ꀨꏾꌠ > ꋊꃆꌧꇐ

ꊨꊭꅪꎔ
ꄜꃑꄮꈉ: 2013-01-13  | ꁰꄻꊿ:ꆈꌠꏂꀨ

ꊨꊭꅪꎔ

 

ꋍꇬꇴꄲꀕ

ꋍꋏꃅꊂꅪ

ꈨꃘꆪꏃꁨꇁꆏ

ꌅꂮꀊꏸꄰ

ꂱꀮꇴꇁꃰ

ꑙꌺꋶꇁꃰ

ꏃꃅꄜꇁꃰ

ꄓꊂꐚꂿꄓ

ꐚꂿꃅꄔꏦ

ꄓꊂꁏꃀꄓ

ꁏꃀꉾꐯꄂ

ꄓꊂꑮꆜꄓ

ꑮꆜꈌꋚꃅ

ꄓꊂꌺꅪꄓ

ꌺꅪꈌꏣꄀ

ꌅꂮꀊꏸꄰ

ꌕꈎꎸꈌꉘ

ꌕꆪꈌꑳꊨ

ꄓꊂꆗꌺꄓ

ꆗꌺꈌꀖꆹ

ꄓꊂꈌꐎꄓ

ꈌꐎꑿꌺꄓ

ꄓꊂꈌꆈꄓ

ꈌꆈꊈꌺꄓ

ꄓꊂꈌꋓꄓ

ꈌꋓꀊꍆꄓ

ꄓꊂꈌꅪꄓ

ꈌꅪꀠꃨꄓ

ꄓꊂꈌꉘꄓ

ꈌꉘꆿꆙꄓ

ꄓꊂꈌꏂꄓ

ꈌꏂꆿꑸꄓ

ꈌꐎꈌꆈꐊ

ꈌꋓꈌꅪꐊ

ꈌꏂꈌꉘꐊ

ꈌꐎꏣꐎꄀ

ꈌꆈꏣꆈꄀ

ꈌꏂꏢꏂꄀ

ꈌꉘꏣꉘꄀ

ꈌꅪꏣꅪꄀ

ꀊꏀꆗꌕꑻ

ꌌꆹꌌꆹꃅ

ꌌꆹꌿꋦꈍꐰꇔ

ꌿꋦꈍꐰꆏ

ꊿꇴꌠꈨꀕ

ꊿꇴꌠꂸꈨ

ꈌꐥꌠꈨꀕ

ꈌꐥꌠꂸꈨ

ꌌꇁꂷꁌꈍꐰꇔ

ꂷꁌꈍꐰꆏ

ꊿꇴꌠꈨꀕ

ꊿꇴꌠꂸꈨ

ꈌꐥꌠꈨꀕ

ꈌꐥꌠꂸꈨ

ꃅꑟꌌꇁꄙ

ꇍꀮꍫꐎꋍꂷꄙ

ꎴꄓꆹꃴꆏ

ꊿꇴꅼꀑꇴ

ꈌꐥꅼꀑꐥ

ꃅꆳꅼꀑꁏ

ꂷꏾꅼꀑꇤ

ꁯꋓꐯꑎꆏ

ꊿꇴꈐꀑꇴ

ꈌꐥꈐꀑꐥ

ꃅꆳꈐꀑꁏ

ꂷꏾꈐꀑꇤ

ꈌꐥꂷꏾꇤ

ꂷꏾꇤꋌꀕ

ꁧꀑꌠꇴꄧ

ꇉꅶꈌꐥꎓ

ꆫꌠꇴꐥꏿ

ꂃꍣꑌꂇꀕ

ꆞꍣꑌꃰꀕ

ꉊꂿꁍꀕꂃꇁꃰ

ꅸꒉꅸꇁꃅ

ꅸꇁꁧꀑꌕꏮꀕ

