《ꀉꂿꅩꌺ》(ꉬ)-ꋊꃆꌧꇐ-ꆈꌠꌧꇐꁱꀕꊅꇊꈐꏓꅉ

《ꀉꂿꅩꌺ》(ꉬ)

ꄜꃑꄮꈉ： 2011-11-30 　|　ꁰꄻꊿ：ꇓꆈꀋꃀ

ꀉꂿꅩꌺꑌ,
ꉐꆈꐁꀕꇉꐛꁧ,
ꂸꐂꇉꐛꁦꑟꃲ。
ꈹꀮꎔꀕꇉꃹꁧ,
ꂸꎔꇉꃹꁦꑟꃲ。
ꅩꌺꇕꀕꌠꐙꁧ,
ꂸꇖꌠꐙꁧꇈꃲ,
ꅩꌺꈍꃅꂯ!

ꀉꂿꅩꌺꑌ,
ꀊꆨꉱꈐꅪꀀꅉ,
ꅪꁧꇈꉈꆏ,
ꀉꉌꈩꅉꐛꇈꃲ。
ꑌꂾꅪꑌꅉ,
ꅪꁧꇈꉈꆏ,
ꀉꍸꈩꅉꐛꇈꃲ。
ꈵꃴꅪꈩꅉ,
ꅪꁧꇈꉈꆏ,
ꈌꀞꄇꑴꐹꅉꐛꇈꃲ。
ꐷꈭꅪꐂꅉ,
ꅪꁧꇈꉈꆏ,
ꃢꁮꑷꊭꈩꅉꐛꇈꃲ。
ꑳꉎꁧꐙꁦꌕꂷ,
ꋍꂷꑿꉘꅉ,
ꋍꂷꈾꏿꅉ,
ꋍꂷꅪꑌꅉ;
ꅪꁧꇈꉈꆏ,
ꊸꑋꆲꋒꄚꇊꃲ,
ꉩꑍꉒꆉꂃꇈꃲ,
ꐛꑍꉐꌦꌵꇊꃲ。
ꑳꐮꐦꐛꐦꌕꂷ,
ꋍꂷꍯꊪꁍ,
ꋍꂷꃢꆫꁍ,
ꋍꂷꅪꈩꁍ;
ꅪꁧꇈꉈꆏ,
ꋅꀑꆲꏂꃨꇊꃲ,
ꑋꀑꀠꃀꇖꇊꃲ。
ꑳꅶꏦꃴꅪꈴꅉ,
ꅪꁧꇈꉈꆏ,
ꍀꇁꈳꏦꐛꇈꃲ。
ꑳꊂꒉꀕꅪꋌꅉ,
ꅪꁧꇈꉈꆏ,
ꉜꏂꆗꅉꐛꇈꃲ。
ꅔꐎꅪꂃꅪꈩꅉ,
ꅪꁧꇈꉈꆏ,
ꅔꊂꑌꑿꂾꐞꀕꇈꃲ,
ꅔꄩꏰꌺꇗꈭꀕꇈꃲ。

ꀉꂿꅩꌺꑌ,
ꅪꁧꇈꉈꆏ,
ꀉꂿꀀꐋꂸꊌꆹ,
ꑴꑆꎰꃀꀉꂿꀀꐋꃅꇈꃲ,
ꋋꑌꑴꑆꀀꅲꐭꂸꅱꑟꃲ。
ꀉꂿꑌꐉꂸꊌꆹ,
ꇢꇑꀉꍸꀉꂿꑌꐉꃅꇈꃲ,
ꋋꑌꇢꇑꑌꅲꄓꂸꅱꑟꃲ。
ꀉꂿꉆꐋꂸꊌꆹ,
ꑷꈯꌬꁧꀉꂿꉆꐋꃅꇈꃲ,
ꋋꑌꌷꁧꉆꅲꎼꂸꅱꑟꃲ。
ꀉꂿꊪꐉꂸꊌꆹ,
ꇣꏦꇇꀜꀉꂿꊪꐉꃅꇈꃲ,
ꋋꑌꇣꑐꇤꁦꐞꂸꄐꑟꃲ。

ꀉꂿꅩꌺꑠꍈꑌ,
ꀿꇁꃀꉂꆺꀕꂂꍈꄸ,
ꃺꇁꑌꉂꉙꀕꐙꍈꄸ,
ꃈꉂꑓꁴꑰꀕꇣꍈꄸ,
ꐋꇁꊇꉂꑖꈈꀕꍈꄸ。
ꅩꌺꀿꉂꇱꋓꍬꂿꑌ,
ꇱꋓꍬꀕꈤꇁꇐ,
ꅩꌺꀿꉂꈤꂸꉆꑟꃲ。
ꅩꌺꃀꉂꇁꄿꋖꂿꑌ,
ꇁꄿꋕꀕꈤꇁꇐ,
ꅩꌺꃀꉂꈤꂸꉆꑟꃲ,
ꅩꌺꎮꑍꅉ!

