ꂴꊛ：ꉒꈌꈬꇬꉂꏣ(ꊰꉬ)http://yi.yizuren.com/plus/view.php?aid=132
ꊰꃘ
ꃅꍛꁱꑓꂿꋒꀋꋒꃅꄈꄮꇬꆏ，ꀋꉻꃢꌺꂶꌠꌗꃀꌗꌺꐮꑘꀋꒃꃅꀥꀱꑤꍰꇓꈓꇬꑟꇁꀐ。
ꃺꃶꀁꑳꑍꁱꌠꋋꑍꂷꆹꑭꁘꊼꇅꐕꀋꐳꄉꇁꑎꀐ，ꈍꃅꉉꄿꂿ，ꋍꑊꑭꆹꊋꑌꐨꆹ，ꈍꃅꑌꀊꄶꀋꉻꏤꃅꂓꅑꂓꈨꌠꋩꌋꂶꌠꆹꀋꏣꌠꉬ！
ꑸꆀꆹꋋꇅꃅꋍꅿꐏꏲꌋꂶꌠꇬꋨꏦꀐ，ꇫꐊꐺꌠꆹꌧꅍꂿꅍꐥꌠꀛꐂꑵꉙꊉꇪꄨꑼꂷꑌꐊ。
“ꀊꑴ，ꆏꋋꎼꐤꎭꏿꀙꀐ！ꆏꉜꉏ，ꇯꍝꃅꉉꆎꇰꂿ，ꋍꑍꋍꉔꆏꂶꌠꊌꀋꂿꇬꆏ，ꉡꆹꑠꃅꉪ，ꆏꂁꇿꇬꀀꄉꌟꃅꀉꁧꇊꀕꌺꐊꄉꎧꅝꎸꋠꁧꀋꐚꀑꎼꈁ，ꄚꈬꑍꈫꄅꀕꌠꆏ，ꆎꆹꀇꐒꈍꑋꁠꆧꀉꄂꎹꊌꅝꅊꇈ。”
ꑸꆀꂶꌠꎇꀀꈤꇬꀀꑌꃅꄉꃮꂱꎼꂶꌠꇱꀀꄖꎼꇁ。ꀋꅞꉖ，ꀊꄶꅉꃴꑳꂶꌠꇬꄉꂚꄏꏭꇔꅲꄮꇬ，“ꌉꋚ”ꐙꌠꊿꇱꃝꈷꃄꅉꇫꎭꄉ，ꊾꆽꌠꎭꃃꒉꈧꌠꀜꇁꋍꈁꑓꇬꍂꄉꌥꀱꆱꂷꊂꐛ，ꂶꊂꂶꌠꇬꆹꄝꎧꑌꉖꀋꉆ，ꉈꑴꆏꁬꋌꑋꉖꀋꉆꄉ，ꄡꇝꆿꑍꃅꋌꂮꀉꄂꄻꇬꌍꄉꐛꅹ，ꌞꈍꃅꎔꌠꈁꑓꂶꌠꇬꊼꇅꏂꀠꅍꊽꉌꁕꏮꃅꐙ。ꋋꆹꇯꍝꃅꊾꂿꀋꏾꌠ，ꀀꑌꀕꇴꏾꀙꐯꀙꃅꎍ。ꄡꇗꀛꐂꑵꉙꊉꇪꄨꑼꂶꌠꄉꀉꐯꈭꃅꉪꇮꏢꇮꄉꑸꆀꋋꇱꊢꂖꌊꇬꂿꆹ，ꋋꆹꋍꁁꏯꆏꑸꆀꅿꀊꆂꎲꁿꅍꄟꁁꏡꌠꇬꃛꏣꃛꅷꐺ，ꋍꁁꏯꆏꀋꆏꃅꑸꆀꏮꌗꋏꄉꉉꇬ：ꄚꈐꏮꐊꇐꀉꇨꃅꐥꀐ，ꌊꄉꁱꇐꀉꇨꑠꁬꁱꉆꇬꑌꌭꀋꄿꌠꉬꀒ。ꌌꄉꁱꇐꀉꇨꑠꁬꁱꉆꑴꅀ？ꋋꆹꇬꊎꉪꈽꅷꐺ，ꋍꁁꏯꆏꑓꏮꋍꂴꆽꉆꎍꌠꀋꉻꃢꌺꇬꅲꅷꐺ，ꋍꁁꏯꆏꈁꑓꊼꇅꎎꌊꐺ,ꄾꌦꋩꃅꈁꑓꂷꊂꀋꅑꁀꌠꏯꌌꊿꀦꐺ。
“ꇨꊸꇚꑴꂼ？”
