ꋍꑍꆿꃀꂷꑞꑌꊌꀋꋠꃅ，ꂮꌊꀒꒉꈙꀕꈗꃅꇬꏷꐺ。ꇁꌊꒊꄝꂷꋑꑟ，ꋌꉪꇬ：ꎸꊌꀋꋠꆏꒉꋍꁯꇵꅜꑌꊼꇅꍑꀐꉂꄉ，ꇵꆹꎇꌊꒉꅝꆸꄮꇬ，ꀌꀠꂷꊧꇙꀜꃅꋍꏸꑭꋒꄉꀜꇁ，ꆿꃀꀃꐒꀋꅝꃅ，ꈌꁉꌊꀌꀠꂶꌠꑝꆹ，ꀌꀠꉉꇬ：“ꆿꅪꀊꃺꅽꇴꅽꉻꋍꒈꒊ，ꆏꇁꌊꉢꀌꀠꑠꂷꋠꇮꅀ?ꆏꉡꋠꇬꆹꋍꁠꆚꀉꄂꐛ，ꂊꃅꂊꀋꄐꂮꃅꂮꀋꋌ”ꄷ。ꆿꃀꉉꇬ：“ꉢꀃꑍꂮꐯꂮꀐ，ꋍꁠꆚꋟꌦꋩꇿ，ꀃꐒꅝꑊꎷꁠꆚꋠ”ꄷ，ꉉꑌꃅꄉꄮꇬꆏꈌꁉꌊꀌꀠꏭꆹꌦꀐ，ꀌꀠꉈꑴꊼꇅꀜꇈꉉꇬ：“ꆿꅪꀊꃺꉠꇭꀧꈂꃅꑌꆏꇣꋠꀐ，ꄚꉣꑊꂴꆽꊼꇅꐂꀥ，ꈀꄸꄉꐂꉔꉏ，ꉢꐂꆎꀋꏣꑲꆏ，ꉠꇭꀧꀋꎪꃅꉌꃹꑓꐛꃅꆎꍈꀐ，ꆏꐂꉡꀋꏣꑲꆏ，ꆏꉡꋠꀋꇮꀐ”ꄷ。ꆿꃀꉪꇬ“ꀌꀠꑓꉂꅽꌌꂷ，ꀀꏸꑭꁆꂯꀋꒊ，ꐂꀥꇬꆹꑓꌧꂭꄉꈁꏾꃅꐂꇬꑌ，ꐂꇫꊋꄎꑴꉂ‘ꍑꑴ’ꄷ”，ꀌꀠꄹꇬ：“ꆿꅪꀊꃺꆎꆹꀉꒉꌠꉥ，ꆏꂴꐂ”ꄷ。“ꂴꐂꑲꆏꂴꐂꀋꆏ”ꄷ，ꆿꃀꌙꃅꐂꅶꁉꅞ，ꀌꀠꆿꃀꁍꎼꇬꎑꅶꁉꅞ，ꆿꃀꆏ“ꀌꀠꑓꉂꆏꐂꄡꑟꀐ”ꄷ，ꀌꀠꆿꃀꊂꆈꄉ，“ꉢꈂꄮꅉꆐꐂꍤꁆꅐꀐ”ꄷ。ꆿꃀꉈꑴꌙꃅꐂꅶꁉꅐ，ꀌꀠꆿꃀꁍꎼꎑꄉꅶꁉꑟ，ꆿꃀꆏ“ꀌꀠꑓꉂꐂꄿꀐ”ꄷ，ꀌꀠꆿꃀꊂꉆꄉꉉꇬ：“ꉢꏛꃅꈠꃅꅉꆐꐂꈴꇁꀐꃅꄉ”ꄷ，ꄚꆿꃀꉌꃀꃴꀋꌦ。ꑓꉂꋍꇅꋍꇈ，ꀌꀠꋠꂯꐛꅹꄉꏡꁈꋍꏢꏂꅐꇀꌦꀐ。“ꀌꀠꑓꉂ，ꋌꃢꆎꊋꃅꄉ，ꄚꉣꑊꉈꑴꐷꀥ，ꈀꄸꄉꀉꑌꃅꐷꄎꉏ，ꉢꐷꆎꀋꑍꑲꆏꉢꆎꀋꋠ，ꆏꐷꉡꀋꑍꑲꆏ，ꉢꆎꋠꀐ”ꄷ。ꀌꀠꊼꇅꉪꇈꉉꇬ：“ꍑꐯꍑ，ꆿꅪꀊꃺꆏꂴꐷꀞ”ꄷ。