ꄌꃀꍝꅑꀕ

ꄌꃀꍝꂸꅑ

ꄌꋒꉘꌠꅊ

ꍝꒉꁪꌠꅊ

ꄌꋒꉘꑌꉬ

ꍝꒉꁪꑌꉬ

ꅸꒉꅸꇁꃅ

ꅸꇁꌩꁐꈬꉘꆏ

ꌿꉘꈬꁍꈴ

ꉊꈴꑭꇖꀕ

ꉊꈴꑭꂸꇖ

ꌿꑌꁪꌠꅀ

ꆫꑓꎴꌠꅀ

ꌿꑌꁪꑌꉬ

ꆫꑓꎴꌠꉬ

ꅸꒉꅸꇁꃅ

ꅸꇁꇉꅶꌕꇉꈴ

ꁖꑭꊖꑐꀕ

ꁖꑭꊖꂸꑐ

ꁖꑭꎴꌠꅀ

ꊖꄲꇨꌠꉬ

ꁖꑭꎴꑌꉬ

ꊖꄲꇨꑌꉬ

ꅸꒉꅸꇁꃅ

ꅸꇁꀈꉙꑗꒉꆏ

ꎟꒉꌕꄂꈴ

ꁒꁮꒉꌸꀕ

ꁒꁮꒉꂸꌸ

ꉊꈴꉘꌠꅀ

ꎟꒉꁪꌠꉬ

ꉊꈴꉘꑌꉬ

ꎟꒉꁪꑌꉬ

ꉊꒉꉊꂥꋍꂷꉬ

ꌩꁐꈬꉘꆫꌠꇴ

ꂿꆹꋌꂿꇉ

ꄝꆹꄝꎼꀑ

ꇍꀮꍫꐎꋍꂷꑌ

ꆈꒉꃴꐚꉜꄉꀥ

ꀊꏂꆗꌕꑻ

ꅸꒉꅸꇁꃅ

ꅸꇁꌅꂮꀊꏸꋒ

ꌅꂮꀊꏸꑌ

ꃽꇇꏂꉹꄵ

ꑴꇇꏂꉈꏢ

ꋍꇇꄝꀑꇬ

ꉒꐎꉒꆈꃹ

ꇿꇬꁧꀋꐛ

ꊂꇁꋍꊐꆏ

ꅸꒉꃀꈍꄹꎑꋒ

ꃀꈍꄹꎑꑌ

ꃽꇇꐎꉹꄵ

ꑴꇇꐎꉈꏢ

ꋍꇇꄝꀑꇬ

ꃅꉒꃅꄂꃹ

ꇿꇬꁧꀋꐛ

ꋍꊂꋍꊐꆏ

ꅸꇁꉳꑴꄼꈯꋒ

ꉳꑴꄻꈯꑌ

ꃽꇇꏼꌩꄵ

ꏼꌩꄵꑌꈬ

ꑴꇇꁵꄿꏢ

ꁵꄿꏢꑌꋽ

ꇍꀮꍫꐎꆏ

ꉳꑴꄼꈯꑌ

ꄤꁻꀂꄤꁻ

ꄼꈯꀂꄤꁻ

ꅿꑌꏝꊂꇁꃅꐧꒆꌺ

ꀂꑌꏝꊂꇁꃅꉊꒆꌺ

ꋍꂷꐥꋍꉻ

ꀂꁻꃅꉊꉬꑌ

ꌸꃅꉊꂸꉬ

ꌸꃅꉊꉬꑌ

ꐚꃅꉊꂸꉬ

ꐚꃅꉊꉬꑌ

ꉾꃅꉊꂸꉬ

ꉾꃅꉊꉬꑌ

ꏬꃅꉊꂸꉬ

ꏬꃅꉊꉬꑌ

ꋠꃅꉊꂸꉬ

ꋠꃅꉊꉬꑌ

ꅝꃅꉊꂸꉬ

ꇍꀮꍫꐎꀂꋌꂷ

