ꀃꌋꀊꆨꃀ,ꌟꃆꍸꃀꂷꆏꀋꃋꑍꂷꁨ,ꀋꃋꀉꒉꂶꌠꆏꃼꂷꂓ;ꀋꃋꀄꊭꍇꌠꆏꊮꂷꂓ。ꃼꂷꆹꈎꄜꊼꇅꀉꒉꀐꌠꉥ,ꀐꁮꅺꐳ,ꉪꑌꏡꑌꑠꂷꉬ;ꊮꂷꍇꌠꆏꈎꄜꑌꀄꊭꇨꄉ,ꅉꐚꅍꀋꐥꑴꌦ。ꈎꏅꊂꄹꉇꆏ,ꀉꂿꂶꌠꃮꀂꏾꌋꆀꎧꀵꀉꁌꀊꂵꅍꈎꏅꎭꁧꂿꄷꄉ,ꀉꂿꂶꌠꋍꀋꃋꃼꂷꊮꂷꑋꏭ:“ꀉꑳꑋ,ꀉꂿꆹꎧꎸꀵꀉꁌꀊꂵꅍꁧꀐ,ꆐꑊꑴꌠꀃꈈꄘꋒꃅꄙꄉꀁꇬꐥꄉꇈ,ꀉꂿꀱꀋꇁꌥꋩꆏꈀꄸꑌꄝꀁꇬꄡꊐꂸ”ꄷ。ꀋꃋꑍꍈꏭꂘꄉꇈꁧꀐ。
ꃼꂷꊮꂷꑋꀉꂿꂶꌠꀉꁌꀊꂵꅍꁧꂿꄷꆹꌊꈝꃀꈢꌩꏪꇆꆉꆈꊉꅍꑠꂷꇬꈴꁧꄮꇬꆏ,ꉘꀋꇉꃅꊿꐈꀊꂵꂷꋋꇅꃅꌩꏪꇬꈴꅐꇁꇈ,ꃼꂷꊮꂷꑋꀉꂿꂶꌠꋌꇱꇊꄉꇬꏭ:“ꌱꃀ,ꀉꑌꈎꐯꀋꂿꀐ,ꆏꇿꁧꂯ?ꀉꑳꀋꁧꑞꃅꆎꐊꀋꇁꌠꉬ?”ꄷ,ꃼꂷꊮꂷꀉꂿꆏꇬꏭ:“ꀋꌧꀐꂼꀊꂵ,ꆏꇿꁧꃅꄷ?ꉡꆹꀉꁌꀊꂵꅍꈎꏅꎭꁧ,ꀉꑳꀋꁧꆹꌦꀉꑌꈎꐛꀐ,ꀉꑳꆹꃼꂷꊮꂷꄷꑠꑍꍈꀉꄂꐥꍰ!”ꄷꇬꆏ;ꀊꂵꆏꇬꋠꂯꄐꌠꉥ,ꀋꐯꈀꍏꀕꃅꐒꈁꐒꑓꄻꄉꇬꏭ:“ꌱꃀꀋ,ꆏꀄꊭꑴꌦꄮꇬꉢꆍꅍꋍꏮꑟꋺ,ꆏꉢꀋꌧꌠꅑꀋꀵ,ꀉꂿꎭ,ꆏꃆꍸꃀꅐꀐꅊꇈ!ꀉꑳꆹꈍꑍꍈꉬ?”ꄷ。ꃼꂷꊮꂷꑊꀉꂿꆏ,“ꀉꑳꆹꀋꃋꑍꍈꀉꄂꁨ,ꀁꇬꃮꃬꀨꎹꌠꀋꐥꌠꉥ,ꀉꑳꑍꍈꌠꇤꀁꇬꑳꐍꎻꇈꉢꀉꄂꇁꌠ,ꀊꂵꆹꇿꁧꂯꄐꌠꉬ?”ꄷꇬꆏ,ꊿꐈꀊꂵꂶꌠꆏꐈꄉꇬꏭ:“ꌱꃀ,ꉣꑊꈁꉬꈝꃀꋍꏢꄸ,ꆍꀉꁌꀊꂵꏤꌋꆀꉠꆸꅉꀊꎴꀋꇢ,ꉡꑌꉪꑐꂵꅍꆹꂿꄷꄐꌠ,ꀃꑍꉣꑊꀉꁧꑮꃀꑞꃅꋍꃅꊜꋼꌠꉬ,ꀃꑍꆏꄚꈴꀋꇁꇮꇬꆹꈝꃀꑌꉢꋋꀋꌧꀐ;ꌱꃀꀋ,ꑷ!ꆏꂴꐊꄉꈜꏁ,ꉢꅽꊂꐊꂿ”ꄷꐮꐊꁧꀐ。
