ꀨꏾꌠ > ꃆꃀꁱꇐꋽꇐ

ꉒꈌꈬꇬꉂꏣ(ꊰꇖ)
ꄜꃑꄮꈉ: 2013-04-01  | ꁰꄻꊿ:ꀉꈌꏬꌋ

ꂴꊛ:ꉒꈌꈬꇬꉂꏣ(ꊰꌕ)http://yi.yizuren.com/plus/view.php?aid=130

                              ꊰꇖ

   ꂚꄏꆹꀱꎭꈴꏳꑳꀒꁵꂶꌠꇬꑌꀋꆹ,ꌍꑓꁬꌠꇬꎸꄿꈧꌠꊿꇱꆽꒇꇫꎭꀐꐛꅹ,ꌍꑓꈐꏭꂁꅉꈚꌠꆹꊿꌋꅜꀐꒉꄸꃅ,ꋋꆹꊿꇱꏭꆦꌊꑤꏓꂱꃀꈿꅉꄿꃴꑳꂶꌠꇬꀀꄉꁧꀐ。
   ꅉꃴꏦꑳꌡꌠ“ꇌꉻ”ꋋꂷꆹ,ꈜꈼꑓꀋꂿꇈꉈꑴꆏꅫꏻꀕ。ꄚꋍꃅꑴꇬꐰꀕꈩꀕꐨꆹꂴꆽꀀꂶꌠꄩꀉꒉꃅꁦꎆꀐ。ꋋꆹꀛꐂꅉꈚꌠꇂꃴꐛꄉ,ꀛꐂꅉꂶꌠꈍꒉꆏ,“ꇌꉻ”ꋋꂷꑋꈍꒉꌠꉬ。ꑤꑭꊂ,ꇓꈓꇬꉬꄿꂿ、ꑘꃅꁡꇤꇬꉬꄿꂿ,ꇿꇬꑌꂚꄏꅿꑭꐨꀋꁮꅉꀋꐥ;ꄚꋌꈚꇬꀉꄂ,ꋌꇫꇁꀋꋻꑴꌦ。
   ꄚꋋꈚꇬꆹꊇꅉꇯꆐꌌꁨꐞꅍꌫꉂꌫꈾꀋꐥꐛꅹ,ꄆꍣꇬꄆꃑꀋꃑꃆꂮꑠꆹꋋꌋꆀꀊꅰꐮꃆꂮꀉꒉꃅꀋꐥ。ꒀꒉꌌꊐꄉꄔꌠꂶꄒꂷꀉꄂꅉꀕꃅꋋꐊꐺꇬꎷ,ꂵꆧꆹꃅꈊꌡ,ꃅꈊꆏꂵꆧꌡ。ꀋꃋꋋꇅꇬꆹ,ꋋꆹꀊꄸꀈꏦꌋꆀꎭꂵꊞꐂꑋꅿꀑꇬꋬꂻꒉꎴꌠꎁꃅꉌꐒꇁꎭꇁꀐ。ꋋꆹꊿꊇꉈꋍꃢꃄꈌꄐꃅꂵꇁꀋꉊꋋꀀꋻꌠ“ꇌꉻ”ꂶꌠꇬꃹꁧꌠꏦ。
   ꀥꋍꏯꅞꀉꏯꅞꃅꐺꌠꀉꉌꈧꌠꆹ,ꋍꅿꉪꈜꋋꇱꃸꆽꅷꎌꅉꎍꀋꉆ。ꀉꉌꈧꌠꆹꅉꀕꃅꆏꇬꉆꄉ,ꐬꆠꃰꈻꏭꃅꏮꂚꄏꇬꉜꎍꇬꎷ,ꂴꆽꋋꇁꄚꇬꑟꇁꄮꇬꆹ,ꋋꆹꀉꉌꈧꌠꇱꉪꌊꉌꈹꊿꉬꎻꈁꄉ,ꅉꀕꃅꈍꄮꑌꀑꇬꈭꆶꌠꊭꄎꄉꇬꎷ。ꀅꌳꀅꌳꃅꄉꐮꎖꅷꇁꇬꆏ,ꂚꄏꅿꎭꈐꆹꀉꉌꈧꌠꇯꀋꐰꌠꊿꊇꌋꅜꌠꀋꏮ,ꉌꋦꑓꏀꃅꀥꅷꋍꅿꀀꈤꇬꑌꄉꉂꐪꎭꇁꌠꐥ,ꐂꅷꂶꄒꄈꅉꇬꁱꄜꂶꌠꇬꄉ,ꑞꑌꀋꉪꀋꈾꃅ,ꀂꏾꍞꇁꍔꌺꇬꍯꉗꅝꀜꈧꌠꑽꅝꇬꎷ,ꉈꑴꄹꁆꆏꀃꃀꈢ、ꀑꇬꁮꌠꀋꑴꃅꃴꐛꋃꐛꋠꀋꉆꀐꌠꂸꄬꀉꀜꈧꌠꉄꋠꐺꌠꑌꐥ。
   ꃅꐎꋍꈓꂷꅑꅷꇁꌠꆏ,ꋍꁮꆪꌠꋠꁌꅜꁌꎆꃀꑍꊏꐥꐛꅹ,ꐥꐨꃆꂮꆹꇯꍝꃅꄺꀱꌊꊼꇅꃪꀐꌠꉬ。ꋋꆹꈞꆈꄉꀅꌳꌺꃅꇫꄉꉪꈽꄮꇬꆏ,ꑭꄑꄉꋍꇬꏲꌠꀃꈈꃱꈿꌬꊿꂶꌠꆹ,ꌞꊿꂴꆽꄉꇬꆏ,ꉇꉈꃅꊿꋋꊨꅷꈌꎸꀋꀮꍈꑌꀋꒊꑴꇬ,ꄚꋚꐙꌠꂴꆽꃅꄉꇬꆹ,ꋋꆹꉉꄻꀋꅐꃅꂚꄏꇬꉽꐯꉾꌠꉬꑴ。ꋋꆹꋚꋑꅝꒉꈧꌠꀉꄂꌞꅷꂚꄏꍈꇁꇬꎷꌠꀉꄂꀋꉬꃅ,ꅉꀕꃅꄮꈉꈍꄮꆏꋚꋠꌠꋋꎺꄉ,ꄷꀋꁧꋋꆹꈍꄮꆏꋚꎭꒉꎭꌊꂚꄏꍈꌠꄮꈉꑌ,ꋋꎺꀕꇊꐝꄧꀕꃅꋍꉌꂵꇬꊐꄉꇬꎷ。ꀒꐱꃅꉉꇬꆏ,ꋋꆹꋍꈓꂷꍃꂁꄉꐥꅻꀋꅐ,ꊨꏦꇭꀧꎸꄜꇬꆹꋍꍈꑌꁣꀋꏙꌠꉬ,ꄷꀋꁧꉪꊇꋍꇬꑠꃅꉂꌠꋋꆹꇯꍝꃅ,ꋍꊨꏦꀃꅉꉌꂵꇬꄉꋋꌌꉪꎻꇁꄎꇬꎷꌠꉬ。
   ꄚ,ꂁꄉꏭꆦꌊꋌꈚꇬꀀꇁꈭꐨꆏ,ꇯꍝꃅꈀꄸꑌꇬꀋꐚꌠꉬ。
   ꑸꆀꆹꇯꍝꃅꃮꂱꎼꂶꌠꆦꇫꎭꄷꌠꅀ?ꈍꃅꄉꋋꂷꆦꇫꎭꉆꂯ?ꀉꉌꈧꌠꀉꄂꀊꄶꋚꋠꁱꄜꇬꄉꐂꅷꀀꈤꇬꅞꌦ,ꀀꈤꇬꄉꐂꅷꋚꋠꁱꄜꇬꅞꌦꃅꑭꆏꇁꀋꉆꃅꎌꇬꎷ。ꄚꈍꃅꉉꄿꂿ,ꀉꉌꈧꌠꆹꄡꇗꂚꄏꅿꉪꈜꉪꏣꈧꌠꋋꃹꆽꅷꎍꅉꎍꀋꉆꃅꎍꌦꀐ。
   ꀉꉌꋋꑵꆹꇭꀧꆹꀄꊭꑴꇬ,ꄚꉌꂵꆹꄌꉆꄜꇬꊐꌊꐺꏠꌠꉬ。ꄚꀀꈤꇬꄉꐂꅷꀀꀨꋐꌠꇬꑟꇬꆏ,ꑞꒉꄸꉬꀋꐚ,ꀊꄶꄉꍛꆏꍛꄹꐮꇤꀙꐯꀙꃅꎍꌐꌦ。
   ꂚꄏꂶꌠꆹꀉꉌꈧꌠꇱꄖꅷꀀꑌꃹꒉꀋꉆꐛꅹ,ꀀꀨꋋꇱꇔꄉ,ꅞꀊꄶꀀꈤꁧꏢꀕꁮꇬꑌꎍ。ꀉꉌꈧꌠꆹꋌꇱꇷꏸꀸꆽꀸꄓ,ꋋꇅꃅꁈꇿꇬꁧꌐꀋꐛꀐ。ꂚꄏꆹꑣꄓꏿꑯꅮꋌꇱꄻꅑꄉ,ꇁꌊꅉꃴꏦꑳꂶꌠꅏꈌꇬꉆꎍ,ꀃꈈꁬꌠꆹꌋꄈꊾꇱꎤꄉ,ꄚꀃꈈꄩꆏꌍꑓꀊꏀꅐꁌꄉ,ꊿꋋꀋꌧꇈꐥꍂꃅꇫꂿꀋꋻꌠꑓꋪꋑꆹꏮꀊꄶꇬꉜꎍꇬꎷ。ꀃꈈꁬꌠꊂꆈꆏꌩꄽꀮꂶꑌꄻꇫꄉ,ꉜꅊꇈꂿꆏꋌꄛꅊꁧꐔꍂꁧꀋꉆꁧꀋꎽꀐꌠꉬꅊꇈ,ꃅꐙꐛꄟꈧꌠꀊꅰꃅꊽꐬꆠꀱꋦ。
   ꌍꑓꀃꈈꉈꏭꋋꇅꃅꅩꌬꄷꑠꇅꄹꇈ,ꄆꄬꂷꇭꏢꇬꊎꉉꆹꉇꆹꃅꊽꑓꌂꇫꎍ,ꊛꄉꃚꋒꇬꋍꏮꈊꋚꊪꇁꃅꉉꇫꈌꐚꇁ。
   “ꀉꀒ,ꈍꃅꎙꋚꇯꀋꎭꑴꌦꇬꆏ,ꈍꃅꄉꈊꋚꋠꀐꄷꌠꉬꀋ?”