ꀉꂿꅩꌺꑌ,
ꅔꐎꏰꌺꋵꀕꆏꇁꇐ,
ꅙꑭꎽꀮꊜꀕꆏꇁꇐ,
ꂷꑭꉑꀮꍺꀕꆏꇁꇐ,
ꅩꌺꀿꇁꃀꉂꆏꂸꉆꇊꃲ;
ꌩꄩꇪꀮꂾꀕꆏꇁꇐ,
ꌩꑭꁯꎓꂾꀕꆏꇁꇐ,
ꅩꌺꀿꇁꃀꉂꆏꂸꉆꇊꃲ,
ꅩꌺꎮꑍꅉ!

ꀉꂿꅩꌺꑌ,
ꁯꄸꀿꂸꁨ,
ꊖꆈꀿꃅꐥꇈꃲ;
ꁯꆮꃀꂸꁨ,
ꌧꏾꃀꃅꐥꇈꃲ。
ꅩꌺꌡꃅꐥꇬꆹ,
ꑍꆏꈧꌺꀿꃅꐥꇈꃲ,
ꌊꆏꆪꌺꃀꃅꐥꇈꃲ,
ꅩꌺꎮꑍꅉ!

ꀉꂿꅩꌺꑌ,
ꇙꀕꇫꐥꌠ,
ꀉꂿꂸꉂꌠꂸꐥ,
ꁯꄸꀉꂿꉂ,
ꀝꆽꀛꆽꉂ;
ꁯꆮꀉꂿꉂ,
ꅏꁏꅐꆗꉂ;
ꁯꎓꀉꂿꉂ,
ꌩꃴꎑꄉꉂ;
ꐛꑿꀉꂿꉂ,
ꃪꃹꅑꄉꉂ;
ꃢꁮꀉꂿꉂ,
ꑇꇖꑅꇖꉂ;
ꑷꊭꀉꂿꉂ,
ꊫꑻꊨꑻꉂ;
ꑾꌺꀉꂿꉂ,
ꂳꄹꌔꇬꊛꃅꉂ;
ꃆꌺꀉꂿꉂ,
ꈜꅪꆲꏂꄓꃅꉂ;
ꇂꇤꀉꂿꉂ,
ꃪꄧꇐꂃꄓꃅꉂ;
ꅩꌺꀉꂿꉂ,
ꑍꇁꌊꇖꏿꃅꉂꇈꃲ,
ꑓꁴꋙꊰꋠꃅꉂꇈꃲ。
ꀉꂿꌩꃴꐥ,
ꅩꌺꌩꃴꉂꇈꃲ;
ꀉꂿꃪꃹꐥ,
ꅩꌺꃪꃹꉂꇈꃲ。
ꆺꑳꀉꂿꂸꎺꄿꑴꇬ,
ꁦꀑꎺꁧꂾꆏꎺꇁꃲ;
ꆺꑳꀉꂿꂸꉂꄿꑴꇬ,
ꇉꅶꉃꏂꂾꆏꉂꇁꃲ,
ꅩꌺꎮꑍꅉ!

ꀉꂿꅩꌺꑌ,
ꀿꄷꃀꄷꆹ,
ꁦꀑꉒꏂꉬ,
ꉒꏣꑓꂿꑌ,
ꉒꐰꑓꂸꂿ,
ꉫꑌꐰꆹꇐ,
ꂸꉬꐰꆹꇐ;
ꋅꀑꃰꐎꉬ,
ꃰꐛꑓꂿꑌ,
ꃰꐯꑓꂸꂿ,
ꉫꑌꐯꆹꇐ,
ꂸꉬꐯꆹꇐ;
ꂸꃃꁰꇷꆴꌠꉬ,
ꃱꏾꏮꏂꆴꌠꉬ,
ꉫꑌꆴꆹꇐ,
ꂸꉬꆴꆹꇐ。
ꀿꄷꃀꄷꆹ,
ꇌꃀꉻꇬꉆ,
ꑍꉆꉖꂸꉆ;
ꌩꃀꃪꄧꋦ,
ꉒꋦꎸꂸꋦ;
ꊿꂾꀁꇬꑌ,
ꈎꑌꆪꂸꑌ;
ꉫꑌꈤꆹꇐ,
ꂸꉬꈤꆹꇐꇈꃲ。
ꅩꌺꎮꑍꅉ!

