ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꈬ)
ꄜꃑꄮꈉ: 2013-03-01  | ꁰꄻꊿ:ꀉꈌꏬꌋ

  ꂴꊛ:ꉒꈌꈬꇬꉂꏣ(ꉆ)http://yi.yizuren.com/plus/view.php?aid=125     
                         

                          ꈬ
  ꆈꁨꇤꊭꅍꎍꇈꐛꀋꐛꑘꀋꒃꃅꎍꌠꃅꑍꋍꑍꂷꈢꋒꇫꈴꒈꌦꀐ。
  ꑸꆀꌋꆀꀋꉻꃢꌺꑋꆹꀱꇊꀱꃅꂚꄏꇬꁎꆽꌾꀖꀋꇁꀐ,ꀊꄶꀃꈈꉈꏭꃱꈿꌬꊿꈧꌠꀉꄂ,ꋍꇅꋋꇅꇬꆏꀂꏾꎎꌊꈐꏭꄉ:“ꅽꏮꑽꃤꉉꌠꉪꌊꈍꃅꐙꀐ?”ꊁꆏꀂꏾꇯꊼꇅꇬꀋꎎꇬꀋꉜꇬꀋꍣꆘꅝꀐ。ꊖꁍꇬꀉꄂꇇꁆꎇꌊꇬꊼꇅꅥꅷꐺ,ꀋꇊꇬꀒꊇꑠꈨꇫꐥꑴꌦ,ꄷꀋꁧꋀꊇꅿꍞꊟꊋꃤꄝꇬꀋꎭꑴꌦꃅꌠꌡ。
  ꀃꂰꋋꉔꌟꃅꆈꁨꇤꊭꀕꃅꎍꇈꅔꆹꀕꌠꆹ,ꂚꄏꄚ“ꇌꉻ”ꋋꂷꇬꀀꇁꈭꐨ,ꇯꍝꃅꉘꃀꃢꌠꊝꌠꉬ。ꄚꑠꃅꑴꇬꋍꉌꂵꆹꄡꇗꃨꆰꏸꈨꌊꎌꅉꀋꎍꑘꀋꒃꃅꎍꇬꎷꑴꌦ。ꇦꀨꅇꁊꇁꀠꂶꌠꆹꄡꇗꌺꇰꃀꄡꀧꀕꃅꁱꀋꐭꌗꀋꅐꇈꆈꁨꇤꊭꅍꎍꑴꌦ,ꄆꍣꂶꌠꋌꃀꅈꆐꃆꑘꃣꈌꌤꆿꅐꌠꅀꉈꑴꀉꁁꑞꑵꒉꄷꐥꌠꉬꂯ,ꋋꉘꇉꌠꆹꃆꑘꃣꈌꌤꆿꅐꐘꌠꉬ。ꄷꀋꁧꋋꆹꀊꅰꃅꉘꇉꌠꆏꌤꆿꈧꌠꉬꇮꃅꌌꉆꐥꃅꄉꂥꀘꐝꉅꇫꎭꑟꉂꌠꉬ。ꋋꆹꇯꍝꃅꀊꄸꀈꏦꌋꆀꐮꂿꐮꈨꀋꏾꈨꀋꉬ,ꄚꋌꉌꐒꌠꆏꊨꏦꑴꅉꀊꄸꀈꏦꂶꌠꉉꌊꉬꅲꂥꀘꐝꉅꀋꄐꐘꌠꐒ,ꀋꄹꄷꀊꄸꀈꏦꆹꎭꂵꊞꐂꌟꃅꇫꁧꀋꅲꇮꇬꆹ,ꋍꅿꐤꅉꆹꆽꀠꊿꈔꅲꀱꍠꀐꌠꉬ。ꇦꀨꅇꁊꇁꀠꂶꌠꆹꀋꄹꄷꉈꋍꃢꀊꅰꃅꂿꏈꇁꇮꇬꆹ,ꇓꈓꋋꂷꃅꋌꐛꃅꐙꄆꄒꂷꇭꏁꇅꁤꇅꁎꌦꋭ,ꀊꄸꀈꏦꆹꈍꃅꑌꀋꈹꇁꐊꄏꃅꃄꆳꈹꉍꈄꇬꊐꃅꀕꐬꄵꈏꏮꃹꇁꆹꀋꀬꌠꉬ,ꄚꋋꆹꀃꂰꈊꃀꑲꆀꇯꍝꃅꆈꁨꇤꊭꅍꎍꑠꉔꊌꌠꉬ。
  ꇦꀨꅇꁊꇁꀠꇆꇦꀨꅇꁊꇁꀠ,ꆏꑞꐛꅹꃅꇬꊼꇅꀋꂿꊼꇅꀋꏈꊼꇅꀋꂇꌠꉬ?ꆏꉆꐥꃅꂿꇁꇬꍑꍓꇆ?ꉢꂚꄏꅿꅳꀧꆹꆏꏅꁖꆏꏅꇉꁧꇫꎭꑲꑌꀋꇝꀐ。