ꃼꂷꊮꂷꀉꂿꆹꀊꂵꋋꂷꊿꐈꀊꂵꉬꌠꋌꀕꀋꐚꄉ,ꎂꀕꃅꀊꂵꈝꃀꀋꌧꂷꉬꎻꈁ,ꋍꑊꐮꐊꆹꌊꇁꄿꇨꁨꑠꏢꐂꄮꇬꆏ,ꊾꋠꀊꂵꂶꌠꆏꈍꄮꇯꆐꊿꋋꂷꋟꏢꉪꌠꉥ,ꃼꂷꊮꂷꑋꀉꂿꂶꌠꇨꁨꏡꌠꐂꆹꇰꇬꆏ,ꂃꂪꊂꆈꏭꊿꐈꀊꂵꂶꌠꇱꄔꄉ,ꃼꂷꊮꂷꀉꂿꂶꌠꋌꄳꊰꇨꁨꇬꊐꇈꋌꇤꌋꇧꎭꀐ。
ꊿꐈꀊꂵꂶꌠꃼꂷꊮꂷꀉꂿꋌꒃꋠꈭꐨ,ꉈꑴꌞꀋꃋꑍꍈꌠꒃꋠꏢꉨꄉꋋꇅꃅꋌꀱꉈꑴꌞꀋꃋꑍꍈꌠꎹꇁꌦꀐ。ꊾꐈꀊꂵꇁꌋꃼꂷꊮꂷꑋꀀꅉꑟꇈꋌꎼꀃꈈꁭꑭꉆꄉ:“ꀉꑳꑋꀋ,ꀉꂿꇁꀐ,ꉆꐥꃅꀃꈈꁉ”ꄷ。ꃼꂷꊮꂷꑋꆏꇬꏭ:“ꆏꉪꀉꂿꀋꉬ,ꉪꀉꂿꇁꇬꆹꃮꉘꃬꉘꅉꃅꇁꌠꄸ,ꉪꀃꈈꈁꏾꃅꁉꀋꉆ,”ꄷ。ꊂꄹꉇꆏꊿꐈꀊꂵꂶꌠꎼꃮꉘꃬꉘꅉꃅꇁꌊꀃꈈꁭꉆꄉ:“ꀉꑳꑋꀋ,ꀉꂿꇁꀐ,ꉆꐥꃅꀃꈈꁉ”ꄷ。ꃼꂷꊮꂷꑋꇫꏭ:“ꆏꉣꑊꀉꂿꀋꉬꏭꐛ,ꉪꀉꂿꇁꇬꆹꅻꊪꅻꃰꊪꇖꏋꇅꄑꃅꇁ,ꆸꎡꆼꇠꊪꇖꏭꇉꄑꃅꇁ,ꃦꌌꈚꌌꃠꇗꃖꇖꃅꄉꇁ。”ꄷꇬꆏ,ꊿꐈꀊꂵꂶꌠꋌꎼꃅꅍꎷꀋꊌꄉꁱꀋꐭꃅꀱꇬꈴꁧ;ꊁꇊꊁꄹꑌꆏ,ꊿꐈꀊꂵꂶꌠꅻꊪꅻꃰꊪꇖꏋꇅꄑ,ꆸꎡꆽꇠꊪꇖꏭꇉꄑ,ꃦꌌꈚꌌꃠꇗꃖꇖꈧꃅꇁꌊꃼꂷꊮꂷꀃꈈꁭꉆꄉ:“ꀉꑳꑋꀋ,ꇯꍝꃅꀉꂿꀱꇁꀐ,ꉆꐥꃅꀃꈈꁉꄉꋙꍈꃅꀉꂿꍈꉏ,ꀉꂿꀃꑍꀉꁌꀊꂵꅍꍈꀋꋠꃅꇁꄉ,ꐙꑌꐙꄏ,ꀃꃀꑌꂮꌦꄉꏽꀐꍰ!”