   ꋋꆹꀋꇊꇬꆏꀃꈈꃱꈿꌬꊿꂶꌠꏭꌗꋏꌠꌡ。ꀃꈈꃱꈿꌬꊿꂶꌠꆹꎎꋍꇬꊼꇅꄀꇈ,ꆸꏂꆹꏢꃅꂱꀯꌩꀊꄶꇬꉆꎍ。ꋋꆹꑭꁘꐕꌊꌍꑓꏢꁮꇬꄉ,ꋚꍔꌠꊪꌊꇁ,ꉈꑴꋂꄮꆏꃱꋯꃱꂷꄵꐮꉔꄉꑍꇯꉬ。ꋙꆹꈠꐛꀐ,ꋂꄮꄷꌠꃱꋯꃱꀜꈧꌠꆹꋁꍈꑌꄻꇬꁊꀋꄉꐛꅹ,ꑡꅿꉗꍈꑌꐜꀋꈨ。ꎭꈐꂄꎔꌠꆏꏢꅿꇔꅿꃅꀋꐛꑴꌦꅊꇈ,ꋋꆹꄽꂫꆏꂿꑋꏿꃅꋚꍔꌠꌋꆀꋂꄮꑍꇯꌠꋋꇱꇣꋠꇫꎭꌐ。ꑠꄮꇬꑲꆀꋌꌌꉪꇁ,ꋋꆹꇯꍝꃅꀃꃀꂮꀙꀐꌠꉬꅊꇈꄉꋚꒉꊼꇅꀉꑌꑍꇰꌌꇁꑞꉂꌠꉬꅊꇈ。ꎙꋚꌞꎭꌊꇁꀋꇁꌠꆹ,ꇯꍝꃅꋋꇬꀋꎺꀐ,ꉜꅊꇉꂾꆏ,ꋋꆹꀋꌋꀋꏢꃅꀀꑌꇴꁧꀐꌠꉬꅊꇈ。ꋍꇇꁆꌠꎇꎼꆹꇬꆏ,ꇇꈯꄮꈉꂶꌠꑌꅐꀋꅑꃅꐙꇿꈴꁧꀋꐚꄉ,ꇯꍝꃅꄮꈉꆹꇿꇫꐥꀐꌠꊨꄅꀋꉆꀐ。
   ꀊꄶꑸꆀꍤꁆꄉꁖꇁꄮꇬꆹ,ꂿꃅꁬꌠꋋꇅꃅꀕꍛꁮꇁꂯꄉꀐ。ꋀꊇꆹꏦꎫꈛꈌꑠꈚꇬꈴꁧꐛꅹ,ꋍꇬꐏꎭꊿꁥꌠꆹꋋꇅꇬꆏꋬꂻꌠꏡꁈꏁꄉꌬ,ꉐꁿꀁꄂꈬꊿꇱꄻꋍꀂꏾꇬꉱꇈ,ꈻꌠꈻ,ꄹꌠꄹꃅꎍꐛꅹ,ꋍꇇꇬꇇꈯꄮꈉꂶꌠꆹꈍꄮꇯꆐꊰꇿꇬꅞꇈꀋꐚꀐ。ꄚ,ꀀꑌꋋꂷꆹꇯꍝꃅꇴꌒꐯꇴꌒ!ꂸꄬꌋꆀꍮꉘꈧꌠꋋꇤꇬꄉꇈ,ꃢꈜꇰꀋꇔꃅꋋꎇꋍꃢꀀꇬꆏ,ꉐꑴ,ꀋꌋꀋꏢꃅ,ꉜꅊꇈꂿꆏ,ꁮꏮꈞꆈꃹ,ꆪꏮꁦꎐꅐꇁꀐꅊꇈ。
   ꋋꆹꋋꇅꃅꀋꉊꂴꋍꀀꅉ“ꇌꉻ”ꂶꌠꑌꊼꇅꉂꇁꀐ。
   ꎸꑟꌊꏍꄉꌠꌍꑓꁬꌠꇬꉆꄉꉜꑲꆏ,ꋋꆹꈜꎴꃅꄷꃅꉒ,ꃅꄂꑠꋌꊌꂿ,ꎹꄓꄂꅪꌋꆀꁮꏮꈞꆈꃹꌠꋋꊌꂿ,ꃅꏸꌋꆀꆧꁨꐮꄡꌠꋌꊌꂿ;ꉈꑴꆏꁱꂷꀉꒉꄊꊫꀨꈧꌠꅿꐏꑳꋋꊌꂿ,ꑝꉸꄯꒉꃷꅉꑳꋿꋋꊌꂿ,ꉈꑴꆏꂁꀊꄶꁧꊂꀀꎍꌠꆿꃀꁡꇤꁦꌠꈛꌎ……ꀋꃋꀃꑍꆏꋋꆹꇯꍝꃅꀕꌋꆀꐮꌋꃬꃅꀋꐥꀐ。
   ꈍꃅ,ꈍꃅꑠꃅꄉꊿꇫꀋꈁ、ꇫꀋꉂꌠꊾꂷꐛꁧꌠꉬ?ꇯꍝꃅꃄꈌꄐꀋꇮꆺꌋꀐ!
