉꀋꐕ｡ꀑꑌꀋꇖꌠꌱꃀ,ꍯꃅꀋꇖꍯꏬꑠꃅꀋꇮ,ꐥ,ꀉꂿꅇꃅ,ꆏꉌꈲꑠꂷꅍꐛꀋꇮꀐ｡ꆏꉌꈲꋋꂷꅍꐛꑲꆏ,ꉢꌦꆏꁳꈛꏢꀉꄂꁮꀐ”ꄷ｡ꏣꀨꏢꋌꎹꌊꌦꀈꊞꃀꁵꂿꄷ,ꑳꊂꌩꁧꇬꄉꆼꏶꇈ,ꊿꊌꂿꅜꄉꊿꇱꈭꋏꎼꇁ｡
ꀉꂿꀈꊞꃀꋌꇴꌊꅲ:“ꀈꊞ,ꆐꑊꋌꃀꋍꈜꀀꀋꋻꌦꑲꆏ,ꑠꃅꀋꇮ,ꉌꈲꑠꂷꅍꐛꀋꇮ,ꈎꄜꑌꅽꄩꀉꑌꈎꒉ｡ꉌꈲꆈꌠꐮꄹꐛꇬ,ꃆꏃꊂꑋꆏꉌꆐꅑꇁ｡ꋟꏦꅜꏦ,ꃅꇏꂶꄟ,ꅇꉉꉐꉇꑠꐯꀋꊒ,ꀊꏀꃅꋍꑍꈩꌒꎹꑴꇬ,ꊂꈎꄜꇁꇬꆏ,ꋍꂷꃚꇖ,ꋍꂷꏬꇖꄉ,ꐯꄎꊋꑵꉬꑴ”ꄷꂘ｡
ꀈꊞꃀꀋꂁꀋꁿꃅꄹꇬ:“ꀉꂿ,ꈍꃅꂯꀋ,ꀃꑊꐯꈽꀀꋻꀐ,ꆐꃅꇬꇉꂯꊐꄉꀐ,ꀂꀉꁁꑷꅍꈍꃅꐛꁧꂯ”ꃅꄉ,ꀉꂿꑌꋌꎼꃅꅍꎷꀋꊌ｡
ꀉꄉꂶꌠꑌꋌꇈꉈꆏ,ꀒꑍꋌꃅꎧꀉꄂꅝ,ꎧꑱꄷꆏꄯꁯꌩꏦꄓꄉꏈ:“ꀈꊞꃀ,ꌩꒆꉀꒆꈄꀕꉀꃮ,ꀂꐥꌠꀋꐰꆸꏦ,ꌠꐥꀀꉎꎆꆹꏦꄷꑠꑵ｡ꅽꑘꌧꐂꏤꑠꎰꉬꎰꀋꉬ,ꆈꉬꆈꀋꉬ｡ꌠꄹꇬꇓꂵꀑꈑꃅꀋꌒ,ꉌꈲꐋꀨꃅꀋꌒ,ꆏꉌꈲꂷꄷꐛꑲꆏ,ꃆꏃꊂꑋꅽꂛꊨꑮꃀꇿꒃꂯꑌꂵꇿꃝꂯ,ꊈꌐꊿꉚꄸ,ꂛꊨꋊꃤꊿꉚꄸ｡ꉌꈲꋋꂷꄹꀋꐛꑲꆏ,ꀉꁁꆈꌠꆹꅽꉌꈀꃹꌠꄷꐛ｡ꊾꆹꅽꇱꀧꉘ,ꆎꆹꅽꉌꂵꉘ”ꄷ｡
꒔ꃢꋌꃢꆏ:“ꀉꐩ꒜ꍔꅐ,ꑱꉌꀱꐊꅐ,ꃮꃀꀊꏂꆏꃮꁮꀊꏂ,ꅽꀋꃋꍯꑓꀋꁮꌦꇯꆏꆭꋠ”ꄹꇁꀉꂿꏭꏈ｡ꋍꃢꀈꊞꃀꅔꄉ,ꀉꄉꂶꌠꀉꂿꋌꅥꀙꋺ｡
ꀋꁧꂛꊨꋍꂷꉜꋍꂷꆏꏈꉢꏈꂅ｡ꀈꊞꃀꊿꀐꇱꐒꑷꈯꌬꁧꇬꄀꄉꂷꏦꌌꏶꋻ｡“ꀈꊞꀋ,ꌞꊿꆏꌟꃅꑠꐤꐥꉏ?ꆏꈍꃅꎰꑠꂷꀉꄂꉌꃹꌠꉬ｡ꉪꆏꎼꀑꑊꌌꄈꅉꀋꊌ｡ꆈꌠꋌꑋꑍꅽꉌꃹꌠꋍꂷꑋꀋꐥꇂ?ꉪꐛꊫꀉꁌꀋꁧꃅꅫꃀꌱꃀꅽꌟꃅꑠꂷꐥꀋꋻ｡ꆏꉌꈲꋋꂷꅍꐛꑲꆏ,ꉪꈌꅥꆏꊂꇱ,ꃬꅥꆏꊂꄀ”｡ꄚꀈꊞꃀꋍꑍꈌꊰꀋꋻ,ꀂꄡꇗꐛꇬꎷꄷ｡
