ꀎꋏꇐꀳꇬ“ꁧꇁꇈꄅꄖ,ꐓꇌꀜꃅꌒ;ꆈꒉꃴꍚꀕ,ꉜꏂꆗꃅꌒ;ꃪꅪꅩꑳꀕ,ꐛꑿꇖꃅꌒ;ꀿꃅꍞꄅꄖ,ꅩꌺꈩꃅꌒ;ꑋꈌꊸꆳꁏ,ꁬꃨꀕꃅꌒ”ꄷ,ꋋꆹꀋꐯꐤꀋꁨꌠ。VOe彝族人网（彝人网）- 彝族文化网络博物馆
   ꁍꇩꀊꏀꋋꂷꄻꐛꈭꐨ,ꍏꉸꊿꋅꉬꊰꃘꁯꌠ,ꁍꇩꀉꂿꑍꐎꋙꊰꍈꄉ,ꊿꋅꃧꀕꉬꊰꃘꀮꌠꐯꇯꆏꄿꉠꄩꐂꃅꃨ,ꃨꇊꃨꎔꄅ,ꀊꅰꃨꀊꅰꅪꋜꀕꃅꋽ,ꆈꌠꃧꃨꃧꀑꂚꃨꋋꀮꄈꑌꀊꅰꃅꎔꌊꊽꑓꐛꊽꉌꇿꇬꅜ。VOe彝族人网（彝人网）- 彝族文化网络博物馆
   ꉪꆹꉘꃅꁦꀑꋦꌠꃧꃨ_ꇉꄩꂚꃨ,ꂚꃨꋋꀮꆹꍏꇩꇭꍣꄈ、ꁍꇩꀉꂿꀨꎹꌠꇂꃴꄉ,ꋍꋏꇈꋍꋏ、ꋍꈓꇈꋍꈓꃅꐤꅉꋼꅉꑟ。ꆈꌠꇐꀳꇬ”ꀃꌋꏁꀊꆨ,ꁍꁇꑲꅉꆏ,ꌺꇖꃄꇴꋊ;ꁍꁇꈀꇽꅉ,ꌺꇖꈁꋶꉼ;ꁍꁇꎼꒂꅉ,ꌺꇖꈤꏮꈚ;ꁍꁇꈌꌋꅉ,ꌺꇖꋍꇬꇴ;ꁍꁇꉛꈹꅉ,ꌺꇖꉛꂫꌌ”ꄷ。ꉪꆈꌠꋋꁯꑌ,ꅔꊂꁬꃧꀕ,ꉪꑌꄚꈿꃨ;ꇉꊂꂚꃧꀕ,ꉪꑌꄚꈿꃨ;ꆈꒉꀋꃀꐊ,ꄄꁁꎿꆈꉪꏮꋺ;ꉷꃅꄇꈜꍞꄉ,ꀃꇁꉷꃅꉪꏮꋺ;ꁦꀑꇓꂃꐊꄉ,ꆲꏂꌔꄲꉪꄡꋺ;ꌞꌺꃆꇭꋩ,ꉪꑌꄚꈿꋩ;ꌞꌺꋍꇅꋪ,ꉪꆹꌕꇇꐂꃅꑠꁯꉬꐛꅹ,ꁍꇁꀿꋏꍂꃅꁍꇩꑾꌋꈤꊂꉪꋦꅷꀃꑍꋋꄮꑟ,ꄷꀋꁧꌞꌺꈁꃅꅍꃅꇬꎷ,ꁍꇩꋈꄻꑞꑌꉪꑆꊋꋍꈨꍆ。ꉪꑞꑠꑷꑌ,ꊨꏦꅇꂷꁱꂷꐥ,ꀉꁌꂓꅑꇖ,ꀋꁧꂓꅑꌺ;ꀋꃀꍔꂄꌺ,ꌞꌺꋍꂓꄜ,ꉪꆹꊯꂓꄜꃅꄉꑞꑌꌞꊂꀋꊰꃅꐥꅷꇁ,ꋍꋏꄑꋍꋏꏭꀋꋌꃅꐥꅷꇁꁯꉬ。VOe彝族人网（彝人网）- 彝族文化网络博物馆