“ꇝꂱꉈꈽꃅꆳꂷꉐꈬꇬꄉꀇꐒꁠꆧꅝꇬꑽꀋꐥ。ꄚꉡꆹꇯꍝꃅꊿꇱꆽꃴꊼꇅꀙꀐ，ꀊꄶꆺꃮꒊꃀꏢꁮꇬꄉ，ꀋꄹꄷꑘꃅꉻꏒꍗꑮꂶꌠꄓꄉꇬꀋꄉꇮꇬꆹ，ꉡꆹꈍꄮꑋꊿꇱꅥꌦꀐꌠꉬ，ꀍꂷꈬꂷꅑꇬꂯꋀꇽꀋꇎꌠꉬ！”
“ꋀꊇꑞꃅꆏꒃꇁꌠꉬꄷꀋ？”ꑸꆀꊼꇅꉌꌤꐆꃅꐙꇁꀐ。
“ꄡꇗꀊꄶꅇꂷꀉꆹꀊꋨꇬꒉꄷꀋꅲ？ꑡꉢꂶꌠꆹꊿꏠꋪꒃꌠꃅ，ꉡꆹꂚꄏꇬꊨꀖꌠꊿꑽꀋꊧꃚꂶꌠꉬ。”
ꑸꆀꂶꌠꆹꒊꒉꇁꀐ：“ꊿꑽꀋꊧꃚꂶꌠꆹꆏꇿꉬꂯꀒ，ꊿꑽꀋꊧꃚꂶꌠꆹꄚꇫꐥ，ꉢꉬ，ꑸꆀ。”
ꋋꆹꀂꏾꏵꀠꌊꅲꇫꏭꃅꏮꀛꐂꑵꉙꊉꇪꄨꑼꂶꌠꇬꉜꎍ。ꋋꆹꄯꒉꁱꇐꀉꇨꀉꇨꑠꁬꁱꂿꄷꌠꀋꉬꅀ？ꋋꆹꋍꇬꊼꇅꎖꉚꂿꉂꃅꉪ：ꈍꃅꄉꈌꋊꉙꅇꁱꂯꆏ？ꅇꀨꀋꉬꀋꉆꌠꆹꇿꇬꀀꎍꌠꉬꂯ？
ꀛꐂꑵꉙꊉꇪꄨꑼꂶꌠꑌꏮꑸꆀꊼꇅꉜꇈ，ꊨꏦꑴꑳꉜꒉꃅꊼꇅꒊꒉꈭꐨꆏꑲꇤꀖꌊꅝꅷꐺ，ꑳꇣꌠꑳꃅꇴꀉꒉꃅꑠꁠꆧꏶꈂꀸꇬꊐꈭꐨꆏ，ꀅꌳꌺꃅꑳꃅꇴꈧꌠꋋꀞꉈꏭꅐꇁꑲꆀꉉꇬ：
“ꀔ，ꇯꍝꃅꄯꒉꁱꇐꀉꇨꉾꃪꑠꁬꁱꉆ。”
“ꅇꀨꆹꄻꀊꄶ‘ꑳꎎꁥꌠꃅꇏ’ꀂꏽꄉꇬꄉ，ꀊꅰꃅꃪꏭꐛ，ꀊꅰꃅꃹꅼꏭꐛ。”
“ꑠꀋꉬ，ꋍꃅꇬꆹꁱꇐꌫꈾꈧꌠꁧꈩꇨꀐ。”
“ꀊꁪ，ꅽꉣꑊꆹꀋꋯꋍꉙꐊꃅꉪꅷꋍꈜꑞꌦꀐ。ꄡꇗꌌꀊꄶ‘ꂿꑘꊿꊢꀖꌊꇓꈓꆹ’ꌠꀁꏾꄉꁱꇐꁱꇬꄉꀊꅰꃅꃪ，ꋋꆹꊿꏠꐮꉈꈽꌠꃅꐪꀊꏀꇬꎃꊒꌠꉬ。ꄽꂫꆏꑽꃤꈧꌠꉬꇮꌌꊨꄅꀨꄅꄉꇤꂚꄏꁳꀵꌐ。ꑠꃅꑲꆏ，ꊿꋋꂷꆹꈍꃅꑌꑽꃤꑍꐘꀵꄉꐥꍂꃅꄩꅐꄩꄓꀋꄐꌠꉬꀐ。”
ꀋꉻꃢꌺꋌꇷꋍꏠꐂ：ꈍꃅꄉꑽꃤ‘ꑍꐘ’ꀵꌠꉬ？ꇯꍝꃅꊨꏦꇬꉌꀋꒊꌠꐞꁖꀐ。
“ꀋꃉꌌꉪꋌꀋꎺꃅꉉꆏꀋꇰ。ꋋꑍꀕꇬ，ꉪꊇꊌꐨꀉꏀꀉꒉꃅꐥꀐ。ꉜꅊꇈꂿꆏꂚꄏꌋꆀꀋꉊꂴꆽꄚꇬꄉꌤꃅꌠꄗꌦꆀꑼꑊꆹꐯꇯꐋꁏꐚꐙꁧꌠꉬꅊꇈ，ꋀꊇꑷꄠꏦꑳꇬꀀꄮꇬꇯꆐꄈꏮꁏꄉꐋꁏꐚꐙꁧꀐ。”
