ꂴꊛ：ꉒꈌꈬꇬꉂꏣ(ꊰ)http://yi.yizuren.com/plus/view.php?aid=127
ꊯꊪ
ꇯꍝꃅꂚꄏꂿꇁꂿꄷꌠꆹ，ꃶꐚꃅꑲꆏꑸꆀꀉꄂꈨꀋꉬꅇꇈ。
ꄵꇓꁦꀑꄉꏮꉈꑴꇁꈭꐨꆏ，ꋋꆹꇯꍝꃅꀑꊰꑊꊰꀙꐯꀙꀐꌠꉬ，ꉌꂵꂅꊿꋋꉉꅐꇁꀋꇮꃅꎍ。ꋌꃶꍋꀯꇬꎹꆹꋺ。ꉘꇉꌠꆏ“ꃼꏯꎎꁥꌠꎁꃅꊋꁈꍈꄏ”ꑟꉂꌠ。ꂴꆹꊇꅉꃶꐚꇯꆐꋍꇬꌂꌠꉹꁌꈧꌠꆹꉫꑌꋍꇬꍻ，ꀋꉬꋍꇬꍻ；ꀙꑌꋍꇬꉉ，ꀋꀙꋍꇬꉉ，ꉉꏾꉉꀋꏾꃅꉉꇬ：“ꀋꃉꆏꑡꑌꄣꇫꎍꌐꀐ，ꌅꂮꑌꃰꊿ，ꇓꐚꑌꃰꊿ，ꃅꃴꃄꅉꄅꀕꒊ，ꉪꊇꆹꌞꊿꇬꏲꌅꈌꀋꐥ！”ꑍꃀꑍꊂꋍꇬꄏꐓꈧꌠꆏ，ꊜꋽꄮꈉꎹꄉꇈꏡꁈꏂꇬꁳ：“ꑡꌅꂮꑌꃰꊿ，ꇓꐚꑌꃰꊿ，ꃅꃴꃄꅉꄅꀕꒊꄷꌠ，ꋋꆹꊾꇷꊿꇋꈱꊾꊏꌠꉬ。ꉹꁌꏓꂱꑲꆀꇯꍝꃅꌳꈄꀋꃀꍜꇰꀊꇐꅿꊂꋊꊁꒆꁥꌠꉬ，ꆏꑴꌠꄡꇗꉌꄡꐒꑓꄡꊀꃅꅽꅿꉹꁌꏓꂱꁥꌠꄕꊪꌊꌬꇀꌦ！”
ꋋꈨꐛꅹꃅ，ꁱꂷꀉꒉꄊꊫꀨꈧꌠꆹꃅꃴꃄꅉꉱꄐꃅꁖꇁꌐꀐ，ꒊꃀꒈꅐꃅꅐꇁꌐꀐ。
ꄚꑠꃅꑴꇬ，ꃆꑘꆹꁢꊧ，ꌤꑘꆹꅐꒉꄸꐥꑠꑵꉬ，ꇫꄉꀅꌳꃅꍤꇬꌤꅐꊫꄳꍈꑌꎹꀋꊌ。ꁢꊧꀋꐥꃅꄀꇗꇱꄉ，ꄵꇓꁦꀐꌤꑘꐘꌠꅿꊂꆈꏂꇫꊿꂶꌠꌌꂚꄏꃅꄉꉉꇬꆹ，ꀉꁁꄷꀋꁧꐏꎭꁥꌠꈒꇓꇬꇯꉉꌊꈴꒉꅉꀋꊌꌠꉬ。