ꇖꆪ23ꑍꅑ25ꑍꑟꌠ,ꁱꊿꆹꌧꍧꌜꆃꎭꆈꌠꊨꏦꏱꅉꍏꃀꁧꑤꆈꌠꌧꇐꀎꉼꇬꃛꉼꍈꇑꑦꑪ、ꌠꏣꀘꐊꄉꇭꍏꌜꈩꆫꑘꀻꎆꃀꀉꒉꈿꅉꆹꇈ,ꆈꌠꌋꅪꂓꅑꂒꋦꌠꎸꑣꂶꌠꀀꅉ、ꀋꆨꆈꌠꋦꁍ、ꌌꉪꊋꌠꎴꑭꃅꀹ、ꎔꋽꌠꄊꃓꑤꑟꄉ,ꆈꌠꎸꑣꁰꁱꏁꇅꁤꇅꁏꌠꆫ,ꅡꊪꀕ、ꄉꉬꀕꌠꑦꊈꃚꆫꃬ,ꎸꑣꄃꁧꆫ,ꎸꑣꏂꀨꄉꑳꉜ,ꆈꌠꁰꁱꀉꑌꌧꅼꏁꇅꁨꇅꁏꌠꊿꋌꎼꉌꂵꑌꐯꑌ。
ꋠꅍꈩꅉ:ꎸꑣꁰꁱꀋꐊꌠꀋꐥ
ꇭꍏꁮꐚꁁꏯꑟꀐꄷꆏ,ꎸꑣꅿꊿꋅꋯꑌꋍꃱꃅꌠꌌꈯꄟꃅꄉꌠꍔꍞꉌꊈꈐꏭꃹꌠꌡ,ꋠꅍꈩꅉ,ꑞꑌꎸꑣꁰꁱꀊꅼꌧꅼꌠꇫꐊꎍ。
ꊈꆀꑤ,ꉪꊇꆹꆫꃬꆹꏾꐯꏾꃅꆹꌊꑤꍰꑾꌋꈤꁁꏯꐛꌠꇩꏤꊐꌠꋌꐛꋌꐙꀧꌋꃅꅉꏜꋦꎿꈚꌠꑟ。ꄚꇬꆹꇭꍏꋌꐛꋌꐙꒉꐚꎾꃝꀉꒉꇊꀉꒉꂶꌠ,ꇩꏤꊐꌠꃅꈋꃄꏦꆫꃬꅉ,ꏓꇱꃅꊂ1.2ꃪꉻꏾꐥ,ꎿꄩꀊꂥꐨꆏ2171.7ꂰꐥ,ꎿꇬꏜꋦꆈꊉꀕꄉꌌꏜꋦꎿꂓꄉꌠ。ꀋꉬꀋꉆꃅꌌꀧꌋꃅꌠꆏꈭꃀꑠꉌꊭꉌꇓ178ꑵꐥ,ꉗꉘꅔꏂꒉꊩꋦꐥꑠꈚ,ꇩꏤꌌꀋꉬꀋꉆꃅꀧꌋꃅꌠꎿꇬꋦꇐ37ꑵꌋꆀꉛ10ꎖꑵꐥ。
ꌧꅷꎸꑣꂶꌠꃆꂮꄀꀐꄷꆏ,ꇉꇳꌠꆈꌠꌋꅪꂶꌠꀑꒉꑊꒉꇴꃅ,“ꋋꆹꉪꊇꊿꋅꋋꂷꅿꌳꈄꀋꃀꉬ,ꉪꊇꉌꂵꈐꅿꌊꌺꉬ,ꋌꊿꋅꋯꑌꍔꊱꌬꄉ,ꀀꅉꑠꃅꉾꃪꌠꍸꉪꁳꄉꇈ。”