   ꆈꌠꇐꀳꇬ“ꀿꈄꌺꀋꏦ,ꃀꎔꅪꀋꃠ,ꊾꆹꍔ,ꃄꆹꁆ,ꀐꐩꃀꍔꅐ,ꎽꀮꍒꅐ,ꌩꄩꑙꌺꌩꍔꅐ,ꇉꅶꉑꀮꎔꍒꅐ,ꌭꊂꍀꆿꈄꍔꅐ”ꄷ。ꆈꌠꇆ,ꅽꀉꁌꀋꁧꇯꆏꎔꋊꎔ、ꈄꋊꈄ,ꀊꆨꃅꋍꑍꇯꆏꅽꂓꃅꑆꈏꄅꉇꄅꀋꈨꅉꀋꐥ,ꊿꋅꉬꊰꎖꁯꌠꇢꊭ,ꅽꂓꌠꈨꇎꁯꉬ。ꀃꌋꏁꀊꆨꇇꃛꇇꆀ,ꎹꀕꑗꅪ、ꇴꊈꁍꌠꃮꃶ、ꐈꀮꐧꃅꋦꊂꅑꅷꇁꌠ,ꍝꇰꀉꇐ、ꐧꃅꃵꃶ、ꌦꌺꄂꅪ、ꌿꌺꈯꄿ、ꎺꌺꆳꄿ、ꃄꄻꑿꊪ,ꄜꀘꎥꃅ、ꃀꈌꄹꐯ、ꉻꀘꆈꈾ、ꉒꀘꀊꐞꏤꑠꄿꄮꇬ,ꏃꊰꃅꄔꐞ、ꏃꃅꒊꊝꂋꌠꄙ,ꃄꄻꊁꄻ、ꁧꊨꇈꐽ,ꑌꇁꉆꇨꄙ、ꒉꇁꃪꉮꄙ,ꆈꌠꌺꇖꄚꄉꋌꌌꇫꋦꇫꑆꄉ。ꊁꋍꋏꄿꌟꆏ,ꄇꅿꇓꈓꇂꍋꃰꃅꇫꄉꏲ,ꆿꁮꀒꎂꏧꄖꏧꍣꇫꄉꐛ,ꆹꀕꌅꃀ、ꀊꄙꀋꆀꇫꄉꄿ,ꇍꈩꂟꉻꉬꄷꍗꇭꆃꂽꄙ,ꀊꎞꃭꌒꌅꃀꇨ,ꇂꏧꆀꌺꄾꄉꒊꆈꈈꂰꋌꌌꇫꄉꇙ,ꆈꌠꋋꁯꀉꁘꁯꉬꄷꌠꈀꄸꋌꉇꀬ?VOe彝族人网（彝人网）- 彝族文化网络博物馆
   ꇉꐙꀉꒉꌩꋦꄕꆏꌩꋲꌩꑠꅐ,ꐦꐛꀊꐯꁬꋦꄕꆏꁬꋲꆰꑠꅐ,ꐧꋦꀉꒉꊿꋦꄕꆏꅇꋲꉐꑞꅐ,ꆈꌠꏓꂱꑌꇭꍣꄈꏃꂠꌠꇂꃴꄉ,ꃖꏧꇗꅉ、ꐚꁦꐧꋦꇗꅉꀉꆹꇔ,ꉇꄅꁮꐚꎞ、ꈏꇓꊿꏠꐮꉈꈽꌠꇔꄉ,ꊿꇬꋬꂻ,ꑌꑿꀻꎆ,ꆿꍯꂷꌵ。ꁍꇩꀊꏀꋋꂷꄻꐛꈭꐨ,ꐥꐨꀊꏀꅐ,ꄇꈜꀊꏀꍬꇬꆏ,ꆈꌠꁱꇐꀊꏀꌠꑌꄚꊂꈹꄉꅐꇁ,ꁱꊿꆈꌠꀉꑳꈧꌠꑌꋍꋏꇈꋍꋏꃅꄚꄉꄿꇁ,ꄷꀋꁧꉌꈲꆈꌠꅇꂷꁱꂷꑍꑵꌌꄉ,ꇌꏂꃙꋩꌺꀉꏮꃼꇁꃼꀋꌋ,ꑳꇁꑳꀋꌋꃅꁱꇐꈁꂄꀕ、ꈁꎔꀕ、ꈀꋽꀕ、ꐚꒉꌟꃅꐓꂿꀕꑠꈍꑋꊿꇱꁱꅐꇁ,ꆈꌠꋥꁕꏦꊀ、ꐥꐨꐥꄸꌋꆀꃅꇏꂶꄟꇿꇬꈍꃅꐙꌠꁱꇐꋋꈨꇬꅐꇁꌐ。