   ꃄꈌꄐꀋꇮꆺꌋꀕ,ꉡꑌꃄꈌꄐꀋꇮꆺꌋꀕꌠꀋꉬꄜꅀ?ꈍꃅꄉꋍꇬꉬꅲꌠꉬꂯ?ꏦꑳꃹꇈꂱꑱꌒꐨꃅꐥꀋꄐꌠ“ꁏꐚ”ꂶꆹ,ꈍꃅꈁꒉꈁꌒꀕꌠꐚꁏꄩꅐꌠꁏꃀꂶꌋꆀꐮꉂꇁꌠꉬ,ꉂꏣꑟꅪꆹꀋꎪ ꃅꈬꈈꀕꂯꆏ?ꋋꆹꃹꅼꃅꎺꏣꇬꄉꋌꉪꎼꇀꌦ。ꋋꆹꊰꈎꂿꀋꉬ,ꉈꑴꆏꉬꈎꂿꑌꀋꉬ,ꃅꑍꃅꉖꆹꒉꀕꌟꃅꇬꐱꁧꇬꎷꑵꉬꅊꇈ。ꊰꈎꂾ,ꋋꆹꋍꇬꉬꀋꅲ;ꉬꈎꐛꈭꐨ,ꌋꅪꂶꌠꄉꋍꇬꉬꀋꅲ。ꀃꑍꋋꄮꆏ,ꉂꏣꉂꑟꐚꒉꌟꃅꐓꂿꀕ,ꉌꂵꑍꂷꉪꐪꋍꏢꉪ,ꉌꂵꑍꂷꐈꇁꋍꂷꐛ。ꄚ,ꃰꊿꉌꂵꉪꅉꐰꇑꇬꀋꑟ,ꑡꃅꄉꃅꄵꀕꃅꇁꌊꃣꌾꈌꂰ,ꃆꃶꑖꋩꌠꇈꀋꇮꆺꌋꀕꌠꃅꈎꃅꆪꑠꊭꇬꊜꌠꉬ。ꉐꑴ!ꄚꋋꆹꄡꇗꑠꃅꐙꌠꃅꈎꃅꆪꏭꈁꎭꀕꌠꉬ,ꃅꈎꃅꆪꑠꃅꀋꇮꆺꌋꀕꐛꅹ,ꀊꄸꀈꏦꆹꑞꑌꀋꑴꀋꅲꇈꉌꇗꃅꇁꋍꅿꂣꈐꇬꃹꇁꀐ。ꄚꊽꉌꈻꃴꆅꇈꐜꅖꌠꆏ,ꃰꊿꑍꂷꐮꉂꇁꇬꃅꑍꃅꉖꆹꇯꍝꃅꀁꎴꀙꇨꀐ。
   ꑠꄮꇬꆏ,ꀃꈈꁭꑭꉈꏭꆹꈘꆽꈘꄧ,ꈨꉆꈨꀋꉆꃅꑭꁘꂾꃚꌋꆀꌧꈿꏇꃚꈧꇫꈌꐚꇁ。
   “ꆏꑞꂷꏦꅍꐥꇊ?ꑷ,ꑷꁧꌶꂿ。”ꌋꅪꂷꑠꃅꉉ。
   “ꉢ,ꉠꏸꏦ?ꉢꆎꏦ。”ꌺꃰꂷꅿꃚꋒꇫꈌꐚꇁ。
   “ꉡꂷꑡꈨꏦꅍꐥꄜ?ꊿꂾꃀꌠꁌꀋꐥ,ꁖꅖꀈꃀꒉꀋꑭꀐ。”
   “ꑠꀋꉬ,ꅽꑓꊏꑓꂡꀊꋨꈨ,ꀋꉊꑫꑵꄮꇬꌟꃅꆈꏸꀕ。”
   “ꉎꉐ……”
   ꂚꄏꋋꇷꋍꇅꁵ:ꈀꄸꉬ?ꌋꅪꂶꌠꆹꑸꆀꀋꉬꑲꆏ,ꀉꁁꈀꄸꂷꉬꂯ?ꄚꀊꄶꌺꃰꀊꋨꂷꅿꃛꁙꃚꋒꆹꑡꃅꑠꃅꋒꌥꌠꉬꂯ!
   ꎤꂷꎤꁉꇁꐮꄚꃚꋒꂴꆽꈌꐚꇁ,ꊛꄉꀃꈈꁬꌠꆹꍛꃅꁉꎼꇁꀐ。ꃮꂱꎼꂶꌠꂴꐊꇁ,ꇇꇀꑳꁆꌠꆹꄆꄬꂷꇭꊼꇅꀉꎴꑠꏢꄔꌊꐺ,ꂷꇭꁨꑭꐎꊭꀕꃅꄔꂚꄏꈁꑓꇬꁨꎍ。ꂚꄏꆹꋋꇅꃅꇭꀧꏮꀠꎼꒉ,ꋋꆏꂷꇭꁨꑭꑓꌂꈌꌂꇧꒉꄸ,ꑠꅹꂚꄏꆹꃮꂱꎼꇇꇀꃼꁆꌠꆹꑞꈨꄌꌊꐺꌠ,ꋌꋋꊌꂿꐞꀋꉅ。
   ꀃꈈꃱꈿꌬꊿꂶꌠꆹ,ꉈꄉꈈꑌꅍꇴꄂꐯꇯꉆꑵꌠꑍꂷꄌꌊꈐꏮꃹꇁꇈ,ꉈꄉꈈꑌꅍꑍꂶꌠꋋꇱꁉꄻꊒꀕꃅꇤꀊꄶꇖꎐꄲꁱꄜꀄꊭꍇꌠꏢꁮꇬꅞꄉ,ꊛꄉꃮꂱꎼꇇꇬꄉꄆꄬꂷꇭꏡꌠꋋꇱꒃꌊꄻꊖꁌꇬꄀꄉ,ꂷꇭꁨꑭꈧꌠꄡꇗꇁꂚꄏꀀꈤꇬꌸꐛꅹ,ꋌꄓꇬꉆꄉꂷꇭꁨꑭꋋꇱꋒꇫꎭ。
   “ꆎꑞꐛꅹꑠꃅꁨꇅꀕꌠꏦꌠꉬ?”
   ꑸꆀꂶꌠꆹꇬꅇꋋꇬꎁꃅꒊꌋꀕꇈꉱꉴꃅꋍꇬꇯꒉ。ꃱꈿꌬꊿꂶꌠꁖꁧꀐ。ꑸꆀꆹꋍꊂꈹꇁꇈꋌꌋꆀꆼꁠꋓꃅꅞꀊꄶꉈꄉꈈꑌꅍꇬꑋꎍꌠꊿꀊꋨꂷꇬꌧꈿꅷꐺ,ꃮꂱꎼꂶꌠꑋꅉꀋꊌꃅꎍ,ꄚꋋꆹꂱꑱꄉꒉꂱꑱꄻꑵꌠꑠꂷꉬꄉꅞꂚꄏꀀꈤꇫꑌꀕꀋꏾꐛꅹ,ꋋꆹꑭꁆꑍꁆꌠꊼꇅꑑꃹꏭꃅꇁꌊꑸꆀꊂꆈꉈꄉꈈꑌꅍꂶꌠꇬꉈꉆꎍ。
   “ꊾꋋꂷ,ꆏꌧꌦꀋ?”
   ꑸꆀꃚꋒꇬꍬꄉꂚꄏꅿꑓꋪꆹꏮꇁꀊꄶꈁꑓꀊꋨꂷꇬꉜꀐ。ꊿꋋꂷꈌꁯꑓꂷꆹꈁꉜꈀꋽꀕꑠꂷ,ꊼꇅꑴꅑꌠꆏ,ꋋꅑꐺꌠꂽꀎꇓꂶꌠꌋꆀꄻꈚꐺꌠꂽꃢꈜꋬꈭꌠꆹꀉꒉꇨꐛꅹ,ꑓꏮꇬꉚꇬꆹ,ꈀꄸꉜꇬꑌꇐꑌꌋꉆꂽꐛꃅꀋꐛꃅꎍ,ꇯꍝꃅꀊꄶ《ꂽꒃ》ꄷꄆꒌꂶꌠꈐꏭꌡꐯꌡ。
   “ꋋꆹꂽꇬꄉꉇꄀꌊꇁꌠꐋꀨꂷ。“ꃮꂱꎼꂶꌠꊾꅰꊾꑻꏭꃅꉉꈌꊐꅷꐺ。