“ꂚꄏꑷꄠꏦꑳꇬꀀꄮꇬꆹꄈꎀꍹꇬꂯꀋꃹꌦꂷꉬꇬ？”ꀋꉻꃢꌺꂶꌠꇰꉉꐝꀋꉅꏮꃅꑠꇬꋋꉉꎼꆹ。
“ꆎꆹꈍꃅꑡꑌꐝꉅꌐꌠꉬ？”ꑸꆀꂶꌠꄻꀋꈴꀙꐯꀙꃅꎌ。
“ꌤꋋꐘꆹ，ꆏꇁꂴꆽꂾꇯꆐꌌꋍꃢꉈꏭꂁꄉꍤꎥꋻ。”
“ꀊꑴ，ꆍꊇꅿꂴꊩꌺꇇꈷꀊꋨꁥꑌꑳꏯꎎꁥꀋꂸ。ꑠꀋꉬꑲꆏ。ꉢꉈꃅꍏꇬꄉꀥꌊꄚꇬꑡꃅꇁꂸ？ꉈꈽꌤꑘꃅꇬꊋꀉꄂꑌꀋꇿ，ꌞꆈꌠꇐꀳꄉꇬꆹ，ꊋꑌꁈꏂꀋꐰꄷꀋꂸ，ꄡꇗꀑꆊꊼꇅꈩꐳꑲꆀꍑꌠꉬ。ꃰꊿꉌꂵꈍꒉꆏꃄꅉꋚꁧꈍꑌꅐꄏꌠꀋꂸ。ꐋꁏꐚꐙꁧꂷꌌꆽꃴꇬꆹ，ꌫꈾꀋꊌꌠꆹꑱꅳꁖꒊꍈꂯꐒꄻꀋꅐꌠꉬ？！”
“ꋋꍈꆹꉪꌤꃅꊿꋋꁥꃅꇬꅉꐚꌐꌠꉬ，ꃄꈌꄐꃅꀕꇬꈍꃅꑌꇬꀋꄿꇬꀋꀙꌠꉬ！”ꀋꉻꃢꌺꂶꌠꈍꃅꀋꐚꃅꋋꇅꃅꐈꌊꉌꈲꁮꅉꇬꃤꃀꌕꏼꌌꋲꇬꋲꌦꇫꎭꀋꄐꌠꍰꑻꏢꂶꌠꐛꇬꎍꀐ。
“ꋋꍈꆹꆏꐒꄻꀋꅐ。ꂚꄏꋍꊨꏦꉉꌠꉬ，ꄷꀋꁧꉈꑴꃚꈢꑌꐥ。ꀋꅔꉇꊩꌺꇇꈷꊤꇬꄉꃚꈢꀐ，ꉪꑓꋪꈍꑋꋋꇱꌩꏷꌬꀕꃅꄉꀐ，ꀃꑍꁯꋒꐯꉐꃀꀉꒉꂷꈿꑴꌦ，ꃚꈢꈧꌠꉬꇮꃑꉹꁌꋍꏅꌠꇰꌐꂾ。”
“ꃚꈢ？ꋋꆹꐋꁏꐚꐙꁧꌠꈝꃀꇬꍬꅲꀕꑌꀋꐚ？”ꀋꉻꃢꌺꂶꌠꄡꇗꇬꀋꑇ。
“ꀊꑴ，ꌞꊿꌌꉉꇬꆍꆈꌠꊿꋅꋋꁯꆹꀑꆊꈬꑳꏢꀋꇎꃅꉉꀋꂸ，ꇯꍝꃅꀑꆊꈬꑳꏢꀋꇎꌠꉬꅊꇈ。”ꑸꆀꂶꌠꈛꎂꃅꀛꐂꑵꉙꊉꇪꄨꑼꂶꌠꈂꀸꇬꄉꑳꇣꌠꋋꇱꒃꌊꄉ，ꀂꏾꂪꀠꇬꌭꄉꇤꌠꋌꇱꆸꐔꑍꐦꃅꄻꁱꄜꇬꅞꇈ，“ꌧꌦꀐ？ꌧꌦꀐ？ꉑꉎꉐ，ꁦꋠꃀꌠꀑꇬꑌ，ꈍꃅꄉꌧꇗꌬꌠꀋꌧꑴꌦꅀ？！”