ꁻꃅꉊꉬꑌ

ꏼꏂꈬꀺꐔ

ꉾꃅꉊꉬꑌ

ꈍꄯꈬꀺꀜ

ꏬꃅꉊꉬꑌ

ꉾꐯꈬꂷꐷ

ꋠꃅꉊꉬꑌ

ꎐꂷꌕꁍꂵ

ꋍꂷꈾꐯꑌ

ꋍꂷꈾꂸꐯ

ꆾꄝꐎꈬꊨ

ꋍꊭꊰꉆꑌ

ꋍꊭꊰꂸꉆ

ꄼꈯꌺꍸꑌ

ꀿꉂꆹꐯꀕ

ꃀꉂꆹꐯꀕ

ꀿꉂꃀꉂꆹꐯꆏ

ꅽꀿꅇꌌꄜꇁꃰ

ꅽꃀꅇꌌꄜꇁꃰ

ꄼꈯꇊꄼꈯ

ꅿꆹꅲꄉꇉ

ꀂꇁꄜꌦꃅ

ꅽꀿꅿꉂꊤꀕꑌ

ꅽꃀꅿꉂꄂꀕꉆ

ꅿꀿꅿꉂꌠ

ꑍꆏꑭꃶꈝꃀꍬ

ꈝꃀꏃꏢꈴ

ꌋꆏꉌꂵꑓꁴꅐ

ꑓꁴꀑꈑꀀ

ꅽꃀꅿꉂꌠ

ꑍꆏꉌꃶꑓꂿꑟ

ꃷꇎꊰꈚꏮ

ꌋꆏꑓꁴꇇꊂꊰ

ꃅꏂꌕꄅꈴ

ꅿꀿꅽꃀꆹ

ꅿꁧꇉꊂꆏ

ꃢꍸꌌꇁꉘ

ꃢꀠꇰꊰꐛꈨꃰ

ꅽꀿꋠꌷꄸ

ꅽꃀꉬꀋꅲ

ꄼꈯꇁꉛꄸ

ꍶꍸꌌꇁꉘ

ꍶꎭꇰꊰꐛꈨꃰ

ꅽꀿꋠꌷꄸ

ꅽꃀꉬꀋꅲ

ꄼꈯꇁꉛꄸ

ꑿꍸꌋꇁꉘ

ꑿꅰꇰꊰꐛꈨꃰ

ꅿꀿꋠꌷꄸ

ꅽꃀꉬꀋꅲ

ꄼꈯꇁꉛꄸ

ꇌꍸꌌꇁꉘ

ꇌꎶꇰꊰꐛꈨꃰ

ꅽꀿꃷꌷꄸ

ꅽꃀꉬꀋꅲ

ꄼꈯꇁꉛꄸ

ꃅꍸꌌꇁꉘ

ꃆꇭꇰꊰꐛꈨꃰ

ꅽꀿꃷꌷꄸ

ꅽꃀꉬꀋꅲ

ꄼꈯꋩꌷꄸ

ꄼꈯꇉꄼꈯ

ꇬꑌꀋꄿꃰ

ꉉꑌꀋꉬꃰ

ꀂꁻꃅꉊꉬꑌ

ꋠꃅꉊꂸꉬ

ꆾꄝꐎꈬꊨ

ꋍꊭꊰꉆꑌ

ꋍꊭꊰꀋꉆ

ꉬꑌꀞꇁꇉ

ꂸꉬꀞꇁꇉ

ꉳꑸꄼꈯꑌ

ꄡꁻꄡꁻꄸꀋꄿ

ꋍꇇꄝꎼꆹ

ꉊꇴꐔꊂꌸ

ꉊꂪꍅꊂꈴ

ꉊꂿꆺꀕꂃ

ꉊꌦꑘꄃꈘ

ꉊꈯꇓꁨꐛ

ꉳꑴꄼꈯꑌ

ꀀꊭꃅꋍꑍ

ꐒꏣꐎꈬꏢ

