ꁱꊿꀑꐱꐥꋊꃆꂮ:ꄏꎭꈉꑴ,ꏝꀪꊿ,1908ꈓ7ꆪꏝꀪꉿꀘꄉꒆ,ꂴꇫꇬꑟꏹꂓꋺ,ꌧꁱꂓꆹꈉꑴꃅꄉ。1931ꈓꄏꏢꋽꇐꑴꇐꌶꅉꇬꄉꌶꅐ。1934ꈎꄓꇩꌷꏷꐥ,ꀧꆺꌶꂥꍔꑪꑫꇬꄉꋽꇐꐩꋊꃆꂮꌷ。ꋌꏛꃅꇯꆐꁰꄻꄉꌠꑴꇐ《ꃅꋆꄮꐰꂢꈷꌕꊱ》、《ꁨꐞ》ꋌꑍꁬ,ꋍꁬ1939ꈎꉘꃀꃢꏝꀪꑴꁱꑼꄉꌷꌠꈁꁠꂴꏠꌠꊌ；ꋍꁬ1956ꈓꏝꀪꋽꇐꑼꈁꁠꊌ。1969ꈎꋌꐧꃆꍸꇐꑆꊋꌐꂷꌋꆀꂰꏝꋽꇐꀉꒉꏠꌠꈁꁠꊌ。ꋍꁰꄻꃆꂮꁧꎁꉉꀽꄏꌠꆹ1968ꈓꁰꄻꌠ《ꏢꇉꇖꄮꐰꑴꂷꈨ》ꌋꆀ1975—1981ꈓꄮꁰꄻꌠ《ꄤꍋꄝꁱꑳꇊꑴꀕꑭꁱ》ꑠꈨꉬ。ꀉꁁ,ꋌꉈꑴꉌꐡꁱꇐꁱꈩꌊꉾꐯꉾ，ꄯꒉ《ꄏꎭꈉꑴꁱꇐꏓꇱꄯꒉ》ꊯꊪꋐꅐꋺ。
ꉢꏢꄖꌌꀋꉬꀋꉆꌠꁱꃆꄻꇐꃅꄉꑴꂷꈨꁰꄻꄮꇬ,ꉢꉪꂓꅑꌠꑼꎭꋦꆳꃰꈨꌠꄀꑲꆏ,ꉢꈍꃅꀊꋨꌩꇇꉧꎍꃧꃨꁬꎶꃨꈍꀕꅉ,ꌋꆀꃅꑌꄮꐰꈊꃀꆧꁨꐛꒆꐯꁦꐮꐞꅉꇬꊼꇅꉜꏾꇊ。
ꀊꋨꑍꆹ4ꆪ10ꑋꄹꉇꂴꊁꉬꏭꁮ,ꀊꋨꉖꇯꍝꃅꆧꈎꊯꉬꑍꄹꑍꉬꌠꉢꐝꉅꇈꈭꐨꆏ,ꉢꏢꄖꇬꉜꄉꁧ。ꃅꑍꃀꆏꑼꎭꋍꏅꈩꁋꈚꌠꉜꈩ,ꎭꈓꂄꄉ,ꊝꀕꃅꆳꃰꃧꃨꀕꈍꀕꄮꊝ,ꃅꑌꄮꐰꉘꁮꌋꆀꅂꐛꐎꈊꂄꌠꐯꉉꄉꌟꃅ,ꄎꌬꅍꃅꃴꎑ。
ꈊꇁꄮ,ꉢꏹꇩꑼꌋꆀꌓꐂꑼꋌꈨꇬꋍꃢꆫꃨꌐꇈ,ꉜꎼꇁꇬꄮꈉꑋꇬꑟꀐꐛꅹꉢꀱꉈꑴꏢꄖꇓꈓꃹꇁ。