ꀋꉻꃢꌺꂶꌠꆹꊼꇅꀑꉞꇈꄚꒊꆹꒊꀋꒉ。ꋍꈁꑓꇬꌦꇬꅑꎍꑓꋪꁆꌠꊉꌦꀐ，ꃅꅍꎸꀋꊌꃅꑓꋪꇁꑳꁆꌠꀉꄂꏮꌊꑸꆀꌋꆀꀛꐂꑵꉙꊉꇪꄨꑼꂶꌠꇬꉜꎍ，ꊂꆏꑓꏣꏮꌊꌍꑓꉈꏭꌧꅪꏪꂶꌠꇬꉜꎍ。ꋋꆹꆫꑘꌤꃅꌠ，ꀋꉊꂴꋍꇇꈴꄉꑝꑟꇂꄉꊙꎹꌊꇁꌠꀋꆪꑐꀉꎴꍔꂄꀊꋨꊰꂷꆹ，ꀋꃉꆏꋍꂷꑌꀋꋒꃅ‘ꑊꋌ‘ꇱꇤꋠꇫꎭꌐꀐ。ꋋꆹꒊꇙꒈꇙꃅꌌꉪꇬ，ꋌꌋꆀꂚꄏꅿꀑꇫꐥꐨꆹꀋꇊꇬꆏꀋꆪꑐꀉꎴꍔꂄꀊꋨꊰꂷꌋꆀꐯꌟꃅꉈꁒꑗꉘꇫꎍ。
“ꍑꀐ，ꄡꇗꊛꄉꉪꊇꁱꇐꁬꌠꁰꂿ。”ꀛꐂꑵꉙꊉꇪꄨꑼꂶꌠꆹꉈꋍꃢꑳꇤꄀꅝꇈ，ꑳꃅꇴꀉꒉꑠꁠꆧꏶꅝꈭꐨꆏ，ꀅꌳꌺꃅꑳꃅꇴꃴꂿꀕꑠꈨꋋꇱꀞꉈꏭꅐꇀꌦ。
“ꂿꑘꊿꊢꀖꌊꇓꈓꇬꆹꌠꊇꅉꌤꃆꆹꌄꈌꇑꌠꏮꁏꌠꉬ，ꋋꆏꐱꀨꏡꌠꌌꄉꀊꅰꃅꂵꀉꂥꃅꄉꉆꀐ。”ꑸꆀꂶꌠꄇꀋꄿꏮꃅꉉ，ꑓꋪꋑꌠꍻꋍꐋꀨꀉꆹꂶꌠꇬꀵꎌ，ꉌꂵꇬꆏꑠꃅꉪ：ꀉꑳꑊꋌꅽꐛꄟꋋꂷ，ꄡꇗꋍꃅꊋꑌꏡꑌꇬꎷ，ꀋꅞꉖꈊꃀꑲꆀꋍꃢꐯꈽꀀꄉꋍꈭꃅꄉꇬ，ꆏꉜꉐ，ꅽꐛꄟꏡꌠꌋꆀꐮꃅꐯꌠꌡ！
“ꑦꑸꐋꀨꀋ，ꅽꊈꅉꆹꑴꁱꑴꌠ。”ꋍꐋꀨꀉꆹꂶꌠꉌꇿꐆꃅꀑꐕꏮꌊꀋꉻꃢꌺꇬꉜꎍ，“ꀋꄹꄷꌫꈾꋋꈨꌌꄉꁱꇐꁬꀉꄂꁱꇬꆹ，ꆏꉜꇬꉪꊇꀋꉻꃢꌺꏭꈴꄿꑴꅀ？”
ꑸꆀꂶꌠꆹꇭꀧꊼꇅꇙꈩꈭꐨꆏ，ꇇꎇꌊꆳꁏꅷꋍꂴꆽꑟꇁꌠꑳꃅꇴꈧꌠꇤꈹꅥꅷꐺ，ꉌꂵꉪꇬ：ꀉꑳꑊꋌꆏꋋꂷ，ꇯꍝꃅꀋꂄꆈꒉꀕ！ꉢꋌꀋꐚꃅꑡꏡꁈꏂꐺꀋꐚꌦꀐꃅꉪ。
“ꉡꆹꅽꉪꐨꀉꇨꌠꊼꇅꅲꏾ。”ꑸꆀꉉꇬ。
“ꄚꑠꃅꑴꇬ，ꌫꈾꋋꈨꆹꌌꊼꇅꄺꀱꄻꅐꑴꌦ。”
ꀛꐂꑵꉙꊉꇪꄨꑼꂶꌠꆹꄧꀕꃅꎴꂿꋍꉔꈊꃀꂚꄏꑋꋻꌠꉈꑌꈈꅍꂶꌠꇬꑌꎌ，ꋍꇇꊃꆈꑍꂷꌠꆹꄻꁱꄜꄩꍑꄉ，ꀂꏾꎎꌊꄉ，ꊛꄉꑳꃅꇴꀞꌠꂱꀯꏢꌠꏂꌊꏮꑸꆀꈁꑓꂶꌠꇬꉜꄉꀒꒉꑟ。
“ꉜꅊꇉꂾꆏꑠꈨꉬꅊꇈ！ꑊꋌꌺꋋꂷ,ꇯꍝꃅꉠꇨꇅꃃ！”
ꋋꏮꀋꉻꃢꌺꊼꇅꉜꈭꐨꆏ，ꉘꇉꄉꇬꆹꋋꆹꉆꐥꃅꊼꇅꊭꄏꄉ，ꁯꋒꐯꉐꆏꂚꄏꏮꊨꀖꃀꈿꄮꇬꆏ，ꋌꁳꉘꃀꂶꌠꄻꄉꂴꅑꄉ，ꋋꆿꃀꁡꇤꄉꊿꌌꉌꌦꑗꉘꍈꌠꃆꂮꑌꊈꎸꀨꑟꉂꌠꉬ。
