ꂴꊛ：ꉒꈌꈬꇬꉂꏣ(ꊯꊪ)http://yi.yizuren.com/plus/view.php?aid=128
ꊯꑌ
ꋍꇬ“ꈐ”ꇁꂿꄷꌠꀊꄸꀈꏦꂶꌠꌋꆀꎭꂵꊞꐂꑋꆹ，ꇨꆰꇨꊸꃅꐂꌍꑓꉈꏭꈴꁧꌠꊌꂿꈭꐨꑲꆀ，ꂚꄏꂶꌠꆹꋍꅿ“ꇌꉻ”ꂶꌠꇬꄉꁖꇁ，ꋌꇁꌊꑸꆀꅿꌤꃅꅉꇬꑟ。
ꉻꌤꃅꂽꊣꌠꅿꃀꂶꌠꆹꈿꌐꊌꀋꂥꃅ，ꑳꅜꀜꈧꌠꌋꆀꀋꆪꃷꅍꈧꌠ，ꋋꇅꃅꊿꇱꌩꀃꈈꊂꆈꊐꀐ。ꃅꉘꃅꌗꇬꑳꃅꇴꎧꌗꌋꆀꎬꐚꋄꒉꇬꊎꁨꅿꑴꌦ。ꑸꆀꅿꁧꃚꑍꂷꌠꅪꃅꅩꍠꀕꇫꎍ，ꂽꀂꄁꈫꌠꋌꇔꇇꇬꏦꄉ，ꊨꏦꇭꀧꁯꇐꅑꂶꌠꆹ，ꎭꁁꀂꄁꀊꐎꈫꌠꈐꏭꄉꇿꇬꑌꌧꉆꄇꇖꀕꌐ，ꀊꅰꃅꋍꅿꉦꃀꇬ“ꌧꃰ”ꑍꂷꌠꂿꇬꆏ，ꁦꋠꂷꉬꄷꈧꌠꆏ，ꈍꃅꑌꉌꂵꂶꌠꈜꀕꐂꌐꌠꉬꀐꋭ。ꋌꀂꏾꊼꇅꈎꇈ，ꂚꄏꏮꌊꋍꂴꆽꄉꌠꉈꁠꅍꂶꌠꀂꏽꑌꆹꑌꃅꉉꇬ。
“ꈍꃅꐙ，ꀋꑍꊂꋌꑍꀕꇬꈊꃀꀀꌒꑌꌒꀄꂼꂻꌒꑴꀞ?”ꋌꀂꏾꊼꇅꎎꄉꒈꌦꀕꃅꏮꂚꄏꇬꉜꄉ，ꀋꉂꉁꋒꃅꈌꃈꉐꌒꃅꉉꅷꐺ。
“ꃀꅉꆐꀀꌒꑌꌒꇈꈜꀕꃅꀄꂼꑌꀊꅰꃅꂻꈜꌒꐯꌒꑴꍰ，ꌦꇁꌊꌺꐤꅉꇬꀋꏣ，ꋋꆹꆍꌤꌧꃪꃭꃅꀨꎹꆽꃴꋒꐯꋒꐛꅹꌠꉬ。”ꂚꄏꂶꌠꋋꇅꃅꇫꀋꏦꇫꀑꀋꉜꑊꀋꉜꃅꍅꄹꇫꅇꀱ。
ꑸꆀꂶꌠꆹꈍꃅꌠꉬꀋꐚ，ꀃꑍꆏꊿꋍꂷꐈꑍꂷꐛ，ꃀꅉꆐꀺꐯꀺꇈꀉꑳꍪꀺꇯꇬꀋꏣꃅꎍ，ꆿꏪꍔꋌꑊꂚꄏꄐꇈꋍꊨꏦꀃꅉꆏꒉꊸꍔꃝꌊꅝꐺ。
ꆏꉜꉐ，ꎼꏹꆹꆿꏪꅝ,ꉹꁌꏓꂱꆹꒉꊸꐍꊭꀕꌠꅝ，ꄡꇗꀨꎹꆽꃴꋭꌠꆏꈍꃅꑌꀨꎹꆽꃴꑲꆀꍑꌠꉬ。
ꂚꄏꆹꋍꈌꍬꄉꀋꉉꃅ，ꌙꈈꀕꃅꇓꆈꀋꃀꁱꐭꀋꇮꂷꀋꏮꅞꀊꄶꑌꎍꇬꎷ。ꐥꐨꀂꏽꎼꃅꃏꑽꇈꁧꀋꎴꇤꀋꌃꌠꑊꋌꃌꅪꋋꂷꆹ，ꀉꁁꆏꀋꇢꀋꋠꅍꀋꐥ，ꈜꀕꇈꌠꆗꇢꐘꌠꉬ，ꄚꑳ、ꎧꌋꆀꆿꏪꆏꃀꅉꆐꅥꌦꇬꑌꋍꁠꆧꅝꀋꅲꌠ。ꋍꅿꃮꀆꃛꁙꅑꏡꌠꆹꌌꀧꌋꃅꂿꄷꐛꅹ，ꋠꇐꅝꒉꑠꋌꇤꇫꎭꀬꌠꉬ，ꇯꍝꃅꀋꇨꄷꉉꀋꉆꌠ。
“ꆏꇬꊎꑡꑵꉪꇆ？”ꋌꂚꄏꏭꅲ。
“ꉢꉪꇬ，ꆎꆹꇯꍝꃅꇧꊋꑌꑴꍰ！””
