ꄜꌊꀉꁌꊂꌒꇰ
ꄜꃑꄮꈉ： 2013-12-30 | ꁰꄻꊿ：ꃇꐂꇐꈬ
ꄜꌊꀉꁌꊂꌒꇰ
ꊿꇬꈍꑋꆺꇈꊿꂿꇓꁨꐛꌠꉠꑓꐛꇁꇬꎷ
——ꄜꌊꋪꀕꁍꃴꀉꁌꊂꌒꇰꆹꎻ
ꃬꊭꏬꌌꃅꈯꃹꇈꃬꂵꑓꁴꅐꇬ
ꏬꆉꒊꀋꒉ
ꍶꌺꆿꌌꇉꊂꃹꇈꍶꃀꑓꁴꅐꇬ
ꆿꃀꒊꀋꒉ
ꋋꆹ,
ꃬꂵꑓꁴꅏꄮ,
ꃬꀮꏬꋖꆹꀋꀬꒉꄸ
ꍶꃀꑓꁴꅏꄮꍶꁮꆿꁻꆹꀋꀬꒉꄸ
ꈍꄮꇈꉈꆏ
ꏬꆉꒉꌦꌥꄮꃬꂵꅏꑻꀕꇬꎷ
ꆿꑌꊝꇉꀛꄮꍶꃀꃃꇵꀕꇬꎷ
——ꋋꆹꍶꁮꃬꀮꁮꅉꏬꆉꆿꅪꌧꒉꄸ
ꉠꀋꃀꌺꄂꆜꇈꀋꃀꄸꈣꀋꃀꆜꄉ
ꌺꐈꐰꇑꐛꑟꉂꇬꌺꀱꌻꐛꁦꑟꃲ
ꉠꑷꈐꇦꏦꌺꌦꀋꃀꆼꏻꀮꇗꀕ
ꇦꏦꉻꄹꐓꇰꃲ
ꇤꈏꈑꆠꉻꄹꄓꇰꃲ
——ꋋꆹꑱꈐꆈꃃꃆꇈꎰꃛꀉꐩꀆꒉꄸ
ꉢꂿꌠ
ꃀꐈꌺꐈꋓꌠꇨ
ꌦꇗꅩꏜꄅꌠꇨ
ꄩꉻꊂꌒꄅꌠꇨ
ꀋꁧꀿꃶꐈꌠꀋꊙꃝ
ꀉꂿꃀꑌꐈꌠꀋꊙꃝ
ꋋꆹꃰꊿꉌꃀꀴꊪꅐꇈꈻꏡꎹꏣꀍꏶꈬꄅꀕ
ꀂꏾꏃꂷꎑꌠꀋꊙꃜꒉꄸ
——ꄜꌊꋪꀕꁍꃴꀉꁌꊂꌒꇰꆹꎻ
ꉢꈨꌠ,
ꉠꀊꃅꐛꃅꐙꁏ
ꁮꏂꆼꏻꑱꇉꅑ
ꑲꏾꇓꌺꐂ
ꃰꊿꉬꇮꀋꌦꐥꐈꏿ
ꇨꊨꇫꋠꑬꅮꏣꋠ
ꀿꀱꌺꎸꋟꇰꃲ
ꃀꀱꅩꎸꋟꇰꃲ
ꋋꆹꉠꐥꐨꉢꅉꐚꉠꁮꅉꉢꐝꉅꒉꄸ
——ꄜꌊꋪꀕꁍꃴꀉꁌꊂꌒꇰꆹꎻ
ꄚ
ꉢꀉꁌꊂꌒꇁꉚꀋꂪꀐꏭꐛ
ꃆꏂꄑ
ꃆꏂꄑꆏ
ꃤꃀꏠ
ꉐꅋꎹ
ꋲꋭꌠ
——ꋲ
ꅋꍈꋭꌠ
——ꅋꍈ
ꇁꀦ： 《ꉙꇐ》
ꁰꄻꌠ：
beleys ｜
ꄜꃑꌠ：
