ꆈꌠꇐꀳꌋꄀ
ꄜꃑꄮꈉ： 2012-01-02 | ꁰꄻꊿ：beley工作室
ꊴꐷꃙꃚꈍꏮꄁꆏ
ꀋꆪꅻꀧꈍꏮꄖ。
ꂷꃉꂷꏂꂦꀋꋌ,
ꒈꀮꂶꈻꂷꏂꈁ。
ꀿꀋꁨꐥꉆ,
ꃀꀋꁨꐥꉆ,
ꅇꏤꀋꁨꐥꀋꉆ。
ꁮꏂꃬꏿꅝ,
ꁮꏂꅥꂯꑌ,
ꃬꏿꐷꎼꏦ,
ꃬꏿꒃꂯꑌ,
ꁮꏂꄵꎼꏦ。
ꅥꂷꊂꌒꅲ,
ꅇꂷꀕꊂꌒꀋꅲ。
ꃬꎶꐍꂷꑏꏢꆈ,
ꒀꈥꆇꂷꁖꁆꊙ。
ꅶꁉꇂꁮꏢꊿꌌ,
ꍤꁆꎵꃀꍔꃹ。
ꃅꆳꌧꂓꁏ,
ꌧꂓꌧꂓꐯꅣ,
ꀨꆹꀉꐚꋌꌊꁧ,
ꒈꆹꀊꍆꁏꇀꇤ,
ꈓꈥꃅꊸꆗ。
ꆿꉌꑌꄉꑿꐊꐺ,
ꏬꉌꑌꄉꃬꐊꐺ。
ꀉꐚꌕꈎꋌꀋꐎ,
ꏬꆉꃯꅉꐯ,
ꅝꇐꐋꄩꎆ。
ꆗꌺꏭꅉꐯ,
ꌧꇐꐋꄩꎆ。
ꑖꉬꃅꃴꆹ,
ꃅꊭꇫꀋꋲ,
ꑖꉬꃄꅉꆹ,
ꁮꏂꇬꀋꄵ。
ꉪꑽꆏꉜꑽ,
ꉜꑽꆏꃅꑽ。
ꀒꈓꉆꎸꁸꀋꐛ,
ꊂꈎꈌꌋꐋꀋꊌ。
ꌦꃅꌊꃅꑌ,
ꋍꑍꑭꋋꇁꇬꐥ,
ꌦꌺꌊꌺꑌꋍꇬꉉꑽꇮ。
ꈜꐯꐋꀋꎹ,
ꈛꃶꐋꀋꊌ。
ꀉꐚꆏꃮꆀꃅꃮ,
ꌠꑊꇬꋒꆏꅥꅽꃅꅥ,
ꊿꆅꉌꂵꊿꆅꑌ。
ꎵꃀꀯꀋꇮꌠꀃꐒꇸ,
ꏻꒉꇱꀋꇮꌠꃆꄔꏦ,
ꎸꃅꀋꇮꌠꂷꇭꄔ。
ꃱꇌꌟꃅꒆꏦꎃ,
ꇬꇉꒉꍷꐛꌠꐥ,
ꄮꁧꌟꃅꇷꌎꀕ,
ꇬꇉꎺꁯꑌꌠꐥ。
ꈁꑓꆹꂦꁁ,
ꉌꂵꆹꏦꍠ。
ꇇꏸꀉꄂꏢ,
ꆖꂷꀕꉅꀋꉆ。
ꌳꈄꀁꇬꑌ,
ꆧꁨꐚꅍꎍ,
ꅪꎔꀁꇬꑌ,
ꃅꇏꃝꅍꈨ。
ꅡꈭꅇꂷꀊꉘꃮꆫꀉꑳꋒꎍ。
ꆧꁨꎖꄉꉹꋩ,
ꊾꎖꄉꅇꉉ,
ꃄꎖꄉꈁꏷ,
ꁍꎖꄉꑾꑭ。
ꃬꌌꏬꈌꇬꄉꃹꀋꇮ,
ꑿꌌꆿꈌꇬꄉꏃꀋꇮ。
ꏬꌌꃬꃅꉘꀋꉆ,
ꍀꌌꑿꃅꁨꀋꉆ。
ꈌꆈꊾꌦꅝ、ꆺꑳꈬꂷꍍ,
ꉏꆈꃅꇴꈍ、ꌿꉘꈬꁍꍍ。
ꎆꀑꑊꋍꑍ,
ꐋꀑꑊꋍꍂ。
ꎴꁧꆏꁦꃚ,
ꃆꑘꆏꁦꊧ。
ꇬꇉꋌꀋꑌ,
ꂱꀯꋌꄡꄀ。
ꇁꀦ： 《ꆃꎭꉜꇐꁱꀕ》
ꁰꄻꌠ：
beleys ｜
ꄜꃑꌠ：