“ꆿꏪꅝꌠꌷꀋꇮꑴꌦꌠꅀ?”ꋌꉿꀕꃅꒊꒉꁖꀐ，ꃶꐚꃅꉉꑲꆏ，ꉢꇬꌷꀋꇮꇫꌷꀋꇮꑴꌦꌠꆹꀉꑌꐯꀉꑌꃅꐥꑴꌦ，ꅺꌡꇬ，ꈍꃅꄉꊽꇬꆫꍰꂯ？”
“ꆎꆹꇯꍝꃅꁱꀋꋊꆺꀋꒉꂷꉬꀐꍰ！””
“ꅽꅿꄐꌐꉙꂘꂄꌠꉬꐛꅹꌠ，ꉠꉂꇂꅉꌠꑤꊇꎼꏹꀋ。”ꋋꆹꀅꌳꃅꊼꇅꑬꆏꈭꐨꆏ，ꈄꁨꌺꍈꇬꄉꄯꒉꏾꋌꀖꌊꎍꐽꃅꄻꂚꄏꂴꆽꄉ，“ꄚꈐꏭꌤꃆꈍꑋꏢ，ꉢꆎꉘꇉꌠꆏ，ꆏꑴꌠꉈꑴꋍꃢꌌꉠꏯꉙꂘꑟꉂꌠꉬ！”
ꋌꄓꀍꉀꉆꇈ，ꇇꋑꌠꒉꊸꅝꅍꂶꌠꄌꌊ，ꑳꈐꏭꄉꀱꒊꀱꇁꃅꏮꅷꐺ。ꒉꊸꅿꊸꌗꈧꌠꌋꆀꐛꎿꂷꇭꅿꃅꇴꃅꌗꈧꌠꐮꆽꁱꅷꐺꐛꅹ，ꑓꋪꋑꌠꋌꇱꂭꐯꇯꄉꇬꆏ，ꑓꊏꑓꂡꈧꌠꀊꅰꃅꁯꄸꐒꑆꀉꆈꏢꀋꏮꆈꃅꆈꏸꀕꇫꎍ。
ꑳꈐꏭꆏ，ꀋꉊꂴꑘꀋꋌꃅꁦꎆꌠꆹꉈꄉꈈꑌꅍꈍꑋꂷꀉꄂ。ꊿꀉꁁꈨꇬꀋꐥꐛꅹ，ꈁꇁꁦꉘꀕꇫꎍ。ꈍꄮꈍꄮꂾ，ꋋꌋꆀꂚꄏ，ꉈꑴꆏꄗꌦꆀꑼꏤꋋꈨꅿꑋꅉꉆꅉꆹ，ꀉꑳꌕꈎꌓꀖꈨꀋꏮ，ꀍꃈꀱꆽꃅꐮꏵꀠꀐꅊꇈ。“ꋍꃢꆏꀮꏂꊋ,ꋍꃢꆏꀭꆈꊋ”，ꋋꆹꑵꉙꑠꇬꑵꋻ，ꉜꅊꇈꂾꆏꀋꃋꐛꐪꃶꐚꌠꆹꋌꇱꄛꑣꅐꇁꀐꅊꇈ,ꄚꑫꑡꂷꇬꄉꑵꋺꌠꆹꋌꋋꀋꎺꇯꏢꀕꀐ。ꐩꋊꄮꈉꆹꉂꐪꉂꏣꄜꀋꇮꌠꋧꐈꏦꃤꉬꅊꇈ，ꄚꋧꐈꏦꃤꆹꈍꄮꑌꉂꏣꁨꇁꀋꉆꇬꎷꌠꉬ！ꋌꉪꇬ，ꀊꑴ，ꉡꆹꑍꇁꉚꋍꑍꌘꎴꉩꄉꇁꉚ，ꌋꇁꉚꀑꈑꑓꁴꇉꄉꇁꉚꌠꋋꄹꉇꑟꇁꀐ，ꊋꐛꌠꑊꋌꑱꃀꏡꌠꆹꄽꂫꆏꊰꇁꉠꇇꇬꃹꀐꃲ！
“ꈍꃅꐙ？ꄗꌦꆀꑼꅿꐩꋊꋋꊭꆹ，ꉢꉪꇬꆎꆹꇫꐝꉅꐯꐝꉅꌠꉬ。”ꋌꄓꀍꉀꉆꇈ，ꑓꋪꋑꌠꍻꉈꏭꁖꇁꄉꏽꃅꏮꂚꄏꅿꈁꑓꂶꌠꇬꉜꎍ。
“ꉢꋋꐝꀋꉅ。”
“ꑞꐛꅹꐝꀋꉅ，ꆍꊇꐯꇯꈢꏦꑳꋍꂷꇬꊐꄉꌠꀋꂸ。”
“ꄚꈐꏭꑡꌤꃆꈨꉉꄷꌠꉬ?”ꂚꄏꂶꌠꄯꒉꏽꌠꋌꇱꇵꑸꆀꁵꈭꐨꆏꉉꇬ：“ꋌꆹꈍꃅꄉꐛꐈꀋꉾꁧꌠꉬ？ꁮꐚꏭꑡꌤꃆꈨꄜꇲꅐꇁꀐꌠꉬ？ꅽꀂꏾꆼꇽꅽꀑꆊꐴꇵꅉꇬꄉꉢꅉꐚꇁꄷꌠꅀ？ꆏꄹꇬꉡꆹꇩꂱꄉꑊꋌꉱꃀꈧꌠꅿꃱꈿꌬꊿꉬꄷꌠꅀ？”
“ꑠꑲꆏ，ꆏꉜꇬ，ꄗꌦꆀꑼꆹꐛꐈꀋꉾꇁꑵꌠꉫꉬꇆ？”