ꈬꏢꆺꀕꄹ

ꏃꏢꀋꎪꀕ

ꄌꀨꐎꈬꄅ

ꈬꄅꆺꀕꄹ

ꏃꄅꀋꎪꀕ

ꉳꑴꌺꍸꑌ

ꒆꇁꃅꋍꈓ

ꃀꆹꄌꈪꑌ

ꑍꐎꋚꊰꍈ

ꒆꇁꃅꑍꈓ

ꀿꆹꄌꈪꑌ

ꉾꃤꋚꊰꍈ

ꒆꇁꃅꌕꈎ

ꑌꃅꑌꐋꊰ

ꇢꇑꑌꐋꄐ

ꒆꇁꃅꇖꈎ

ꉊꃅꉊꐋꎹ

ꑳꈯꌬꁧꉆꐋꃅ

ꒆꇁꃅꉬꈎ

ꍶꆫꌠꊂꁧ

ꄹꈭꄹꇍꏮ

ꁮꏂꒃꇁꉛꃅꌌ

ꀍꀠꒃꇁꇓꃅꌌ

ꒆꇁꃅꃘꈎ

ꁮꆫꌠꊂꁧ

ꁧꀑꇉꀑꏮ

ꁮꈤꁧꀑꆹ

ꄼꈯꁧꀑꑌ

ꁮꑌꂷꑣꂷꋠꐽ

ꄼꈯꂷꑣꂷꅝꎔ

ꁮꈻꇉꀏꇁ

ꄼꈯꇉꀏꑌ

ꍀꉘꋌꒃꃅꀕꋩ

ꆿꅪꋌꒃꇌꃅꂿ

ꑛꄂꋌꒃꃅꀕꋩ

ꊈꂿꋌꒃꇌꃅꂿ

ꃤꅪꋌꌌꈌꃅꏃ

ꐔꇌꋌꌌꎆꃅꅸ

ꒆꇁꃅꏃꈓ

ꁊꄝꑣꃅꈚ

ꅥꈿꇁꋍꑍ

ꇓꂵꉜꀋꂪ

ꋌꇁꊤꀕꑌ

ꌉꈿꇁꋍꑍ

ꐳꇁꉛꀋꂪ

ꋌꇁꄂꀕꉆ

ꑭꈜꉜꏃꆗ

ꄩꈜꃪꅪꎆ

ꐳꊈꁵꄿꋓ

ꐳꂷꃅꏸꋦ

ꋍꁏꋍꊂꌉ

ꆈꒉꈬꊂꊫꄉꌉ

ꉎꁏꉎꊂꌉ

ꌿꑌꈬꊂꊫꄉꌉ

ꇍꀮꍫꐎꅸꄮꇬ

ꈌꇔꅔꁉꈌꇔꀕ

ꉊꄙꋓꁍꆈꈯꄙ

ꈌꋓꇱꊈꃪꏂꋓ

ꈌꐜꈌꐜꁍꇭꐜ

ꍞꆹꀊꐔꀘꇐꍞ

ꈻꆹꌒꇖꅔꁍꈻ

ꐚꆹꀊꐦꉘꃅꐚ

ꉾꆹꃅꇖꅔꊂꉾ

ꇍꀮꍫꐎꒃꂴꆽ

ꅸꇁꌅꋦꐦꇭꈴ

ꐈꇁꊴꃀꐜꅪꐛ

ꀊꏀꆗꌕꑻ

ꈌꃨꋓꈨꆏ

ꂴꆽꇉꈬꐕꐴꋓꎼꈁ

ꇉꈬꐕꐴꆹꀋꉬ

ꊂꇁꅔꁍꊴꌺꋓꎼꈁ

ꊂꇁꅔꁍꊴꌺꆹꂸꉬ

ꊂꑴꇉꆈꊈꌺꋓꎼꈁ

ꊂꑴꇉꆈꊈꌺꆹꂸꉬ

ꊨꊭꅪꎔꋓꅊꇉ

 