  ꑤꊈꀨꇬꎼꏹꂶꌠꄻꄉꄮꇬ,ꄆꍣꋋꂷꀂꏽꋋꆹꊋꃤꀉꒉꃅꅐꀐꌠꉬ。ꀉꒉꃅꀒꁨꉜꄉꏹꄮꇫꅐꇐꋋꐘꆹ,ꃬꀮꊸꀕꁨꊰꄃꌠꌤꃆꀉꑌꈨꌋꆀꐯꌟꃅ,ꇭꀧꈮꁁꄣ,ꉌꃀꌦꅪꀞ,ꃀꀋꌠꃅꑊꑆꍕ。ꀋꉊꑠꋍꃢꇬ,ꄆꒌꃑꀂꉗꍈꀉꄂꐛꑴꌦꇬꆏ,ꒌꐛꂪꌦꁬꌠꇬꁧꋽꇉꎔꌠꌋꆀꌺꃰꌋꅪꃀꌠꀉꑳꑠꇬꁖꇀꑌꃅꄉꄮꇬꆏ,ꋋꇅꃅꊌꀋꂿꉜꀋꉆꇫꎭꌦ,ꄆꍣꂶꌠꉈꑴꋍꃢꆐꅑꌤꑘꅐꌦꀐ。ꋍꃢꆏꂽꑼꉙꐂꄨꍏꇬꄉꀛꐂꑵꉙꉹꁌꀨꇁꇈ,ꋋꆹꉪꉩꌋꆀꀍꑐꈬꏢꈘꄉ,ꋂꇱꃅꇱ、ꋐꄃꃅꄃꄉꌦꆀꑼꀉꆹꂶꌠꋌꅰꇂꃴꅞꇈ,ꉙꐂꄨꁥꌠꋌꋩꌊꑤꇬꑟꇁ。ꇯꍝꃅꌞꉙꐂꄨꆹꃀꅉꆐꀉꑌꃢꀉꑌꈭꃅꉙꐂꉹꁌꏓꂱꈧꌠꀨꏾꌠꉬ,ꄚꈬꑍꈬꄅꀕ,ꊯꊪꑍꄀꄃꃅꊿꋋꉪꇬꀋꑟꌠꆏ,ꄽꂫꆏꄆꍣꂶꌠꆐꅑꌤꑘꅐꌦꄉ,ꀊꄶꈜꎴꃅꄷꈬꊯꈬꉘꀀꄉꇁꌠꉹꁌꀉꑌꈨꉙꐂꃆꂮꉜꀋꄐꆘꅝꇫꎭ。ꊁꆏ,ꋋꆹꄚꃆꂮꐥꌠꌤꏲꅉꈨꇴꌊꀉꑌꃢꃅꎥꃪ、ꑌꇖꃀꀉꑌꂷꈿꄉ,ꄽꂫꆏꉪꅼꆏꅉꐚ,ꉪꀱꆏꌧꋬꃅꑤꎆꏲꏳꇬꄉꎆꃀꀉꒉꀨꌊꉱꋊꉱꋃꃅꄆꍣꂶꌠꌌꄺꀱꋻ,ꅑꅷꁱꀕꀉꒉꃅꇝꂱꂾꑟꌠ,ꍠꇙꀕꃅꐎꌕꈎꇬ,ꌌꊼꇅꍤꄻꇬꀉꄂꑲꆏ,ꄆꆹꋍꃢꑌꆽꈘꀋꋻꃅꃑꅷꀃꑍꋍꄮꇬꑟꇁꌠꉬ。
  ꄚꑞꒉꄸꉬꀋꐚ,ꀋꑍꊂꋋꊭꇬꆏꅉꀕꃅꄆꀋꐥꇬꎷ。
  ꀋꄹꄷꇮꇐꁁꏯꌤꃆꆹꉬꑲꆏ,ꋌꉪꇬꆹ,ꋌꇅꃅꄆꌞꃑꎼꇁꄎꌠꉬ。ꀊꅰꃅꀃꂯꋋꉔꆹꄆꀋꐥꀋꉆꌠꉬꀐ。
  ꇯꍝꃅꋍꉉꅇꅐꀐ,ꈜꎴꃅꄷꋋꇅꃅꂾꃚꑵꍻꀕꍻꃅꀕꆲꐊꇁ,ꇦꀨꅇꁊꇁꀠꂶꌠꋋꇅꃅꊉꀕꃅꋍꃢꏈꇁ,ꀋꇊꇬꈌꀥꈌꍣꌧꃀꀉꇨꑠꂷꈂꀸꊿꇱꋍꄉꌠꀋꏭ,ꋋꇅꇬꆏꋍꀋꄐꃅꁉꎼꇁꐛꅹ,ꀊꄶꁦꒉꇈꉬꃅꋌꌌꇙꈩꅷꐺꌠꂾꃚꈧꌠꆹ,ꋖꍀꋖꆿꄑꉼꀕꃅꐂꅔꁖꇁꌐꌠꌡꀐ。
  ꇦꀨꅇꁊꇁꀠꅇꁊꌠꄜꇐꆹ,ꄡꇗ“ꍞꊠꄉꄗꒄꂱꏤꏮꈌꊰꄯꒉ”ꉬꌦꀐ。
  ꋌꈍꉘꏡꇬꇁꉚꀐꌠꅇꁊꌠꆹ,ꋋꌌꀊꅰꃅꉌꎭꑓꁧꌠꌋꆀꅇꀋꈨꆏꉌꀋꆅꃅꐷꏾꇁ,ꀋꎺꀋꈨꃅꑓꋪꋌꎎꌊꌍꑓꉈꏭꉜꎍ。ꁮꐚꀉꁁꁮꏮꈞꆈꃹꒉꂯꄉꀐ,ꉘꁮꂶꌠꆹꈁꉜꅩꋝꀕꇫꎍ。ꃅꇴꆈꌅꀕꇈꃴꂿꀕꈧꌠꇉꅼꉼꏒꀕꅈꇬꄉꀅꌳꀅꌳꃅꄓꆹꇰ,ꉐꆈꀉꐚꅐꁆꌡꃅꅩꋝꀕꌠꉘꁮꑭꋌꇱꁿꆈꍃꅍꎍ。ꌍꑓꉈꏮꃅꆳꁏꀐ,ꌧꂓꁦꌠꃅꆳꈬꇬꄉꄂꆸꈘꃅꉈꈧꅷꐺ,ꌩꏾꀉꏂꈧꌠꆹꆲꐊꐂꀕꁏꅷ,ꋍꏾꇈꋍꏾꄹꇁꏾꇁꀋꏾꃅꊰꇁꊖꆈꄹꄧꅞꌐ。ꋍꅿꉌꃀꂶꌠꑌꊰꇁꋤꀕꃅꐬꉱꀋꅑꑠꂷꇬꃹꁧꌠꌡ。ꋋꇅꃅꊨꏦꑴꅉꊨꏦꌧꐝꉅꇁꌠꌡ,ꋍꊨꏦꑴꅉꋋꂷꆹꆈꌠꌳꈄꀋꃀꍜꇰꀉꇐꑌꀋꉬ,ꀑꁮꅺꐳꀊꌤꃅꇢꑌꀋꉬ。ꀋꄹꄷꌳꈄꂓꅑꍜꇰꀉꇐꆹꉬꑲꆏ,ꋌꑞꃅꐂꄚꌍꑓꉈꏭꈴꄉ,ꐱꆹꑾꌙꄹꐂꋌꇫꋒꌥꌠꃆꀞꀊꐎꂶꌠꋩꄉ,ꏬꏹꃅꏹꉈꏡꁻꃅꁻꋍꅿꑍꇁꌋꉂꏿꌠꆿꃀꁡꇤꀋꁧꌠꉬ?ꀋꄹꄷꀑꁮꅺꐳꀊꌤꃅꇢꆹꉬꑲꆏ,ꋌꑞꃅꅇꁊꌠꇬꉌꁏꇫꉌꀋꃹꇁꌠꉬ?ꊿꁋꊾꎴꇈꑊꋌꃺꒌꊌꌠꌤꃆꆹ,ꀋꉊꈍꑋꈎꂴꆽꂾꋋꑌꄡꇗꁍꇗꑴꆺꃅꄹꁆꃅꋺꑽꋻ!