ꃷꇎꐋꂿꉌꐡꅑꌠꑿꁬꑮꃀꒉꌊꀈꊞꃀꀋꁧꀉꂿꏭꇕꄟ:“ꀉꒉꌋꆀꃀꒉꑊꀋ,ꀋꃅꋋꇅꇬ,ꉌꈲꆈꌠꑌꀋꍣꀐ,ꋌꉌꈀꃹꅉꇬꐙꇬꎷ｡ꑠꀋꉬꑲꆏꀈꊞꌦꂿꄷꈨ,ꃆꏃꊂꑋꃄꆹꂴꃅꉌꆐꊂꅑꇁꌠꇨ｡ꀉꒉꆎꆹꇥꀯꂷꃷꅍꊇꁧꈨꍣꇮꇂ,ꀈꊞꉌꃹꑲꆏꄻꀒꁨꃝꇮ”ꄷꇖꂟ,ꑍꃅꉖꌒꑠꉖꆏ,ꀈꊞꃀꑿꁬꑮꃀꇱꂁꌊꑘꌧꐂꅍꑮꀐ｡
ꑘꌧꐂꆹꀞꄂꑶꋦꄉ,ꀁꇬꉽꐯꂷꌋꆀꈓꋦꀀꍹꏢꀉꄂꁨ｡ꋍꃺꃶꈧꌠꋍꁯꇫꅲꀋꄐ,ꐛꊫꏤꀋꁧꂛꊨꆹ,ꎰꅍꐛꀐꌠꉬꄷꄉ,ꇬꇇꀨꄷꀋꁧꇫꌂꆈꏸꀕꄉ,ꇇꀨꇇꄻꀋꅲꌐ｡
ꀈꊞꃀꉪꇬ,ꊨꏦꉌꃹꌠꊌꑲꆏ,ꀋꋠꀋꅝꑌꉌꂵꌒꀐꉂ｡ꆈꌠꇐꀳꇬ:“ꌣꈚꌢꎭꆹꃮꃀꂷꐥꍂ,ꌠꅼꌠꑳꆹꀉꐔꂷꐥꍂ”ꄷ｡ꀈꊞꌋꆀꑘꌧꐂꑊ,ꎸꄓꈨꐊꅐ,ꈊꃀꏸꐊꈻꄉꆫꏂꂿꇭ,ꑘꌧꐂꂸꆤꌶꌺꂘ,ꈊꇁꎸꄓ,ꑲꇤꂯꅝꀋꆷꃅꀈꊞꃀꐊꄉꑘꁨꊖꑣ｡ꀈꊞꃀꑌꏂꇮꇭꇮꄉꑱꈓꇤꉻꊭꄎ,ꃮꁮꃬꊭꉘ｡ꀊꋨꄮꇬ,ꑸꑽꋍꐚꏬꄉꇬ,ꑍꐚꌔꐚꃅꋠ｡ꏧꄔꀉꄂꋍꐛꍫ,ꀉꃅꀊꄂꋍꐛꍫ｡ꀈꊞꃀꋍꑍꋠꎭꅜꎭꀐꃅꀋꋻ,ꉌꊰꑓꊰꀋꋻ｡ꑮꊂꄹꈎꆏ,ꀋꃋꑦꏣꂶꌠꒆ,ꋋꄮꇬꆏ,ꃌꒆꑊꄅꁁꇗꄃꀕꀐ｡
ꊰꆪꋍꑍꇩꏤꋩꑍꑠꃢ,ꁡꇤꇬꃮꂷꌉꄉꃷ,ꑘꌧꐂꃺꃶꑶꌠꆹꀁꇬꌣꈚꄉ,ꃮꎸꌕꊰꎖꏣꃼꌊꋠꁧ｡ꄚꀈꊞꃀꏤꆹꎆꃀꀋꐥꄉꃮꎸꃼꀋꄐ,ꀉꑳꌺꍡꎹꂶꌠ,ꑳꉨꄉ“ꀉꂿ,ꉢꃮꎸꋠꏾ”ꃅꏅꇬ,ꃺꃶꏤꋍꍈꄻꀉꑳꍈꏭꀋꉉ,ꊁꆏꄚꐺꌠꑿꁬꅉꐚꄉ,ꀈꊞꃀꏭ:“ꃀꒉꃮꎸꃼꀉꑳꍈ”ꄷ｡ꀈꊞꆏ:“ꉪ꒧ꌧꐂꑌꀁꇬꀋꐥ,ꀁꇬꃮꎸꐥꑴꌦ”ꄷꈱ｡ꑿꁬꀋꄿꃅꊨꏦꎆꃀꀖꄉꃮꎸꌕꏣꃼꋇꍈꋺ｡ꎭꇁꄮꆏ,ꃺꃶꀁꑳꑌꐮꅲꀋꄐꑵꉬꅊꇈ｡