ꎼꃅꃏꑽꌠꑊꋌꉱꃀꃆꄔꇣꌠꆹ，ꈍꃅꑌꏦꌊꃆꄔꂱꍀꄓꆹꀋꄐꇬꎷꌠ，ꑠꅹꇦꀨꅇꁊꇀꀠꀉꒉꂶꌠꌌꇫꄉꊨꏈꏿꌦꀐ，ꄷꀋꁧꊛꄉꂷꇭꂶꌠꑌꄌꉈꏭꎼꇁꀐ：ꉛꀕ，ꂴꋌꂶꌠꌌ“ꊼꇅꆼꍅ”、“ꊼꇅꃪꉚ”，ꋍꅿꏦꒉꋦꇈꇧꀱꋦꌠꊼꇅꅥꍅꇫꎭ！ꊂꑲꆀꏡꁈꀉꇨꏢꏂꄉ，ꋀꅿꅑꃆꅑꑘꊼꇅꅲꉚꂿ，ꋍꇅꀉꄂꃅꌩꉱꋊꉱꋃꐴꀋꊌꇫꎭꂿ，ꄷꀋꁧꊛꄉꄚꈐꏭ“ꊿꀋꂄꆈꒉꀕꈧꌠꌋꆀꋀꅿꊂꋊꌺꇖꈧꌠ”ꉬꇮꌩꎴꌊꅤꃅꐬꉱꀋꅑꑠꂷꇬꊐꇫꎭꌐꂿ。
ꄚꈬꑍꈬꄅꀕꌠꆏ，ꉈꑴꋍꃢꐯꀋꄮꐮꆹꀖꌦꀐ。
ꋋꆹꀋꉻꃢꌺꈍꑋꏮꇬꉚꒉꋺ，ꀋꉻꃢꌺꀱꉈꑴꇁꄉꉉꇁꇬ，ꀊꄶꇬꆹꎸꅍꎸꀹꏼꀉꄂ，ꄻꐛꀋꐛꑲꆏꊰꇁꉆꄉ，ꃅꐎꊯꎖꑋꅀꆪꁁꂷꃅꑓꀋꂿꁧꉆ。ꑸꆀꆹꇯꍝꃅꈌꎓꅲꐡꇈꀑꃶꑓꈹꊐꀐ。ꂴꆽꉪꄉꇬꆹꑤꍰꇓꈓꑭꊂꃅꑆꁬꌠꃅꐮꐊꈴꑲꆏ，ꂚꄏꅿꅋꒉꑱꒉꈧꌠꆹꀋꉬꀋꉆꌠꆏꑘꃅꁡꇤꐥꌐꎻꈁꄉ，ꌌꀱꒊꀱꇁꃅꊨꀖ，ꇝꂱꇴꉻꆹꃅꍛꁯꃅꁯꌧꉆꐝꉅꇁꇈ，ꀉꇨꃅꐮꉻꏑ、ꌕꑵꐮꐊꌠꃅꉆꄉꇝꂱꊈꑼꉼꂷꄻꉆꀐꉂꃅꉪꄉꌠ。ꄚꀋꃋꑲꆀꀱꉈꑴꄉꉜꇁꉪꇁꇬꆏ，ꉪꐪꋋꏢꆹꃶꐚꃅꀉꑳꌕꈎꉪꃅꉨꄉꆹꑽꆽꀠꀐꌠꉬꅊꇈ。ꀋꇷꇆꀋꇷꋠ，ꈨꑗꉘꁮꇬꉚꇁ，ꋋꆹꇯꍝꃅꑽꉎꑽꄅꇱꌠꉬꀐꅊꇈ！ꋋꆹꃄꐔꄀꅷꃅꉈꑓꂡꑙꃲ，ꀀꑌꀋꉬ，ꑋꑌꀋꉬꃅꉌꂵꎌꅉꀋꎍꃲ，ꒉꄸꆏꋋꆹꍏꇬꌍꆽꁏꉻꏑꊝꀯꇬꄉꊨꏦꉌꂵꉪꐪꀉꇨꈧꌠꄜꆹꋺꀐꒉꄸ，ꋋꆹꍏꇬꑌꄉꁍꌒꁱꌺꄻꀋꏾ，ꉘꇉꌠꆏꀏꏯꄉꌤꃶꐚꃅꑠꍈꃅꇁꑟꉂꌠꉬ。