  ꑠꃅꄉꉪꇬꆏ,ꋋꆹꀊꅰꃅꀊꄸꀈꏦꂿꆹꈨꆹꏾꌦꄉꏽꀐ。
  ꀈꏦꊨꏦꀃꅉꆹꑭꄑꇓꈓꇬꄉꋋꋩꇁ,ꋋꆹꐛꊈꇯꆐꐛꐈꀐ。ꋌꃀꈴꅐꁧꀐꌠꆹꉉꄻꀋꅐ,ꄚꈐꏭꀋꑍꊂꌧꂓꇆꆉꏪꇬꄉꅐꌠꌤꉌꂵꀋꇿꐘꌠꆹ,ꀈꏦꄻꂚꄏꏆꌐꌠꌡꀐ。ꂚꄏꅿꌞꃀꈴꀋꄿꌠꉌꂵꀊꋨꂷꆹ,ꈍꉗꏢꇁꉚꅗꀐꌠꉬ,ꌌꉪꄉꉜꎼꇁꇬꀃꑍꆹꊼꇅꁦꉘꌺꃅꎍꌠꌡ。
  ꊰꈎꂾꆿꃀꁡꇤꐞꇁꊂ,ꊛꄉꇉꂿꁦꀑꄉꁈꉈꏭꐺꌠꈁꁏꉻꄑꊿꈧꌠꈹꒃꅥꌉꌠꃅꐺꈭꐨꆏ,ꋋꆹꋍꃢꀉꄂꀱꆿꃀꁡꇤꁧꋺ,ꀊꋨꇈꉈꆏꋋꆹꋍꃢꑌꀊꄸꀈꏦꂿꀋꋻꀐ。ꑤꊈꀨꇬꎼꏹꂶꌠꄻꀊꋨꄹꈎꃅꋆꄮꐰ,ꋋꆹꃶꍋꀯꀨꇬꍔꊈꂶꌠꑌꁥꇱꄻꄉꑴꌦꐛꅹ,ꄡꇗꀋꉊꂴꀀꋺꌠꀀꅉꈚꌠꇬꀀꑴꌦ。ꃰꌵꌙꈈꀕꑶꋦꁡꇤꃅꌙꈈꀕꌠꆈꌠꈎꏅꑠꃢꇬꆏ,ꃴꄿꏁꍅꂶꌠꄡꇗꃮꀂꏾꌋꆀꋠꅍꅝꒉꋠꇐꊰꑋꑟꌠꀵꋍꄷꄉꈎꏅꎭꇀꌦꀐ。ꋇꑊꆹꁱꄜꇖꁨꄜꑠꂷꇬꉈꑌꄉ,ꂚꄏꆏꈧꊰꀕꃅꊭꄎꄉꌠꇭꍏꃀꄠꎧꏣꌠꌌꐯꇯꅝꅷꐺ,ꄚꋌꉜꇬꎧꂓꅑꌠꅿꉗꆹ“ꆀꃅꁡꇤꎧꒉꏿꄉꑵꌠꌋꆀꐯꃅꐯꌠꌡꇬꎷ。”
ꋠꄜꇬ,ꃅꐙꐛꄟꆹꑊꑍꒉꀋꋒꃅꉌꐒꑓꋩꀙꇨꎌ。ꃰꈧꌠꆹꀊꅰꐛꀊꅰꃰꌦꀱꑐꀕꃅꀉꒉꇁꇬꎷ,ꃅꑆꁬꌠꆹꐈꇁꀊꐎꁬꐛꇁꂯꃅꎍꌠꑋꌡ。ꃶꍋꀯꐷꈭꇬ,ꋋꈍꑋꈓꂿꁮꂷꀊꐎꑵꌠꌌꁊꈴꃅꊪꏿꄉ,ꉈꃅꁮꁧꈍꑋꁧꍠꌊꇬꊪꄉ。ꀋꃋꋋꇅꇬ,ꑱꈐꄆꂷꇭꁨꑭꇱꁨꄉꌠꃰꈬꈊꃀꇬꄉꀅꌳꀅꌳꃅꉈꈧꅷꐺ,ꄷꀋꁧꉌꐒꇁꎭꌠꁱꒌꑌꃰꈬꇬꐛꎌꌐ。
  “ꉐꑴ,ꃴꄿꀋ,ꎼꈎꆿꃀꁡꇤꐛꐪꆹꈍꃅꐙ?”ꑍꃀꑍꊂꌟꃅ,ꂚꄏꂶꌠꆹꄡꇗꂴꈌꋊꄉꉉꇬꎷ,“ꆏꊼꇅꉉꉡꇰꇁꈅ。”
  ꃴꄿꏁꍅꂶꌠꂱꊨꊼꇅꌎꇈ,ꌗꏂꁌꄹꌗꀉꒉꐯꀉꒉꑠꇬꏂ。
  “ꆏꌤꑞꈨꉌꂵꀋꇿꅍꐥꀋ?ꃀꑌꂶꌠꑌꉌꈲꈎꏅꌐꑲꆏꀱꇁꀐ。ꉡꆹꅇꊪꄯꒉꁱꌞꊿꁳꌌꇬꁴꆹꋻꀐ。”
  “ꇅꂚꇆꇅꂚ,ꅽꏲꋭꌠꆏꀕꇬꀋꏲ,ꆏꏲꀋꋭꌠꆏꉇꉈꃅꇫꏲꇁ。ꉢꁦꋠꊿꂾꉬꈭꃘꊰꋋꈓ,ꃘꊰꇌꂿꏮꀐꌠꑠꂷ,ꆏꄹꇬꉢꑮꃀꂷꊊꉂꑴꌦꄷꌠꅀ?”
  ꂚꄏꂶꌠꆹꒉꇈꀋꆏꃅꀒꆺꈩꅷꐺ。
  “ꀻꑳꆈꐷꀕꋋꂷꇂꃴꆏꀉꄂꐥꇬꆹ。ꈍꃅꉉꇬꑌꀋꍑꌠꉬ。ꋋꈍꑋꈓꃀꑌꂶꌠꀱꉌꈲꃄꈌꁧꌠꆹꋌꅑꁧꀋꀵꌠꉬ。ꋋꆹꉢꃅꉢꀉꄂꅑꌠꉬ!ꆿꃀꁡꇤꑠꂷꇬꈍꃅꄉꎷꏸꉆꑵꉬꂯ,ꁦꀑꇉꄩꌩꋦꆈꊉꀕꈧꌠꆹꊿꋐꊿꇽꊿꏓꌐꀐ,ꃄꅉꀉꅠꀕꈧꌠꀉꄂꀒꌃꃅꊸꆗꇫꎍꌐꀐ,ꄚꊿꐴꆹꋛꂷ,ꃰꊿꋚꃀꌺꈍꄮꑌꋚꀋꋠꀋꉆꌠꉬꇆ,ꋋꈨꒉꄸꃅꃀꑌꂶꌠꆹ,ꋍꊨꏦꀃꅉꇯꆐꉌꃹꄉꋍꌺꅤꌺꑌꈧꌠꇱꋩꌊꉌꈲꃅꄷꊼꇅꀀꁧꌠꉬ。”
  “ꇯꍝꃅꉢꅉꐚꌠ,ꋋꑌꋍꊋꋠꐨꀉꒉꃅꐥꌠ。”
  “ꀊꄶꉌꈲꃅꄷꑠꇬꑌꄡꇗꊋꋠꐨꀉꒉꃅꐥꌠꇆ。ꋋꑍꈓꂾꆹꇿꇬꑌ,ꋍꐚꂊꆏꋍꐚꂮ,ꈊꋠꎸꀋꋠ,ꈊꂊꎸꀋꂊ。ꀋꃉꀃꑍꆏꊼꇅꐥꌒꀐ,ꉡꆹꋍꃅꄷꁁꌠꏯꑌꑟꋻꀐ,ꄚꃆꂮꐥꌠꑌꉜꐪꉪꏦꅲꇫꌊꃬꆹꋻꀐ。ꃀꑌꂶꌠꉉꇬ:“ꇉꄩꇪꀮꋍꈓꋍꃢꂿ,ꁦꌦꀱꇀꌦꃅ,ꀁꆹꐥꍂꃅꆏꂶꌠꀉꄂꉂꇬꎷꄷ!”ꃴꄿꀋ,ꆏꅲꉚ,ꃀꑌꂶꌠꉉꌠꆹꈍꃅꊽꉌꐡꑓꇗ、ꈍꃅꇯꍝꌠꉌꃀꇬꀖꅇꉬꉏ!ꋋꐥꋊꐥꍂꃅꆏꀉꄂꉂꇬꎷ!ꋌꀱꑤꍰꇓꈓꇬꑟꇁꄷꌦꆏ,ꉪꊇꆹꉆꐥꃅꌞꎭꌊꆿꃀꁡꇤꇁꂿ。