   ꂚꄏꆹꄽꂫꆏꋋꎺꋌꉪꐙꇁꀐ,ꄡꇗꀊꄶ《ꂛꊨꅫꃀꋓꄉꃅꏀꀖ》ꑫꂶꌠꑵꌠꇫꇇꀤꐋꀉꆹꂷꌠꉬꅊꇈ!ꋍꇅꃅꋍꇅꀉꄂꃅ,ꋍꇬꇉꄚꄉꃆꍀꄓ,ꈁꑓꂶꌠꅪꃅꅩꍠꀕꇫꅞ。ꄚꋋꇅꃅꊨꏦꑴꅉꊨꏦꋰꄉ,ꇗꄃꀕꃅꎍꇀꌦꀐ。ꋋꉪꇁꀊꄸꀈꏦꄀꄷꆏ,ꉌꂵꇬꆹꐙꒉꐔꃅꐔꇈꎘꂨꅍꇎꐯꇎꃅꎍ。ꋌꌋꆀꑸꆀꑊꆹꀋꃉꀃꑍꆏ,ꑠꃅꐮꇬꐮꄙꂳꆽꀕꑠꑵꀉꄂꋒꇈꀐ。ꀋꅞꉖꈊꃀꌋꁁꊾꀀꃅꆈꌣꀕꄮꇬ,ꋋꆹꃀꅉꑓꀠꀕꑊꏦꎲꄏꀋꇮꃅꋍꏭꉉꇬꑡ“ꀋꌂꀕꋒꃅ,ꀋꉂꀕꋒꃅ”ꃅꌠꉬꄷ,ꋋꆹꈍꃅꎲꀋꑌꌠꉬ!ꋋꆹꈍꃅꊿꋋꌂꌠꉬ!ꐧꋦꃰꊿꅿꐥꐨꒈꂃꒊꆱꋋꑵꆹ,ꑕꃰꊿꇭꀧꎑꎍꌠꌦꏭꇓꃀ,ꈍꑋꋌꇱꒈꑻꁦꎴꇤꌃꑌꀋꐚꑠꑵ。ꄚꃰꊿꄹꁆꆏ,ꌦꏭꇓꃀꋋꑵꆹꏓꅉꇱꅉꃅꀋꎴꀋꈻꌠꍍꒉꆀꒉꐛꑠꑵꑌꉬꌦꅊꇈ。ꋌꌋꆀꑫꑵꊿꋋꑍꂷꅿꇁꃆꇁꂮꆹ,ꋋꆹꉪꌊꈾꌊꀋꅐꃅꋋꇠꅉꐚꀐ。ꌦꆀꑼꀉꆹꂶꌠꅿꍔꍞꀑꇬꂶꌠꌌꈔꑍꇫꎭꂾꆏꐛꅹ,ꊿꊇꆹꋍꇬꄉꏡꁈꏂꇀꌦꌠꉬꅊꇈ。ꄚ,ꇯꍝꃅꋋꆹꉘꁮꇬꏣꄀ,ꆿꃀꇬꊀꄅ,ꀄꂼꂻꌠꀋꉬꄷꌠꅀ?ꂱꊨꆈꒀꀕꃅꎍꌠꂱꀯꋑꌠꇫꄉ,ꀋꎺꃅꊿꊇꏭꉜꄸꀱꋦꌠꄇꇖꀕꃅꌧꉆꇁ。
   ꋋꈨꆹꉬꇮꃅꑸꆀꅿꏨꆉꑓꋪꋑꌠꂿꁈꆶꀋꄏꅊꇈ。
   ꋋꆹꀋꎺꀂꏾꋒꄉꇈ,ꏾꁒꏾꌌꃅꊼꇅꒉꇁ,ꋋꉜꇬꑌꃰꊿꐥꐨꋋꑵꋍꇅꋋꇅꇬꆏ,ꃶꐚꃅꊽꒊꒉꏭꃅꐛꌠꉬꑴ。ꋋꆹꂚꄏꇬꉂꀋꋻꌠꀋꉬ。ꇷꄙꊋꌭꌠꈯꄿꈯꊈ,ꌳꉔꌳꈄꀱꋦꌠꐛꄟ,ꐮꐞꄮꇬꄜꅐꎼꇁꌠꅼꇻꀕꌠꉂꏣꑠꆹ,ꇓꆈꀋꃀꋍꂷꇈꋍꂷꌟꃅꆷꇁꎿꃝꇬꊐꄷꆏ,ꄚꄉꎿꉱꑘꁧꇬꎷꑴꇬ,ꄚꈍꃅꉉꄿꂿ,ꋍꅿꉂꏣꒊꊨꎮꀕꈧꌠꆹꋋꇱꌌꋍꃢꀜꐥꀜꆗꏿꋻꌠꉬ。
   ꄚꃰꊿꐰꇑꃰꊿꀋꐊ,ꑾꎭꑿꀋꅿ,ꋍꑊꆹꈍꄮꑌꃀꅉꆐꐥꍂꃅꋍꑶꋦꀋꄐꇬꎷꌠꉬ。ꂴꆽꐮꐊꇬꂾꄹꉈꌠꇰꆐ,ꋋꆹꌋꐳꃅꋋꉪꎼꇁꇬ,ꋋꆹꈍꄮꑌꐈꇁꋍꅿꊿꑽꂶꌠꐛꌠꉬ!ꂴꆽꌤꑘꉪꌤꑘꌌꀨꇬꄉꇈ,ꊂꑲꆀꑮꃀꌌꊁꄉꌠꁦꋠꑠꂶꆹ,ꑓꇙꀕꃅꋍꅿꉂꏣꈝꃀꇬꀈꈥꃅꑓꅐꅈꑠꄚꊰꇈ,ꉈꑴꆏꎓꀦꐡꊧꑌꄚꁮꇈꌠꉬ。ꋋꒉꄸꃅꋍꏢꁮꇫꐥꌠꑫꑵꊿꋋꂷꆏ,ꊝꋽꃅꇁꌊꋍꉌꃀꀈꈥꃅꑓꅐꅉꈧꌠꋋꇱꋍꑕꊷꆣꌺꃅꐯꇯꄉꌠꉬꀐ。ꋋꆹꈍꑌꃢꉪꋻꏡꋻ:ꉡꆹꑞꈨꃅꑽꄷꌠꉬ?ꄷꀋꁧꐮꐞꄮ,ꋋꑌꂚꄏꇬꉂꐯꉂꃅꎍꑴꌦ。ꋋꆹꇯꍝꃅꈱꌠꀋꉬ,ꋍꅿꌋꅪꂷꅿꃰꊿꈝꃀꎵꑳꀕꌠꇬꉘꃀꈭꌠꑌꄻꂚꄏꁵꌠꉬ。ꄚ“ꆧꁨꅂꐛꃰꆪꈭ”ꇁꀋꉆꀐ。ꋍꑊꈯꄔꇬꆹ,ꂿꅉꆐꈀꄸꐂꑌꐂꇬꈴꀋꄐꌠꇁꄿꀊꅼꇨꑠꏢꐥꀐ。ꉪꊇꈀꄸꑌꊼꇅꉪꉚꉐ,ꁨꇐꀋꐥꏠꌠꂽꑼꅿꃹꍋꀯꍔꊈꂷ,ꊁꆏꁨꇐꀋꐥꏠꌠꍔꄈꅿꑤꊈꎼꏹꂷ,ꈍꃅꄉꌋꎎꌠꌋꅪꂷꐊꉆꄷꌠꉬ?ꑘꁨꉙꂘꅉꇬꄉ,ꋋꆹꂴꊂꃅꂚꄏꅿꌤꃅ、ꌷꐨꌋꆀꐥꐨꃆꂮꅱꇬꌠꅇꊪꄯꒉꑍꁬꊪꎴꊌꋺ。ꅇꊪꄯꒉꉜꌐꈭꐨ,ꂴꆽꌟꃅꋋꇱꇴꄂꐯꇯꄉꂴꆽꌟꃅꋋꇱꎬꀱꎼꁧꇬꎷ。ꋋꆹꀊꄶꑫꑵꀊꋨꂷꀉꄂꇁꉚꇬꎷꐛꅹ,ꅇꊪꄯꒉꈍꑋꃢꁱꎼꁦꋻꇬꂚꄏꌋꆀꐯꌟꌠꊝꇬꎷ。ꏮꀱꉈꎼꇁꌠꅇꊪꄯꒉꁱꇷꇬꆹꑠꃅꁱꄉ,“ꊿꑠꂷꀋꐥ”ꅀ“ꃄꂓꐝꀋꉅ”ꃅꁱꇬꄀꎼꇁꇬꎷ。ꄇꇖꀕ,ꋋꆹꊨꏦꐮꏦꉅꌠꉬ。ꀊꋨꁁꏯꆹꉂꈜꋩꀋꇮꌠꅀꏸꏦꇨꌠꉬꂯꆏ?ꋋꏮꅔꏂꃅꃤꄮꇬꉜꄉꌗꏿꋺ:
   “ꋋꆹꑞꒉꄸꉬ?ꋋꆹꑡꒉꄸꉬꀋꇆ?!”