ꄷꇬꆏ,ꀋꃋꃼꂷꊮꂷꂶꌠꎼꀃꈈꑓꐬꇬꈴꄉꊼꇅꆈꉚꇬꆏ,ꊿꋋꂷꋍꑊꀉꂿꀋꌡꀕꃅꐙꇈ,ꃼꂷꇬꏭ:“ꉢꅽꃚꅽꉐꅲꇬꄡꇗꉠꀉꂿꃚꉐꀋꌡꀕꃅꐙ,ꉠꀉꂿꇁꇬꆹꂴꆽꃮꑭꃬꅐꇤꀃꈈꑓꐬꇬꈴꎼꇁ,ꆏꉪꀉꂿꀋꉬꏭꐛ,ꀃꈈꉪꋌꁇꀋꄎ。”ꄷꇬꆏ,ꀋꃋꊮꂷꍇꌠꆏꈎꄜꑌꀄꊭ,ꑍꃀꑍꑌꋍꀉꂿꇱꌌꃇꑐꇧꇨꄉ,ꋍꉌꂵꍇꌠꑌꋍꀉꂿꇯꍝꃅꇁꀐꇚꑴꉂꄉ,ꃺꃀꃼꂷꂶꌠꉉꀋꌐꌦꇬꆏ,ꋌꎼꃺꃀꈌꇑꌊꊿꐈꀊꂵꏭ:“ꀉꂿꀋ!ꅽꃼꂷꉇꉈꃅꆏꈧꌠ,ꉢꆎꉂꌋꈊꃀꂯꀀꑌꀋꇴꅷꃅꄜ,ꀃꈈꆹꉇꈌꂷꅍꏢꌌꄙꄉ,ꆏꀒꁨꄹꑲꆏꋋꇅꃅꁉꄸ”ꄷꇈ;ꊿꐈꀊꂵꊋꇱꄉꀃꈈꋌꄹꎼꆹꇬꆏ,ꀃꈈꁬꌠꋋꇅꃅꋌꁈꎼꒉꈭꐨ,ꊿꐈꀊꂵꋋꇅꃅꋌꂇꀂꇬꊐꀐ。
ꈊꃀꍪꋠꄮꇬꆏ,ꀋꃋꃼꂷꊮꂷꑋꆹꁁꌕꒉꏬꀕ,ꑉꂷꋛꋚꃅꄉꋠ;ꊿꐈꀊꂵꂶꌠꆏꃼꂷꊮꂷꑋꏭ:“ꀉꑳꑋꀋ,ꀉꂿꈜꎼꐙꄏꇨꄉꆸꄜꊼꇅꎍꂿ,ꆍꃺꃀꑍꂵꑋꀒꁨꋠꌶ,ꀉꂿꆹꀉꁌꀊꂵꅍꎸꅗꋚꅙꀐꌠꉥ,ꋚꋠꀋꏾ,ꀉꂿꉈꇬꄻꀋꅐ”ꄷꇈ,ꋌꎼꆸꄜꎌꎴꀕꃅꋌꐂꆸꄜꃹꁧꀐ。
ꃼꂷꊮꂷꑋꋚꋠꑌꃅꄉꇬꆏ,ꊿꐈꀊꂵꂶꌠꋍꆱꌺꏡꌠꋌꀖꄉ,ꑍꃀꑍꊾꌋꆀꎆꋌꇱꒃꋠꇈꊾꎸꌋꆀꎆꎸꋠꋒꈧꌠꋌꄌꌊ,ꀱꏟ、ꀱꏟꃅꋠꇬꆏ,ꃼꂷꊮꂷꊌꈨꇈ,ꃼꂷꇬꏭ:“ꀉꂿꀋ,ꆏꇬꀋꎍꃅ,ꀱꏟ、ꀱꏟꃅꑞꈨꋠꀋ?”ꄷꇬꆏ,ꊿꐈꀊꂵꏭ:“ꈔꀉꑳ,ꑞꈨꋠꂯ?ꀉꂿꈝꃀꇬꀃꃀꂮꏦꄉ,ꀉꁌꄰꌧꂓꑍꂷꄻꉢꁳꌌꈝꃀꈢꋠꇁꄷꋠꀋꎺꃅꉢꌌꑝꌠ,ꀉꁁꋠꅍꑞꈨꐥꂯ?ꀉꑳꑋꀋ,ꌎꈯꀐ,ꆐꑊꉆꐥꃅꋚꋠꄉꉪꌕꂾꇬꀀꅲꀐꍯ!”ꄷ。
