《ꅺꊈꄯꒉ》—ꉒꐈꉾꐈꀥ-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꅺꊈꄯꒉ》—ꉒꐈꉾꐈꀥ

ꄜꃑꄮꈉ： 2011-09-05 　|　ꁰꄻꊿ：ꇓꆈꀋꃀ

ꉒꐈꉾꐈꀥ

ꁍꉺꌺꌕꑌ，
ꌦꈌꌋꈌꇖꋇꌌ，
ꂷꅪꇉꂿꇔ，
ꌦꑣꌋꑣꌕꋇꋒ，
ꂴꆽ꒔ꋇꋒ，
ꐛꂮꑣꉫꉬ？
ꐛꂮꑣꂸꉬ；
ꊁꇁ꒔ꋇꋒ，
ꀋꈨꑣꉫꉬ？
ꀋꈨꑣꂸꉬ；
꒔ꊁ꒔ꋇꋒ，
ꀋꄳꑣꉫꉬ？
ꀋꄳꑣꉬꇈ。
ꋪꀕꁍꃴꆏ，
ꌦꇁꌋꂽꐩ，
ꁍꉺꌺꌕꑌ，
ꂽꄙꂽꉐꏃ，
ꁏꆹꌩꇁꌋꂽꅸ，
ꅸꇁꇤꇉꆹꀸꊫ，
ꄙꌺꌉꅞꇈ，
ꉐꌺꒃꌊꇁ，
ꃆꇭꌕꉐꍍ꒿꒔ꇷꄀꌌꇁ，
ꁍꉺꀊꋯꄚꄉꈔ，
ꌺꒉꀊꄳꆹꈬꉻ，
ꌺꇢꀋꈨꆹꐈꆃ。

ꉒꇁꉾꑍꁯ，
ꂸꅔꇐꅔꐚ，
ꁍꉺꀊꋯꈔꎆꅔꄉꐚ，
ꁍꅔꑗꅒꐚ，
ꇓꅔꐚꅒꐚ，
ꃢ꒜ꋚꁧꅔ，
ꑷ꒜ꒉꐑꅔ，
ꆏꐭꉢꒉꅔ，
ꆏꃅꉢꉔꅔ，
ꃰꃅꐎꍔꅔ，
ꏂꅪꇇꌒꅔꄉꐚ，
ꊢꌺꉘꇕꇗꌠꑟ，
ꀖꌺꅩꐞꀕꌠꑟ。

ꉒꇁꉾꑍꁯ，
ꉒꐈꉾꋠꋯ，
ꉾꐈꉒꋠꋯ。
ꂴꆽ꒔ꑍꐈ，
ꉒꐈꉾꀋꂿ，
ꉾꐈꉒꀋꂿ；
ꊁꇁ꒔ꑍꐈ，
ꉒꐈꉾꀋꌧ，
ꉾꐈꉒꀋꌧ，
ꉒꈻꈜꉐꆹ，
ꈜꉐꌣꇓꀕ,
ꉾꈻꈜꐯꒉ，
ꇓꑭꁻꁍꀕ。
ꉒꇁꉾꑋꁯ，
ꆏꐈꉢꐈꀥ，
ꉒꐈꑿꐎꐛ，
ꉾꐈꆿꅪꐙ，
ꑌꑿꈀꁈꀕ，
ꆿꅪꈁꄚꄝ，
꒔ꑍꉾꊋꅜ；
ꉒꐈꀖꃅꐙ，
ꉾꐈꇌꃅꐛ，
ꇌꇁꀖꀑꌃ，
ꀖꁏꇌꀑꊥ，
꒔ꑍꉒꊋꅜ；
ꉒꐈꑷꃅꐛ，
ꉾꐈꏬꃅꐙ，
ꑷ꒜ꈁꁈꀕ，
ꏨꆉꈀꏶꏹ，
ꑍꀕꉾꊋꅜ；
ꉒꐈꌥꏾꀊꅪꐛ，
ꉾꐈꃅꃴꏁꇙꐙ，
ꏁꇙ꒿ꇊꒉꉱꃹ，
ꌥꏾꒉꄩꁮ，
ꑍꀕꉒꊋꅜ；
ꉒꐈꃢꃀꐛ，
ꉾꐈꃤꅪꐙ，
ꃢ꒜ꈁꁈꀕ，
ꃤꅪꈁꄚꄝ，
ꌕꑍꉾꊋꅜ；
ꉒꐈꀋꃋꑮꆜꐛ，
ꉾꐈꇇꈯꇇꀘꐙ，
ꀋꃋꑮꆜꑌ，
ꒃꅉꅑꅉꃅ，
ꌕꑍꉒꊋꅜ；
ꉒꐈꊿꃅꐛ，
ꉾꐈꊈꃅꐙ，
ꊈꀱꊿꑝꇁ，
ꊿꁏꉹꒃꌊ，
ꆪꍝꑋꀑꋪ。