  “ꆎꆹꀱꉈꑴꇀꇀꌦ?”ꃴꄿꏁꍅꇫꅲ。
  “ꉢꇫꊼꇅꊋꇤꄉꅔꈿꉚꂿ。”ꂚꄏꉉꇬ。
  “ꇅꂚ,ꆏꑞꃅꀱꉈꑴꊼꇅꉜꀋꁧꇆ?ꋦꐋꀕꀨꃷꇎꃷꇤꃺꑌꊈꃅꆎꉂꆎꑟꌐꑴꌦ。”ꃴꄿꏁꍅꑓꋪꆹꀉꅪꀐ,ꄌꌊꂱꀯꏢꁮꇬꑟꀐꌠꎧꅝꇓꍔꏡꌠꆹ,ꀅꌳꌺꃅꋌꄻꉈꑴꋠꄜꇬꄈꌦꀐ。
  “ꃴꄿꀋ,ꆏꑡꃅꇆ?”ꂚꄏꉉꇬ,“ꌕꈎꊋꋠꄮꑌꈢꋒꁧꀐ,ꀋꉊꋋꈍꑋꈓꌤꃆꀂꏾꆹꑽꐛꅹ,ꉪꊇꆹꀋꃅꇬꊎꄺꀱꋊꍬꅷꐺꇰ,ꐪꐙꆹꀊꅰꃅꊽꉌꂵꉪꅉꇬꑟꃅꉾꃪꇁꌠꉬꀐ。”
  “ꋋꏢꆹꉢꅉꐚ,ꁡꇤꇬꊿꈧꌠꈀꄸꑌꇫꅉꐚꌐ。ꈌꑽꉐꑽꂱꑆꂰꉐꑽ,ꑭꑽꇇꑽꈜꐯꈜꉐꑽ,ꈛꎼꑭꁘꄔꎪꄔꑽꇮꇬ,ꉈꑴꀱꄉꄔꀱꈳꀱꑲꆏꍑꀐ。ꐚꁦꌋꈧꌠꆷꇫꎭꇈꉪꊇꆹꄓꉀꉆꀐ,ꇯꍝꃅꊾꂷꌡꀐ,ꋋꆹꑡꑌꇬꀋꏣꌠꉬ。ꂿꃅꃴꇉꀕꅉꇬꄅꆈꌅꑓꀋꂿꉆꑴꅀ?ꎧꏸꎧꒉꐝꇅꀕꅉꇬꍑꒉꄩꀋꐊꉆꑴꅀ?ꇅꂚꀋ,ꆎꆹꌕꈎꅇꆹꀧꄻꀋꅐꀐ。ꉢꅽꏯꋍꇬꀉꄂꅲ,ꆎꆹꑞꐛꅹꃅꀱꆿꃀꁡꇤꊼꇅꉜꅲꀋꇁꌠꉬ?ꑞꐛꅹꀊꄸꀈꏦꇬꊼꇅꉜꅲꀋꇁꌠꉬ?‘ꇉꄩꇪꀮꋍꈓꋍꃢꂿ,ꁦꌦꀱꇀꌦꃅ’,ꆎꆹꑞꐛꅹꃅꀊꄸꀈꏦꂶꌠꄻꅽꇬꇉꌕꄿꎺꏣꇬꊐꄉꍹꐛꆰꀿꇫꎭꌠꉬ?!”
  ꂚꄏꆹꉌꂵꈐꇬꄉꌗꁌꌗꏂꄹꌗꏂꇈ,ꌞꃀꈴꀋꄿꃅꐛꌠꉌꂵꂶꌠꆹ,ꀱꇙꀱꄉꄹꊾꃚꊾꄜꃅꋍꇬꁎꆽꆹꍑꎌꌦꀐ。
  “ꀈꏦ,ꀋꑍꊂꋋꊭꇬꆹꉾꃪꒉꄚꇁꄿꃅꐥꑴꀞ?ꉈꑴꂸꈁꆿꎰꏤꅿꑳꈧꌠꆹꋉꄈꄉꀐ?”
  “ꐥꋊꐥꍂꃅꀋꋉꀐ。”
  “ꑞꐛꅹꉬ?”
  “ꂸꈁꆿꎰꆹꈍꄮꇯꆐꌦꇫꈴꁧꀐ。”
  “ꀔ,ꑠꈨꐥꅀ?”
  ꃅꐎꌕꈎꑤꍰꇓꈓꇬꀋꇁꀐꌠꃴꄿꏁꍅꆹ,ꅇꉩꋍꄣꋋꌌꂚꄏꇰꇁ,ꂚꄏꋋꎼꉌꂵꆅꌊꌦꄉꏽꃅꎌ。ꂸꈁꆿꎰꆹꋌꀉꄂꃅꇈꈬꇉꃪꇬꈍꑋꈎꐥꋺꐛꅹ,ꐛꄟꂶꌠꆹꑋꁮꉆꁮꌟꃅꈯꄿꀉꇨ,ꉌꂵꆹꋍꉎꀋꐥꃅꂄꑭꑌ,ꀋꐈꀋꋓ,ꄳꆉꃅꐛꑠꂷ。ꀊꄸꀈꏦꆹꋍꇖꂟꐨꇬꉬꀋꅲꈭꐨꆏ,ꋋꆹꃅꐎꈍꉗꏢꃅꉌꂵꀋꇿꋺ。ꄽꂫꆏ,ꀊꄸꀈꏦꆹꀇꐒꇸꀇꐒꀵꂿꄷꄉꄔꉔꃪꐛꑭꆹꈁꁏꀙꇨꄉ,ꇘꑐꀋꄐꃅꎇꇤꈏꇢꇑꏢꁮꇬꈍꉘꏢꀀꋺ。ꃷꇎꃷꇤꃺꃀꑌꂵꈧꌠꄓꋍꇬꇇꀤꄉꀇꐒꇸ,ꌩꏓꌩꉅ,ꋚꃅꒉꑽꌠꃅꇬꎷ,ꄚꈍꃅꉉꅹꀋꅐ,ꊽꉌꂵꋌꇱꁨꋌꇱꍌꐝꏋꀕꌠꁦꀑꎺꒉꂷꒉꀊꋨꈨꆹ,ꂸꈁꆿꎰꌩꏪꇆꆉꈬꇬꍻꄉ,ꈜꎴꐯꈜꎴꃅꇸꀵꌊꇁꌠꉬ。ꊿꌌꇫꄉꀉꁌꁮꅉꃅꌧꇬ,ꊴꃀꐜꅪꅝꋺꌠꁦꀑꎺꒉꂷꒉꋋꐬꆹ,ꂷꊂꌸꌠ、ꑭꊨꇇꊭꈢꌠ、ꌩꇑꌦꆗꅑꌠꇿꐯꇿꐬꉬꄷꃅꉉꇬꎷ。ꃅꉒꃴꀱꍠꀕ、ꂷꉐꆈꑰꀕꃅꐛꌠꑠꋍꑍ,ꂸꈁꆿꎰꂶꌠꀇꐒꀮꇸꀵꇁꇈ,ꇭꀧꋋꂷꃅꑿꊿꌌꒉꅞꄉꑾꎭꋍꂯꂷꀋꏭꒈꊭꁂꄠꀕꇫꎍ。ꃢꈜꈧꌠꋋꇔꌊꇤꈏꇢꇑꂱꋯꄉ,ꃆꄔꇬꀊꃶꌐꊷꆣꀕꄮꇬꆏ,ꃅꈊꌋꐓꊿꀀꃅꆈꌣꀕꀐ,ꃅꉒꑌꀊꅰꃅꃴꄉꇇꎇꇇꀋꂿꇈꂷꉐꇯꀊꅰꃅꒉꀮꇬꄉꃝꎼꇁꌠꀋꏮꐛꃅꇫꎍ。ꋋꄓꇬꉆꄉꁧꂯꄐꄉꄮꇬꆏ,ꀊꄸꀈꏦꇁꇫꇬꄉꉉꇬ:
  “ꆏꄡꁧꀐ!‘ꁦꀑꑊꀋꉜꇈꀑꑊꉜ;ꇈꀑꑊꀋꉜꃪꀑꑊꉜ;ꃪꀑꑊꀋꉜꒉꀑꑊꉜ;ꒀꃀꑊꀋꑾꌺꀑꑊꉜ;ꌱꃀꄸꌠꀑꑌꌭ,ꎽꀮꎽꃀꈍꄮꑌꋍꈌꃅꋦ,ꀑꆗꀊꌱꈍꄮꑌꋍꁯꋍꑱꃅꋦꌠ’。ꉈꏭꊾꋠꆿꃀꐥ,ꆏꇆꆏꆹꇯꍝꃅꇬꄡꁧꀐ!”