“ꉢ？”ꂚꄏꂶꌠꅇꀨꋋꏢꋌꋒꀉꁁꎭꄉꉉꇬ，“ꅽꋋꈨꆹꉠꇬꍤꄻꌠꅀ，ꄗꌦꆀꑼꇬꍤꄻꌠꉬꀋ？ꉠꇬꆹꍤꌠꑲꆏ，ꆍꅿꏥꏦꇬꈴꇬꑋꑠꃅꀋꉆꌠꉬ，ꉢꉘꇉꌠꆹꏦꃤꇬꈴꄉꀞꄻꑲꆀꍑ；ꀋꄹꄷꄗꌦꆀꑼꇬꆹꍤꄻꌠꉬꑲꆏ，ꆎꆹꐥꋊꐥꍂꃅꑠꌅꈌꀋꐥꌠꉬ，ꉢꈍꃅꑌꂽꑼꄀꉈꏭꎭꁧꈧꌠꌋꆀꊼꇅꐮꂿꑲꆀꍑ。”
ꆿꏪꅝꅍꏡꌠ“ꍠ”ꄷꋍꇱꇵꁱꄜꇬꏶꇈ，ꇨꇅꃃꌊꆽꄿꊉꅪꃅꅩꇉꀕꀐ。ꄚꋋꇅꄷꈍꃅꋌꇱꋰꄉꄎꌠꉬꀋꐚ，ꑱꈐꄉꑭꁘꑍꁘꌘꁘꍔꇈꀅꌳꃅꌗꊏꈭꐨꆏ，ꌙꈈꀕꃅꋌꅞꉈꑌꅈꇬꑌꎍꇈ，ꈁꑓꇬꃃꈌꃃꑓꃆꄔꂱꍀꄓꈧꌠꑌꋋꇅꃅꐛꐈꌊꀱꑖꈈꀕꇫꈴꁦꌦꀐ。
“ꈍꃅꄉꌌꅽꏯꉉꂯꆏ？ꄗꌦꆀꑼꆹꅽꉣꑊꅿꏲꌋꀉꆹꂷꉬꀐ，ꅽꉣꑊꆹꊿꋌꎼꈬꑍꈬꄅꀕꃅꉪꇬꀋꑟꃅꐛꐈꐨꇬꈴꁧꄉ，ꃜꁏꌠꌤꃆꐘꌠꃅꄉꇬꑌ，ꋋꆹꂴꆽꊿꂂꀂꏾꌌꄔꇬ“ꀉꑷ”ꀋꄹꑵꌠꉬ，ꉢꉜꇬꉣꑊꆹꋍꇇꀤꄉꋌꁳꌤꃆꋋꐘꉜꌊꐝꉅꎻꂿ，ꋋꈨꒉꄸꃅꉘꇉꌠꆏ，ꆏꑴꌠꌤꃆꅿꃶꐚꐛꐪꉉꄻꅐꌠꉬꀐ。”
ꉉꌐꊂꆿꏪꅝꅍꏡꌠꉈꑴꋍꃢꋌꇱꒃꇇꇬꊐꄉꌊꐺꌦꀐ，ꅜꑌꇬꀋꅝꃅꈁꏾꃅꋌꄻꇇꇬꊐꄉꌌꈩꅷꐺ。ꅇꈐꏭꄜꇐꆹ，ꂚꄏꆏꀉꄻꀕꃅꋌꉪꐙꌠꉬ，ꄚꅻꀋꉬꃅꄡꇗꀂꏾꋌꇱꐕꌊꏮꑸꆀꈁꑓꇬꉜꎍꑴꌦ。“ꌕꑍꐯꀋꂿꇬꆏ，ꐛꐪꊽꐬꆠꃅꐛꐈꑵꉬꅉꅊꇈ，”ꑠꄷꀋꁧꃅꐎꊯꎖꈎꑋꈢꋒꐩꋊꇬꐊꁧꀐ！ꋋꆹꀊꅰꃅꐛꐈꌊꊿꋋꀋꌧꀐ，ꈁꑓꂶꌠꇤꉇꄉꈭꐨꆏ，ꑡꀕꑌꋌꇱꂁꆈꈬꀕꃅꎍꌐꀐ。
ꂚꄏꏮꋍꇬꉜꎍꌠ，ꋋꆹꋌꀕꀋꌋ。ꋍꅿꉪꏣꈘꀋꉆꇈꉪꌊꑞꅉꑟꀋꄐꃅꌾꀖꇬꎍꌠꉪꏡꌠꇬ，ꋋꇅꃅꉪꐪꇣꋲꂵꇖꀕꑠꏢꋌꉪꅐꇁ，ꀋꄹꄷꀊꋨꄹꈎꋌꌋꆀꂚꄏꑋꂱꑱꅉꐞꀋꁧꑵꉬꇮꇬ，ꀋꃉꋋꆹꈍꃅꄉꋍꑊꈯꄔꇬꌤꃆꈧꌠꀞꄻꂯ？ꋌꄂꉈꏭꏣꎼꑞꈴꁦꄮꇬ，ꌤꃆꋌꑵꀂꏽꆹ，ꀞꄻꐨꋍꑞꋍꑵꐯꀋꌡꌠꑠꀉꑌꃅꊝꋺ：ꏟꈯꀕꃅꄹꊨꑞꅉꁸꊨꄅꇫꎭꄷꌠꐥ；ꀊꅰꃅꀋꎪꃅꐮꉂꁧꄷꌠꐥ；ꈂꀸꆏꐮꐞꁧꃅꉉꇈꉌꂵꆏꄡꇗꐮꉂꑴꌦꄉ，ꈊꃀꑟꄷꆏꅉꀕꃅꂁꋍꈚꀀꇬꎷꑠꑌꐥ。