ꉒꇁꉾꑍꁯ，
ꇬꇁꉳꌠꑟ，
ꄤꌉꉒꄤꌉ，
ꄤꁻꉾꄤꁻ，
ꌉꇁꆳꂿꐚꂸꉬ，
ꌌꇁꉉꂿꄷ。
ꂴꆽ꒔ꑍꆏ，
ꄵꇓꁦꀑꋪꄉꉉ，
ꅙꐚꌦꆗꇁ꒜ꃅ，
ꃅꍫꈬꐎꋩ；
ꊁꇁ꒔ꑍꆏ，
ꄵꇓꁧꐧꋪꄉꉉ，
ꃅꏂꊖꌺꇁ꒜ꃅ，
ꃅꆈꏂꐎꋩ；
ꊁꇁ꒔ꑍꆏ，
ꄵꇓꒈꇤꋪꄉꉉ，
ꌦꌺꀊꃴꇁ꒜ꃅ，
ꌦꃅꈌꅪꋩ。
ꌦꌺꀊꃴꑌ，
ꃅꇔꄹꃴꏪ，
ꊀꇔꄹꄧꅞ，
ꆿꐎꁧꑴꇁ，
ꌦꃅꋌꄚꇬꅝꇊ，
ꌦꃅꆿꄚꃲ，
ꀋꉉꃲꑴꄷ。
ꉒꇁꉾꑍꁯ，
ꀋꇷꋠꃲꄷ，
ꉹꁌꄚꄉꅸ，
ꆿꐎꁧꑴꑌ，
ꊿꌉꄚꅞꇈ。
ꌦꌺꀊꃴꇁ，
ꈨꑗꄐꂿꄷ，
ꆿꌦꇖꇱꃬ，
ꃄꇖꄹꊂꁊ，
꒔ꄧꈨꊂꌸ，
ꈨꁈꄂꃢꉘ，
꒔ꄧꄂꊂꌸ，
ꄂꈘꇖꃱꅞ，
꒔ꊂꉒꀱꁦꀑꅐꂸꅲ，
ꉐꐙꃅꈯꌸꂸꅲ。
ꉒꇁꉾꑍꁯ，
ꃝꇔꐋꁏꃅꂿꄷ，
ꉿꄓꐙꇌꋠ，
ꏃꃅꍚꆈꒉ；
ꂸꆤꄮꇌꋠ，
ꄵꐛꉐꌦꃅ;
ꈩꋒꃝꇌꋠ，
ꃄꇖꄂꅪꈫ。
ꇌꏸꇖꈌꀖ,
ꃄꇖꄹꊂꁊ，
ꃰꅪꌕꁧꐛ；
ꇌꌦꇖꇱꃬ，
ꋧꃅꇤꄧꎭ，
ꉐꌦꌕ꒨ꐛ；
ꇌꑆꇖꁬꐒ，
ꃄꇖꄹꊂꈠ，
꒔ꊂꉒꐛꁦꀑꅐꅲꃲ，
ꉐꐙꃅꈯꌸꅲꃲ。
ꉒꇁꉾꑋꁯ，
ꉒꀱꉒ꒜ꃅ，
ꉒꀘꀉꐞꇁ꒜ꃅ，
ꉾꀱꉾ꒜ꃅ，
ꉾꀘꆂꈿꈾꇁ꒜ꃅ。
ꅇꊪꉐꏤꆹ，
ꌿꉘꏁꄏꌌ，
ꊪꈌꃘꇤꆹ，
ꆂꒉꃅꐳꌊ，
ꊈꉜꌐꉜꆹ，
ꅔꐍꌕꏂꌌ。
ꌕꁯꏸꂸꑌꇱꄉꏤ：
ꉺꇓꃅꌺꏸꂸꑌ，
ꅙꑭꎽꀮꏸꂸꑌ，
ꇉꅶꐔꐳꏸꂸꑌ。
ꌕꁯꑐꂸꋦꇱꄉꏤ：
ꒉꃴꉜꏂꑐꂸꋦ，
ꄹꃴꏂꌺꑐꂸꋦ，
ꄹꄧꀠꌺꑐꂸꋦ。
ꌕꁯꐎꂸꅐꇱꏤ：
ꃢ꒜ꆈꂷꐎꂸꅐ，
ꇉꅶꊇꌺꐎꂸꅐ，
ꉐꆈꀉꐚꐎꂸꅐ。
ꌕꁯꆈꂸꃹꇱꄉꏤ：
ꁦꀑꑿꐎꆈꂸꃹ，
ꃅꃴꈭꏂꆈꂸꃹ，
ꇉꅶꈹꀮꆈꂸꃹ，
ꂸꁏꇁꎜꄉ。

ꉒꇁꉾꑍꁯ，
ꉒꑌꄙꈄꅸ，
ꉾꂾꏂꉐꒃ，
ꉒꀘꀉꐞꁵ，
ꎆꁵꄙꃅꁵ，
ꉒꌺꄙꁍꒆ，
ꉒꊂꌺꈬꇈ。
ꉾꑌꄙꈄꅸ，
ꉒ꒜ꐎꇐꒃ，
ꉾꀘꆂꈾꁵ，
ꎆꁵꄙꃅꁵ，
ꉾꌺꄙꁍꒆ，
ꉾꊃꌺꈬꇈ。
ꈬꉻꃼꊂꈤ，
ꐈꆃꑳꊂꈤ。

ꇁꀦ： 彝族人网 ꁰꄻꌠ： beleys 　｜　 ꄜꃑꌠ：

ꂴꁬꌠ：《ꅺꊈꄯꒉ》—ꈬꉻꋊꀨ... ꊁꁬꌠ：《ꅺꊈꄯꒉ》—ꌅꋦꁋ

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