  ꑠꃅꄉꂸꈁꆿꎰꆹꀋꁧꃅꀈꏦꋑꐥꇈꀐ。ꏤꃅꏤꄉꇬꆹ,ꀋꌦꀋꆅꃅꉘꁮꌟꃅꀈꏦꈿꄉꐥꐮ;ꉂꃅꉂꐮꄉꇬꆹ,ꎿꃀꒉꀋꌤꇓꂵꍹꀋꐛꌠꌟꃅꀈꏦꋍꑊꐮꉂꐯ。ꄚꉌꃀꉪꅉꐰꇑꇫꀋꑟ,ꃣꈌꉌꉪꐛꀋꉆ,ꐦꐛꃅꌒꅞꀋꉆ;ꈬꑍꈬꄅꀕ,ꊯꊪꑍꄀꄃ,ꀋꇴꀋꏢꃅꊭꌸ;ꂸꈁꆿꎰꆹꌩꁧꀉꒉꃅꊭꌸꌠꀋꏮ……
  “ꇅꂚ,ꆎꆹꆿꃀꁡꇤꊼꇅꉜꆹꄡꑟ,ꀊꄸꀈꏦꊼꇅꉜꆹꄡꑟ,ꉈꑴꆏꋦꐋꃷꇎꃷꇤꃺꑌꊈꑌꊼꇅꉜꆹꄡꑟꌠ。”ꃴꄿꏁꍅꂶꌠꈍꑋꃢꃅꎧꅝꍔꌺꋋꄌꌊꂱꀯꏢꁮꇬꑟꇈꋋꄻꉈꑴꄉꇬꎷ。
  “ꃴꄿꀋ,ꂸꈁꆿꎰꆹꈍꃅꌦꌠꉬ?”
  ꂚꄏꆹꂸꈁꆿꎰꌦꃆꌦꂮꉪꇫꎍ,ꋌꌌꉪꇬꋍꊨꏦꀃꅉꆹꅑꑘꒉꄷꐥꌠꌡꇬꎷ。ꁦꋠꌺꄿꋋꂷꆹ,ꂚꄏꋍꊨꏦꀃꅉꑭꄑꄉꋩꌊꆀꃅꃰꊿꈧꌠꈿꄉꐥꇁꂷ。ꄚ,ꋋꆹꀋꃉꆏꑿꐰꇑꑿꀋꐊ,ꑾꎭꑿꀋꅿ,ꂱꑱꐰꇑꎭꈐꂱꑱꀋꐊꃅꉬꐮꉬꉎꃰꃅꄰꃱꈿꌬꊿꐛꁧꀐ。
  “ꇓꂃꄡꀋꉆ,ꌦꌠꌭꀋꉆꌠꀋꏮꄽꂫꆏꄡꇗꆐꀋꉬꃅꌦꀐ。” ꃴꄿꏁꍅꂶꌠꄽꂫꆏꄡꇗꎧꏸꐝꏋꀕꑠꋍꁠꆧꋌꃃꆺꄝꇥꉢꆈꉘꀕꂶꌠꇬꊐ,ꆿꃀꁡꇤꀊꋨꄮꇬꆹꊋꀉꒉꃅꇤꄉꎷꏸꌠꌤꃆꐘꀞ,ꀋꉬꀋꉆꌠꆏꄻꀊꄸꀈꏦꁳꏲꄉꆸꎍꌠꃅ。ꂸꈁꆿꎰꆹꌩꌌꏦꃆꂮꌤꃆꐘꌠꄜꇲꌠꏲꂠ。ꁡꇤꇬꌩꏪꈧꌠꉬꇮꃅꊿꇱꋐꏦꇷꀠꀕꑊꅗꅍꎌꄮꇬꆏ,ꀈꏦꆹꊨꏦꀻꑳꂶꌠꑌꐆꌊꄚꈿꏦꇁꀐ。ꎷꏸꇤꄸꂶꌠꆹꀃꃀꉆꈤꇉꈂꀸꁡꉐꏢꅓꃅꁉꎍꇬꎷꐛꅹ,ꋍꑍꋍꉔꀉꄂꃅꌩꏪꂷꋋꇣꋠꌐꄎ。ꌩꏪꀉꁁꈧꌠꆹꈭꎴꈜꎴꇨꅈꇬꐛꎍꌐꒉꄷꃅ,ꂸꈁꆿꎰꂶꌠꆹꊿꁥꏃꌊꌋꄸꁮꒀꉜꄉꌩꏓꌩꉅꁧ。ꀈꏦꉣꑊꆹꈀꄸꑌꋀꊇꀊꄶꌩꏓꌩꉅꆹꌠꉌꃹꑓꐛ。ꄚꀈꏦꆹꀱꒊꀱꇁꃅꋀꊇꏭꏤꄻꇬ,ꀋꎪꀋꑴꃅꀊꄶꌧꂓꀉꃚꐯꀉꃚꀊꋨꁧꆹꄡꋐꃅꊏꇫꋉꄉꇈꃅꉉꇬꎷ。ꉉꅷꄚꑟꄮꇬꆏ,ꃴꄿꏁꍅꂶꌠꆹꀋꎸꀕꃅꋋꏮꂚꄏꇬꊼꇅꉜ,ꉈꑴꊛꄉꎦꁠꆧꋋꃃꇥꉢꅩꇉꅍꂶꌠꇬꊐꌦꀐ,ꆿꎰꆹꉪꀋꀽꉌꀋꃹꌦꄉꏽꐛꅹ,ꋋꎼꀈꏦꏭꈌꀱꉐꑣꄉꅲꇬ:“ꑞꐛꅹꌩꁧꋋꁧꄻꇫꋉꄉꇈ?”ꀈꏦꇨꇅꃃꀐ:“ꅽꏯꄡꋐꄷꆏꄡꋐꀋꅲ,ꅲꉅꅲꊨ,ꅲꅷꀋꑟꅉꀋꐥ,ꅲꌊꅽꀉꄉꅰꌋꅽꀉꂿꆀꌋꂶꌠꃅꄷꌠꅀ?”ꆿꎰꆹꃃꅑꇁꄮꇬꆏꇂꁮꏢꌡ,ꀂꏾꂶꌠꐕꌊꑞꂿꆏꑞꁻꀬꑵꌠꉬ。ꀈꏦꆹꀊꅰꃅꇨꇅꃃꌊꈁꑓꂶꌠꉘꁮꅐꇁꄮꇬꀋꏮꅪꃅꅩꍠꀕꇫꎍꇈꊛꄉꉉꇬ:“ꉆꀕ,ꆎꑡꌅꈌꐥꇈꉠꏯꑠꃅꅲꇁꀬꌠꉬ?ꉡꆹꌩꁧꀊꋨꁧꉌꃹ,ꉡꆹꅉꀕꃅꋌꉚꏾꇬꎷꌠꉬ!”