   ꃅꃴꇬꃅꄂꋍꅇꀱꀋꇮ,ꁦꀑꎺꁧꑌꋍꅇꀱꀋꇮ,ꒈꂪꏭꉜꄉꐚꌠꃅꃴꈭꏂꌋꆀꒊꃀꑌꋍꅲꅇꀱꀋꇮ。ꇯꍝꃅꀕꅍꎷꀋꊌ,ꑞꑌꋍꊨꏦꀃꅉꇬꌥꉩ,ꇫꊙꇬꈹ,ꇫꎖꉚꁧꄻꅐꌐ。ꑠꃅꄉꃅꐑꑍꈓꂷꀊꄶꐥꄉꑘꁨꉙꂘꇈ,ꀎꇓꂶꌠꇔꇫꎭꄉꀱꑤꍰꇓꈓꇬꑟꇁꀐ。ꑤꍰꇓꈓꆹꇬꁦꀑꇈꒉꈧꌠꆹꉬꇮꋍꐛꅉꋋꐛꌐꑴꌦ,ꄚꋋꆹꑞꆏꉂꏣꉬꌠꋋꅉꐚꀐ。ꉂꏣꆹꉉꊾꇰꀋꉆꌠꌒꊌꑠꑵ,ꁬꃨꀮꌡ、ꎧꏸꍔꌡ、ꆿꒉꍔꌡ……ꋋꊇꅉꆹꑫꑵꊾꂷꉬꐛꅹ,ꑴꁱꃆꂮꌧꇐꑠꑌꀉꇨꄉ,ꅉꀕꃅꋍꊨꏦꀛꐂꅉꈚꌠꌋꆀꑴꁱꑴꌠꂪꌦꁬꌠꇬꄉ,ꈁꏾꃅꉌꂵꑞꉪꆏꑞꑴꇬꎷ,ꏦꃅꏦꅍꑌꀋꐥ,ꑠꅹꊛꄉꈍꑋꃢꊿꋌꎼꑊꏦꈌꁉꀋꀬꌠꒊꇐꌋꆀꄷꅠꊿꋋꌂꏷꈌꀕꑠꋋꇱꑵꎼꇁꋺ。
   “ꁱꀕꀉꒉꃅꇝꂱ”ꄷꄮꇬꆏ,ꋋꆹꌕꐈꌕꉙꁏꌊ“ꃀꑊꋌ”ꂷꐛ,“ꑊꋌꃌꅪ”ꂷꑌꐛꄉ。ꀊꄶ“ꇌꉻ”ꌋꆀꊿꀋꂄꈧꌠꈐꏭ,ꂴꆽꋍꁱꒌꄚꇬꊰꇈ。ꄚꑠꃅꑴꇬ,ꋋꆹꀄꂼꂷꅿꇬꀕꊧꀨꀉꄂꉬꑴꌦ!ꃅꐛꃅꄏꀕ,ꌺꇯꀁꇬꑌ,ꃄꊭꑲꁮꌸ,ꃅꊸꇬꑌꃅꇴꃅꏢꇁ:ꀊꄶꁨꇐꐥꏠꌠꌎꁏꌠꈝꃀꇬꉜꄉꄊꇪꃅꍩꀒꅥꑟ!ꋍꉔꀉꄂꃅ,ꋋꆹꊿꇱꌌꎲꊐ、ꆼꍅ、ꁒꐀꌠꐥꐨꉆꈉꇬꄉꀱꐛꐈꌊꉈꈽꌠꅿꇬꂿꂴꅑꂶꌠꐛ,ꃅꋊꅿꉁꌺꂵꂷꐛꇬꅞ。ꀊꋨꄮꇬꆹꋌꋍꃢꉪꀋꀽꃅꅋꒃꈌꊐꀋꇊꌦ,ꏣꒃꆹꅑꀋꇊꌦꀐꌠ,ꄚꀋꃉꆏꋍꇅꀉꄂꃅ,ꋋꆹꑡꀕꑌꉪꀽꏢꀽꌐꃲ,ꊨꏦꊫꂫꃰꇌꆹꊫꇵꏦꍠꌟꃅꎔꇫꎍ,ꋋꆹꈍꃅꑌꄩꆹꃅꃴꈨ,ꀏꆹꅉꃴꈨꌠꌤꐘꃅꅐꎼꇁꄎꌠꉬ。
   ꀀꁁꊿꀋꐥ,ꃅꁁꄂꀋꅑ。ꁨꇐꐥꏠꌠꌋꆀꁨꇐꐥꏠꌠꅿꌍꆽꁏꌠꈝꃀꏭꌌꉉꇁꇬꆹ,ꋋꆹꀋꃉꆏꈍꃅꀕꏾꆏꈍꃅꀕꀐꌠꉬꑴꂸ?ꄿꀐ,ꈀꄸꂷꉠꇬꎲꊐꋺꌠꉬꄿꂿ、ꆼꍅꋺꌠꉬꄿꂿ、ꁒꐀꋺꌠꉬꄿꂿ……ꀋꃉꆏꄝꇬꏆꀋꉆꃅꌌꄉꎼꏾꑳꀠꑳꌐ!ꇯꍝꃅꉌꊭꅐꀱꉌꊭꉦꃀꍣꌠꌡꃅꂵꏽꑳꀠꑳꇫꎭꌐ!ꋋꈨꐛꅹꃅ,ꋋꆹꊋꇨꃅꏦꂿꏦꅍꀋꐥꃅꑠꋍꃢꃄꌦꀐ,ꃅꌊꊋꐛꄉꀑꊌꑊꊌ,ꂓꊌꌗꊌ,ꉈꑴꆏꉆꈉꑌꊌꀐ。ꇁꌊꑤꍰꇓꈓꋋꂷꇬꑟꇁꄷꆏ,ꋋꆹꀅꌳꌺꃅꊼꇅꀉꄂꊨꏦꄐꅍꄛꑣꌠꀦꌠꉬ。ꂚꄏꂶꌠꆹ,ꋋꆹꂴꆽꆹꀊꅰꃅꇫꌂꏷꈌꀕꑠꈨꀋꉬ。ꑤꍰꇓꈓꑟꇁꇬꆹ,ꋋꆹꂚꄏꇬꊼꇅꇇꀤꑞꉂꃅꇰꉪꋻꌠꉬ。ꑍꄜꄯꒉꇬꆹꅉꀕꃅ“ꀬꅑꃅꌅꈌꌭꀨꇬꂶꌠꌌꁌꄝ”ꃅꀋꅑꄷꌠꅀ?ꋋꆹꉪꃅꉪꄉꇬꆹ,ꄚꇬꄉꃅꌟꀧꑠꂷꃅꏢꉪꌠ,ꄚꄉꒊꌋꀕꃅꋍꊨꏦꀃꅉꋋꂷꆹꌳꈄꀬꅑꌠꀉꄂꀋꉬꃅ,ꉈꑴꆏꌳꉔꁈꏂꁈꇭꑌꇮꌠꌧꇐꌌꊼꇅꌧꀽꏢꉪꌠꉬ。
   ꂚꄏꅿ“ꌕꁏꀕꌠꉉꐨꃅꐨ”ꈧꌠꋒꄷꌦꆏ,ꋍꉌꂵꀊꅰꃅꀉꒉꀡꃱꃅꐙꇁ。ꀉꒉꃅꑭꁗꍔꄉꀻꎆꄮꇬ,ꋋꆹꄇꈜꑍꋮꌐꒉꁿꌩꈍꑋꆹꊪꄉꑴꇬ,ꄚꋋꆏꅑꑘꆹꈍꑋꐥꉆꂯꆏ?ꉈꑴꉉꌦꇬꆏ,ꋋꆹꃅꄷꇬꇁꑎ,ꀋꃋꀃꑍꆹꈐꄡꇗꃶꍋꀯꇬꀨꇬꍔꊈꂶꌠꋋꄻꄉꑴꌦ,ꋌꂶꌠꂴꆽꆏꌌꁌꄝ,ꊂꆏꌌꊛꄉꆼꋏꇨꁠ,ꀋꃋꊂ“ꌕꑵꏓꐮꐊ”ꌠꃅꄮꇬꆏ,ꑤꋋꂷꃅꑆꇂꃴꆹ,ꋋꇱꆼꋏꋍꇇꇬꊐꄉꌐꌠꀋꉬꄷꌠꅀ?ꊂꆏ,ꂚꄏꅿ“ꁨꇐꐥꏠꌠꐥꐨꐥꄷ”ꁁꌠꏯꁱꇐꌬꇐꈨꎹꊌꋺꄮꇬꆏ,ꋍꉌꂵꂶꌠꆹꊰꃄꐬꉱꀋꅑꑠꂷꇬꃹꇈꀱꇁꌠꀋꏭ,ꀊꅰꃅꇨꇅꃃꌦꀐ。ꋍꉌꂵꇬꊼꇅꈏꈐꃅꉘꀋꇉꃅꊿꇿꌠꆏ,ꋌꌌꊭꄎꄉꅥꂯꌠꀾꋋꁬꆹꎭꈐꂄꄉꅥꎼꀋꒉꌦꅊꇈ;ꑠꆹꀋꉬꅊꇈꑲꆏ,ꇯꍝꃅꐡꈥꄉꀨꎹꆽꃴꄻꂠꐯꇯꇬꆹꊋꋠꀐ。
   ꑸꆀꌌꉪꇁꇬꋍꅿꉂꏣꉂꑟꆹꊿꈩꊿꊎꅞꀐ。ꑠꐛꅹ,ꋋꆹꎲꄏꑊꏦ、ꇨꃃꇫꊰꌠꀋꑴꃅ,ꊨꏦꑭꄑꄉꌕꑍꌕꉖꊨꀖꃀꀉꒉꋋꂷꇬꊥꇬꇹꄣ。ꄚꊼꇅꐜꅖꌠꆏꃅꐛꃅꄏꀕ,ꈬꑍꈫꄅꀕ,ꉘꃀꄹꉇꇯꆐꌌꏭꄂꄉꊨꀖꃀꀉꒉꋋꂷꆹꀊꅰꋍꑵꃅꑌꀋꐛ。ꄚ,ꃅꐛꃅꄡꆹꈍꃅꑌꁨꇐꀋꐥꇝꂱꁆꌠꏮꄉꎑꎍꇬꎷ,ꋋꉌꐒꇁꎭꌊꉌꂵꌦꆈꇓꇅꌠꇬꆏ,ꃄꑆꉈꄅꅇꃅꀋꇿꌠꇫꅐꇁꅊꇈ,ꀛꐂꑵꉙꅉꇬꌤꃅꊿꈧꌠꆹꉘꀋꇉꃅꇬꀋꇴꃅꄚꅐꇁ,ꋋꆹꌌꇁꋍꅿꍔꍞꐥꐨꐥꍂꌋꆀꉌꌤꈥꇤꀕꌠꉌꃀꇬꄉꉉꇁꇬꆹ,ꋋꆹꑋꊂꌕꆪꁬꌺꂶꉐꇁꉚꌠꏮꀋꋋꃅꇬꈇꐯꇬꈇꌠꉬꅊꇈ。
   ꑸꆀꂶꌠꀂꏾꎎꄉꏮ《ꂛꊨꅫꃀꋓꄉꃅꏀꀖ》ꂶꌠꇬꐋꀨꀉꆹꂶꌠꊼꇅꉜꇈ,ꊁꆏꋌꀱꑓꑟꉈꀋꈻꃅꏭꂚꄏꅿꈁꑓꆈꏸꀕꂶꌠꇬꉜꎍ。
   “ꍑꀐ,ꆏꊼꇅꉉꉏ,ꄗꌦꆀꑼꂶꌠꊿꈢꏦꑳꂶꌠꇬꀀꄮꇬꉇꑴꃄꄟꑽꄟꑞꈨꐥꀋ?”