ꀉꂿꅩꌺꑌ,
ꅩꌺꌡꃅꐥꇬꆹ,
ꋍꑍꌔꎴꉩꇬꑌ,
ꀉꂿꋌꂸꈨ;
ꌕꑍꋍꐚꋠꇬꑌ,
ꀉꂿꋌꂸꐚ;
ꌕꈎꋍꃢꈚꇬꑌ,
ꀉꂿꋌꂸꐚꇈꃲ。
ꀉꂿꅩꌺꑌ,
ꊨꊭꉙꁊꆏꅏꋯ,
ꅩꌺꉌꎭꆏꆊꈤ。
ꅩꌺꌡꃅꐥꇬꆹ,
ꋍꏯꉪꇈꁭꅐꎭ,
ꋙꋠꋌꂸꐛꇈꃲ;
ꋍꏯꉪꇈꁮꐚꎭ,
ꒉꅝꆊꂸꐛꇈꃲ,
ꅩꌺꎮꑍꅉ!

ꀉꂿꅩꌺꑌ,
ꌩꋦꆸꈈꋦꌠꎭ,
ꆀꆳꇀꑌꎟꌠꎭ,
ꎰꆳꇀꑌꎟꌠꎭ。
ꏜꋦꈛꁧꋦꌠꎭ,
ꋍꑍꌕꈭꌃꌠꎭ,
ꋍꑍꌕꃢꄔꌠꎭ。
ꊨꊭꈛꁧꈌꌠꎭ,
ꋍꑍꌕꈭꄓꌠꎭ,
ꋍꑍꌔꈌꐆꌠꎭ。
ꅪꐙꈞꆈꐛꌠꎭ,
ꈞꆈꅇꈨꇁꌠꎭ,
ꁁꈨꁁꂸꈨꌠꎭ;
ꋍꑍꌕꅇꈨꌠꎭ,
ꋍꑍꌔꎴꉩꌠꎭꇈꃲ,
ꅩꌺꎮꑍꅉ!

ꀉꂿꅩꌺꑌ,
ꀃꑍꋍꄮꆏ,
ꀃꉎꀿꂸꑌ,
ꌕꅇꀀꆹꑟꇈꃲ;
ꀃꐮꑌꂸꉆ,
ꊪꑭꀀꆹꑟꇈꃲ。
ꅩꌺꈎꇖꆪꇖꏽ,
ꑍꇖꉖꇖꏽꇊꃲ,
ꅩꌺꎮꑍꅉ!

ꀉꂿꅩꌺꑌ,
ꀃꀿꀁꇨꆹ,
ꈌꇨꉌꂸꇨ;
ꌡꀿꀁꇨꆹ,
ꈌꇨꉌꇨꊨꇊꃲ。
ꅩꌺꌡꃅꐥꇬꆹ,
ꋙꋠꌡꇇꉜꁧꃲ,
ꒉꅝꌡꈌꉜꁧꃲ,
ꃢꈚꌡꑓꉜꁧꃲ。
ꌿꂷꎭꇬꐊ,
ꌿꊏꎬꑓꊴꇈꃲ;
ꍶꂷꑿꇬꐊ,
ꍶꉻꑾꑓꊴꇈꃲ。
ꁮꐥꉷꃅꅐ,
ꏜꋠꐉꂸꊌ,
ꋍꇬꂾꐞꀕꇈꃲ;
ꅪꐥꌡꃅꅐ,
ꉉꈿꐋꂸꊌ,
ꋍꇬꇖꈭꀕꇈꃲ,
ꅩꌺꎮꑍꅉ!

ꀉꂿꅩꌺꑌ,
ꋚꇁꒈꄸꆹ,
ꑍꄸꉖꂸꄸ;
ꃢꇁꈚꄸꆹ,
ꈎꄸꆪꂸꄸ;
ꃆꇁꒆꄸꆹ,
ꍂꇊꉹꅉꀕꇈꃲ。
ꁍꇁꑖꄸꆹ,
ꇌꃀꉈꅛꊐ;
ꁭꇁꂥꄸꆹ,
ꅩꌺꉈꅛꊐꇈꃲ,
ꅩꌺꎮꑍꅉ!