ꐯꅀꀋꐯꆹꋌꋋꀋꐚ，ꌞꊿꌌꇫꄉꉉꇬꌜꇝꂱꊈꑼꉼꑦꊤꆹꀑꐱꃅꋍꉪꐪꋋꏢꇬꉌꃹꑓꐛꈴꑴꄷ，ꊭꄎꄉꇬꋌꁳꑤꇬꄉꌟꒉꏲꌋꌅꈌꌬꌠꑍꂷꂶꌠꅀꌕꂷꂶꌠꄺꏢꉪꄷ。ꃀꅉꆐꋍꄩꋍꂷꀉꄂꐥꇈꋍꇂꃴꄙꀕꃪꀕꃅꐥꌠꌟꒉꑍꂷꂶꌠꄻꅀ，ꄡꇗꁍꌒꁱꌺꌡꇈꌟꒉꌅꈌꌬꌠꌕꂷꂶꌠꄻꂯꆏ？ꋋꆹꀋꉬꀋꉆꌠꆏꋍꅿꃅꐪꑽꑌꌋꆀꋍꅿꌤꃅꆿꃅꄐꐨꐥꀋꐥꌠꇬꀉꄂꉜꌠꉬꀐ。ꋍꇁꌊꑤꋋꂷꇬꑟꇁꈭꐨꆏ，ꂴꆽꉪꃅꉪꄉꇬꆹ，ꀊꑙꌧꃰꑣꃅꑣꑟꉂꇁꌠ，ꄚꐦꐛꃅꌒꅞꀋꉆ，ꃣꈌꉌꉪꐛꀋꉆ，ꉌꂵꉪꅉꃅꇏꇬꀋꑟ，ꉘꀋꇉꌠꆏꂚꄏꅿꐴꀕꆹꀊꅼꃅꀀꇨꀕꅊꇈ，ꐯꇪꐯꎏꀙꇨꀕ，ꈻꐴꈘꂯꑌꇫꈻꀋꄐ；ꒇꆼꈘꂯꑌꒇꇬꀋꀙ。ꏡꁈꀉꇨꑵꀋꐥ，ꌦꂽꌋꂽꈨꀋꐥꃅꄉꂚꄏꂶꌠꂵꇂꃴꅞꉱꋊꇫꎭꂿꄷꇬꆹ，ꇯꍝꃅꃀꅉꆐꆿꃀꇬꊀꄅ，ꉘꁮꇬꏣꄀꆹꌠꏭꀋꋌꃅꊋꋠꐯꊋꋠꌠꉬꀐ。
ꑸꆀꌤꀞꅉꈚꌠꆹ，ꈍꄮꇯꆐꊈꌊꂚꄏꅿꌤꀞꅉꈚꌠꇬꄻꄉꀐ。ꌍꑓꉈꏭꆹꉻꈫꀄꊭꑠꍈꇬꐙ，ꉬꇮꃅꌧꅪꑵꌠꀉꄂꊪꄉ。ꉻꈫꄽꂫꑞꅉꈚꌠꇬꆏ，ꊖꁍꇬꊫꄉꐚꀮꀋꏮꑲꌺꀄꊭꑠꎆꋉꇬꑕꄉ。ꈐꏭꆏꀋꆪꑐꀊꎴꍔꂄꑵꌠꑠꊰꂷꉘꇬꈢꄉ。ꃥꌋꑶꌠꇬꀋꐥꄉ，ꋀꊇꆹꈁꏾꃅꊿꌌꆼꍅꑗꉘꍈꐛꅹ，ꌦꌠꌦꈔꌠꈔ，ꌕꀥꃘꈚꃰꃅ“ꑊꋌ”ꋚꈁꐛꌐ，ꀋꃉꆏꉌꂅꑓꑣꉌꃀꈥꇤꀕꌠꑠꋍꋒꀉꄂꋒꇈꀐ。