ꀀꄮꇬꆏ。ꊿꐈꀊꂵꂶꌠꃼꂷꊮꂷꑋꏭ:“ꀉꑳꑋ,ꀉꂿꆹꈊꃀꀀꇬꎸꋊꌠꀉꄂꏦꂷ。ꆐꑊꑍꂷꐯꇯꃦꈜꇔꌌꃆꄔꄩꃪꄉꊼꇅꇤꉚ,ꈍꑠꂷꄈꎸꐥꉚ,ꎸꐥꂶꌠꆏꀃꂰꉠꑬꂪꏯꀀ,ꎸꀋꐥꂶꌠꆏꉠꂣꈐꇬꀀ”ꄷ。ꀋꃋꊮꂷꍇꌠꆏ,ꋍꀉꂿꀋꉬꃅꊿꐈꀊꂵꉬꌠꋌꋋꀋꐚꌠꉥ,ꀂꄈꀉꂿꂣꈐꇬꀀꌠꉬꄷ,ꃦꈜꋌꇔꌌꇤꈏꃆꄔꄩꃪꄉꈍꃅꇤꇬꑌꐛꅍꀋꐥ;ꄚ,ꃺꃀꃼꂷꂶꌠꆏ,ꊿꐈꀊꂵꂶꌠꋍꀉꂿꀋꉬꌠꋌꌋꄉꀐꌠꉥ,ꀋꌋꀕꃅꋌꆈꌊꁈꆸꇬꐩꂷꋍꇱꋌꃬꋍꀂꄁꇬꁊꇈ,ꀂꄁꈫꌠꋌꄌꌊꇤꈏꃆꄔꄩꃪꄉꊼꇅꇤꇬꆏ,ꐩꂷꈧꌠꋌꇤꃆꄔꇬꊐꄉ,ꇤꈏꃆꄔꇬꋋꇅꃅꀰꀱꀕꃅꂿꇬꆏ,ꊿꐈꀊꂵꂶꌠꄹꇬ:“ꀉꇱꀕꇰ!ꀉꂿꀉꁌꀊꂵꅍꀉꑌꑍꀋꐛꌦꀉ,ꃼꂷꑞꃅꎸꋍꑋꀕꀿꌠꉬ?ꉠꉌꀋꌒꌦꒉꀐ。ꉠꀋꃋꊮꂷꄈ,ꎸꍈꑌꐥꀋꇬ,ꀃꂰꆏꉢꉠꊮꂷꂣꀀꂯ,ꃼꂷꆹꎸꐥꇨꌠꉥ,ꉠꑬꂪꏯꀀ”ꄷꇈꄚꄉꐯꇯꇬꀀꁧꀐ。
ꃼꂷꊮꂷꑋꊿꐈꀊꂵꄰꀀꅷꃬꀮꇳꄮꇬꆏ,ꑐꂵꊮꂷꍇꌠꊿꐈꀊꂵꇱꆼꋏꌦꄉꌌꀱꏟꃅꋠꇬꆏ,ꃼꂷꌋꅜꇈ,ꋌꎼꊿꐈꀊꂵꏭ:“ꀉꂿꀋ,ꆏꀱꏟꃅꑞꈨꑝꋠꇆ?”ꄷ,ꀊꂵꄹꇬ:“ꀉꁌꄰꄻꉢꁳꎼꇁꌠꌧꂓꂷꇬꀀꌦꅊꇈꄉ,ꌧꂓꋋꂷꑝꌠꀋꆅ,”ꄷ。