ꀉꂿꅩꌺꑌ,
ꈚꃀꎭꅍꐛ,
ꐛꏾꐛꂸꏾ;
ꎭꃀꈚꅍꐛ,
ꐛꌒꐛꂸꌒ。
ꅩꌺꌡꃅꐥꇬꆹ,
ꈋꆹꎧꏁꎧꐞꊪ,
ꅩꌺꈌꁉꋌꂸꅝ;
ꇇꆹꁮꑟꁁꑟꊭ,
ꅩꌺꇇꎇꋌꂸꈻ;
ꊫꇵꏦꍠꄅꑲꑌ,
ꅩꌺꑓꏮꋌꂸꉜ;
ꐎꇁꏁꈤꀀꑲꑌ,
ꅩꌺꋌꂸꏾ;
ꐎꏂꂻꈤꏽꑲꑌ,
ꅩꌺꋌꂸꏽ;
ꆿꍯꑮꁍꊨꑲꑌ,
ꅩꌺꋌꂸꁯ;
ꑌꑿꄄꆈꐛꑲꑌ,
ꅩꌺꋌꂸꁯ。
ꌡꌺꆞꑭꊖꇤꄔꑌꋍꈁꌒ,
ꏂꃴꏂꆈꄄꑌꋍꈁꌒ,
ꃀꆏꉒꐎꄓꑌꋍꈁꌒ,
ꏲꄣꃅꏸꋥꑌꋍꈁꌒ,
ꋩꃅꉘꁇꁉꑌꋍꈁꌒ。
ꃅꐛꊀꄮꇀꂷꐥꇈꃲ,
ꊿꐙꊾꄮꇀꂷꐥꇈꃲ。
ꀉꂿꅩꌺꑌ,
ꎷꈌꉌꈪꑌ,
ꇇꋌꒉꂸꅝ;
ꎭꌺꉌꈪꑌ,
ꈚꅍꋚꂸꒌ。

ꀉꂿꅩꌺꑌ,
ꅩꌺꉂꃅꉂꌠꆹ,
ꃅꇀꊸꌠꈧꐊꃅꈬꌬꇁꑟ,
ꎔꇁꃨꌠꆧꐊꁧꎐꅐꇁꑟ,
ꌂꇀꑷꌠꁮꐊꈞꆈꃹꁧꑟ;
ꃅꇀꈄꌠꉒꐊꁦꈌꏣꇁꑟ,
ꊪꇀꏦꌠꏷꐊꃅꌋꎵꇁꑟ;
ꀂꀱꀃꃅꑟꁧꑟ,
ꀋꆀꁧꑭꀿꇁꃀꐮꑌꁧꑟ,
ꃺꇁꑌꐊꀋꆀꁧꀐꆫꁧꑟ,
ꐋꇁꊈꐊꀋꆀꒉꃴꈩꁧꑟ。
ꅩꌺꉂꃅꉂꌠꆹ,
ꋍꑍꌕꃢꂾꑌꈜꀕꉂ;
ꅩꌺꌂꃅꌂꌠꆹ,
ꌕꈎꋍꃢꂾꑌꈜꀕꌂꇈꃲ。

ꀉꂿꅩꌺꑌ,
ꅩꌺꉌꃀꉪꅉꐛꉆꆏ,
ꋚꇁꒉꎔꀋꁧꀉꂿꍈꂿꉂ,
ꃢꇁꈚꎔꃺꇁꑌꎔꇢꂿꉂ;
ꎧꏁꎧꐞꀋꈘꏡꂿꉂ,
ꈌꆹꂿꉘꈁꊛꏿꂿꉂ。
ꅇꆹꀎꋏꅲꂿꉂ,
ꀋꌧꀿꃀꅲꂿꉂ,
ꀋꂿꃺꑌꅲꂿꉂ,
ꀋꇮꐋꀨꅲꂿꉂ,
ꀋꀺꊈꌐꅲꂿꉂ,
ꀋꑳꏣꑟꅲꂿꉂ。
ꀃꑍꋍꄮꆏ,
ꉪꑌꀈꈥꉪꑟꃲ。
ꑷꁱꐞꇬꂄꁧꃲ,
ꑲꅉꐦꇬꅑꁧꃲ;
ꅩꌺꉌꃀꁦꀑꉪ,
ꐰꇑꁧꑭꊰꇈꃲ,
ꅩꌺꎮꑍꅉ!