ꊰꏁ
ꆿꃀꁡꇤꋍꇅꀉꄂꃅꊿꌕꑻꁈꁧ，ꀊꅰꃅꀋꉻꃢꌺꂶꌠꁈꁧꄉ，ꁡꇤꇬꊿꋌꇱꅥꂷꊂꌸꐛꅹ，ꌤꃆꋋꐘꆹꁡꇤꋋꂷꃅꋋꌌꃄꇙꃅꇙ。ꄇꇖꀕꌠꆏ，ꐙꁧꌋꈧꌠꑌꇓꈓꇬꊿꈧꌠꌶꄉꆼꁏꆽꄻꀐ，ꇅꂚꅿꐤꅉꑌꀊꅰꃅꆽꀠꇁꉆꃅꎌ。ꐏꁈꏲꌋꂶꌠꀥꇓꈓꇬꃹꁧꌠꇬ，ꋌꋪꒃꐆꎹꌠꀋꃅꄷꌠꈀꄸꂷꇫꅉꐚꀋ？ꈀꄸꑌꇅꂚꀑꇬꋬꂻꒉꎴꌠꎁꃅꉌꐒꇁꎭꀙꐯꀙꇧꎍꌐ。
ꃅꄜꄷꌦꆏ，ꇤꈏꇢꇑꏢꁮꋍꉎꀋꐥꌠꏂꇫꁰꈘꃀꂶꌠꌌꈿꌦꀐ。
ꃴꄿꏁꍅꂶꌠꆹꋋꌋꆀꐮꐊꌦꀋꇊꃅꎭꅗꅧꅗꌠꇌꑆꇬꋒꂶꌠꄌꌊꐺ。ꈁꑓꇬꐒꊀꐪꈧꌠꆹꀅꌳꀅꌳꃅꑍꐜꀋꈨꒉꌐꃲ,ꉪꐨꏤꄻꄉꌠꑠꐘꋍꉌꂵꈐꏭꄉꀅꌳꌺꃅꐛꒆꄇꇖꀕꃅꎍꃲ。ꋌꌗꏂꁌꃅ：
“ꇅꂚꇬꀋꐥꀐ，ꈀꄸꂷꉪꊇꇬꉌꇬꑓꇬꇁꑴꌦꂯ，ꉪꊇꅿꄚꉎꆹꏲꌋꀋꁨ、ꐰꆹꄈꅉꀋꒃꌠꄈꍛꀯꋋꂷ，ꀋꃉꆏꑡꑌꈍꃅꑌꉪꊇꊨꏦꑓꁖꈛꎸꌠꌡꃅ，ꊨꏦꌅꈌꊨꏦꌌꑲꆀꍑꀐ。”
ꀊꄸꀈꏦꌋꆀꎭꂵꊞꐂꑋꆹꉘꇉꋚꎑꃅꏭꋍꇬꉜꎍ。ꂱꀘꇥꀯꋋꑍꂷꆹ，ꀋꃉꆏꊋꁨꇬꌌꌬꅉꀋꊌ。ꀊꅰꃅꀊꄸꀈꏦꆃꍈꂶꌠꆹ，ꉌꊸꌊꉌꃀꃆꄔꐞꃅꐞ。ꀋꅞꉖꈊꃀ，ꋋꃆꀞꀊꐎꂶꌠꋩꄉꂱꀘꑍꂷꏃꄉꇬꋍꃢꈹꀑꑴꇬ，ꄚꅻꀋꉬꃅꑎꇨꀕꄉ，ꀋꉻꃢꌺꂶꌠꆹꈍꄮꇬꇯꆐꁈꇿꇬꈴꁧꀋꐚꀐ。ꀋꃋꋋꇅꇬ，ꋋꇯꍝꃅꉌꊸꌊꃆꄔꐞꃅꐞ。ꀋꉊꂴꆽꆹ，ꑡꌤꍈꐥꄿꂿ，ꇪꎹꄈꊈꇬꎹꆹꉆ，ꉈꑴꆏꑤꏓꂱꃶꍋꀯꇫꑌꎹꁧꉆ。ꄚꀋꃉꆏ，ꇪꎹꄈꊈꆹꑳꈤꂷꀉꄂꇬꐙꃲ，ꑤꏓꂱꃶꍋꀯꇫꑌꄡꇗꇬꊎꊨꀖꃀꑠꈿꄉ，ꃰꊿꉌꂵꑌꅉꀋꑌ，ꌤꑡꑌꏲꂠꀋꄐꀐ。ꇯꍝꀋꎪꃅꉉꑲꆏ，ꑡꑌꃴꄿꏁꍅꉉꌠꌡꃅꊨꏦꌅꈌꊨꏦꌌꑲꆀꍑꌐꀐꌠ。ꎭꈐꎔꌠꆏ，ꃴꄿꏁꍅꆹꑌꇐꃪꂒꉻꒉ，ꄷꀋꁧꀋꉊꁏꐚꄓꈁꁏꌠꌤꃆꃅꋺ，ꉈꑴꁡꇤꇬꉘꃀꄈꎀꍹꇬꃹꂶꌠꑌꉬ，ꀋꃋꋋꇅꇬꆹ，ꉹꁌꈧꌠꉬꇮꃅꋍꅇꃅꅲꌐꑴꌦ，ꋍꉜꐨꃅꐨꇬꁌꒉꄣꅼꌐꑴꌦ。