   “ꑡꃄꄟꑽꄟꄜꀋ?”ꂚꄏꂶꌠꀍꃈꀱꆽꃅꀱꉈꑴꅲ。
   “ꐛꊰꌠꃄꄟꑽꄟꉬꄷꌠꀋꂸ!”
   “ꉢꋋꅉꀋꐚ,ꀊꅰꃅꉢꋋꐝꀋꉅꌠꉬꑴ。”
   ꀋꇊꇬꆏꉌꅧꑓꇤꌠꋊꇤꅐꇁꂿꄷꌠꀋꏮ,ꂚꄏꂶꌠꆹꀂꏾꇯꋌꇱꎎꀉꏯꁁꌠꏯꉜꎍ。ꃮꂱꎼꂶꌠꆹꋌꇅꃅꊜꋽꄮꋋꇅꇬꉜꄉ,ꑭꁘꋋꇱꐕꎼꆹꇈ,ꀊꄶꊖꁍꇬꅑꎍꌠꄆꂷꇭꏡꌠꋋꇱꒃꇇꈐꊐꄉ,ꊒꆽꀕꃅꋋꇱꄔꂚꄏꅿꈁꑓꇬꋦꎌ。ꂚꄏꆹꋌꐛꋍꃅꐙꃅꇇꎇꌊꄆꂷꇭꐍꌬꀕꈧꌠꇬꄡꁿꅷꐺ。
   “ꑡꃅꌠꉬ,ꁤꇅꀕꌠꂿꇬꏷꏦꃨꆰꅀꄷ?”ꑸꆀꂶꌠꆹꇫꌎꇬꑻꇬꃝꎭꏭꃅꉉꅷꐺ。
   “ꀋꉬ,ꋋꆹꁤꇅꀕꌠꀋꉬ,ꋋꆹꉘꁮꅿꁈꍈ。”ꂚꄏꂶꌠꇗꄃꐆꃅꄉꉉ。
   “ꂵꇖꀕꀐ,ꆏꉉꌊꈍꃅꇣꋲꇈꈻꇐꀉꇨꀒ。”ꀊꄶꑫꑵꊿꀊꋨꂷꆹꀋꉪꀋꈾꃅꈐꏭꃹꇁꇈꉉꇬ,“ꉡꆹꅽꇬꊼꇅꅲꂿ,ꑠꅹ,ꉘꁮꆹꈍꄮꇬꆏꁈꅑꇁꌠꉬ?”
   “ꋋꆹꈆꑪꌧꃀꈧꌠꅿꊨꇽꅇꉬ。”
   “ꅽ‘ꉘꁮꁈ’ꋋꂷꆹ,ꈍꃅꑌꈆꑪꊨꇽꅇꀉꄂꀋꉬꋭ?”ꉉꑌꃅꄉꄮꇬꆏ,ꀊꄶꑫꑵꊿꀊꋨꂷꆹꃚꈢꏸꂶꌠꋋꇱꁉꄉ,ꊭꄎꄉꃚꈢꂿꄷꐺ。
   “ꉏꑴ,ꆍꊇꍯꊂꍯꀜꉅꌦꀑꅀ!”ꂚꄏꊼꇅꌋꐚꇁꀐ。
   ꃚꈢꏸꂶꌠꁌꍻꆏꁌꍻꄹꂿꌦꀐ。ꄚꐜꅖꌠꆏꇨꊸꇨꃅꆹꑽꐛꀋꐛꃲ,ꑫꑵꊿꂶꌠꆹꀋꃉꌌꉉꌠꅇꈧꌠꆹꃚꈢꇬꊐꀋꄉꃅ,ꈬꑍꈬꄅꀕꃅꀋꅞꉖꈊꃀꂚꄏꀀꑌꇴꀋꇎꄉꃶꏈꂿꏈꃅꏈꌠꅇꈧꌠꄉꋋꇱꃑꎼꇁꌐ:
   ꉢꋊꇠꉜꇬ,ꄗꌦꆀꑼꆹꐋꁏꐚꐙꁧꀐ。
   ꂚꄏꋋꇷꋍꃢꇬꉆꄉꀐ,ꄚꄡꇗꋋꇅꃅꋋꉪꐙꇁ,ꋋꆹꋀꊇꉈꀕꃅꋍꅿꅇꂷꈧꌠꉅꌊ,ꀑꀋꐊꑭꀋꇱꃅꄉꃚꈢꄉꊛꄀꐯꇯꄉꌠꉬꅊꇈ。ꄚꄉꂚꄏꆹꃃꀋꎺꃅꀥꌊꁱꄜꀊꋨꂷꏭꉜꄉꀥꒉꀐ。ꑸꆀꂶꌠꑌꋋꇅꃅꇇꋌꎇꄉ,ꂚꄏꋌꇱꌭꇯꏢꀕꃅꎌ,ꄷꀋꁧꇈꆏꆺꒉꄇꒉꐆꃅꂚꄏꇬꁒꐀꄉꉉꇬ:
   “ꑎꀐ,ꀋꃉꑡꑌꑎꇨꀐ。ꆏꉉꎼꇁꌠꅇꂷꀊꋨꈨꆹ,ꉪꊇꌌꀁꑌꄷꇬꑌ,ꊰꃢꐯꀋꇁꃅꏮꈢꄉꌞꌊꍏꑷꁱꀕꀉꒉꃅꇝꂱꌤꃅꅉꌋꆀꌕꂽꌤꃅꅉꇫꎭꀐ。ꀋꄹꄷꆎꆹꇬꉌꃹꀐꇬ,ꉪꊇꆹꃚꈢꃚꈻꏣꂶꆹꄕꌞꆏꁳꇬꑌꄡꇗꌭꀋꄿꌠꉬ。”
   “ꌍꁏꌊꃅꌠ!ꌍꁏꌊꃅꌠ!ꌍꁏꌊꃅꌠ!”