  ꂚꄏꉌꂵꂶꌠꆹꀊꅰꃅꌼꀖꑠꑵꁦꎆꇀꌦꀐ。“ꉡꆹꅉꀕꃅꋌꉚꏾꇬꎷꌠꉬ。”ꋋꆹꑡꀕꑵꄜꌠꉬꂯ?ꋋꆏꋌꀊꄶꌩꁧꀊꋨꁧꇂꃴꄉꉡꇁꉚꋻꄷꌠꅀ,ꉈꑴꋍꅿꍃꏽꈧꌠꄡꇗꊏꀊꄶꌩꁧꀊꋨꁧꇂꃴꊐꄉꑴꌦꄷꌠꅀ?ꋋꈨꉬꇮꃅ,ꒉꐎꌟꃅꐝꍠꀕ,ꉈꑴꆏꃅꉒꌟꃅꌙꉂꋍꅍꂿꉆꂿꀋꉆꃅꎌ。ꂚꄏꆹꀊꅰꃅꋍꉌꂵꂶꌠꑋꅉꀋꑌ、ꀀꅉꀋꀀꃅ“ꄏꀕ”ꃅꐂꅷꁖꁧꄉꏽꃅꎍꌦꀐ。
ꃴꄿꏁꍅꂶꌠꆹꎧꅝꍔꌺꏡꌠꋌꄌꌊꑍꁠꆧꃃꄉꅝꈭꐨꑲꆀꌺꇰꌕꈎꁱꐭꑲꀋꌧꂷꋋꇅꇬꑲꆀꁱꐭꇮꇁꂷꀋꏭꉉꇬ:
  “ꉘꀋꇉꃅꌤꆹꑠꃅꅐꀐꅊꇈ。ꌧꂓꇆꆉꏪꇬꄉꀱꇁꀊꋨꄹꉖꈊꃀꆏ,ꂸꈁꆿꎰꆹꌞꊿꂾꂁꄉ,ꌙꈈꀕꃅꃤꃀꏼꋋꄌꆼꁠꇬꏦꄉ,ꀋꎸꀕꃅꇁꌊꁧꄩꑟꇁꀐ。ꃅꅂꑭꁨꄉꌠꇂꃴꄉꃄꐎꋍꉔꀋꆏꀋꀀꃅ “ꌉꈿ”ꅷꃅꄜ,ꃅꍛꁱꇁꇄꌠꇬꆏ,ꃅꉒꃴꀱꍠꀕꌠꆹꀋꌋꀋꏡꃅ,ꇁꌊꇉꅼꉼꏒꀕꅈꇬꊐꐛꅹꑓꀋꂿꃅꎍꄉ,ꋋꆹꀊꄶꌧꂓꀉꃚꐯꀉꃚꀊꋨꁧꐊ,ꐰꇑꎭꈐꄸꄉꆺꀕꂃꊰꀋꉊꋌꀊꄶꄉꇉꊿꃪꊿꄺꄮꇫꐥꋺꌠꉼꏒꀕꌠꇉꅼꀊꋨꂷꇬꊐꄉ,ꏃꃅꉬꐮꃰꊿꐝꄉꉬꉎꃹꁧꌠꉬꅊꇈ。”
  “ꀊꑴ,ꃴꄿ,ꌤꋋꐘꆏꑞꃅꏛꃅꈠꃅꉉꉢꀋꇰꌠꉬ?”
  “ꋋꈍꑋꈎꈀꄸꑌꉌꂵꀋꇿ,ꈀꄸꑌꉌꂵꐛꀋꐛꀕꅹ。ꉪꊇꁡꇤꋋꂷꃅꄓꄉꋍꃢꐮꇖꐮꄟꋺ,ꌤꋌꐘꉉꈀꄸꑌꇰꀋꉆ。ꉈꀱꉉꇬꑌ,ꉡꆹꀉꑌꈎꑤꍰꇓꈓꇬꆹꀋꋻꀐ,ꑤꍰꇓꈓꇬꆹꄷꇬꑌ,ꉡꑌꄡꇗꑶꇽꁡꇤꃷꋪꏦꃤꍬꑲꆀꍑꌠꉬ。”
  “ꉬꑴꇆ,ꐯꑴꇆ,ꉡꆹꈍꄮꇬꇯꆐꏛꃅꈠꃅꀊꄸꀈꏦꊼꇅꉜꆹꋭꌠꉬꀐ。ꉡꆹꋍꎝꁯꀐ,ꉡꀊꄸꀈꏦꉁꎝꁯꀐ!”
  ꂚꄏꆹꅏꊋꃅꌗꇫꅐꇈ,ꑓꏣꉈꀋꈻꃅꏮꀊꄶꌍꑓꉈꏭꃰꌦꀱꑐꀕꃅꃘꈧꌠꇬꉜꎍ。ꐷꈭꇬ,ꃰꈧꌠꆹꀊꅰꐛꀊꅰꃅꀉꂥ、ꀊꅰꃅꀉꄖꇁꇬꎷ,ꄚꈍꃅꑌꉌꐒꇁꎭꌠꁮꁧꈧꌠꐛꒌꐛꄟꆹꁿꄉꀋꄐꇬꎷꌠꉬ。
  ꊁꄹꉇꃅꄜꄮꇬꆏ,ꃰꈉꁡꊭꀋꃀꇬꑟꇫꎍꀐ,ꂚꄏꆹꄡꇗꃴꄿꏁꍅꐊꆿꃀꁡꇤꑟꆹꀐ。
  ꀊꄸꀈꏦꀻꑳꂶꌠꀋꋉꀋꄻꃅꇫꎍꑴꌦ,ꋋꆹꌞꃅꄷꄉꀀꇙꄚꀀꇁꌠꃀꌠꀉꂵꑓꋪꑍꁆꌠꐯꇯꑓꁖꑠꂷꌋꆀꐯꇯꋍꑷꃅꋦꅊꇈ。ꐥꐨꐥꄸꃆꂮꆹꊋꋠꐯꊋꋠꑴꇬ,ꄚꀈꏦꆹꀉꂵꑓꁖꋋꂷꇫꁌꒉꐮꁌꒉ,ꀋꃋꂷꉪꇫꑟꄎꌠꃅ,ꋋꃅꇫꑟꄉꌐꀐ。ꂚꄏꇁꄚꑳꁥꌺꋋꂷꇬꃹꄷꆏ,ꑶꋦꉾꃪꐮꁌꒉꄣꅼꌠꀉꄂꊌꐥꄎꌠꑱꈐꊷꆣꀕꌠꋌꌌꉪꇁꀐ。ꊼꇅꋍꉌꂵꇿꏯꃅꐙ,ꀉꇖꀉꎭꌠꉌꂵꂶꌠꑋꋋꇅꃅꑾꌙꁦꉘꀕꃅꎍꀐ。
  “ꆏꉬꅊꇈꅀ!”ꋌꇬꊎꀉꂵꎁꃅꃢꈜꀉꁘꀉꇁꈧꌠꏓꌊꈪꀱꏿꅷꐺꅊꇈ,“ꐚꁧꀐꌠꎺꑌꃱꇌꈍꃅꐙꀱꉈꑴꇁꑲꌧꌠꉬꂯꇆ?”