ꆿꃀꆏꊋꈁꑌꃅꇤꄉꐷ，ꀌꀠꂴꆽꆏ，ꀌꀠꇭꀧꂯꀋꒊꃅꎍ。ꆿꃀꂶꌠꄉꒉꇴꃅ，ꋌꉪꇬ，ꋌꃢꆏꀌꀠꈍꃅꑌꀂꇣꋠꀐꉂ。“ꀌꀠꑓꉂꆏꐷꄡꑟꀐ”ꄷ。ꀌꀠꇨꀋꊸꃅꇫꄉꐷꋒꃅ，ꇇꌌꇥꉢꇬꋍꇅꇵ、ꈂꀸꇬꄉꆿꑐꏢꒃꅐꇁ：(ꆿꑐꋋꏢꆏ，ꆿꃀꌋꆀꀌꀠꑋꐂꀥꄮꇬ、ꀌꀠꇱꌃꆿꃀꁍꎼꇬꇱꄉꄮꇬ、ꆿꑐꏢꋍꎐꂷꇬꎑꇈꌠ。)ꆿꃀꇫꅲ：“ꅽꑠꑞꉬꄷ?”ꀌꀠꆏꆿꑐꏢꉬꑴꄷ，ꆿꃀꄹꇬ：“ꈂꃅꆿꑐꏢꅽꈂꀸꇬꀀꇁ?”ꄷ，ꀌꀠꄹꇬ：“ꉠꀉꁌꀋꁧꆿꒃꆿꋠꇈ，ꆿꎸꇬꇉꑌꑴꌦ，ꆿꑐꏢꎐꂷꇬꑐꎍꑴꌦꅊꇈ”ꄷ，ꆿꃀꂶꌠꅇꂷꋋꈨꀕꇈ，ꋌꇷꏾꌌꀕꃅꇖꌋꍯ，ꋌꎼꑭꃺꇇꏵ，ꈂꄮꆶꇫꈴꁧꇮꀋꐚꃅꎍ，ꆿꃀꉉꇬ“ꉢꆎꀋꋠꀐ，ꉢꁧꀐꄷ，”ꉉꅉꉉꅉꃅꁍꎼꑙꄉꁈꁧꂯꄉꄮꇬꆏ，ꀌꀠꇬꏭ，“ꆿꅪꀊꃺꆏꀃꑍꇈꉈꆏꎔꃅꐥꇮꃅꐥ，ꀂꀋꉬꀁꄟꃅꄡꐛ，ꋓꉪꁨꄉꐥꅉꇊ，ꈂꄮꆏꉢꀌꀠꏋꇅꂽꇽꌊꅽꊂꇁꅉꈭ，ꆏꑴꌠꊼꇅꀀꐚꑋꐚꃅꄉꉏ”ꄷ。
ꆿꃀꂶꌠꅇꂷꋋꇬꈨꇈ，ꋌꎼꈂꃅꇮꀋꐚ，ꀃꃀꂴꆽꅉꆐꂮꀐ，ꐷꀥꄮꇬ，ꀃꃀꇬꎹꁵꎹꏫꇫꈁꑌꍇꌠꃅꐷꇫꎭꌐ，ꆿꃀꋌꎼꂮꑌꂮꉌꂵꑌꐒ，ꉪꇁꁍꍂꀿꍂꃅꆿꒃꆿꋠꌠꀌꀠꄀꇬꀊꅰꃅꐬꆠꃰꈻ。ꑽꇁꃅꈭꀕ，ꀃꑍꂸꋒꇏꆹꋒꀌꀠꑠꂷꋑ。ꆿꃀꀊꅰꉪꀊꅰꎹꀕꇤ，ꄚꂁꇬꑌꀌꀠꇫꇁꏦ，ꀊꄶꂁꂯꇬꑌꀌꀠꇫꇁꏦ。ꋧꃅꇣꄧꋌꉜꇬꈫꈈꃅꑠꈚꇬꀋꐥ。ꈜꐯꈜꉐꁯꍛꂷꇫꀜꇬꑌꆿꃀꋌꇷꋍꇅꁵ，ꁁꇁꍧꃅꑠꇬꄹꑌꆿꃀꋌꇷꋍꈪꈯ，ꑍꀋꐥꌊꀋꐥꃅꇬꏡꐺꇬꎷ。ꐙꑌꐙꄏ、ꌗꑌꌗꋆ、ꂮꑌꂮ，ꀀꑌꀕꇴꏾꌠꆿꃀꇁꌊꌩꏪꂷꈯꄔꇬꑟꇁ，ꏣꆹꏡꆹꃅꇫꐺꀋꄚꃅꇬꀀꎍꀐ。ꋌꇬꀀꇈꋋꇅꃅꀀꑌꇴꒉꀐ，ꀀꃀꂻꇬꑌꀌꀠꏋꇅꂽꋍꊂꈹꐺꂻ，ꋍꃢꋍꃢꈮꍻꃅꀀꈯ。
