ꎭꐪ·ꌒꐪ
ꄜꃑꄮꈉ： 2013-12-21 | ꁰꄻꊿ：ꊈꀘꌒꀨ
ꎭꐪ·ꌒꐪ
ꊈꀘꌒꀨ/ꁱ
ꎭꐪ
ꁦꀑꂙꃨꅿꉗꌑꐩꀕꌠꍶꑭꑾꑭꐊꋒꌦꉐꂷꇱꑄꇁꊖꆈꈁꆷꃹꇈ，ꐈꉐꆈꅋꏸꐛꄉꇁꅉꃴꒉꐎꈿꇁꊂ，ꋍꃭꇇꑍꃭꇇꄹꃰꊿꒌꆠꈍꑋꅋꌸꌦꀋꐚ?ꑋꈌꉙꏦꀕꄮꀉꑳꉨꃚꀉꂿꉌꂵꋌꌌꍓ，ꃅꒉꆈꋧꋪꄮꀉꂿꀉꑳꉓꃚꐷꈭꈌꃨꇇꐎꃮꃚꐉꄉꁦꀑꁧꄩꏣꇈꇉꈫꇁꄿꋖ。ꎺꁯꂷꇭꏁꂿꀕꍇꌠꉱꉳꉱꀋꄿꃅꆳꂷꉐꏶꇊꈂꀸꊐꇬꎷ。ꃅꑍꃅꉖꀉꐔꑓꁴꐊꄉꆺꀕꂃꇈꄡꂿꑗꀋꉬ，ꀉꐔꉨꃚꀀꀨꇂꃴꀀꄉꍀꌺꆿꌺꂇꃅꂇꇈꉱꈓꈜꐯꐰꇑꊂꌒꋌꇷꑋꅉꊌꀋꑌ。ꑭꁆꊕꏪꐰꌠꑍꇁꌊꀋꐥꈛꁧꏜꋇꋌꄔꀑꀋꉈ，ꆀꌺꉂꏣꉂꑟꁦꀑꂙꃨꀕꁯꉐꍑꌟꃅꈨꑭꂿꀋꉆ。ꎭꆹꋌꄷꉬ，ꋌꄷꇐꀋꈤ。
ꌒꐪ
ꆈꌠꁱꂷꉢꌌꁱꅍꇂꃴꀀꄉꆺꀕꂃꃅꂃꇈ，ꏬꅍꑍꏢꉢꍠꇬꄀꋌꁳꃄꇖꄹꊂꈁꏾꇀꅉꐙꃰꏿ，ꉠꅇꂷꉢꌌꉠꁮꅉꌧꇁꌟꃅꐋꀨꋍꏅꇰꇈꊿꃅꋌꅲꀕꇢꈻ。ꀉꄉꑳꅝꉒꐎꄓꃅꄓꄉꀉꁌꈄꃆꈄꂮꌧꇁꌺꇖꋍꏅꇰ，ꀉꂿꑱꍹꀯꃹꐛꑿꈴꃅꈴꄉꀊꂵꉂꐪꉂꑟꉙꇁꃮꁮꃬꊭꅸ，ꀉꐔꐛꑊꒉꇸꇉꇬꀀꄉꑊꏦꐆꃅꉌꂵꃅꉈꐞꃅꐞ，ꁦꀑꁧꄩꎆꆫꀉꑳꑸꑽꃚꌠꃄꐔꄀꃅꄀꇈꉐꆰꁠꃅꁠ，ꌩꈪꇁꄉꇌꎶꃘꑴꊂꈹꑳꐮꐦꀞꋌꌌꃬꈌꎸꃅꎸ。ꌒꆹꋌꄷꉬ，ꋌꄷꇐꀋꈤ。
ꇁꀦ： 《ꉙꇐ》
ꁰꄻꌠ：
｜
ꄜꃑꌠ：
beley ꌤꃅꅉ
