ꃅꃤꄷꌦꆏꇓꈓꏦꎫꀄꊭꑠꍈꇬ,ꑷꈓ、ꐷꈭꃅꄆꄒꂷꇭꏁꇅꁤꇅꁏꄉꄔꎼꇁꌐꀐ。ꇓꈓꁭꅐꏭꑳꎔꇣꃨꀏꄩꊰꑋꊐꃅꋉꄉꑠꂷꇬꀏꊐꌠꇬꁱꂷꐛꐈꌊꀊꃴꇁꌦ,ꀊꏂꆸꌦ,ꀊꅪꇁꌦꃅ“ꁭꅐOKꄜ”ꄷꑠꈚꇬ,ꌠꏀꉬꂿ,ꃀꌠꉬꂿ,ꎆꊥꌊꃥꆠꐺꌠꉬꂿ,ꑬꆏꑵꉙꀛꐂꇁꌠꉬꂿ,ꋌꋩꋌꏦꌊꑳꈐꂷꇭꐚꍁꐚꍃꅍꈧꌠꇂꃴꎭꃔꀨꆏꀕꌠꀂꏽꑋꄉꌐ。
ꀋꋓꀋꉪꇬꆏꈊꃀꄮꈉ10:00ꇄꌠꇬꑟꌦꀐꅉꇈ。ꑠꃅꑴꇬ,ꊿꋋꈨꈀꄸꑌꄮꈉꈍꑋꂷꈴꒉꀐꌠꋓꉪꀋꁨꌐ。
ꋍꇅꌺꐛꇬꆏꇬꉢꌤꃅꊿꑍꂷꌕꈈꀕꃅꑳꈐꏭꃹꇁ,ꋍꑊꅳꀧꐬꇓꊎꐮꌕꈭꐨꑍꂷꌠꂱꑱꅉꈴꄉꊾꈬꇬꊎꆈꍮꐺ。
ꑮꆜꎼꃏꃅꄉꎆꎹꑍꂷꌋꆀꐯꏀꐯꀖꇫꑌꇈꌠꐎꀘꄇꀕꇬꉢꑍꂷꊾꈬꇬꆈꍮꅸꐺꋌꊌꂿꇫꆏ,ꆠꌋꄲꄷꑠꇅꄹꇈ,ꐯꏀꐯꀖꐘꌠꆏꄉꁰꑌꀋꐭꌗꑌꀋꅐꃅꂱꇫꑌ。ꌋꅪꆿꏓꋋꑍꂷꋋꈨꂿꇬꆏꐎꀘꄇꀕꑡꋍꉌꀋꃹꀐꎻꈁ,ꃨꆭꌊ“ꆏꑡꃅꁱꀋꐭꇆ,ꑡꍈꅽꄸꀋꈴꌠꉉꇆ!”ꃅꇬꏮꅲꇬꎷ。ꐎꀘꄇꀕꋍꑵꀋꉬꎴꃅꋌꄓꉈꏭꉜꄉꒉ。ꂷꇭꏂꌠꅪꌠꁨꑭꒋꄉꐛꅹꄸ,ꑠꄮꇫꆏꐎꀘꄇꀕꈁꑓꐛꐈꎍꀐꌠ。
“ꉐꑴ!ꉆꄉ!”ꐎꀘꄇꀕꅇꂷꋌꇬꈨꇬꆏ,ꇬꉢꑍꂷꌠꋍꏮꇁꌠꄇꇖꀕꀐ。ꄚꄉꑌꑿꆿꂿꈯꌠꌡꃅꋌꎼꀃꈈꁮꑭꉜꄉꀒꆶꑟꇬꆏ,ꇬꉢꑍꂷꌠꊁꄉ”ꒉꀐ,ꒃꄉ”ꄷꅸꊁꒉ。ꑠꎳꉘꀋꇉꌟꆏꀃꈉꁭꑌꇬꉢꉬꑻꑠꈨꄐꀊꄶꇁꉚꄉꅉꇈ,ꄚꄉꄇꀕꂶꌠꉌꊭꂷꇁꑓꂫꇷꇬꂫꌠꐙꊝꄹꋀꇱꇇꎤꊐꌊꁧ。
