ꏞꏈꃨꁍ ꑵꉙꌻꑘ
ꍏꇩꀁꑌꊿꋅꑵꉙꊨꏦꁰꄻꄉꌠꈋꍣꂿꄷꇬ,ꍏꇩꀁꑌꊿꋅꑵꉙꊨꏦꁰꄻꄉꑵꌠꑵꊿꉘꃀꇊꉘꃀꁥꌠ——“ꈬꉘꏨꆉ”ꐵꄉꉉ,ꋀꊇꁰꄻꊿꀋꉬꀋꉆꌠꐙꈌꐎꁬꐵꄉꉉꑠꆹ,ꈍꃅꑌꊼꇅꉉꈴꉉꋊꃅꀋꐛꇬꎷꌠ。ꆈꌠꆀꉙꑵꉙꊨꏦꁱꄉꌠꆹ,ꐙꈌꐎꁬꁱꄉꌠꈍꄮꑌꊽꉌꂵꃹ,ꇣꋲꏀꀺꏭꃅꐙ,ꊽꅲꇢꈻꉌꐡꇁꁠꃅꐙꇬꎷꈭꐨ,ꂟꌋꉐꈬꁱꄉꌠꑌꄡꇗꀋꉉꀋꄿꏭꃅꐙ。ꋋꈍꑋꈓꆈꌠꑵꉙꊨꏦꁰꄻꄉꌠ(ꋓꉪꁨ:ꉪꌌꄚꄉꉉꌠꆹꆈꌠꑵꉙꊨꏦꁰꄻꄉꌠꃅꄜꌐꌠ,ꆈꌠꆀꉙꑵꉙꊨꏦꁰꄻꄉꈧꌠꀉꄂꀋꄜ)ꈬꇬ,ꑵꉙꁱꇐꒈꅐꃅꅐ,ꑵꊿꀊꏀꑠꑌꏂꃅꏁꏪꀕ,ꄚꈐꏭꁱꇮꑵꇮꌠꑌꌐꀋꉆ,ꑠꃅꑴꇬ,ꃶꐚꀕꃅꑵꅇꑵꃚꃅꁰꄻꌊꐮꐊꐙꃅꅲꌒꉾꃪꑠꀉꑌꑹꀋꐥ。
2001ꈎ8ꆪꈬꉘꏨꆉꆀꉙꊨꏦꁱꄉꌠꑵꉙꍡꀻ《ꀉꂿꑘꀕ》ꄷꂶꌠꅐꇁꈭꐨ,ꆈꌠꆀꉙꑵꉙꊨꏦꁱꄉꌠꏓꑵꉙꍡꀻꋍꂷꃅꅏꄻꅐꇁꌠꀁꑌꐯꀁꑌꀐ。ꀊꋨꄮꇬꍏꇩꑵꉙꍡꀻꑭꊂꃅꃷꌞꌊꀊꅰꀋꃪ,ꈄꏍꄩꃷꂷꑵꉙꋍꑠꑌꄚꇬꎟꑣꁧꒃ,ꁰꄻꈏꊋꑌꆹꈢꇬꎏꎍ,ꂁꈐꏿꄉꃷꌠꑌꃛꐯꃛꃅꐙ,ꆈꌠꑵꉙꊇꅉꇯꅲꐋꀊꅰꇫꋒꀋꌧ,ꇫꅲꌠꑌꀊꅰꀉꑌꃅꀋꐥꌠꑵꉙꋌꑵ,ꄚꐥꈭꋍꃅꌼꇗꌼꀠꃅꐙꑠꇬꄉꊨꏦꑋꅉꉆꅉꍈꊌꂿꄷꇬꈍꃅꊋꋠꌠꆹꉉꄻꀋꅐꀐ。