ꁬꋦꏪꆀꀕ,ꁬꃨꀋꃷꎵ,ꐛꑿꈁꉪꇀꅉꍘ,ꁍꇩꀉꒉ,ꆈꌠꐩꋊꀊꎴ,ꆈꃅꆸꈈꋌꐛꋌꐙ,ꐧꋦꄹꏦ、ꐩꋊꃆꂮ、ꎆꏣꍔꍞꃆꂮ、ꋻꅑꃅꀹ、ꅇꂷꁱꂷ、ꀉꁌꁮꅉ、ꃆꃀꅺꊈꌋꆀꑇꇐꄻꇐꋍꑠꌐꀋꉆꐛꅹꃅ,ꀋꉊꌕꊰꈎꊬꌠꇬꇯꆏ,ꌧꈿꁱꇐꁱꂓꅑꊿꅿꐇ、ꅿꇂꑋ,ꐩꋊꀊꏀꀉꆹꑍꊭꐂ,ꁱꇐꆈꌠꏓꂱꄷꀋꁧꀉꁁꊿꋅꋋꂿꉌꇙꌐꑠꋉꁱꅐꇁ。ꉬꊰꈎꊬꌠꇬꅐꇁꌠꁱꊿꌠꑥꑟ、ꁋꃏ、ꇊꍞꑴ、ꑪꍔꇩꏤꋋꈨꃅꁦꏦꄺꀱꊋꐛ、ꉼꊞꎹꄻ、ꁍꇩꀊꏀꋉꃆꂮꁱꅐꇁꄉ,ꉹꁌꉌꊋꄏ。“ꁱꀕꇝꂱ”ꈳꅐ,ꀋꂄ“ꇖꑻꁥꌠ”ꅥꆿꐛꈭꐨꅐꇁꌠꁱꊿꀊꏀꐙꃅꌳꈄ、ꀋꆀꋨꎆ、ꀈꆺꏤꋍꋏꇬꊎꄿꇁ,ꆈꌠꃅꄷꁱꇐꊽꉌꐡꑓꇗꑠꈨꁱꅐꇁꄉ,ꊿꃅꋋꂿꎬꐚꐛ,ꋍꁠꆧꀋꋠꉈꉩꀕꌠꐛꇬꅜ。ꋌꊂꈭꐨꆏ,ꇉꊂꂸꃉꅿꃅꅿ,ꆈꌠꀉꑳꁱꇐꁱꊿꀊꏀꁁꐷ、ꉢꊉꑟ、ꑪꏤꀘ、ꊝꒄꄤꏤꑠꁥꄚꊂꈹꄉꍻꅐꇀꌦꀐ,ꁱꅐꇁꌠꁱꇐꋍꊐꋍꊐꇈꋍꊐ,ꋍꁥꄑꋍꁥꄩꐂ,ꋀꊇꁱꅐꇁꌠꁱꇐꆏ,ꇉꄩꇪꀮꂾꃚꀉꏮꀿꇁꃀꉂꋌ,ꌩꃴꁯꎓꇕꃚꀉꏮꆀꇁꌱꉂꋌ,ꁱꇐꋋꈨꂿꊂꉂꐪꀉꏮꈘꀋꉆꇬꅜ。VOe彝族人网（彝人网）- 彝族文化网络博物馆
   ꀋꉊꉬꊰꈎꅑꀋꃋꈬꊰꈎꋋꊭꑟꌠ,ꈌꌧꉐꏵ、ꇐꀳꎴꏢꌋꆀꅇꃀꁱꂓꅑꌠꃷꐕꆿꄿ、ꐛꄃꂶꏦ、ꄜꀮꎥꀮ、ꇈꃶꆿꐂ、ꁍꂱꃚ、ꀋꎞꀀꊞ、ꀞꃀꐎꁬꃀ、ꂷꄓꏾ、ꊵꊪꏤꐋꀨꋋꈨꑠꁱꅐꇁꌠ,ꃶꐚꃅꇌꃚꉶꁱꄏꃅ,ꊾꊋꊿꌗꈍꑋꋌꄏꇝꂱꌤꑘꇬꊐ,ꎹꄓꃪꀮꀉꏮꊿꋌꄖꋌꄓꌊꐂꇁꎹꉼꍗꑴꌤꑘꋈꄻꅉꊐ,ꇝꂱꌋꆀꌤꑘꋍꑞꋍꑵꈍꃅꋈꄻꌊꊋꐛꉏ!ꉡꆹꆈꌠꉬ,ꆈꌠꁱꊿꋋꈨꁯ、ꋋꈨꉁꅉ。