ꐎꀘꄇꀕꀄꂼꌠꀉꏯꉜꇁꂾꆏꏦꑳꆈꋧꋪꅉꇬꀀꎍꇈꅉꇈ。ꏦꑳꈐꏭꂴꀀꇊꑽꊿꈧꌠꋍꏭꉻꏂꇁꌠꇨꄮꆏꀊꅰꃅꋍꑽꐪꋋꈨꉪꇁꋍꉌꆏꅑꀱꍠꀕꌊ,ꏦꑳꃹꈭꐨꃅꐎꏃꑍꌠꆏꋙꑌꉪꀋꄚꒈꑌꉪꀋꄚꃅ:“ꈍꄮꑲꆀꅐꁧꂯ,ꅐꁧꄎꀕꂯ?ꑞꐛꅹꑽꈜꆈꒉꀕꑠꏢꍬꌠꉬꂯ,ꅐꁧꀋꄐꇮꇬꀋꃀꀉꑳꈧꌠꈍꃅꀋꆾ”ꉀ,ꀋꇊꆏꀄꂼꌞꐬꈀꆠꀕꑠꈁꂼꌠꌡ。ꉪꅷꀑꇬꑟꅷꑭꇬꑟ,ꉪꇊꈜꀋꁮꇫꆏꑓꁵꉱꇤꌐꀐ。
ꄇꀕꆹꎂꀕꑘꁨꌺꒆꂷ。ꋍꀉꄉꃀꐚꈭꐨꌢꎭꌟꁧꐛꅹꊛꄉꁨꀘꀋꄐꃅꐧꌶꅉꑍꈐꊐꌠꀗꑌꃅꀱꉈꋍꀉꂿꌊꆀꀁꑳꑌꂵꌕꂾꌠꈽꑘꃅꇁ。ꑮꃀꆹꋍꀉꄉꃀꀋꐚꌦꇯꆐꑮꄉꀐꌠꉥ,ꋌꀱꀁꇬꇁꈭꐨꆏꑮꃀꑌꎹꌊꁨꑶꋦꇤꄂꇁꇈ,ꑍꈓꀋꐛꌦꇫꆏꌹꍈꇯꉬꄉꉌꂵꌑꎍꀐꌠ。
ꑠꄮꆏꄇꀕꉪꇬꃄꅉꀁꑌꃅꀋꇎ,ꈬꉘꃅꄷꌟꃅꎇꃀꍅꑓꍈꑌꀋꁨꄉ,ꇇꒉꇇꇁꎅꍈꌬꈇꇬꎹꊋꐯꎹꊋꌠꉥꈍꌐꉈꏭꎆꍈꎹꁧꂾꉂ。
ꋀꏤꋋꈚꆹꐕꍯꄇꈜꈛꑌꄉ,ꁡꇤꊿꀉꑌꌠꇓꂵꋲꌊꃷꄉꃢꁌꈚꁌꋂꁌꋐꁌꍈꌺꎹꑟꃅ。ꄇꀕꉪꇬꑌꋌꐘꀋꉬꑲꆏꀉꁁꆹꉪꇁꄀꅉꂷꐘꀋꈨ。ꄚꃆꀞꇀꍯꆹꋍꑵꈻꀋꄐ,ꄫꇁꏸꇷꃼꌊꈻꑲꆏꀊꉗꀋꐛꃅꌣꈚꉆꀐꉂ,ꉌꂵꑢꄉꎆꍈꉛꌊꄫꇁꏷꇷꃼꏭꄐ。
ꉪꇫꑟꆏꃅꇫꑟ,ꄇꀕꎼꃷꇎꃷꇤ/ꏣꃀꏣꑟꅍꄉꎆꃀ5000ꂷꋌꉛꌊꇁꇈ,ꋍꁮꆪꀋꐛꇬꆏ“ꇴ——”ꄹꄫꇁꏸꇷꋌꃼꌊꁡꇤꑟꇁꀐ。ꁡꇤꊿꈀꄸꄹꇬꑌꌠꏀꉬꇮꄇꀕꁈꏂꇮ,ꀋꃉꄫꇁꏸꋋꇷꌌꎆꃅꋌꃬꅜꌐꀐꌠꉬꄷꌐ。
