《ꀊꌱꑘ》（ꌕ 、ꇖ）-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀊꌱꑘ》（ꌕ 、ꇖ）

ꄜꃑꄮꈉ： 2011-10-23 　|　ꁰꄻꊿ：ꇓꆈꀋꃀ

(ꌕ)
ꀂ,ꉠꌱꑕ!
ꀂ,ꉠꌱꑕ!
ꊿꐙꊾꄮꇀꂷꐥ,
ꃅꐛꊀꄮꇀꂷꐥ;
ꎔꇁꉌꀒꅑꌠꐥ,
ꀋꎔꉌꈪꊰꌠꐥ,
ꑍꎔꀋꐥꑍꄮꐥꇈꃲ。

ꉠꌱꑕꑘꑠꍈꑌ,
ꊿꐙꊾꄮꇀꂷꄸ,
ꃅꐛꊀꄮꇀꂷꄸ。
ꀋꉂꑍꂷꉂꇁꄷꀋꉆ,
ꉂꇁꑍꍈꉂꏣꇽꀋꉆ,
ꉡꆹꉠꌱꀉꄂꉂꄸꇆ!

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉡꆹꉠꌱꀉꄂꉂꄸꇆ!
ꁭꅐꌕꇉꏭ,
ꏃꉐꐎꆧꂒꂷꑌ,
ꀁꆹꉡꉂꐯꉡꉂꑶꇆ,
ꉡꆹꆏꀋꉂ,
ꐎꂾꈬꏦꀕꑌꆏꀋꉂ,
ꏂꂾꈬꏦꀕꑌꆏꀋꉂ,
ꉡꆹꉠꌱꀉꄂꉂꄸꇆ!

ꁮꐚꌕꇉꏭ,
ꊴꉐꏂꆧꂒꂷꑌ,
ꀁꆹꉡꉂꐯꉡꉂꑶꇆ,
ꉡꆹꆏꀋꉂ,
ꃆꇭꏂꅪꎡꑌꆏꀋꉂ,
ꐎꏂꈬꊛꄈꑌꆏꀋꉂ,
ꉡꆹꉠꌱꀉꄂꉂꄸꇆ!

ꈢꉐꌕꈍꏭ,
ꆿꉐꏠꆧꂒꂷꑌ,
ꀁꆹꉡꉂꐯꉡꉂꑶꇆ,
ꉡꆹꆏꀋꉂ,
ꑌꑿꄙꃅꅸꑌꆏꀋꉂ,
ꆿꍯꉐꃅꁨꑌꆏꀋꉂ,
ꉡꆹꉠꌱꀉꄂꉂꄸꇆ!

ꃅꉇꌕꇉꏭ,
ꍀꉐꊪꆧꂒꂷꑌ,
ꀁꆹꉡꉂꐯꉡꉂꑶꇆ,
ꉡꆹꆏꀋꉂ,
ꀝꀬꄌꁿꏽꑌꆏꀋꉂ,
ꊫꇵꏦꍠꄞꑌꆏꀋꉂ,
ꉡꆹꉠꌱꀉꄂꉂꄸꇆ!

ꒈꂪꌕꏃꏭ,
ꎺꉐꃨꆧꂒꂷꑌ,
ꀁꆹꉡꉂꐯꉡꉂꑶꇆ,
ꉡꆹꆏꀋꉂ,
ꐍꋩꇁꆽꃄꑌꆏꀋꉂ,
ꏁꋩꇢꇑꃄꑌꆏꀋꉂ,
ꉡꆹꉠꌱꀉꄂꉂꄸꇆ!

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉡꆹꉠꌱꀉꄂꉂꄸꇆ!
ꋌꉐꌕꁄꏭ,
ꅪꎔꏩꐷꏿ,
ꋋꑌꑊꑍꈬꂷꅑ,
ꆏꂿꅽꐋꐛ,
ꉢꂿꉠꐋꐛ;
ꈋꆹꋍꂷꉂ,
ꉋꆹꋍꂷꇱ。
ꑍꆏꈧꌺꌡ,
ꆏꂿꆏꉚꏸꌬꀕ,
ꉢꂿꉢꉚꊷꆣꀕ:
ꌊꆏꆧꌺꌡ,
ꆏꂿꆏꉚꒈꌦꀕ,
ꉢꂿꉢꉚꁨꇉꀕ。
ꉢꆗꀊꑘꀕꉁꑌꋌꀋꉂ,
ꁯꑌꋌꀋꁯ;
ꋌꐥꋍꃅꐥ,
ꉡꆹꋌꀋꉂ,
ꉡꆹꉠꌱꀉꄂꉂꄸꇆ!