  ꋍꅿꐛꐪꐛꊀꂶꌠꆹꒉꈻꑌꀋꉬꒉꊸꑌꀋꉬꃅꎌ,ꋍꅿꉂꏣꉂꑟꆹꃆꄔꑌꀋꌡꀇꐒꑌꀋꌡꃅꎌ。ꂵꆧꈧꊝꀕꄮꇬꉬꐛꅹ,ꃰꈧꌠꆹꀋꃉꆏꑊꏦꄉꀋꐛꃅꊼꇅꑬꆏꎍꀐ,ꀻꑳꇬꑆꇁꌠꉘꁮꑬꆹ,ꐍꇅꅍꇁꊿꌶꇬꊷꆣꌺꃅꀋꐛꃅꈺꄂꅍꊽꎬꈠꍅꋍꀕꃅꐙ。ꀉꂵꂶꌠꃷꇎꃷꇤꅍꄉꌧꈿꁉꈿꁧꀐꐛꅹ,ꇤꈏꇢꇑꏢꁮꇬ,ꀊꄸꀈꏦꀉꄂꇫꏮꐺ。ꋋꆹꑠꃅꏾꁒꏾꌌꅍꎌ,ꅲꇫꅇꂷꑌꀁꑌꐯꀁꑌꇈꀋꀬꏾꌌꀕꃅꎍꇁꄉꏽ。
  “ꌩꏪꇆꆉꐛꅉꇬꆏ,ꎺꑌꃱꇌꌋꆀꋍꑟꋍꑵꉌꊭꑠꆹꈍꄮꇬꑌꐙꀱꋍꄩꑌꇁꌠꉬ。”ꂚꄏꆹꉌꇿꑓꇿꈮꈜꃅꅇꉉꅷꐺ,ꋍꅇꂷꈐꏭꆹꉘꇉꅍꌋꆀꇁꉚꌠꐛꂨꅍꍃꂁꇬꀀꎌ。
  “ꆿꃀꁡꇤꆹꌩꏪꇆꆉꐛꅉꀋꐥꀐ,ꈍꄮꇯꆐꊿꇱꋐꇽꀒꌃꃅꊸꆗꀐ。” ꋍꅿꉂꐪꉂꏣꆹꄡꇗꃆꄔꑌꀋꉬꀇꐒꑌꀋꌡꃅꎍꑴꌦ。
  “ꌩꏪꇆꆉꄹꁆꆹ,ꐥꋊꐥꍂꃅꀋꑍꀋꈤꃅꒆꊽꉌꂵꇬꅿꋦꀑꌠ,ꈀꄸꑌꇫꇽꇬꋐꀋꄐꌠ。”ꂚꄏꉌꂵꂶꌠꑌꄏꄹꐂꆹꀐ,“ꀈꏦꀋ,ꆎꆹꉠꉌꂵꇬꋦꎌꌠꌩꏪꇆꆉꀋꉬꄷꌠꅀ。”
  “ꀋꉬ,ꀋꉬ,ꆎꆹꑠꃅꉉꀋꉆꌠꉬ。”
  ꀈꏦꆹꌕꃢꊛꄉꀒꆺꈩꈭꐨꆏ,ꌙꈈꀕꃅꊰꎺꏣꉪꏡꌠꇁꄿꆈꃃꀕꏡꌠꇬꊐꀐ。ꋍꏭꇬꑌꄷꑌꀋꉉ,ꋍꏭꋍꑊꐮꐞꈭꐨꐛꐨꐛꊀꑌꀋꅲꀋꇭꃅ,ꋌꇯꍝꃅꀋꀬꏾꌌꀕꀐ。ꇤꈏꇬꆹꃆꄔꀄꊭꌺꑠꍈꄻꇫꏦꄉ。ꀈꏦꆹꋍꇅꋋꇅꇬꀉꄂꏮꃆꄔꇣꌠꉜꑲꆏ,ꑱꈐꋋꂷꇬꃆꄔꂴꍀꍈꇤꉇꄉꈭꐨꆏ,ꀋꇊꇬꆏꀈꏦꀉꄂꇫꐥꀐꌠꌡꇫꎍ。
  “ꅽꃆꂮꆹ,ꃴꄿꏁꍅꂶꌠꇱꉉꉡꇰꄉꌐꀐ。”ꂚꄏꆹꉌꂵꈐꇬꄉꉌꐡꌠ、ꉌꎭꌠꌋꆀꀊꄸꀈꏦꋍꇬꂿꀋꈬꄉ,ꉌꂵꀋꇿꈧꌠꉬꇮꋍꋰꋌꍅꄉꌐ。“ꃴꄿꏁꍅꉣꑊꆹꋍꃢꐮꇖꐮꄟꋻꀐ,ꉡꆹꅽꎝꌣꇁꌠ,ꉡꆹꅽꉂꎝꌣꇁꀐ。”
  “ꀋꉬ,ꀋꉬ,ꑠꀋꉬ。”
  ꀊꄸꀈꏦꆹꌩꇣꑐꌺꀄꊭꑠꍈꌌꀋꆏꃅꌦꒉꂯꄉꀐꌠꃆꄔꇣꌠꇬꃸꆽꅷꐺ,ꀋꆏꃅꀒꆺꑌꈩꅷꐺ。
  “ꉡꆹꑡꑌꀋꈉꀋꊸꀐ。”ꋌꁱꐭꄮꇬꃚꋒꆹꊅꆀꀱꅍꎍꄉꊽꉌꂵꋋꎼꑑꃹꏾꁵꀕ,“ꉡꆹꑡꑌꀋꈉꀋꊸꀐ。ꀑꆈꐈꇁꀑꐎꐛ,ꀑꐎꐈꇁꀑꆈꐛꀋꉆ,ꉡꆹꑡꑌꀋꈉꀋꊸꀐ,ꑡꀕꑌꃄꏾꒉꌌꃅꇇꈢꋒꈧꐊꈞꆈꃹꁧꌐꀐ。”
  “ꀈꏦꀋ,ꉬꇮꃅꈢꋒꁧꀋꌐꑴꌦ,ꐩꋊꃅꑍꆹꄡꇗꉪꊇꃤꉬꑴꌦ。ꆏꉜꉏ,ꉪꊇꐯꇯꀑꆈꀕꏸꀕꀋꌐꑴꌦꄷꌠꅀ?”
  ꂚꄏꉌꂵꂶꌠꆹꀊꅰꃅꉌꐒꇁꎭꇀꌦꀐ:ꀊꑴ,ꉡꆹꀋꎪꃅꋍꅿꐜꀋꈨꑍꆘꅝꀐꀊꋨꈨꉬꇮ,ꀋꎪꃅꎹꋋꊒꌐꂯ!ꈍꑋꈎꂿꊨꏦꆹꃶꐚꃅꄷꐀꏸꏦꇨꀐ。ꎭꈐꂄꌠꆹ,ꀋꃉꆏꑸꆀꂶꌠꆹꇁꋍꇬꆼꁱꌠꌤꆿꑠꀋꃅꀐꐛꅹ,ꋍꇬꈭꋍꈜꇈꌠꀋꐥꄉ,ꋋꆹꀬꅑꃅꋍꊨꏦꉌꂵꇖꂽꐨꉉꄜꎼꇁꀬꌠꉬ。
  “ꀈꏦꀋ,ꉆꐥꃅꉠꅇꃅꇆ,ꉣꑊꆹꋍꈜꐥꁧꂿ。ꍑꍓꀋ,ꉣꑊꆹꐥꋊꐥꍂꃅꋍꈜꐥꁧꂿ!”
  “ꀋꍑ,ꀋꍑ,ꀋꍑ。”
  “ꑞꐛꅹꉬꀋ?ꋦꐋꃷꇎꃷꇤꃺꑌꊈꅽꊂꈼꊨꌠꐒꌠꆹꉬꑲꆏ。ꁧꂿ,ꃆꏂꑍꆏꁧꂾ。ꀔ,ꀉꂵꑓꁖꂶꌠꆹꉈꇬꌠꉬꑲꆏ,ꋋꆹꐒꄻꀋꅐ,ꋋꆹꃀꅉꇯꆐꉪꊇꐊꄉꐥꁧꋭ。ꍑꍓ,ꉪꊇꃆꏂꑍꆏꁧꂾ?”
  ꂚꄏꆹꐂꀒꁨꉆꄉ,ꀅꌳꃅꇤꈏꇢꇑꏢꁮꇬꄉꀊꄸꀈꏦꂶꌠꋌꇱꆼꃬꎼꇁꇈ,ꀋꎺꃅꇇꑍꁆꌠꋌꍔꄉ,ꏟꈯꀕꃅꀈꏦꋋꄌꋍꂣꈐꇬꊐꄉ……ꋍꉌꂵꈐꋌꀕꉇꀋꇮꃅꉌꎭꌠꃅꑌꐛ,ꉈꑴꉌꌒꐯꉌꌒꌠꑌꌡ。
  “ꀋꍑ!ꀋꍑ!ꀋꍑ!ꑠꃅꇬꀋꍑ,ꆏꑠꃅꀋꉆ!ꇅꂚꀋ,ꆏꑠꃅꀋꉆꀐ!”