ꎿꄩꄉꇉꑌꇈꇁꎿꆸꈈꑟꄷꌦ,ꍔꑠꏲꌋꆹꉪꋀꇱꋩꌊꃅꄷꋌꈚꎸꑣꁰꁱꐋꀋꌡꐨꐥꌠꊈꆀꉻꄫꉻꇬ、ꃮꁖꊭꌋꆀꈾꋚꋠꁧ。ꋠꇐꋋꌕꑵꆹꃅꄷꋌꈚꆈꌠꋠꇐꈐꏭꀋꉬꀋꉆꑠꌕꑵ。ꉪꊇꋀꇱꋩꌊ“ꊈꆀꃮꁖꊭꉻꇬ”ꈚꌠꇬꑟ,ꉻꄫꉻꇬꈐꏭꃱꆈ、ꄔꃛꐊ,ꀊꃴ、ꀊꅪ、ꀊꐎꌠꐮꐊꇁꄉ,ꊿꋌꎼꋠꏾꐨꋋꇅꃅꉀꐕꆹ。ꃮꁖꊭꆹꑤꇔꌌꒈꆽꄉꌠꉬꄷꑴꇬ,ꄚꑍꃀꑍꉪꊇꑠꃅꄻꄉꋠꌠꌋꆀꐯꀋꌡ,ꁬꋌꅿꉗꑌꀋꐊ。ꈾꋚꀊꅰꃅꐋꀋꌡ,ꋚꈧꌠꈽꋠꇬꀋꇊꆏꊽꈂꀸꇬꄉꀜꐺꌠꌡ。ꉪꊇꆹꂊꃅꋚꎔꋋꐚꋠꄉꈭꐨ,ꑭꄑꀒꁨꁧꌦꀐ。
ꄊꃓꑟꇬꆏ,ꇓꈓꂶꌠꇬꑲꇤꈧꌠꃅꆈꌠꁰꁱꐋꀋꌡꐨꐊꈴꌐ。ꊿꋅꃅꀹꎥꃪꌠꌐꌷꌧꃀꆏꑲꋉꇣꄻꐺꌠꁦꋠꑠꂷꅲꇫꆹ:“ꍔꃚꆍꏭꑠꃅꋈꄻꄷꌠꅀ?”ꅇꀱ:“ꉬꑴꇅ,ꍔꃚꄉꀃꈈꌍꑓꑠꒃꒉ,ꍔꃚꀥꋍꇱꎆꁵꑴꌦ。”
ꎸꑣꊰꋂꅍꋠ,ꎸꑣꎧꏸꅝ,ꎸꑣꁰꁱꉜ,ꎸꑣꃅꈋꃄꏦꆫ。ꎸꑣꁰꁱꆹꀋꐊꅉꀋꐥ。ꑍꃀꑍꎧꀋꅝꌠꉪꋌꁥꑌ,ꎼꄚꄉꎸꑣꎧꍔꈌꑟꀐ。ꎧꊿꀋꑱꃅ,ꁰꁱꄉꀊꅰꊿꑱꎍꌠꌡ。
ꈩꆫꎆꏣ:ꎸꑣꁰꁱꉘꇉ
ꉪꊇꆹꋍꇅꂯꀋꆏꃅꇫꑟꄷꌦꎸꑣꏂꀨꄉꑳꌋꆀꇭꍏꑦꊈꃚꐛꅉꈚꌠꉜꄉꆹ。ꆈꌠꑳꇤꐋꀋꌡꐨꐥꌠꀯꑠꇠꏦꎫꈛꈌꈚꌠꆏꐎꀃꈈ,ꋍꊂꆏꏂꀃꈈ、ꐯꀃꈈ。ꀃꈈꋍꁬꋑꀋꋒꀃꈈꌕꐬꁮ,ꌷꁧꇖꁧꌠꄩꋓꋽꅇꇬꅑ,ꂴꇫꌠꉌꈲꁱꂷꃅꄉ,ꊁꇬꌠꆏꆈꌠꁱꂷꃅꄉ。ꅇꋋꈨꆹꎸꑣꆈꌠꋯꑌ,ꊿꋅꋯꑌꌠꍔꌬꄉ,ꏓꂱꈲꏣꊌꌠꀮꄑꌠ。