ꉡꆹ，ꉡꆹꐛꐪꑟꑵꌠꌋꂯꆏ？ꋍꑓꋪꂭꐯꇯꄉꑍꁆꌠꁉꌊ“ꇝꂱꒃꉇꋒ，ꌜꍣꌌꀻꎆꄹꆷ”ꄷꍑꇬꄀꄉꌠꆿꏪꅝꅍꏡꌠꉜꐺꄮꇬꆏ，ꄧꀕꃅꋌꇫꋒꌥꇈꉈꑴꇫꋒꀋꌧꌠꑓꋪꋑꌠꌋꆀꊒꆽꀕꃅꇁꐮꋖ，ꉌꂵꂶꌠꆹꋍꈯꋌꀋꌅꃅꄏꃅꐂꇱꀋꏦ。ꆿꏪꅝꅍꏡꌠꉈꑴꋍꃢꋌꇤꇬꐓꄈꌦ，ꌋꅪꅿꊇꅉꑊꏦꀋꐕꑵꌠꇫꇤꅷꐺꐛꅹꄉ，ꀋꎺꃅꀂꏾꂶꌠꋍꇱꈎꄉ，ꑓꋪꋑꌠꏮꌊꀊꄶꑕꑅꎸꇬꎑꎍꌠꎭꁁꀂꄁꈫꌠꈐꏭꉜꇬꆏ，ꀊꅰꃅꀭꉂꅍꎍꇈꁦꋠꈧꌠꃅꇬꇢꐯꇬꇢꌠ“ꌧꃰ”ꑍꂷꌠꇬꉜꎍ。ꄚꋌꉈꑴꋍꃢꀂꏾꐕꄉꉜꌦꄮꇬꆏ，ꂚꄏꅿꑓꋪꑍꁆꌠꆹꏮꋍꇇꑍꁆꌠꇬꀉꄂꉜꎍꇈꌦ，ꀊꅰꃅꋍꅿꁯꇐꅑꐯꅑꀊꋨꈚꇬꆹ，ꀋꇊꇬꂚꄏꇬꉚꀋꏾꐯꀋꏾꌠꌡ。ꋌꏮꉈꑴꋍꃢꋍꅿꇇꑍꁆꌠꇬꉜꌦꇬꆏ，ꋋꇅꃅꈁꑓꀊꊸꇈꉌꂵꂶꌠꄏꄹꐂꇀꌦꀐ。ꋋꈨꐛꅹꃅꋋꆹꁮꎐꈨꑌꃅꉉꇬ:“ꄮꈉꇇꈯꋋꂷꆹ，ꀊꄶꃱꈿꌬꊿꀊꋨꈨꇇꇬꄉꒃꌊꇁꌠꉬ。ꈍꃅꉉꄿꂿꋋꆹꀊꋨꄹꈎꄗꌦꆀꑼꄖꉣꑊꁵꌠꉂꏣꉂꑟꊫꌐꉬꑴ，ꋋꍈꀉꄂꃅꄉꉉꇬꂯ，ꅽꉣꑊꆹꈍꃅꂄꃅꌠꌌꄷꀱꉆꂯ？ꀊꅰꃅꋍꇇꀤꄉꋍꌤꃆꈧꌠꌧꐝꉅꌐꄡꑟꌠꉬꀐ。”
“ꅽꑡꌤꃆꈨꌌꄜꐝꉅꂿꄷꌠꄜꇆ？”
“ꁱꀊꄶꄯꒉꇬꄀꄉꀊꋨꈨꄜ，ꉡꆹꆎꉘꇉꌠꆏ，ꆏꑴꌠꉥꑣꃅꊼꇅꉪꉚꅊꇈ。”
“ꉢꑡꑌꉪꄻꀋꅐꀐ！”ꂚꄏꂶꌠꉈꑌꅍꂶꌠꋌꇱꆷꊁꄉꇈꄓꇬꉆꄉꉉꇬ，“ꄗꌦꆀꑼꆹꌍꆽꁏꁥꌠꉬꄿꂿ，ꀋꉬꄿꂿ，ꆏꋍꇬꍤꄻꌠꌅꈌꑱꅳꁖꒊꍈꂯꀋꐥꌠꉬ！”
ꑸꆀꆹꂚꄏꏭꅞꀏꑌꄷꉉꈭꐨꆏ，ꉈꑴꋍꃢꀉꏀꃅꐛꎿꂷꇭꀉꁁꏢꄻꇬꄔꄈꌦꀐ。ꌊꁁꈊꃀꑊꋌꉱꃀꃅꆳꈧꌠꑠ，ꌍꑓꉈꏭꄉꀋꆏꃅꃀꈿꀛꐂꑵꉙꅷꐺꇬꎷ。ꋋꆹꇭꀧꊼꇅꇙꇈ，ꈁꑓꁬꌠꋌꇱꂁꂷꇭꊂꆈꌐꒉꇬꊐꄉ，ꉈꑴꇿꇬꄉꀊꐎꇈꁬꃨꀉꅪꈪꇬꄀꄉꌠꆽꈜꁁꂷꋌꇱꉅꌊꇵꆹꇬꆼꎰꄉꀋꐚ，ꇇꊃꆈꇇꊭꑍꂷꌠꆹꋌꇤꉈꑌꅍꇬꉈꄉꇫꑌ，ꌗꈧꌠꀉꄂ“ꁍ——ꁍ”ꃅꇫꈴꇫꈌꐚ，ꀋꇊꇬꈍꀞꐵꑷꐯꐵꑷꑠꂷꇬꊎꃅꊸꃪꀀꑌꇴꌠꌡ。