ꃼꂷꆏꉇꉈꃅꐈꄉꇬꏭ:“ꀉꂿꀊ,ꉡꑌꋠꏾꀐꂼ,ꆏꑴꌠꀄꊭꍈꄻꉡꍈꉏ?”ꄷꇬꆏ,ꊿꐈꀊꂵꂶꌠꆏꊮꂷꇇꏸꌺꑍꏢꋌꄻꃼꂷꁵꇈ,ꃼꂷꋌꇷꇬꇉꉘꅍꀕ,ꃼꂷꉪꇬꊮꂷꈍꃅꑌꋌꇣꋠꀐ,ꏡꁈꏂꄉꀋꆶꇬꀋꐯꀐꉂꄉ,ꐈꄉꋌꎼꊿꐈꀊꂵꏭ:“ꀉꂿꀋ,ꉢꀃꃀꍈꄸꀐ,ꅊꁧꍈꒉꏾꀐ,ꋰꀕꋰꀋꄿꀐ,ꈍꃅꂯꀋ?”ꄷꉉꇈ,ꉇꀕꃅꇇꁮꋌꄻꈂꀸꇬꂿꄉꃷꁖꋒꃅꇬꆏ,ꊿꐈꀊꂵꂶꌠꇨꆰꇨꊸꃅꇬꏭ:“ꁌꍸꄁꇴꌺꀋ,ꆏꉆꐥꃅꄓꅊꁧꒉꍮ,ꀃꌐꆏꒇꄚꀀꈌꇬꊐꂵꉎ?”ꄷꇈ,ꊿꐈꀊꂵꆏꃼꂷꁇꏦꄉ,ꀋꌋꀕꃅꋌꋋꂷꋌꌌꏣꄀꃼꂷꂃꂪꇬꄀꄉ,ꑟꋋꂷꌠꆏꋌꌭꄉꇈꃼꂷꁳꅊꁧꒉꎻ;ꃼꂷꄓꂃꈚꄉꋌꎼꀃꈈꁭꑭꑌꄉꇈ,ꋍꇱꄒꇬꎷꂷꋌꈹꌌꋌꄻꋍꑋꅉꐕꄉ,ꋌꁈꌧꅗꆿꆈꁦꁧꄩꑌꄉꇈꃼꂷꌦꁧꄩꑌꅷꃅꄜꄮꇬꆏ,ꊿꐈꀊꂵꂶꌠꊮꂷꃶꉆꈧꌠꋌꄌꌊꌧꅗꁧꐴꑭꒉꇉꇬꄉ,ꎵꅉꅜꅉꃅꇬꆏ;ꃼꂷꌦꁧꄩꑌꄉꉜꅉꉜꅉꃅꉌꂵꆅꌊꑓꁴꅐꄉ,ꂴꆽꑓꁴꄩꊰꊿꐈꀊꂵꇇꁮꇬꌸꇬꆏ,ꊿꐈꀊꂵꆏ:“ꁮꌦꁮꑌꁮꑱꇥꄆꀕ”ꄷꇈ,ꑓꁴꄩꌠꋌꇱꑽꅝ;ꊂꊛꄉꑓꁴꄩꊰꀊꂵꇇꁮꄩꌸꌦꇬꆏ,ꄡꇗ:“ꁮꌦꁮꑌꁮꑽꇥꄆꀕ”ꄷꇈ,ꋌꏮꌩꁧꄩꉜꇬꆏ,ꀋꃋꃼꂷꋌꊌꂿ;“ꁌꍸꄁꇴꌺꀋ,ꉡꆹꆏꁈꌩꃹꃪꃹꁧꀐꎼꈀ,ꉘꀋꇉꃅꆎꂷꆈꄚꑌꅊꇈꀒ!”ꄷꇈ,ꋌꎼꇧꍻꇧꆽꃅꌩꁧꅂꌊꃼꂷꒃꋠꂿꄷꇬꆏ,ꌩꁧꋌꋋꅂꀋꄐꃅꉔꌊ“ꄏ!”