ꑘꌧꐂꋍꃢꋌꃢꆏꑤꂘꃀꌶꀱꅉꁱꂷꌷꁧꄉꀈꊞꀑꀜꂴꐛ,ꏾꋒꀜꊁꅞꃅꑘꁨ｡ꑘꂘꃀꁱꂷꌷꁧꄮ,ꀈꊞꃀꌻꑘꀕꑦꂶꌠꃴꑌꌊꐺ,ꀋꃋꀉꒉꂶꌠꄻꀊꂵꁵꅰꄉ｡ꌺꆗꍡꎹꂶꌠꐒꂴꄀ,ꇱꄓꋍꃤꀵꃅꀕ｡ꆏꈉꌕꂷꇢꅉꃀꑴꄊꎫꇱꋓꇬꄉꀀꃆꑣ,ꃄꅉꉆꊰꎖꈄꌠꋌꀉꄂꑣꌐ,ꋌꑠꀋꃋꆸꈐꉌꂵꇬꀋꑌꄮꀋꐥ｡
ꃅꋆꑸꑽꊪꄮꐰ,ꑘꌧꐂꁱꂷꌷꁧꄉꀈꊞꃀꀉꑳꐒꋍꁁꏯꄀ,ꌩꈪꄻꋍꁆꏯꄜꄉꃰꐻꃰꆺꎵꌠꀋꑴꃅꃄꅉꂿ｡ꋙꊪꒉꏽꄮꑭꇱꌠꑌꀋꊌ,ꋚꐬꅤꌠꑌꀋꊌ,ꃌꍸꃀꂷꀊꏯꐙ｡ꎸꊂꌕꂷꉐꐙꆈꑰꀕꇬꑌꀋꑴ,ꋍꑍꑸꑽꑍꊏꈄꀈꊞꃀꀖꄉꇬ,ꃅꃤꀐꇬꑘꌧꐂꋌꊂꀵꀋꇁꄉ,ꇨꇅꃃꌦꄉꏽ｡ꊁꎭꈓꂄ,ꃷꇎꎭꂵꏬꀨꊌꂿꄉ,ꋌꑱꈐꊾꊋꇖꉬꑻꋌꊥꇬꌊꀈꊞꃀꇇꀨꄉꀵ｡
ꀋꎭꎆꀋꁨ,ꀋꎭꋚꀋꋠ,ꀈꊞꃀꏤꋍꈓꋍꉙꃅꌣꈚꆹꀐ,ꈵꃴꈵꍽꃮꇁꃬꌺꎓꃅꄉꀐ｡ꑳꈫꑳꇋꌩꋚꇓꂷꀮꇗꀕ,ꋆꇁꑌꀋꐥꑞꋠꏾꑞꋠ｡ꃀꑴꋂꑭꊂꎆꃀꋍꄙꂷꊭꄎꌠꀋꐥꌥꄮꇬ,ꋇꏤꋍꄙꎖꂷꊭꄉꀐ｡
ꑘꌧꐂꑌꉌꂵꂄ,ꋍꀿꃶꏃꊰꈎꑠꂷꌺꈧꌠꉈꏭꎆꎹꁧꌐꄉ,ꀱꀋꇁꇫꎭꇈ,ꋌꋩꌊꋇꏤꄉꀨꎹ｡ꀈꊞꃀꄚꄉꁦꎆꎭ,ꋆꇁꑌꀋꐥꀿꃶꋋꂷꋌꌌꊨꏦꃀꌠꏭꀋꋌꃅꉜ,ꋚꑌꋚꎔꅐꇬꂴꇸꋋꍈ,ꃦꇙꃦꈜꒈꋌ,ꏦꎫꇤꍤꒉꇬ,ꎬꐚꂸꄤꃼꌊꇫꍈꇁ,ꎧꅥꇬꄎꃅꑍꈓꌕꈎꀨꎹꇈꋌꋩꈽꇧꎭꀐ｡ꃀꌠꃤꃄꅉꇖꑻꁧꎁꌠꑌꋌꃅꄉ,ꋇꏤꋚꒉꐤꅉꀉꑌꅉꑟ｡
1995ꈎꆏ,ꑘꌧꐂꎖꌋꇩꏤꂘꃀꃅꄉꄀꌌꑣꈯꄜꌶꅉꂘꇁꀐ｡ꀈꊞꃀꌋꆀꀉꑳꈧꌠꄚꄉꑣꌶꅉꇬꐥꇁ,ꑘꌧꐂꃄꎆꋍꁮꆪꌠꋍꄙꃘꉐꎖꇬꑟꄉ,ꎧꏸꀑꈑꀀ,ꇁꏙꈌꂿꄉ｡ꑱꈐꑭꊂꏸꃅꄂꋓꅿ,ꄆꁱꄆꏃ,VCDꑠꑷꈓꂾꏒꀕ,ꀋꌒꀕꂿꉨ｡ꑠꅹ,ꀈꊞꃀꉌꂵꈐ,ꐥꌒꐥꀋꌒꌠꃷꅍꊇꁧꑌꀋꍣ,ꉌꈲꆈꌠꑌꀋꍣ,ꊨꏦꊋꇤꄟꀉꄂꍣꃅꉪꇫꎷ｡