ꋍꂷꋋꂷꊿꋋꉂ,ꉌꈲꃺꃶꆈꌠꃆꂮꎥꃪ、ꆈꌠꏂꀨꏓ、ꆈꌠꅇꂷꁱꂷꄻꌠꉢꋋꉂ,ꉌꈲꃑꇩꒄ,ꂷꑪꆃ、ꍯꌧꆀ、ꅿꂱ、ꍈꌡꒀ、ꑼꍡꄐꏤꋋꈨꐩꍂꃅꉢꇫꉂ、ꇫꁌꒉ,ꋋꆹꃶꐚꃅꊿꋅꀄꊭꀉꒉ,ꊿꄿꊾꁘꀋꍣꃅꆈꌠꎁꃅꌤꃅꌠ,ꋀꊇꑭꐨꆈꌠꃅꄷꁮ,ꇇꐪꆈꃅꆸꈈꎑ,ꇵꂷꆀꃅꁊꌠꀋꎺꄮꀋꐥ,ꋋꆹꆈꌠꌺꇖꐩꋊꐩꍂꃅꇬꎺꌠꉬ。ꁎꆦꌧꃀꆈꌠꀎꋏꀠꃛꃇꃈ、ꀋꇐꏂꋒ、ꍌꉼꊵ、ꆾꌖꋩꉐ、ꇑꍉꑪ、ꎸꃺꏸ、ꇊꉙꀈꐂ、ꎭꂵꃺꉐ、ꂷꆿꈴ、ꌜꊫꐃ、ꂴꐟꉐꈬ,ꂵꉌꃅꇢ、ꑠꍞꆀ、ꌜꑪꇤ、ꐞꇁꃺꑐ、ꆈꀜꀕꌧꂱ、ꎭꂵꐁꐂ、ꂶꎭꆿꃀ、ꐚꃮꏤꏦ、ꆃꒄꏾ、ꌠꇻꂱ、ꎭꂵꆿꑴ、ꍗꏧꑟꃅꑠꋍꂷꉚꋋꂷ,ꀋꇨꌠꀋꐥ,ꋋꈨꂿꇁꇬ,ꆈꌠꋋꁯꀁꋌꀋꊰꀞꉂꃅꑠꏢꉠꉌꂵꇬꃹꇁꇬꆏ,ꌤꃅꐙꄏ、ꋚꀋꋠꀃꃀꂮꌠꀋꎺ,ꈊꃀꀀꐜꌠꑌꀋꎺꇬꎷ,ꋋꆹꃶꐚꃅꈭꇁꈜꏀꀺꆈꌠꊂꋊꍬꌠꊿꉬ,ꋋꆹꆈꌠꊂꋊꈍꃅꇬꀋꎺꇁꉆꂯ?ꆈꌠꉬꄷꆏꋍꇬꇴ、ꋍꎴꉉ、ꋍꊱꎥꃪꇬꍣꅍꀋꅑꈧꌠꉬꀐ。VOe彝族人网（彝人网）- 彝族文化网络博物馆
   ꆈꌠꇐꀳꇬ“ꇗꅉꑡꅐꆏꃰꊿꑡꍬ,ꅔꐎꁬꌺꑡꅐꆏꑌꑿꑡꋠ”ꄷ,ꄈꅿꊿꋅꇗꅉꃪꌠꅐ,ꀊꆨꀘꂾꇇꇬꀀꌠꆈꌠꁱꂷꏮꇁꆈꌠꉹꁌꇇꇬꃹ,ꆈꌠꁱꂷꌶꅉꐛ,ꆈꌠꁱꂷꌤꃅꅉꐛ,ꆈꌠꁱꂷꀊꏀꌬꃅꇬꆏ,ꆈꌠꌺꆈꌠꁱꂷꌌꄉꌧꈿꁱꇐ、ꉌꐡꁱꇐ、ꑓꆫꁱꇐꑠꁱꌊꌜ、ꍏ、ꇩꏦꑭꊂꃅꈁꁠꊌꌠꐥ,ꋋꆹꆈꌠꐩꋊꇬꃅꃴꃄꅉꇢꃅꐛꐈꄉꅐꇁꌠꉬ。