ꇁꌋꑣꑸꋌꈚꑟꄮ,ꉘꀋꇉꃅꍯꊪꌎꑓꈴꄉꉈꏭꉜꇬ,ꁰꅐꁁꏭꀉꒉꇊꃰꇌꈭꌠꆧꁨꑠꂷꁮꃅꃴꄩꏷꐺ。ꉢꋌꇯꌠꃅꐙ。ꂴꇯꉢꑼꎭꆳꃰꌩꁧꂴꉆꂿꉂ,ꀋꃅꌌꆧꁨꐛꒆꒈꆭꀕꃅꁰꅐꏭꁆꄉꐱꄩꇁ,ꆧꁨꋌꅐꄩꃅꃴꇬꎑꑲꆏ,ꉨꏦꐋꀋꌡꐩꋌꇅꃅꆘꅝꌐꁧꉆ。ꋋꄮꇬꉢꂴꇓꉈꅔꏂꄩꄉꄮꈉꀉꑌꃅꃹꌠꉌꆐꅑꇁ。
ꉢꇨꊸꃛꃅꇁꌊꑼꎭꋍꏅꈩꁋꇬꑟ,ꊼꇅꌺꌗꄝꇈꎔꎗꃅꆫꈩꅸꇁ,ꊾꉌꌒꀮꌠꆹ,ꋌꈚꁧꏡꊫ,ꀋꃋꆧꁨꐛꒌꂿꀋꉆꌦꑴꇬ,ꄏꎭꆹꃴꇉꀕꌠꈊꉒꊭꎍ,ꁧꂴꆽꆳꃰꌩꁧꀕꍡꌺꊰꁧ,ꑌꃢꎔꃨꁨꐞꅩꇉꀕꌠꈚ,ꏢꄖꑋꈌꉘꑊꉬꇮꏸꏓꋍꋬꇌꇁꌟꌡꃅ。ꃅꅉꄩ,ꃧꀕꀮꊰꎍꊌꀋꂿ。
ꁦꀑꋌꁕꃅꁨꇉꀕ,ꆧꁨꊼꇅꌺꀂꏾꎇꎼꇁ,ꌕꈈꃅꅐꄩꊪꅪꃅꐛꌠꃅꃴꄩꎑ。ꋋꄮꇬ,ꆳꃰꃧꃨꀑꐕꄉꆧꁨꆫ,ꆧꁨꑋꀁꏾꈎꌊꆳꃰꉜꄉ,ꋌꇅꃅ,ꂷꇭꑌꈋꈧꐺꈨꌠꌋꆀꊾꒌꀧꇖꊪꇖꃅꐛꌠꉬꇮꑍꁧꌐꇈ,ꈭꀕꇍꀕꆈꁨꇤꊭꅍ,ꆧꁨꌋꆀꃧꃨꌕꈈꀕꌠꃅꃴꃄꅉꑠꃅꉾꃪꂷꀉꄂꊏꇈ。
ꋍꑠꆹꑍꃀꑍꂵꇖꀕꇈꊜꋽꄷꌠꄡꑟꀐ。ꃧꃨꀕꄮꀁꎴ,ꀋꎪꃅꆧꁨꐛꒆꄎꌬꃅꐛꄮꑋꊝꊋꄡꑟ;ꀊꅰꃅꆧꁨꑭꏦꂓꅑꋍꑠꑋꀃꑍꈊꄮꀉꄂꉬꏭꁮ,ꀋꄸꄷꂿꃅꀕꉩꉐꐙꑠꋒꑲꆏ,ꃅꈋꃅꏦꐛꒌꑠꃅꎔꃨꀋꄏ。ꀉꁁ,ꉢꉜꆫꊿꋌꂷꇫꐥꇫꂿꑲꑍꍑꄡꑟꌶ。