ꋌꐯꌕꁄꏭ,
ꅩꃨꁵꇗꐛ,
ꉂꌠꀋꊉꎵ,
ꍯꌠꈬꋉꑟ。
ꋋꑌꒉꊩꀋꍽꌟ,
ꃬꆪꑋꅐꃬꆪꃨ,
ꈌꆪꑋꅐꈌꆪꃨ;
ꁯꆮꌩꐚꌟ,
ꌩꃨꌩꂿꈬ,
ꁬꃨꁬꂿꈬ。
ꉢꆗꀊꑘꀕꉁꑌꋌꀋꉂ,
ꉜꑌꋌꀋꉜ;
ꋌꐥꋍꃅꐥ,
ꉡꆹꋌꀋꉂ,
ꉡꆹꉠꌱꀉꄂꉂꄸꇆ!

ꀂ,ꉠꌱꑕ!
ꀂ,ꉠꌱꑕ!
ꃅꃴꏷꋦꄖ,
ꏷꌺꌫꂷꏃꊰꋌꉚꏾ;
ꑋꀑꃨꎔꃨ,
ꃨꑠꄘꇖꉐ,
ꃨꑠꄘꇖꉐ,
ꁦꀑꂚꃨꋍꀮꊿꋌꁭ;
ꐧꋦꅪꎔꑌ,
ꅪꐥꉐꑋꊏ,
ꌱꇁꑕꑘꆎꂷꊿꋋꉂ。

(ꇖ)
ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꉠꌱꉣꑊꉂꇁꑟꅇꆹ,
ꏬꌌꃅꈬꈨꆹꃲ,
ꏷꌺꑍꍈꆧꃴꍃꄉꆈꆹꃲ;
ꆳꌌꅔꇬꈨꆹꃲ,
ꏰꌺꑍꍈꄂꃴꁿꄉꋶꆹꃲ;
ꆿꌌꇉꊂꈨꆹꃲ,
ꁯꎓꑍꍈꌩꃴꎑꄉꂿꆹꃲ;
ꎴꌌꒉꊂꈨꆹꃲ,
ꉜꏂꑍꍈꀜꆗꏿꆹꃲ。

ꉠꌱꉣꑊꌕꇁꈈꅇꆹ,
ꊖꑭꉌꌺꈨꆹꃲ,
ꉌꌺꑍꍈꋋꈨꑓꍝꀕꆹꃲ;
ꈛꁧꏜꉘꈨꆹꃲ,
ꏜꉘꑍꍈꋋꈨꀍꉞꄎꆹꃲ。

ꉠꌱꉣꑊꉂꐪꉂꐛꆹ,
ꏃꑳꃰꊿꈨꆹꃲ,
ꏃꊰꋋꈨꉏꀑꂴꄼꀕꆹꃲ;
ꀑꑌꀐꒉꋋꈨꑓꏂꋘꉬꀕ,
ꀉꁧꀕꏸꋋꈨꑊꂡꌾꆹꃲ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꉂꃅꉂꌠꆹ,
ꑍꆏꈨꃴꂿ,
ꈬꑍꃅꂸꈊꎼꑟ;
ꌊꆏꆧꃴꂿ,
ꈬꉖꃅꂸꄜꎼꑟ。
ꋋꑌꑍꆏꈧꌺꉘꉩꑌ,
ꁮꏮꈞꆈꃹꒉꃲ,
ꉌꃀꄏꄹꊰꒉꃲ。
ꌊꆏꆧꌺꉘꉩꑌ,
ꌊꎼꌊꈴꏿꆹꃲ,
ꇬꇉꉘꅍꀕꆹꃲ;
ꆺꑳꃪꀮꉘꉩꑌ,
ꃪꀮꇳꄧꀕꇁꃲ,
ꄸꌋꊪꇖꀕꇁꃲ。
ꀑꑌꀉꁧꉘꉩꑌ,
ꇧꅉꇀꅉꑟꇈꃳ。