ꋋꆹꀊꅰꃀꀋꌠꑴꌦꌠꈁꑓꁬꉬꐛꅹ，ꂁꂷꇭꊂꆈꌐꒉꇂꃴꊐꄉꇬꆏꀊꅰꃅꀉꏀꌠꑌꌡ。ꋍꅿꑊꋌꉌꂵꂶꌠꇬꆹꑡꀕꉪꈽꌠꉬꂯꆏ？ꂚꄏꂶꌠꀋꋓꀋꉪꃅꏮꋍꇬꈍꑌꃢꉜꇬꆏ，ꋍꅿꉌꂵꂶꌠꇬꌤꃆꇣꋲꊿꋋꀋꌧꂵꇖꀕꃅꐙꌠꀅꌳꃅꋌꌌꉪꅐꇁꀐ。ꋋꆏꉍꈄꁬꉬꇬꑌꋒꀋꄿꌠꉬ，ꑸꆀꆹꉍꈄꋌꁬꌌꄗꌦꆀꑼꇬꎺꇁꌠ，ꉈꑴꆏꌌꂚꄏꇬꑌꎺꇁꌠꉬꋭ。ꄗꌦꆀꑼꅿꐩꋊꃆꂮꆹ，ꂚꄏꇬꐝꉅꐯꐝꉅ，ꄚꋋꆹꈍꑋꈓꆏꂚꄏꆹꀊꅰꇫꅉꀋꐚꀐ。ꀋꉊꉻꄑꀊꉗꀋꐛꌥꄮꇬ，ꂚꄏꆹꑡꀕꉬꌠꋌꇬꀋꌧꐛꅹ，ꅇꊪꄯꒉꈍꑋꃢꁱꌊꄗꌦꆀꑼꁵꒉꋺ，ꉘꇉꌠꆏꌟꒉꀉꆹꋋꂷꋍꇬꊼꇅꄐꌐꌠꌋꆀꇇꀤꑟꉂꌠꉬ。ꄚ，ꀊꉗꐯꀉꉘꏢꐛꇬꉌꌤꅇꇬꀋꈨꆘꅝ。ꊁꆏ，ꃶꍋꀯꉈꏭꏣꎼꑞꈴꁧꌠꐋꀨꂷꀱꇁꄮꆏ，ꄯꒉꀄꊭꑠꍈꌊꂚꄏꁵꇁ，ꀊꄶꈐꏭꆹꑠꃅꁱꇬꄀꄉ：“ꏟꈯꃅꌗꊏꄉ，ꅱꈯꃅꋰꄉꅊꇈ！”ꋋꆹꋍꈓꂾꌤꐘꉬꀐ。ꋍꅿꄜꐪꀊꋨꈨꆹ，ꈍꃅꄉꀊꄶꊿꋌꎼꑾꀑꃶꂷꀋꏯ，ꀑꃶꑓꈹꊐꌠꈎꆪꀊꋨꊭꈳꅐꂯꌠꄜꏭꐛ，ꐯꇯꋓꄉ“ꐏꌉꐋꀨ”ꃅꑠꆏꀋꄜꌠꉬ。ꋌꌋꆀꄗꌦꆀꑼꑊꐯꇯꈢꑷꄠꏦꑳꇬꊐꄉꀊꋨꊭꇬ，ꄮꈉꆹꀊꅰꀊꀋꎴ。ꊁꇩꂱꄉꌍꆽꁏꁥꌠꆏꄗꌦꆀꑼꆹ，ꏮꆱꄉꌉꁥꌠꇬꄐꍈꂷꇬꄉꒆꅷꍤꌋꂽꆃꍈꂷꇬꑟꌠ，ꁦꋠꀉꇨꑠꂷꉬꌠꋀꅉꐚꈭꐨꆏ，ꋋꇅꃅꄗꌦꆀꑼꂶꌠꆹ，ꏭꆦꌊꀉꁁꈚꇬꊐꇫꎭꀐ。ꌤꃆꋋꈨꆹ，ꋌꌌꎀꍹꏭꉉꋺꀐ，ꄗꌦꆀꑼꊨꏦꀃꅉꑌꉉꋺ。ꀋꃉꀃꑍꆏ，ꌤꃆꀋꉬꌠꌤꃆꇫꅐꇁꀐ，ꉈꑴꆏꃅꄵꀕꃅꑸꆀꌋꆀꇁꐮꊝꌦꐛꅹ，ꌤꃆꆹꃀꅉꀊꅰꊋꋠꇁꏭꐛ。ꄚꑠꃅꑴꇬꀋꏦ，ꄯꁯꊒꀕꌌꌠꈌꇫꌂꑵꉬꒉꄸ，ꌩꁧꊒꀕꋥꆏꁰꒌꌐꒉꇂꎎꌠꆹꀋꏦꑽꀋꐥ，ꂚꄏꅿꉌꂵꆹꄡꇗꎌꅉꎍꑘꒃꑵꌠꉬꑴꌦ。ꀋꃋꋋꇅꇬ，ꂚꄏꀊꅰꃅꇫꊂꁠꉌꐒꌠꆏ，ꄡꇗꀊꄸꀈꏦꌋꆀꎭꂵꊞꐂꑋꅿꃄꄟꑽꄟꈧꌠꉬ。