ꃅꊰꇁꀏꅞꇬꆏ,ꃼꂷꇬꏭ:“ꀉꂿꀋ,ꆎꆹꌧꅗꆿꆈꅝꏾꏭꐛ,ꄚ,ꆏꋋꅂꇁꀋꄐꀐꌠꉥ,ꆏꑴꌠꇌꐔꈨꌌꌩꁧꎰꄉꅂꇬꆏꅂꇁꄎꏭꐛ,”ꄷꇈ,ꇌꐔꈨꊿꐈꀊꂵꄌꌊꌧꅗꆿꆈꁦꌠꍀꄉꅂꇬꆏ,ꉔꇓꏻꇓꃅꋌꇬꅂꀋꄐꀐ。ꃼꂷꇬꏭ:“ꀉꂿꀋ,ꆏꅁꅂꌋꆀꐙꄏꏭꐛꀐ,ꀃꃀꑌꂮꏭꐛꀐ,ꉪꀁꇬꃮꋌꈨꎍꑴ,ꆏꑴꌠꃮꋌꈧꌠꌌꌩꁧꇬꉖꄉꑲꆏꅂꄩꇁꄎꌠꉬ,”ꄷꇬꆏ,ꊿꐈꀊꂵꉪꇬꐯꀐꇚꑴꉂꄉ,ꋋꇅꃅꋌꀥꀁꇬꃮꋌꈨꋌꎹꌊꌩꁧꁦꌠꉖꄉꈭꐨꋌꎼꊼꇅꅂꉚꇬꆏ,ꀊꅰꃅꉔꌊꅁꃅꅂꀋꉆꀐ。ꄚꄉ,ꃼꂷꆏꈍꃅꊿꐈꀊꂵꋋꂷꏂꇧꎭꑲꆀꉌꂵꇬꒉꄿꏢꉨꌠꉥ,ꋌꎼꊿꐈꀊꂵꏭ:“ꀉꂿꀋ,ꆏꀈꃀꀐꌠꉥꌩꁧꆏꋋꅂꀋꄐꀐ,ꆏꅁꅂꌦꆀꀄꂳꌊꊿꈔꇁꏭꐛ,ꆏꉆꐥꃅꉪꑶꄧꐳꐎꏬꌺꏡꌠꌵꌌꇁ,ꉢꐳꌌꌧꅗꆿꆈꈨꑣꆏꄎꂿ,”ꄷ。ꊿꐈꀊꂵꂶꌠꋍꁁꏭꆹꉆꐥꃅꃼꂷꂶꌠꒃꋠꏢꉨ,ꋍꁁꏭꆹꌩꁧꅁꅂꌦꆀꐙꑌꐙꄏ,ꀃꃀꑌꂮꌊꃅꅍꎷꀋꊌꄉ,ꀋꇝꃅꋌꀥꀁꇬꄉꑶꄧꐳꏢꋌꌵꃼꂷꁵꄉꌧꅗꆿꆈꂶꀕꑣꋌꄎꎽ。ꃼꂷꐳꏡꌠꋌꒃꇇꈐꊐꄉꈭꐨꆏ,ꋌꎼꊿꐈꀊꂵꏭ:“ꀉꂿꀋ,ꆏꈂꀸꁉꄉꋌꐥ,ꉢꐳꌌꌧꅗꆿꆈꑣꆏꄎꂿ,”ꂴꆽꋍꂷꋌꑣꐳꂷꀂꏾꄀꄉꄻꇬꄚꇈ:“ꀉꂿꀋ,ꆏꅝꇬꂄꅀꀋꂄ,ꉈꑴꅜꀕꌦꀋ?”ꄷꇬꆏ,ꀊꂵꇬꏭ:“ꀋꃋꃼꂷꐥ,ꀉꂿꂮꌦꂯꄉꀐ,ꆏꑴꌠꉆꐥꃅꀉꑌꑍꇯꑣꀉꂿꄐꇁꂸ。”ꄷ。ꃼꂷꉪꇬꎔꃅꅰꄉꀋꏂꇬꌦꐳꂷꄩꄀꄉꊒꀕꃅꋌꄻꀊꂵꈂꀸꇬꊐꎼꒉꇈ,ꃼꂷꇬꏭ:“ꀉꂿꅝꇎꀕꀐ,ꉈꑴꅜꀕꌦꀋ?”