“ꉢꉪꇬꆹ，ꂽꁸꌕꁥꃅ。”ꃴꄿꏁꍅꉉꇬ，ꊞꐂꌺꆏꑳꐏꄉꈹꐯꇯꄉꌐꌠꐙꁧꌋꈧꌠꌌꏟꈯꀕꃅꐏꁈꄉ，ꊾꆹꋍꂷꑌꄝꆶꁧꀋꉆ，ꋋꆏꂴꁥꌠ。ꀈꏦꆹꊿꈍꑋꑼꏃꁧ,ꊿꀉꑌꃅꀋꈁ，ꋓꉪꁨꄉꂁꆈꄉ，ꀋꉬꀋꉆꌠꆏꄆꍣꇬꊿꈧꌠꌋꆀꐯꑌꑲꄉ，ꀋꎪꃅꇅꂚꂶꌠꈢꇿꇬꊐꄉꌠꍤꌋꐝꉅꃅꄉ，ꉆꐥꃅꇅꂚꂶꌠꁌꌊꆿꃀꁡꇤꇁ。ꀈꏦꀋ，ꆎꇅꂚꀋꐥꀋꉆꌠ，ꉪꊇꑌꇅꂚꀋꉬꀋꉆꌠ，ꂿꃆꋋꏢꆹꆏꃅꒉꇬꈍꃅꐙꀋ？”
ꀈꏦ“ꀔ”ꄷꑠꇬꉉ。
“ꀉꑳ，ꅽꂿꃆꏡꌠꆽꇨꌐꌠꉬ，ꄚꆏꀋꃅꀋꉆꌠꉬ。ꊞꐂꌺꆹꃚꋠꈑꆠꇤꀋꇮꇨꑴꌦ，ꉡꆹꀥꀋꄐꀐ。ꆎꆹꀋꎪꃅꊜꋽꄮꉜꄉꃅ，ꐕꇰꀡꄏꐕꇗꉼꄬꃅꀕꀋꉆ，ꑤꍰꇓꈓꆹꌞꊿꅿꋧꃅꉬ。ꀋꉻꃢꌺ、ꑸꆀꏤꀊꋨꁥꆹ，ꐈꇨꋓꇨꇈꀋꂄꆈꒉꀕ，ꆏꑴꌠꀋꎪꃅꋓꉪꁨꄉꅊꇈ。ꉢꇬꉌꋬꈬꀋꐛꌠꆏꋋꍈꉬ。”
“ꃴꄿꀋ，ꆏꉌꐒꌊꀋꌸ。ꉢꅉꐚꑴ，ꉪꊇꉹꁌꋍꏅꌠꋍꇬꐞꀋꉆ，ꉢꀋꎪꃅꏡꁈꏁꄉꇅꂚꂶꌠꎹꌊꇁꅊꈫ。”ꋌꅇꉉꆽꋊꆽꈘ，ꄚꑓꁴꆹꑓꐬꇬꄉꋪꐂꅷꐺꀐ。
ꋋꆏꑍꁥꀕꉬ。ꌕꁥꀕꌠꆏ，ꉠꃤꐘꌠꉬꀐ。ꉡꆹꇌꑆꇬꋒꋋꂷꌌꄉꀑꇬꀋꑴꃅ，ꇌꑆꋒꇬꂾꃚꌊꉪꊇꈬꉘꁡꇤꉹꁌꈧꌠꀀꄖꀀꐚꇁꎼꂿ。ꑌꑿꌟꃅꀋꃅꇫꐥꀋꉆ，ꉪꊇꆹꑓꀠꀕꃅꐙꁧꌋꈧꌠꁳꈁꏾꃅꐥꀋꉆ，ꈁꏾꃅꅥꐷꇑꀋꉆ，ꈁꏾꃅꉪꄈꎀꍹꇬꅥꐷꇁꀋꉆ。ꁡꇤꂷꈁꐛꅉꃅꊋꏓꋯꑌꋍꃱꃅꄉꂵꂿ。ꅳꍩꈩꄷꑌꉪꊇꂱꀘꈧꌠꇇꇬꀀ；ꅆꃅꈩꄸꑌ,ꈍꑋꈁꆏꈍꑌꋩꄉꏟꈯꀕꃅꂵꊋꐛꂾ！
“ꃴꄿꀋ，ꆏꁏꐚꁡꇤꂷꋉꂿꄷꌠꅀ？”ꎭꂵꊞꐂꂶꌠꑓꍻꅪꌬꀕꇈꀒꅡꂫꅡꃅꅲ。