ꊨꊭꅪꎔꑌ

ꀑꊰꉀꁏꀕ

ꑎꇤꇵꌆꀕ

ꅲꇬꏂꐚꀕ

ꆾꄰꎵꐦꀕ

ꁧꇉꏂꈯꀕ

ꇇꏸꊰꁻꀕ

ꇇꆹꀨꈩꀕ

ꑓꂷꏂꀱꆫ

ꑓꊏꆗꁍꀕ

ꑓꂥꋍꄿꒌ

ꂱꀯꉦꑣꀕ

ꊨꊭꅪꎔꑌ

ꀑꑊꅲꁧꆹ

ꀒꎂꁱꌺꀋꇊꌡ

ꃅꇐꂷꄟꆹ

ꅔꁉꒉꃀꀋꇊꌡ

ꁱꐭꌗꅐꆹ

ꅔꐎꏰꌺꀋꇊꌡ

ꅪꎔꅪꃨꑠꂷꉬ

ꊨꊭꅪꎔꆏ

ꌠꃅꀃꂓꄜ

ꌠꋌꀃꂓꂁ

ꊨꊭꅪꎔꄸꌠꀂꉬꑴ

ꌅꀋꃰꆀꈑꅿꉬꀕ

ꌅꀋꃰꆀꈑꆏ

ꌅꀋꃰꆀꈑꀂꉬꑴꄸ

ꊨꊭꅪꎔꑮꂰꇁ

ꀊꃰꆀꈑꍯꂰꆹ

ꅪꎔꅪꃨꆹ

ꊨꊭꅪꎔꐥ

ꌅꉩꌅꑳꆹ

ꀋꃰꆀꈑꐥ

ꀋꃰꆀꈑꑌ

ꊪꇁꏦꌋꇁ

ꑳꈐꑟꇉꆏ

ꏮꁁꇗꄃꀕ

ꋍꑍꌕꋚꃅ

ꑮꑟꃅꋍꈓ

ꑮꎔꑮꃨꑠꂷꉬ

ꑮꑟꃅꑍꈓ

ꑮꉔꑮꄏꑠꂷꉬ

ꑮꑟꃅꌕꈎ

ꑮꄸꊂꑮꅠ

ꊨꊭꅪꎔꑌ

ꀒꑓꊂꑓꅑ

ꀒꑓꆹꈜꉜ

ꊂꑓꆹꊿꋘ

ꀒꈌꊂꈌꅑ

ꀒꈌꆹꋚꋠ

ꊂꈌꆹꊿꋠ

ꀒꇇꊂꇇꅑ

ꀒꇇꌩꒃꏦ

ꊂꇇꊿꉌꇵ

ꃷꇎꊿꌦꊿꎸꋠ

ꊿꌦꊿꁱꑡ

ꑮꑟꇖꈎꐛꇬꆏ

ꑮꁏꆅꇐꃢꇁꃰ

ꀋꊈꆀꈑꆹ

ꑌꊂꆅꆹꇖꀕꏒꀕꆅ

ꎵꊂꆅꆹꃀꀕꋧꀕꆅ

ꍵꊂꆅꆹꎭꀕꈠꀕꆅ

ꋆꊂꆅꆹꌂꀕꑷꀕꆅ

ꆀꈑꋌꄉꅪꎔꅲ

ꅿꁧꇿꇬꁧ

ꅿꀿꇿꇬꀿ

ꅿꎭꀂꇰꇁꉜꄸ

ꊨꊭꅪꎔꆏ

ꒆꆹꌦꑳꀊꂿꒆ

ꐥꆹꐵꑷꎰꆈꐥ

ꁧꆹꄂꏂꉻꊂꁧ

ꈴꆹꌅꋦꐦꇬꈴ

ꐛꆹꀋꐦꎰꂥꐚ

<ꒉꆹꃅꑌꀠꑎꅝ>

ꒉꆹꃆꉻꀠꑓꅝ

ꋚꆹꒉꆈꂝꃨꋠꌠꄸ

ꀋꊈꆀꈑꑌ

ꈨꇉꈯꇉꑟ

ꐈꇉꏂꇉꑟ

ꀀꆅꀀꈻꆹ

ꁧꀑꊴꏸꄐꆏꌒ

ꂸꄐꂸꌒꄸ

ꁧꀑꊴꏸꑌ

ꅪꎔꒃꌌꇁ

ꋌꄐꋌꌒꀕ

ꋌꄐꋌꂸꌒ

ꆺꑳꑛꏂꀑꆫꉬꅊꇉ

ꐕꐴꇍꀮꄐꆏꌒ