ꑸꆀꆹꌤꃅꅉꄉꉻꈫꇬꊼꇅꒉꏾ，ꋌꐥꍂꃅꈭꊒꈛꊒꇬꈴꌠꋻꅑꐨꀋꐥ。ꄚꊼꇅꍑꑴꌦꌠꆏ，ꋋꆹꀋꉊꋍꃢꀛꐂꑫꑵꂷꉬꐛꅹ，ꐱꆹꑾꌙꄷꑭꁘꊼꇅꐕꇈ，ꇭꀧꊼꐂꇬꆏ，ꋋꇅꄷꋌꐂꌍꑓꇬꉆ，ꉈꑴꊛꄉꀅꌳꄷꑠꇅꐁꌦꇬꆏ，ꋌꇁꀋꆪꑐꀊꎴꍔꂄꀊꋨꑍꂷꂴꆽꉆꎍꀐ。ꄵꇓꁦꀑꄉꐬꆠꃰꈻꈧꌠꆹꀋꃉꆏꐩꋊꒊꃀꐊꇿꇬꃹꁧꌠꋌꋋꀋꎺꀐꐛꅹ，ꋍꅿꈂꀸꈌꇢꉐꇢꅑꏡꌠꋋꇅꃅ，ꆺꄝꊫꃴꑍꈯꄹꈂꀸꇬꄉꁡꇂꒉꐚꀞꇀꌦꀐ。
ꌩꏾꆲꁏꊰꌐꀐꌠꌧꅪꈧꌠꇂꃴꆏ，ꂷꋏꂶꄧꃅꁬꐴꑍꇯꇬꁖꎍ。ꀋꆪꆹꋠꅍꀋꊌꀑꐛꅹ，ꑓꋪꍻꄉꑡꑌꀋꇝꃅꁬꐴꈧꌠꌃꋠꅷꐺ，ꄷꀋꁧꑓꋪꋑꌠꐬꆠꏸꏦꒌꆠꀀꅉꀋꀀꃅꅼꉜꍯꉜꇱꀋꏦꃅꎍ，ꈍꄮꑌꈔꏣꉮꏣꈧꌠꇬꋓꉪꁨꎍꇬꎷ。ꑸꆀꂶꌠꐧꊭꈎꌊꐺꌠꂿꇬꆏ，ꀋꆪꅻꀧꇖꁆꌠꆹꋓꃅꄖꂿꃅꇬꉜꎍꌐ，ꐁꈯꏿꀉꎴꐯꀉꎴꃅꐂꅷꐺ。ꑠꃅꎍꌠꂿꇬꆏ，ꑸꆀꂶꌠꆹꀊꅰꃅꀋꆪꀊꋨꑍꂷꇬꈹꈩꏾꇀꌦꀐ。
ꑸꆀꂶꌠꈛꎂꁋꑟꀕꃅ，ꋍꇭꀧꇬꂽꃢꈜꀉꆹꈫꌠꋌꇔꌊꇇꇬꊐꄉ，ꍔꌊꉆꈹꉍꈄꁬꄻꄉ，ꀜꅉꐁꅉꃅ，ꄚꑍꆹꌔꆹꀉꄂꐥꌠꌧꅪꏪꋋꂷꇬꄉ，ꉆꈹꌠꈩꅍꈩꅷꐺ。
“ꑸꆀꐋꀨ，ꆏꑡꃅꅷꐺꇆ？”
ꃮꂱꎼꂶꌠꇁꌊꌤꃅꅉꇬꑟꇬꆏ，ꑕꇭꀧꇬꎑꎍꏖꑐꅑꀂꄁꈬꀉꄂꈚꐺꌠꑸꆀꂶꌠ，ꉻꈫꇬꐺꌠꋌꊌꂿꄉ，ꐃꎎꇂꂮꅍꋌꇁꌊꌍꑓꂴꆽꉆꎍ。ꋋꆹꉪꄉꐂꌍꑓꉈꏭꈴꒉꏢꉪꌠ，ꄚꊋꃤꌋꆀꌗꀋꐥꀋꇎꐛꅹ，ꈂꀸꏡꌠꀉꄂꀌꀠꂷꀋꏮ，ꂴꋍꂴꑑꄹꊿꋌꀋꈨꊿꋌꀋꌧꃅꑞꀕꏈꅷꐺꀋꐚ。