ꃴꄿꏁꍅꂶꌠꆹꉬꀋꉬꄷꀋꄹꃅꊼꇅꒉꈭꐨꆏꊛꄉꉉꌦ：
“ꉠꃤꁥꌠꆹꌌꑍꁥꀕꌠꏭꇇꀤꌠꃅꌠꉬ。ꀋꄹꄷꀈꏦꆹꇅꂚꇿꐥꌠꅉꐙꑲꆏ，ꉪꊇꆹꊾꑌꆏꊋꒉ，‘ꈐ’ꌊꇁꀋꄐꑳꆏ，ꇑꌊꇁꂿ。ꋌꇁꑲꆏ，ꉪꊇꆏꋍꅇꃅꂿ，ꋋꀑꉞꄷꄉꉌꃹꑲꆏ，ꉪꆹ，ꉪꊇꆹꎹꉼꍗꑴꁏꐚꁡꇤꂷꋉꐛꂾ。
ꎭꂵꊞꐂꇿꌊꀋꎺꃅꇇꁮꏪꅷꐺ。ꋋꉜꇬ，ꃴꄿꏁꍅꉪꐪꋋꏢꆹꐛꒆꃅꎼꊋꐛꄎꌠꉬ。ꀊꄶꇓꈓꇬꌍꁏꊿꏓꅉꀊꋨꈚꇬꆹ，ꃶꐚꃅꇬꆹꊿꈍꑋꑻꐥ，ꄷꀋꁧꉬꇮꃅꀒꎂꇓꈓꀆꉬꌐ――ꈌꇨ，ꇯꍝꃅꍩꈩꅅꃅꌬꄉꋍꈭꅥꌉꄷꇬꆹ，ꃀꅉꆐꐚꁏꃥꐛꀐꌠꇓꐚꈧꌠꃆꂮꀋꉬꌠꉬ。ꀊꄶꑤꍰꇓꈓꇬꃶꍋꀯꏲꌠꑤꍏꄐꀊꋨꑍꈚꇬꆹꂯ，ꂿꃆꆏꏦꑳꐏꁈꌠꀉꄂ，ꉈꑴꆏꋀꊇꆹꊋꒉꌠꆏꂿꑘꊿꌋꆀꁏꐚꀉꄂꉬꌐ，ꈍꃅꑌꊨꏦꊈꅉꎺꄉꌐꌠꉬ，ꌍꁏꌠꐊꄉꊨꏦꊿꅥꇁꀋꋭ？ꑠꃅꉪꇬꆏ，ꊋꐛꌠꆹꋀꊇꇇꇬꀀꎍꌠꌡ，ꋋꇅꃅꋌꄓꀏꉀꉆꇈ，ꇵꊫꑍꂷꌠꋏꑆꐯꋏꑆꃅꉉꇬ：
“ꍑ！ꃴꄿꏁꍅꀋ，ꍑ！”
ꃴꄿꏁꍅꆹꉈꑴꀊꄸꀈꏦꉜꐨꊼꇅꅱꑟꉂꌠ，ꄚꀈꏦꂶꌠꆹꃴꄿꏁꍅꅿꀍꄟꄻꊖꁍꇬꄀꄉꂶꌠꒃꅷꐺꇈ，ꊨꏦꀃꅉꂶꌠꆹꄻꌊꌺꃰꂷꌡꃅꎍꌠꂿꇬꆏ，ꋋꆹꈍꉗꏢꃅꁱꀋꐭ。ꊂꑲꆀꑠꃅꉉ：
“ꀊꑴ，‘ꃅꄂꆹꀇꐒꈝꃀꋋꀋꂿ，ꆧꁨꆹꃅꏸꈝꃀꋋꀋꂿ’！ꀉꑳꀋ，ꆎꆹꇅꂚꆎꋌꎷꀋꊌꇬꑌꌭꀋꄿꌠ。”
“ꑠꈨꉬꑲꆏꉪꊇꈍꃅꂯ？”ꎭꂵꊞꐂꂶꌠꅳꁖꂶꌠꇬꉩꌍꅷꇨꆰꇨꊸꏭꃅꏮꃴꄿꏁꍅꂶꌠꇬꉜꎍ。
“ꁨꃅꆹꊇꅉꇰꆐꃪꑭꇬꀋꈴꌠ，ꀋꄹꄷꑠꈨꆹꉬꑲꆏ，ꉪꊇꑌꃪꑭꇬꀋꈴꀋꉆꃲ。”ꋌꇇꏾꀕꌌꀕꃅꑍꁆꌠꎇꄉ，ꎸꅍꎮꑑꌡꌠꇇꁆꌠꌊ，ꃰꇌꈭꃅꑠꏮꉈꈭꐨꆏꉉꇬ，“ꋋꆹꇬꊎꉩꈽꇬꎷꌠꌤꃆꐘꉬ，ꆍꊇꇬꉌꃹꀕꀋ？”