ꄷꇬꆏ,ꀊꂵꇬꏭ:“ꀋꃋꃼꂷꐥ,ꅽꀉꂿꂮꌦꂯꄉꀐ,ꉆꐥꃅꊛꄉꀉꑌꃅꑣꎼꇁꉏ,ꅝꇎꄮꀋꐥꀐ。”ꄷ,ꊂꋌꃢꆏꌧꅗꂶꂷꀞꃅꀞꄂꂷꀉꄂꃼꂷꇱꑣꐳꂷꄩꄀꄉꄻꇬꄏꎼꒉꇬꆏ,ꀊꂵꇬꏭ:“ꃼꂷꇈꃼꂷꀋ!ꅽꀉꂿꂮꌦꒉꂯꀑꇬ,ꆏꑞꃅꀉꑌꑍꇯꑣꎼꀋꇁꃅ,ꋍꂷꑍꂷꃅꉡꊏꌠꉬ?ꆏꅽꀉꂿꏂꏢꉨꅀ!ꆏꉡꏂꇬꆹ,ꉠꌦꐈꒊꃀꐛꆏꇈ,ꉠꃷꅍꌋꆀꉠꎸꆹꐈꃪꅪꐛꆏꇈ,ꉠꀍꑐꐈꅡꀯꐛꆏꇈꌠꉬꑴꂸ!”ꄷ。ꀋꃋꃼꂷꇬꏭ:“ꀉꂿꀋ,ꆏꑞꃅꋍꃅꉉꇆ,ꅽꀋꃋꂷꄓꆏꀉꂿꂷꏭꏂꑵꅀ,ꌺꉘꆹꀿꉂ,ꅩꉘꆹꃀꉂꑵ,ꉢꄚꌩꄩꎔꃅꑭꐙꇇꐛꀋꌒꒉꄸꄉꋍꃢꌠꀉꑌꃅꑣꀋꌒꐛꅹꄸ;ꆏꑴꌠꎔꃅꈂꀸꀊꐯꃅꁉꄉꂸ,ꉢꋌꃢꆏꀉꑌꃅꑣꆏꄎꎼꇁꂿ,”ꄷꇬꆏ,ꊿꐈꀊꂵꂶꌠꇯꍝꐯꀐꉂꄉ,ꈂꀸꂶꌠꋌꏅꁈꆸꈌꒊꃅꄉꇬꄽꄉꇬꆏ,ꃼꂷꑌꋍꉌꂵꋌꉪꑌꂵꊮꂷꍓꍇꌠꄀꄮꇬꆏ,ꉌꂵꁐꍠꃅꆅꌊꌧꅗꉬꂷꃘꂷꋌꑣꐳꂷꄩꄀꄉꇈ,ꋍꇭꀧꇖꌋꊋꈀꑌꃅꇤꄉ,ꐳꏡꌠꋌꇱꅝꊿꐈꀊꂵꆺꄝꇬꊐꎼꒉꇈ,ꐳꏡꌠꎼꆺꄝꇬꈴꇬꇉꌕꄿꊐꄉ,ꊿꐈꀊꂵꋍꃼꂷꇱꅝꂿꆸꀮꃅꄚꅞꀐ。
ꊿꐈꀊꂵꃼꂷꇱꌉꌦꀊꉗꀋꐛꌦꇬꆏ,ꀊꂵꃷꅐꌋꆀꎸꈧꌠꇯꍝꃅꐈꃪꅪꐛ,ꌦꈧꌠꐈꒊꃀꐛ,ꀍꑐꈧꌠꐈꅡꀯꐛꄉꃼꂷꋌꇊꄚꅞꀐꅊꇈ;ꃼꂷꋌꎼꃅꅍꎷꀋꊌꃅꆈꄚꌧꅗꁧꇬꑌꄉꇬꆏ,ꂴꆽꊴꃀꐞꅪꏢꀥꄚꈴꇁꇈ,ꃼꂷꎼꊴꏡꌠꏭ:“ꊴꃀꀊꃺꀋ,ꆏꊼꇅꉡꀑꇬꄏꀞ!”ꄷꇬ,ꊴꃀꐞꅪꇬꏭ:“ꉢꅽꀑꇬꄏꄷꀋꁧ,ꉢꂯꈌꈹꅸꃸꅉꀋꊌꀐ,ꅽꀑꇤꇬꄷꀋꁧꉠꀐꇬꂯꈭꀋꅐꏭꐛꀐꍰ!”