ꑠꃅꑴꇬ,ꆈꌠꌺꑠꆏꃷꅍꇬ“ꉘꁮꏣꄀꎭ,ꆿꃀꊀꄅꎭ”ꌠꉌꊋꑌꇬꎷꐛꅹ,ꑵꉙꐥꈭꋍꃅꄷꅠꑠꇂꃴꄉ,ꆀꆿꃅꄷꑵꉙꊿꀊꌤꇊꄷꁥꌠꂴꊁꃅꆀꉙꑵꉙꍡꀻꑍꂷꅐꌊꄓꇁ(ꋀꑵꉙꍡꀻꑍꂷꂶꌠ《ꀁꇬ》ꄷꂶꌠꆹꑵꉙꍡꀻꉷꉙꌊꀨꇬꄈꂷꉬ),ꋍꃅꄉ,ꋌꃀꆈꌠꆀꉙꑵꉙꊨꏦꁱꄉꌠꈭꎁꌙꈈꀕꆏꇫꎍꌠꀺꁖꆹ,ꆈꌠꆀꉙꑵꉙꉈꑴꋍꃢꃅꉹꁌꈬꇬꀉꇨꃅꁊꈴꈨꈴ,ꊿꇫꂿꈬꃅꐙꇁꌦꀐ。ꀊꌤꇊꑵꌠꆀꉘꑵꉙꈧꌠꀉꑌꌠꆈꌠꑵꉙꌊꁈꀊꏀꂟꌋꉐꈬꄷꂶꌠꁱꄉꌐꌠ,ꋌ“ꇐꀳꈍꎞ”ꑠꀉꑌꃅꌊꌬꌊꉙꅇꄻꄉꀋꃅꋋꄮꁊꈴꑵꉙꐊꂷꑠꐯꁆꐯꇯꌊꄮꐽꐯꊯꄉ——ꆈꌠ“ꇐꀳꇐꏢ”ꆹꊇꅉꃅꉉꌒꈻꌒ,ꎆꇌꊱꁨ,ꐥꇗꈻꇐꄜꇐ,ꌧꃆꎕꏦꀊꅶꃅꐊꑠꑵ,ꄡꃅꄡꇬꆹꑵꃚꁆꌒꐯꁆꌒꄡꐥꌠ,ꄚꁱꂷꀗꃚꆹꑵꃚꁆꇱꑟꄩꌒꃚꁱꌐꌋꆀꋍꉹꃅꉜꀋꉆ,ꑠꐛꅹꃅ,ꀋꃅꋋꄮꁊꈴꌠꑵꉙꑵꃚꀏꐂꄩꅞꀍꍅꇓꀋꐥꃅꐙꋋꈨꌋꆀꐮꄮꌊꁟꑻꀕꂿꄷꇬꑌꈝꀋꐮꐘꀋꉬ——“ꇐꀳꈍꎞ”ꊨꏦꇇꄻꃅꄻꊱꆺꀕꐙꀊꄷꑵꀊꅰꇤꏦꀕꃅꀋꐛꀐ,ꆀꉙꆹꋍꈷꑟꄩꄉꑵꃚꉪꇗꊒꆽꀕꃅꁨꑠꐛ,ꋊꅉꃅꐙ,ꁦꎆꁧꒉꋊꍬꄻꀋꅐ,ꋋꈨꆹꈍꃅꑌꆈꌠꑵꉙꊨꏦꁱꄉꌠꍔꐯꐨꇬꀺꀖꅍꍈꐥꀐꌠ。
ꀋꉐꉎ ꃰꊿ/ꁮꏂꌡꃅꇷꆴꑟ/ꀋꉐꉎ ꆈꌠ/ꐤꅉꌐꅉꑟꁧꃲ/ꀋꉐꉎ ꀉꑳ/ꀿꃀꊼꇅꀨꎹꂯ/ꀋꉐꉎꀑ ꃆꏂ/ꊂꑋꉌꆐꅑꀋꇿ(《ꇳꍝ》)
ꐧꇁꃰꊿꐯꀋꐰꐮꊂꀠ/ꌩꏪꀊꑙꐯꀋꐰꐮꎸꈹ(《ꃄꊭꅇ》)