ꀌꀠꆏ，ꃮꑲꀧꂷꋌꎹꌊꂨꄉ，ꇓꐯꌺꈨꋌꉅꌊꇬꊎꄉꇈ，ꋌꎹꅷꆿꃀꀀꅉꇬꑟꇁ，ꆿꃀꂶꌠꇫꄉꀀꑌꇴ，ꀀꂇꀀꌒꑟꃅꀀ，ꃮꑳꀧꂶꌠꈬꀕꃅꋌꐒꆿꃀꁍꎼꇬꇱꄉ。ꂷꏦꏢꌌꆿꃀꋌꏻꋍꇅꁵꇈꉉꇬ：“ꆿꅪꀊꃺ、ꉆꐥꃅꄓꇁ、ꀌꀠꏋꇅꂽꀽꀐ”ꄷ。ꆿꃀꂶꌠꇬꊎꀀꃀꂻꇰꄉ。“ꀌꀠꂽꀽꀐ!”ꃅꑠꇬꈨꉆꑴꌦꅀ，ꋋꇅꃅꈯꍻꃅꀀꐚꇁꇈ，ꏁꃬꇂꃬꇸꃅ、ꑞꑌꅲꀋꄚꃅꀥꁧꀐ：ꏋꏌꀕꃅꑠꋍꎎꋍꊂꈹꐺ，ꋌꀊꅰꃅꀥ、ꋍꊂꏋꇅꀊꅰꃅꂿ，ꏋꇅꀊꅰꃅꂿ、ꋌꀊꅰꃅꀥ，ꄹꇭꄹꑓꑌꀋꑴ，ꇓꁨꇓꇤꑌꀋꑴꃅꑮꈭꇂꐟꃅꀥꇬꎷ。ꁦꀑꁧꄩꍀꆿꈧꌠꇫꅲ：“ꆿꅪꀊꃺꆏꑞꂿꇈꋍꃅꀥꀋꄷ?”ꆿꃀꌗꋆꄉꀥꅉꉉꅉꃅ：“ꉠꊂꏋꇅꂽꀽꀐ、ꉢꆍꏭꉉꄏꊂꀋꉂꀐ。”ꄡꇗꋍꁧꎁꀥꇬꎷ。ꀥꌊꒈꇤꏢꇬꑟꇁ、ꁮꉬꍓꉬꃅꒉꈫꁧꀐ。ꁍꎼꇬꃮꑲꀧꒉꅑꇈ，ꇬꀋꂿꀐ，ꈭꅶꁉꅞꇬꆏ，ꏋꇅꂾꃚꇫꂿꀋꈨꀐ，ꋌꉪꇬ：ꀌꀠꂽꒉꈫꀋꇮꈨꉬꐨꁮ，ꉢꑣꒉꅶꁉꎭꀐ，ꋌꇁꇓꏪꂷꄩꑌꄉꑬꆏ，ꋋꄹꉇꆏꃅꊸꑠꑍ，ꆿꃀꁍꎼꇬꃮꑳꀧꃅꊸꆗꃶꊂꆏ，ꆿꃀꌌꉪꀋꉪꃅꁍꎼꆣꇈ，ꏋꏌꀕꃅꂿꇁꌦꀐ，ꆿꃀꑬꆏꇎꀋꇎꇬꆏ，ꑣꄓꄉꀥꌦꀐ，ꇷꁨꇁꄿꑌꀋꑴ，ꏦꐞꃪꏦꑌꀋꑴꃅꀥꇬꎷ。ꇈꈬꃮꑌꊈꂾꈧꌠꇫꅲ，“ꆿꅪꀊꃺꑞꅇꆏꈨꇈꋍꃅꀥ”ꄷ，ꆿꃀꈂꀸꇬꃴꀨꀕꃅꅐꄉꀥꅉꉉꅉꃅ：“ꀌꀠꂽꉠꊂꈹꐺ，ꉢꆍꉉꄏꊂꀋꉂꄷ。”