“ꀊ——ꑴ，ꆏꁖꉈꏭꄡꇁꃅꄉ。ꉢꇬꊎꀋꆪꈹꅷꐺꇆ。”
“ꆏꀋꆪꈹꌊꑞꃅꂯꇆ？”
“ꁨꇐꐥꏠꌠꀉꄂꀋꆪꉘꉆꑲꆏ，ꌍꆽꁏꁥꌠꆏꀋꆪꎸꋠꀋꉆꄷꌠꅀ？”ꑸꆀꂷꌠꒈꅉꃅꂽꀂꄁꀉꁘꈫꌠꋌꇱꒃꇬꊐꌊꀱꌍꑓꂴꆽꉆꎍꀐ。
ꃮꂱꎼꂶꌠꇭꀧꊼꇅꎎꇈ，ꋋꇅꃅꀂꄁꈫꌠꋌꇱꊪꇇꇬꊐꄉ，ꀋꆏꃅꈂꀸꏡꌠꌌꀂꄁꇬꈑꋧꈑꃀꈧꌠꂡꅷꐺ。
“ꉐꑴ，ꆏꉜꉏ，ꆏꋋꂷꇯꍝꃅꁦꋠꌗꀋꉆ。”
ꑸꆀꂶꌠꐂꌍꑓꈐꏭꃹꇁꈭꐨꆏ，ꀂꄁꈫꌠꋌꇱꒃꌊꈍꑋꇇꇤꈭꐨꆏ，ꈁꇁꉈꃅꋌꇱꇵꊨꏦꑋꅉꂶꌠꇬꅞꄉꀐ。
“ꁦꋠꌗꌊꑞꃅꂯꇆ？ꂱꎼꅿꂿꃆꁻꌐꆹ，ꌟꒉꈧꌠꀨꎹꆽꃴꋒꃅꄉꑲꆏꍑꀐ；ꉠꅿꑭꋧꂿꃆꁻꌐꆹ，ꉪꊇꅿꃆꏂꊂꑋꇝꂱꊈꑼꉼꍗꏓ——ꎔꇁꃨꇈꉂꑟꅑꄉꊿꋋꉂꊿꋌꁭꌠꑸꆀꐋꀨꂶꌠꀨꎹꆽꃴꋒꃅꄈꏢꌠꀉꄂꍰ！”
ꑸꆀꂶꌠꑖꑟꀕꃅꋌꎎꃮꂱꎼꊼꇅꄀꇈ，ꈌꃈꉐꌒꄉꉉꇬ：“ꅇꀨꀋꐊꒈꎰꀕꋋꈨꀉꄂꄡꉉꀐ，ꉆꐥꃅꉉ，ꉢꎷꌊꑡꌤꐥꇆ？”
“ꉠꌤꆹꀉꒉꍈꀋꉬ，ꀋꏦꆏꇨꊸꄻꀋꅐꇆ。ꆏꑞꐛꅹꃅꀋꆪꎸꋠꏾꌠꉬꇆ？ꇫꐥꇈꋋꑍꂷꆹ，ꆏꉪꊇꏭꑠꃅꉉꋺ，ꌌꊏꇫꎼꄉꂚꄏꅿꅑꐪꑽꑌꈧꌠꀧꍮꂿꄷꌠꆽꀒ，ꉠꅿꉂꇂꅉꌠꌟꒉꀋ，ꆏꋌꀋꎺꀒꅀ？”