ꀊꄸꀈꏦꆹꉉꇫꑟꆏꃅꇫꑟꄎꌠꆈꌠꅫꃀꌱꃀꂷꉬ。ꀊꅰꃅꀕꃴꐚꇁꑌꀋꏦ、ꃅꅉꐡꁧꑌꀋꏦꌠꎭꂵꊞꐂꂶꌠꑌꇫꐊꐺꑴꌦ！ꄾꌦꋩꃅꌤꀋꅐꆿꀋꅐꇬꆏꑡꑌꋍꉎꀋꐥꃅꃪꌠ。ꋋꆹꋍꑊꅿꀑꇬꋬꂻꌤꃆꐘꌠꇬꉌꐒ，ꉈꑴꆏꆿꃀꁡꇤꋬꀕꂻꀕꃆꂮꑌꉌꐒꐯꉌꐒ。ꆿꃀꁡꇤꆹꊨꏦꄿꐨꃅ“ꄈꍛꀯ”ꂷꑌꋉꐛꄉꀐ，ꉈꑴꊭꄎꄉꇬ“ꑤꊈ”ꂷꑌꄻꐛꑴꌦꌠꉬꄷ，ꌤꃆꆹꃄꈌꄐꃅꉘꁮꇬꏣꄀ、ꆿꃀꇬꊀꄅꆹꌠꀋꏮꀋꇮꆺꌋꀕꇫꎍꀐ，ꋋꈨꇬꄉꉜꅷꇁꇬ，ꆿꃀꁡꇤꆹꈍꃅꑌꄇꇉꇷꌡꐯꌡ。ꄇꇉꋋꇷꆹꉜꉚꋯꀋꐛꌠꉒꎿꄩꄉꃅꍜꁻꌐꂷꇬꀋꐛꃅꄁꃰꐺ，ꈜꍜꏃꌠꏃꌋꑌꀋꊌꀋꂿ，ꈜꌐꂷꇭꑌꊌꀋꂿ，ꈍꄮꈋꄮꆏꎾꇓꇬꑌꋖꉆ、ꒉꉱꑘꑌꉆ，ꇉꀂꏽꊿꈧꌠꀉꄂꐬꆠꃰꈻꌠꌋꆀꏸꀸꆽꀸꐨꆹ，ꈍꃅꑌꊨꏦꃤꄩꑘꀋꋌꃅꁦꎆꋭ。ꂚꄏꂶꌠꉈꑌꅍꂶꌠꋌꌌꊼꇅꇙꈩꇈ，ꋋꇅꃅꂁꀊꄶꂷꇭꊂꆈꇬꀀꎍꄉꊿꋌꁭꌠꑓꋪꀊꋨꋒꂾꁈꅷꐺ，ꄚꑸꆀꂶꌠꆹꋋꇅꇬꆏꉈꑌꅍꇬꄉꋌꄓꀍꉀꉆꀐ。
“ꇅꂚ，ꆏꑡꑵꉪꅷꐺꇆ？”
ꐮꐞꀊꉗꏢꐛꄉꐮꂿꇁꇬ，ꂚꄏꆹꉘꃀꃢꌠꑸꆀꑠꃅꋍꇬꉉꌠꈨꇬꆏ，ꇭꀧꋌꎎꄉꏮꑸꆀꇬꊼꇅꉜ，ꄚꁱꋍꇬꑋꀋꐭꌗꋍꇬꑌꀋꅐ。
“ꉡꆹꊼꇅꅉꐚꏾ，ꇅꂚꀋ，ꆏꇬꊎꑡꑵꉪꅷꐺꌠꉬ？”
“ꉢꀋꃋꇬꊎꉪꌠꆹ，ꆏꈍꃅꑌꇫꉌꀋꃹꑓꀋꐛꌠꉬ。”
“ꀍꃈꀱꆽ，ꉡꆹꃀꅉꉌꌤꐯꉌꌤ，ꑓꀖꐯꑓꀖꌠꉬ。”
“ꉡꆹꇬꊎꆿꃀꁡꇤꉪꅷꐺꇆ。”
“ꀊꑿꀕ，ꃪꐯꃪ，ꉢꑞꃅꇬꉌꀋꌤꑓꀋꀖꂯꆏ？ꉢꃀꅉꆐꋍꉎꀋꐥꃅꉌꌤꑓꀖꌠꉬꀐꍰ！”ꑸꆀꒊꒉꀐ，ꀅꌳꃅꇭꀧꂶꌠꌌꊼꇅꇙꈩꅷꐺ，“ꆿꃀꁡꇤꆹꂱꀘꆃꍈꂷꀋꐥꅀ？ꄚꀊꄶꌧꂓꏪꀊꋨꂷꇬ，ꉡꆹꑭꐓꀋꐳꃅꋍꁘꆹꑎꐛꅹ，ꉢꋋꊌꀋꂿꇫꎭꇆ。”
“ꋋꆹꅽꎭꈐꂄꌠꒉꄸꉬ。ꑠꆹꀋꉬꑲꆏ，ꅽꀂꏾꂶꌠꈍꄮꇯꆐꊿꇱꇽꆿꃀꎮꈁꃅꇫꎭꀐꌠꉬ。”
“ꆎꆹꑠꃅꉠꏯꒊꅍꀖꇬ，ꉠꇨꇅꋍꍈꂯꀋꃃ；ꉢꉌꌤꑓꀖꇫꅉꐚꏾꐯꏾꌠꆏ，ꆎꆹꑞꐛꅹꃅꋋꐊꆿꃀꁡꇤꐥꀋꁧꌠꉬ？ꀋꃋꋋꇅꇬ，ꌌꅽꏯꁆꄉꉉꇁꇬ，ꀊꄶꇬꆹꌦꌺꌊꌺꐥꌒꁍꑠꈚꉬꀋꇊ，ꈍꃅꀉꁘꄷꇬꑌꀊꄶꆹꉌꌦꑓꉘꍇꌠꏭꀋꋌꃅꉈꈽꐘꌠꂾꊼꇅꁈꐺꉆꌠꉬ。”