ꅺꌡꇬꀈꆺꃤꌧꈿꁱꇐ《ꐴꌋꆀꃨ》ꁬꌠ,ꐛꃭꁁꐷꃤ《ꁧꐙꃅꈋꌠꏀꉂꏣ》ꋐꌠꇩꏤꑭꊂꀁꑌꊿꋅꁱꇐꃆꇭꈁꁠꊌꀐ,ꀉꁁꏃꑳꄊꀕꃤ《ꌦꀱꄓꇁ》、ꐛꊪꆿꆉꃤ《ꀉꁘꊿ》、ꎭꂵꏤꏦꃤ《ꈌꌋꉆꈹꑍꃼꑌ》、ꎭꂵꋩꊽꃤ《ꃅꄷꂘꃀ》、ꀋꇐꏂꋒꃤ《ꄄꁏꎿꆈꑓꆫ》、ꎭꂵꐁꐂ《ꆈꃅꈎꏀ》、ꆥꌺꇔꇷꃤ《ꄈꅿꍔꊱꈨꏀꌬ》、ꀋꁈꃴꇤꃤ《ꉢꁦꀑꉆꄮꇬ》ꃅꋋꈨꑠꌜ、ꍏꈁꁠꊌ,ꄷꀋꁧꄹꁆꌋꌊꌶꅉꀉꂥꊐꌠꃤꂘꅍꄯꒉꄻ。ꋋꈨꈭꐨꆈꌠꀉꑳꇨꌠꐞꆫꄀꈬ、ꂵꉌꀕꈲꌺ、ꎸꍰꏮ、ꏃꎖꍀꉈ、ꀋꈑꃺꀕ、ꎭꂵꇐꄜ、ꀊꁠꃴꇤꃀꃅꑠ,ꋍꋏꇈꋍꋏ、ꋍꂷꉚꋍꂷ,ꀋꇨꂷꐥꅀ?ꆈꌠꀕꆗꑮꆜ、ꀎꋏꊂꋊ、ꋍꑞꋍꑵꌤꃅꅉꇬꀉꇨꑠꈨꐥꄷꆏꊽꉌꂵꇿ。ꋋꈨꂿꇁꇬ,ꆈꌠꁱꂷꌬꌊꈍꃅꐙꇁꀱꋦꌠꀋꉉꇬꈀꄸꑌꇬꌥꇫꅉꐚꌐꈨꉬꀐ。VOe彝族人网（彝人网）- 彝族文化网络博物馆
   ꆈꌠꇐꀳꇬ“ꀀꌺꍗꀋꇿ,ꐋꐊꇀꅉꈫ;ꃆꇭꍗꀋꇿ,ꏪꈜꇀꅉꈫ;ꀀꅪꍗꀋꇿ,ꈫꅐꇁꅉꈫ;ꀀꃀꍗꀋꇿ,ꌐꐊꇀꄟꉜ”ꄷ。ꆈꌠꌧꃀꀎꋏ、ꊂꋊ、ꌺꃰ、ꌋꅪ、ꂘꃀ、ꌶꌺꈀꄸꑌꆈꌠꁱꇐꃨꁍꇬꄉꃨꎔꌋ,ꐚꒉꈬꇬꄉꐚꏀꄵꌠꎹ,ꌩꏣꄉꎺꒃ,ꒉꏣꄉꉛꒃꄷꆏ,ꆈꌠꁱꇐꋋꀧꌌꊿꋅꃺꑌꈬꇬꄉꑋꅉꉆꈉꐥ,ꄷꀋꁧꆈꌠꎁꃅꋍꇬꄜꄎꌠꆏꊛꄉꌷ,ꊛꄉꃅ—ꋌꃀꂒꇬꇫꎍꀐꌠꁱꊿꊈ,ꑓꏮꉈꄡꉜ、ꑭꎅꊂꄡꄔ、ꇇꎇꊂꄡꉩꃅꀒꁨꉜꄉꂵ,ꄷꀋꁧꊂꋊꊁꒆꊛꄉꏃꌊꀒꁨꆹꅊꇈ!ꀋꉉꀐ,ꉢꀊꅰꉉꆏꀋꅰꉌꐡꇁ,ꀊꅰꉉꆏꉠꉌꂵꂶꌠꀊꅰꐂꇬꎷ,ꄚꉎꌻꇭꌳꄿ、ꅩꄿꋋꈨꐥꈭꐨ,ꉡꑌꆈꌠꂷꉬꄷ,ꌞꄹꄉꈌꒉꉎꉐꍔꄎꀐ,ꋋꆹꌺꄿꀉꂿꍔꅉꆘꅉꃅ,ꌺꏪꀉꂿꍕꇁꑕꅉꃅꄷꌠꋋꑠꄜꀑꀞ!VOe彝族人网（彝人网）- 彝族文化网络博物馆
 VOe彝族人网（彝人网）- 彝族文化网络博物馆