ꏂꀃꈈꁬꌠꈴꇁꈭꐨꑳꁆꏯꆏꎸꑣꏂꀨꄉꑳꌋꆀꎸꑣꄃꁧ。ꌩꋦꇓꋦꑠꐕꈴ,ꑟꂷꐇꋒꇶꌠꈴꇬꆏꎸꑣꂶꌠꅿꁱꂶꌠꊌꂿꉆꀐ,ꇭꀧꆳꁿꀂꄁꈚ,ꐧꇬꑱꃀꌌ,ꀂꏾꀍꃓꅑ。ꊾꁱꑍꁁꏯꆏꃨꇰꃅꄉꂚꃨꑍꁧꄻꄚꄉ。
ꎸꑣꏂꀨꄉꑳꃹꇁꇬꆏ,ꀊꆨꆹꃆꐥꇐꐛꐨꊽꑓꋪꇬꃹꇁ。ꂽꑼ、ꊪꑭꑠꁱꐊꌐ。ꑦꊈꃚꑳꇤꌊꉜꇁꇬ,ꄚꇬꆹꀄꊭꃅꐙ。ꃼꁆꏯꉜꄉꏮꄉꎴꆀꈝꃀꋍꉐꂰꀋꇈꐥꑠꐕꈴꇬꆏ,ꎸꑣꄃꅉꑟꀐ。ꄃꁧꑍꁁꏯꌷꁧꑍꁧꋦ,ꅂꊐꈬꊐꈴꇬꆏꄃꁧꇓꌐ,ꇓꌐꐛꅉꄉꀱꉈꑴꅂꊐꈬꊐꈴꇬꆏꃰꇌꈭꃅꐙꈭꐨꀊꐎꌠꎸꑣꄃꁧꂶꌠ,ꄃꁧꂶꌠꆹꈬꊐꃅꄉ。ꄃꁧꈭꇍꑴꁱꑴꄉ,ꈭꇍꇊꑴꈧꌠꑌꀊꐎꃅꄻꄉ。
ꇈꒉꃪꒉ:ꇐꑌꌋꉆ
ꇖꆪ24ꑍꄹꉇ,ꄊꃓꑤꏲꌋꐋꀨꈧꌠꆹꉪꊇꋀꏃꌊꇩꏤꊐꌠꌩꏪꋍꏅꈩꅉꇬꂚꃨꆫꃬꆹ。ꋋꊭꇬꆹꂚꃨꀕꇰꐯꃨꇰꃅꄉꇄꌠꉬꄉ,ꇈꈬꇉꃪꑠꃅꉙꒉꌊꉙꄉꌠꌡ。ꂚꃨꌩꏪꋋꂷꆹꅑꀋꃋꑟꌠꊿꅉꐚꌠꀧꌋꃅꌊꉾꃪ、ꃅꊂꀉꒉ、ꂚꃨꀉꑌꑵꐥꌠꂚꃨꏪꀕꑠꈚꉬ。ꊿꌌ“ꋧꃅꃨꁍ”、“ꅉꆺꐧꃬꆈꋓ”ꂓꄉ。
ꇩꏤꊐꌠꃅꈋꃄꏦꆫꃬꅉꋌꈚꆹꃪꐬꆈꉬꀕꌠꐛ,ꒉꀕꐝꍠꀕ,ꎿꒉꆈꃃꃆ,ꌩꋦꃴꇉꀕ,ꁬꃨꀕꈍꀕ。ꋍꈚꉚꋍꈚ,ꑓꆫꌒꅉꑠꆫꇱꀋꏦꃅꊽꃀꈴꒉꇬꎷ。ꉪꊇꆹꈩꌒꆫꌒꃅꑠꃢꈩꆫꀐ。
ꉪꊇꆹꐞꀋꄚꃅꎸꑣꀀꅉꐞ,ꎸꑣꁰꁱꉌꂵꑌꌊꉈꀱꀐ。ꀱꇁꌠꈝꃀꇬ,ꉌꂵꄸꈐꆹꈍꃅꌞꃤꌷꄉꊨꏦꃅꄷꀖꁉ?ꈍꃅꄉꎆꏣꀻꎆꌠꊥꎆꑠꉪꅷꐺ。ꀱꉈꑟꈭꐨꋋꇅꃅꄯꒉꁱꄉꉪꐨꄜꎼꇁꂿꉁ。
《ꆃꎭꑍꄜ》2012ꈎ5ꆪ13ꑍ 3ꁁꏯꇬꎑꁬ