“ꀋꆪꋋꑍꂷꀉꄂꇬꆹ，ꈍꃅꑌꌌꂚꄏꇬꁈꏂꁈꇭꇓꄃꄻꀋꄐꀐꌠꉬ，ꉈꑴꏡꁈꀉꇨꃅꑠꈨꏂꑲꆀ……ꄿꀐ，ꋋꈨꄡꉉꀐ”，ꑸꆀꂶꌠꇫꁌꒉꐆꃅꑓꌬꅍꋌꍻꋍꑆꐎꎸꁞꌠꈁꑓꂶꌠꇬꀵꎍ。“ꀋꃉꆏ，ꆏꑴꌠꁨꅽꅿꌤꀉꒉꀋꉬꀋꉆꈧꌠꊼꇅꉉꄿꀐ”ꄷ。
“ꊿꄹꁆꊾꂷꄀꌊꁧꏢꉪ。”
“ꈀꄸꂷꄀꇁꌠꉬꇆ？”
“ꂚꄏ。”
ꑸꆀꂶꌠꑓꂭꊼꇅꋏꇈ，ꋋꇅꃅꃮꂱꎼꇇꇬꄉꄛꇰꄯꒉꁬꌠꋌꇱꒃꌊꉜ，ꈁꑓꂶꌠꋋꇅꃅꊿꇫꌌꉪꊋꇈꊿꋌꀋꌧꌠꒊꒉꃅꐛꇁ。
“ꑸꆀꐋꀨꀋ，ꄚꈐꏭꑊꋌꉱꃀꊾꋠꆿꃀꆹꇫꀋꐊꄿꇆ？”
ꑸꆀꂶꌠꋋꇅꃅꉈꑌꅍꂶꌠꇬꄉꄓꉀꉆꇈꃮꂱꎼꏭꉉꇬ：
“ꉡꆹꌦꂽꌋꂽꐥꀐ。ꉆꐥꃅꉻꌤꃅꂽꊣꌠꏭꊼꇅꅇꇰꒉ，ꉡꆹꃛꊸꃅꃀꂷꈿꂯ。ꉈꑴꆏ，ꀃꂰꈊꃀꆹꄰꁼꏿꄉꌉꅷꃅꄜꇬꑌꋒꀋꄿꌠꉬ，ꉆꐥꃅꊾꇴꌊꀋꆪꑍꂷꌠꌉꌌꄉꋂꄮꃅꇁꌶ。”
“ꌌꆭꀊꅪꃅꄉꋠꅀꒉꇱꄉꅝꂯꆏ？”
“ꉢꈍꃅꐙꑵꄉꇢꌠ，ꉆ，ꆏꋌꅉꀋꐚꀐꅀ？”ꑸꆀꂶꌠꑓꂭꊼꇅꋏꇈꅰꑷꏭꃅꏮꃮꂱꎼꂶꌠꇬꉜꎍ。
“ꉢꎺꇁꀐ，ꎬꐚꋄꒉꇱꄉꀉꈠꃅꋠ。”
ꃮꂱꎼꂶꌠꅪꎔꁮꀋꏂꇣꃨꌟꃅꐧꊭꊼꇅꉈꇈ，ꈁꑓꇬꒊꆭꀕꃅ，ꃅꆳꄲꁏꌠꀋꏮꉈꏭꇿꇬꈴꁧꀋꐚꀐ。
ꊁꊛ：ꉒꈌꈬꇬꉂꏣ(ꊯꑌ)http://yi.yizuren.com/plus/view.php?aid=129
ꉒꈌꈬꇬꉂꏣ(ꊯꊪ)
ꄜꃑꄮꈉ： 2013-04-01 | ꁰꄻꊿ：ꀉꈌꏬꌋ
ꇁꀦ： 《ꉒꈌꈬꇬꉂꏣ》
ꁰꄻꌠ：
beleys ｜
ꄜꃑꌠ：