“ꁏꐚꁡꇤꋈꌠꎁꃅ，ꀋꉬ，ꎹꉼꍗꑴꁏꐚꁡꇤꋈꌠꎁꃅꈭꌩꈜꎳ，ꉪꊇꎹꉼꍗꑴꁏꐚꁡꇤꋈꐛꈭꐨꋬꂻꌠꎁꃅ，ꀊꄶꀉꁌꀋꁧꋊꃅꉪꁏꐚꇬꌦꅝꌠ‘ꐙꁧꌋꀉꆈ’ꈧꌠꆹ，ꉬꇮꃅꅥꈔꌐ！ꉬꇮꃅꌉꉱꋊꇫꎭꌐ！ꃴꄿꀋ，ꆎꆹꉪꊇꏃꌊꀒꁨꉜꄉꂵꅊꇈ，ꉪꊇꄩꅐꀑꌠꁏꐚꆹꉬꇮꃅ，ꂚꎼꏹꀱꇁꂿꆹ，ꐯꇯꃅꅽꅇꃅꉐꃅꌐꂿ！ꉬꇮꃅꆎꐊꁧꌐꂿ！”
ꎭꂵꊞꐂꆹꋍꇅꀉꄂꃅꋍꉌꊋꉬꇮꃅꋌꄜꎼꇁꌐꈭꐨ，ꉦꃀꆗꄉꀊꄶꇬꉆꎌ。
ꀊꄸꀈꏦꆹꑡꑌꀋꉉ，ꄚꑓꋪꈐꏭꆹꋪꒃꐆꎹꌠꃆꄔꂱꍀꄓꇫꎍ。ꋌꎺꇁꋍꅿꃀꌠꀿꃀꑍꂷꌠꌦꄚꌦꀋꄚꃅꌦꌠꄀ，ꋌꎺꇁꂛꊨꃈꌺꂶꌠꐋꁏꐚꐙꁧꌠꄀ，ꋋꉪꄚꃣꌾꈌꂰꃆꃶꑖꋩꌠꋧꃅꋋꂷꇬ，ꊨꏦꏣꃀꏣꑟꀉꄂꀕꌠꂚꄏꅿꋬꂻꃆꂮꄀ。ꋋꎭꂵꊞꐂꌟꃅꄇꄜꋊꄉꉌꊋꑌꐨꆹꀋꄜꑴꇬ，ꋍꅿꉌꂵꈐꏭꅇꏤꆹꁦꀑꒊꃀꋌꇷꑑꃹꏽꌠꉬ，ꉘꁮꆧꁨꋌꎼꑓꁴꅐꏾꌠꉬ。ꋋꇅꃅ，ꅪꎔꅪꃨꑠꂷꃅꄉꇬ，ꑡꉂꏣꉂꑟꑖꈈꀕꃅꑠꉬꇮꐜꀋꈨꌐꃲ。ꏣꃀꏣꑟꎁꃅ，ꋌꇫꄉꇁꉚꎍ，ꋋꆹꋌꂿꋌꃅꋻꌠꐥꌠꌦꌠꀋꑴꃅꌉꆳꌠ、ꊿꂾꇓꁨꐛꌠ、ꊾꌦꑘꄃꐛꌠꌉꈿꁌ……
“ꍑꑴꇆ，ꉡꑌꀑꑊꀋꈁꀐ！”ꃴꄿꏁꍅꂶꌠꄽꂫꆏꆈꌠꁏꐚꈍꑋꄙꈎꃅꋊꊛꎼꇁꌠꉌꂵꑌꂂꌠꌳꈄꀬꅑꅐꀖꄉꉉꇬ，“ꇓꈓꇬꌊꁏꁥꌠꆹꂚꎼꏹꇬꁏꆷ，ꇭꍣꄈꇬꁎꆽ；ꆿꃀꁡꇤꐙꁧꌋꊿꋠꉌꃀꀋꌦꃅꉈꑴꋍꃢꐂꉪꊇꄩꄸꋩꇁꑠꈨꆹꉬꑲꆏ，ꉪꊇꂴꇇꋏꆏꇨꌠꃅꀐ！ꄚ‘ꐚꁦꌋꀉꆈ’ꋋꈨꂴꆽꌌ——”ꋍꇇꋍꁆꆏꇵꊫꋏꄉ，ꋍꁆꆏꎇꄉꀂꏾꇽꇫꎭꄷꐛꅍꑠꇅꃅꇈ，ꌙꈈꀕꃅꎭꂵꊞꐂꌋꆀꀊꄸꀈꏦꑌꏭꉉꇬ：“ꋋꆹꉪꊇꄈꍛꀯꅿꁰꈘꌠꏤꐪꑍꏢꌠꉬ，ꌤꃆꀉꒉꇨꌠꉬ，ꂁꇰꏢꀕꃅꄉꑲꆀꍑꌠꉬ！”
ꊁꊛ：ꉒꈌꈬꇬꉂꏣ(ꊰꉆ)http://yi.yizuren.com/plus/view.php?aid=134