ꑵꉙꁰꄻꌠꑌꋽꇐꇳꏦꀉꁁꈧꌠꌋꆀꐯꌟ,ꈍꄮꑌꊾꂷꊨꏦꀉꄂꃤꃅꋧꁧꈌꈥꐷꑠꀋꉬ,ꂟꌋꉐꈬꆹꀑꇬꉂꐪꇬꌊꃬꐨꌋꆀꄜꋊꐨꃹꅼꃅꐙ。ꃅꋊꐛꐪ“ꊿꂂꊿꄸꎆꃀꀑꑊꅑ”(《ꇁꀐꆺ》)ꌠꊜꄮꇬ,ꋌꄡꇗꉪꋧꈺꀽꃅꐙ。“ꃷꎏꐥꏭꃅꐙ”ꋌꉹꃅꐵꄓꏿꑠꆹꋊꃅꊿꑞꁯꑞꁯꄰꃅꋦꅷꇁꌠꆈꌠꊿꋅꋋꁯꃅꉜꎼꇁꇬ,ꃰꊿꇢꊭꏦꉅꐨꆹ“ꀜꐆꌠ”ꌋꆀ“ꏓꇱꌠ”ꈬꇬꄉꌼꀖ、ꆼꈘꃅꐙꇁ。“ꉪꇐꀉꎂꀕꌠꆹꉈꏮꁱꀕꊝꄷꆏ,ꊨꏦꀑꋩꀕꃅꈁꎹꈁꈹꌠꇬꄉꁮꆘꀋꅝꑲꆏꈍꇌꈋꇌꇫꌥꇫꁱꈧꀋꐛꌠꌋꆀꊨꀖꌠꇬꅐꀋꄐꃅꀀꎍꌠ”[1]。ꐛꅹꃅ,“ꉢꀋꊭꀋꄐꈍꃅꌉꈿꂯ/ꉢꀋꍣꀋꁻꈍꃅꒉꈫꂯ”,ꉢ“ꀋꈭꒉꌕꂡ/ꉢꉫꑌꄚꈭꇁ,ꀋꉬꄚꈭꇁ//ꀋꅂꃪꌕꊐ/ꉢꉫꑌꄚꅂꇁ/ꀋꉬꄚꅂꇁ”“ꉢꄓꌠꄓꇁꃲ/ꄓꌊꏢꑟꑆꊋꀱꇁ//ꉢꀽꌠꀽꇁꃲ/ꀽꌊꐋꀨꀑꑊꇔꇁ”(《ꇁꀐꆺ》)。ꐥꐨꊿꋌꀋꐕꌤꌧꃪꃭꋍꑠꊜꄮ,ꂟꌋꉐꈬꀑꀋꁏꑊꀋꆴ,ꀅꌳꀕꃅꇳꍝ,“ꐥꍂꆏꀉꄂꉂ/ꌞꊿꈍꃅꉣꑊꊂꀠꒉꄿꂿ/ꉡꆹꌥꑌꋋꈨꅇꀋꅲ”(《ꉂꏣ》)。ꃄꅉꋋꉘꉚꅸꀉꒉꋋꁕꂿꇬ,ꋌꋌꄷ,“ꉢꐤꑌꅽꃰꊿ/ꌥꑌꅽꐰꇗ”(《ꉠꃅꉂ》)。ꎹꇁꈹꇬꎷꌠꈜꎴꃅꄷꐰꇗꊩꅉꃅꉆꀕꌠꆹꊿꋌꀋꐚ,ꄚꉪꋍꑍꆏꇫꎭꂿꄷꀋꋻ。ꀄꂼꎔꀕꊂꈹꄮꇬꉪꀁꋌꀑꉀꑌꉪꋺ,ꈌꊰꀞꐕꑌꉪꋺ,ꄚꉌꃀꄸꈐꉌꊈꑇꐨꀊꄷꍈꇬꊎꉀꒆꇬꎷ,ꇬꊎꉪꄖꉪꄒꌊꀒꁨꆹꇬꎷ。
“ꃅꍜꁤꇅꀕꆏꉌꂵꇿꌟꃅꑌꐛ/ꏃꃅꆈꋧꋪꆏꉌꎭꌟꃅꑌꐛ/ꑴ!ꄚꊰꄿꀐꃀ ꀞꐕ/ꀊꑴ!ꀋꍑ,ꋰꄉ/ꇁꑴꌦꀞꀒ ꅀꈢꋒꁧꀐꂯ/ꀋꐚꀐ,ꀋꐚꀐ/ꉂꋺꌠ,ꌂꋻꌠ,ꊋꋺꌠ,ꈔꋻꌠ/ꉨꑌꀋꉬꀐ,ꒈꑌꀋꉬꀐ/(《ꉪꏣꈤ》)