ꀉꂿꅩꌺꑌ,
ꅩꌺꈍꃅꂯ!
ꒉꉫꆹꀕꇫꒉꌠ,
ꆿꏼꒊꊰꄤꒉꑟ,
ꇓꁬꈬꊐꊯꆏꎭꇈꃲ。
ꌩꉫꆹꀕꇫꋦꌠ,
ꋓꃱꉘꁌꄤꋦꑟ,
ꀐꆹꐻꇁꉈꒃꈣꆏꎭ,
ꐧꆹꆳꅥꐓꆏꎭꇈꃲ。
ꇐꂃꇫꂃꌠ,
ꋓꃱꃪꇬꄤꂃꑟ,
ꂃꇊꃪꃹꊐꆏꎭ,
ꊰꇊꇓꇤꄚꆏꎭꇈꃲ。
ꊿꐥꇫꐥꌠ,
ꀉꂿꅩꌺꄤꐥꑟ,
ꅩꌺꎮꑍꅉ!

ꀉꂿꅩꌺꑌ,
ꅪꐥꅩꎭꏿꇈꃲ。
ꃅꐬꑳꃅꀀꅗꃲ,
ꁮꏂꀀꐋꃅꅗꃲ,
ꀌꀠꑌꐉꃅꅗꃲ,
ꄚꌧꃅꀕꋩꅗꃲ。
ꋋꑌꎺꇨꁦꀑꋦ,
ꎺꐧꐔꉆꑌ,
ꎺꐴꍹꂸꉆꑟꉬ;
ꅩꎭꁭꂥꊪ,
ꅩꀑꈤꉆꑌ,
ꅩꉌꊰꂸꉆꑟꉬ。

ꀉꂿꅩꌺꑌ,
ꑳꉎꈜꐎꈜꌔꏢ,
ꅩꌺꍬꂿꈛꏢꇬꂸꐊ,
ꑳꐮꈛꆈꈜꌔꏢ,
ꅩꌺꍬꂿꈛꏢꇬꂸꐊ;
ꑳꊂꈜꏂꈜꌔꏢ,
ꅩꌺꍬꂿꈛꏢꇬꂸꐊ。
ꅩꌺꊸꑋꄂꐊꐺꂯꑌ,
ꄁꈘꇖꃱꅞꁧꃲ;
ꉩꑍꉒꐊꐺꂯꑌ,
ꉒꇔꃅꈬꃹꁧꃲ。

ꀉꂿꅩꌺꑌ,
ꏣꒃꆹꅑꌦꂯꑌ,
ꏣꇤꆼꁠꅞꎼꏦ;
ꅋꒃꈌꊎꌦꂯꑌ,
ꅋꁧꉘꇕꇗꎼꏦ;
ꈭꇁꈜꈢꌦꂯꑌ,
ꍀꇁꈐꏿꅘꁧꇂꃴꌦꎼꏦ。
ꀒꇁꁮꅍꌦꂯꑌ,
ꃈꎔꅪꊂꁠꎼꏦ;
ꊁꇁꀿꅍꌦꂯꑌ,
ꎆꎔꅪꊂꁠꎼꏦ。
ꌩꋦꃅꏪꀕ,
ꅩꌺꌦꂿꌨꁧꐉꀕꎼ?
ꃪꐛꅩꑳꀕ,
ꅩꌺꌦꂿꃪꂷꐉꀕꎼ?
ꒉꀕꆈꃃꃆ,
ꅩꌺꌦꂿꒈꂡꐉꀕꎼ?

ꀉꂿꅩꌺꑌ,
ꅩꌺꐥꏡꈘꆏꎭꏡꈤꎼꑟ,
ꅩꌺꇭꀧꌥꆏꉌꃀꑍꎼꑟ,
ꅩꌺꉌꃀꑍꆏꉪꏣꈘꎼꑟ!

ꇁꀦ： ꆀꉙꊅ ꁰꄻꌠ： beleys 　｜　 ꄜꃑꌠ：

ꂴꁬꌠ：ꐭꌠꉜꄡꄸ ꊁꁬꌠ：《ꀉꂿꅩꌺ》(ꇖ)

ꎙꋧ

ꉪꊇꃆꂮ　|　ꃅꌐ　|　ꊅꍈꃄꁱ