ꄷꇬꄚꈴꁧ。ꊂꎷꈌꋍꋇꐙꃰꏿꃅꄚꈴꇁꌦ,ꃼꂷꎼꇬꏭ:“ꈌꌦꈌꌋꎷꈌꅽꑠꋉꐥ,ꆍꑴꌠꉡꊼꇅꈭꋏꇬꍑꀕꀋ?”ꄷꇬꆏ,ꎷꈌꋇꌠꄹꇬ:“ꆎꈭꋏꆹꄡꑟꑴꀉ,ꉪꊴꃀꐞꅪꈹꈉꄉꅽꈭꋏꀋꄐꀐ,”ꄷꇈꎼꄚꈴꁧꌦꀐ。ꊂꄽꂫꇬꆏꊿꈌꌋꂶꌠꀥꄚꅐꇁꇈ,ꃼꂷꎼꇬꏭ:“ꈌꃅꌊꁈꀋ,ꉡꆹꅩꍸꅪꇜꍈꉥ,ꀋꃅꊿꐈꀊꂵꉢꇱꌉꌦꀐ,ꋌꐈꃪꅪ、ꒊꃀꌋꆀꅡꀯꐛꄉ,ꉢꋌꇊꄚꅞꄉꅐꁧꀋꄐꀐ,ꆏꑴꌠꉡꊼꇅꈭꋏꇬꍑꀕꀋꐚꀐꂼ!”ꄷꇬꆏ,ꁦꋠꈌꌋꂶꌠꇬꏭ:“ꆏꑌꅩꍸꂷ,ꉡꑌꌺꍸꈌꌋꍈ,ꊾꍸꐯꀦꎹꄡꑟꑵꀋꆅ,ꆏꑴꌠꉠꈌꏧꋋꏢꏟꈯꃅꋏꌫꄉ,ꉢꈌꐜꎼꇁꇬꆏ,ꆎꊿꐈꀊꂵꆹꂯꋋꇅꃅꈌꇱꇤꋠꇧꎭꌠꉬ,ꆏꉌꂵꐒꄻꀋꅐ,ꉢꀋꎪꃅꆏꂶꌠꈭꋏꄎꌠꉬ,”ꄷꄮꇬꆏ,ꅇꂷꋋꈨꊿꐈꀊꂵꈨꄉ,ꊿꐈꀊꂵꆏꐤꀕꈌꀉꄂꏦꑵꉬꅊꇈꄉ,ꒊꃀꑌꋋꇅꃅꌤ,ꃪꅪꌋꆀꅡꀯꑌꋋꇅꃅꑍꇧꎭꁧꌐ,ꊿꐈꀊꂵꆹꁈꇿꈴꁧꀋꐚꀐ。ꄚꄉꁦꋠꈌꌋꂶꌠꆏꋍꏤꏂꈫꌠꋌꄻꀏꃄꅉꈈꄉ,ꃼꂷꆏꋋꇅꃅꌩꁧꄩꄉꋌꐂꀏꃄꅉꏤꏂꇬꅞꇈꄚꄉꈭꅐ,ꊁꁦꋠꌺꍸꈌꌋꋋꍈꌋꆀꀋꃋꅩꍸꃼꂷꋋꍈꑌꐯꊊꌊꋍꑷꐛꁧꇈ,ꊿꐈꀊꂵꑵꌠꑌꃷꏃꀋꁨꃅꋍꑊꇱꏂꇧꎭꌐꄷꁮꅉꑠꂷꐥꄷꍰ。
ꃼꂷꊮꂷꑋ(ꀉꁌꁮꅉ)
ꄜꃑꄮꈉ： 2012-05-27 | ꁰꄻꊿ：ꎻꌺꇃꇷ ꎴꁱꌠ
ꇁꀦ： ꆃꎭꉜꇐꁱꀕ
ꁰꄻꌠ：
beleys ｜
ꄜꃑꌠ：