ꂸꄐꂷꌒꄸ

ꐕꐴꇍꀮꑌ

ꅪꎔꒃꌌꇁ

ꋌꄐꋌꌒꀕ

ꋌꄐꋌꂸꌒ

ꆺꑳꑿꐎꁫꅫꉬꅊꇉ

ꎽꀮꉑꀮꄐꆏꌒ

ꂸꄐꆏꂸꌒ

ꎽꀮꉑꀮꑌ

ꅪꎔꒃꌌꇁ

ꋌꄐꋌꌒꀕ

ꋌꄐꋌꂸꌒ

ꆺꑳꑷꀮꁯꆮꉬꅊꇉ

ꇉꅶꊈꌺꄐꆏꌒ

ꂸꄐꆏꂸꌒ

ꇉꅶꊈꌺꑌ

ꅪꎔꒃꌌꇁ

ꋌꄐꋌꌒꀕ

ꋌꄐꋌꂸꌒ

ꆺꑳꊈꈌꀊꆈꉬꅊꇉ

ꋌꊂꃱꋰꆫꐎꁧꇭꃰꐎꋍꆺꋠꆏꌒ

ꂸꋠꂸꌒꄸ

ꊨꊭꅪꎔꆏ

ꋌꆹꉬꃰꆏ

ꃱꋰꆫꐎꁧꇬ

ꃰꐎꋉꁧꂰ

ꀂꁧꇉꊂꆏ

ꑳꉎꇓꃅꇓꄸꎍ

ꆺꑳꇓꊸꆹꄡꌣ

ꇓꊸꌣꆏꀂꀑꃀ

ꑳꐯꏸꃅꏸꄸꋦ

ꆺꑳꏸꋐꆹꄡꏦ

ꏸꋐꏦꆏꀂꌗꁠ

ꑳꂿꃅꇴꆹꄡꋊ

ꃅꇴꋊꆏꀂꑓꊉ

ꑳꈐꑳꄡꌩ

ꑳꌩꀂꉌꃶ

ꇤꇎꀘꄡꍞ

ꀘꍞꀀꅲꃖ

ꇤꁄꋩꄤꉃ

ꋩꂸꀀꌋꀘ

ꀘꇇꋩꄡꐔ

ꋩꐔꀂꐧꈢꑴ

ꊨꊭꅪꎔꁧꇉꊂ

ꀊꃰꆀꈑꑌ

ꆗꌺꈬꊰꊪ

ꀘꇁꑊꌺꇴ

ꌠꑊꈬꊰꇴ

ꆺꑳꏂꃴꊐ

ꇰꋒꃪꅪꎆ

ꑊꌋꇴꐥꏿ

ꊂꌒꐛꒀꈴ

ꀘꂿꈬꊰꇴ

ꆺꑳꏂꃴꊐ

ꀘꑌꃪꅪꎆ

ꃼꄲꁵꄿꋓ

ꀘꃚꂇꁨꀕ

ꀘꇴꃈꊭꌡ

ꀘꇁꑊꌺꄓ

ꍃꇊꇴꇉꃅ

ꇓꉅꊸꇁꌣ

ꏸꌩꋐꇁꏦ

ꑳꂿꃅꇴꋊ

ꁏꄓꑷꈐꌩ

ꀘꈌꆹꋩꉃ

ꀘꇇꆹꋩꐔ

ꋍꃅꇉꊂꆏ

ꏃꑍꊰꌕꐛ

ꊨꊭꅪꎔꑌ

ꐈꇁꍶꁱꎽꅫꐛ

ꃰꇁꑳꉎꅞ

ꈬꐥꌗꂸꁠ

ꀊꊈꆀꈑꄰ

ꆗꌺꈬꑻꅸ

ꉹꄵꌠꉹꄵ

ꂥꈻꌠꂥꈻ

ꁻꇊꌉꇉꃅ

ꅥꇉꐷꇉꃅ

ꍶꁱꎽꅫꑌ

ꅻꀨꃰꐯꑌ

ꁖꇤꃰꐎꑐ

ꆹꂡꃰꏂꑌ

ꁍꎽꃰꅪꑌꅉꇊ

ꋌꊂꌌꇁꁪꉘꃪꐬꊐ

ꐚꀮꑳꂿꌋꐬꊐꄸꌠꑌꐥ

ꏢꌠꏢꈬꀕ

ꏢꌠꏢꈬꃰ

ꎫꌠꎫꏸꀕ

ꎫꌠꎫꏸꃰ

ꊂꇁꏃꑍꊰꌕꆏ

 