ꆿꃀꀋꎺꀋꈨꃅꀥꇬꎷ、ꏋꇅꑌꊁꄉꂿꇬꎷ，ꌩꐞꂶꐞꎰ、ꇿꇬꉫꑌꂇꆹꊎꇬꎷ，ꌩꏪꇈꏪꉐꊭꑋꑆꈴꆹꀋꄐꑠ，ꆿꃀꑆꈴꆹꀐ。ꃮꑳꀧꌩꊥꁖꇈ，ꇓꐯꌺꈧꌠꁖꁧꌐꀐ。ꏋꇅꂿꀋꈨꀐ，ꆿꃀꐙꄏꌊꌦꄉꏽ，ꋌꉪꇬ：ꀌꀠꂽꋋꈨꌩꏪꀺꀋꄎꑵꐩꁮ，ꐙꄏꌊꉐꅿꋍꐑꎳꃅꎇꄉꇈ，ꋌꄻꌩꏪꈯꄔꇬꑌꄉ：ꉢꀋꃉꐛꆏꄚꄉꎔꎗꃅꊼꇅꑬꆏꀐꄷ。
ꆿꃀꑬꆏꑌꃅꄉꄮꇬꆏ，ꀊꑙꂷꇿꄉꇁꀋꐚ，ꇁꌊꆿꃀꂴꑌꄉ，“ꆿꑌꀊꃺꀃꑍꑞꑵꆏꂿꇈ，ꋍꑍꀥꃅꈊ?”ꄷ。ꆿꃀꉉꇬ：“ꀊꑙꏿꁙꆏꋋꀋꐚ，ꀃꑍꀌꀠꏋꇅꂽꇽꉠꊂꇯꎼꇁꄉ，ꉢꋌꎼꉌꃀꃴꀝꀕ、ꃅꇐꈋꀋꊌ，ꃪꃹꑌꅳꀋꉬ，ꒉꃹꑌꅹꀋꉬꀋꇊꂷꇈꃅ，ꌩꏪꋋꂷꀺꈴꇁ，ꏋꇅꂽꌩꏪꀺꀊꄎꈨꒉꄸ，ꋋꀋꉬꑲꆏꉢꀋꃅꆸꈐꇬꊎꀥꑴꌦ”ꄷ。ꀊꑙꋋꈨꀕꇈ，ꉎꉐꃅꒉꄉꉉ：“ꆿꅪꀊꃺ，ꆏꌟꒉꅇꐭꉉ，ꅽꇷꅽꉻꋍꒈꌠ，ꀌꀠꑓꉂꑠꂷꇯꏦꅀ，ꀌꀠꑠ，ꉪꇉꈫꇁꄿꄉꁮꆰꈹꅝꐺꇬ，ꈍꑋꉪꄔꌦꀋꐚ，ꀌꀠꑓꉂꑠꅽꏸꑭꁆꂯꀋꒊ，ꆏꑠꂷꏦꅀ，ꆿꈐꆿꉘꋍꏅꆏꌌꊰꀐ，ꉢꆏꏁꆹ，ꉣꑊꎼꋌꁳꋍꀋꁧꋋꇴꆹꄷ。”ꆿꃀꀑꆺꌕꏮꇤꄉꉉ：“ꀋꆹꀐ，ꀋꆹꐮꀋꆹꀑ，ꉢꋍꂯꈌꊰꐯꈌꊰꀐ，ꉌꆐꅑꐯꅑꀐ”ꄷ，“ꉢꑓꏮꇬꉚꃅꀋꉂꀐ，ꉢꐥꍂꃅꌩꏪꋋꂷꈋꉈꐂꃅꀋꉂꀐ，ꉢꋌꎼꈬꃅꈬꋒꆣꀐ”ꄷ。ꀊꑙꄹꇬ：“ꀋꏦꐯꀋꏦ，ꉢꇫꐥ”ꄷ，ꆿꃀꄡꇗꇫꆹꀋꀬ，ꀒꆺꍠꃅꇤꇬꎷ。ꀊꑙꄹꇬ：“ꆿꅪꀊꃺꆏꐬꆠꑲꆏ，ꉣꑊꇭꀧꑍꈬꏢꎹꌊꏣꄀꐯꇯꄉ，ꉢꂴꆽꐊꆏꊂꏭꈹ，ꋌꂴꆽꉠꏯꇁ，ꌥꀕꉢꂴꌦ，ꐥꀕꆏꊁꐥꇈꋍꃅꇬꈂꃅꐙꄷ”，ꆿꃀꉪꇬ：“ꋍꃅꇬꆹꀋꇊꃅꐙꉂ，ꉢꋍꍈꉌꒊꀐꄷ”，ꀊꑙꏭ“ꍑꑴ”ꄷ，ꀊꑙꇈꈬꄉꑍꈬꏢꎹꌊꇁꇈ，ꋍꁁꏯꆏꄀꆿꃀꇇꑭꇬꇱꄉ，ꋍꁁꏯꆏꄀꀊꑙꏸꑭꇬꇱꄉ。ꑍꂷꌠꐃꈪꐃꈪꃅꐯꏁꌊꀌꀠꎹꆹꀐ。