   ꂚꄏꇨꇅꃃꌊꐂꅷꇬꋨꐺ,ꉌꆐꅑꌠꌋꆀꇫꌂꏸꈌꀕꌠꄚꄉꇁꐮꄚꋲꌐ。ꄚꋍꃅꑴꇬ,ꋧꃅꇣꄧꋋꂷꇬꀉꁁꆹꀋꐥꅍꀋꐥꇈ,ꉌꆐꅑꌠꉃꄻꌠꁬꋌꆹꀋꐥꑵꉬꅊꇈ。ꊨꏦꑴꅉꆹꀋꋓꀋꉪꐛꅹ,ꄚꄉꈍꃅꑌꑛꉘꃴꇉꀕꌠꆹꊰꇁꄗꌦꆀꑼꇬꌸꎂꀕꀐ。ꋋꆹꃅꇁꁈꀋꊌ,ꀌꈓꍻꃅꌗꀉꄂꅐꀊꄶꀀꈤꁦꏢꇬꑌꎌ。
   ꑠꄮꇬꆏ,ꈊꋚꐙꌠꅿꉘꌒꐨꀕꃅꀕꄉꌐꀐ。ꑸꆀꂶꌠꅲꇬꐆꃅꏭꑫꑵꊿꂶꌠꇬꊼꇅꉜꇈ,ꈁꑓꇬꆹꀋꃉꌌꐙꌉꆳꑊꋌꊽꐬꆠꑵꌠꆹꋍꍈꑌꐜꀋꈨꀐ。ꑫꑵꊿꂶꌠꆹꇿꇴꀕꃅꑓꂭꋏꅷꐺ。ꑸꆀꂶꌠꆹꐝꉅꏭꃅꊼꇅꒉꇈ。ꑡꑌꋋꐝꉅꌐꀐ。
   ꈊꋚꐙꌠꌞꎭꌊꇁꂿ,ꉈꑴꋍꃢꃚꈢꏸꂶꌠꁉꄉꅲꌦꀐ。ꄚꈐꏭꆹꄡꇗꂚꄏꅿꊼꇅꃛꌞꇈꀉꇖꐆꃅꐙꌠꃚꋒ,ꅇꂷꅇꀨꈧꌠꐛꐈꌊꀉꁁꑵꐛꌦꀐ:
   “ꉡꆹꆿꃀꁡꇤꉂ。ꉡꆹꁏꐚꀋꂄꆈꒉꀕꌠ。ꀊꄶꌧꂓꏪꇬꃅꐪꑽꐪꈧꌠꆹ,ꉠꅿꉜꐪꋋꇱꋊꇽꋊꇠꅐꇁꀐ。”
   ꃚꈢꈧꌠꆹꋍꃢꀋꄿꑍꃢꌕꃢꃅꀱꒊꀱꇁꃅꌌꁉꃑꏿꇬꎷ,ꊿꌕꑻꌠꆹꑓꏣꑓꑟꉇꑴꀋꈻꃅꏭꂚꄏꅿꈁꑓꐛꐈꐨꇬꉜꎍꇬꎷ。
   ꀋꃋꋋꃢꆏ,ꂚꄏꆹꇨꇅꑌꀋꃃꀐ。ꋋꆹꀋꇊꇬꆏꎊꈬꂷꇁꊾꇱꈐꌊꁧꌠꌡ,ꊨꏦꑴꅉꊨꏦꅉꐚ,ꊨꏦꎊꈬꂷꇁꆹꈍꃅꄉꈐꍿꇱꈐꌊꁧ,ꄚꈐꍿꇱꈐꌊꁧꌠꎊꈬꂷꇁꈧꌠꆹ,ꀱꌊꃥꌋꄰꁵꀋꇁꂿꇐꏿꄮꇬꆏ,ꄡꇗꉌꂵꎍꅉꎍ、ꀀꄮꀀ、ꋠꄮꋠꃅꁦꉘꑾꌙꀕꀐ。ꀋꄹꄷꆘꅝꌋꀉꁁꂷꉬꇮꇬꆹ。ꋋꆹꈍꃅꑌꏁꍿꂶꌠꅿꉌꂵꑋꄟꌋꆀꈌꁯꑓꂷꑠꈍꃅꐙꂷꉬꌠ,ꋍꃢꌌꉪꈽꎥꃪꀐꌠꉬ,ꄷꀋꁧꇊꆏꏁꍿꂶꌠꆹꈍꃅꄉ,ꎆꃀꋋꀧꌌꌬꌠꍤꆗꁧꀐꌠꉬ。ꄚꀋꃋꋋꇅꇬꆏ,ꋍꂴꆽꉆꎍꌠꍔꍞꇇꃼꅑꊿꋋꁥꆹ,ꋋꌋꎼꇁꇬꋀꊇꆹꁍꎴꌠꌋꆀꀙꀋꐥꌠꀉꄂꉬꌐ。
   ꂚꄏꈁꑓꇬꑊꁏꌠꂿꇬꆏ,ꀍꃈꀱꆽꃅꑸꆀꂶꌠꋋꎼꉌꂵꎍꅉꀋꎍꑘꀋꒃꀙꇨꁠꀐ。ꑸꆀꆹꀋꉊꋍꃢꇬꂚꄏꅿꇿꌠ、ꐒꌠꑞꑌꋋꊌꂿꋺ,ꀊꅰꃅꂚꄏꅿꀀꑌꇴꄟꎺꇊꐝꄧꀕꃅꋋꎺꉌꂵꇬꊐꄉꑴꌦ。ꄚꀋꃋꂚꄏꈁꑓꐛꐨꋋꂷꆹ,ꋋꐥꍂꃅꇬꂿꀋꋻꑴꌦ,ꀊꅰꃅꋌꇬꉪꀽꇁꀋꄐ。ꄗꌦꆀꑼꆹꐋꁏꐚꐙꁧꌠꉬꑲꆏ,ꆎꆹꑡꉬꌠꉬ,ꆎꆹꋍꅿꊪꌺꉬꇬ,ꄚꈐꏮꅽꃆꅽꂮꀋꐥꄷꌠꅀ?ꋍꂷꒉꃹꆏꋍꏅꀇꐒꍀ,ꋋꆹꈜꅤꅔꇬꇁꄎꑴꌦꄷꌠꅀ?ꄷꀋꁧ,ꋋꆹꉈꑴꆏꆿꃀꁡꇤꅿꇇꆈꁆꌠꉬꄷꏚꍆꀐ,ꐩꋊꌋꆀꀋꃋꋋꄮꄻꐯꇯ,ꌦꑌꉌꆐꅑꀋꇮꌠꁨꇐꐥꈝꃀꍬꌠꌊꁏꋋꁥꆹꐥꍂꃅꄓꉀꉆꀋꄐꀐ。ꇯꍝꃅꌞꊿꏭꈁꎭꀕꇗꅉꃅꋭꌠꉬ,ꋋꏮꋍꏢꁮꇬꑫꑵꊿꂶꌠꊼꇅꉜꇈ,ꊼꇅꈌꌦꀕꃅꒊꒉꁖꇁ。ꌞꊿꆹꇯꍝꃅꏨꆉꃰꅉꐯ,ꂿꇐꌕꏳꐋꄩꎆ;ꆗꌺꐥꅉꐯ,ꌧꇐꌕꏳꐋꄩꎆꀊꋨꏠꉬ,ꀑꁮꅺꐳꌠꆹꑭꉔꇇꉔꀋꇮꅍꀋꐥ,ꀊꄶ“ꀂꏾꆦ”ꌠꇬꄉꉪꅷꃚꈢꃚꈻꏣꇬꄉ,ꏡꁈꏂꌠꃄꄟꑠꀋꌦꀋꌋꂵꇖꀕꇫꎍ。ꀊꑴ,“ꈉꐩ”ꋋꑵꆹꌕꐈꌕꉙꀕꇈꌕꁏꌕꍅꀕꑵꉬꑴꇆ!
   ꈊꋚꄌꌊꑟꇁꄮꇬꆏ,ꑸꆀꆹꀊꅰꃅꒊꒉꁖꇀꌦꀐ。
   ꁱꄜꇖꎏꄲꂶꌠꄩꋚꑌꉘꁇꁉꋋꀋꋠꉈꉩꀕꇫꎍ。ꎭꃃꃬꏿꇱꄉꌠ、ꇌꎸꅿꉘꌒꐨꀕꌠ、ꀋꆪꎸꎬꐚꌋꆀꋄꒉꉔꄉꌠꑠꀋꐊꅍꀋꐥ。ꉈꑴꆏꇭꍏꂼꄠꎧꏣꑌꐊ。ꑫꑵꊿꂶꌠꆹꎧꌕꍔꈈꇅꈄꇬꊐꄉꈭꐨꆏ,ꋍꍔꄌꌊꑸꆀꂴꆽꅞꄉ,ꉈꑴꋍꍔꄌꌊꂚꄏꁵꆸꑌꃅꉉꇬ:
   “ꅽꇬꑊꏦꀐꒉꄸꉬ,ꀑꑊꍈꇤꉪꁳꄉ,ꉪꊇꐯꇯ“ꈉꐩ”ꎁꃅꋍꇅꈄꅝꄷ!”
   ꂚꄏꆹꀋꎺꃅꇭꀧꏮꁏꌊꀉꁁꏯꉜꎍ,ꋋꆹꇯꍝꃅꑓꏭꋋꇬꉌꇬꑓꇬꌠꀋꆪꍔꂄꑐꀉꎴꋋꈨꈁꏾꃅꊿꇱꌌꑗꉘꍈ,ꋠꄜꇬꄉꑊꋌꋠꅍꐛꌠꉜꀋꀬ。
   ꑫꑵꊿꂶꌠꆹꉎꉐꃅꒊꒉꇬꆏ,ꋍꈂꀸꇬꎏꂷꄖꈧꌠꐎꏒꅍꊽꃨꆰꏸꈧꇁ。
   “ꑦꑸ,ꆏꊼꇅꄚꄉꌓꀖꉌꌒꊐꇁꉐ,ꅽꅿ‘ꀋꆪꎸꎭꐚꋄꒉꉔ’ꌠꆹ,ꈍꃅꄉꃅ、ꈍꃅꄉꏬꌠꉬꀋ!”
   “ꋋꈨꆹꂚꎼꏹꇬꈁꎭꀕꑲꆀꍑꌠꉬ。” ꑸꆀꂶꌠꆹꒃꇮꉉꇮꃅꇫꊂꐊꄉꉉꅷꐺ,“ꅽꃤꀊꄶꉈꄅꇩꏤꑝꑟꇂꄉꊙꌊꇁꌠꀋꆪꈧꌠꆹ,ꉪꎁꃅꅽꇬꊨꀖꀠꂘꌠꂷꊪꅳꍩꐛꌠꀉꄂꀋꉬꃅ,ꉈꑴꆏꉪꊇꈊꋚꀕꑌꉘꁇꁉꌠꑌꐛꌠꉬ。”
   “ꀋꆪꊰꂷꐯꇯꆍꊇꇱꇤꋠꇫꎭꌐꀑꌠꅀ?”ꂚꄏꋰꀋꄐꀐ。“ꋀꊇꆹꇩꏤꇢꊭꌫꎆꌌꍔꈹꌌꇁꌠꉬ,ꋋꆹꑤꑬꊂꆫꑘꄺꀱꌠꇬꁣꏙꐨꀉꒉꃅꐥꐘꉬ,ꆍꊇꑍꉆꇬꊐꀬꑴꅀ?!”