ꃶꐚꀕꃅꉉꇬ,“ꐥꐨꆹꉌꎭꑫꊱꉬꄷꑌ,ꉪꆹꄛꁮꀕꅡꊪꀕꃅꉌꎭꑫꋋꊱꈩꌐꁱꌐꄡꐥ,ꉌꎭꑫꇬꂵꇖꀕꌠꌋꆀꌞꉌꊪꌠꇤꇫꎭꀋꉆ。”[2]ꂟꌋꉐꈬꆹꋍꃅꄉꊨꏦꑵꉙꁡꇤꂶꌠꁰꄻꉪꂾꅞ——ꋧꃅꀉꎂꀕꌠꇬꄉꉂꏣꃶꐚꄁꃰꏿꑠꇿꎹꇿꈹꁧꂯ?ꉪꏣꈤꌠꑌꐥꅍꉬꉎꌦꌋꅇꂷꃅꆘꅝ。ꃅꈎꃅꆪꇫꄉꏮ,ꀄꂼꈐꏭꑕꑘꀊꄷꂷꁧꈪꇉꑭꄉꈾꃨꁧꋌꁬꀄꐛꇁ, ꁯꋒꃅꆳꇴꄹꑳꂾꇱꋒꄩꄉꌌꁧꌐꌠꌡ,ꉢꇴꇁꍝꅇꐤꅉꑍꅉꑟꌠꈬꄉꇁꀐꆺ,ꄚꀋꃉꄹꆏ——“ꆎꆹꀋꃅꐥꌑꀕ?”ꄷꑠꇬꂯꄹꀋꉆꑟꃲ。“ꑘꀕꀋ,ꌦꃅꆅꌶꀋꇷꋠ,ꆏꁧꇈꉈꆏꉢꉌꃀꎭ,ꑓꁴꅐ,ꈍꃅꂯ? ”“ꑘꀕꉈ ꉂꇁꑟꅇꑍꇬꄛꌦ/ꑘꀕꉈꆏꊌꈧꀕꑌꀋꐚ/ꑘꀕꉈ ꁦꀑꂙꃨꃨꇀꌦ/ꑘꀕꉈꑣꌊꆏꁳꑟꉂ”。
ꉉꀽ
*ꂟꌋꉐꈬ:ꆈꌠꑵꉙꁰꄻꊿ,2012ꈎ12ꆪ10ꑋꒊꆈꌜꆀꆿꑤꀁꇬꄉꆅꇫꈴꁧ。
[1] [ꏐꏃ] ꏐꇱ（Jung,C.G.）:《ꉌꇗꌷꇐꌋꆀꁱꇐ》,ꃗꍧ,ꌠꈍ ꁏ.ꇂꏢ:ꑴꆀꄯꒉꅏꅉ,2014ꈎꅐꃢꌠ.208ꏾꏽꌠ. (ꁱꇐꋌꁬꉚꌬꅇꂷꋋꈍꑋꇬꐯꇯꁱꊿꄯꒉꋋꈨꉷꉙꃅꄉꅐꋐꌠꇬꄉꁏꌊꆀꉙꃅꄉꌬꌐꌠꉬ,ꄚꊁꈧꌠꑌꑠꃅꐙ)
[2] [ꄓꇩ]ꆀꊴ:《ꉌꎭꑫꅐꀦ》,ꍏꇩꀻ ꁏ.ꀙꏢ:ꌒꆃꄯꒉꅏꅉ,1986ꈎ.7ꏾꏽꌠ.