ꀋꄸꄷꃧꃨꀕꊰꀋꇮ,ꉪꊇꐥꋊꐥꍂꃅꅉꆺꋌꂷꄩꐥꄎꑳꆏ,ꃧꃨꆧꁨꐮꋒꑠꈨꂯꊽꉌꐡꑓꇗꇁꀋꄏꌠꉬ。ꃧꃨꀕꊰ,ꇬꅑꒆꇐꀑꇬꁨꐞꌬꑭꀁꎴꌠꉜꅐꇁꉆꐛꅹ,ꃧꃨꁌꒉꃧꃨꆫꉜ,ꃰꊿꌩꃨꏭꁌꒉꌠꉜꅐꇁꉆ。ꅉꆺꄩꑓꂭꋏꉚꀋꂪꃅꌦꆘꅝꌠꐥꇐ,ꋍꑍꎭꈓꁨꄉꐯꋒꑳꆏ,ꃰꊿꉌꃀꈐꇬꄉꇿꐪꄓ。ꋍꑠꆳꃰꃧꃨꀉꄂꀋꉬ,ꈜꃀꈤꋦꌠꂓꀋꐥꏜꁧꁬꂿꇬꑌꑠꃅꐛꄡꑟ。
ꋌꐛꋌꐙꃄꏦꐛꐪꊿꇫꉌꐡꑓꇗꇬꎷ,ꋍꑠꆹꉢꌉꈿꅉꇬꄉꌊꎖꉚꊌꇁꌠꉬ。ꀊꋨꇅꌠꉪꌊꊨꏦꑴꅉꂷꌠꀑꇬꃆꄔꁘꌠꈍꄮꌦꀋꐙꌠꄀ,ꋌꄮꑳꑌꋌꐛꋌꐙꃄꏦꐛꐪꊋꑌꏡꑌꄔꊋꑌꌠꉢꌋꅜ,ꄚꄉ,ꉠꉌꃀꀉꇨꃅꋍꃢꇘꑐꋺ。ꀋꉊꉢꉜꇬ,ꃄꏦꐛꐪꋌꈨꉬꇮꐋꀋꌡꅍꀋꐥ,ꀱꆽꉜꀋꐕꌠꉬ。
ꌉꆳꌐꇈꉈ,ꌢꎭꐥꋊꇅꌠꇬ,ꉢꉙꊰꎭꐪꆈꃃꃆꅉꃹ。ꃅꋅ,ꉢꀉꄂꄃꆹꃅꈺꌋꀕꇈꌕꈈꅍꎍꌠꁧꏡꄩꉆꄉ,ꋌꐛꋌꐙꋌꄮꉢꌋꐮꉌꈴ,ꉢꄸꈐꎙꊐꈴ,ꉢꉌꃀꇯꍝꀉꎂꀕꌠꐥꐨꊌꑟꉂ。ꉢꃄꏦꑴꁱꐥꐨꐥꄸꀊꋨꄮꇬꇯꆐꃅꇈꇁꀐ。
ꉢꃅꈋꃄꏦꊿꐨꍈꀋꂿꑠꑴꁱꀋꃹꌠꀋꉬꃅ,ꋌꐛꋌꐙꃅꈌꃄꏦꐥꐨꐪꐥꌠꉌꃹ。ꄚ,ꉢꑴꁱꄉꌠꃅꈋꃄꏦꈨꌠꈐꏭ,ꊿꂷꊌꂿꇁꀋꉆꄉꏽ。ꋍꑠꐛꅹ,ꉢꑴꁱꄉꌠꃄꏦꆹꃰꊿꉌꋽꑊꀡꌠꉬ。ꉢꆹꋌꐛꋌꐙꃄꏦꋽꉻꈳꄉꃰꊿꉌꂵꈐꃆꂮꑴꁱꌠꉬ。
ꉢꅉꀕꃅꑴꅉꁱꂯꌠꃆꂮꉪꏡꉨꌋꇬꎷ,ꉢꉌꐡꁱꇐꁰꄻꃅꌠꆹ,ꁦꉘꀕꌠꋌꐛꋌꐙꌋꆀꀋꁥꀋꄶꌠꐛꉻꐮꋒꈭꐨꉌꐡꄉꁰꄻꌠꉬ。ꌉꈿꌐꊂꒈꎧꈄꃅꀒꁨꆹꋊꌠꇬ,ꄮꈉꀉꑌꐯꀉꑌꄮꇬ,ꉢꃅꋊꈛꎼꌋꆀꐯꀋꏚꌠꈝꃀꈴꇈꁧ,ꀋꃅꉜꎼꇁꇬ,ꈜꃀꋌꏢꍑꏢꉬ,ꋋꊂ,ꉢꉌꊋꑌꐪꊛꄉꍬꅷꁧꂯꌠꉬ。