ꀌꀠꇓꁨꇂꃴꒉꊩꂷꇬꀀ，ꋌꀜꇓꁨꂷꄩꑌꄉ，ꈜꎴꃅꉜꇬꆏ，ꀊꑙꂷꌋꆀꆿꃀꂷꐮꐊꇁꀐ，ꀊꑙꂴꆽꐊꆿꃀꊂꏭꈹ。ꀌꀠꉪꇬ：ꀊꑙꌋꆀꆿꃀꐯꏁꉡꏂꉢꇫꇁꌠꉬꀐ，ꉢꋋꑍꂷꊢꐯꇯꂯ。ꀌꀠꇓꁨꄩꄉꃛꁵꇁꁳꍔꃅꇴ：”ꀊꑙꐃꁙ、ꆏꆿꃀꂷꈻꌊꉠꎆꊒꇁꅀ，ꅽꆿꃀꋅꂷꉬꅀꈧꐙꂷ，ꈧꐚꌠꆹꉢꇬꀋꈁ，ꆏꉆꐥꃅꈻꌊꉢꀦꇁ，ꉢꄚꄉꈁꄽꅽꇁꉚꀐ”ꄷ。ꆿꃀꂴꆽꇯꆐꐬꆠꃰꈻ、ꏻꌦꏦꌦꃅꎌꂷ，ꀌꀠꀊꑙꏭꇴꅇꈧꌠꆿꃀꈨꇈ，ꋌꉪꇬ：ꀊꑙꋋꂷꀂꂶꌠꌌꀌꀠꎆꌣꒉꏭꄐꂷꉬꇊ，ꋍꑊꐮꋯꄉꀁꏂꀁꇬꏭꉪꅊꇈꉂꄉ，ꑭꇯꏾꄉꀱꉈꑴꉜꄉꃨ，ꀊꑙꊁꄉ：“ꆿꅪꀊꃺ!ꆿꅪꀊꃺ”ꃅꇳꀕꇴꀋꄿꃅ、ꆿꃀꂶꌠꑬꈭꇂꐞꃅꉈꑴꉜꄉꀥꇬꎷ，ꀊꑙꀥꆿꃀꊋꀋꄿ、ꆿꇱꈻꌊꀏꃄꅉꇬꌩꌊꐺꄉꌦꀐ。ꀊꑙꌦꇬꆏ，ꎏꌦꇴꃅꀮꂷꉈꏭꁖꎍ，ꆿꃀꂶꌠꋍꏿꀥꌦ、ꀱꀊꑙꂶꌠꏭꋍꇅꉜꌦ：ꀊꑙꎏꌦꇴꌠꋌꂿꇈ，ꀊꑙꏭ：“ꀊꑙꏿꁙꆏꈌꌦꄚ，ꉢꈌꌦꀋꄚꀐꄷ”ꇁꌊꃪꀮꂷꀂꏽꑟꇁꇬꆏ，ꆿꃀꇨꇅꃃꄉ，ꀊꑙꋌꏹꃪꇬꎭꇈ，ꆿꃀꌋꆀꀊꑙꏣꄀꐯꇯꄉꌠꉨ，ꆿꃀꋌꈻꌋꇬꊐꀐ，ꆿꃀꌋꆀꀊꑙꐯꇯꃪꇬꃹꁧꀐ。ꁮꅉꋋꂷꆹ“ꊋꑌꁈꑌꀊꐰ”ꌠꉉꀽꀐ。
ꐭꌠꉜꄡꄸ
ꄜꃑꄮꈉ： 2012-01-02 | ꁰꄻꊿ：ꀋꇐꃅꑗ ꎴꌊꇁꌠ
ꇁꀦ： 《ꆃꎭꉜꇐꁱꀕ》
ꁰꄻꌠ：
beleys ｜
ꄜꃑꌠ：