   “ꑡꀬꀋꀬꄜꀋ,ꋋꑌꈉꐩꉬ。”ꑫꑵꊿꂶꌠꑓꂭꋏꄉꉉꇬ,“ꀊꄶꅽꃤꉘꁮꇬꁈꂷꃅꀊꋨꇬꌡꃅ,ꉢꉪꇬꆹꉪꊇꑸꆀꐋꀨꅿꎺꁱꁰꇐꊱꌠꇬꆹ,ꀋꎪꃅꑠꃅꁱꇬꄀꄉꌠꉬ:ꑞꈎꑞꆪꑞꑍꄹꉇꑞꈚꇬꅉꃴꑳꁨꇬꄉ,ꂿꑘꊿꊢꀖꌊꇓꈓꇬꆹꌠ,ꁨꇐꐥꏠꌠꈝꃀꌍꁏꍬꌠꌋꆀꐋꁏꐚꐙꁧꌠꂚꄏꂶꌠꆹ,ꋍꃢꇬꊿꈀꄸ、ꈀꄸ、ꈀꄸꏤꌕꑻꂴꆽꄉ,ꄇꄜꋊꄉꇰꀋꃀꌠꏃꌋꏮꊨꀖꊂꀠꋺ,ꋋꉉꇬ‘ꉘꁮꑌꁈꂷꅑꃅꌠꆹꍔꍞꅿꊨꇽꅇ’。ꃶꐙꃅꇬꆹꀊꋨꄮꇬꆹꉆꐥꃅꃚꈢꉆꌠꉬꑴ,ꄚꃅꅍꎸꀋꊌꌠꆏ,ꂚꄏꂶꌠꆹꀉꐩꀋꀮꂷꌡꃅꐈꇨꋓꇨꄉ,ꋋꆹꋍꁁꏯꆏꉉ、ꋍꁁꏯꆏꃚꈢꏸꇑꐛꅹ,ꑠꅹ……”
   ꃙꃚꀋꅑꃅꈱꌠꑊꋌꉱꃀꋌꁥꂴꆽꄉꇬ,ꂚꄏꆹꇯꍝꃅꋍꇨꃃꌠꃆꄔꁙꌠꋰꄉꀋꄐꀐ。ꃮꂱꎼꂶꌠꆹꂚꄏꊿꅣꇁꏦꄉ,ꀋꎺꃅꆼꁠꎇꌊꑸꆀꁿꒉꇬꆏ,ꀋꋓꀋꉪꃅꂴꆽꇯꆐꆅꎓꆅꐡꆿꐛꊰꇁꂯꄉꌠ,ꁱꄜꇖꎐꄲꂶꌠꋋꇱꍑꆿꐛꉱꅐꀋꐥꀐ。ꄚꄉꄽꀻꑌꊰꃄꅉꇬꐷ、ꇅꈄꑌꊰꃄꅉꇬꐷꄉꋧꐛꃀꐛ,ꂷꇭꑌꐷꄉꄔꀋꉆꇫꎭ。ꅉꃴꑳꂶꌠꋋꇅꃅꑓꀋꂿꆈꋧꋪꇬꎍ,ꄆꄬꏡꌠꀉꄂꐎꌬꅍꎍ,ꄆꄬꁨꑭꆹꐎꌬꅍꇁꈁꏾꃅꈯꀥꏿꐺꌠꀉꉌꈧꌠꇬꌸꎍ。
   ꋋꇅꇬꆏ,ꉈꏭꊿꀥꈐꏭꃹꇁꌠꑭꁘꂾꃚꅡꊪꀕꃅꇫꈌꐙꇁ,ꌍꁏꊿꂷꌗꏂꁍꆏꁍꄹꀥꅉꃴꑳꇬꃹꇁ,ꌗꃀꌗꌺꐮꑘꀋꒃꃅꏮꑸꆀꇬꉜꄉꉉꇬ:
   “ꅇꄜ,ꅇꄜ……”
   ꂚꄏꉌꂵꊼꇅꐂꇈ,ꀑꃀꑓꉱꏂꀐ:ꊿꈔꆽꀠꀐ,ꀊꄸꀈꏦꌋꆀꎭꂵꊞꐂꑌꆹ,ꈍꃅꑌꀞꇁꐷ,ꈔꀋꑴꃅꂵꎭꈴꏳꄩ“ꇌꉻ”ꀊꋨꂷꇬꄉꋋꎸꆹꄉ,ꈍꃅꑌꌤꅐꀑꋭ!ꀊꑴ,ꆏꑡꐒꆏꑡꅐꇬꎷ,ꀋꇷꇂꇷꋠ,ꑾꐰꇑꑿꀋꐊ,ꑿꎭꑿꀋꅿ,ꈍꃅꑵꉬꀋꆾ!
   “ꅇꄜ,ꑸꆀꐋꀨꀋ,ꉪꊇꂴꆽ“ꇌꉻ”ꀊꋨꂷꇬꄉ,ꉈꋍꃢꌦꑌꉌꆐꀋꅑꌠꁨꇐꐥꌍꁏꈝꃀꍬꌠꂚꄏꅿꑽꃤꏢꌋꅝꌦꀐ……”
   “ꑡꉬ?ꉆꐥꃅꉉ!”ꑸꆀꂶꌠꋍꁁꏯꆏ,ꀜꈁꑓꇬꍀꎍꌠꎭꃃꒉꈧꌠꌩꑻꅷꐺ,ꋍꁁꏯꆏꉜꀋꂪꃅꀊꋨꁁꏯꅇꄜꌠꅲꅷꐺ。
   “ꀊꑴ,ꋍꇬꃅꉢꋋꉉꆎꇰꌐꀋꄐ,ꄚꇬꅑꎍꌐꀐ,ꆏꊼꇅꉜꉏ!”
   ꁱꂷꁵꇗꐛꆈꏪꀕꃅꅑꌐꌠꄯꒉꈍꑋꏾꄆꄬꁨꑭꇂꃴꐛꎍ。
   ꄏꄷꋍꇅꂿꇈ,ꂚꄏꉌꂵꎍꅉꎍꑘꒃꀐ:ꀊꄶꄯꒉꇬꅑꎍꀊꋨꈨꆹ,ꋍꅿꉌꃀꌦꐳ,ꋍꅿꇵꂷꉬ;ꀊꄶꄯꒉꇬꆹꂚꄏꎭꈴꏳꑳꄩ“ꇌꉻ”ꀊꋨꂷꇬꀀ,ꉆꅉꂥꆏꂿꅉꎴ、ꉪꇐꎴꌠꉪꐨꌋꆀꊌꐪꉬ:ꑡꈚꇬꈭꈜꆽꑐꇨ,ꌌꄉꏟꈯꃅꐆꄉꌌꀀꑳꀉꏀꋽꎔꑠꋉꄻ……ꄚꉎꋋꈨꉬꇮꌌꑤꊈꌤꀋꂿꑘꃅꒃꉈꄉꀞꄻꑲꆀꏓꂱꁧꎁꃅꌠꌗꌠꉬ。
   “ꂚꄏ!ꇯꍝꃅꉢꉪꇬꀋꑟ,ꋍꎴꉘꀋꇉ,ꆏ,ꆏ!……”ꑸꆀꇨꇅꃃꌊꎐꂷꈧꌠꇠꄹꐯꑝꐺ。ꋋꆹꂚꄏꇱꁱꄉꌠꄐꌐꄯꒉꈧꌠꂿꄉ,ꇨꇅꃃꌊꈁꑓꀉꃴꄸꉉꑎꆹ,ꋋꆹꄚꄯꒉꋌꈍꑋꏾꂚꄏꌊꌬꇮꌠꎁꃅꇨꇅꃃ,ꋍꃀꐞꏅꇁꄉꏾꃅꎌꄸꇬꄉꈜꀕꋭꋽꌠꉬ——ꎺꇊꐞꄧꀕꃅꑸꆀꎺꄉꑴꌦ,ꄯꒉꋋꈨꆹꌌꄉꂚꄏꁳꋌꌋꆀꀊꄶ“ꍑꂷꍑꒉ”ꌡꌠꌋꅪꀊꋨꂷꑊꃆꂮꁱꄸꄉꇤꂚꄏꁵꄉꌠꉬ,ꄚ,ꈬꑍꈫꄅꀕ,ꊯꊪꑍꄀꄃꃅꂚꄏꇱꌌ……
   ꂚꄏꆹꒊꒉꁖꀐ,ꂚꄏꆹ“ꑽꃤ”ꆈꒉꀕꑠꐘꃄꄏꐛꅹꃅꒊꒉꁖ……

              ꊁꊛ:ꉒꈌꈬꇬꉂꏣ(ꊰꉬ)http://yi.yizuren.com/plus/view.php?aid=132

ꇁꀦ: 《ꉒꈌꈬꇬꉂꏣ》 ꁰꄻꌠ:  |  ꄜꃑꌠ: beley ꌤꃅꅉ