ꂚꄏꒊꁖꇁ，ꈁꑓꇬꄉꀋꆏꃅꐂꅷꐺ。ꀉꅼꌧꊋꌠꑓꋪꋑꌠꈐꏭ，ꈨꑭꏷꌬꀕꑍꁙꇬꀀꎍ，ꀋꇊꇬꁮꐚꇬꄙꃅꄙꌠꑌꌡ，ꉈꑴꆏꋍꇬꋓꎭꌉꎭꇁꌠꑌꌡ。
“ꑠꃅꑲꆏ，ꉡꆹꇇꀉꆈꀋꂄꆈꒉꀕꁆꌠꉬꀐꌠ。ꆍꊇꁱꎼꇁꌠꁱꂷꀉꒉꄊꊫꀨꈧꌠꆏ，ꌌꑠꃅꄉꉉꉆꀐꌠꉬ——ꁻꌐꉜꄉꁻ。”
ꑸꆀꆹꂚꄏꅿꑓꋪꋑꌠꋌꇱꐵꇫꎭ，ꄷꀋꁧꂚꄏꅿꅇꂷꈧꌠꑌꋋꇱꐵꀉꁁꎭꄉꀅꌳꃅꉉꇬ：“ꍑꑴꇆ，ꉣꑊꆿꃀꁡꇤꃆꂮꄡꉉꌶꂿ。ꉢꆎꉘꇉꌠꆹꆏꑴꌠꀉꁁꑠꍈꉉꅊꇈ。”
“ꆎꌅꇆ，ꅽꄿꐨ。”
“ꉡꆹꆏꁳꊼꇅꇠꎻꏢꉪ，ꉢꇬꊎꑡꑵꉪꉏ？”
“ꆏꀉꁁꑞꈨꉪꑴꌦꂯ？”ꂚꄏꂶꌠꃼꏯꎎꄉꉉꇬ，“ꆍꊇꉪꌠꆹ，ꑡꑌꉌꂵꉪꅉꇬꑟꌐꀐ，ꇯꍝꃅꐰꇑꎭꈐꁦꌺꒊꌠꉬ。ꄈꌋꆀꍔꃙꎆꏣꁱꀕꑠꌅꈌꀉꒉꈧꌠꉬꇮꃅ，‘ꑍꑵꌊꁏꊿ’ꈧꌠꅿꇇꇬꄉꆍꇱꇑꌊꇁꀋꌐꌦꅀ？”
“ꌅꈌꇑꈧꌠꃆꂮꆹ，ꆏꑞꐛꅹꃅꎺꇊꐝꄧꀕꇬꎷꌠꉬ？‘ꋍꆪꇝꂱ’ꅿꆲꋒꉏꆈꈧꌠ，ꆎꆹꇫꉌꃹꈴꅀꇫꉌꁏꑓꆽꌠꉬ，ꄚꋋꆹꇝꂱꌋꆀꇝꂱꏭꁏꌠꏂꎕꏦꇬꏂꎕꇓꂷꉬ。”
ꑸꆀꂶꌠꒉꊸꊐꅍꏡꌠꋌꇱꄌꌊꂴꏭꄉꒉꊸꈨꋌꇱꃝꂚꄏꃤꈧꌠꇬꇱꈭꐨꆏ，ꉈꑴꊛꄉꋍꈨꃝꊨꏦꃤꇬꇱꅷꐺ，ꊁꆏꒉꊸꅝꅍꏡꌠ，ꀅꌳꃅꋌꇱꄌꌊꂱꀯꏢꁮꇬꄉ，ꌌ“ꁍ——ꁍ”ꃅꂡꅷꐺ，ꋋꆹꋍꂱꀯꒉꊸꆼꏦꌠꀉꄻꀕꃅꂚꄏꌧ。
“ꉪꊇꄡꇗꀱꌊꅇꐚꅇꀨꈧꌠꉉꌦꂿ。ꆏꊼꇅꇠꉏ，ꉡꆹꇬꊎꑡꑵꉪꅷꐺꇆ？”
“ꀊꑴ，ꁬꃷꂷꆏꈝꃀꏢ，ꃰꊿꂷꆏꉌꂵꂷ；ꀉꂿꌺꒆꄟꐯꀋꌡ，ꃰꊿꑍꂷꐰꇑꐯꀋꒊ；ꃰꊿꑍꂷꈝꃀꁻꌐꐯꌟꌐꑵꀋꉬ。ꅽꃀꈴꀋꄿꀐ，ꉡꆹꃮꀑꆊꑌꐛꅹꇯꍝꃅꇫꇠꀋꄐ。”
ꑸꆀꂶꌠꀅꌳꃅꀇꐒꁠꆤꅝꇈ，ꄷꀋꁧꋻꅑꏭꃅꉐꆂꏡꌠꎇꌊ，ꋍꅿꂱꀯꂱꑆꈧꌠꇬꊼꇅꑽꅷꐺ。ꐛꎿꂷꇭꄔꒉꈧꌠꀋꆏꃅꊰꇁꄉ“ꄧ——ꄧ”ꃅꂿꇬꎷ，ꑸꆀꂶꌠꒉꊸꅝꅍꏡꌠꋌꇤꇬꐓꄉ，ꐧꊭꊼꇅꉈꈭꐨꆏ，ꋍꁁꏯꆏꇇꏸꌌꐛꎿꂷꇭꄔꒉꈧꌠꌩꅷꐺ，ꋍꁁꏯꆏꀋꆏꃅꉉꇬ：“ꉡꆹꑠꈨꉪ，ꀊꋨꄹꈎ，ꀋꄹꄷꉣꑊꐮꐞꂱꑱꅉꀋꁧꑲꆏ，ꀋꃉꀃꑍꆏꉡꆹꈍꃅꇮꀋꐚꀐꌠ?”