ꀂ,ꉠꌱꑕ!
ꀂ,ꉠꌱꑕ!
ꎵꃀꊿꋋꉂ,
ꐩꁌꊿꋊꇨꇈꃲ;
ꐚꒉꊿꋋꉂ,
ꐛꃽꊿꋊꇨꇈꃲ;
ꉛꏬꊿꋋꉂ,
ꆂꒉꊿꌊꇨꇈꃲ;
ꀊꌱꊿꋋꉂ,
ꀉꁧꊾꇨꀕꇈꃲ。

ꀂ,ꉠꌱꑕ!
ꀂ,ꉠꌱꑕ!
ꀉꁧꀕꏸꄰ,
ꇧꅉꇀꅉꃄꇰꃲ。
ꀉꁧꀕꏸꄰ,
ꀑꑌꈜꀕꇨꇈꃲ,
ꀉꁧꈜꀕꇨꇈꃲ,
ꈌꀞꃘꑴꈜꀕꇨꇈꃲ,
ꎤꁉꎤꆹꈜꀕꇨꇈꃲ。

ꀉꁧꀕꏸꄰ,
ꇧꅉꇀꅉꃄꑟꃲ。
ꃱꆹꈬꊐꄀꄉꃲ,
ꇁꆽꈬꏢꊐꄉꃲ,
ꎤꁉꈬꋬꄀꄉꃲ,
ꂸꁉꇁꎜꄉꑟꃲ。

ꀉꁧꀕꏸꄰ,
ꅪꎔꉱꈐꀀ,
ꅩꎤꉱꈐꊐꄉꃲ;
ꊾꇬꃅꇬꏦꃅꏦ,
ꏁꍿꆿꃀꐏꃅꐏꑟꃲ;
ꃱꆹꄇꃀꉜꑌꊪꇖꀕ,
ꎤꁉꎤꇺꉜꑌꊪꏮꀕ,
ꈌꀞꃘꑴꉼꏒꀕꑟꃲ。

ꀂ,ꉠꌱꑕ!
ꀂ,ꉠꌱꑕ!
ꀉꁧꀕꏸꄰ,
ꌩꃅꌩꊨꆹ,
ꐟꈮꇤꇉꀉꄂꋍꂷꐥꎼꑟ,
ꊘꑌꊌꂸꉆꎼꑟ;
ꎤꁉꎤꇺꆹ,
ꇍꈩꀒꎂꀉꄂꋍꋬꎍꎼꑟ,
ꂾꑌꃷꂸꅲꎼꑟ。

ꀉꁧꀕꏸꄰ,
ꈌꀞꃘꑴꆎꂷꑌ,
ꑋꀊꌕꆪꆹ,
ꌌꇁꇉꈫꇁꄿꄀꎼꑟ,
ꑾꃅꇁꂟꍈꎼꑟ;
ꋅꀊꌕꆪꆹ,
ꌌꇁꁦꀑꇉꄩꄀꎼꑟ,
ꑓꂷꀉꐚꇵꎼꑟ,
ꐻꇁꉈꉻꍈꎼꑟ。

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꆹ,
ꃱꆹꈐꉈꇢ,
ꃱꆹꎣꈬꋬ,
ꌗꏂꅺꈨꑌ,
ꂸꂿꇁꎜꄉ,
ꁧꇢꇉꇢꏭꂸꋋꑟꃲ。

ꉠꌱꉣꑊꆹ,
ꐷꈐꐷꉈꇢ,
ꉼꀒꊕꈬꄅ,
ꈬꄅꃪꅪꎅꑟꃲ。
ꑳꐯꌔꏮꀕ,
ꑳꉎꌔꏮꀕ,
ꈁꄚꅺꈨꑌ,
ꂸꂿꇁꎜꄈꑟꃲ,
ꉠꌱꉣꑊꈍꃅꂯ!

ꀉꁧꀕꏸꄰ,
ꉼꀒꑞꃅꋍꂤꂦꇁꎼ?
ꃭꉱꑞꃅꋍꄕꄗꇁꎼ?
ꉠꌱꉣꑊꂸꂿꇁꎜꄉ,
ꉌꃀꁯꎓꅐꇈꃲ,
ꉠꌱꉣꑊꈍꃅꂯ!

ꀂ,ꉠꌱꑕ!
ꀂ,ꉠꌱꑕ!
ꉠꌱꑕꑘꑠꍈꑌ,
ꇫꍻꇫꁁꏿꆹꃲ,
ꐷꈭꏂꊂꏮꆹꃲ,
ꑓꁴꑰꀕꇤꆹꃲ,
ꆗꀊꑘꀕꑠꍈꑌ,
ꄷꁈꄷꉘꏿꆹꃲ,
ꀊꇷꉙꄸꀕꆹꃲ。

ꆗꀊꑘꀕꑌ,
ꑬꃶꈛꂿꏿꆹꃲ,
ꑳꈫꑳꇋꏮꆹꃲ;
ꂸꇴꂸꇱꋠꆹꃲ,
ꌩꑭꇉꃴꍬꆹꃲ,
ꁦꀑꁦꈌꏣꆹꃲ,
ꉠꌱꉣꑊꈍꃅꂯ!

ꀂ,ꉠꌱꑕ!
ꀂ,ꉠꌱꑕ!
ꉠꌱꉣꑊꈍꃅꂯ!
ꀉꁧꀕꏸꄰ,
ꀑꑌꀐꒉꄰ,
ꇧꅉꇀꅉꃅ,
ꇖꃅꇕꇐꈣꑟꃲ。
ꐍꆹꂻꇬꇖ,
ꏁꆹꍔꇬꇖ,
ꑌꑿꄙꃅꇕꑟꃲ;
ꃆꇭꃆꃨꇖ,
ꄇꆹꀊꊛꇕꑟꃲ;
ꃬꌦꃬꌋꇖ,
ꀉꊭꒉꐤꃬꂵꋍꂷꇖ,
ꋍꑍꏃꂷꏿꌠꇕꑟꃲ;
ꃮꌦꃮꌋꇖ,
ꐱꑴꎰꆈꑋꄂꁨꏂꇖ,
ꃅꌋꃮꑴꋍꂷꇕꑟꃲ。

ꇁꀦ： ꆀꉙꊅ ꁰꄻꌠ： 　｜　 ꄜꃑꌠ： beley ꌤꃅꅉ

ꂴꁬꌠ：《ꀊꌱꑘ》（ꉬ 、ꃘ）... ꊁꁬꌠ：《ꀊꌱꑘ》（ꑍ）

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