ꇯꍝꃅꇫꑌꄫꇁꏸꋋꇷꃼꌊꇁꀊꉘꀋꐛꌦꇫꆏꎆꌃ9000ꂷꄇꀕꎹꅜꇈ,ꄫꇁꏸꁌ5000ꂷꌠꌣꈭꐨ4000ꍍꀐ。ꌤꀋꐥꆿꀋꐥꃅꑠꃅꃪꅷꁧꑲꆏꀉꑌꀉꎳꀋꈁꃅꄇꀕꌣꈚꀐꌠ。
ꄚ,ꂿꃅꀋꋌꄎ,ꋓꇗꉏꃰꇿꁧꇁꀋꐚ。ꑠꋍꑍꆏꄇꀕꃅꄜꀕꇓꂵꍯꈻꌊꇓꂵꃷꅉꑟꇬꆏ,ꂿꃅꁬꌠꉕꆈꉏꆈꂃꇈ,ꂷꉐꑵꌠꒈꀮꄌꃝꏽꄉꀋꆏꃅꐛꅷꃅꈊ。ꄇꀕꂷꉐꇱꇊꄚꊐꄉꃅꈊꂷꉐꊼꇅꑬꈘꄮꇬꑲꆀꄫꇁꏸꇶꌠꋌꇽꌊꀁꇬꏭꉜꄉꁧ。
ꆹꌊꈝꃀꋍꐕꑟꇫꆏ,ꌺꃰꌠꏀꃀꌠꐮꐊꏃꑹꑠꁥꑌꄇꈜꀡꌩꀟꆃꅍꋋꏢꇬꍬꆹ。ꊿꈧꌠꇭꀧꒈꊭꁂꄠꀕ,ꁡꊭꈋꐯꆞꈧꌠꑬꅮꈧꌠꑘꀨꇱꇗꌊꒈꑌꀋꀮꌌꈷꇓꃚꅉꑘꄃꄔꈨꌡ。ꄧꇁꏸꇷꋀꊂꇁꇫꆏ,ꋀꇊꇫꆏꄉꇈ,ꃆꅉꈀꎭꀕꃅꀒꄻꇫꑌꎼꁧꇮꄷꈧꊰꀕꃅꇖꂟꇬꆏ,ꄇꀕꂷꌠꉌꂵꂄꑭꑌꑠꂷꉬꄉꊿꈧꌠꋍꎭꃅꉈꌊꋍꂷꑌꀋꌧꅳꅐꋌꇤꇫꑌꌊꁧꀐ。
ꈝꃀꈢꀡꆃꀊꅰꁧꀊꅰꀉꄖ,ꄫꇁꏸꏮꇉꌕꋓꃘꂷꌠꑍꃀꑍꌟꃅꇗꄃꀱꃅꂱꑱꈳꅉꈴꀋꄐꃅ,ꑳꇁꐰꅞꌦ,ꑳꇁꉎꅸꌦꄹꋍꈀꏾꃅꇬꊎꑇꐺꇬꆏ,ꄇꀕꂶꌠꀂꁦꋠꄷꆏꈌꊰꊋ,ꊿꈧꌠꏭꁖꁧꄷꋋꇬꉉꇬꑌꑊꏦꇈꂱꀯꋊꄉꄡꇗꇽꅷꁧ。ꁦꋠꄩꑌꈧꌠꄫꇁꏸꇶꌠꊿꎧꑱꑠꂷꌡꃅꈜꉎꃪꇬꀋꇊꁻ,ꈜꐯꃪꃹꀋꇊꊰꃅꇫꆏꇬꇈꉘꅍꄹꏸꃴꆜꄓꌊꏮꅶꍯꉜꀋꀬꑴꇬ,ꄡꇗꀋꏦꀋꏦꇚꑴꉂ,ꁮꇬꐭꂷꑌꀋꐊꃅꌕꈈꅍꇫꑌꌐ。