  ꋋꆹꂚꄏꂣꈐꇬꄉꃆꀞꂷꏣꈘꇁꌠꀋꏭꋌꐂꉈꏭꅞꇈ,ꀋꎺꃅꀂꏾꋋꎎꌊꍀꌺꂷꊿꇱꌾꇨꇅꃃꀋꎺꌠꀋꏮꑓꍻꅍꋌꍻꂚꄏꇬꀵꎌ。ꋋꌗꋍꌗꈻꌗꃀꌗꌺꐮꑘꀋꒃꇨꇅꃃꑓꂷꅪꇬꀕꇫꎍꀐ,ꅫꏶꀕꌠꂱꑆꋑꌠꊼꇅꁈꎍ,ꎐꂷꐍꊭꀕꑍꎆꌠꋌꌃꇯꏢꀕꃅꐯꇯꄉ,ꀋꇊꇬꃅꆳꂯꁏꇫꃹꒉꀋꄐꌠꌡ。ꀊꄸꀈꏦꑠꃅꇨꇅꃃꌠꆹ,ꂚꄏꇬꊌꂿꀋꋻꑴꌦ。
ꋍꈪꌺꐛꇬꆏ,ꋍꈁꑓꇬꃃꃚꃃꉐꈧꌠꆹꐜꀋꈨꀐ,ꋌꃚꋒꀁꂥꌺꃅꇈꎮꑑꅉꃅꇖꂟꄉꉉꇬ:
  “ꆏꁧꅲꀐ,ꁧꅲꀐ!ꃅꃴꈭꏂꐚꁧꆏ,ꁰꒌꄚꈿꌞꃅꐛꁧꃲ。ꁧꅲꀐ,ꆏꉆꐥꃅꁧꅲꀐ!ꉡꆹꀞꄂꆗꉼꃅꐥꇬꄉꀊꅰꃅꃪ,ꉡꆹꐰꇑꎭꈐꀮ、ꑍꀮꉖꇯꆐꄚꇬꑟꀐꌠ。ꆏꁧꅲꀐ!ꉡꆹꇯꍝꃅꅽꇬꇖꂟꃲ,ꆏꑴꌠꉠꇬꄉꄡꇤ,ꆏꑴꌠꉠꇬꁧꄡꏘ,ꉠꇫꎭꃅꄡꉈ。ꆎꆹꉠꃆꂮꆏꌧꋭ,ꉡꆹꊿꉠꇬꄉꇤꌠꌂ,ꉠꇬꁧꏘꌠꌂ,ꉡꆹꇯꍝꃅꅽꅿꎭꃅꉈꐨꀋꈉꀋꊸꌠꉬ。ꉡꆹꇯꍝꃅꅽꇬꇖꂟꃲ,ꆏꉆꐥꃅꁧꇆ!”
  “ꉢꁧꀋꉆꀐ!”ꂚꄏꃹꅼꃅꉌꎭꑓꁧꌠꆹ,ꀍꃈꀱꆽꃅꋍꅿꈄꊋꑌꌠꃆꄔꄀꃅꄀ、ꃆꄔꐞꃅꐞꋌꎼꉙꀕꄹꐞꇁꀐ,“ꉡꆹꎝꊒꇁꌠ,ꉡꆹꁧꀋꉆꀐ!ꎝꊒꐝꀋꉅꑲꆏ,ꉡꆹꐥꋊꐥꍂꃅꀋꁧꃅꄚꆿꃀꁡꇤꀀꀐꌠꉬ!”
  “ꀋꇷꀒꀋꇷꋠ,ꈨꑗꉘꁮꇬꉚꇁ!ꎝꁭꌠꋋꀧꆹ,ꈀꄸꑌꇫꊒꐝꉅꀋꄐꀑꄷꇆ!”
  ꋌꋋꇅꃅꉨꑭꒈꁴꏿꇈ,ꀋꎺꃅꇇꑍꁆꌠꍔꌊꂃꂪꋌꍣꁡꊭꀋꃀꇬꑟꄉ,ꃆꇭꃅꃨꑠꂷꏣꄀꏣꈘꆶꁧꌠꀋꏭ,ꋌꀥꉈꏭꃅꉒꃴꇈꂶꉐꆈꑰꀕꌠꃅꃤꈬꇬꃹꁧꀐ……
  ꂿꃅꁬꌠꑌꈊꅉꇀꅉꑟ,ꈊꅉꇀꅉꃅꑓꀋꂿꀐ。ꎸꅍꌍꑓꂴꆽꉆꎍꌠꂚꄏꂶꌠꆹ,ꉪꏡꈜꇬꄉꋋꇅꃅꀀꐚꇁꀐ,ꄚꀊꄸꀈꏦꇬꉂꌠꉂꐪꆹ,ꄡꇗꋍꍈꂯꀁꋌꀋꒊꑴꌦ。ꀋꃋꋌꇅꇬ,ꋍꑓꐛꈌꐛꇁꌠꆏ,ꀊꄸꀈꏦꑌꀋꉬ,ꃴꄿꏁꍅꑌꀋꉬ,ꋋꆹꐒꀊꄶꌧꂓꀊꋨꁧꇬꄀꄉ,ꊒꀕꃅꋍꀀꅉꌍꑓꇬꉜꄉꏅꌠꃚꋒꀉꂥꃅꂿꌠꇦꀨꅇꁊꇁꀠꀊꋨꂷꀉꄂꉬꌠ。
  ꄆꍣꂶꌠꄆꃑꑲꆏ,ꀊꄸꀈꏦꉬꄿꂿ,ꎭꂵꊞꐂꉬꄿꂿ,ꀃꂰꈊꃀꋋꉔꆹꈍꃅꑌꂇꋍ“ꇌꉻ”ꋋꂷꇬꆹꃹꇁꀋꀬꀐꌠꉬꐛꅹ,ꋌꌌꉪꎼꇁꇬ,ꋍꉌꂵꂶꌠꊼꇅꎌꅉꎍ、ꀀꅉꀀꑘꒃꊖꑣꃅꐙ,ꄚꉈꑴꊼꇅꉘꇉꉘꀋꅐ、ꉘꇉꋚꀋꎑꃅꑌꐛ。ꉪꑌꍣꅼꌠꆹꀅꌳꀅꌳꃅꉂꏣꉂꑟꋌꇱꎃꊐꇫꎭꀐ,ꉌꂵꂶꌠꆹꎌꅉꎍ、ꀀꅉꀀꑘꒃꊖꑣꌠꀉꄂꋌꌌꉪꇁꇬꎷ。
  ꋋꆹꃀꅉꆐꂚꄏꊨꏦꊋꐛꀐꄸꌠꅀ,ꉈꑴꋍꊨꏦꅿꐒꊀꌠꉬꂯ?ꂚꄏꅿꅳꃀꆹꄅꍻꆏꄅꍻꄹꇬꊎꆅ,ꋍꀂꏾꂶꌠꆹꇦꀨꅇꁊꇁꀠꀉꒉꀊꂥꂶꌠꇱꂨꁖꄉꏽꃅꎍ,ꀊꄶꋍꃢꈴꅷꈢꋒꁧꀋꉆꌠꉺꍯꇶꌠꆹ“ꉺꇉꉺꇉ”ꄹꋍꀂꏾꄩꄉꂃꅷꐺꌦꀐ。

               ꊁꊛ:ꉒꈌꈬꇬꉂꏣ(ꊰ)http://yi.yizuren.com/plus/view.php?aid=127

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