ꐛꎿꂷꇭꄔꒉꈧꌠꆹꄽꂫꋌꇱꌨꑻꁦꎴꃅꇫꎭꌐꀐ。ꋌꊛꄉꋌꌧꋌꅉꐚꌠꏡꁈꀊꋨꌕꏢꋌꇱꉉꎼꇁ，ꂚꄏꁳꇠꉚꄮꇬꋋꆹꄚꈯꄔꑞꏢꌌꌬꂯꃅꉪꌠꉬ。
“ꆏꋌꅉꀋꐚꑴꌦꌠꅀ？ꏡꁈꉈꑴꅽꀍꑐꑘꃅꐥꑴꌦ？”ꂚꄏꂶꌠꑠꃅꉉ。
“ꑡꑵꏡꁈꉬ？”ꑸꆀꆹꉌꂵꇬꒃꐯꒃꃅꋌꏮꂚꄏꉜꎍ。
“ꅺꌡꇬꐂꃪꇬꊐ、ꐂꒉꈁꃉꌦ、ꅋꋠꑱꅝꌦꅀꏦꀨꏢꎹꌊꐒꇵꆹꇬꄀꄉꏣꒃꆹꅑꌦ。”
“ꊨꏦꇬꀺꌦ。”ꑸꆀꂶꌠꈁꏾꃅꉎꉐꄷꑠꇬꒉꇈ，ꊛꄉꉉꌦꇬ：“ꋋꆹꉠꅿꊇꅉꐛꄟꌋꆀꐮꀋꊒꌠꉬ”ꄷ。
“ꑠꉬꑲꆏ，ꆎꆹꃀꅉꂗꍵꑱꃀꏢꌊꅽꊨꏦꀱꊨꏦꀂꏽꆼꇽꄹꌶꀐ。”
“ꆏꑞꐛꅹꃅꉠꏯꀋꋌꃅꎖꃨꅑꇨꌠꉬ？”ꑸꆀꂶꌠꒊꒉꌠꋌꇱꆏꄉꉉꇬ，“ꑠꀋꉬ，ꉡꆹꏡꁈꌕꑵꌠꌬꂯ。”
“ꑲ，ꀋꐯꀕꉨꉪꃅ，ꉬꀐ，ꑠꃅꉉꋭ，ꋋꈨꑲꆀꅽꊇꅉꐛꄟꌋꆀꐮꊒꌠꉬ。”
ꂚꄏꂶꌠꑄꆜꁨꇉꀕꃅꒊꒉꁖꀐ，ꋋꆹꀋꃉꆏꑳꋋꂷꅿꃥꌋꀋꁧꀋꉬꀐꌠꋌꋋꀋꎺꃅ，ꋋꇅꄷꋌꄓꇬꉆꇈ，ꉈꑌꅍꂶꌠꋍꇱꄹꇫꎭꄉ，ꑭꁘꍔꄉꑳꈐꏭꃹꆹꀐ。ꀊꋨꈚꇬꆹꋋꋍꈓꂾꃀꈿꅷꑎꇨꀕꄮꇬꀀꅉꈚꉬ。ꀃꈈꃭꉱꁬꌠꋌꇱꄹꎼꆹꇬꆏ，ꊿꀊꑙꈁꑓꅑ、ꆿꃀꇬꇉꑌꑠꂷꇱꇊꇰꃅꇯꏢꀕꀐ。
“ꆏꅽꀊꁌꀋꁧ、ꅽꀂꏾꆼꇽ、ꅽꀑꆊꐴꇵꂶꌠꃅꐺꅀ！ꋋꆹꑸꆀꐋꀨꅿꑬꆏꅉꉬ，ꅽꀑꆊꐴꇵꂶꌠꎹꇁꌠꉬꏭꁮꀐ？”
“ꃮꂱꎼꂶꌠꇇꇬꆏꃚꈻꏸꂷꄌꌊꏢꁮꏭꉈꑌꅍꑠꂷꇬꄉꀍꉀꄓꇁ。ꂚꄏꋌꋋꋓꉪꀋꁨꀐ，ꌤꃅꅉꇬꄉꑳꈐꏭꆹꌠꀃꈈꁬꌠꇬ，ꊭꈜꀣꈜꑠꏢꇫꁮꄉ，ꀇꐒꃴꂿꀕꂡꌡꌠꑓꋪꋒꆹꈍꄮꑌꌙꈈꀕꃅꏮꋍꇬꆈꎍꇬꎷꌠꉬꅊꇈ。
“ꋌꁳꊼꇅꁨꉜꆹꎼ，ꃮꂱꎼꀋ，ꈍꃅꉉꄿꂿꉪꊇꆹꏦꃤꇬꋍꍈꀋꊒꌠꉬꀐ。ꄚꇬꍤꆗꇁꌠꊾꆹꑍꂷꀉꄂꈨꀋꉬꀐꃅꄉ！”
ꃮꂱꎼꂶꌠꉈꑴꊼꇅꎞꇬꆏ，ꂚꄏꆹꌧꉆꌧꀋꉆꃅꎍꌠꑳꅜꀜꈧꌠꋌꊌꂿꀐ，ꀋꉊꋍꅿꀀꈤꀊꋨꂷꇬ，ꊿꀉꁁꂷꇬꀀꎍꌠꌡꑴꌦ。
“ꏦꃤꇬꊒꀐꀞ，ꂚꎼꏹꀋ？ꀋꃉꆏ，ꆎꆹꉌꋬꈬꐛꀐꋭ？”
ꅇꂷꋋꇬꉉꑌꃅꄉꄮꇬꆏ，ꑸꆀꂶꌠꇭꀧꃼꏯꊼꇅꎎꇈ，ꏸꑭꋍꁆꋌꎇꉈꑌꅍꂶꌠꄩꅞ，ꑬꅮꁆꌠꐵꑷꐆꃅꀅꌳꀅꌳꃅꇔꊰꀧꄷꀏꃄꅉꇬꅞꇈ，ꑭꉱꂶꌠꐍꀧꅍꇬꁖꎍ，ꄷꀋꁧꀅꌳꀅꌳꃅꇯꌌꃜꌎꅷꐺ。
ꄚꀋꇮꆺꌋꀕꃅꊾꏂꏡꁈꀉꑌꐯꀉꑌꃅꐥꌠꃀꑊꋌꋋꂷꂴꆽꄉ，ꂚꄏꌌꉪꎼꇁꇬꊨꏦꀃꅉꆹꉈꑴꋍꃢꃀꑊꋌꋋꂷꇱꌌꒊꈧꌦꀐꉂ。ꋌꀱꂴꑋꅉꈚꌠꇬꉆꎍꌦꀐ，ꄚꀋꃋꋌꃢꈍꃅꑌꅞꀏꆹꑌꀋꅲꀐꌠ，ꀅꌳꃅꇇꑍꁆꋌꇱꎇꌊꈩꇈ，ꉏꎸꃄꅉꃅꉉꇬ:
“ꉢꉜꇬꆹ，ꋋꇅꃅꀕꄜꇁꂯꀑ，ꉡꆹꀀꑌꇴꋭꀐ。”
“ꉎꉐ……”ꑸꆀꂶꌠꒊꒉꁖꀐ，ꀀꑌꈨꑡꂷꇴꅍꅑꇆ！ꁨꇐꀋꐥꏠꌠꇬꀀꒉꀋꅲ，ꆏꄹꇬꁨꇐꐥꏠꌠꆏꀀꒉꅲꄷꌠꅀ？”
ꊁꊛ：ꉒꈌꈬꇬꉂꏣ(ꊰꌕ)http://yi.yizuren.com/plus/view.php?aid=130