ꃭꌒꆿꐎꄰ

ꆫꌺꌕꑻꆏ

ꉘꈌꉛꁿꁠꏿ

ꌩꉘꒉꇤꅞ

ꀈꐔꈬꑻꆹ

ꇇꏢꈬꁬꌌ

ꉊꈯꈬꏼꌌ

ꋪꉙꈬꏢꌌ

ꌩꈹꌩꅝꆹ

ꆗꌺꈬꑻꆏ

ꈍꄯꈬꀺꌌ

ꉛꈄꈬꂷꌌ

ꉛꎹꉛꈹꆹ

ꂴꆹꉛꐑꄜꂪꏿ

ꌩꋲꇓꍣꇁ

ꊂꌌꉛꐑꄜꐧꏿ

ꉛꊪꉛꍽꇁ

ꋌꊂꌌꇁꉛꐑꄜꀑꏿ

ꍶꁱꎽꅫꋍꂷꇁ

ꍶꂿꊿꌌꉾ

ꇓꏪꉾꇉꃅ

ꆫꌺꍶꑆꐒ

ꃅꅉꍶꑆꈠ

ꆗꌺꍶꉾꃅ

ꈍꄯꌌꇁꋲ

ꀈꐔꍶꃶꃅ

ꇇꏢꌌꇁꊐ

ꉊꈯꌌꇁꀺ

ꋌꃅꊂꋌꋠ

ꀑꑭꎹꄃꏿ

ꈯꐥꇁꏖꃅ

ꃶꉆꎸꋉꃅ

ꋌꋠꇉꊂꆏ

ꍶꎸꆹꊿꅋ

ꍶꃶꆹꊿꈢ

ꊨꊭꅪꎔ

ꐈꇁꑊꋌꐛꅊꇉ

ꃭꌒꆿꐎꋌꋠꈤ

ꃭꌒꆿꐎꅓ

ꀑꐎꐞꁠꁵ

ꀑꐎꐞꁠꋌꋠꈤ

ꀑꐎꐞꁠꅓ

ꀊꈌꀊꃈꁵ

ꀊꈌꀊꃈꋌꋠꈤ

ꀊꈌꀊꃈꅓ

ꇌꅔꊏꋦꁵ

ꇌꅔꊏꋦꋌꋠꈤ

ꇌꅔꊏꋦꅓ

ꃀꉙꍆꀕꁵ

ꃀꉙꍆꀕꋌꋠꈤ

ꃀꉙꍆꀕꅓ

ꇤꈬꇤꇉꀊꊈꁏꀕꁵ

ꀊꊈꁏꀕꋌꋠꈤ

ꀊꊈꁏꀕꅓ

ꀊꐰꂰꑿꁵ

ꀊꐰꂰꑿꋌꋠꈤ

ꀊꐰꂰꑿꅓ

ꀊꁏꎸꎼꁵ

ꀊꁏꎸꎼꋌꋠꈤ

ꀊꁏꎸꎼꑊꋌꉬꂸꌦ

ꐎꉻꊰꑌꁯꌠꑊꋌꉬꀊꌦ

ꆈꉻꑍꊏꇖꌠꑊꋌꉬꀊꌦ

ꆀꃤꇖꊰꉆꌠꑊꋌꉬꂸꌦ

ꑊꋌꑙꆅꋌꈨꌠ

ꐪꎹꋌꊋꃰ

ꂓꎸꋌꋉꃰ

ꄡꎼꋌꄡꎼ

ꄡꄉꋌꄡꄉ

ꍃꀑꋍꊂꁌ

ꏮꂪꋍꊂꀺ

ꉔꇉꇴꇉꑟ

ꅲꇉꒉꇉꑟ

 
 
 

ꇁꀦ: ꆈꌠꏂꀨ ꁰꄻꌠ:  |  ꄜꃑꌠ: beley ꌤꃅꅉ