ꃰꊿꆺꄡꒉꃅꋌꐛꋌꐙꌋꆀꃅꈋꃄꏦꊝꄡꑟ。ꑠꃅꄉ,ꉈꏭꁧꄻꅐꑳꐥꇬ,ꋋꎂꃅꋌꐛꋌꐙꌋꆀꐮꋒ,ꀋꉬꀑꇬꌞꃅꄷꉜꆫꁧ,ꌞꊿꐥꐨꉪꐪꅉꐚꌶ。ꅺꌡꉪꊇꀀꅉꁡꇤꇬꌩꁧꀕꄩꌩꏾꁬꉬꄿꂿ,ꉌꊧꄉꇫꉚꑳꆏ,ꐥꐨꄜꅍꉪꐙꇁꉆꌠ。
ꉢꉻꈫꈐꋦꌠꌩꁧꀕꉜꐺ,ꀋꎪꃅꉉꇬ,ꉢꉈꑟꀋꈻꃅꌩꇇꄩꌩꏾꁬꆫꐺꌠꉬ,ꀋꃅ,ꋌꀊꃴꇈꎔꃨꁏ,ꃅꎸꄮꐰꈨꑭꇂꃴꄉꏹꌬꏷꌬꁨꐞꈩ。ꉢꉪꋌꅿꁮꌺꃅꐛꎍꄮꉢꊌꂿꋺꌠꃆꂮꄀ。ꀊꋨꇅꌠꆹꀋꉊꄻꈎꃅꋆꃹꆹꄮ,ꄚꅿꁮꌩꏾꋌꏾꅿꅐꀋꇁꅉꇬ,ꈬꐙꇈꀊꏂꌩꏾꁬꇬꎑ,ꀊꉘꀋꐛꇬꆏꌩꏾꀊꏂꋌꁬꌩꁧꍡꌺꄩꄉꊰꃅꅉꅞ,ꋍꊁꂴꆽꐞꇪꋌꊫꄩ,ꅿꁮꋌꍈꊊꑌꏡꑌꉘꁇꁉꃅꒆꅷꇁꀐ。
ꈻꆳꈍꃅꁏꄿꂿ,ꃰꐎꈍꃅꋪꐵꏿꄿꂿ,ꋌꌕꈄꃅꑋꈌꇁꉚꇬꎷ,ꀅꌳꀅꌳꃅꊋꃤꊭꋍꇭꀧꇬꀀꄉꇬꎷ。ꋍꑍꎸꄑ,ꂷꉐꀄꊭꑠꄲꐛꇈꃅꊸꇁ,ꌩꇇꄩꐯꏑꌠꉐꂶꍗꀕꉢꊌꂿ,ꏷꐥꅍ,ꑽꑊꇓꃅ,ꂶꂷꅐꏀꅿꁮꋌꈨꉐꒉꀨꐛꅹꏸꋽꏷꌬꃅꎍꌐ。ꄚꄉꏜꁧꑋꅿꁮꅿꇁꃲꌠꉢꌋꇁ,ꑋꈌꄮꐰꑟꇁꃲ。
ꑋꈌꑟꇁꀐ,ꌩꁧꄙꃪꉌꇿꑓꇿꃅꀊꃴꇁ。ꄚꆏ,ꊰꃅꅉꄩꎍꈬꐚꇈꌠꌩꏾꀊꏂꈨꌠꆹ,ꈍꄮꇯꆐꍹꐛꆿꐛꐈꊖꆈꐛꀋꐙꀐ。
ꆏꐳꃅꒆꌊꌩꏾꀄꊭꑠꁬꐛ,ꃅꎸꉘꃀꄮꐰꋌꉘꁮꇂꃴꄉꃴꁮꏂꄀ。ꏾꃴꋦꁧꀂꆓꃅꎍꌠꌩꏾ,ꋌꄮꉘꁇꁉꊋꑌꁦꅤꄮꐰꉬꑴꇬ,ꉮꁮꈏꃹꇁꉆꄮꑌꉬ。ꆏꐥꅍꀋꐥꃅꊷꄮꐰꋩ,ꀋꃋꌩꏾꄊꀖꈨꌠꌋꐮꐊꌩꁧꌐꒉꁬꐛ,ꌩꇪꈨꌠꒉꁿꎍꌐ。