ꄫꇁꏸꇶꌠꀁꋍꁏꅉꑠꈚꑟꇬꆏ,ꈝꃀꏡꌠꀊꅰꃅꃮꋌꅨꄉꌠꌡꀐ。ꄇꀕꂶꌠꈍꃅꏀꂯꀋꄿꃪꈌꉜꄉꀑꒉꑟꀐ。ꄩꑌꌠꏀꑬꋽꇇꋽꑠꂷꀉꄂꋌꐂꈭꅐꁧꑲꆏ,ꀉꁁꈧꌠꍮꊭꌋꆀꐯꀳꀑꂪꀱꆽꄹꊰꇁꃪꃹꊯꎖꂰꐥꑠꂷꇬꃹꁧꀐ。
ꈍꉗꏢꐛꀋꐚꄇꀕꏸꐚꇁꇈꄫꇁꏸꇂꃴꀅꌳꃅꋌꇱꑀꅐꇁꇫꆏ,ꋍꇭꀧꋋꂷꃅꌦꇗꐩꀋꅍꀐ。ꋌꎺꇁꊿꈧꌠꄀꇈꃶꇖꂿꇌꄹꅸꇁꋋꂷꋌꃢꎑ,ꅸꇁꀊꋩꂷꋍꃢꎑꃅꊿꈧꌠꄖꍮꉚꇬꆏ,ꌕꑻꀉꄂꀊꅰꀋꀙꉬ,ꃀꌠꃘꊰꎖꈎꑠꂷꆹꇓꂵꋖꌦꀐ,ꌠꏀꑍꊎꎖꈎꑠꂷꏸꑭꄫꇁꏸꇱꍑꆸꐔꏭꁮꇙꋏꄹꀋꄐꀐ,ꀉꑳꊰꃘꈓꐥꑠꂷꑌꇙꀋꋏꇫꎍꀐ。ꄇꀕꋌꇷꈂꀸꏅ,ꑓꁵꑵꌠꋌꄹꉇꂷꉐꈧꌠꌡꃅꒈꆏꇁꀋꉆ。
ꐎꀘꄇꀕꎆꎸꎆꊭꋍꍂꌒꎹꂿꄷꀋꉬꃅ,ꑗꉘꃴꇉꀕꌠꊝ。ꌦꌠꊾꐆꌋꆀꀋꌦꌠꁬꋌꐯꇯꌗꅸꇁꇬꆏꎆꌃ40000ꂷꀊꇈꑟ,ꄷꀋꁧꆏꎆꃀꋋꈨꃣꈌꎆꈨꀉꄂꄉꈌꃛꇇꊸꑓꀠꀕꇫꎍ。ꄇꀕꎆꐒꋚꐒꂱꀯꋍꐕꃅꀊꃶꌊꊾꇰꂷꐛ,ꋍꈚꉜꇬꑓꂷꆣꈜꀋꐛ,ꋍꈚꑌꇬꀂꏾꐕꄉꑌꀋꄚ,ꋚꒉꈍꃅꂄꐚꋟꑌꑐꇁꆺꐮꊐꀋꉆ,ꋍꑍꌠꆏꁋꉔꄹꑳꈧꌠꐔꄀ,ꑳꅜꀕꌋꆀꈌꃛꉏꀧꇬꑌꉪꇁꄀꅉꎷꀋꊌ。ꎧꑱꇬꀀꇬꀉꄂꉪꅍꀋꐥꄉ,ꎧꅝꑲꀋꌧꑠꂷꀋꃉꆏꎧꑱꐛꀨꀋꐥꑠꂷꐛꀐ。ꑠꅹꉈꏭꄉꎧꅝꎧꑱꇬꎷꄮꇬꆏ,ꎧꅝꈌꇬꄉꐋꀨꆿꏓꆿꁘꑠꑌꀉꑌꃅꐥꀐ。