ꉢꅽꋌꉈꃆꂮꎖꉚꇈꇁ。ꉢꊌꂿꌠ:ꎸꐧꈐꇬꌩꁧꌐꒉꀊꄖꌠꇂꃴꁯꎓꂿꃚꎴ,ꆲꆈꋍꄲꁏꊁ,“ꉼꀕ”ꄹꁯꎓꂿꃚꐈꌌꇕꈻꐒꃚꐛꁧ,ꂿꃅꑋꋌꐊꄉꈺꅷꇁ,ꁯꎓꃚꈘꊂ,ꌩꐴꑭꇬꁯꄷꁻꂢꉙꃚꈨꇁꌦ,ꁯꄷꑵꃚꀺꃃꑳꏾꃅꆈꁨꇤꊭꌠꃅꍵꈊꃀꁦꎂꂿꃚꀉꑌꈨꇱ。
ꌩꏾꂴꆧꐨ,ꀋꋓꀋꉪꃅꆈꋧꐛꁏꆘꅝ,ꊁꆏꐈꌊꌩꏾꀊꏀꑠꁬꐛ,ꈺꆳꈐꇬꄉꁏꈩꎍ。ꈊꃀꍵꉐꌍꑓꅥ,ꊂꄹꉇꎸꄑꄓꇁꇬ,ꌩꐞꄩꅽꐪꀋꁮꑓꀋꂿꆘꅝ,ꌩꐞꆏꇬꎑꀉꋩꈚꇬꉈꑴꅿꁮꀮꅿꅐꇁꌠꀉꄂꊌꂿ。ꅿꁮꌺꋌꍈꀊꃴꇁꄮꇬꆏ,ꂴꌩꏾꀊꏂꁬꌠ,ꋌꈍꄮꇯꆐꊰꃅꅉꅞ,ꊖꆈꉱꃹꇈꃲ。
ꋍꑠꆹꋌꐛꈳꏦꉬꑴ,ꌩꏾꀊꃴꑠꁬꀉꄂꀋꉬꃅ,ꋧꃅꇬꋦꌠꈀꐥꇐꉬꇮꐯꌠꌐ。ꐔꊰꐴꃹꊂ,ꈻꇐꀋꐥꌠꐛꃅꐙꉇꇷꀋꉬ。ꌩꏾꀊꏂꋌꈍꑌꁬꐛꅹꌩꁧꀉꒉꋌꁧꉘꁇꁉꐛꄮꆦꇁ。ꌩꏾꋌꁬꅿꅐꇁꇈꈬꐙꑍꁧꌠꆹꃅꋊꐛꐈꎷꌠꌐꋉ。
ꐯꌟꌠ,ꊿꂷꌦꑴꇬꃰꊿꋦꐪꌋꆀꐯꃆꂮꐥꌠꉬ。ꌦ,ꈀꄸꑌꇫꏦ,ꄚꆏꊨꏦꀑꇬꀨꌋꃅꈭꐨ,ꌞꊿꀑꇬꑌꄡꇗꀨꌋꃅꑲꆏ,ꆎꐥꇈꄽꂫꑟ,ꉈꑴꀱꃄꅉꃹꂯꄮꇬ,ꆏꉘꀋꇉꃅꇿꌶ。ꑠꆹꉢꐷꈭꈐꏭꌩꏾꁬꂿꄉꉪꐚꇁꌠ。ꋌꈨꀉꄂꀋꉬ,ꋌꆹꌩꏾꀉꋩꁬꉠꏯꌰꃅꌥꀕꐤꀕꌠꀰꏮꃆꂮꉉꌠꉬ。
（ꉉꀽ：ꄯꒉꋋꁬ《ꄏꎭꈉꑴꁱꇐꃪꋐ》ꈐꏭꌊꌋꁏꁬ ꀋꇐꏠꆧ ꁏꌠ）