ꐋꀨꋋꈨꇢꊭꊿꃅꀋꐛꑠꊋꒉ,ꋍꑍꌠꆏꋟꌦꅜꌦꃅꎅꑌꇿꅐꇁꀋꐚ,ꀅꌳꀆꌳꃅꐮꐊꅷꇁꇬꆏ,ꊾꈐꊿꀸꉺꍯꆷꑡꑌꋀꃅꇇꀋꏢꌠꄇꀕꅉꐚꑴꇬ,ꄡꇗꋌꉜꇬꑽꀋꐥꏭꃅꐙ,ꄷꀋꁧꆏꐋꀨꋋꈨꐉꄉꎆꎹꌊꃣꈌꎆꊒꏢꉪ。
ꋍꈭꐨꆏꄇꀕꀃꃀꂉꆏꑓꋪꁖꀋꇝ,ꌧꅉꃅꑽꈜꍬꉺꍯꆷꉺꍯꈐ。ꉘꀋꇉꌠꆏꀊꉗꀋꐛꃅꋍꐋꀨꈨꇬꉢꒃꅝꇈ,ꋍꃆꂮꈧꌠꈁꐥꃅꊿꀖꇬꉢꇰꌐꀐꅉꇈ……
ꄇꀕꑍꉪꌊꈾꏿꄓꀋꄚꃅꑠꃅꐎꏃꑍꂷꀀꈭꐨꆏ,ꀞꐕꀑꑊꂁꅉꎹꄚꀀꇫꄉꂯꌞꊿꋌꅷꀋꇁ,ꃣꈌꏡꌠꑌꇔꉆꀐꀞꉂ,ꄚꆏꂮꌊꀃꃀꁑꊰꄹꋚꊸꒉꊸꃅꋍꐚꀉꄂꉪꉬ,ꀉꁁꆹꑡꑌꋍꈁꌒꀐ。
ꄚꀋꉪꑌꀋꉆ,ꄇꀕꋍꑍꌠꆏꋍꃅꐪꑽꑌꋋꈨꋍꏳꉪꀋꌐꌦꇬꆏꋍꏳꇁꇬꊛ,ꉌꂵꂶꌠꒈꐂꇓꇷꇫꄉꏮꌠꌡ,ꀊꁌꀕꃅꑠꇅꀕꀋꆏ,ꏦꑳꈓꏭꑽꊿꈧꌠꐮꏙꐯꄁꌠꁨꐊ,ꉌꂅꑓꑣꌗꁖꆏꊿꇿꏭꁮꍶꀆꇌꀆꃅꀆꑠꁨꐊ……ꋋꈨꂿꇈꄇꀕꀊꅰꃅꉌꂵꂅꑣꀕ,ꀊꅰꉌꆐꀱꍠꀕ:“ꀋꇷ,ꀊꋩꄹꉇꑡꃅꆏꄉꊂꄹꉇꆀꀱꀋꇁ?ꑡꃅꀋꄿꀕꀋꅓꌊꌞꊿꑠꈨꄻꇫꑌꎼꇁ?ꑞꃅꀋꍑꀐꄷꈝꂿꈢꄉꀖꇫꎭꀋꇊ?ꑞꃅꂴꇯꑽꀐꄷꇈꈜꃀꆈꏸꀕꌠꍬꀋ”ꉂ,ꃅꇏꂴꆽꃅ,ꉌꆐꊂꆽꅑꌊꏦꑳꑍꆏꁮꀋꂿ,ꌊꆏꆪꀋꂿꃅꆈꋧꅍꋋꂷꈐꏭꄉꃅꑍꃅꉖꇁꉚꀐ。
ꏦꑳꆈꋧꋪ,ꉌꆐꀱꍠꀕ
ꄜꃑꄮꈉ： 2012-04-24 | ꁰꄻꊿ：ꉇꌺꈌꈬ ꁱ
ꇁꀦ： 彝族人网
ꁰꄻꌠ：
beleys ｜
ꄜꃑꌠ：
